Avril

Ngano musamu wa mpasi we naku? Kampe muntu wakufwemese mu timvuka. (Zaki 3:2) Kampe bantu balusalaka peleko balukotaka bakuseheselaka mu bungu ti Yehova sarilaka. (1 Pi. 4:3, 4) Kampe bantu ba kanda diaku bakuyiminaka mu kwenda ku tukutakanu peleko mu samuna. (Mat. 10:35, 36) Tala ti musamu wa nkatika mpasi we naku, lendi bâ na mabanza ma bika mu sarila Yehova. Kâ, lendi bâ na lukwikulu ti, musamu ni musamu wu bwabana na wo, Yehova mbo kakuhana ndwenga na ngolo zifwanane mu korela na mu telamana wo. Mu Zu diandi, Yehova watsonekesa bifwani bia bantu beri na masumu, batelamana mpasi za ngolo. Mu bungu dia nti? Ngatu tabaka ndongosolo mu bifwani bio. Ntiangu Yehova kasarila ntumwa Paulo mu tsoneka. Bu tukwe tangi binsamu bio, mbo bitubakisa mu bâ na butindi na tivuvu. Kâ, mu bakila bio ndandu, ka tusukinakandi kwa mu tanga Bibila. Tufweti bika Matsonoko masobesa mbanzulu zeto, mpe masimba mitima mieto. w21.03 14 par. 1-2

Ngano bantu ba samuninaka ntiana mbutu ziyelele bongelaka ngatu batia zo? Dieka bo, misamu mitatu mimoneka: 1) Mbo samuna na manzangu. Ntangu ya tia mbutu ya fioti kwa yena, ka yifweti’â yahombela ko. 2) Mbo bâ na nsayi tala ti mweni bantu bata wâ nsangu za mbote. Bibila ditêle: “Bantu [mbo] bayangalalaka mu ntangu yi batiaka mbutu.” (Iza. 9:3) Mpe, 3) mbo mona ti muntu ni muntu wulendi bâ mulongoki; buna delakasa misamu mi tâ na misamu mi kakekolo yandi. Milongoki miakaka mia Yezu kampe mieri banzaka ti Bisi-Samaria kani kabwe ka baketi’â kwizi bâ milongoki mia Yezu ko; kâ Yezu keri’â wa banzilaka bo ko. Yandi ntiana bantu balendi bâ milongoki keri ba mwinaka. Kwe beto mpe wufwanane tamonaka bantu ba mu teritware’eto ntiana bweri ba mwinaka Yezu. Ntumwa Paulo tifwani tia nzitukulu tieri ti tufweti landa. Paulo wazaba nkwikulu za bantu ba keri samuninaka, misamu mi beri kekoloko keri bakulaka, mpe ntiana bantu balendi kwizi bâ milongoki mia Yezu keri ba mwinaka. w20.04 8-9 par. 3-4

Kani wakipaka kwa nsalulu za bantu, dingaka mu zaba ntia mbanzulu ze nawu. Yehova kwa lendi tomo tu bakula. Buna mu lomba kakubakisa mu bongelaka bampwana’aku ntiana Yandi bu kababongelaka, mpe kakubakisa mu bakula bwe lendi ba songela tiari tia mutima. Ka tulendi’â tasola ko ntia mpangi zifwanane zi tusongela tiari tieto tia mutima. Babansoni misamu mia mpasi babwabanaka na mio, miamîngi mifwanane na mio miabwabana na Yonase, Eliya, Agare na Lote. Vula-vula bawu beni batulumuna misamu miawu. Diangana, beto bansoni misamu mie kô tayirika miatumwisa mpasi. Ntiangu bwe bubote ti Yehova katulomba mu bâ na mbanzulu zimosi na bantu bakaka. (1 Pi. 3:8) Bu tutumamaka kwe Yehova, mbo bumosi bwa kanda dieto dia swaswana dia mu nza mpe dia nzitukulu tuyikaka ngolo. Buna tulendi kwizi bonga nzengolo ya wirikila, ya longoka na ya songela tiari tia mutima kwe mpangi zeto. w20.04 18-19 par. 15-17

Yezu wasongela tifwani tia lunga tia bâ wa tumama kwe Nzambi. Buna, mpila ya mfunu ya tumama kwe Nzambi ni ya landa ntambi za Yezu mu mpila yi tulenda. (Za 8:29) Mu tatamana mu diatila mu matieleka, tufweti bâ na lukwikulu ti Yehova ni Nzambi ya matieleka, mpe misamu mi katutêlaka mu Bibila, Zu diandi, mia matieleka miena. Tufweti bâ mpe na lukwikulu ti Yezu ni Masiya. Lumbu ti, bantu babingi basaka ntembe bu bawâka ti Yezu bamusola mu bâ Mutinu wa Timfumu tia Nzambi. Za watâ ti mbo kubâ ‘bihuni biabingi’ bihuna bantu balembolo ba kubama mu nwanina matieleka matariri Yehova na Yezu. (2 Za 7-11) Za watsoneka ti: ‘Nani we ngungu, tala ka ni yandi’â wo ko kalaka ti Yezu ni Kristo?’ (1 Za 2:22) Mpila ya yimosi yilembo tu wubakasa ni ya longoka Zu dia Nzambi. Buna, mbo tukwizi zaba Yehova na Yezu. (Za 17:3) Mpe mbo tukwizi bâ na lukwikulu ti mu matieleka twena. w20.07 21 par. 4-5

