Olembiwa na Yohani
8 12 Vanduli viwa Yesu ooawandela ira: “Miyo ndili wala wailambo. Uliwetene ondi-arela miyo kanaza aenda mudima, koma unoza akaena wala wa moyo.” 13 Eno Afarisi koomuwandela Yesu ira: “Weyo unovipangela umboni wekave koma umbonawo ngonama.” 14 Yesu oosomeda ira: “Ngakale ira ndinavipangela umboni mekave, umbonanga ngoona, chifukwa ndinoiziwa wewo ndakumele miyo na wewo ndinadowa miyo. Koma nyo kamunaiziwa wewo ndakumele miyo koma teto wewo ndinadowa miyo. 15 Nyo munoweluza volandela mwemo muthu unaoneela liye unde.* Koma miyo kandinaweluza muthu uliwetene. 16 Koma ndafuna muweluza muthu, ndinomuweluza mwachilungamo, chifukwa kandinaweluza mekave koma miyo limo-i na Babanga unoyo andirumile ninaweluzela limo-i. 17 Koma teto mu Ilamulo inyu koolembamo ira: ‘Umboni wa athu ambin’li ngodalileya.’ 18 Miyo vamekave ndinovipangela umboni moi Babanga unoyo andirumile unondipangela teto umboni.” 19 Ndiye aluwa koomufuka ira: “Kodi Babawo uli waani?” Yesu oowasomeda ira: “Nyo kamunandiiziwa koma teto kamunamuiziwa Babanga. Aakale ira mundiiziwa, moomuiziwa teto Babanga.” 20 Liye aongile mawu anala angali vakwikwi na mabokosi a vyopeleka vevo afunji-a liye mukachisi. Koma kalivo unoyo amu-indile chifukwa thawae yali yaanafiye.
21 Eno liye ooawandela teto ira: “Miyo ndinodowa moi munoza mundisaelesaele, koma munoza mukhwe mwangali ochimwa. Wewo ndinadowa miyo nyo kamunawande fiyawo.” 22 Ndiye Ayudayo koowambeela onga ira: “Kodi unafuna aviphe? Nanga chifukwa n’ni unaonga ira, ‘Wewo ndinadowa miyo nyo kamunawande fiyawo?’” 23 Liye oopitiliza awandela ira: “Nyo muli okumela vailambo yavati vano koma miyo ndili okumela udimu. Nyo muli okumela muilambwela koma miyo kandili okumela muilambwela. 24 Mbaona ndiuwandelileni ira: Munoza mukhwe mwangali ochimwa. Chifukwa akala kamunaroromela ira unoyo mwamudedi-eda nyo ngu miyo, munoza mukhwe mwangali ochimwa.” 25 Eno aluwa koowambeela mufuka ira: “Kodi uli mbaani?” Yesu oowasomeda ira: “Chifukwa n’ni ndinaononga thawanga onganga na nyo? 26 Miyo ndikaana vyongo vinjinji vyoi ndionge vyokuza nyo nopeleka iweluzo. Moi unoyo andirumile unoonga vyoona, moi vyevyo ndavwile miyo wa liye pivyevyo ndinavionga miyo muilambwela.” 27 Aluwa katazindikilile ira liye aonga vyokuza Babae. 28 Vanduli viwa Yesu aongile ira: “Mwaza mumupachika Mwana wa muthu vatengo, munoza muiziwe ira unoyo mwamudedi-eda nyo ngu miyo koma teto ira kandinapanga iliyetene mokeda ganiza mekave. Koma vyevyo ndinaonga miyo vinokala vyogwilizana ndendende na vyevyo Babanga andifunji-ile liye. 29 Moi unoyo andirumile uli na miyo. Liye kandi-iile mekave chifukwa ndinopanga vyongo vyevyo vinamusangalasa thawi detene.” 30 Angaongile vyevi, athu anjinji koowambeela muroromela.
