Juillet

Tufweti sa tindiku na Yezu ngatu tusambulu tweto bahanina to mvutu. Wuzololo tâ ti ka wufweni’â ko mu tâka, “mu nkumbu ya Yezu” ku nsuka ya tusambulu tweto. Tufweti bakula bwe Yehova kasarilaka Yezu mu hana mvutu mu tusambulu tweto. Yezu watâ kwe bantumwa ti: ‘Miamiansoni mi lulomba mu nkumbu’ani, mbo niyirika mio.’ (Za 14:13) Ni bu sa ti ni Yehova kwa wâka tusambulu tweto mpe haninaka to mvutu, Yehova wahana lenda na nswa wa lungisaka nzengolo zandi kwe Yezu. Buna, ntete kahananina tusambululu tweto mvutu, mbo katoko talaka tala ti malongi ma hana Yezu, ma tulandaka. Mu tifwani, Yezu watâ ti: ‘Diangana, lwamana lemvokela bantu mu bubi bu balusiri, beno mpe Tata’eno we ku zulu mbo masumu meno. Tala ti ka lulemvokele’â bantu ko, beno mpe, Tata’eno ka [lu lemvokela] masumu meno ko.’ (Mat. 6:14, 15) Nkatika mfunu wena mu bongelaka bampwana’eto ntiana kwa bu tu bongelaka Yehova na Yezu! w20.04 22 par. 6

Ntumwa Paulo wabakula misamu mieri kekoloko bantu beri mu wâka, mpe wadelakasa nsangu zi keri tâka. Mu tifwani, bantu ba kazonza na bo ku Listre, ka batomo’â zaba Zu dia Nzambi ko. Dieka bo, Paulo wazonza mu mpila yi baketi bakurila misamu mi keri batêlaka. Paulo wazonzela ntangu yi batiaka mbutu na lenda dia mona nsayi ya luzingu. Yandi wasarila nzonzolo na bifwani bi baketi tomo bakula. Sarila lenda dia bakula mu zaba misamu mi kekoloko bantu ba mu teritware’aku mpe delakasa misamu mi tâ. Bwe lendi zabila bima bi kekoloko muntu bu bwabana nandi peleko bu kwenda ku nzo’andi? Tomo talaka misamu miyôkaka. Kampe nsaba kata sala, buku kata tanga, kaminio kata yirika peleko tima tiakaka kata sa. Lendi sarila tima ti kata sa mu batika timoko na yandi. (Za 4:7) Ndwatulu ya muntu yilendi songela hata di katûka, tisalu ti kasalaka, peleko ekipe ya sport yi kazoloko. w20.04 11 par. 1-12

Mu bungu dia lwaka lwalwingi, mpangi zakaka lwaka peleko nsoni zimonaka mu misamu miakaka bu babâkana bantu. Kampe musamu wa mpasi wubâka kwe bawu mu bâ ha mbuka ye na bantu babingi, kâ ku tukutakanu twa timvuka batatamanaka mu kwenda na ku tukutakanu twa tunene. Musamu wa wunene bamonaka wo mu zonza na bantu ba balembolo zaba, kâ bantu bakaka bazonzesaka mu tisalu tia samuna. Tala ti nge mpe ni mo kati mo wena, bâ na lukwikulu ti ka wena nge kaka ko. Bantu babingi bê ntiana nge. Bambukaka ti Yehova ngolo zaku zazansoni za kayangalalaka. Mu bungu ti kuta bika ko, tidimbu tiena tita songela ti Yehova nge kasakumunaka, mpe ngolo ze naku nsatu zi kahanaka. (Flp. 4:6, 7) Tala ti Yehova sarilaka ni bu sa ti timbevo tie naku peleko lwaka lwalwingi lwe naku, bâ na lukwikulu ti Yehova tâka nsayi. Bantu babingi ha kati dieto balembolo na tikolela tia mbote, kâ vivirila bata vivirila. (2 Kor. 4:16) Na lubakusu lwa Yehova, beto bansoni mbo ntinu tudioka tii ku nsuka! w20.04 31 par. 20-21

Ndwenga za Nzambi mu mpila yi kasarila nzo’eto, mutoto zitomo monekenaka. (Ebr. 3:4) Mutoto wa nzitukulu wena mu bungu ti, yo ni planete ya yimosi ye na bima biabiansoni bifwanane mu simbirila luzingu lwa bantu. Mu nza ya mukaka, mutoto tulendi wa fwanakasa na bato yita kwe yende mu mubu (océan). Kâ, luswaswanu lwalwingi lwe ha kati dia bato, bantu, na mutoto’eto. Mu tifwani, bilumbu bikwa, bantu bê mu kati dia bato batatamana mu bâ ba moyo, tala ti bafweti sala oxygène, bidia, na mamba bawu beni, mpe tala ti ka balendi’â balosa bima bia mvindu kwakaka ko? Bantu bê mu kati dia bato yo mbo bakulu fwa. Kâ, mutoto luzingu lwa miliare za bantu na za bibulu wulendaka mu simbirila. Oxygène wutuhanaka, bidia na mamba me neto nsatu, mpe bima bio ka bimangaka ko. Ni bu sa ti bima bia mvindu biabiansoni ha mutoto kwa bibâka, mutoto wa toma kwa wena mpe bantu na bibulu balendi tatamana mu bêla wo. Ngano bwe wubêlaka? Yehova wasala mutoto na lenda dia sobesaka bima bia mvindu mu bima bia mbote bi balendi vutu sarila. w20.05 20 par. 3-4

