Disembala

Ka u Yehova ali na maka aghakuti angabazusya abafwe? Tutakukayikila! Ichifukwa chakuti we Chala “Uwamaka ghosi.” (Ubuvu. 1.8) U Yehova ali na maka aghakuti angapota abalwani bache bosi, nu bufwe bulo. (1 Koli. 15:26) Ichifukwa ichinji cho tukumanya ukuti u Chala akwiza pakubazusya abafwe, chakuti ate ni chiluvya. Intondwa yiliyosi akuyitizya izina. (Yesa. 40.26) Umwakuyana bulo, akukumbukila bosi bo bafuye. (Jobu 14.13; Luka 20.38) Akukumbukila utuntu tunandi-nandi utwakukwafannya na bo akwiza pakubazusya, ukuyana na mo bakabonekelagha, ubuntu bwabo, mo bakabombelagha ivintu nu kukumbukila mo bakabombelagha. Naloli, tukusubila ukuti u Yehova akwiza pakuzusya abantu bo bafuye, ichifukwa chakuti tukumanya ukuti ali ni chinyonywa sona amaka aghakubombela bunubu. Ennya ichifukwa ichamwabo cho tukusubila vyo u Chala atulayizizye. Kunyuma uku, u Yehova akazusyapo kale abantu bamo. U Yehova akabapa abanavuli abasubaliwa bamo nu Yesu amaka aghakuzusya abantu. w23.04 9-10 ¶7-9

Nanti tukulongosola umwaluso sona umwabololo vingavwa ukuti abantu abanji babe ni chinyonywa ichakuteghelezya nu kubukilila ukunenezannya nabo. Napo vingaba bunubu, loli nanti yumo akulonda bulo ukuti atususye pa vyo tukusubila pamo ukutugemula, tutakulondiwa ukubukilila ukunenezannya nawe. (Mbupi. 26.4) Loli tebosi bo bakubomba bunubu, bamo bakuteghelezya. Ukunena ubwanaloli, tukupindula sana nanti tukumanyila ukuti tube balolo. Mulabe kwa Yehova ukuti abape amaka gho mukulondiwa ukuti mubukilile ukuba bololo pa kabalilo ko mukwamula amalalusyo gho umuntu yumo angalalusya ukuti mwande bulo ukususannya. Mukumbukilaghe ukuti ukuba bololo kungabavwa ukuti muleghuke ukudalinkana. Sona ubololo bungabavwa ukuti mwamulaghe umwamuchizi, vyo vingabavwa bo bakuteghelezya ukuti basinte mo bakutwenezya sona mo bakwenezya ubwanaloli ubwa mu Bayibolo. “Akabalilo kosi mwiyannye pakumwamula umuntu” yo akulonda ukumanya vyo mukusubila “loli mumwamulaye mubololo, sona na mumuchizi.” (1 Pita. 3.15) Naloli, ubololo bwakulondiwa sana! w23.09 19 ¶18-19

Inong’onela izila 4 izya mo tungalangizizya ubufisalyoyo. Iyabwandilo, umuntu yo mufisalyoyo atakukalala lubilo. Nanti umuntu yumo abomba ivintu vimo ivyakumukalalizya pamo ivintu vyamufyenya, akubukilila ukuba wakufwasa sona atakunyosezya ivintu ivibibi vyo yumo amubombela. (Kuso. 34.6) Iyabubili, umuntu yo mufisalyoyo akulindilila umwakufwasa. Nanti ivintu vimo vyasenda akabalilo akatali ukuchila mo inong’onelagha, atakukalala. (Mata. 18.26, 27) Iyabutatu, umuntu yo mufisalyoyo atakubomba ivintu umwakuchimbilila. Nanti akulonda ukuti abombe imbombo yimo iyakulondiwa, atakuchimbilila ukwanda pamo ukuyimalizya. Mumalo mwache, akwenelezya ukuti ali na kabalilo akakukwana akakuti abombele imbombo yo akulonda ukubomba. Pisinda pache akuyibomba akiza imbombo iyi pa kabalilo kache. Iyanambala folo, umuntu yo mufisalyoyo, akuyezya ukujimba ku ntamyo ukusita ukudandaghula. Umuntu yo mufisalyoyo akubomba chilichosi cho angakwanisya ukuti ajimbe sona ukuti abukilile ukumubombela u Yehova umwakuhoboka. (Kolo. 1.11) Abantu ba Yehova bakulondiwa ukulangizya ubufisalyoyo muzila zyosi izi. w23.08 20-21 ¶3-6

Ichifukwa cho tukulondiwa ukughufighilila umoyo witu uwakufwanikizya chakuti, u Yehova azimennye inyinong’ono zyitu. Ifundo iyi yikung’anamula ukuti akwennya ivyinji ukuchila aliwesi sona amenye akiza mo umuntu aliwesi abeleye. U Yehova angabukilila ukutughana nanti tukubukilila ukwinong’onelapo pa bulongozi bo akutupa bo bungatwavwa ukuti twize twikale nu bumi kwa bwila na bwila. (Yoha. 4.14) Ivi vingatwavwa ukuti tutakavulale ni nkalo imbibi na mabumyasi agha Satana na bantu bache ababibi aba muchisu ichi. (1 Yoha. 5.18, 19) Nanti tukupalamila kwa Yehova, vingatwavwa ukuti twande pakumughana nu kumuchindika nkani. Ichifukwa chakuti tutakulonda ukumukalalizya Ubaba witu, tukuchibenga ichintu chilichosi cho chingapangisya ukuti tubombe ichintu ichibibi. Umuyemba yumo uwa ku Croatia izina lyache u Marta akayeliwa ukuti abombe ubwamalaya, akasimba ukuti: “Chikaba chakutamya ukuti ninong’one akiza nu kulimbana ni chinyonywa ichakuti imbombe ichintu ichibibi. Loli ukumunyila u Yehova koko kukanfighilila.” Ka ukumunyila u Yehova kukamwavwa buli-buli? U Marta akanena ukuti akinong’onelapo ivintu ivibibi vyo vingabombiwa nanti angabomba ubwamalaya. Nuswe tungabomba umwakuyana bulo. w23.06 20-21 ¶3-4

