Salaka dia mansukina dia Yezu

Bayuda Pake beri kembelaka mivu miamiansoni, mu tilumbu tia 14 tia ngonda ya Niza. Pake bawu yeri bambulaka bwe Yehova kabakûrila mu bungamba ku Ezipte, mpe bwe kabanatina ku Mutoto wa Kani. Mu muvu wa 33 M.B., Yezu na ntumwa zandi bakembela Pake mu nzo yimosi yabâ mu zulu, ku Yerusaleme. Bu bamana dia, Yezu watâ: ‘Wumosi ha kati dieno kunteka.’ Ntumwa zayituku mpe zayula kwe Yezu: ‘Ngano nani wena?’ Yezu watâ: ‘Wô wu nihana dimpa di ni yandi.’ Dieka bo, Yezu wahana tibuku tia dimpa kwe Yuda Iskariote. Mbala mosi, Yuda watelama mpe wadûka mu nzo.

Buna Yezu wasambila, wabukuna dimpa, mpe wahana dio kwe ntumwa zasâla. Yandi watâ: ‘Dieno dimpa di. Tifwani tiena tia nitu’ani yi nihana mu bungu dia beno.’ Ha manima, yandi wasambila mu bungu dia vinu, mpe wahana yo kwe ntumwa zandi. Yandi watâ: ‘Nweno vinu yi. Tifwani tiena tia menga mani ma nihana mu bungu dia mulemvo wa masumu. Nilukanisini ti mbo lubâ mitinu na meno ku zulu. Sâkeno bo mivu miamiansoni mu kumbabukilaka.’ Mivu miamiansoni, milongoki mia Yezu mu nkokela yo bakutakanaka. Lukutakanu lo, Salaka dia Mfumu batâka lo.

Bu bamana dia, ntumwa zadisikita mu zaba nani wayôka mfunu ha kati diawu. Kâ Yezu wabatêla: ‘Wô yôkele mfunu ha kati dieno ni wô monekaka wa fioti, wô lembo dingaka mu moneka.

‘Beno ndiku zani lwena. Misamu miamiansoni mia kundomba Tata’ani nita lu têla. Ntamana mbo nikwenda kwe Tata’ani ku zulu. Beno ni hâ lusâla, mpe bantu mbo bazaba ti milongoki miani lwena bu lubâ na luzolo beno na beno, ntiana bu naluzololo.’

Dieka bo, Yezu wasambila bu kalomba kwe Yehova mu kengerela milongoki miandi miamiansoni. Yandi walomba kwe Yehova mu ba bakisa mu sala ha timosi mu tidzunu. Yezu wasambila ngatu nkumbu ya Yehova yabâ ya santu. Buna, Yezu na ntumwa zandi batanga mikunga mia mukembo mu bungu dia Yehova, mpe badûka mu nzo. Ntangu yi baketi kanga Yezu penepene yabâ.