Mpila yakaka yi tulendi sa ngatu bakaka balembo tâ makuba ni mu ba hana nzila bayirika misamu buna bu bazololo, kani tadingaka kwa bayirika mio buna bu tuzololo beto. (Rom. 14:19-21; 1 Kor. 8:9, 13) Buna, ka twena ntiana muntu wusaka tinsamu tia dioka ko, wusarilaka ngolo mu bâ ha tibuka tia ntete ngatu kabaka musendo wa yandi kaka. Bantu bô badiokaka ndandu ya bawu beni batoko banzilaka kwa. Ntiangu bayêlaka mu nunguna bampwana’awu bu badiokaka, ngatu babâ ku matu. Kâ, beto ka tusarilaka bo ko kwe bampwana’eto. (Nga. 5:26; 6:4) Kani dieto ni mu bakisa bantu babingi batûla hâna ha sukisini titini tia dioka, tintwari na beto, mpe tabaka musendo wa luzingu. Ntiangu tusarilaka ngolo mu landa malongi matûka kwe Nzambi matâka ti: ‘Muna muntu, ka dingakandi kwa bubote bwa yandi kaka; kâ mpe na bwa bantu bakaka.’ (Flp. 2:4) Mu ntinu zi tuta dioka, Yehova wahana tivuvu tia luzingu lwa mankululu ku mazulu peleko ha mutoto ku Paradi, mu nsayi,kwe kanda diandi,kwe bô basukisa titini. w20.04 28 par. 10; 29 par. 12

Milio za Bakristo bakaka mbo bavuka mpe mbo babâ bazinga mu nza ya môna. Bô bazinga ha mutoto mbo babâ mbangi za nungunu yakaka mu lufwa mu ntangu yi vumbuka miliare za bantu ba fwa mu ntama. Banza’eti ntia mpila nsayi yibâ mu ntangu nungunu yo yitula! (Bis. 24:15) Mpe bô babansoni bê ba kwikama kwe Yehova mbo banunga lufwa lu babiarila kwe Adame. Mbo babâ na lenda dia zinga mankululu. Bakristo babansoni bê ba moyo lumbu ti, bafweti tondaka mu misamu mitindisaka mitariri mvumbukulu, mia tsoneka Paulo kwe Bisi-Korente. Misamu miamingi mita sa ti tatumamana malongi ma Paulo mu sala kwakwingi bwawu bu ‘mu tisalu tia Mfumu.’ (1 Kor. 15:58) Tala ti tusiri mio miamiansoni mifwanakane mu tisalu tio, tulendi baka musendo wa nsayi mu bilumbu bita kwiza. Luzingu mbo lutomo bâ lwa toma yôka bima biabiansoni bi tulendi banza. Musamu wo wusongele ti mpasi zeto mu Mfumu, ka zena za mpamba ko. w20.12 13 par. 16-17

Tamana tala ntangu na misamu mi zonzelaka mbikululu ze mu Ezekiele 38:10-23; Daniele 2:43-45; 11:44–12:1; na Nzabukusu 16:13-16, 21, mbo tumona ti mbikululu zo, misamu mimosi kwa zizonzelaka. Buna, tatala misamu mi tubanzaka ti mialungana. Ntangu fioti ha manima ma mbatukulu ya mpasi ziyôkele, “mitinu mia ha mutoto wa mukaka” mbo miyirika timvuka tia nsi zazingi. (Nza. 16:13, 14, NWT) Timvuka tio mu Bibila tie na nkumbu: “Goge ya ku nsi ya Magoge.” (Ezk. 38:2) Timvuka tio tia nsi zazingi mbo tikwizi nwanisa kanda dia Nzambi mu mbala ya mansukina. Bu keri zonzelaka ntangu ya mansukina, ntumwa Za wamona mvula ya ngolo ya matari (grêle), yeka lembo toko noka, yeri bwilaka mbeni za Nzambi. Tifwani tio tia mvula ya matari tilendi monekesa nsangu za ngolo za mfundusu zi samuna kanda dia Nzambi. Musamu wo mbo wu nata Goge ya ku nsi ya Magoge kanwanisa kanda dia Nzambi na mabanza ma fukisa dio mankululu.​—Nza. 16:21. w20.05 15 par. 13-14

Ngolo za Nzambi zisalaka, kabu diena di tufweti tomo zolo. Lendi songela ti mpeve santu ya tomo zoloko wamana dimbitilaka misamu mi yilungisaka mu ntangu yi. Ntete kakâla ku zulu, Yezu watêla milongoki miandi ti: ‘Mpeve santu bu yikôka mu beno, mbo lubâ na ngolo. Mbo lubâ mpe mbangi zani [. . .] na tii kwa sukina mutoto nzi.’ (Bis. 1:8) Na lubakusu lwa mpeve santu, bantu milio 8 na ndambu bê bisari bia Yehova mu bizunga biabiansoni bia mu nza. Paradi ya timpeve mpe ye neto mu bungu ti mpeve ya Nzambi mbo yitubakisaka mu bâ na bifu ntiana, luzolo, nsayi, tidzunu, luvivululu, nsayi ya sarila mbote, mbote ya ku mutima, timinu, bulembami, na tifu tia tiyimina. Bifu ni bio batâka nkumbu “mbutu ya mpeve.” (Nga. 5:22, 23, NWT) Diangana, mpeve santu kabu dia ntalu diena! w20.05 28 par. 10; 29 par. 13

