Décembre

Ntangu zakaka wulendi bâ musamu wa mpasi mu bakula musamu wu tâka zu dia Nzambi. Peleko wulendi bâ mpe ti Yehova ka ta hanina mvutu mu tusambulu tweto ko, buna bu tukekolo. Misamu mio milendi sa ti tabâ na ntembe. Tala ti tubikiri ntembe zeto mu mutima, mbo ziwolesa timinu tieto mpe mbo zibebesa tindiku tieto na Yehova. (Zaki 1:7, 8) Ntembe zo zilendi sa ti tahombesa tivuvu tieto mu bungu dia bilumbu bia ku matu. Ntumwa Paulo wafwanakasa tivuvu tieto mu bungu dia bilumbu bia ku matu na ancre (tisengo tisikamasaka bato mu mamba). (Ebr. 6:19) Ancre mbo yisikamasaka bato mu ntangu ya bitembo bia ngolo mpe mbo yisaka ti bato ka yibotasandi matari ma manene. Kâ ancre mbo yibâka salu tala ti chaîne yimuvukasaka na bato ka yena ya tabuka ko. Chaîne ya ancre bu yigataka ka yivutu’â sâlaka ngolo ko, mpila mosi mpe tala ti tubikiri ntembe mu mutima’eto mbo ziwolesa timinu tieto. Muntu we na ntembe, tala ti wubwabane na nkwamusu, wulendi hombesa timinu tiandi mu lenda die na Yehova dia lungisa makani mandi. Tamana hombesa timinu tieto mbo tuhombesa mpe tivuvu tieto. Musamu wa mpasi wena kwe muntu wa mpila yo mu bâ mu nsayi! w21.02 30 par. 14-15

Abrahame wafweti longoka mu kêla Yehova na luvivululu lwalwansoni. Mvula yôka 70 kampe zeri nandi mu ntangu yandi na kanda diandi bakatuka ku Ure. (Mba. 11:31–12:4) Mpe mvula 100 kayôkesa mu kwe bê mu bivula, bu keri kwe ziete ku mahata ma Kana. Abrahame wafwa bu keri na mvula 175. (Mba. 25:7) Kâ ka mona Yehova ta lungisa kani diandi ko di katêla ti mbo kahana nsi yi keri kwe zietele kwe bala bandi. Mpe ntangu fioti kwa kabâ moyo mu mona Timfumu tia Nzambi. Ni bu sa ti misamu ni bo miabêla, mbo bazonzelaka Abrahame ha manima ma lufwa lwandi ntiana muntu “wa nuna mpe wa yukuta mu bilumbu.” (Mba. 25:8) Ni bu sa ti misamu mia mpasi ni mio miabâ nandi, Abrahame watatamana mu bâ na timinu tia ngolo mpe nsayi yeri nandi mu kêla Yehova. Bwe kalendela mu vivirila? Mu bungu ti, mu luzingu lwandi lwalwansoni, Yehova mbo keri mu kengerelaka mpe mbo keri mu bongelaka ntiana ndiku. (Mba. 15:1; Iza. 41:8; Zaki 2:22) Ntiana Abrahame, beto mpe hata die na bandu dia matieleka tuta kêla. Kâ, ka tuta kêla ntungulu ya hata dio ko. Timfumu tia Nzambi batûla tio mu 1914 mpe ni tio tita yâla mazulu mamansoni. (Nza. 12:7-10) Kâ, kêla tuta kêla tiabatika mu yâla mutoto. w20.08 4-5 par. 11-12

Mu tomo wirikilaka bampwana’eto, tufweti bâ ba kuluka mpe na luvivululu. Misamu mitatu mita sa ti tasarila ngolo zo. Wa ntete, ka tukulu’â bâ na mabanza ma mbi mu bantu ko. Wa nzole, tulendi kwizi bakula mbanzulu za mpangi’eto, mpe tulendi kwizi bakula mu bungu dia nti kata sila misamu mu mpila eyi peleko mu mpila yakaka, mpe mbo wutubakisa mu tomo mu songela tiari tia mutima. Wa tatu, tulendi bakisa muntu mu zaba misamu mimutariri. Ntangu zakaka muntu ka wutomo’â bakulaka mabanza mandi ma ku mutima ko na tii bu kakwizi ma zonzela. Musamu wa mpasi wubâka kwe mpangi zakaka mu tâka mbanzulu zawu mu bungu dia misamu mi babwabana na mio mu ntama, peleko mu bungu dia timuntu tiawu. Kampe ntangu yayingi ye nawu nsatu ngatu bakubama mu tu zonzela, kâ mu ntangu yi batuzonzelaka tufweti bâka na lenda dia tomo bakulaka mbanzulu zawu za matieleka. Tala ti tubêle na luvivululu ntiana Yehova, tulendi bâ bantu ba basikirila. Ntiangu, bu babâ ba kubama mu tu zonzela, tufweti tomo ba wirikila. w20.04 15-16 par. 6-7