Satana nkumbu ya Nzambi keri hunisinaka misamu, mpe kwe Eva katâka ti Yehova ngungu yena. Buna, Satana wayizi bâ Diabulu peleko muntu wuhunaka misamu. Eva watomo hunakana; wakwikila Satana. (1 Tim. 2:14) Eva watûla lukwikulu lwalwingi mu Satana yôka lukwikulu lwandi mu Yehova. Ka wabâ musamu wa mpasi ko kwe Eva mu bonga nzengolo yiyôkele bubi. Yandi wabonga nzengolo ya kolama kwe Yehova. Yandi wadia mbutu ya ba yimina Yehova. Ha manima, wahana mpe mbutu yo kwe Adame. (Mba. 3:6) Banza’eti fioti misamu miaketi lenda mu tâ Eva kwe Satana. Yandi waketi tâ musamu ntiana: “Meno, ka nikuzebi’â ko, kâ Yehova Tata’ani Yandi nzebi; Yandi nzoIolo mpe ni Yandi nisilaka tivuvu. Yandi wahana kwe Adame na kwe meno bima biabiansoni bie neto. Bwe lendi zonzela bubi bwandi? Katuka wo!” Ntia nsayi Yehova yaketi bâ nandi bu kaketi wâ misamu mio mia kwikama mu munwa wa mwana’andi wa mukento wumuzololo! (Bin. 27:11) Kâ, Eva keri’â na luzolo lwa kwikama ko mu Yehova; Adame mpe keri’â na luzolo lo ko. Bu balembo bâ na luzolo lo kwe Tata’awu, Adame na Eva balembana mu nwanina nkumbu’andi bu beri ya hunisinaka misamu. w20.06 4 par. 10-11

Tufweti sîkaka mpangi zeto za zikento mu bungu dia bisalu bi basalaka mu bungu dia Yehova. Mu bisalu bi basalaka, mwe na tisalu tia tunga na tia kipa Nzo za Nsambululu, lubakusu mu bimvuka bi bazonzaka mazu ma nzenza na ku Betele. Lubakusu mpe bahanaka mu ntangu ya katastrofe, mu mbangululu ya mabuku meto, mpe mipasuri-nzila peleko misionere babâka. Musamu wakaka mpe, mpangi za zikento za kwela babakala bawu bê na madema mu timvuka na mu organizasio zibakisaka. Tala ti lubakusu lwa bakento bawu kâni, mpangi zo ze na madema, ka zilenda ko mu sala ntiana “bantu ba nkabila.” (Efz. 4:8) Bakuluntu bê na ndwenga mbo babakulaka ti mpangi za zikento “mukangu wa wunene wa binwani” wena, wa bisari bi tihanaka na luzolo lwa mutima mpe bivulu salaka bubote mu tisalu tia samuna. Bakuluntu bazebi ti mpangi zo za zikento za kula mpe za kwikama, tisalu tia mbote basalaka mu bakisa mpangi za zikento za ntwenia bu batelamanaka nkwamusu. (Tite 2:3-5) Diangana, wufwanane tazolo mpangi zeto za zikento mpe tabatondaka! w20.09 23-24 par. 13-14

Yehova ka zimbakanaka bantu beri mu sarilaka ko, mpe bayizi bika mu mu sarila ntangu fioti. Ka zimbakanaka ko mpe mio mi basa mu tisalu tiandi. (Ebr. 6:10) Mbikuri Izaya tifwani tia mbote kahana mu bangula mio mi kamonaka Yehova ku mutima mu bungu dia kanda diandi. Izaya watsoneka ti: “Ntiana muvungi bimeme biandi kakipa. Bala ba bimeme kakutakasa mu koko kwandi, mpe ha titulu tiandi kabatûla.” (Iza. 40:11) Bwe muvungi wa wunene wumonaka tala ti timosi tia bimeme biandi tizimbakane? Yezu wasongela bwe Yehova kamonaka ku mutima bu kayula milongoki miandi: ‘Bwe luta wa banzila? Tala ti muntu bimeme nkama (100) bie nandi, timosi tiamana wumuka, ngano ka sa sisa bia luvwa na vwa (99) ko ku mongo mu kwe dinga tina tiwumukini? Kamana tia mona, wa matieleka nita lu têla, nsayi yi timuhana mbo yiyôka nsayi ya bio bia luvwa na vwa bilembolo wumuka.’​—Mat. 18:12, 13. w20.06 19-20 par. 8-9

Bweso bwe kwe beto mu sarila Yehova mu mpila zazansoni zi tulenda. (Mik. 27:4; 84:10) Tala ti mpangi yizololo mu sala tisalu tiatingi mu organizasio ya Yehova, musamu wa mbote wena. Kâ, bu kata baka madema, ka fweti’â kabâ na mabanza ma yôka mu yandi beni ko. (Like 17:7-10) Kani diandi difweti bâ dia sarila bampwana’andi na kuluka kwakwansoni. (2 Kor. 12:15) Mu Bibila, bifwani bie mo bia bantu beri na mabanza ma yôka mu bawu beni. Diotrefese ka bâ na mabanza ma delakana ko. Yandi wadinga mu bâ ha “tibuka tia ntete” mu timvuka. (3 Za 9) Uziya na lumpampani, wayêla mu sala tisalu tia lembo mu tuma Yehova. (2 Nta. 26:16-21) Absalome wadinga kabâ mutinu, ntiangu kaleba luzolo lwa bisi-hata ngatu bamutambula. (2 Sam. 15:2-6) Bifwani bia bantu bo bitomono songela ti ti Yehova ka zololo’â bantu badingaka mukembo wa bawu beni ko. (Bin. 25:27) Diangana, lumpampani na tifu tia dinga mu moneka, ku mpasi kwa binataka.​—Bin. 16:18. w20.07 4 par. 7-8

