KHANI YOFUNJEDA 37
Niroromelenga Yehova Ngati Mwemo Samisoni Apangela Liye
“Yehova Mbwiye Mulukulu Okwaranya, chonde, ndiumbuweleni nondiva-a kopolo.” — OWEL. 16:28.
NYIMBO 30 Atate Wanga, Mulungu Wanga Ndiponso Bwenzi Langa
VYEVYO NINAFUNJEDE IYOa
1-2. Chifukwa n’ni ninafuneela funjeda khani ya Samisoni?
KODI chin’ni inazecha m’maganizo mwinyu mwavwa zina loi Samisoni? Mwina munoganizela vya muthu wakopolo vinjinji. Vyevyo pivyoona. Koma vathawi imo-iwa Samisoni oosakula vyongo molakweya, vyevyo vyamuzi-ede mavuto alukulu. Komave Yehova ooganizela vyongo vinjinji vyevyo Samisoni apangile liye vomutumikela mororomeleya moi oovilemba m’Baibulo ira vinikami-enga.
2 Yehova oomu-indi-eda chito Samisoni vopanga vyongo vyodabwi-a nayolinga yofuna kami-a Aizarayeli, anayo kali athwae. Vangavirile chaka dinjinji Samisoni angatatiile, Yehova oomusogolela namarumiwa Paulo ira alembe zina la Samisoni va gulu la athu anayo katonyi-ede iroromelo. (Aheb. 11:32-34) Isazo ya Samisoni inokoza nilimbikisa. Liye oororomela Yehova ngakale va thawi dorucha vinjinji. Tiyemoni nione vyevyo ninafunjede iyo wa Samisoni koma teto mwemo isazo yae inanilimbikiseleathu.
SAMISONI OOROROMELA YEHOVA
3. Kodi Samisoni ava-iwe utumiki woi avi?
3 Samisoni abaliwe vathawi ineyo Afilisiti kalamulelaathu koma teto pondeleza Aizarayeli. (Owel. 13:1) Ulamulilo wankhanza unola woopangi-a ira Aizarayeli kavuteyenga vinjinji. Yehova oomusakula Samisoni ira ‘aze akale vasogolo vovulumucha Izarayeli m’mandani mwa Afilisiti.’ (Owel. 13:5) Inela yali chito yorucha. Ira awande inda chito inela, Samisoni afuneela roromela Yehova.
Samisoni oororomela Yehova moi ali okozeya chenja. Liye oo-indi-eda chito yongo ineyo yafwanyeile ira akwakwaneli-ede yofuna ya Yehova (Onani ndima 4-5)
4. Kodi Yehova amukami-ile avi Samisoni ira avivulumuche wa Afilisiti? (Oweluza 15:14-16)
4 Kaganizelani isazo imo-iwa yotonyi-eda ira Samisoni oororomela Yehova koma teto mwemo Mulungu amukami-ele liye. Vathawi imo-iwa, gulu la asilikali a Afilisiti looza ira limu-inde Samisoni wu Lehi. Mwina wewu wali wu Yuda. Athu a wu Yuda kookaana mantha moi kooganiza vyomupeleka Samisoni wa adanayo. Eno athu atundwae koomumanga na migo-i mbin’li disha nodowa mupeleka wa Afilisiti. (Owel. 15:9-13) Koma “zimu wa Yehova oowambeela inda chito” va Samisoni moi liye oophaza migo-ido. Angapangile eno “oofwanya likuva lititi la sagwada da bulu waphongo” moi oolidoda noli-indi-eda chito vopha Afilisiti okwakwana 1 000. — Welengani Oweluza 15:14-16.
5. Kodi indi-eda chito likuva la sagwada da bulu watonyi-ede avi ira Samisoni oororomela Yehova?
5 Chifukwa n’ni Samisoni a-indi-ede chito likuva la sagwada da bulu? Inela kayali ida ineyo athu ka-indi-edaathu chito vakondo. Pivyo-oira fuka ira Samisoni ooiziwa ira unokoza kwaranya vakondweyo chifukwa yororomela Yehova o-okala ida ineyo a-indi-ede liye chito. Muthu ororomeleya unola oo-indi-eda chito yongo ineyo yafwanyeile ira akwakwaneli-ede yolinga ya Yehova. Chifukwa yoi oororomela Yehova, Samisoni oodalisiwa moi ookwaranya vakondweyo.
6. Kodi ninafunjede n’ni wa Samisoni nava-iwa utumiki umo-iwene?
6 Yehova unokoza niva-a kopolo ira nikwakwani-e inda chito ngakale dedo dinaoneya ira ti dorucha. Mulungu unokoza panga vyevi mundila yodabwi-a. Kamukaikelenga ira Yehova unoyo amuva-ile kopolo Samisoni, unokoza ukami-ani nyo panga yofuna yae akala nanyen’ne munamuroromela.— Miya. 16:3.