Misamu miamingi mita songela ti, bô babâ na bweso bwa mona mvumbukulu ya ba fwa balendi bâ na lukwikulu ti mbo bavutu zaba bantu ba bafwilulu. Mu tifwani, mu mpila yasalamana mvumbukulu mu ntama, tulendi tâ ti kampe Yehova, bantu bavumbuka, wavutu ba sala na nitu zatoko bâ nawu, na mpila’awu yi beri toko zonzelaka, na mabanza meri nawu ntete bafwa. Bambuka ti Yezu wafwanakasa lufwa na tolo, mpe mvumbukulu ya ba fwa na bu tuvumbukaka ku tolo. (Mat. 9:18, 24; Za 11:11-13) Muntu bu wuvumbukaka ku tolo, tidiri tiandi na tipamu tiandi mpila yimosi kwa bibaka na bu katokolo bâ ntete ke kasêka; mpe nsimu’andi ka yisobaka ko. Tabongeno tifwani tia Lazare. Bilumbu biyà kayôkesa mu lufwa, mpe nitu’andi yabatika mu bola. Kâ, buna kwa Yezu bu kamuvumbula, bibusi biandi biamuzaba, Lazare mpe wababambukila.—Za 11:38-44; 12:1, 2. w20.08 14 par. 3; 16 par. 8

Yehova mpila mosi kazololoko tikunku tia Bakristo ba tumbu na tia bimeme biakaka. Bikunku bio bia biole ntalu biena ha meso mandi. Wa tuzebi mu bungu ti, Yandi wahana luzingu lwa Mwana’andi mu bungu dia Bakristo ba tumbu na bimeme biakaka. Tivuvu tiawu tiswasikisaka bikunku bio bia biole. Kâ bantu ba bikunku bio bia biole bafweti tatamana mu bâ ba kwikama kwe Nzambi na kwe Kristo. (Mik. 31:23) Mpe tabambukaka ti mpeve santu ya Nzambi mpila mosi yisarilaka mu beto bansoni. Wuzololo tâ ti Yehova mbo kahanaka mpeve santu’andi kwe muna muntu, mu mpila yidelakane na nsatu zandi. Yehova wahana kwe muna tisari tiandi tivuvu mu bungu dia bilumbu bita kwiza. (Yer. 29:11) Mbambukulu ya lufwa lwa Yezu bweso yihanaka kwe muna muntu mu kembela Nzambi na Kristo mu bungu dia mio mi bayirika mu bungu dia beto ngatu ta baka luzingu lwa mankululu. Mbambukulu ni lukutakanu luyôkele mfunu kwe Bakristo ba matieleka. w21.01 18 par. 16; 19 par. 19

Mu bantu babansoni babâka ku Mbambukulu, babîngi tivuvu tia bâ ha mutoto tie nawu. Mu bungu dia nti bawu mpe bakwendaka ku Mbambukulu? Mu bungu ti mabanza mamosi mabâka nawu na bantu bakwendaka ku makwela ma ndiku zawu. Ni mu songela luzolo lwawu mu bungu dia ndiku zawu bakwendaka, na mu songela ti bawu bata yika moko. Mpila mosi mpe, bimeme biakaka ku Mbambukulu bikwendaka mu songela luzolo lwawu kwe Yezu na kwe Bakristo ba tumbu, na mu songela ti bawu bayikaka moko. Bimeme biakaka mpe ku Mbambukulu bikwendaka mu songela ti mukayulu wa Yezu, wusa ti babaka luzingu lwa mankululu, wa batondaka. Musamu wakaka wa mfunu wusaka ti bimeme biakaka biendi ku Mbambukulu ni mu tumamana ntumunu ya Yezu. Yezu bu kakembela Ndia ya ntete na ntumwa zandi za kwikama, wabatêla ti: ‘Yendeno se bo, mu kumbambukilaka moyo.’ (1 Kor. 11:23-26) Buna bimeme biakaka mbo bitatamana mu sa Ndia ya Mfumu Bakristo ba tumbu bu batiri ha mutoto. Mpe bantu babansoni batâka mbila ku Mbambukulu ya lufwa lwa Kristo. w21.01 17-18 par. 13-14

Tulendi banza ti mu zolo muntu, tufweti bâ kwa na mabanza ma mbote mu yandi peleko tufweti mu têla misamu mia mbote. Kâ luzolo, mu bâ lwa matieleka, tufweti lwa songela mu nsalulu. (Fwanakasa na Zaki 2:17, 26.) Mu tifwani, Yehova beto kazololo. (1 Za 4:19) Mpe luzolo lwandi katusongelaka mu ntêlo za toma ze mu Bibila. (Mik. 25:10; Rom. 8:38, 39) Nzambi luzolo lwandi mpe katusongelaka mu mio mi kayirikaka. Yehova watambula ti Mwana’andi wu katomono zolo wamona mpasi mpe wafwa mu bungu dia beto. (Za 3:16) Buna tulendi bâ na lukwikulu ti Yehova beto kazololo. Bu tubatumamanaka mbo tusongelaka ti Yehova na Yezu bawu tuzololo. (Za 14:15; 1 Za 5:3) Yezu watutuma tazolosonoko beto na beto. (Za 13:34, 35) Luzolo lo mu nzonzolo na mu ndiatulu tusongelaka lo.​—1 Za 3:18. w21.01 9 par. 6; 10 par. 8