U Yesu akamanyagha ukuti ubwighane bwa Yehova bwakuti azelufye izina lyache, vyo vingavwa ukuti asusye amabumyasi aghakupambana-pambana. Cho chifukwa umumanyisi witu akabamanyisya abamanyili bache ukuti biputaghe muzila iyi: “Tata witu uwa kumwanya; itabwa lyako lichindikiwanje.” (Mata. 6.9) U Yesu akivwisyanga ukuti inkani iyi yoyo nkulu nkani muchipeliwa chosi. Pa vipeliwa vyosi ivyamahala, patalipo ichipeliwa chimo cho chichindikite izina lya Yehova ngati mo u Yesu akabombela. U Yesu akati apinyiwa, nkimba abalwani bache bakamupa nongwa buli? Bakamupa inongwa iyakumusamula u Chala! U Yesu akasubilagha ukuti ukumusamula pamo ukulituka izina izelu ilya Baba wache bo butulanongwa ubukulu sana. Vikamukwafya sana ukuti inti bamulonge nu kumupa inongwa iyakuti wamusamu. Ichi cho chikaba chifukwa ichikulu cho u Yesu “akayimba nkani mumoyo wache” bakaba papipi ukuti bamukole.—Luka 22.41-44 w24.02 11 ¶11

Tukulondiwa ukumughana nkani u Yehova nu Yesu ukuchila abakamu bitu po tuli pa chipalano icha bumi. (Mata. 10.37) Loli ivi vitakung’anamula ukuti tupotwanje ukukwanilisya ubudindo bwitu mumbumba. Ubwanaloli bwakuti, ukuti tumuhobosye u Chala nu Kilisitu, tukulondiwa ukukwanilisya ubudindo bo tuli nabo mumbumba yitu. (1 Timo. 5.4, 8) Nanti tukubomba bunubu, tukwiza pakuba bakuhoboka. U Yehova akumanya ukuti imbumba yingaba yakuhoboka nanti umulume nu muchi bakubombelana ivintu umwalughano nu mwamuchizi, abapapi bakubaghana nu kubamanyisya abana babo, sona nanti abana bakubivwila abapapi babo. (Efe. 5.33; 6.1, 4) Umulume, umuchi pamo abana, mwebosi mubombezyange ubulongozi ubwamahala ubwakufuma mu Bayibolo. Mutakabombaghe ivintu vimo ichifukwa chakuti umwe mukwinong’ona ukuti vyiza, pamo ichifukwa chakuti ko mukwikala abantu abinji bakubomba bunubo pamo vyo abakaswili bangababuzya ukuti mubombaghe. Mubombezyange akiza amabuku ghitu gho ghakulongosola Ibayibolo. Muli amasakizyo gho ghangabavwa ukumanya mo mungabombezezya ifundo izya mu Bayibolo. w23.08 28 ¶6-7

Umukolo Uwachikilisitu abaghiye ukuba na maluso ghamo gho ghangamwavwa. Amaluso ghamo gho umulindu angamanyila kubwana ghangamwavwa ubumi bwache bosi. Umwakufwanikizya, mumanyile ukubelenga nu kusimba akiza. Mukikalile aka bantu bamo, bakwennya ukuti ukubelenga nu kusimba te maluso aghakulondiwa ukuti abakolo bamanyile. Napo vingaba bunubu, loli chiza sana sona chakulondiwa ukuti Umukilisitu aliwesi amanye ukubelenga nu kusimba akiza. (1 Timo. 4.13) Napo ko mukwikala chingaba chakutamya, loli muyezye-yezye ukumanyila ukubelenga nu kusimba akiza. Ka mungapindula buli-buli? Amaluso agha ghangabavwa ukuti mwaghe indalama zyo mukulondiwa. Sona chingaba chipepe ukumanyila Ibayibolo nu kubamanyisya abanji. Ichakulondiwa nkani ukuchila pa vyosi, chakuti mukupalamila kwa Yehova po mukumayilla Amazyu ghache nu kwinong’onelapo.—1 Timo. 4.15. w23.12 20 ¶10-11

Mulabaghe ubutuli kwa Yehova ukuti muzipote injelo. Ichifukwa chakuti swe bantu abambula ukufikapo, akabalilo kosi tukulimbana ni njelo zyo zingatupangisya ukuti tubombe ivintu ivibibi. U Satana akubomba chilichosi cho angakwanisya umwakuti atupangisye ukuti chibe chipala ukubomba ivintu ivyiza. Izila yoka yo akubombezya imbombo yakuti akuvulungannya akinong’onele kitu ukuti tusalaghe ivyakusangalusya ivibibi. Ivyakusangalusya vimo vingizuzya ivintu ivibibi mu nyinong’ono zyitu, vyo vingapangisya ukuti tutakabe baswepu pamaso pa Yehova sona vingatupangisya ukuti tubombe imbibi inkulu. (Mali. 7.21-23; Yako. 1.14, 15) Tukulondiwa ubutuli ubwa Yehova nanti tukulonda ukuzipota injelo izyakuti tubombe ivintu ivibibi. Mu lwiputo lwache ulwa chifwanikizyo, u Yesu akongelezyapo ifundo iyi: “Utakitikizyanje ukuti tuwile munjelo, loli utupoke kwa Satana Umubibi yula.” (Mata. 6.13) U Yehova akulonda ukuti atwavwe, loli tukulondiwa ukulaba ubutuli bwache. Nanti twalaba ubutuli kwa Yehova, tukulondiwa ukubomba ivintu umwakuyana ni nyiputo zyitu. w23.05 6-7 ¶15-17