Makanda makaka ma Bakristo mayenda ku nsi ya nzenza mu kwe swama peleko mu kwe dinga tisalu. Mu misamu mia mpila yo, bala bawu bafweti kwe longoka ku lukolo mu zu di bazonzaka ku nsi yo ya môna. Bibuti mpe bilendi dinga mu longoka zu dio ngatu babaka tisalu. Ngano nti basa tala ti timvuka tie kô ti bazonzaka zu diawu dia mbutukulu? Ngano mu ntia timvuka bakwenda? Ngano mu timvuka ti bazonzaka zu diawu dia mbutukulu bakwenda peleko mu timvuka ti banzonaka zu dia nsi yo ya nzenza? Mfumu-kanda fweti bonga nzengolo ya sola timvuka ti kwenda kanda diandi mu bungu dia tukutakanu. Mu bungu ti nzengolo yo mfumu-kanda kwa yitariri, fweti taluzula ntia nsololo yibâ ya mbote mu bungu dia kanda diandi. (Nga. 6:5) Tufweti zitisa nzengolo yibonga mfumu-kanda. Nzengolo ni nzengolo yibonga mfumu-kanda, tufweti ya tambula, tufweti bwana mpe tufweti songela luzolo kwe kanda dio.—Rom. 15:7. w20.08 30 par. 17-18

Tala ti tuzololo tabaka ngolo zitûkaka kwe Yehova, ka tufweti’â tabanzaka ko ti ngolo za nitu, lukolo lwa lula, kûma ku takurila peleko bimvwama bisaka ti tabâ muntu wa ntalu. Bima bio ka bisaka ko ti tabâ salu ha meso ma Yehova. Mu kanda dia Nzambi ‘ka babingi’â ko bê na ndwenga ha meso ma bantu, ka babingi’â ko babutukila mu makanda ma nsangu.’ (1 Kor. 1:26) Buna, tala ti ka wena na bima bi tuzonzele ku mbatukulu ya paragrafe yi ko, lendi tatamana mu sarila Yehova. Kani wamwina bio buna, bongela luzingu lwaku mu mpila ya mbote, ntina bweso bwa mona ngolo za yehova zita sala mu nge. Mu tifwani, wamana tîna bantu batelamanaka nkwikulu zaku, sambila Yehova kakuhana butindi ngatu wazonzela misamu mi kwikilaka. (Efz. 6:19, 20) Tala ti timbevo tie naku tûka ntama, lomba kwe Yehova kakuhana ngolo mu tatamana mu sala mu tisalu tiandi. Bu mona lubakusu lwa Yehova, timinu tiaku mbo tikula mpe mbo baka ngolo. w20.07 16 par. 9

Tala ti wena’eto tatûla Timfumu ha tibuka tia ntete mu luzingu lweto, tufweti bâ ntiana Abrahame watambula mu hombesa bima biandi mu tâ Nzambi nsayi, mpe wasila bô mu luzolo lwa mutima. (Mak. 10:28-30; Ebr. 11:8-10) Ka lubanzandi ti ka lubwabana na misamu mia mpasi ko. Bantu bô bayôkesaka luzingu lwawu mu sarila Yehova, nkwamusu zibâka nawu mpe. (Zaki 1:2; 1 Pi. 5:9) Lumbu ti, misamu miamingi mita sa ti tabanzaka bilumbu bita kwiza. Misamu mita yilama mu nza mia mita songela ti ku nsuka ya bilumbu bia mansukina bia nza yi twena. Mu tusakumunu twatwingi tu tubaka mu ntangu yiyâla Timfumu tia Nzambi, mwe mpe na mvumbukulu ya bantu beto bafwa ba tatomo zolo. Mu ntangu yo, Yehova mbo kasenda Abrahame mu bungu dia timinu tiandi na luvivululu lwandi bu kamuvumbula kwe ba fwa na kanda diandi ha mutoto. Ngano mbo lubâ kô mu ba bwana? Lulendi kwa bâ tala ti, ntiana Abrahame, luzololo mu hombesa bima mu bungu dia Timfumu tia Nzambi, tala ti lutatamane mu bâ na timinu tia ngolo ntono mpasi, mpe tala ti lulongokele mu kêla Yehova na luvivululu.​—Mika 7:7. w20.08 5-6 par. 13-14; 7 par. 17