Bô bê ba tumbu mu mpeve santu, tivuvu tie nawu tia bâ tintwari na Yezu ntangu zazansoni, mpe mbo bayâla nandi mu Timfumu tia Nzambi. Buna, mbo bamumona, mbo bazonza nandi, mpe mbo babatika mu yôkesaka ntangu nandi. (Za 14:2, 3) Bô bê na tivuvu tia bâ ha mutoto, bawu mpe mbo bamona luzolo lwa Yezu. Ni bu sa ti ka bamona Yezu ko, mbo batomo kwizi bâ nkatika ndiku na yandi, bu bakwe mone nsayi ya luzingu lu babahana kwe Yehova na Yezu. (Iza. 9:6, 7) Bu tutambulaka ndombolo yi tu siriri Yezu ya bâ ndiku zandi, tusakumunu tubakaka. Mu tifwani, luzolo na lubakusu lwandi tubakaka tûka bwawu bu. Bweso bwe neto bwa baka luzingu lwa mankululu. Musamu wuyôkele mfunu, tindiku tieto na Yezu mbo tituhana tima tiyôkele ntalu​—tindiku na Yehova we Tata dia Yezu. Bweso bwa bunene bwena tala ti bakutêle nkumbu, ndiku ya Yezu! w20.04 25 par. 15-16

Mukanda wa tsoneka ntumwa Paulo kwe Bakristo ba tumbu ba ku Korente katsoneka wo, beri na vuvu tia baka mvumbukulu ya ku zulu. Bakristo bo beri ‘ba santukusu mu Yezu Kristo, [babatâ] mbila [mu bâ ba santu].’ Paulo wazonzela mpe ‘bô [. . .] bafwila mu tintwari na Kristo.’ (1 Kor. 1:2; 15:18; 2 Kor. 5:17) Mu mukanda wakaka wa Bibila wu katsoneka, Paulo watâ ti bô beri ‘mu bumosi na [Yezu] mu lufwa lwe nsinsa na lwa yandi, ni bo mpe [babâ] nsinsa mu mvumbukulu.’ (Rom. 6:3-5) Yezu wavumbuka mu nitu ya timpeve mpe wayenda ku zulu. Buna, misamu ni bo mpe mibâ mu bungu dia bantu babansoni bê ‘mu Kristo,’ wuzololo tâ Bakristo ba tumbu. Paulo watsoneka ti Kristo wavumbuka ntiana ‘[mbutu za ntete], ha kati dia bô basêkele [ku lufwa].’ (1 Kor. 15:20) Bambuka ti bantu bakaka, ntiana Lazare, bavumbuka kwe ba fwa ha mutoto, kâ Yezu ni yandi wa ntete wavumbuka kwe ba fwa na nitu ya timpeve mpe wabaka luzingu lwa mankululu. w20.12 5-6 par.15-16

Bakristo ba tumbu bafwaka mu ntangu yi, mbala mosi babakaka mvumbukulu ya ku mazulu. Musamu wo wudelakane na musamu watsoneka ntumwa Paulo mu 1 Bisi-Korente 15:51, 52. Ha manima ma mvumbukulu’awu, mpangi zo za Kristo mbo zibâ na nsayi yayingi. Bibila mbo ditutêlaka ntia tisalu bô basobaka ‘ntiana bu balabulaka’ bakwe sala ku zulu. Yezu wabatêla: ‘Wô nunga muzingu mpe landa nsalulu zani na tii hâna nsuka, lenda dia tumina makanda nimuhana. Dieka bo, mbo [katwarisa] mo, na [muti] wa tisengo. Mbo katutakasa mo ntiana [mbungu za tibuma]; ntiana me beni bu nabakiri lutumu kwe Tata.’ (Nza. 2:26, 27) Mbo balanda Yezu, mpe mbo basala tisalu tia muvungi mu kipa makanda na muti wa tisengo.​—Nza. 19:11-15. w20.12 12 par. 14-15

Ntumwa Paulo watâ Yezu “mbutu za ntete,” mu bungu ti ha manima ma mvumbukulu ya Yezu, bantu bakaka mbo baketi baka mvumbukulu ya ku mazulu. Bantumwa na bantu bakaka ‘mu tintwari na Kristo’ mbo baketi landa Yezu. (1 Kor. 15:18) Ntangu bu yaketi fwana, mbo baketi kwizi baka mvumbukulu ye nsinsa na mvumbukulu ya Yezu. Mvumbukulu ya ku mazulu ya bô bê ‘mu tintwari na Kristo’ ka yabatika ko mu ntangu Paulo yi katsonekena Bisi-Korente. Kâ, Paulo bilumbu bia ku matu keri zonzelaka: “Muna muntu, tintwari na mulonga’andi: Kristo, mbutu za ntete, ha manima bantu Kristo ba kavwiri mu ntangu yi kabâ hô.” (1 Kor. 15:23, NWT; 1 Tes. 4:15, 16) Lumbu ti, mu ntangu Kristo yike hô twena. Bantumwa na Bakristo ba tumbu bakaka, batoko kêla ntangu Kristo yi kaketi bâ hô ntete babaka musendo’awu wa ku mazulu, mpe babâ ‘nsinsa [na Yezu] mu mvumbukulu.’​—Rom. 6:5. w20.12 5 par. 12; 6 par. 16-17

