KHANI YOFUNJEDA 18
Nilimbi-anenga va Misonkano da Pingo
“Tiyemoni niganizelane . . . nilimbi-anenga.” — AHEB. 10:24, 25.
NYIMBO 88 Ndidziwitseni Njira Zanu
VYEVYO NINAFUNJEDE IYOa
1. Chifukwa n’ni ninasomedecha vamisonkano?
CHIFUKWA n’ni ninadowa umisonkano da pingo? Chifukwa ilukulu chotamanda Yehova. (Sal. 26:12; 111:1) Ninadowecha umisonkano na yolinga yoi nilimbikisanenga muthawi yovutela. (1 Ates. 5:11) Naimecha muwono nosomeda, ninokwakwaneli-eda vyolinga viili vyevi.
2. Kodi chithawi iivi vevo ninakaana iyo mwayi wosomeda vamisonkano di-u?
2 Mulungu uliwetene ninokaana mwayi wosomeda vamisonkano di-u. Mofwanafwani-a, umapeto wamulungu ninokoza someda va Phunzilo la Sanja ya Olonda. Vamisonkano damuwari mwamulungu, ninokoza someda mbali ya Makundo Okami- a, Phunzilo la Baibulo la Pingo koma teto mbali dimo-i dofuneela kambirana.
3. Kodi ninagumane na mavuto aavi, nanga lemba la Aheberi 10:24,25, linanikami-e avi?
3 Etene iyene ninafuneela tamanda Yehova koma teto limbi-a Akiristu afwi-u. Koma vakhani yopeleka ndemanga, ninokoza gumanana mavuto ambin’li: (1) Ninokoza ovanga someda. (2) Iyo podi funechechanga ira nisomede koma oova-iwa mwayi ira nisomede n’nga mwemo nafunela iyo. Ndiye kodi ninapange avi vamavuto anala? Ninofwanya yosomeda mukalata ineyo namarumiwa Paulo alembele liye Aheberi. Vosambaula funeya wosonkana, liye aongile ira niganizelenga vinjinji ‘vyolimbi-ana.’ (Welengani Aheberi 10:24, 25.) Nazindikila ira amo-iwa kanokoza limbi-iwa masiki na ndemanga yachidule yotonyi-eda iroromelo yi-u, kaninaove someda. Teto masiki ira kaninava-iwe mwayi woi nisomede vakwikwivakwikwi, ninokala osangalala ira amo-iwa mupingo kookaana mwayi opeleka ndemanga. — 1 Pe. 3:8.
4. Kodi ninakambirana makundo maralu aavi mukhanila?
4 Mukhanila, yowambeela ninokambirana vyevyo ninaire iyo ira nilimbi-anenga mupingo ung’onong’ono, mwemo kamunakala athu anjinji osomeda. Era eno ninokambirana mwemo ninairele iyo ira nilimbikisanenga mupingo ulukulu, mwemo athu anjinji kanaimeli-a miwono ira kasomede. Vogomi-eda ninokambirana mwemo ninairele iyo ira vyosomeda vi-u vikalenga vyolimbikisa wa amo-iwa.
NILIMBI-ANENGA MUPINGO UNG’ONONG’ONO
5. Kodi ninalimbi-ane avi akala nisonkanile oyeva?
5 Mupingo ung’onong’ono kapena kalabu kavinakala athu anjinji oimeli-a miwono ira kasomede. Thawi dimo-i oiri-a phunzilo unafuneela dedi-edela wathawi ira muthu m’mo-i aimeche muwono ira asomede. Era eno misonkano kadinasangalasa kwenikweni moi vyevi kavinakala vyolimbikisa. Ndiye kodi munafuneela ira n’ni? Mukalenga ofunechecha imeli-a muwono vakwikwivakwikwi. Mwairanga vyevyo munolimbi-a amo-iwa ira naaliwene kasomedenga vakwikwivakwikwi.
6-7. Kodi munayevi-e avi ova wewo munakaana nyo vakhani yopeleka ndemanga?
6 Koma bwanji akala munaova peleka ndemanga? Athu anjinji teto kanovivwa eno. Komave ira mulimbi-enga vinjinji abali na arongolinyu, bwanji oofwanya ndila dedo dinaukami-eni ira muyevi-e ova vakhani inela. Ndiye kodi munaire avi vyevi?