Nanti abantu bo bali pa sendwa bakwenya ukuti ubumanyani bwabo nu Baba wabo uwa kumwanya bwakulondiwa, bakuba bakwisengannya akabalilo kosi ukubombezya ubulongozi bo akubapa. Ubulongozi ubu bungabavwa ukuti bachepesye pamo ukumazya intamyo zyo zingapangisya ukuti ulughano lwabo luchepe. Abantu bosi bo bali pa bumanyani ubwakughoma nu Yehova bope bakulondiwa ukubomba chilichosi cho bangakwanisya ukuti bamuyezye nu kuba ni nkalo zyo u Yehova ali nazyo ngati ichisa, ubufisalyoyo nu kuhobokela. (Efe. 4.32–5.1) Isendwa yo yikulangizanya inkalo ngati izi, chikuba chipepe ukuti ulughano lwabo lubukilile ukukula. Umuyemba yumo izina lyache u Lena yo ikala mu sendwa ukwa myaka iyakupululila 25, akanena ukuti “chikuba chipepe ukumughana nu kumuchindika umuntu yo wabuzimu.” Ennya ichifwanikizyo icha mu Bayibolo ichi. Pa kabalilo ko u Yehova akasalagha imbumba yo yikwiza ukuba bapapi aba Mesiya, pa bizukulu bosi aba Devedi akasalapo u Jozefu nu Maliya. Chifukwa buli? Ichifukwa chakuti bosi babili bakaba pa bumanyani nu Yehova, sona u Yehova akamanya ukuti imbumba yabo yikwiza pakumughana. w23.05 21 ¶3-4

U Yesu mulongozi witu sona wakufikapo, loli abakamu bo abasalite ukuti batulongozyanje te bakufikapo. Chikuba chakutamya ukubivwila nkani-nkani nanti batubuzya ukuti tubombe ichintu chimo cho tutakulonda ukubomba. Umutumiwa u Pitala bakamupa ubulongozi, loli pabwandilo atakalonda ukubwivwila. U Pitala atakakana lyoka loli akakana katatu pa kabalilo ko uwantumi akamubuzyanga ukuti alye ivinyamana vyo vikaba vinyazu ukuyana ni Ndaghilo izya Mozesi. (Imbo. 10.9-16) Chifukwa buli? Ichifukwa chakuti ubulongozi ubupya ubu butakaba bwakwivwika kukwache. Pa kabalilo kamo, umutumiwa u Pabuli akivwila po abanavuli abachasongo ku Yelusalemu bakamubuzya ukuti asende abanavuli 4 nu kubuka nabo ku tempeli nu kubomba umwambo uwa kwiswefya ukulangizya ukuti akukonka Indaghilo. U Pabuli akamanyagha ukuti Abakilisitu bate pasi pa Ndaghilo. Sona akaba ukuti atabombitepo ichintu chimo ichibibi. U Pabuli akivwila mwalubilo. Loli u Pabuli akasenda “abanavuli folo bala nukubomba nabo inyiho izyakwiswefya.” (Imbo. 21.23, 24, 26) Ichifukwa chakuti u Pabuli akivwila ubulongozi, vikavwa ukuti umutende ghubukilile.—Loma 14.19, 21. w23.10 10 ¶15-16

Mutangalonda ukuti ukunyila yibe nkalo iyakulondiwa sana pa bumanyani bwinyu ubwiza. Napo vili bunubu, loli bo bakulonda ukuba pabumanyani ubwiza nu Yehova bakulondiwa ukuti ‘bamunyilaghe.’ Napo tungaba ukuti twamubombela u Yehova kwa kabalilo akatali, loli swebosi tukulondiwa ukubukilila ukumuchindika nkani u Yehova. Nkimba ukumunyila u Chala chikung’anamula ichoni? Umuntu yo akumuchindika naloli u Chala, akumughana sona atakulonda ukubomba chilichosi cho chingananga ubumanyani bwache nu Yehova. U Yesu akalangizyanga ukuti ‘akamunyilagha u Chala.’ (Hebe. 5.7) U Yesu atakennyanga ukuti u Yehova wakoghofya. (Yesa. 11.2, 3) Mumalo mwache akalangizyanga ukuti amughanite sana u Yehova sona akabalilo kosi akaba wakwisengannya ukumwivwila. (Yoha. 14.21, 31) Ngati we Yesu, nuswe bulo tukulondiwa ukulangizya umuchizi kwa Yehova nu kumunyila, ichifukwa chakuti walughano, wamahala, mugholosu sona wamaka. Tukumanya ukuti u Yehova atughanite sona akuhoboka na mo tukubombela ni vintu vyo akutumanyisya. Nanti tutakumwivwila u Yehova tukumukalalizya, loli nanti tukumwivwila akuhoboka.—Sali. 78.41; Mbupi. 27.11. w23.06 14 ¶1-2; 15 ¶5

