Za

1 Ku mbatukulu Zu kô kabâ, mpe Zu na Nzambi kabâ, mpe Zu nzambi* yabâ. 2 Yandi wabâ ku mbatukulu na Nzambi. 3 Bima biabiansoni mu nzila ya yandi biayilamana, mpe ka kwena na kani tima timosi ko tialembo yilama mu nzila ya yandi.

Bima biayilama 4 mu nzila ya yandi biabakila luzingu, mpe luzingu lwayizi bâ mutsamina wa bantu. 5 Mpe mutsamina wa wuta kenga ku mpimpa ya ngolo,* kâ mpimpa ya ngolo ka yimunungini’â ko.

6 Muntu wumosi batambika ntiana timonikisi tia Nzambi; nkumbu’andi yeri Za. 7 Yandi wayiza ntiana mbangi, mu tâ timbangi mu bungu dia mutsamina ngatu bantu ba mpila na mpila bakwikila mu nzila ya yandi. 8 Ka bâ mutsamina wo ko, kâ wafweti tâ timbangi mu mutsamina wo.

9 Mutsamina wa matieleka wukengaka kwe bantu ba mpila na mpila wafweti kwiza mu nza. 10 Wabâ mu nza, mpe nza yayilama mu nzila ya yandi, kâ nza ka yamuzaba ko. 11 Wayiza mu nzo ya yandi beni, kâ bantu ba kanda diandi ka bamutambula ko. 12 Kâ, kwe bô babansoni bamubwana, wabahana nswa wa bâ bala ba Nzambi, mu bungu ti basarila timinu mu nkumbu’andi. 13 Mpe ka babutuka mu menga ko, peleko mu luzolo lwa musunia, peleko mu luzolo lwa muntu, kâ mu luzolo lwa Nzambi.

14 Buna Zu diayizi bâ muntu mpe wabâ ha kati dieto, mpe tamona mukembo’andi, ntiana mukembo wa mwana wa wumosi wutûkiri kwe tata; mpe wafuluka mu bweso* bwa Nzambi na mu matieleka. 15 (Za watâ timbangi mu yandi, yee, wakawula: “Ni mu bungu dia yandi natâ, ‘Muntu wuta kwiza ha manima mani yôkele ku matu mani, mu bungu ti wazinga ntete meno.’”) 16 Mu bungu ti beto bansoni tabakiri bima biabingi bi kafulukiri na bio, bweso bwa nzitukulu ha zulu bweso bwa nzitukulu. 17 Mu bungu ti Musiku mu nzila ya Mose bahana wo, bweso bwa nzitukulu na matieleka biayiza mu nzila ya Yezu Kristo. 18 Ka kwena na kani muntu ko weka mona Nzambi; nzambi ya yimosi yabutuka ye ha lweka* lwa Tata ni yandi watuzabikisa Yandi ni nani.

19 Tio ni timbangi tia hana Za mu ntangu Bayuda batambika banganga-nzambi na Balevite tûka ku Yerusaleme mu mu yula: “Nge nani?” 20 Watambula wo, ka kala wo ko, watâ: “Meno ka Kristo’â ko.” 21 Mpe bamuyula: “Buna nge nani? Nge ni Eliya?” Wavutula: “Ka meno’â ko.” “Nge ni Mbikuri?” Mpe wavutula: “Kâni!” 22 Buna bamutêla: “Nge nani? Tu têla ngatu tahana mvutu kwe bô batutambikiri. Bwe ta tâ mu nge beni?” 23 Watâ: “Meno ni zu dia muntu dita kawula ku sese,* ‘Sungikeno nzila ya Yehova,’* ntiana bwa tâ wo mbikuri Izayi.” 24 Bafarize batambika bantu bo. 25 Dieka bo bamuyula: “Buna mu bungu dia nti ta batisa, tala ti nge ka Kristo’â ko peleko Eliya peleko Mbikuri?” 26 Za wabavuturila: “Meno mu mamba nibatisaka. Muntu wumosi wê ha kati dieno wu lulembolo zaba, 27 wô kwiza ha manima mani, mpe ka ndiena wa lunga ko mu sutula misinga mia mapapa mandi.” 28 Misamu mio ku Betani mieri yôkelaka ku lweka lwakaka lwa Zurde, kweri batisilaka Za.