7. Pelekani isazo yotonyi-eda ira ninafuneela roromela Yehova ira anisogolelenga?
7 Abali na arongola anjinji anayo kana-inda chito domangamanga mugulu la Yehova kanotonyi-eda ira kanomuroromela. Mundulimu, abali koolemba mapulani koma teto manga Nyumba da Umwene na malo amo-iwa. Koma vangavirile thawi, vafuneela chenja chifukwa yoenjedeleya wa athu mugulu la Yehova. Abali anayo kanasogolela mugulu li-u koomuvepa Yehova ira aasogolele moi kooshisha ndila disha, monga gula nyumba nodisakaeda. Robert, unoyo ukalile a-indanga chito domangamanga muvilambo vinjinji aongile ira: “Vowambeela kavyali vyokweya wa athu amo-iwa ira ka-arelenga ndila isha inela. Ndilela yali yo-iyana vinjinji na vyevyo nikalile iyo nipanganga wa chaka dinjinji. Koma abali koofunechecha chenja moi vinovaela oneya ira Yehova unanadalisa ndila isha inela.” Inela chi isazo imo-i yoka yotonyi-eda ira Yehova unosogolela athwae ira kakwakwaneli-ede yolinga yae. Etene iyene ninopanga pama vifukanga ira, ‘Kodi ndinolola ira Yehova andisogolelenga koma teto ndinokala okozeya chenja ira ndimutumikelenga mundila yofwanelela?’
SAMISONI OOROROMELA YEHOVA IRA AMUKAMI-ENGA
8. Kodi vathawi imo-iwa Samisoni apangile n’ni angan’na thona vinjinji?
8 Mwina munoumbuwela vyongo vimo-i vyodabwi-a vyevyo Samisoni apangile liye. Liye oopha phodogoma moi vanduli viwa oopha Afilisiti 30 mu mzinda wa Asikeloni. (Owel. 14:5, 6, 19) Samisoni ooiziwa ira kaawande panga vyongo ngati vyevi mo-okami-iwa na Yehova. Umboni wa vyevi waoneile vathawi imo-iwa vevo an’na liye thona vinjinji, vanduli vopha Afilisiti 1 000. Kodi liye apangile n’ni? M’malo moviroromela ira afwanye ma-inje ong’wa, oomuvepa Yehova ira amukami-e. — Owel. 15:18.
9. Kodi Yehova apangile n’ni Samisoni angamuvepile ira amukami-e? (Oweluza 15:19 na mawu a mphedi)
9 Yehova oosomeda yovepa ya Samisoni vopangi-a ira teya ikumi-e ma-inje. Samisoni angang’wile ma-injayo, “oofwanya kopolo nosisimuliwa.” (Welengani Oweluza 15:19 na mawu a mphedi.) Mwina ma-inje koopitilizave kuma vamalwayo wa chaka dinjinji, mpakana va thawi ineyo namaongela Samueli asogoleliwe liye lemba buku la Oweluza. Aizarayeli anayo kaonile ma-injala kooumbuwela ira Yehova ngororomeleya moi unokami-a atumikae ororomeleya va thawi ineyo kavuteileathu.
Samisoni oofwanya kopolo angang’wile ma-inje anayo Yehova amuva-ile liye. Na-iyene ninopanga pama na-indi-edanga chito vyongo vyevyo Yehova unaniva-a liye nayolinga yoi nipitilize kala ororomeleya wa liye (Onani ndima 10)
10. Kodi ninafuneela panga n’ni ira Yehova anikami-e? (Onani teto ithuzithuzi.)
10 Kaya nin’na luso loi avi kapena nipanga vinjinji votumikela Yehova, na-iyene ninafuneela roromela Yehova ira anikami-enga. Ninafuneela kala oviyevi-a nosomedelanga ira vyongo vinokoza niendelanga pama akala ninaroromela Yehova. Mofwanafwana na Samisoni unoyo afwanyile kopolo angang’wile ma-inje anayo Yehova amuva-ile liye, na-iyene ninokoza fwanya kopolo mwauzimu naroromelanga vyetene vyevyo Yehova unaniva-a liye. — Mat. 11:28.
