Marke

10 Tûka kûna, watelama mpe wayenda mu ndilu ya Yude ku simu diakaka dia Zurde, pôka dia bantu diavutu mu zungirila. Mpe ntiana kwa bu keri saka, wabatika mu vutu ba longesa. 2 Mpe Bafarize bapusana mu mu tonta, mpe bamuyula tala ti bakala nswa wê nandi wa honda makwela na mukento’andi. 3 Yandi wabavuturila: “Mose ntia ntumunu kaluhana?” 4 Bawu bamutêla: “Mose wahana nzila ya tsoneka mukanda wusongela ti mukento bakumini na mu honda makwela na yandi.” 5 Kâ Yezu wabatêla: “Ni mu bungu dia mitima mieno mia ngolo kalutsonekena ntumunu yo. 6 Kâ, tûka ku mbatukulu ya ndilukulu, ‘wabasala mukento na bakala. 7 Ntiangu bakala mbo kasisa tata’andi na nguri’andi, 8 mpe ba bole mbo babâ musunia wumosi,’ buna ka basiri’â bole ko, kâ musunia wumosi. 9 Ntiangu muntu ka wuhambasandi bio bi vukase Nzambi.” 10 Bu bavutu bâ mu nzo, milongoki miabatika mu mu yula biyuvu mu musamu wo. 11 Yandi wabatêla: “Wô honda makwela na mukento’andi mpe kwelele mukento wakaka, siri bunsuza ha matu ma mukento wa ntete, 12 mpe tala ti mukento, bu kameni honda makwela na bakala diandi kwelele bakala diakaka, siri bunsuza.”

13 Bantu babatika mu mu natina bala ba fioti ngatu kabasimba, kâ milongoki miababamina. 14 Bu kamona bo, Yezu wafwema mpe wabatêla: “Bîkeno bala ba fioti biza kwe meno; ka ludingandi mu ba kabakasa, mu bungu ti Timfumu tia Nzambi tia bô bê ntiana bawu tiena. 15 Wa matieleka nita lu têla, wô lembo bwana Timfumu tia Nzambi ntiana mwana wa fioti, kani kabwe ka kota mô ko.” 16 Wabonga bala mu moko mandi mpe wabatika mu ba sakumuna bu kabatenseka moko.

17 Bu keri kwe yende mu nzila, bakala dimosi diadioka, diafukama ha matu mandi mpe diamuyula: “Mulongi wa mbote, nti mfweti sa mu baka luzingu lwa mankululu?” 18 Yezu wamutêla: “Mu bungu dia nti ta kuntâ muntu wa mbote? Muntu wumosi kwa wê wa mbote, ni Nzambi. 19 Ntumunu za zebi: ‘Kuhondandi muntu, kusandi bunsuza, kulabandi, kutândi timbangi tia bungungu, kusandi bumbaki, zitisa* tata’aku na nguri’aku.’” 20 Bakala dio diamuvuturila: “Mulongi, misamu mio miamiansoni mia nisarilaka tûka buleke bwani.” 21 Yezu wamutala, wabâ na luzolo mu yandi mpe wamutêla: “Tima timosi tita ku kondo: Yenda, teka bimvwama biaku mpe kabila bamputu, buna mbo bâ na timvwama ku zulu; mpe yiza wakundanda.” 22 Kâ bakala dio tiari tiamubaka mu bungu dia mvutu yi bamuhana, mpe wayenda na tiari tiatiansoni, mu bungu ti bimvwama biabingi bieri nandi.

23 Bu kamana taluzula kwakwansoni, Yezu watâ kwe milongoki miandi: “Musamu wa mpasi wubâ kwe bô bê na mbongo mu kota mu Timfumu tia Nzambi!” 24 Kâ milongoki miayituku mu nzonzolo’andi. Buna Yezu wavutula: “Bala, diangana musamu wa mpasi wena mu kota mu Timfumu tia Nzambi! 25 Mbo wubâ musamu wa fioti kwe shamo mu yôkela ha munwa wa ntumbu, kâ musamu wa mpasi kwe mvwama mu kota mu Timfumu tia Nzambi.” 26 Bavutu tomo yituku, mpe batâ:* “Nani kwa lendi vûka?” 27 Bu kabatala mu meso, Yezu watâ: “Kwe bantu ka bulendi’â bwabâ ko, kâ ka kwe Nzambi’â ko, mu bungu ti Nzambi ka lendi’â kalembana musamu ko.” 28 Piere wabatika mu mu têla: “Tala! Bima biabiansoni bia tasisiri mpe takulendi.” 29 Yezu watâ: “Wa matieleka nita lu têla, ka muntu‘â ko sisiri nzo, peleko nkazi, peleko bibusi, peleko mama, peleko tata, peleko bala, peleko misitu mu bungu dia meno na mu bungu dia nsangu za mbote, 30 lembo baka bwawu bu mbala yôka 100—nzo, nkazi, bibusi, bamama, bala, misitu mu nkwamusu—mpe mu nza* yikwiza, luzingu lwa mankululu. 31 Kâ babingi bê ba ntete mbo babâ ba mansukina, mpe ba mansukina mbo babâ ba ntete.”