Mbizi mbo zivulu bâka mu mbuka ye na mamba ma bazololo mpe ye na bidia biabingi. Tilobi tifweti zaba ntangu yi kafweti kwe loba mu bungu ti mfunu yena. Misionere yimosi yeri bâka ku Île ya Pacifique yayizi bakula ti mbizi mu ntangu yifwanakane balobaka zo. Mpangi yimosi ye Mbangi ya Yehova yayizi mu tâ mbila ngatu bê baloba mbizi. Misionere yatâ: “Tamonana mbazi mu 9h ya pari.” Mpangi yo yamutêla ti: “Kuta tomo bakula ko. Mbo tukwe lobaka mu ntangu yifwanakane mu bungu dia mbizi, kâ ka mu ntangu’â ko yifwanakane mu bungu dia beto.” Mpila mosi mpe, milongoki mia Yezu, miayizi bâ bilobi bia bantu, mbo mieri kwendaka mu mbuka zeri bâka bantu na mu ntangu yi baketi kwe ba bwana. Mu tifwani, milongoki mia Yezu mbo mieri samunaka mu tempelo, mu sinagoge, mu nzo na nzo na ku mazandu. (Bis. 5:42; 17:17; 18:4) Beto mpe tufweti zabaka ntangu yi bâka bantu ku nzo zawu mpe tufweti zabaka bibuka bi tulendi ba bwana mu ba samunina. Tufweti bâ ba kubama mu sobaka programe’eto mu kwe samuna mu ntangu na mu bibuka bi tulendi kwe bwana bantu.​—1 Kor. 9:19-23. w20.09 4 par. 8-9

Mpila yimosi ya sa tindiku na Yezu ni mu yikaka organizasio ya Yehova moko. Mbo tukwizi bâ nkatika ndiku za Yezu we mfumu ya timvuka bu tuwisanaka na bantu bô Yezu ba kasola mu tu twarisaka. (Efz. 4:16) Mu tifwani, mbo tusarilaka ngolo mu sarila Nzo za Nsambululu zazansoni mu mpila ya yibote. Ntiangu bayizi vukasa bimvuka biakaka. Nsalulu yo mbo yisaka ti organizasio ya Yehova yalundaka mbongo zazingi zi bahanaka mu makabu. Kâ, mu bungu ti ni buna wena, bisamuni biakaka bifweti yukunu mu nsalulu za môna. Kampe bisamuni biango bia kwikama mvula zazingi biatoko yôkesa mu bimvuka biakaka mpe batomo kangama kwe mpangi zi beri mu timvuka timosi. Kâ bwawu bu, babalombele mu sarila mu bimvuka bia swaswana. Yezu, diangana nsayi yayingi yi bâka nandi bu kamonaka milongoki mio mia kwikama mpe mia nsungu bata sala tinwari na ndombolo yo! w20.04 24 par. 14

Mutinu wa ku nore na mutinu wa ku side batatamane mu nwanina lutumu lwa nza. Mu tifwani, tatala ka nti biayôka ha manima ma Muzingu wa nzole wa wunene wa nza, mu ntangu Union soviétique na nsi zi beri tintwari babâ na lutumu lwalwingi mu nsi zazingi za Europe. Nsalulu za mutinu wa ku nore zanata mutinu wa ku side kasa tintwari na nsi zakaka mu musamu wutariri binwani. Timvuka tio bayizi tia tâ nkumbu OTAN (Organisation du Traité de l’Atlantique Nord). Mutinu wa ku nore na mutinu wa ku side mbongo zazingi bata dukisa mu yika mikangu mia binwani biawu ngolo. Mutinu wa ku nore na mutinu wa ku side banwana mpe bu beri kwe bakisaka nsi zo zi bena tintwari mu mizingu ku Afrike, ku Asie, na ku Amérique latine. Mu mivu miayôkele, Russie na nsi zi bena tintwari bayizi bâ nkatika ngolo mu nza. Mbo banwanisaka mutinu wa ku side mu nzila ya ordinatere. Mitinu mio miafundasane bu miayizi tesasana ti programe za ordinatere basarilaka ngatu bimvwama biawu biahombela mpe guvernema zawu zabwa. Ntiana bwa bikula wo Daniele, mutinu wa ku nore wutatamane mu nwanisa kanda dia Nzambi.​—Dan. 11:41. w20.05 13 par. 5-6