Umwene Uziya akati aba na maka, akaleka ukumupalizya u Yehova pa vintu ivyiza vyo akamubombela. Nkimba tukumanyilapo ichoni? Tubaghiye ukukumbuka ukuti u Yehova weyo atupiye ivintu vyosi ivyiza vyo tukuhoboka navyo pa bumi na po tukumubombela. Mumalo mwakuti twituvye pa vyo twakwanisya ukubomba, amapalo ghosi ghabuke kwa Yehova pa vintu vyosi vyo twakwanisya ukubomba. (1 Koli. 4.7) Tubaghiye ukumanya ukuti swe bantu bambula ukufikapo sona tukulondiwa ubulongozi. Umukamu yumo yo ali ni myaka iyamuma 60 akanena ukuti: “Namanyila ukuleka ukwiyinong’onela nemwene pamo ukukalala nanti bamo bakuti napuvya vimo. Nanti napokela ubulongozi pa vintu vyo napuvya, nkuyezya ukusinta nu kumupa u Yehova vyosi vyo ningakwanisya.” Ubwanaloli bwakuti, nanti tukumwivwila u Yehova nu kubukilila ukuba bakwiyisya, tungaba nu bumi ubwakuhoboka.—Mbupi. 22.4. w23.09 10 ¶10-11

Abakilisitu aba mukabalilo aka Pabuli bakalondiwanga ukuba bakujimba. Bope bulo bakakomanagha ni ntamyo izyakuyana na zyo abantu bo bakikalagha mukabalilo kabo bakakomanagha nazyo. Loli bakakomanagha sona ni ntamyo ichifukwa chakuti bakaba Bakilisitu. Abinji bakatamiwanga ichifukwa chakuti abalongozi Abachiyuda na Bachiloma sona abamumbumba yabo bakabayivyanga. (Mata. 10.21) Sona bakalondiwanga ukwenelezya ukuti ivimanyisyo ivyabumyasi vyo abakusambukila bakamanyisyanga vitakabavulungannye. (Imbo. 20.29, 30) Napo vikaba bunubu, loli Abakilisitu bala bakabukilila ukujimba. (Ubuvu. 2.3) Choni cho chikabavwa ukuti bajimbe? Bakinong’onelaghapo ivifwanikizyo vyo vikwaghiwa mu Masimbo ivya bantu bo bakajimba ku ntamyo ngati we Yobu. (Yako. 5.10, 11) Pa kabalilo kamo bakiputa ukuti babe bakujimba. (Imbo. 4.29-31) Sona bakabukilila ukukumbukila ukuti nanti bangabukilila ukuba bajimvu, u Yehova akwiza pakubasaya. (Imbo. 5.41) Nuswe bulo nanti akabalilo kosi tukumanyila inkani izya bantu bo bakajimba ukufuma mu Mazyu agha Chala, mumabuku ghitu nu kwinong’onelapo, vingatwavwa ukuti tujimbe. w23.07 3 ¶5-6

U Yehova nu Yesu batalileka lumo ukutwavwa. Umutumiwa u Pitala akati amukana u Yesu, chikaba chakutamya ukuti asale akiza ivintu ivyakulondiwa. Ka akikala bulo mye pamo akaba nu lweke ngati mumanyili uwa Yesu? U Yesu akamulaba u Yehova ukuti ulwitiko ulwa Pitala lutakamale. U Yesu akamubuzya u Pitala vyo akalaba mulwiputo lula sona akamupa ulusubilo ulwakuti pisinda pache u Pitala akwiza pakubakazya abakamu bache. (Luka 22.31, 32) Tutakukayikila ukuti u Pitala akabanga nu lusubilo nanti akumbukila amazyu agha Yesu! Nuswe bulo nanti tukulonda ukusala ichintu chimo ichakulondiwa nkani, u Yehova angabombezya abadimi abasubaliwa ukuti batwavwe ukuti tubukilile ukuba nu lwitiko. (Efe. 4:​8, 11) Ngati mo u Yehova akamutulila u Pitala poka na bapatumiwa abamwabo ukwagha ivyakulondiwa pa bumi, nuswe bulo akwiza ukutwavwa ukwagha ivyakulondiwa pa bumi nanti ukumubombela u Yehova tukukubika pabwandilo pa bumi bwitu. w23.09 24-25 ¶14-15

U Yehova akumanya ichintu chilichosi cho tungababombela abanji umwachisa napo chingaba chidono bulo. Akuchennya ichintu cho twabomba ngati chabupi ichapamwanya sana sona akwennya ngati nkongole iyakuti akwiza pakutunyosezya. Nanti mukabombagha ngati mwavwilizyi pamo usongo, u Yehova akukumbukila imbombo yosi yo mukabombagha nu lughano lo lukabapangisya ukuti mubombaghe bula-bula. (1 Koli. 15.58) Sona u Yehova akwennya ulughano lo mukubukilila ukulangizya. U Yehova akulonda ukuti swebosi tumughanaghe sona tubaghanaghe abanji. Tungalangizya ukuti tumughanite u Yehova umwakubelenga Amazyu ghache nu kwinong’onelapo pa vyo twabelenga sona akabalilo kosi tunenaghe nawe mulwiputo. Tungalangizya ukuti tubaghanite abakamu na bayemba muzila izyakupambana-pambana. Po ulughano lwitu lukukula, inti vitwavwe ukupalamila kwa Yehova na kubakamu na bayemba bitu. Sona inti tuhoboke nu bumanyani ubu kwa bwila na bwila! w23.07 10 ¶11; 11 ¶13; 13 ¶18