32 Ku Yerusaleme beri nakaka, mpe Yezu watêkela ku matu. Bayituku, kâ bô beri ba landaka babatika mu bâ na bunkuta. Wavutu bonga ba 12 ha bawu kaka mpe wabatika mu ba têla misamu miaketi mu turila: 33 “Tala! Ku Yerusaleme tuta kwenda, mpe Mwana muntu mbo bamuteka ha moko ma mfumu za banganga-nzambi na bitsoniki. Mbo bamuzengela lufwa mpe mbo bamuhana ha moko ma bantu ba makanda, 34 mpe bawu mbo bamusehesela, mbo bamuloborela mante, mbo bamuwinda bisikoti mpe mbo bamuhonda, kâ bilumbu bitatu ha manima mbo kavumbuka kwe ba fwa.”

35 Zaki na Za bala ba Zebede, bapusana kwe yandi mpe bamutêla: “Mulongi, tuzololo watuyirikila miamiansoni mi tukulomba.” 36 Yandi wabatêla: “Nti luta zolo nasa mu bungu dia beno?” 37 Bavutula: “Tu hana nzila ngatu tazakala, wumosi ku lubakala lwaku mpe wakaka ku lukento lwaku mu mukembo’aku.” 38 Kâ Yezu wabatêla: “Musamu wu luta lomba ka luzebi’â wo ko. Ngano lulendi nwa mbungu* yi nita nwa peleko lulendi batusu mu bateme yi nita baka?” 39 Bamutêla: “Mbo tulenda.” Buna Yezu wabatêla: “Mbungu* yi nita nwa, mbo lunwa yo, mpe mbo lubatusu mu bateme yi nita baka. 40 Kâ, ka meno’â ko ndie na nswa wa hana nzila ya zakala ku lubakala peleko ku lukento lwani. Mbuka zo, mu bungu dia bô Tata’ani ba kakubikila zo zena.”

41 Ntumwa za 10 zakaka bu zawâ bo, zadasukila Zaki na Za. 42 Kâ Yezu wabatâ mbila mpe wabatêla: “Luzebi ti bantu bamonekaka* ti luyâlu lwe nawu, makanda bayâlaka mu ngolo, mpe bantu babayôkele nsangu, songela basongelaka ti ni bawu bê na lutumu. 43 Musamu ka wufweti’â wabêla bo ko kwe beno; kâ wô zololo kabâ nsangu ha kati dieno fweti bâ tisari tieno, 44 mpe wô zololo mu bâ wa ntete fweti bâ ngamba ya babansoni. 45 Mu bungu ti Mwana muntu ka yiza ko ngatu bamusarila, kâ mu sarila bantu na mu hana luzingu* lwandi mu nkûlulu mu bungu dia bantu babingi.”

46 Batula ku Yeriko. Buna Yezu na milongoki, tintwari na pôka dia bantu bu beri dukaka ku Yeriko, Baritime (mwana wa Time), timfwa-meso tieri yingaka, wazakala mu ndeko nzila. 47 Bu kawâ ti Yezu weri, Musi-Nazarete, wabatika mu kawula bu keri takâ: “Mwana Davide,Yezu, kumfwila tiari!” 48 Buna bantu babingi babatika mu mu bamina, bu beri mu têlaka kakuta, kâ yandi ni keri tomo kawulaka mu ngolo: “Mwana Davide, kumfwila tiari!” 49 Buna Yezu wakangama mpe watâ: “Mu têno mbila.” Buna batâ mbila timfwa-meso mpe bamutêla: “Bâ na butindi! Telama; mbila kata ku tâ.” 50 Bu kamana losa tinkuti tiandi tia zulu, watelama na manzangu mpe wayenda kwe Yezu. 51 Buna Yezu wamutêla: “Nti zololo nasa mu bungu dia nge?” Timfwa-meso tiamutêla: “Rabuni,* sa ti navutu mona.” 52 Mpe Yezu wamutêla: “Yenda. Timinu tiaku tikuwasisi.” Hô nkatika bendo wavutu mona, mpe wabatika mu mu landa mu nzila.