Ntumwa Paulo keri’â zonzelaka muntu wu bavumburi ngatu kabâ ha mutoto ko, ntiana bantu ba vumbula Eliya, Elize na Yezu. Paulo mbo keri zonzelaka bantu babaka mvumbukulu ya ku mazulu na nitu za timpeve. (1 Kor. 15:43, 44) Yezu bu keri ha mutoto, nitu ya tinsuni yeri nandi. Kâ bu kavumbuka kwe ba fwa “wayizi ba mpeve yihanaka luzingu” mpe wakâla ku mazulu. Mpila mosi mpe, Bakristo ba tumbu mbo babavumbula na nitu zilendi bâ ku mazulu. Paulo wabangula ti: ‘Ntiana bu tabonga tifwani tia wô watûka mu mutoto, ni bo mpe tubonga tifwani tia wô watûka ku mazulu.’ (1 Kor. 15:45-49) Mfunu wena mu zaba ti Yezu ka vumbuka na nitu ya tinsuni ko. Mu ntangu Paulo yi keri ku nsuka ya nzonzolo’andi, wabangula mu bungu dia nti katêla ti: ‘Nitu na menga, ka bilendi’â biabiarila Timfumu tia Nzambi ko’ ku zulu. (1 Kor. 15:50) Bantumwa na bantu bakaka ba tumbu ka babavumbula ku zulu ko na nitu za tinsuni zilendi bola. w20.12 10-11 par. 10-12

Nzambi watuma milongoki mia ntete miakaka mia Yezu mu tsoneka misamu mitariri mvumbukulu ya ku mazulu. Ntumwa Za watâ: ‘Bala ba Nzambi twena, kâ mpila yi tubâ, [. . .] ka yena ya zabakana ko. Tuzebi ti bu katizabikisa, mbo tubâ ntiana yandi.’ (1 Za 3:2) Buna Bakristo ba tumbu ka bazebi’â ko bwe babâ bu babaka mvumbukulu ya ku zulu mu nitu za timpeve. Kâ, mbo bamona Yehova bu babaka musendo’awu. Bibila ka ditomo’â zonzela mvumbukulu ya ku zulu, kâ ntumwa Paulo wazonzela yo fioti. Bakristo ba tumbu mbo babâ na Kristo bu ‘kamana zimbakasa bimfumu biabiakulu, na [tuyalu twatwansoni], na ngolo zazansoni.’ Mu kati na ‘mutantu wa mansuka, [. . .] lufwa.’ Ha manima, Yezu na bô ba kayâla na bo, mbo babâ mu lutumu lwa Yehova mpe bima biabiansoni mbo bibâ mu lutumu lwandi. (1 Kor. 15:24-28) Diangana ntangu ya nkatika ya nsayi yibâ! w20.12 8 par. 2

Bakristo ba kwikama balembolo na tivuvu tia kwe bâ na Yezu ku zulu bawu, tivuvu tie nawu tia mvumbukulu ya ba fwa. Bibila mbo ditâka ti ntumwa Paulo na bantu bakaka bayenda ku zulu, bu babaka “mvumbukulu ya ntete kwe ba fwa.” (Flp. 3:11, NWT) Ngano ka wuta songela ko ti mvumbukulu yakaka ye kô yilanda? Musamu wo wusingase musamu watâ Yobe mu bungu dia bilumbu bia ku matu. (Yobe 14:15) “Bô Kristo ba kavwiri bu kabâ hô,” mbo babâ ku zulu na Yezu mu ntangu yi kafukisa tuyalu twatwansoni twa ngolo na bimfumu. ‘Mutantu wa mansuka, [. . .] lufwa’ mpe, mbo bafukisa lo. Babansoni babaka mvumbukulu ya ku zulu kani kabwe ka bavutu’â fwa ko. (1 Kor. 15:23-26) Bantu bê na tivuvu tia bâ ha mutoto balendi bâ na tivuvu mu misamu mia tâ Paulo mie mu verse ya tilumbu ti. Diangana, ka kwena muntu ko wulembolo wa sungama wulendi kwenda ku zulu, buna verse yo mvumbukulu yisalama ha mutoto yita zonzela. w20.12 6-7 par. 18-19

