Za

2 Mpe tilumbu tia bitatu, malaki mabâ ku Kana, ku Galile, mpe nguri ya Yezu kûna kabâ. 2 Batikisa mpe Yezu na milongoki miandi ku malaki mo ma makwela.

3 Vinu bu diawa, nguri ya Yezu wamutêla: “Ka basiri’â na vinu ko.” 4 Kâ Yezu wamutêla: “Mukento, bwe wuta tu tarila nge na meno?* Ntangu’ani ka yeka’eti fwana ko.” 5 Nguri’andi watâ kwe bantu beri salaka: “Seno miamiansoni mi kalutêla.” 6 Mayuki 6 ma matari mabâ kô, ntiana bweri wa lombaka misiku mia bunkete mia Bayuda, muna yuki bidezolo biole peleko bitatu bieri kotaka mûna. 7 Yezu wabatêla: “Fuluseno mayuki mo mu mamba.” Buna batomo ma fulusa. 8 Ha manima wabatêla: “Bwawu bu bongeno ndambu, mpe nateno yo kwe ntwarisi ya malaki.” Buna bamunatina yo. 9 Ntwarisi ya malaki yabimba mamba ma batitula mu vinu, ka zaba ko ka kwe diatûka (kâ bisari biabaka mamba biazaba kwe diatûka). Ntwarisi ya malaki yatâ mbila bakala dieri kwelaka, 10 mpe wamutêla: “Bantu bakaka vinu diyôkele bubote batoko hanaka, mpe ha manima bu dibaka bantu, mbo badukisa dio dilembolo dia nkatika dia mbote. Kâ nge lundiri vinu diyôkele bubote tii bwawu bu.” 11 Yezu wayirika misamu mio ku Kana ya Galile: yeri mbatukulu ya bimangu biandi. Wasongela mukembo’andi mpe milongoki miandi miasa timinu mu yandi.

12 Ha manima, yandi na nguri’andi, na mpangi zandi mpe na milongoki miandi bakôka ku Kafarnawome, kâ ka bayôkesa bilumbu biabingi kûna ko.

13 Pake ya Bayuda pene-pene yabâ, mpe Yezu wanaka ku Yerusaleme. 14 Wabwana mu tempelo bantu beri tekaka ngombe, bimeme na mabembe, na bantu beri sobesaka mbongo bazakala ha chaise zawu. 15 Buna bu kamana yirika tisikoti mu misinga, wabakuma babansoni mu tempelo na bimeme biawu, mpe na ngombe zawu, walosa ha mutoto mipata mia bantu beri sobesaka mbongo, mpe wabwisa meza mawu. 16 Mpe watâ kwe bô beri tekaka mabembe: “Nateno bima bi mala! Mpe bîkeno mu titula nzo ya Tata’ani nzo ya nkari!”* 17 Milongoki miandi miabambuka ti watsonama: “Luhemo mu bungu dia nzo’aku mbo lulema mu meno ntiana tiya.”

18 Buna Bayuda bamuvuturila: “Ntia tidimbu lendi tu hana mu tu songela ti nswa wê naku wa yirika misamu mi?” 19 Yezu wabavuturila: “Bwiseno tempelo yi mpe mbo nitelamasa yo mu bilumbu bitatu.” 20 Buna Bayuda batâ: “Tempelo yi mu mvula 46 batungila yo, kâ nge mbo telamasa yo mu bilumbu bitatu?” 21 Kâ tempelo yi keri zonzelaka ni nitu’andi. 22 Buna bu kavumbuka kwe ba fwa, milongoki miandi miabambuka ti ni bo keri vulu tâka, mpe bakwikila Matsonoko na misamu mia tâ Yezu.

23 Kâ bu kabâ ku Yerusaleme ku malaki ma Pake, bantu babingi basa timinu mu nkumbu’andi bu bamona bimangu bi kasa. 24 Kâ Yezu ka bâ na lukwikulu mu bawu ko mu bungu ti wabazaba babansoni, 25 mpe ka bâ na nsatu ko bamubangurila misamu mu bantu, mu bungu ti wazaba mio mie mu muntu.