Yezu dîkiri mafunda ma bantu

Ntangu fioti ntete Pake ya muvu wa 32 M.B., ntumwa mu nzietolo ya tisalu tia samuna zatûka. Bawu bafwatika babâ, mpe Yezu wabanata mu bato ku Betisayida, ku balendela mu huma. Kâ bato bu yatûla penepene na simu, Yezu wamona mafunda ma bantu beri kwe ba landi. Ni bu sa ti Yezu nsatu yabâ nandi ya bâ na ntumwa zandi ha bawu kaka, wabwana bantu bo mu nsayi. Yandi wawasisa mbevo zawu, mpe wabatika mu ba longesa. Tilumbu tiatiansoni, Yezu wabalongesa Timfumu tia Nzambi. Nkokela bu yafwana, ntumwa zandi zayiza kwe yandi, mpe zamutêla: ‘Bantu ba nsatu ye nawu; ba kârisa ngatu badinga tima tia dia.’

Yezu wabatêla: ‘Ka balendi’â benda ko; ba haneno bima kwawu ku.’ Ntumwa zatâ: ‘Ngano zololo twenda tabasumbila mampa?’ Filipe, yimosi ya ntumwa, watâ: ‘Ni bu sa ti mbongo zazingi ze neto, ka tulenda ko mu sumba mampa mafwana mu bungu dia bantu ba.’

Yezu wayula: ‘Ngano nti bie neno?’ Andre watâ: ‘Mampa ma 5 me neto na mbizi zole za fioti.’ Yezu walomba kwe bantu mu zakala ku matiti, mu bikunku bia bantu 50 na bia bantu 100. Yezu wabonga mampa na mbizi, watala ku zulu, mpe wasambila. Ha manima, yandi wahana bidia kwe ntumwa, mpe ntumwa zakaba bio kwe bantu. Babakala 5000, bakento na bala ba fioti badia babansoni tii bu bayukuta. Ntumwa zakutakasa bima biabiansoni biasâla ngatu bialembo hombela. Bitunga 12 bia mukaka biasârila! Diangana timangu tio tia nzitukulu tiabâ.

Bantu batomo yituku, ni badinga ti Yezu kabâ mutinu’awu. Kâ Yezu wazaba ti ntangu ka yafwana ko kwe Yehova ngatu yandi kabâ Mutinu. Buna, yandi watâ kwe bantu benda, mpe watâ kwe ntumwa zandi mu kwenda ku simu diakaka dia mubu wa Galile. Bawu banaka mu bato, mpe Yezu wanaka yandi kaka ku mongo. Mu bungu dia nti? Mu bungu ti ntangu ya bâ nandi nsatu mu sambila Tata’andi. Ni bu sa ti misamu miamingi mia bâ nandi mu yirika, Yezu ntangu keri sârisaka ya sambila.