7 Munokoza fwanya makundo amo-i anayo kanaukami-eni mu Sanja da Olondab damundulimu. Mofwanafwani-a, mukozeelenga pama. (Miya. 21:5) Mwakozeela pama khaniyo, kavinakala vyorucha ira musomede. Koma teto ndemanga dinyu dikalenga dachidule. (Miya. 15:23; 17:27) Kamunaovenga vinjinji ira mupeleke ndemanga yachidule. Ndemanga yachidule, mwina teto yokaana chiganizo imo-i kapena viili, inokoza kala yo-orucha vwechecha wa abali na arongolinyu iyana na ndemanga yolapa yokaana makundo anjinji. Mwasomedanga mwachidule koma teto mawu enyuenyu, munotonyi-eda ira muikozeela pama koma teto muvwechecha vyevyo mufunjedile nyo.
8. Kodi Yehova unaona avi vyetene vyevyo ninayesayesa iyo viira?
8 Bwanji akala muyesedile arela amo-i mwamalangizwala koma munaona ira munanaovave peleka ndemanga maulendo men’li kapena poselavo? Kamukaikelenga ira Yehova unoyamikela ira munoyesayesa ira vyevyo munawande nyo. (Luk. 21:1-4) Koma ira vyevyo munawande nyo kunatapulela vipanikiza. (Afil. 4:5) Muonenga vyevyo munawande nyo kwakwani-a viira, muvi-elelenga yolinga yoi muviire teto mupepelenga ira kamuovenga. Munokoza ambeela na yolinga yoi mupelekenga ndemanga imo-i yachidule.
NILIMBI-ANENGA MUPINGO ULUKULU
9. Kodi ti vuto liivi lelo ninagumanena iyo mupingo ulukulu?
9 Akala mupingo mwinyu muli ofalisa anjinji munokoza gumanana vuto limo-iliwa. Mwina abali na arongola anjinji kanoomeliwa someda moi thawi dinjinji mwavenyi-a muwono katinautonyani. Mofwanafwani-a, murongola m’mo-iwa zinalaye Danielle, unosangalala peleka ndemanga vamisonkano.c Liye unaona ira inela chimbali yolambela waye, nandila yolimbikisela amo-i koma teto inomukami-a ira makundo aimbarimbari kagarateyenga m’murimani mwaye. Koma angatamele mupingo ulukulu kaava-iwa mwayi wosomeda vakwikwivakwikwi moi thawi dimo-i misonkano doomala oosomedavo. Liye eere: “Ndookumudwa vinjinji moi ndawona ira ndinanaponya mwayi umo-iwene ulukulu. Teto vyaireyanga moweli-edaweli-eda unowamba wona ira mwina oiri-oyo unapanga akomove.”
10. Kodi ninaire avi ira nikayena mwayi wosomeda vamisonkano?
10 Kodi moowambeela vivwavo monga mwemo avwela liye Danielle? Akala chi eno, mwina munokoza ganiza ira bola keda iya someda, kedanga vuruwana misonkanodo. Koma kamunafuneela iya yesayesa ira musomede vamisonkano. Ndiye kodi munaire avi? Munokoza ira pama kozeelanga ndemanga dingasidene vasonkano uliwetene. Eno akala kamutonyiwe ira musomede umaambeelelo wa phunzilo, munokoza kaanave mwayi wosomeda muwari mwamisonkanodo. Mwakozeelanga Phunzilo la Sanja ya Olonda, muganizelenga mwemo ndima iliyetene inagwilizanelaathu na muru wa khaniyo. Mwairanga vyevi munokoza kaana makundo amo-i oyi musomede vaphunzilo letenelelo. Mukozeelenga ira mwasomede va ndima dedo dinasambaula makundo odii-a aimbarimbari, oyi mborucha asambaula. (1 Akor. 2:10) Chifukwa n’ni? Chifukwa mwina vanokoza kala athu oyeva oimecha muwono ira kasomede vambali ineyo. Koma bwanji vanduli vo-arela malangizo anala vamisonkano dingasidene muona ira kamunava-iwa mwayi wosomeda? Misonkano da-anaambeele mumuwandelenga unoyo unairi-e phunzilolo yofuka ineyo munafuna nyo someda.