Umukilisitu aliwesi akusala weka ubutuli bo angapokela nanti abina. Nanti Abakilisitu bakusala pa nkani iya butuli bo bangapokela nanti babina, babaghiye ukwivwila indaghilo izya mu Bayibolo izyakuti batakapokele ibanda nu kubomba ivyamizimu. (Imbo. 15.20; Gala. 5.19, 20) Aliwesi angasala ubutuli bo angapokela nanti abina. Napo tungaba ukuti tukumanya ivyinji ivyakukwafannya na mo imilembo yo tukupokela yikubombela imbombo ukuti yakwavwa pamo yakuvulazya, loli tukulondiwa ukuchindika vyo abakamu na bayemba bitu basala pa nkani iya butuli bo bangapokela nanti babina. Ivi vikutwavwa ukumanya ukuti tukulondiwa ukukumbukila ifundo 4 izi: (1) Ubumwene ubwa Chala bweka bobo bukwiza pakumazizya zila imbina zyosi. (Yesa. 33.24) (2) Umukilisitu akulondiwa ukuti “abombaye ukuyana na mumo asimikizizya” cho akwennya ukuti chingamwavwa pa kabalilo ko akusala ubutuli bo angapokela nanti abina. (Loma 14.5.) (3) Tutakulondiwa ukubalonga abamwitu pa vintu vyo basala nu kubapangisya ukuti binong’onaye ukuti batasalite akiza. (Loma 14.13) (4) Abakilisitu bakulangizya ulughano sona bakwivwisya ukuti ukukolelana muchipanga kwakulondiwa sana ukuchila vyo umuntu akusala pa weka.—Loma 14.15, 19, 20. w23.07 24 ¶15

Ka mukwennya ubumanyani bwinyu nu Yehova ukuti bwapamwanya? Tutakukayikila ukuti momo mukubwenezya! Ukwanda kwisinda nkani abantu abinji bakiyivwanga umwakuyana bulo na mo mukwiyivwila. (Sali. 104.33, 34) Amasiku ghano abinji bakwiyipa pakumwiputa u Yehova. Momo bakabombelagha Abaizilayeli bamo bo bakitiziwanga ukuti Banazili pamo abakwiyipa pakubomba imbombo yimo iyapalubazu. Abanazili bakaba Baizilayeli bo bakiyipagha pakumubombela u Yehova muzila iyapalubazu. Indaghilo izya Mozesi zikitikizyanga umwanavuli pamo umukolo ukulapa ichilapo ichapalubazu kwa Yehova ukuti asala ukuba Munazili ukwa kabalilo. (Kuba. 6.1, 2) Nanti Umuizilayeli asala ukulapa ichilapo ichakuti inti abe Munazili, akalondiwanga ukukonka indaghilo zyo Abaizilayeli bosi batakakonkagha. So choni cho Abaizilayeli bakasalagha ukuba Banazili? Bakabombagha bunubu ichifukwa chakuti bakamughanagha u Yehova sona bakalondagha ukulangizya ukuti bakupalizya ukufuma pasi pa moyo ivyabupi ivyiza vyosi vyo akabapa.—Kumbu. 6.5; 16.17. w24.02 14 ¶1-2

Mu Bayibolo, ilizyu ilya Chihebeli ilyakuti “ubusubaliwa” pamo ‘ulughano ulusubaliwa,’ likulongosola ulughano lo u Chala akubalangizya abamanyani bache. Bakulibombezya sona ilizyu ili pakulongosola ulughano lo ababombi aba Chala bakulangizannya. (2 Samu. 9.6, 7) Ubusubaliwa bwitu bungabukilila ukuba bwakughoma nanti akabalilo kendapo. Ennya mo u Daniyeli akabombela ukuti aghomye ubusubaliwa bwache. Pa bumi bwache bosi u Daniyeli akagheliwa nanti musubaliwa kwa Yehova. Loli ichintu ichikulu cho chikamuyela nkani, chikabombiwa po akaba ni myaka iyakupululila 90. Amakambala agha Daliyasi ghakamubenga u Daniyeli sona ghatakamuchindikagha u Chala yo u Daniyeli akamwiputagha. Ivi vikapangisya ukuti bapangane ukuti bamughoghe u Daniyeli. Amakambala agha, ghakapanga ululaghilo nu kumusayinisya umwene lo lukamuyela u Daniyeli nanti inti abukilile ukuba musubaliwa kwa Chala wache pamo kwa mwene. Ukuti u Daniyeli alangizye ukuti musubaliwa kwa mwene, akalondiwanga ukuleka ukwiputa kwa Yehova ukwamasiku 30. Loli u Daniyeli akabukilile ukuba musubaliwa kwa Yehova.—Dani. 6.12-15, 20-22. w23.08 5 ¶10-12

U Yehova akulonda ukuti tubanje bajimvu pakulangizya ulughano abakamu na bayemba bitu. Nanti abakamu na bayemba batubombela ivintu muzila yo te nyiza, tungasubila ukuti vitakung’anamula ukuti balonda ukutuvulazya loli bakuyezya-yezya ukubomba cho u Yehova akuti chiza. (Mbupi. 12.18) U Chala abaghanite ababombi bache abasubaliwa napo akabalilo kamo bakupuvya ivintu. Napo tungapuvya ivintu atakutukalalila mumalo mwache akubukilila ukuba nuswe pabumanyani. (Sali. 103.9) Tukupalizya sana ichifukwa chakuti u Yehova akutuhobokela sona nuswe bulo tukulondiwa ukumweghelela umwakubahobokela abanji! (Efe. 4.32–5.1) Tukumbukilaghe ukuti po ubumalilo buli papipi sana, tukulondiwa ukubukilila ukukolelana na bakamu na bayemba bitu. Tukulindilila ukuti intamyo inti zibukilile ukubala. Vingabombiwa ukuti akabalilo kamo tungaghiwa ukuti tuli mujele ichifukwa cha lwitiko lwitu. Nanti ivi vyiza vyabombiwa tukwiza ukulondiwa ubutuli ubwakufuma ku bakamu na bayemba bitu ukuchila kwisinda kosi.—Mbupi. 17.17. w24.03 15-16 ¶6-7