Tuzebi ti mbeni zeto zamana tu honda, Yehova mbo katuvumbula kwe ba fwa. (Nza. 2:10) Lukwikulu lwe neto ti, ka kwena musamu ko wu bayirika, wutukabakasa mu bâ ndiku za Yehova. (Rom. 8:35-39) Ntia mpila ndwenga Yehova kasongela bu katuhana tivuvu tia mvumbukulu ya ba fwa! Buna, ka twena na bunkuta ko tala ti bô bê mu lutumu lwa Satana batukanikini lufwa tamana lembo sa mio mi bakekoloko. Diangana musamu wo nguria butindi wuta tu hana mu tatamana mu bâ ba kwikama kwe Yehova. Tala ti bô bayinaka Yehova batêle ti honda baluhonda, ngano mbo lubâ na lukwikulu ti Yehova mbo kaluvumbula kwe ba fwa? Bwe lulendi zabila ti mbo lubâ na lukwikulu mu Yehova mu ntangu yina? Mu zaba wo, tufweti tiyula: ‘Ngano nzengolo za fioti zi nibongaka mbo zisongelaka ti lukwikulu lwe nani mu Yehova?’ (Like 16:10) Tiyuvu tiakaka tilendi bâ: ‘Ngano mbêlo’ani mbo yisongelaka ti lukwikulu lwe nani mu kani dia Yehova dia kipa nsatu zani namana toko dinga Timfumu?’ (Mat. 6:31-33) Tala ti lutêle “yee” mu mvutu za biyuvu bio, dieka bo lusongele ti lukwikulu lwe neno mu Yehova, mpe mbo lubâ ba kubama mu ntontolo ziluturila.​—Bin. 3:5, 6. w20.08 17-18 par. 15-16

Tufweti tomo zaba mu sarila Zu dia Nzambi. Tulendi dia zaba mu sarila mu nzila ya tukutakanu tweto. Kâ, tala ti tuzololo tawisa bantu bakaka ti matieleka ma Bibila ntalu mena, tufweti bâ na tifu tia longokaka Bibila beto beni. Tufweti sarila Zu dia Nzambi mu yika timinu tieto ngolo. Wuzololo tâ ti ka tufweti’â tatangaka kwa Bibila ko. Tufweti dia dimbitilaka mpe tufweti dingaka mu mikanda mieto mpila yi tulendi tomo bakurila na yi tulendi tomo sarila Matsonoko. (1 Tim. 4:13-15) Buna, mbo tutomo sarila Zu dia Nzambi mu longesa bantu bakaka. Buna ka tusukina kwa mu batangila verse za mpamba ko. Tuzololo tabakisa bantu mu bakula na mu zaba bwe balendi sarila verse ze mu Bibila. Dieka bo, bu tuvulu longokaka Bibila, tulendi kwizi bâ milongi miyôkele bubote.​—2 Tim. 3:16, 17. w20.09 28 par. 12

Tulendi tûla tisalu tia samuna ha tibuka tia ntete, tala ti tubongele ntangu ya banza misamu miamiansoni mi saka Yehova mu tu bakisa. Mu tifwani, bidia biabingi bia timpeve katuhanaka mu nzila ya mikanda, ya enregistrement audio-video, mpe na mu nzila ya internet. Ngano wa zebi ti mu site’eto nsangu bahanaka mu mazu yôka 1 000? (Mat. 24:45-47) Mpila yakaka yi tulendi tûrila tisalu tia samuna ha tibuka tia ntete ni mu landa tifwani tia Yezu. Ka bika na kani tima ko tiamukabakasa mu samuna matieleka. (Za 18:37) Ka lebakana ko mu ntangu Satana yi kamukanisina ‘bimfumu biabiansoni bia ha nsi na nsangu zawu’; ni bu wubâ mu ntangu bantu yi badinga kabâ mutinu. (Mat. 4:8, 9; Za 6:15) Nsatu za bimvwama na mfietokoso za ngolo, ka zamusobesa mabanza ko. (Like 9:58; Za 8:59) Timinu tieto bu tikotaka mu ntontolo, tulendi tatamana mu tûla tisalu tia samuna ha tibuka tia ntete, tala ti tubambukiri malongi ma hani ntumwa Paulo mu verse ya lumbu ti. w20.09 9-10 par. 6-7

Nsayi yayingi ye neto bu twe na mpangi zazingi za zikento zisalaka tisalu tia ngolo mu timvuka! Mvutu bahanaka ku tukutakanu, mpe tisalu tia samuna basalaka. Bakaka Nzo ya Nsambululu bakipaka, mpe mbo basongelaka ti mpangi zawu za timvuka za bakipaka. Diangana, nkwamusu zazingi batelamanaka. Bakaka bibuti biawu bie bia nuna bakipaka. Bakaka mpe mfietokoso za kanda diawu batelamanaka. Mboko bakaka, ngolo basarilaka, mpe bawu kaka basansaka bala bawu. Mu bungu dia nti tufweti tindisaka mpangi zeto za zikento? Mu bungu ti mu nza ka bazitisaka bakento ko buna bufwanane. Bibila mpe ditulombele tabatindisaka. Mu tifwani, ntumwa Paulo watêla timvuka tia Rome tiabwana Febe mpe ‘tiamubakisa mu miamiansoni mi kakekolo lubakusu.’ (Rom. 16:1, 2) Paulo, mu tikulu katûka ti beri banzaka ti bakento ka beri’â salu ko. Kâ, bu kayizi bâ Mukristo, walanda tifwani tia Kristo mpe wabatika mu bongelaka bakento na buzitu, mpe nsayi. w20.09 20 par. 1-2