31 Ndiye Yesu oopitiliza awandela Ayuda anayo kamuroromelayo ira: “Mwapitiliza arela mawanga, munotonyi-eda ira muli ofunjedanga. 32 Munoza muiziwe choonadi moi choonadiyo inoza iumasuleni.” 33 Aluwa koomusomeda ira: “Iyo nili a-ima a Aburahamu moi kaninakalevo akapolo a muthu. Ndiye chifukwa n’ni unaonga ira, ‘Ninoza nimasuliwe’?” 34 Yesu oowasomeda ira: “Ndithu ndinaauwandelani, muthu uliwetene unoyo unapanga chimo ngu kapolo wa chimo. 35 Koma teto kapolo kanakala m’mba mwa mbwiyae mpakana walewale koma mwana ngunoyo unakalamo mpakana walewale. 36 Eno akala Mwana uumasulileni, munoza mukale omasuwa. 37 Ndinoiziwa ira nyo muli a-ima a Aburahamu. Koma munafuna mundiphe chifukwa kamunasomedela vyevyo ndinafunji-a miyo. 38 Miyo ndinoonga vyevyo ndavionile miyo vevo ndali miyo na Babanga, koma nyo munopanga vyongo vyevyo muvwile nyo wa babinyu.” 39 Aluwa koomusomeda ira: “Babi-u ngu Aburahamu.” Yesu ooawandela ira: “Aakale ira muli a-ima a Aburahamu, mwerenga panga vyevyo Aburahamu apanga liye. 40 Koma sopano munafuna mundiphe miyo, muthu unoyo ndiuwandelileni choonadi ineyo ndaivwile miyo wa Mulungu. Aburahamu kaapangile vyevi. 41 Nyo munapanga chito da babinyu.” Aluwa koomusomeda ira: “Iyo kanabaliwe chifukwa ya iwerewere,* nikaana Babi-u m’mo-i eka, Mulungu.”
42 Yesu ooawandela ira: “Aakale ira Mulungu ngu Babinyu, moondiomeliwana, chifukwa miyo ndakumede wa Mulungu moi ndili vano. Kandazide mofuna mwanga koma liye ngunoyo andirumile. 43 Chifukwa n’ni kamunavwechecha vyevyo ndinaonga miyo? Chifukwa yoi kamunafuna vuruwana mawanga. 44 Nyo muli okumela wa babinyu Mdjelekezi, moi munofuna panga vyevyo babinyu unafuna liye. Liye ngopha athu kumela vowambeela moi kaapitilizile kala mu choonadi, chifukwa mwa liye kamuli choonadi. Aonganga vyonama, unoonga mogwilizana na makalelwae, chifukwa liye ngonama koma teto ngu baba wa vyonama. 45 Koma voi miyo ndinauwandelani vyoona, kamunandiroromela. 46 Mbaani wa nyo unoyo unapeleke umboni otonyi-eda ira ndipanga chimo? Akala ndinaonga vyoona, chifukwa n’ni kamunandiroromela? 47 Okumela wa Mulungu unovuruwana mawu a Mulungu. Koma nyo kamunavuruwana, chifukwa yoi kamuli okumela wa Mulungu.”
48 Ayudayo koomusomeda ira: “Kodi naonganga ira, ‘Weyo uli Msamariya moi ukaana iwanda’ ninaanama?” 49 Yesu oowasomeda ira: “Miyo kandin’na iwanda, koma ndinamulemekeza Babanga moi nyo munaandinyoza. 50 Koma miyo kandinaviva-a mekave ulemelelo. Mulungu ngunoyo unafuna ira ndilemekeziwe moi liye ngoweluza. 51 Ndithu ndinaauwandelani, akala muthu una-arela mawanga, kanaza akhwa.” 52 Ayudayo kaongile ira: “Sopano niiziwa ira ukaana iwanda. Aburahamu ookhwa, moi anamaongela teto kookhwa. Koma weyo unaonga ira, ‘Akala muthu una-arela mawanga kanaza akhwa.’ 53 Kodi weyo uli mulukulu mukwaranya babi-u Aburahamu? Liye ookhwa, anamaongela teto kookhwa. Ndiye weyo unaviona ngati mbaani?” 54 Yesu oowasomeda ira: “Akala ndinavilemekeza mekave, ulemelelwanga kun’na chito. Babanga unoyo munamuonga nyo ira ngu Mulungwinyu, ngunoyo unandilemekeza. 55 Nyo kamunamuiziwa, koma miyo ndinomuiziwa. Akala ndinaonge ira kandinamuiziwa ndinokoza kala onama ngati nyo. Koma ndinomuiziwa moi ndino-arela mawae. 56 Babinyu Aburahamu oosangalala vinjinji chifukwa oodedi-eda dambo lelo ndinaze miyo, teto ooliona moi oosangalala.” 57 Vanduli viwa Ayudayo kaongile ira: “Weyo kunakwakwani-e chaka 50, ndiye unaonga ira oomuona Aburahamu?” 58 Yesu ooawandela ira: “Ndithu ndinaauwandelani, Aburahamu aanabaliwe, miyo ndali ndangaliwo wale.” 59 Eno aluwa koododa mabwe ira kamuvazena, koma Yesu oovitaala, vanduli viwa ookumamo mukachisimo.