Mumasimbo muli inkani izyinji izya bachinyamata bo bakapalamilagha kwa Yehova, akabasayagha sona bakennyanga ukuti ubumi bwabo bukaba bwakuhobosya. U Devedi akaba weka uwa bachinyamata aba. Pa kabalilo ko akaba wachinyamata, akasala ukuti u Chala abe mumanyani wache, pisinda pache akaba we mwene umusubaliwa. (1 Nyafya. 3.6; 9.4, 5; 14.8) Nanti mungamanyila inkani iya Devedi, ichifwanikizyo chache chingabavwa ukuti mumubombelaghe u Yehova umwabusubaliwa. Pamo mungamanyila ivyinji ivya Maliko pamo u Timoti. Inti mwennye ukuti bakanda ukumubombela u Yehova po bakaba bana banandi sona bakabukilila ukumubombela umwabusubaliwa. Vyo bakasala vikamuhobosya u Chala. Mo mukubombela ivintu pa kabalilo aka pa bumi bwinyu, vikwiza pakukwafya vyo mukwiza pakubomba muntazi. Nanti mukumusubila u Yehova, sona mutakusubila mo mukwivwisizya ivintu, akwiza pakubavwa ukuti musale ivintu mwamahala. Mungaba nu bumi ubwakuhobosya sona mukwiza pakusayiwa. Mukumbukilaghe ukuti u Yehova akwennya vyo mukumubombela ukuti vyapamwanya sana. Pa te ichintu ichakuhobosya pa bumi bwinyu ukuchila ukumubombela u Baba bitu uwalughano u Yehova. w23.09 13 ¶18-19

Umutumiwa u Pabuli akamanya ukuti abakamu na bayemba bache Abachikilisitu bakaba bambula ukufikapo. Umwakufwanikizya bamo muchipanga icha ku Yelusalemu bakamunyilagha. (Imbo. 9.26) Pisinda pache, bamo bakanda ukunena ivintu ivibibi vyo vikananga imbili yache. (2 Koli. 10.10) U Pabuli akennya umukamu uwabudindo akusala akabibi ivintu vyo nge vikabapunuzya abanji. (Gala. 2.11, 12) Sona umumanyani wache yumo izina lyache u Maliko, akamupunuzya. (Imbo. 15.37, 38) Ivyakubombiwa ngati ivi nge vikamupangisya ukuti aleke ukubomba ivintu na bantu bo bakamupunuzya. Mumalo mwache, akabukilila ukubennya akiza abakamu na bayemba bache nu kubukilila ukumubombela u Yehova umwabusubaliwa. Choni cho chikamwavwa u Pabuli ukuti ajimbe? U Pabuli akabaghanagha abakamu na bayemba bache. Ichifukwa chakuti u Pabuli akabaghanagha abanji, atakabika umoyo pa vintu vyo bakapuvyanga loli akennyanga inkalo zyabo inyiza. Ulughano lukamwavwa sona u Pabuli ukuti abombe vyatambuliwa mwisimbo ilyilelo. w24.03 15 ¶4-5

Mu Bayibolo muli inkani izyinji zyo zikulongosola ukulondiwa ukwa bololo. Za twennye ichifwanikizyo icha Ayizeki. Pa kabalilo ko akikalagha mukaya aka Bafilisiti ku Gelala, abapalamani bache bakamukanizya ichifula cho ababombi aba baba wache bakakumba. Mumalo mwakuti alwe nabo, u Ayizeki akasama nu kubuka ku malo aghanji nu kufukula ivifula ivyamwabo. (Ubwa. 26.12-18) Loli Abafilisiti bakanena sona ukuti ivifula vyo bakafukula ku malo ghala, vikaba vyabo. Napo vikaba bunubu, loli u Ayizeki akabomba ivintu umwamutende. (Ubwa. 26.19-25) Choni cho chikamwavwa ukuti abukilile ukuba mololo pa kabalilo ko bamo bakamukalalizyanga? Tukusubila ukuti akamanyilako ku bapapi bache u Abulahamu yo akabombagha ivintu mwamutende nu Sala yo akaba nu “muzimu umololo nu wamyee.”—1 Pita. 3.4-6; Ubwa. 21.22-34. w23.09 15 ¶4

U Yehova umwalughano akamutuma Umwana wache ukatote pachisu ichapasi ukuti ize abamanyisye abantu ivya Bumwene nu kwiyipa ubumi bwache ukuba isembe iyakutusatula ku mbibi nu bufwe. Pisinda pache u Yehova akamuzusya u Yesu sona akabuka kumwanya nu kwanda pakulaghila kumwanya ngati we Mwene mu Bumwene ubwa Chala. Ifundo inkulu iya mu Bayibolo yakuti izina ilya Yehova lichindikiwanje po akukwanilisya ubwighane bwache pachisu ukwendela mu Bumwene bwache pasi pa bulaghili ubwa Kilisitu. Ubwighane ubwa Yehova butangasinta. Alayizizye ukuti inti enelezye ukuti chilichosi cho akanena chakwanilisiwa. (Yesa. 46.10; Hebe. 6.17, 18) Pa kabalilo kache ichisu chikwiza pakuba we paladayiso mo abizukulu aba Adamu nu Eva bakwiza pakuba bakufikapo, bagholosu sona ‘bakuhoboka nu bumi kwa bwila na bwila.’ (Sali. 22.26) Loli u Yehova atakwiza pakukwanilisya bulo ivintu ivi. Akwiza pakupangisya ukuti ababombi bache aba pachisu ichapasi na bakumwanya babe bakukolelana. Pisinda pache ichipeliwa chilichosi chikwiza pakuba chisubaliwa pakumwivwila u Yehova ngati Mulaghili wache. (Efe. 1.8-11) Ka mutakuswigha ni zila yo u Yehova akubombezya pakukwanilisya ubwighane bwache? w23.10 20 ¶7-8