11. Kodi ninapange avi ira ni-indi-edenga chito vyongo vyevyo Yehova unaniva-a liye ira vinikami-enga? Pelekani isazo.
11 Kaganizelani isazo ya m’bali-u wawu Russia zina lae Aleksey, unoyo unazuzumi-iwa vinjinji. Kodi chin’ni imukami-ile kalave olimba va mavuto alukulu anayo unagumanana liye? Thawi detene liye na iyanae kanopanga vyongo vyokuza lambela. Aleksey aongile ira: “Ndinoesaesa ira ndifunjedenga vameka koma teto welenga Baibulo dambo lililetene. Mamawa uliwetene miyo na iyananga ninokambirana lemba la dambo koma teto pempela wa Yehova limo-i.” Kodi ninafunjedavo n’ni? M’malo mororomelanga zelu di-u, ninafuneela roromelanga Yehova. Ninokoza panga vyevi volimbi-a iroromelo yi-u napanganga vyongo monga funjeda Baibulo, pempela, fwanyeya vamisonkano koma teto laleela. Napanganga eno, Yehova unoza anidalise chifukwa ya tindi lelo ninatonyi-eda iyo vomutumikela. Oomuva-a kopolo Samisoni, moi mo-okaikela na-iyene unokoza niva-a kopolo.
SAMISONI KAFOOKILE
12. Kodi Samisoni alakwi-ile n’ni, nanga vyevi vina-iyana avi na vyevyo apangile liye munduli?
12 Mofwanafwana na iyo, naliyene Samisoni kaali wangwilo, eno thawi dimo-i oosakula vyongo molakweya. Va thawi imo-iwa, liye oosakula vyongo vyevyo vyaambeeli-ile mavuto alukulu. Angatumikele wa thawi yoyeva monga oweluza, Samisoni “oowambeela muomeliwana mu-iyana m’mo-iwa wa wu Chigwa ya Soreki, unoyo zina lae ali Delila.” (Owel. 16:4) Mundulimu liye oofuna mutela mu-iyana m’mo-iwa wa Chifilisiti, koma Yehova ‘ngunoyo apangi-ile vyevi,’ chifukwa “asaelasaela mpata woi awane na Afilisiti.” Vanduli viwa Samisoni oodowa dowa kala unyumba ya hule limo-iliwa wu mzinda wa Afilisiti wu Gaza. Vathawila Mulungu oomuva-a kopolo Samisoni dogonji-a mzindoyo. (Owel. 14:1-4; 16:1-3) Koma khani ya Delila yali yo-iyana chifukwa yoi liye mwina ali Muizarayeli, moi Yehova kai unoyo apangi-ile ira usamwaliwa ukalevo.
13. Kodi Delila apangile n’ni ira Samisoni agumane na mavuto?
13 Delila oowachela ndalama dinjinji kumela wa Afilisiti ira amupeleke Samisoni. Kodi liye oomuroromela vinjinji Delila chifukwa yoi oomuomeliwana, moi liye kaaiziwa vyevyo afuna liye panga? Kaya vyongo vyali avi, moweli-edaweli-eda Delila oomukanyi-eda Samisoni ira amuululele wewo wakumela kopolo dae, moi vamapeto viwa Samisoni oomuwandela. Pivyovwi-a chisoni ira vyevyo Samisoni apangile liye vyoopangi-a ira kopolo dae dimale koma teto Yehova a-iye muomeliwana wathawi yoyeva. — Owel. 16:16-20.
14. Kodi Samisoni agumanile na mavuto oyi avi chifukwa yomuroromela Delila?
14 Samisoni oogumana na mavuto alukulu chifukwa yomuroromela Delila m’malo mororomela Yehova. Afilisiti koomu-inda moi koomupovola maso. Liye oo-eliwa mundende wu Gaza wewo athuwa aanyaswi-ilevo liye mundulimu moi ookala kapolo ochila tirigu. Vanduli viwa Afilisiti koomunyaswi-a vevo kasonkanileathu ira kapange phwando. Aliwa koopeleka sembe wa mulungwiwa Dagoni, kalanga ngati liye ngunoyo amupelekile Samisoni m’mandani mwiwa. Afilisitayo koomukumi-a Samisoni mundende nomuzana va phwandolo ira “aze aasangalase.”— Owel. 16:21-25.
Yehova oomuva-a Samisoni kopolo ira agonji-e Afilisiti (Onani ndima 15)
15. Kodi Samisoni atonyi-ede avi ira oowambeela nawili roromela Yehova? (Oweluza 16:28-30) (Onani ithuzithuzi yavatakuru lowambeela.)
15 Samisoni ali angalakwi-ile vyongo vinjinji komave kaa-iile tumikela Yehova. Liye oosaelasaela mpata woi akwakwaneli-ede utumiki unoyo Mulungu amuva-ile liye, ira agonji-e Afilisiti. (Welengani Oweluza 16:28-30.) Samisoni oomuvepa Yehova ira: “Ndiloleni ndiaweli-ede Afilisiti.” Mulungu oona oomusomeda moi oomuva-a nawili kopolo dodabwi-a. Eno vathawila, Samisoni oopha Afilisiti anjinji kwaranya maulendo amo-iwa mundulimu.
