Yezu bamukengi

Yezu na ntumwa zandi basabuka mudimba wa Kidrone mu kwenda ku mongo wa Miti mia Olive. Kati-kati dia mpimpa diayôka, mpe ngonda ya mukaka yabâ. Bawu bu batûla ku nsaba ya Getesemane, Yezu wabatêla: “Sâleno hâ, mpe bêno na meso ma tia.” Buna Yezu wahengama fioti ku nsaba yo mpe wafukama. Yandi wasambila Yehova mu tiari: “Bîka luzolo lwaku lwalungana.” Ha manima, Yehova watambika mbazi mu tindisa Yezu. Yezu bu kakâla ha mbuka ya bâ ntumwa zandi, wababwana ku tolo. Yandi watâ: ‘Vumbukeno! Ka yena ntangu ya bwa tolo ko! Ntangu yifweni yi bafweti kunteka ha moko ma mbeni zani.’

Ntangu fioti ha manima, Yuda watûla na mukangu wa bantu babâ na mbele, na mibota. Mbuka ya bâ Yezu ya kazaba mu bungu ti ni kô beri vulu kwendaka. Yuda watêla binwani ti mbo kaketi zabikisa Yezu mu bungu dia bawu. Yandi wapusana kwe Yezu mpe watâ: ‘Mbote Mulongi,’ mpe wamuhana bize. Yezu watâ: ‘Yuda, ngano mu bize ta kuntekela?’

Yezu wapusa mpe wayula: “Nani luta dinga?” Bawu batâ: “Yezu Musi-Nazarete.” Buna Yezu watâ: “Ni meno,” mpe bantu bakâla manima, mpe babwa ha mutoto. Yezu wavutu yula kwe bantu: “Nani luta dinga?” Bawu bavutu tâ: “Yezu Musi-Nazarete.” Yezu wavutula: ‘Nilutêleleke ti ni meno. Bîkeno bantu ba benda.’

Piere bu kabakula misamu mieri yôkaka, wabonga mbele’andi, mpe wazenga kutu dia Malkuse, ngamba yimosi ya mfumu-nganga-nzambi. Kâ Yezu wasimba kutu dia muntu wo mpe diawasa. Ha manima, yandi watâ kwe Piere: ‘Kârisa mbele’aku. Tala ti nweni na mbele ya muzingu, mbo fwila mu mbele ya muzingu.’ Binwani biabwila Yezu, bamukanga misinga mu moko, mpe ntumwa zadioka. Bantu bo banata Yezu ku nzo ya Ane, mfumu ya nganga za Nzambi. Ane wayula biyuvu kwe Yezu, mpe wamutambika kwe Kayife, mfumu-nganga-nzambi. Kâ nti biatûrila ntumwa za Yezu?