Abayuda bo bakikalagha ku Babeloni bakati bafika ku Yelusalemu, patakenda akabalilo akatali bakanda ukukomana ni ntamyo iyakusoba ukwa ndalama, intamyo zyo zikabapo ichifukwa cha vya ndale nu kususiwa. Ivi vikapangisya ukuti kubamo chibe chakutamya ukuti babikepo umoyo pa mbombo iyakuzenga sona itempeli ilya Yehova. Cho chifukwa u Yehova akatuma abalaghuzi babili u Hagayi nu Zekaliya ukuti babakazye abantu umwakuti babikepo umoyo pa mbombo iyakuzenga, vyo vikavwa ukuti pabe ivyakufumapo ivyiza. (Haga. 1.1; Zeka. 1.1) Pakati pendapo imyaka 50, Abayuda bakalondiwanga sona ukukaziwa. U Ezila yo akaba nu luso pakukopela indaghilo, akafuma ku Babeloni nu kubuka ku Yelusalemu ukuti aye abakazye abantu ba Chala ukuti babike ukwiputa ukwa bwanaloli pabwandilo pa bumi bwabo. (Ezra 7.1, 6) Ngati mo ubulaghuzi ubwa Hagayi nu Zekaliya bukabatulila abantu ba Chala kwisinda ukuti babukilile ukumusubila u Yehova pa kabalilo ko bakakomana ni ntamyo, nuswe bulo amasiku ghano bungatwavwa ukuti tubukilile ukumusubila u Yehova ukuti akwiza pakutwavwa nanti twakomana ni ntamyo.—Mbupi. 22.19. w23.11 14-15 ¶2-3

Ka tungalangizya buli-buli ukuti tubaghanite Abakilisitu abamwitu? Izila yoka yo tungalangizizya ukuti tubaghanite ko kubasangalusya. Sona nanti mukubapelela abanji ichisa vikwiza ukubavwa ukuti “mukazannyanje.” (1 Tesa. 4.18) Choni cho chingatwavwa ukuti tubukilile ukughanana? Nanti tukubahobokela abakamu na bayemba bitu pa vintu vyo bapuvya napo chingaba chipala ukubomba bunubu, vingatwavwa ukuti tubukilile ukughanana. Choni cho amasiku ghano chakulondiwa sana ukulangizannya ulughano? Ennya ichifukwa cho umutumiwa u Pitala akalongosola po akanena ukuti: “Mughananaye mwebene nu lughano ulwakufikapo.” (1 Pita. 4.7, 8) Po ubumalilo ubwa chisu ichibibi ichi buli papipi sana, nkimba tukulindilila ichoni? Pa kabalilo ko u Yesu akanenagha na bamanyili bache, akanenela zila ukuti: “Abantu bosi muvyisu vyosi bakwiza pakubabenga pachifukwa icha nene.” (Mata. 24.9) Tukulondiwa ukubukilila ukuba bakukolelana umwakuti tubukilile ukuba basubaliwa kwa Yehova napo bangatubenga. Nanti akabalilo kosi tukulangizya ukuti tubaghanite abakamu na bayemba bitu, u Satana atakwiza pakutulesyannya lumo ichifukwa chakuti ulughano lukumamatizya poka vyosi umwakufikapo.—Filipi 2.1, 2. w23.11 13 ¶18-19

Ubwanaloli ubwa mu Mazyu gha Chala bwamaka sana. Nanti tukubamanyisya abantu ivya Yehova na mo abeleye tukwennya ivintu vimo ivyakuhobosya sana. Abantu bakuleka ukupusikiwa na mabumyasi agha Satana sona bakwanda ukwennya inkalo inyiza izya Baba witu. Bakuba nu muchizi ni lyogha ichifukwa cha maka ghache gho gha te ni mpaka. (Yesa. 40.26) Bakwanda ukusubila mumwache ichifukwa chakuti akubomba ivintu umwabugholosu. (Kumbu. 32.4) Bakumanyila ivyinji ukufuma ku mahala ghache aghapamwanya. (Yesa. 55.9; Loma 11.33) Sona bakusangalusiwa sana pakumanya ifundo iyakuti u Chala we lughano. (1 Yoha. 4.8) Nanti bakupalamila kwa Yehova, ulusubilo lwabo ulwakuti bakwiza pakwikala nu bumi kwa bwila na bwila ngati bana bache lukuba lwabwanaloli. Chapamwanya sana ukubavwa abantu ukuti bapalamile kwa Baba witu! Nanti tukubomba bunubu, u Yehova akutwennya ukuti “tukubombela poka imbombo.”—1 Koli. 3.5. w24.02 12 ¶15

Nanti we mumanyili uwa Bayibolo pamo abapapi bako bo Bakaboni ba Yehova, nkimba ukwinong’ona ivyakuti ungoziwa? Nanti momo vibeleye, ichi chakwibikila ichiza sana! Po muchili pakoziwa ichabwandilo mukulondiwa ukuti mwiyipe tasi kwa Yehova. Ka mungiyipa buli-buli kwa Yehova? Umwakumulayizya mulwiputo ukuti inti mumwiputaghe yuyo weka sona inti mubikaghe ubwighane bwache pabwandilo pa bumi bwinyu. Pisinda pache ukumulayizya u Yehova ukuti inti ubukilile ukumughana “nu moyo wako ghosi nu muzimu wako ghosi ni nyinong’ono zyako zyosi na maka ghako ghosi.” (Mali. 12.30) Ukwiyipa kukubombiwa po uli kwa weka pakasi pa uwe nu Yehova. Loli ulozyo lukubombiwa pabuzelu ukubalangizya abanji ukuti mukiyipa. Ukwiyipa kwinyu kwa palubazu sana, po mubukilile ukusunga ilayizyo lyinyu sona u Yehova akulindilila ukuti inti mubombe bunubu.—Ndumbi. 5.4. w24.03 2 ¶2; 3 ¶5