11. Kodi lemba la Afilipi 2:4 linanilimbikisa ira niirenga n’ni?
11 Welengani Afilipi 2:4. Mosogoleliwa, namarumiwa Paulo oolimbikisa Akiristu ira kaganizelenga vyofuna vya amo-iwa. Kodi nina-indi-ede avi chito malangizo anala vamisonkano? Niumbuwelenga ira mofwanafwana na iyo, amo-i teto kanofuna someda.
Monga mwemo ninapelekela iyo mwayi wa amo-iwa ira naaluwene kaongengavo nawaledanga, nilolenga amo-iwa teto peleka ndemanga vamisonkano (Onani ndima 12)
12. Kodi chi ndila yapama iivi eneyo ninalimbikisele iyo amo-i vamisonkano? (Onani teto ithuzithuzi.)
12 Kaganizelani vi: Vevo munawaleda nyo na afwinyu, kodi munakedecha wonga ekinyu oowava-avo mwayi woi kaongevo? Naari kamunaire vyevyo. Munofuna ira naaluwene teto kaongengavo chifukwa kanokoza ambeela ona ira munowanyalanyaza. Mofwanafwana na vyevi, vamisonkano ninofuna ira athu anjinji kapelekenga ndemanga. Teto imo-i mwandila dapama vinjinji dolimbikisela abali na arongoli-u kuwava-a mwayi woi kasambaule vyokuza iroromelo iwa. (1 Akor. 10:24) Tiyemoni nione mwemo ninairele iyo vyevi.
13. Kodi munaire avi ira muva-e athu anjinji mpata woi kasomede?
13 Mundila imo-i, ninokoza peleka ndemanga dachidule, dedo dinapeleke mpata wa amo-i ira kasomede. Andimuwa na ofalisa amo-iwa oiziwa vinjinji kanokoza peleka isazo vakhanila. Masiki yosomeda inyu yangali yokwiiva, mupewenga romola makundo anjinji. Akala munaromole makundo etene amundima, athu anjinji kanokoza sauwela yoi kasomedevo. Mofwanafwani-a, mundimela muromoliwa makundo meeli, anayo kupeleka ndemanga dachidule koma teto pewa sambaula makundo anjinji. Eno akala munakale owambeela peleka ndemanga vandimela, bwanji ookeda romola likundo limo-i loka?
Kodi chithawi iivi vamisonkano vevo ninasakule iyo ira kaniimeche muwono? (Onani ndima 14)f
14. Chin’ni inanikami-e iziwa ira ninafuneela imecha muwono vakwikwivakwikwi moi avi? (Onani teto ithuzithuzi.)
14 Muirenga vyongo mozindikila vofuna sakula ira musomede vakwikwivakwikwi. Moi avi? Naimeli-anga muwonwi-u vakwikwivakwikwi, oiri-oyo unokoza kakamizeya ira aniromole moweli-edaweli-eda masiki ira amo-iwa katisomedile. Vyevi vinokoza pangi-a ira athu amo-iwa ka-iye imeli-a muwono. — Nam. 3:7.
15. (a) Kodi ninafuneela ira n’ni akala kaniva-iwe mwayi wosomeda? (b) Kodi oiri-a phunzilo unatonyi-ede avi ira unoganizela uliwetene? (Onani bokosi loi, “Akala Munairi-a.”)
15 Ofalisa anjinji kaimecha muwono ira kasomede va phunzilo, kaninakayena mwayi woi nisomede vakwikwivakwikwi n’nga mwemo ninafunela iyo. Teto thawi dimo-i oiri-oyo kananitonye. Vyevi vinokoza nikumudwi-a komave kaninafuneela kumudwa akala kanitonyiwe. — Nam. 7:9.
16. Kodi ninalimbi-e avi amo-i anayo kapelekile ndemanga?
16 Akala kamukwakwani-ide peleka ndemanga maulendo angasene n’nga mwemo mwafunela nyo, bwanji ookeda vuruwana mwacheru amo-i kasomedanga na yolinga yoi muwayamikele vanduli vamisonkano? Abali na arongolinyu kanokoza limbikisiwa nowayamikelawinyu n’nga mwemo kalimbikisiweleathu na ndemanga dinyu. (Miya. 10:21) Yamikelana chindila eneyo ninalimbikiselana iyo.