Tulendi bakisa milongoki mieto ngatu miabâ na nsatu ya samuna nsangu za mbote, tulendi mu yula biyuvu ebi: “Bwe luzingu lwaku lwayizi tomena bu wabatikiri mu sarila ndongosolo za Bibila? Ngano banzi ti bantu bakaka bafweti wâ nsangu zo? Nti lendi sa mu ba bakisa?” (Bin. 3:27; Mat. 9:37, 38) Tatamaneno mu lundaka mu mabanza meno ti Yezu watulomba talongesaka kwe bantu bakaka mu ‘kêla misamu miamiansoni’ mi katutuma. Diangana, mu ntumunu yo mwe na ntumunu zole ziyôkele bunene​—ntumunu ya zolo Nzambi na ya zolo mpwana’eto—​ntumunu zo za zole nguria tintwari zena na tisalu tia samuna na tia kubika milongoki. (Mat. 22:37-39) Tima tia ntete titutumaka mu sala tisalu tia samuna ni luzolo. Kwe milongi miakaka mia Bibila mabanza ma batika tisalu tia samuna bunkuta mabatâka. Kâ tulendi ba tindisa ti na lubakusu lwa Yehova, mbo balenda malembe malembe mu telamana bunkuta bwa bantu.​—Mik. 18:1-3; Bin. 29:25. w20.11 3 par. 6-8

Bu takwe kubame, sambirila mulongoki’aku mpe zonzela nsatu zandi kwe Yehova. Lomba kwe Yehova kakubakisa mu longesa mu mpila yi lendi simbila mitima mia bantu. Lunda mu mabanza ti kani diaku ni mu bakisa mulongoki’aku ngatu wabatusu. Fweti mokaka na Yehova. Bwe? Bu kakwe wirikiri na bu kakwe zonze na Yandi. Yandi lendi wirikila Yehova bu kakwe tangi Bibila bilumbu biabiansoni. (Yos. 1:8; Mik. 1:1-3) Lendi zonzaka na Yehova mu nzila ya lusambulu. Vulu sambilaka mu mutima’aku wawansoni bu lubatikaka na bu lumanisaka mu longoka. Sambilaka na mulongoki’aku, mpe bu lusambilaka, mu zonzelaka kwe Yehova. Bu kakwe wê tusambulu twaku, mbo kakwizi longoka mu sambilaka Nzambi’eto Yehova mu mutima wawansoni na bunsungu, mu nkumbu ya Yezu Kristo. (Mat. 6:9; Za 15:16) Banza’eti bwe ntangulu ya Bibila ya bilumbu biabiansoni (wirikila Yehova) na lusambulu (zonza kwe Yehova) bilendi bakisila mulongoki’aku mu pusana kwe Nzambi!—Zaki 4:8. w20.10 8 par. 8; 9 par. 10-11

Organizasio ya Yehova tisalu tia ngolo yita sala lumbu ti ngatu timvuka tia Bakristo tiatatamana mu bâ mu bunkete na mu tidzunu ntiana mu ntangu ya Bakristo ba ntete. (Bis. 16:4, 5) Mu tifwani: Tala ti mu timvuka tiakaka wele sila Nzo ya Zangama ya Munkengi, ku nsi’aku peleko mu nsi yakaka, mbo zaba ntia timoko bataluzula mpe bwe batwarisila tio. Ho nkatika bendo, kubâ na lwaka ko! Mpeve santu ya Nzambi kwa yilendi tûla tidzunu tia mpila yo! (Sof. 3:9) Nti lendi sa? Tiyula: ‘Ngano mbo nisingasaka bumosi na tidzunu mu timvuka? Ngano bô batwarisaka nitumamanaka? Ngano bantu bakaka balendi kunsikirila, nsungula tala ti madema me nani mu timvuka? Ngano mu ntangu ya fwanana nitulaka, ngano bantu nibakisaka mpe nsayi yibâka nani mu ba bakisa?’ (Zaki 3:17) Tala ti mweni ti lendi vutu sa nsobolo, sambila mu lomba mpeve santu. Diangana, bu kwe biki mpeve santu yasobesa timuntu tiaku na nsalulu zaku, mpangi zaku mbo zitomo ku zolo, mpe mbo batonda mu tisalu ti salaka. w20.10 23 par. 12-13

Zu dia Nzambi dilendi bâ ntiana titâri kwe beto. (Tala Zaki 1:23-25.) Babingi tutalaka titâri bilumbu biabiansoni mu pari ntete taduka. Buna, tulendi mona tala ti hûma hafwanakane mu delakasa ntete bantu bakaka batumona. Mpila mosi mpe, bu tutangaka Bibila bilumbu biabiansoni, mpila zi tulendi sungikila mbanzulu zeto na ndiatulu’eto tukwizi monaka. Bantu babingi batangaka verse ya tilumbu mu pari ntete baduka, buna mbo yibabakisaka. Misamu mi batengi babikaka miasobesa mbanzulu zawu. Mpe mu tilumbu tiatiansoni, mpila zi basarila malongi ma Bibila badingaka. Tufweti longokaka mpe tufweti dimbitilaka Zu dia Nzambi bilumbu biabiansoni. Tulendi mona ti musamu wa fioti kwa wena, kâ timosi tiena tia bima bia mfunu bi tulendi sa mu tatamana mu nzila ya mfinka yinataka ku luzingu. Mu tifwani, Zu dia Nzambi mbo ntiana échographie disalaka yi basaka kwe mukento we na zimi mu zaba tala ti mwana wa bakala peleko wa mukento kabuta. Kâ, tufweti bâ ba kuluka tala ti tuzololo tabaka ndandu ya malongi matûkaka mu Bibila na kwe bisari bia Nzambi. w20.11 18 par. 3; 20 par. 8

