Za

3 Kweri na muntu wumosi ha kati dia Bafarize, nkumbu’andi Nikodeme; mfumu yeri ya Bayuda. 2 Muntu wo waye mu tala mu mpimpa mpe wamutêla: “Rabi, tuzebi ti nge mulongi wena wutûkiri kwe Nzambi, mu bungu ti ka kwena muntu ko wulendi sa bidimbu bita sa tala ti Nzambi kena na Yandi ko.” 3 Yezu wamuvuturila: “Nkatika matieleka nita ku têla, ka kwena muntu ko wulendi mona Timfumu tia Nzambi tala ti ka vutulu’â butuka* ko.” 4 Nikodeme wamutêla: “Bwe muntu wulendi butukila tala ti nunini? Ngano lendi kota mu moyo wa nguri’andi mu butuka mbala ya nzole?” 5 Yezu wamuvuturila: “Nkatika matieleka nita ku têla, tala ti muntu ka butukiri’â mu mamba na mu mpeve ko, ka lendi’â kakota mu Timfumu tia Nzambi ko. 6 Tio tibutukiri mu musunia, musunia wena, mpe tio tibutukiri mu mpeve, mpeve yena. 7 Kuyitukuandi mu bungu ti nikutêlele: Lufweti vutu butuka. 8 Titembo kô ku tizololo tipûpaka, mpe nge ni lwaza kwa wâka, kâ kuzebi’â ko kwe titûkiri mpe kwe tita kwenda. Mpila mosi kwa mpe kwe bô babansoni babutukiri mu mpeve.”

9 Nikodeme wamuvuturila: “Bwe milendi salamana?” 10 Yezu wamuvuturila: “Nge mulongi wa Israele wena, kâ kuzebi’â misamu mio ko?” 11 Nkatika matieleka nita ku têla, misamu mi tuzebi tuta zonzela, mpe timbangi tuta hana mu misamu mi tamona, kâ ka luta tambula timbangi tieto ko. 12 Tala ti niluzonzele misamu mia ha mutoto mpe ka luta kwikila ko, bwe lukwikila tala ti niluzonzele misamu mia ku zulu? 13 Ku lweka lwakaka, ka kwena muntu ko wanaka ku zulu, diambu’eti wô watûka ku zulu, Mwana muntu. 14 Mpila mosi mpe Mose bu katelamasa nioka ku sese,* Mwana muntu mpe bafweti mu telamasa, 15 ngatu bô babansoni bakwikila mu yandi babaka luzingu lwa mankululu.

16 “Mu bungu ti Nzambi watomo zolo nza, ntiangu kahana Mwana’andi wa wumosi ngatu bô babansoni basarila timinu mu yandi ka bafukandi, kâ babaka luzingu lwa mankululu. 17 Mu bungu ti Nzambi ka tambika Mwana’andi ko mu nza, mu fundisa nza, kâ ngatu nza yavûka mu nzila ya yandi. 18 Wô sarila timinu mu yandi ka bamufundisa ko. Wô lembo sarila timinu mu yandi tibakiriri mfundusu, mu bungu ti ka sariri’â timinu ko mu nkumbu ya Mwana wa wumosi wa Nzambi. 19 Mfundusu mu musamu ewu yisikamane: mutsamina wayiza mu nza, kâ bantu bazolo mpimpa ya ngolo* kani bazolo mutsamina, mu bungu ti nsalulu zawu za mbi zeri. 20 Mu bungu ti wô sarilaka misamu mia mbi mutsamina kayinaka mpe ka kwizaka ku mutsamina ko, ngatu nsalulu zandi zalembo zabakana. 21 Kâ wô sarilaka misamu mia sungama ku mutsamina kakwizaka ngatu watomo zabakana ti nsalulu zandi zidelakane na luzolo lwa Nzambi.”

22 Ha manima ma misamu mio, Yezu na milongoki miandi bayenda ku mahata ma fioti ma Yude, mpe wayôkesa mwa ntangu kûna na bawu, mpe bantu keri batisaka. 23 Kâ Za mpe bantu keri batisaka ku Enone, pene-pene na Salime, mu bungu ti mamba mamingi mabâ kûna, mpe bantu mwizu kwa beri kwizaka mu batusu; 24 mu bungu ti ka batikotesela Za ku boloko ko.

25 Milongoki mia Za miadisikita na Muyuda wumosi mu musamu wutariri musiku wa bunkete. 26 Buna bayiza kwe Za mpe bamutêla: “Rabi, muntu wabêle na nge ku simu diakaka dia Zurde, wô wu watêla timbangi, diangana bantu kata batisa mpe babansoni kwe yandi bata kwenda.” 27 Za wabavuturila: “Muntu ka lendi’â kabaka na kani tima ko tala ti Nzambi ka mu heni’â tio ko. 28 Beno beni mbangi zena ti ebu natâ, ‘Ka ndiena Kristo ko, kâ meno batambika ku matu mandi.’ 29 Mukento wu bata kwela, wa bakala dita kwela wena, kâ ndiku ya bakala dita kwela bu katelama hô mpe bu kamuwâ, nsayi yayingi yibâ nandi mu bungu dia zu dia bakala dita kwela. Buna nsayi’ani yeka ya lunga. 30 Yandi fweti tatamana mu naka, kâ meno mfweti tatamana mu kôka.”

31 Wô tûkiri ku zulu yôkele bô babansoni bakaka. Wô tûkiri ha mutoto muntu wa mutoto wena mpe misamu mia mutoto kazonzelaka. Wô tûkiri ku zulu yôkele bô babansoni bakaka. 32 Timbangi kata hana mu mio mi kamona na mi kawâ, kâ bantu ka bata tambula timbangi tiandi ko. 33 Muntu wô tamburi timbangi tiandi, singase ti Nzambi matieleka katâka. 34 Mu bungu ti muntu wô Nzambi wu katambikiri misamu mia Nzambi katâka, mu bungu ti Nzambi mpeve katomo hombolaka. 35 Tata zololo Mwana mpe waheni bima biabiansoni ha moko mandi. 36 Wô sarila timinu mu Mwana luzingu lwa mankululu lwe nandi; wô kolamana Mwana ka baka luzingu ko, kâ nkesi za Nzambi mbo zitatamana mu bâ kwe yandi.