NDILA DIMO-I DOLIMBIKISELANA
17. (a) Kodi makolo kanakami-e avi a-imiwa ira kakozeele ndemanga dofwanelela? (b) Mogwilizana na vidiyo, kodi mbamakundo 4 aavi, anayo kananikami-e nakozeelanga peleka ndemanga? (Onani mawu a mphedi.)
17 Kodi ti ndila dimo-i diivi dedo ninalimbikiselane iyo vamisonkano? Akala muli makolo mukami-enga a-iminyu kozeela ndemanga dogwilizana na usinkhwiwa. (Mat. 21:16) Thawi dimo-i vamisonkano vanofunjediwa khani dilukuludilukulu n’nga dokuza mavuto am’banja kapena makalelo amo-iwene. Komave vanokoza kala ndima imo-i kapena mbin’li doi mwana unokoza somedavo. Koma teto mukami-enga a-iminyu vwechecha chifukwa iwa katinatonyiwe thawi iliyetene eneyo kaimechileathu muwono. Asambaulela vyevi unokoza akami-a ira katikumudwenga, amo-iwa katonyiwa m’malo mwaaliwa. — 1 Tim. 6:18.d
18. Vopeleka ndemanga, kodi ninapewe avi iri-a amo-i ira kaganizelenga vinjinji vyokuza iyo? (Miyambo 27:2)
18 Etene iyene ninokoza kozeela ndemanga dedo dinalemekeze Yehova koma teto dinalimbikise Akiristu afwi-u. (Miya. 25:11) Masiki ira thawi dimo-i diwa ninosambaula mwachidule vyevyo vyaniireelevo, nipewenga wonga vinjinji vyokuza iyo. (Welengani Miyambo 27:2; 2 Akor. 10:18) M’malomwiwa, niyesayesenga ganizela vinjinji vyokuza Yehova, Mawaye koma teto athwaye monga gulu. (Chiv. 4:11) Komave thawi dimo-i yofuka ya ndima inokoza funeya ira nisambaule vyongo vyokuza iyo teto kai lakwa ira vyevyo. Isazo vakhanila pivyevyo ninaone iyo mundima yo-arelela.
19. (a) Kodi vyo-arelavo viwa vinakala vyoi avi naganizelanga amo-i nakala vamisonkano? (Aroma 1:11, 12) (b) Kodi nyo chin’ni inausangalasani vakhani yopeleka ndemanga vamisonkano?
19 Masiki ira kavali malamulo okuza mwemo ninafuneela iyo pelekela ndemanga, etene iyene ninokoza yesayesa ira ndemanga di-u dikalenga dolimbikisa. Vyevi vinatapulela ira thawi dimo-i ninokoza funeya ira nipelekenga ndemanga vakwikwivakwikwi. Kapena teto vinatapulela kala okhutira na mwayi wopeleka ndemanga onoyo ufwanyeile koma teto sangalala ira amo-iwa koofwanya mwayi wopeleka ndemanga. Naganizelanga teto vyofuna vya amo-i nakala vamisonkano, etene ‘ninolimbikisana.’ — Welengani Aroma 1:11, 12.
NYIMBO 93 Mudalitse Msonkhano Wathu
a Ninolimbikisana nasomedanga vamisonkano. Komave amo-iwa kanoova peleka ndemanga. Amo-i kanoomeliwa peleka ndemanga na yolinga yoi karomoliwenga vakwikwivakwikwi. Mulimwetene mwemo vinakaleleathu, kodi ninatonyi-ede avi ira ninoganizelana na yolinga yoi uliwetene alimbi-iwenga? N’nga kodi ninaire avi ira nipelekenga ndemanga dedo dinalimbi-e abali na arongoli-u va chikondi na chito dapama? Khanila inosambaula vyevi.
b Ira mufwanye makundo amo-iwa owonjedeleya, onani Nsanja ya Olonda ya January 2019 tsamba 8-13, koma teto ya September 1, 2003, tsamba 19-22.
c Zina lichenjiwa.
d Onani vidiyo va jw.org yoi Khalani Bwenzi la Yehova — Uzikonzekera Zimene Ukayankhe.
e Onani Nsanja ya Olonda ya July 15, 2013, tsamba 32, koma teto ya September 1, 2003, tsamba 21-22.
f MAWU OSAMBAULA ITHUZITHUZI : M’bali onoyo upelekile wale ndemangaye unava-a athu amo-i mwayi woi kasomedevo.