Ni bu sa ti Bakristo ba mu mbandu ya ntete mbo beri vulu ba niekonaka, ntangu ya tidzunu mpe yeri nawu. Bwe milongoki miayizi sarila ntangu yo ya tidzunu? Bakento na babakala bo ba kwikama, ka babika ko mu samuna nsangu za mbote. Mukanda wa Bisalu wutâka ti “mu bunkuta bwa Yehova” beri kwe diatiri. Bawu batatamana mu samuna nsangu za mbote. Ngano ntia ndandu yamoneka? Bawu batatamana mu funa. Yehova wasakumuna luhemo lwawu lwa samuna mu ntangu yo ya tidzunu. (Bis. 9:26-31) Bakristo ba mu mbandu ya ntete mu ntangu yi beri bâka na bweso bwa samuna beri samunaka. Mu tifwani, ntumwa Paulo bu kabakula ti bweso bwabwingi bweri nandi bwa samuna ku Efeze, wazakala ku hata dio mu samuna. (1 Kor. 16:8, 9) Milongoki miasarila ngolo zazingi mu samuna “nsangu za mbote za Zu dia Yehova.” (Bis. 15:30-35) Ngano ntia ndandu zamoneka? Verse ya lumbu ti yituheni mvutu. w20.09 16 par. 6-8

Adame bu kasumuka, wanata lufwa kwe yandi beni,bala na ntekololo zandi. Tii lumbu ti, mpasi za bukolo bwandi za tuta mona. Kâ, mu bungu ti Nzambi wavumbula Mwana’andi kwe ba fwa, tulendi kwizi bâ mu nsayi mu bilumbu bita kwiza! ‘Mvumbukulu ya ba fwa mpe, mu muntu wumosi yayizila’; ni Yezu. Ntumwa Paulo watâ ti: “Babansoni bu bafwaka mu Adame, ni bo mpe babansoni bavutu baka luzingu mu Kristo.’ (1 Kor. 15:22) Paulo bwe keri zolo tâka bu katâ ti ‘babansoni bu bafwaka mu Adame’? Paulo, bantu babansoni keri zonzelaka, babiarila masumu ma Adame mpe ntiangu bafwaka. (Rom. 5:12) Adame kena mu mulonga wa bantu ‘babaka luzingu’ ko. Nkûlulu ya futa Yezu ka bakila yo ndandu ko mu bungu ti Adame muntu wa lunga weri wasola yandi beni mu kolama kwe Nzambi. Misamu miaturila Adame, ni mio mpe miturila bantu bo ‘Mwana muntu’ ba kabongela ntiana ‘nkombo,’ mbo bafwa mankululu.​—Mat. 25:31-33, 46; Ebr. 5:9. w20.12 5 par. 13-14

Tala ti ka twena na madema ko, tadimbitileno mu tifwani tia mbazi za kwikama. Mutinu Ahabe bu keri yâlaka, Yehova walomba kwe bambazi bahana mabanza mu mpila yi baketi wubakasa Ahabe weri mutinu wa mbi. Mbazi zazingi zahana mabanza mawu. Kâ, Nzambi wasola mbazi yimosi mpe wamutêla ti mabanza ma kahana mbo maketi simba. (1 Mit. 22:19-22) Ngano mbazi zo zakaka za kwikama zanôka? Ngano batiyula: ‘Mu bungu dia nti ndiyôkese ntangu’ani mu hana mabanza mani?’ Kâni. Bambazi ba nkatika ba kuluka bena mpe bazololo ti mukembo wawansoni wendaka kwe Yehova. (Mfu. 13:16-18; Nza. 19:10) Bambukaka ti bweso bwena mu bâ Mbangi ya Yehova na mu samuna Timfumu tiandi. Madema ka masaka ko ti tabâ ntalu ha meso ma Nzambi. Kâ, tala ti ba kuluka twena mbo tubâ ntalu ha meso ma Yehova na ma mpangi zeto. Buna, sambila Yehova ngatu kakubakisa mu tatamana mu bâ wa kuluka. Dimbitilaka mu bifwani biabingi bia mbote bie mu Bibila bia bisari bia kuluka bia Yehova. Sa miamiansoni mi lenda mu sarila mpangi zaku mu luzolo.​—1 Pi. 5:5. w20.12 26 par. 16-17

Mpu yikengerelaka mutu ya mvukulu ni tivuvu ti tu hanaka Yehova​—tivuvu tie neto ti Yehova mbo katukûla mu lufwa mpe mbo kasenda bô basarilaka luzolo lwandi. (1 Tes. 5:8; 1 Tim. 4:10; Tite 1:1, 2) Tivuvu tieto mu mvukulu lenda dieto dia banza tikengerelaka. Beto tibakisaka mu tûla mabanza meto mu makani ma Nzambi, na mu lembo bâ na lwaka lwa yôka mu misamu mi tubwabanaka na mio. Bwe tulendi lwatila mpu yikengerelaka mutu? Mu ntangu yi tutatamanaka mu bâ na mabanza mamosi na Nzambi tulwataka yo. Mu tifwani, kani tatûla tivuvu tieto mu bimvwama, mu Nzambi tutûlaka tio. (Mik. 26:2; 104:34; 1 Tim. 6:17) Mbele ya muzingu ya timpeve ni Zu dia Nzambi, Bibila. Mbele yo ya muzingu bungungu yizabikisaka, mpe bantu yikûlaka mu ndongosolo za bungungu na mu nsalulu za mbi. (2 Kor. 10:4, 5; 2 Tim. 3:16, 17; Ebr. 4:12) Mbele yo tulongokaka mu sarila buna bufwanane, bu tusaka ndongokolo ya beto beni, na ndongonsolo yi tubakaka mu organizasio ya Nzambi.​—2 Tim. 2:15. w21.03 27 par. 4; 29 par. 10-11