Kâ, tulendi tiyula: ‘Bwe ndendi bêla na lukwikulu ti Yehova ka kundosele’â ko?’ Tala ti tiyuriri tiyuvu tio, mbo wusongela ti Yehova lendi ku lemvokela. Tûka vula zazingi, Nzo ya Zangama ya Munkengi yatâ: “[Tulendi] vulu kârilaka mu tâka kuba dimosi. Kampe ka talenda ko mu telamana tifu tia mbi tie neto ntete tabatika mu sarila Nzambi. [. . .] Kubanzandi ti masumu ma balembo lemvokelaka yirikiri. Satana zololo ti wabanzilaka bo. Mu bungu ti lwaka na maniongo me naku, wusongele ti ka wena muntu wa mbi ko, mpe Yehova lendi ku lemvokela. Tatamana mu bâ wa kuluka na mu sambilaka Nzambi ngatu kakulemvokela, kakubakisa ngatu wavutu bâ na ngindu ya yibote, wamona bubote ku mutima mpe walembo tâ kuba dio. Ntete kabâ Mukristo ntumwa Paulo wayizi sa masumu mamingi ma nkatika ma mbi. Paulo wabambukila misamu mi kayirika. (1 Tim. 1:12-15) Kâ wakwikilaka ti mbo baketi mu lemvokela mu nzila ya nkûlulu mpe wabongelaka nkûlulu ntiana kabu dia mu hana Nzambi. Buna Paulo ka tatamana ko mu tisemba, kâ watatamana mu tûla mabanza mandi mu bio bia mbote bi kaketi hana kwe Yehova. w20.11 27 par. 14; 29 par. 17

Satana bima biabingi kasarilaka mu tutuma mu yirika misamu mia mbi. Ngano bwe tusaka? Ka mpasi’â ko mu banza ti bima biango ka biena bia mbi ko. Mu tifwani, tulendi banza ti: ‘Eka, ka bakunkatula mu timvuka ko tala ti ndirikiri musamu ewu, ka wena kwa musamu wa wunene ko.’ Mabanza ma mpila yo ma nkatika ma mbi mena. Bubote bwena mu tiyulaka biyuvu ebi: ‘Ngano Satana yêla kata yêla mu kaba mutima’ani? Tala ti mbikiri mabanza ma mbi makula mu mutima’ani, ngano ndendi fwisa nkumbu ya Yehova nsoni? Ngano nsalulu yi mbo yisa ti napusa kwe Nzambi’ani, peleko mbo yikungambasa na Yandi?’ Dimbitilaka biyuvu bio. Sambila Nzambi kakuhana ndwenga za hanina mvutu mu biyuvu bio mu bunsungu. Mabanza ma mpila yo malendi tu kengerela. Mabanza mo malendi tu bakisa mu telamana ntontolo tii ku nsuka, ntiana bwa sa Yezu bu katâ: “Katuka, Satana!” (Mat. 4:10) Bambuka ti mutima wa kabana ka wena na ntalu yayingi ko. w20.06 12-13 par. 16-17

Na kuluka, mitieno mia Yehova tutumamanaka, mu bungu ti tuzebi ti Yehova zebi nti biyôkele bubote kwe beto. (Efz. 4:22-24) Tifu tia kuluka mbo titutumaka ngatu luzolo lwa Yehova lwayôka luzolo mu beto beni, mpe mbo titutumaka tamona ti bantu bakaka batuyôkele. Bu tusarilaka bo, ndiku za Yehova tukwizi bâka, na za mpangi za mu timvuka. (Bisi-Filipe 2:3) Tala ti ka tusiri’â keba ko, bantu bê na lukuta na bwimi mu nza ya Satana balendi tu sobesa. Kampe, mabanza ma mpila yo Bakristo ba ntete bakaka meri sobesaka, ntiangu ntumwa Paulo katsoneka kwe Bisi-Rome ti: “Kwe muna muntu ha kati dieno nita tâ mu lembo bâ na mabanza ma yôka mu yandi beni, kâ kabâ na mabanza ma delakana.” Paulo wa bakula ti nsatu ye neto ya bâ na mabanza ma delakana mu beto beni. Kâ, tifu tia kuluka titubakisaka mu lembo yôkesa ndilu, na mu lembo bâ na mabanza ma yôka mu beto beni. w20.07 2 par. 1-2

Mu ntangu ya mutinu Aza, ntangu ya tidzunu yayizi suka. Zera weri mfumu ya mukangu wa wunene wa binwani yôka milio yimosi, watûka ku Éthiopie, lukwikulu lweri nandi ti mbo baketi nunga nsi ya Yuda. Kâ, Aza keri’â kwikilaka mu mukangu wa bunwani biandi ko, kâ mu Yehova keri kwikilaka. Aza wasambila: “Tu bakisa, Ô Yehova Nzambi’eto, mu bungu ti ni nge tusikiriri, mpe ni mu nkumbu’aku twiziri mu nwana na mukangu wu wa bantu.” (2 Nta. 14:11) Ni bu sa ti lutangu lwa binwani biatûka ku Éthiopie lwayôka kampe mbala zole lutangu lwa binwani bia Aza, Aza wazaba ti Yehova yôkeke mu ngolo mpe lenda die nandi dia bakisa kanda diandi. Yehova wabakisa kanda diandi. Mukangu wa binwani watûka ku Éthiopie banunga wo. (2 Nta. 14:8-13) Ni bu sa ti ka tutomono’â zaba misamu miturila muna muntu ko, tuzebi ti ntangu ya tidzunu ye na kanda dia Nzambi mbo yisuka. Bambukeno, Yezu wabikula ti mu ntangu ya mansukina, ‘makanda mamansoni mbo mabela’ milongoki miandi.”​—Mat. 24:9. w20.09 17-18 par. 14-16

