Olembiwa na Yohani
2 Va dambo lanaralu, wu Kana wawu Galileya ookala phwando la ukwati moi m’mae wa Yesu ali teto wewo. 2 Yesu limo-i na ofunjedae kooitaniwa teto uphwando la ukwatilo.
3 Vinyu angamalile, m’mae wa Yesu oomuwandela ira: “Vinyu uwamalela.” 4 Koma Yesu oomuwandela m’maeyo ira: “Ndiye iyo vinanikuza avi m’mani?* Thawanga kinafiye.” 5 M’maeyo ooawandela athu anayo kagawa vinyuyo ira: “Mupange iliyetene ineyo unauwandeleni liye.” 6 Vamalovo vookala misuwo dopangiwa na mabwe dokwakwana 6, mogwilizana na malamulo a Ayuda okuza viweli-a. Suwo uliwetene wali wa malita otamangela 44 mpakana 66.* 7 Yesu ooawandela ira: “Zaali-ani misuwodi na ma-inje.” Aluwa koodizaali-a mpakana vamulomo. 8 Ndiye liye ooawandela ira: “Rungamoni vang’ono mudowe mwamuva-e unoyo unaing’anela phwandoli.” Aluwa koodowa muva-a. 9 Oing’anela phwandoyo oolawa ma-inje anayo katanduchiwe vinyu. Ndiye voi kaaiziwile wewo vinyuyo akumeleathu (ngakale ira athu ogawa vinyu anayo karungile ma-injayo kooiziwa), oing’anela phwandoyo oomuitana malimba tela 10 nomuwandela ira: “Muthu uliwetene unokumi-a vinyu wapama yowambeela moi athu kalezela, pavevo unakumi-a liye vinyu o-ooma kwenikweni. Koma weyo usunga vinyu wapama mpakana vano.” 11 Yesu oopanga vyevi wu Kana wawu Galileya monga izindikilwae yowambeela. Liye oowoni-a ulemelelwae moi ofunjedae koowambeela muroromela.
12 Vyevi vingaireile, Yesu limo-i na m’mae, achimwenae na ofunjedae koodowa wu Kaperenao, koma katakalilewo malambo anjinji.
13 Sopano Pasika wa Ayuda ali angaandamele, eno Yesu oomaruwa dowa wu Yelusalemu. 14 Angavolowile mukachisi oofwanya athu oguli-a ng’ombe, khosa na kangaiwa koma teto athu ochenja ndalama kangagaratile m’mipando diwa. 15 Eno oopanga ikwapu ya migo-i notamangi-a athu etene anayo kan’na khosa koma teto ng’ombe mukachisi. Ookutula ndalama da athu ochenja ndalama nogubuducha matebulwiwa. 16 Ndiye ooawandela oguli-a kangaiwayo ira: “Chosani vyongovi muno! Mu-iye tanducha nyumba ya Babanga kala nyumba yoguli-elamo malonda!”* 17 Ofunjedae kooumbuwela vyevyo Malemba kanaongaathu ira: “Vipeleka wanga va nyumbinyu unaza ukala ngati mulo unoyo unakara m’murimani mwanga.”
18 Koma Ayudayo kaongile ira: “Unanioni-a izindikilo yoi avi yotonyi-eda ira ukaana ulamulilo opangela vyongo vyevi?” 19 Yesu oowasomeda ira: “Gwi-ani kachisila moi miyo ndinoza ndim’mange wa malambo maralu.” 20 Ndiye Ayudayo kaongile ira: “Kachisi unola amangiwe wachaka 46, ndiye weyo unaonga ira unoza um’mange wa malambo maralu?” 21 Koma kachisi unoyo amuongana liye lali thuthu lae. 22 Eno angavenyi-iwe wa okhwa, ofunjedae kooumbuwela ira liye aongana vyevi moi koororomela malemba koma teto mawu anayo Yesu aongile liye.
23 Ndiye angali wu Yelusalemu vaikondwelelo ya Pasika, athu anjinji koomuroromela* kangaonile vizindikilo vyevyo apanga liye. 24 Koma Yesu kaaroromele kwenikweni chifukwa oowaiziwa pama etene anayo, 25 moi kavafuneya muthu m’mo-iwa ira amufotokozele vyokuza athwayo, chifukwa liye ooiziwa vyevyo vili m’murimani mwa muthu.