Mukane Umuzimu uwa Bupafu gho Ghuli Muchisu Ichi
ABANTHU abinji amasiku ghano, bakulonda ukuti abanthu bababombelaghe ivinthu muzila iyapalubazu. Napo bangababombela bunubu, loli pope bulo bakulonda ukuti bababombele ivyinji. Akinong’onele akabupafu na kakusita ukupalizya aka, kakulangizya ukuti tuli mumasiku aghabumalilo.—2 Timo. 3.2.
Ukuba nu moyo uwabupafu te kwachilendo. Ichifukwa chakuti u Adamu nu Eva bakalondagha ukwisalila bene ichiza ni chibibi, ivyakufumapo vyache vikaba vibibi sana. Imyaka iyinji yikati yendapo Umwene Uziya uwa ku Yuda akinong’ona ukuti wakwenelela ukupeleka isembe pi tempeli, loli akapuvya sana pakubomba bunubu. (2 Syambu. 26.18, 19) Umwakuyana bulo, Abafalisayi na Basadukayi, bakasubilagha ukuti bapamwanya sana kwa Chala, ichifukwa chakuti bakaba bizukulu ba Abulahamu.—Mata. 3.9.
Tuzyunguliliwe na banthu bo bapafu, sona batakwinong’onela abanji, polelo inkhalo zyabo zingatukwafya. (Gala. 5.26) Tunganda ukwinong’ona ukuti abanthu batubombelaghe ivinthu muzila iyakulangizya ukuti twe bapamwanya. Choni cho chingatwavwa ukuti tutakasendeleko inkhalo zyabo? Tukulondiwa ukwivwisya mo u Yehova akwinong’onela. Ifundo zibili izya mu Bayibolo izi, zingatwavwa pa nkhani iyi.
U Yehova weyo akusala ivinthu vyo tukulondiwa ukupokela. Za twennye ivifwanikizyo vimo.
Pa ndondomeko iya mumbumba, u Yehova akulonda ukuti umulume iyivwange ukuti akuchindikiwa nu muchi wache sona wepe umuchi iyivwange ukuti umulume wache amughanite. (Efe. 5.33) Abanthu bo basendanite bakulondiwa ukuti balangizannyange ulughano. (1 Koli. 7.3) Abapapi bakulonda ukuti abana babo babivwilaghe sona abana bope bakulonda ukuti abapapi babo babalangizyange ulughano nu kubavwa.—2 Koli. 12.14; Efe. 6.2.
Abasongo bo bakulimbikila imbombo muchipanga bakulondiwa ukuchindikiwa. (1 Tesa. 5.12) Napo vili bunubu, loli bate nu budindo ubwakubasalila abakamu na bayemba ivyakubomba.—1 Pita. 5.2, 3.
U Chala apelekite ubwabuke ku maboma agha chisu, ubwakuti ghasendaghe imisonkho sona ghachindikiwanje na banthu bo ghakubalaghila.—Loma 13.1, 6, 7.
Umwalughano, u Yehova akutupa ivyinji ukuchila vyo tukulondiwa. Ichifukwa chakuti twe batulanongwa, amalipilo ghache bo kufwe. (Loma 6.23) Loli u Yehova akutusaya muzila izya kulekanalekana ichifukwa cha lughano lwache ulusubaliwa. (Sali. 103.10, 11) Tukupokela ulusayo pamo ulusako lulilosi ichifukwa cha chisa chache ichikulu.—Loma 12.6-8; Efe. 2.8.
MO TUNGABOMBELA UKUTI TULEGHUKE UMUZIMU UWA BUPAFU
Muchebe ni nkhalo izya muchisu ichi. Ukusita ukumanya, tunganda ukwinong’ona ukuti tukulondiwa ivinthu ivyinji ukuchila abanji. U Yesu akalangizya mo ivi vingabela, pakunena ichifwanikizyo icha bambombo bo bakapokela isalabazya yoka. Abambombo bamo bakanda ukubomba pandabindabi nkhani sona bakabomba isiku lyosi, po bamo bakabomba bulo 1 awala. Igulu ilya bwandilo likinong’onagha ukuti inthi lipokele amalipilo aghinji ukuyana ni mbombo yo likabomba. (Mata. 20.1-16) Pakunena vyo tukumanyilako ku chifwanikizyo ichi, u Yesu akalangizya ukuti abamanyili bache babaghiye ukwikutisiwa na vyo u Chala akabapanga.
Abanavuli bo bakabomba imbombo isiku lyosi bakinong’onagha ukuti inthi bapokele amalipilo aghinji
Mupalizyanje sona mutakadandaghulaghe. (1 Tesa. 5.18) Mumweghelele umutumiwa u Pabuli, yo atakalabagha abakamu na bayemba aba ku Kolinti ukuti bamupange ivinthu ivyakumubili napo akaba nu bwabukw ubwakubomba bunubu. (1 Koli. 9.11-14) Tukulondiwa ukuti tupalizyanje ivinthu vyosi vyo batupa sona tuleghukaghe umuzimu uwabupafu.
Umutumiwa u Pabuli atakalabagha ubutuli ubwa kumubili
Mubanje bakwiyisya. Nanthi yumo akwiyinong’onela nkhani, anganda ukwiyivwa ukuti wapamwanya nkhani ukuchila mo abeleye. Ukwiyisya kungatwavwa ukuti tutakinong’onaghe muzila yiniyi.
Ichifukwa chakuti umulaghuzi u Daniyeli akaba wakwiyisya, vikapangisya ukuti abe wapalubazu sana kwa Yehova
Umulaghuzi u Daniyeli, chifwanikizyo ichiza sana pa nkhani iya kwiyisya. Mo imbumba yabo yikabela, mo akabonekelagha, amahala gho akaba nagho sona ubudindo bo akaba nabo, nge vikamupangisya ukuti iyivwange ukuti abantu babombaghe nawe ivinthu umwapalubazu sona apokelaghe ivinthu ivyapamwanya. (Dani. 1.3, 4, 19, 20) Napo vikaba bunubu, loli u Daniyeli akabukilila ukuba wakwiyisya sona inkhalo iyi yikapangisya ukuti abe wapalubazu sana kwa Yehova.—Dani. 2.30; 10.11, 12.
Za tukane umuzimu uwabupafu nu wakwiyennya gho ghuli paliposi muchisu ichi. Mumalo mwache, nge twabukilila ukuba bakuhoboka na chilichosi cho u Yehova akutupa ichifukwa cha chisa chache ichikulu.