Ka kwena muntu ko wuzololo bamufingaka. Kâ tala ti mbeni zeto zitufingiri mpe tusiri mustima mu misamu mi batâka, tulendi kwizi nôka. (Bin. 24:10) Bwe tufweti bongela bifingu bia mbeni zeto? Ntiana ntumwa Paulo, tulendi “bâka mu nsayi mu [. . .] bifingu.” Mu bungu dia nti? Mu bungu ti, bantu bu batufingaka na bu batutelamanaka, mbo wusongelaka ti beto milongoki mia Yezu miena. (1 Pi. 4:14) Yezu watâ ti milongoki miandi mbo bakwamisa mio. (Za 15:18-20) Musamu wo waturila Bakristo ba ntete. Mu ntangu ya ntama, Bakristo beri landaka nsalulu za Bagreke, ntiana bantu balembo bâ na mayela mpe ba nôka beri bongelaka. Mpe ha kati dia Bayuda Bakristo ntiana bantu balembo zaba mikanda mpe bampampa mpamba beri bongelaka, ntiana ntumwa Piere na ntumwa Za. (Bis. 4:13) Bantu babingi beri banzaka ti Bakristo banôka beri, mpe ka beri’â na ngolo ko. Ka beri’â kotaka misamu mia politike ko, mbo beri kalaka mu bâ binwani, mpe bantu ka beri’â bahanaka buzitu ko. Ngano Bakristo ba ntete babika mbanzulu za mbi za mbeni zawu zabakabakasa mu samuna? Kâni. w20.07 14-15 par. 3-4

Ntumwa Za watomo zolo mpangi zandi, mpe wazoloko ti babâ na timinu tia ngolo. Luzolo lwandi na tiari tiandi biatomo moneka mu malongi ma kabahana mu mikanda mia mitatu mi kabatsonekena. Musamu wa mbote wena mu zaba ti bakento na babakala bayâla na Yezu, luzolo lwe nawu, mpe tiari tie nawu ntiana Za! (1 Za 2:27) Bika malongi ma kahana mabâ mu mitima mieto. Beto bansoni tabongeno nzengolo ya diatila mu matieleka; wuzololo tâ ti tatumama kwe Yehova mu misamu mi tuyirikaka mu luzingu lweto. Longoka Zu diandi mpe tûla lukwikulu mu buku dio. Kurisa timinu mu Yezu. Losa mabanza ma bantu peleko filozofi, na ndongosolo za Ba-aposta. Telamana ndiatulu ya yirika mbi mu mansweki na ya tihana mu sa masumu. Diatila mu mitieno mia Yehova. Mpe bika tabakisa mpangi zeto mu bâ ngolo, mu kwe lemvokela bô batufwemesaka na mu bakisa bô bê na nsatu lubakusu. Buna, ni bu sa ti tubwabane na nkwamusu, mbo tutatamana mu diatila mu matieleka. w20.07 24-25 par. 15-17

Mu luzolo Yehova wahana kwe muna tisari tiandi tia kwikama tibuka mu timvuka. Ni bu sa ti, bisalu bieto bia swaswana biena, beto bansoni ntalu twena, mpe nsatu mpangi zeto ye neto. Ntumwa Paulo watomo songela ti ka kwena muntu ko wulendi tâ kwe tisari tiakaka tia Yehova ti: ‘Ka ndiena naku salu ko.’ (1 Kor. 12:21) Tala ti tuzololo ti timvuka tiabâ mu tidzunu, tufweti zitisaka mpangi zeto mpe tufweti salaka nawu. (Efz. 4:16) Bu tusalaka mu bumosi, muna muntu luzolo wumonaka mpe timvuka ngolo tikwizi bâka. Bakuluntu babansoni ba timvuka, mu mpeve santu ya Yehova babasolelaka. Kâ, bakuluntu babansoni ka bena na lenda dimosi ko. (1 Kor. 12:17,18) Kampe bakaka ka ntama ko babasolele mpe misamu ka miamingi’â ko bazebi. Bakaka ka balendi’â bayirika misamu miamingi ko mu bungu ti ba nuna bena mpe tikolela tiawu ka tiena tia mbote ko. Kâ, ka kwena mukuluntu ko wulendi tâ kwe bakuluntu bakaka ti: ‘Ka ndiena neno salu ko.’ Kani basila bo, muna mukuluntu wufweti landa malongi ma Paulo me mu Bisi-Rome 12:10. w20.08 26 par. 1-2; 27 par. 4