Ni bu sa ti ku boloko keri mu bungu ti nkumbu ya Yezu keri kwe samuni, Za wasongela ti mpangi zandi keri zoloko. Mu tifwani, watsoneka buku dia Nzabukusu mpe watambika dio mu bimvuka ngatu bazaba ‘mio mifweti kwiza [ntamana].’ (Nza. 1:1) Kampe bu bamudukisa ku boloko, ku Patmose, Za watsoneka Evanzile’andi ya luzingu na tisalu tia Yezu. Yandi watsoneka mpe mikanda mitatu mu tindisa na mu yika mpangi zandi ngolo. Lendi landa tifu tia tihana tia Za; mpe mu luzingu lwaku, lendi songela ti bantu ba zoloko. Nza ya Satana yizololo ti wayôkesa ntangu’aku na ngolo zaku mu bungu dia nge beni, mu dinga mu baka mbongo na mu kuna nkumbu. Kani basila bo, Bakristo mu nza ya mukaka batihanaka mu yôkesa ntangu’awu mu samuna nsangu za mbote na mu bakisa bantu ngatu babâ penepene na Yehova. w21.01 10 par. 9-10

Yonatane mbo kaketi sila Davide timbanda. Mu bungu ti mwana wa mutinu Sawule weri, ni Yonatane wafweti bâ mutinu ha manima ma tata’andi. (1 Sam. 20:31) Kâ, Yonatane wa kuluka weri, mpe wa kwikama weri kwe Yehova. Ntiangu katomo singasa nsololo ya sa Yehova bu kasola Davide kabâ mutinu. Yandi wa kwikama mpe weri kwe Davide, ni bu sa ti watomo tâ Sawule nkesi. (1 Sam. 20:32-34) Mu bungu ti Yonatane watomo zolo Davide, ka mu sila timbanda ko. Yonatane weri tinwani tieri na butindi, wanwana mizingu mpe binwanunu biandi bia kazabirila. Yandi na tata’andi ntiana bantu beri na “manzangu mamingi [. . .] yôka mbemba [aigles]” beri ba bongelaka, mpe ntiana bantu beri na “ngolo zazingi [. . .] yôka za ngo-mbulu.” (2 Sam. 1:22, 23) Yonatane mbo kaketi kwe tisîki mu bungu dia misamu mi keri yirikaka na butindi. Kâ, Yonatane ka dinga ko mu yôka Davide, mpe keri’â saka timbanda ko mu misamu mia mbote mieri yirikaka Davide. Yonatane wazolo Davide mu bungu dia butindi bwandi, mpe mu bungu ti Yehova keri sikirilaka. Mu tifwani, ni mu ntangu Davide yi kahonda Goliate, Yonatane kabatika mu mu zolo ntiana yandi beni. w21.01 21 par. 6; 22 par. 8-9

Bakristo babansoni mu lutumu lwa Yezu Kristo bena, yandi we ntwarisi ya lunga. Kâ, Mukristo wa wukento bu wukwelaka mu lutumu lwa bakala die na masumu kakwizi bâka. Wulendi bâ musamu wa mpasi. Buna, bu kadingaka muntu wu ka kwelana, mpangi ya yikento yifweti tiyula: ‘Nti bita songela ti mbo yibâ mfumu-kanda ya mbote? Ngano misamu mia timpeve ha tibuka tia ntete katûlaka mio mu luzingu lwandi? Tala ti kâni, nti bita sa ti nabanza ti mbo kakwizi bâ mfumu-kanda ye na timpeve tia mbote ha manima ma makwela?’ Kâ, mpangi ya yikento yifweti tiyula mpe: ‘Ntia bifu bibâ nani nsatu mu makwela? Ngano luvivululu lwe nani mpe kaba nikabaka? Ngano tindiku tia ngolo tie nani na Yehova?’ (Ekl. 4:9, 12) Tala ti mukento wubongele nzengolo za mbote ntete kakwela, zilendi mu bakisa mu lenda makwela mandi mpe mu bâ mu nsayi. Mpangi zazingi zisongelaka tifwani tia mbote mu bungu ti babakala bawu batumamanaka. Diangana tufweti ba sîka! w21.02 8 par. 1-2

Mu mivu miayôkele, bisamuni biabingi biayizi bâ na kani dia longoka zu diakaka ngatu biakurisa tisalu mu bimvuka bi bazonzaka zu diakaka, bieri na nsatu bisamuni. Bakristo bo, bawu beni babongaka nzengolo mu tomo vutu sarila Yehova. Ni bu sa ti balendi yôkesa mvula zazingi mu tomo zaba mu zonza zu di bata longoka, bimvuka mu mpila zazingi babakisaka. Bifu biawu bia mbote na misamu mi bazebi bimvuka bisikamasaka mpe biyikaka ngolo. Buzitu bwabwingi bu bâka neto mu bungu dia mpangi zo ze na tifu tia tihana! Bakuluntu ka bafweti’â babonga nzengolo ya lembo sola mpangi mu bâ mukuluntu peleko tibakisi mu tisalu ko, mu bungu ti ka zebi’â tomo zonza zu di bazonzaka mu timvuka ko. Bakuluntu mu Bibila basikamana tala ti bazololo mu sola mpangi ngatu yabâ mukuluntu peleko tibakisi mu tisalu; kâ ka mu mpila yi kazonzelaka zu dia timvuka ko.​—1 Tim. 3:1-10, 12, 13; Tite 1:5-9. w20.08 30 par. 15-16

