Wa ntete kwe Bisi-Korente
3 Buna bampangi, ka nalendele’â ko mu lu zonzela ntiana kwe bantu ba timpeve, kâ ntiana kwe bantu ba tinsuni, ntiana kwe bala ba fioti mu Kristo. 2 Nalunwikini mabeni, kâ ka naluheni’â bidia bia dema ko, mu bungu ti ka lwabêle’â na ngolo zazingi ko. Diangana, bwawu bu mpe ka lwena na ngolo zazingi ko, 3 mu bungu ti mu tinsuni lwatiri. Mu bungu ti ha kati dieno timbanda tie neno na tifu tia bakana, ngano ka wuta songela ko ti bantu ba tinsuni lwena mpe ntiana bantu ba nza luta kwe diatiri? 4 Mu bungu ti wumosi bu katâka, “Meno Paulo kumvwiri,” kâ wakaka bu katâka, “Meno Apolose,” ngano ka luta sarila misamu ko ntiana bantu ba nza?
5 Buna Apolose ni nani? Yee, Paulo ni nani? Bisari bia mpamba bialubakisa mu kwizi kwikila, ntiana Mfumu bu kahana lenda kwe muna muntu mu bawu. 6 Meno nakuna, Apolose wamwanga mamba, kâ ni Nzambi ta tatamana mu kurisa, 7 ntiangu ka muntu’â ko wuta kuna peleko wuta mwanga mamba wê mfunu, kâ ni Nzambi ta kurisa. 8 Ni bu sa ti wô ta kuna na wô ta mwanga mamba mu bumosi bena,* kâ muna muntu mbo kabaka musendo’andi tintwari na tisalu tiandi. 9 Mu bungu ti ndiku za tisalu za Nzambi twena. Beno ni musitu wu kasalaka, ntungulu ya Nzambi.
10 Tintwari na bweso bwa nzitukulu bwa Nzambi bu bakungana, natûla bandu ntiana mfumu ya tisalu yitomono zaba tisalu tiandi, kâ muntu wakaka wizi ha tungila. Kâ bîka ti muna muntu kasa keba mu mpila yi kata ha tungila. 11 Mu bungu ti ka kwena muntu ko wulendi tûla bandu diakaka, diambu’eti dio kwa di batûla, Yezu Kristo. 12 Bwawu bu tala ti batungiri ha zulu bandu diango mu ore, mu arza, mu matari ma ntalu, mu muti, mu matîti, peleko mu nianga, 13 tisalu tia muna muntu mbo tizabakana buna bu tiena, mu bungu ti tilumbu tia ntontolo mbo tizabikisa tio, diangana mbo tizabakana mu nzila ya tiya, mpe tiya twawu beni mbo tusongela ntia mpila tisalu muna muntu kasariri. 14 Tala ti tima ti tungiri muntu ha zulu bandu titatamane, mbo kabaka musendo; 15 tala ti tisalu tia muntu wo tiyiri ku tiya, ka sâla na tima ko, kâ yandi beni mbo kavûka; ni bu sa ti ni bo, mbo kavûka ntiana yandi yôkele ku tiya.
16 Ngano ka luzebi’â ko ti beno ni tempelo ya Nzambi mpe mpeve ya Nzambi mu beno yena? 17 Tala ti muntu wufukisi tempelo ya Nzambi, Nzambi mbo kamufukisa; mu bungu ti tempelo ya Nzambi ya santu yena, mpe beno ni tempelo yo.
18 Muntu ka tihunandi: Tala ti muntu ha kati dieno benzi ti ndwenga zê nandi mu nza yi,* bîka ti kizi kabâ tizoba, ngatu kabâ na ndwenga. 19 Diangana ndwenga za nza yi buzoba bwena kwe Nzambi, mu bungu ti watsonama: “Bantu ba ndwenga kabwilaka mu mayela mawu ma mbi.” 20 Musamu wakaka: “Yehova* zebi ti mbanzulu za bantu ba ndwenga ka zena salu ko.” 21 Buna na kani muntu ka tilwonandi mu bantu; mu bungu ti bima biabiansoni bia beno biena, 22 ni bu wubâ Paulo peleko Apolose peleko Sefase* peleko nza peleko luzingu peleko lufwa peleko bima bia lumbu ti peleko bima bikwiza, biabiansoni bia beno biena; 23 mpe beno Kristo lu vwiri; mpe Kristo Nzambi mu vwiri.