Like

3 Mu mvula 15 za luyâlu lwa Tibere Sezare, Ponse Pilate bu keri guvernere ya Yude, Erode bu keri tumaka ku Galile, Filipe yaya’andi bu keri tumaka ku tizunga tia Iture na tia Trakonitide mpe Lisaniase bu keri tumaka ku tizunga tia Abilene, 2 mu bilumbu bia mfumu za banganga-nzambi Ane na Kayife, Za mwana wa Zakari wabaka nsangu za Nzambi ku sese.*

3 Buna wayenda mu tizunga tiatiansoni tieri pene-pene na Zurde, bateme keri samunaka yeri tidimbu tia nsobolo ya mabanza mu bungu dia mulemvo wa masumu, 4 ntiana bu batsoneka wo mu buku dia mbikuri Izayi: “Zu dia muntu dita kawula ku sese:* ‘Kubikeno nzila ya Yehova!* Sungikeno nzila zandi. 5 Midimba* miamiansoni bafweti mia fulusa, mpe miongo miamiansoni mia mila na mia fioti bafweti mia betola; nzila za tengama bafweti za sungika mpe nzila zê na makuba bafweti za lengesa; 6 mpe bantu* babansoni mbo bamona mvukulu ya Nzambi.’”*

7 Buna wabatika mu tâ kwe pôka dia bantu dieri kwizi batusuku kwe yandi: “Beno bala ba mpiri, nani walulwengese mu dioka nkesi zita kwiza? 8 Buna, yirikeno misamu misongela ti lusobele mabanza. Ka lubatikandi mu tâ ti: ‘Tata’eto ni Abrahame.’ Mu bungu ti wa nita lu têla, Nzambi lendi hana bala kwe Abrahame mu nzila ya matari ma. 9 Diangana soka dieka ha mudza wa muti. Muti ni muti wulembo butaka mbutu za mbote mbo bazenga wo, mpe mbo balosa wo ku tiya.”

10 Mpe pôka dia bantu diamuyula: “Buna nti tufweti sa?” 11 Yandi wabavuturila: “Bîka ti muntu wê na binkuti biole* kakabila muntu wulembolo na tinkuti, mpe bîka ti muntu wê na tima tia dia kasila mpe bo.” 12 Bantu batotaka mpaku mpe bayiza mu batusu mpe bamutêla: “Mulongi, nti tufweti sa?” 13 Yandi wabatêla: “Ka lulombandi* ntenso mu ntalu ya mpaku.” 14 Binwani mpe biayizi mu yula: “Nti tufweti sa?” Mpe yandi wabatêla: “Ka lubongandi mbongo za bantu mu ngolo peleko ka lufundisandi muntu mu misamu mia bungungu, kâ yangalaleno mu mbongo zi balufutaka.”

15 Kâ bantu kêla beri kêlaka, mpe babansoni yula beri tiyulaka mu mitima miawu mu bungu dia Za: “Ngano yandi ka Kristo’â ko?” 16 Za wabatêla babansoni: “Meno beno nita batisa mu mamba, kâ wô kundiôkele mu ngolo mwizu kata kwiza, mpe ka ndiena wa lunga ko mu mu katula mapapa. Yandi mbo kalubatisa mu mpeve santu na mu tiya. 17 Tipelo tiandi tia yengezela ha koko kwandi tiena mu tomo tsemesa mbuka’andi ya tutila mbutu, mpe ble kakutakasa mu nzo’andi yi balundilaka bima, kâ titîti mbo kayoka tio ku tiya tu balendi lembo honda.”

18 Wahana mpe malongi mamingi makaka mpe watatamana mu samuna nsangu za mbote kwe bantu. 19 Kâ Za wasemba Erode mfumu ya tizunga tio, mu bungu dia Erodiade mukento wa yaya’andi na mu bungu dia misamu miamiansoni mia mbi mia yirika Erode. 20 Erode wavutu yirika misamu miakaka mia mbi: Watûla Za ku boloko.

21 Buna bantu babansoni bu bamana batusu, Yezu mpe wabatusu. Bu keri sambilaka, mazulu mazibuka, 22 mpe mpeve santu yeri monekaka ntiana bembe yamukôkela, mpe zu diatûka ku zulu diatâ: “Nge ni Mwana’ani wu ntomono zolo, wu ntamburi.”