Bantu balendi banza ti mu bâ mu nsayi bafweti bâ kwa na tikolela tia mbote, na mbongo zazingi, na kanda die mu nsayi. Kâ nsayi ya zonzela Zaki mu mbutu ya mpeve yena mpe ka yitarilaka misamu mie na muntu ko. (Nga. 5:22) Mukristo mu nkatika nsayi wubâka mu bungu ti zebi ti Yehova katâka nsayi, mpe tifwani tia Yezu kalandaka. (Like 6:22, 23; Kol. 1:10, 11) Nsayi’eto tulendi ya fwanakasa na tiya tunamaka mu mwinda, titâri tia mwinda tiya to tikengerelaka mu titembo na mu mvula ngatu ka tufwandi. Beto mpe tulendi tatamana mu bâ mu nsayi ntono misamu mia mpila na mpila mituturilaka mu luzingu lweto. Ka tuhombesa nsayi’eto ko bu tubâ na timbevo na bu tubâ na mbaya. Mbo tubâ mu nsayi, ni bu sa ti bantu sehesela batuseheselaka peleko bantu ba kanda dieto na bantu bakaka batutelamane. Nsayi’eto yilendi kwizi bâ ngolo ntangu zazansoni bantu yi bayêlaka mu katula yo. Mpasi zi tumonaka mu bungu dia timinu tieto zisongele ti beto nkatika milongoki miena mia Kristo. (Mat. 10:22; 24:9; Za 15:20) Ntiangu Zaki katsoneka misamu mia verse ya tilumbu ti. w21.02 28 par. 6

Bu dzukulaka verse za Bibila zisongelaka ti mfunu wena mu tatamana mu bâ mu tidzunu na mu kwikila mu Yehova, sarilaka ngolo mu simba zo mu mutu. Lendi mona ti bubote bwena mu tumbulaka zu bu tangaka zo, peleko watsoneka zo mpe wavulu za tangaka. Yehova walomba kwe Yoswa katangaka buku dia Musiku ntangu zazansoni mu zu dia malembe ngatu kasarila ndwenga. Misamu mi keri tangaka mu Musiku mbo miaketi mu bakisa mpe mu lembo bâ na bunkuta, na mu twarisa kanda dia Nzambi na butindi. (Yos. 1:8, 9) Verse zazingi za Bibila zilendi ku bakisa mu bâ na tidzunu mu misamu mivulu nataka lwaka peleko bunkuta. (Mik. 27:1-3; Bin. 3:25, 26) Ku tukutakanu tweto, ndandu tubakaka mu ndongosolo zi tubakaka mu nzila ya binzonzi, ya mvutu zi hanaka bantu na mu bimoko bi bâka neto na mpangi zeto. (Ebr. 10:24, 25) Tulendi baka mpe lutindusu lwalwingi mu ntangu yi tuzonzelaka misamu mitutâka lwaka kwe ndiku zeto za mu timvuka. w21.01 6 par. 15-16

Mu ntangu yi wabatusu wasongela ti timinu na lukwikulu lwalwingi lwe naku mu Yehova. Mpe Yehova wakusila lukwikulu, mpe mu nsayi, wakutambula mu kanda diandi. Musamu wa mfunu ni mu tatamana mu sikirila Yehova. Lendi banza ti ka wena musamu wa mpasi ko mu sikirila Yehova, bu bonga nzengolo za nkatika za mfunu. Kâ ntangu zakaka bwe sa? Musamu wa mfunu wena mu sikirila Yehova bu bonga nzengolo; zilendi bâ nzengolo zitariri nsaka, tisalu na makani maku ma luzingu. Kusikirilandi ndwenga za nge beni. Kâ dinga mitieno mia Bibila mpe sarila mio. (Bin. 3:5, 6) Wamana sila bo, mbo tâ Yehova nsayi mpe bantu ba mu timvuka tiaku mbo bakuzitisa. Diangana, mu bungu ti nge mpe muntu wa masumu wena, ntangu zakaka mbo yayasa. Kâ, musamu wo ka wukukabakasandi mu sa miamiansoni mi lenda mu tisalu tia Yehova. w21.03 6 par. 14-15

Ngano bantu ba kanda diaku nge batelamanaka mu bungu ti Yehova sarilaka? Ngano mu nsi yi bâka, tisalu tia Yehova ka batomo’â tia haninaka nzila ko, peleko yimina bayiminaka tio? Tala ti ni buna, lendi baka lutindusu bu tanga misamu mie mu 2 Timote 1:12-16 na 4:6-11, 17-22. Ntumwa Paulo watsoneka verse zo mu ntangu yi keri mu boloko. Ntete watanga verse zo, tâ musamu we naku kwe Yehova mpe mu têla bwe ta mona. Tomo mu têla buna bu ta mona ku mutima. Lomba kwe Yehova kakubakisa mu mona mitieno mie mu tinsamu tia Paulo, mikubakisa mu zaba nti fweti sa. Yehova walwengesa Paulo ti wafweti korela nkwamusu mu bungu ti Mukristo weri. (Bis. 21:11-13) Bwe Yehova kabakisila Paulo? Yandi wahanina tusambulu twandi mvutu, mpe ha manima, wamuhana ngolo. Paulo lukwikulu lweri nandi ti mbo kaketi baka musendo wu kasarila ngolo mu baka. Yehova watuma mpe ndiku za kwikama za Paulo mu mu hana lubakusu lweri nandi nsatu. w21.03 17-18 par. 14-15, 19