Isendwa yiliyosi yikukomana ni ntamyo. Ibayibolo likunenela zila ukuti abantu bo basendanite bakwiza “pakukomana ni ntamyo.” (1 Koli. 7.28) Chifukwa buli? Ichifukwa chakuti isendwa yikupangisya ukuti abantu babili bo bambula ukufikapo bikalaghe poka sona bakuba ukuti bakughana pamo ukubenga ivintu ivyakupambana. Abantu bo basendanite bangaba ukuti bakuliye ku malo aghakupambana na kikalile akakupambana. Pa kabalilo ko bachili batasendanite batangamanya akiza mo uwamwabo abeleye. Uwamwabo angaba ni nkalo zimo zyo zingapangisya intamyo musendwa. Mumalo mwakuti bamanye ukuti aliwesi abombapo zimo ukuti intamyo yiwepo sona ukwennya vyo bangabomba ukuti bamalane nayo, banganda ukumupa uwamwabo uwa musendwa inongwa. Banganda ukwinong’ona ukuti ukupatunkana pamo ukusoka yoyo zila inyiza. Loli ka ukupatunkana nu kusoka koko kungamazya intamyo? Awe. U Yehova akulonda ukuti umulume nu muchi babukilile ukwikala poka napo yumo angaba ni ntamyo. w24.03 16 ¶8; 17 ¶11

Nanti mwiyipa nu koziwa, ulusubilo lwinyu ulwakuti mukwiza pakwikala nu bumi ukwa bwila na bwila mu Paladayiso pachisu ichapasi, lungabukilila ukukula nanti mukubukilila ukumanyila ivya Yehova nu kumughana. Nanti mungabomba bunubu, vingabavwa ukuti mughomye ulusubilo lyinyu pa vintu vyo mukusubila. (Hebe. 5.13–6.1) Pamo mukakomana na vyo vikutambuliwa pa Aba Loma 5.2-4. Mubaghiye ukuti mukakomana na mayimba aghakupambana-pambana loli mukabukilila ukujimba sona u Yehova akalangizya ukuti akuhoboka numwe. Ichifukwa chakuti mwamanya ukuti u Chala abaghanite sona akuhoboka numwe, pa kabalilo aka muli ni vifukwa ivyiza ivyakulindilila ukupokela ivintu vyo abalayizizye. Tukusubila ukuti pa kabalilo aka, ulusubilo lwinyu lwaghoma nkani ukuchila mo lukabela kwisinda. Pamweka mukanda ukusubila ukuti ivintu ivi vikwiza pakubombiwa. Tutakukayikila ukuti vikubakwafya sana. Sona ivi vikakwafya ichintu chilichosi pa bumi bwinyu, vikasinta mo mukubombela ivintu ni mbumba yinyu, mo mukusalila ivintu na mo mukubombela na kabalilo kinyu. Umutumiwa u Pabuli akongelezyapo ifundo iyakulondiwa sana pa nkani iya lusubilo ni vintu vyo umuntu angavyagha nanti u Chala akuhoboka nawe. Akubasimikizya ukuti ivintu vyo mukusubila vikwiza pakubombiwa naloli.—Loma 15.13. w23.12 12-13 ¶16-19

Pa kabalilo ko twakomana ni ngelo, mo tukwiyivwila, mo tukwinong’onela sona mo tukubombela ivintu vitangayana na mo twabombelagha akabalilo kosi. Akabalilo kamo tungennya ukuti ingelo zikukonkana-konkana bulo. Nkimba u Yehova akutwavwa buli-buli nanti twanda pakutamiwa inyinong’ono? U Yehova akutusimikizya ukuti akwiza pakutughomya. Nanti isitima yakomana ni chimpepo ichakoghofya pa nyanja, yinganda ukuyingana nkani. Ukuti yitakayinganaye nkani, isitima izyinji zili ni vintu mulubazu imbali zyosi vyo vikuyavwa. Ivintu ivi vikuyavwa isitima ukuti yitakayinganaye nkani, umwakuti abantu bo bakwelite bakuba bakufighililiwa sona bakuya pakufika ko bakuya. Loli ivintu ivi vikubomba akiza imbombo nanti isitima yikwenda. Umwakuyana bulo u Yehova akwiza pakutughomya nanti twabukilila ukuba basubaliwa pa kabalilo kosi ko twakomana ni ngelo. w24.01 22 ¶7-8

Nanti mukoghopa mwilalusye ukuti, ‘Nkimba vintu buli vyo u Yehova ambombela?’ Mwinong’onelepo pa vyo u Yehova apelite. Umwakufwanikizya, “ennya” mo u Yehova akupwelelelela iviyuni na maluba vyo atakavipela mu chifwani chache sona vitakumwiputa. Nanti tungabomba bunubu vingatwavwa ukuti tughomye ulusubilo lwitu ulwakuti nuswe bulo akwiza pakutwavwa. (Mata. 6.25-32) Inong’onela sona vyo u Yehova ababombela ababombi bache. Mungamanyila inkani yimo iya mu Bayibolo iya muntu yo akalangizya ulwitiko ulwakughoma pamo mungabelenga inkani iyakulongosola ivya bumi ubwa mubombi wa Yehova uwa masiku ghano. Umwakongelezyapo, mwinong’onelepo pa vyo u Yehova ababombeyepo kale pa bumi bwinyu. Ka akabavwa buli-buli ukuti mumanye ubwanaloli? (Yoha. 6.44) Nkimba akwamula buli-buli inyiputo zyinyu? (1 Yoha. 5.14) Nkimba isiku lililyosi mukupindula buli-buli ichifukwa cha sembe iya Mwana wache umughaniwa?—Efe. 1.7; Hebe. 4.14-16. w24.01 4 ¶6; 7 ¶17