Yehova, mu lweka lwa organizasio’andi ye ha mutoto katinaka mu nzila ya luzingu. Ntembe kâni, organizasio ya Nzambi bu yituhanaka mbangululu ya môna mu musamu wutariri ndongosolo ya Bibila peleko bu yituhanaka lutwalusu mu mitieno mia ndiatulu, mia tutambulaka mu sarila. Kâ, nti tusaka organizasio ya Nzambi bu yisaka nsobolo ya misamu miakaka mia luzingu lweto, ntiana bu batekaka Nzo ya Nsambululu? Mu mu nsayi tutatamana mu bâ tala ti mu bungu dia Yehova tusalaka, mpe ni Yandi twarisaka organizasio’andi. (Kol. 3:23, 24) Mutinu Davide watuhana tifwani bu kahana mbongo mu bungu dia ntungulu ya Tempelo. Yandi watâ ti: “Ngano meno nani ndiena, mpe bantu ba kanda diani banani bena, ngatu takuhana makabu ma luzolo lwa mutima ntiana mawu ma? Mu bungu ti biabiansoni kwe nge bitûkaka, mpe bima bi tukuheni ni bio bitûkiri ha koko kwaku.” (1 Nta. 29:14) Mu ntangu yi tuhanaka makabu, kwe Yehova mpe tuhanaka bio bitûkiri, ha koko kwandi. Kâ, makabu mo Yehova matomo tâka nsayi bu tuhanaka ntangu’eto, ngolo zeto, na mbongo zeto mu sala tisalu tiandi.—2 Kor. 9:7. w20.11 22-23 par. 14-16

Bu twe Mbangi za Yehova, lenda dieto mu tisalu tia samuna, ka kutarilaka lutangu lwa bantu ko ba tubakisaka mu kwizi bâ Mbangi za Yehova. (Like 8:11-15) Bu tutatamana mu samuna nsangu za mbote na mu longesa bantu, Yehova mbo kamona ti tulendele tisalu tieto. Mu bungu dia nti? Mu bungu ti tumama tuta tumama kwe Yehova na kwe Mwana’andi. (Mak. 13:10; Bis. 5:28, 29) Dema die neto dia kulu samuna bwawu bu mu bungu ti nsuka ya nza yi yeka nguria penepene! Ntangu ka yayingi’â ko yisiri mu samuna nsangu za mbote zilendi vukisa luzingu lwa bantu. Kulembeketandi peleko kubanzandi ti misamu miamiansoni mifweti bâ mia lunga mu sala tisalu tio tia mfunu. Bwawu bu yika ngolo nsatu’aku ya samuna, longoka mu tomo zaba mpila za samunina, yika butindi bwaku ngolo mpe kurisa tifu tia tiyimina. Yiza wasala na bantu yôka 8 milio basamunaka mu nza, mpe mbo baka nsayi yi hanaka Yehova. (Neh. 8:10; Like 5:10) Bonga nzengolo ya tomo samunaka, mpe tatamana mu sarila bo na tii ntangu Yehova yi kakwizi tâ ti tisalu tiwiri. w20.09 7 par.18-20

Ka tulendi’â tabika bivwama ko biatuwubakasa. “Ngolo za bungungu za bimvwama” zilendi wolesa luzolo lweto mu Yehova, matondo meto mu bungu dia Zu dia Nzambi na nsatu’eto ya zonzela dio kwe bantu. (Mat. 13:22) Tala ti tuzololo takengerela bima bia tu hana Yehova, tufweti sarila manzangu bu tumonaka misamu milendi tu natina mpasi. Tulendi dinga tatizabila mpila yi “tuswamina” peleko nti tusa tala ti tumweni misamu mia bunsuza, mia miangu na mia ba-aposta mu Internet peleko mu tele. Tala ti tukubamane mu misamu milendi tu turila, tulendi sarila manzangu mu kengerela tindiku tieto na Yehova na mu tatamana mu bâ ba verela ha meso mandi. (Mik. 101:3; 1 Tim. 4:12) Tufweti kengerela bima bia ntalu bia tu hana Yehova, matieleka ma Bibila na bweso bwa longesa mo kwe bantu. Bu tusila bo, mbo tubâ na ngindu ya mbote, luzingu lwa mbote na nsayi ya bakisa bantu mu zaba Yehova. w20.09 30 par. 16-19

Ngano wa batusu wena? Buna, ha meso ma bantu wazabikisa timinu tiaku mu Yehova, mpe wasongela luzolo lwaku lwa sala na organizasio’andi. Lumbu ti, Yehova organizasio’andi kata twarisa mu mpila yisongelaka timuntu tiandi, kani diandi na mitieno miandi. Tataluzuleno, bima bitatu bi tulendi mona mu organizasio’andi. Tima tia ntete, ‘Nzambi kena na [tihambula] ko.’ (Bis. 10:34) Luzolo lwatuma Yehova kahana Mwana’andi ‘mu futa mfuka [nkûlulu] ya bantu babansoni.’ (1 Tim. 2:6; Za 3:16) Yehova kanda diandi kata sarila mu samuna nsangu za mbote kwe bô bazololo mu wâ zo, ngatu kabakisa bantu babingi mu bakila ndandu mu nkûlulu. tima tia nzole, Yehova Nzambi ya bunkete na ya tidzunu yena. (1 Kor. 14:33, 40) Wuzololo tâ ti, bisari biandi mpe bifweti bâ na bunkete, na tidzunu. Tima tia ntatu, Yehova “Mulongi wa Wunene” wena. (Iza. 30:21) Ntiangu, organizasio’andi yisarilaka ngolo mu longesa bantu misamu mitariri Zu diandi Bibila, mu bimvuka na mu tisalu tia samuna. w20.10 20 par. 1-3