16. Kodi ninafunjeda n’ni va vyevyo Samisoni alakwi-ile liye?
16 Ngakale ira Samisoni oogumana na mavuto alukulu chifukwa yolakwi-a vyongo, liye kaa-iile panga yofuna ya Yehova. Eno kaya nilakwi-a vyongo moi ninafuneela sumululiwa, imechiwa va udindo kapena utumiki umo-iwene, kaninafuneela fooka. Niumbuwelenga ira Yehova unokala okozeya nikululukela. (Sal. 103:8-10) Ngakale ira ninolakwi-a vyongo, Yehova unokoza ni-indi-edangave chito ngati mwemo apangele liye na Samisoni.
Mwina Samisoni kaasangalalile chifukwa ya vyevyo alakwi-ile liye, komave kaatatilile murima. Na-iyene kaninafuneela tatila murima (Onani ndima 17-18)
17-18. Kodi isazo ya Michael iulimbikisileni avi? (Onani teto ithuzithuzi.)
17 Isazo vakhanila pivyevyo vyamuireele m’bali m’mo-iwa waizombwe zina lae Michael. Liye ootumikela Yehova mwatindi moi ali mtumiki okami-a koma teto mpainiya ogarateya. Pivyovwi-a chisoni ira liye oolakwi-a vyongo, vyevyo vyapangi-ile ira a-iye utumikae. Michael aongile ira: “Munduli mwetene mwemu vyongo vikala viendanga pama votumikela Yehova. Koma mwazizizi vyakede kala ngati ndiomba chisi. Kandaganizela ira Yehova unokoza ndi-iya, komave ndookaikela akala ndinaze ndikale nae va usamwali wapama ngati vowambeela kapena teto panganga vinjinji vomutumikela mupingo.”
18 Pivyosangalasa ira Michael katatilile murima. Liye eere: “Ndooesaesa ira ndikale nawili vausamwali wapama na Yehova vopempela wa liye mokumela vati vamurima, funjeda Mawae koma teto aganizela modii-a.” Vangavirile thawi, liye oowambeela tumikela nawili mupingo ngati vowambeela. Vano liye ngu ndimuwa koma teto mpainiya ogarateya. Michael aongile teto ira: “Vyevyo pingo wapangileathu simbwasimbwa andimuwa vondilimbikisa, vyoondikami-a zindikila ira Yehova unondiomeliwanave. Vano ndinanatumikela nawili mupingo ndangan’na chikumbumtima yowela. Vyevyo vyandiireelevi vyoondifunji-a ira Yehova unokululukela uliwetene unoyo ulapile kumela vati vamurima.” Na-iyene ninokala osimikiza ira Yehova unoza anidalise koma teto ni-indi-eda chito ngakale ira noolakwi-avo vyongo. Yofuneya kupanga vyetene vyevyo ninawande iyo ira nisakaede vyevyo nalakwi-ile iyo, nopitiliza muroromela. — Sal. 86:5; Miya. 28:13.
19. Kodi isazo ya Samisoni iulimbikisileni avi?
19 Mukhanila, niona vyongo vyopangi-a chidwi vyevyo vyaireile vamoyo wa Samisoni. Liye kaali wangwilo, komave kaa-iile panga vyetene vyevyo unawande liye votumikela Yehova ngakale ira oolakwi-a vyongo vakhani yokuza Delila. Yehova kaa-iile mu-indi-eda chito. Oomu-indi-eda chito vopanga vyongo vimo-i vyakopolo. Yehova oomuonave monga muthu ororomeleya moi oolola ira zina lae lilembiwe vagulu la athu ororomeleya oromoliwa mu Aheberi chaputala 11. Pivyosangalasa iziwa ira ninomutumikela Babi-u wachikondi, unoyo unafunechecha niva-a kopolo simbwasimbwa nafooka. Eno mofwanafwana na Samisoni, tiyemoni nimuvepenga Yehova ira: “Chonde, ndiumbuweleni nondiva-a kopolo.”— Owel. 16:28.
NYIMBO 3 Ndinu Mphamvu Zathu, Chiyembekezo Chathu Komanso Timakudalirani
a Samisoni ngu muthu oiziweya vinjinji, ngakale wa athu anayo katinaiziwa vinjinji Baibulo. Khanae inofwanyeyecha m’masewelo, nyimbo, koma teto mafilimu. Komave khani yokuza moywae kai nthano chabe. Ninokoza funjeda vinjinji wa muthu wairoromelo unola.