29 Tilumbu tialanda wamona Yezu weri kwizaka kwe yandi, mpe watâ: “Taleno Mwana-Timeme wa Nzambi wukatulaka masumu ma nza! 30 Ni mu bungu dia yandi ntêleke: ‘Muntu wuta kwiza ha manima mani yôkele ku matu mani, mu bungu ti wazinga ntete meno.’ 31 Meno mpe ka namuzaba ko, ntiangu nayizi batisa mu mamba ngatu kazabakana ku Israele.” 32 Za watâ mpe timbangi eti: “Namona mpeve santu yakôka tûka ku zulu ntiana bembe, mpe yatatamana mu bâ ha zulu yandi. 33 Meno mpe ka namuzaba ko, kâ Yandi wakuntambika mu batisa mu mamba wakuntêla: ‘Wô wu mona mpeve yikôkela mpe yitatamana mu bâ, ni yandi batisaka mu mpeve santu.’ 34 Mpe namweni wo, mpe natêle timbangi ti yandi ni Mwana wa Nzambi.”

35 Tilumbu tiakaka tialanda, Za watelama na milongoki miandi miole, 36 mpe bu keri talaka Yezu weri kwe yende, watâ: “Taleno Mwana-Timeme wa Nzambi!” 37 Milongoki miandi mia miole bu miawâ bo, mialanda Yezu. 38 Buna Yezu wabaluka, mpe bu kamona ti yandi beri landaka, wabatêla: “Nti luta dinga?” Bamutêla: “Rabi (tala ti babanguri yo, yizololo tâ, “Mulongi”), kwe bêlaka?” 39 Wabatêla: “Yizeno, mpe mbo lumona.” Buna bayenda mpe bamona ku keri bêlaka, mpe babâ na yandi mu tilumbu tîna; kampe 16 heure yabâ. 40 Andre, mpangi ya Simo Piere, mosi mu ba bole wabâ, bawâ misamu mia tâ Za mpe balanda Yezu. 41 Watoko kwe monekena yaya’andi Simo, mpe wamutêla: “Masiya tumweni” (tala ti babanguri yo, yizololo tâ, “Kristo”), 42 mpe wamunata kwe Yezu. Yezu bu kamumona, watâ: “Nge ni Simo, mwana wa Za; mbo bakutâ nkumbu Sefase” (Yi babangulaka mu “Piere”).

43 Tilumbu tialanda, Yezu weri nandi kenda ku Galile. Wamona Filipe mpe wamutêla: “Kundanda.” 44 Filipe Musi-Betisayida wabâ, mumvuka wa Andre na Piere. 45 Filipe waye monekena Natanayele mpe wamutêla: “Muntu wu zonzelaka Musiku wa Mose na matsonoko ma Bambikuri yandi tumweni, ni Yezu mwana wa Yozefe, Musi-Nazarete.” 46 Kâ Natanayele wamutêla: “Ngano tima tia mbote tilendi duka ku Nazarete?” Filipe wamutêla: “Yiza watala.” 47 Yezu wamona Natanayele weri kwizaka kwe yandi, mpe watâ mu bungu dia yandi: “Taleno Musi-Israele wa matieleka wulembolo na bungungu mu yandi.” 48 Natanayele wamutêla: “Bwe kunzabiri?” Yezu wamuvuturila: “Ntete Filipe kakutâ mbila bu bêleke wa zakala ku nsi’a mufige, nge mweniki.” 49 Natanayele wavutula: “Rabi nge ni Mwana wa Nzambi, nge ni Mutinu wa ku Israele.” 50 Yezu wamuvuturila: “Kwikiri mu bungu ti nikutêlele ti ku nsi’a mufige nikumweni? Mbo mona misamu miyôkele misamu mi mu bunene.” 51 Buna wamutêla: “Nkatika matieleka nita lu têla, mbo lumona zulu dizibuka mpe mbazi za Nzambi zinaka mpe zikôka kwe Mwana muntu.”