Ngano mukento wulendi zimbakana mwana’andi wuyemaka?” Tio ni tiyuvu timosi tia yula Yehova mu ntangu ya mbikuri Izaya. Nzambi watâ kwe kanda diandi ti: “Ni bu sa ti bakento bô balendi zimbakana, kani kabwe meno ka nikuzimbakana ko.” (Iza. 49:15) Nzambi ka vulu’â tifwanakasaka na nguri ko. Kâ, mbo kasaka bo ntangu zakaka. Yehova mbo kasarilaka luzolo lwa ngolo lwe ha kati dia nguri na mwana’andi mu songela ka ntia mpila ke wa kangama kwe bisari biandi. Nguri zazîngi zilendi bakula misamu mia tâ mpangi yimosi ya yikento ye na nkumbu Jasmin: “Mu ntangu yita yemeka mwana’aku, luzolo lwa ngolo ta tunga luzingila luzingu lwalwansoni.” Mu ntangu wumosi wa bisari biandi wubikaka mu samuna na mu kwendaka ku tukutakanu, Yehova mbo kazabaka. Mpangi zo za ntalu za kota tiozi, zazingi zikâlaka mu timvuka, mpe nsayi yayingi yibâka neto mu ntangu yi bakâlaka! Yehova zololo ti bakâla, beto mpe.​—1 Pi. 2:25. w20.06 18 par. 1-3

Bimvwama biabiansoni ka bimonekaka ko. Wa matieleka, bimvwama biyôkele ntalu ni bio bilembo monekaka. Mu tinzonzi ti kasa ha zulu mongo, Yezu wazonzela bimvwama bia ku mazulu bitomono yôka bimvwama ntiana mbongo. Mpe wavutu tâ ti: ‘He timvwama tiaku, mutima’aku mpe ni hana [wena].’ (Mat. 6:19-21) Mutima’eto mbo wututumaka mu landa bima bi tumonaka ti nkatika ntalu biena kwe beto. Mbo tulundaka “bimvwama bia ku mazulu” bu tukwizi zabakanaka mu mpila ya yibote ha meso ma Nzambi. Yezu wabangula ti bimvwama bio kani kabwe ka bilendi’â biabeba ko, mpe ka balendi’â balaba bio ko. Ntumwa Paulo watutindisa mu kêla bima bilembo monekaka. (2 Kor. 4:17, 18) Bima bio bilembo monekaka bimvwama biena, mu bimvwama bio mpe mwe na tusakumunu tu tubaka mu nza ya môna ya Nzambi. Ngano tulendi songela ti bimvwama bio bilembo monekaka bia tuzoloko? w20.05 26 par. 1-2

Misamu mieri têlaka Mose kwe bala ba Israele, timinu tiawu mieri yikaka ngolo mpe tindisa mieri ba tindisaka ntiana mvula ya lembama bu yibolesaka matiti. Ngano bwe tulendi bêla na lukwikulu ti, ndongokolo’eto mbo yidelakanaka na mpila yo? Bu tubâka mu tisalu tia samuna, tulendi sarila Bibila dieto mu songela kwe bantu ti nkumbu ya Nzambi ni Yehova. Tulendi ba hanaka mikanda mia toma, video za mbote, mpe na bima bie mu site’eto bikembesaka Yehova. Ku tisalu, ku lukolo, peleko bu tukwendaka ku nzietolo (voyage), tulendi baka bweso bwa zonzela misamu mitariri Tata’eto dia luzolo na misamu mi kazololo. Bu tuzonzelaka makani ma Yehova mu bungu dia bantu na mutoto kwe bô ba tubwabanaka na bo, mbo tubatêlaka misamu milendi bâ mia nkatika mia nzitukulu kwe bawu, mpe milendi sobesa mpila yi babongelaka Yehova. Bu tuzonzelaka matieleka matariri Tata’eto, mbo tusaka mpe ti nkumbu ya Nzambi yabâ ya santu. Mbo tubakisaka bantu bazaba bungungu bwa tâ bantu bakaka mu Yehova. Misamu mia Bibila mi tulongesaka kwe bantu nkatika tidzunu minataka.​—Iza. 65:13, 14. w20.06 10 par. 8-9

Ntia bifu bie neto nsatu mu bakisa bô bata zolo kâla kwe Yehova? Taleno malongi ma tulendi longoka mu tinsamu tia Yezu titariri mwana wo wa bakala wasisa nzo. (Like 15:17-24) Mwana wo wa bakala wayizi bakula ti buzoba kasarila mpe wabonga nzengolo ya kâla ku nzo. Tata wadioka ntinu mu kwe bwana mwana’andi mpe watomo mu bumba, ngatu mwana kazaba ti tata’andi yandi kwa katiri zolo. Mwana wo, ngindu’andi semba kwa yeri mu sembaka mpe wamona ti ka fwanana ko kamubongela ntiana mwana’andi. Tata wafwila mwana’andi tiari, mpe mwana wamutêla bwe keri monaka ku mutima. Ha manima, tata wayirika misamu mu songela kwe mwana’andi ti wamubwana ntiana muntu wa ntalu wa kanda. Mu songela ti mwana’andi wa kazolo mpe yandi katambula, tata wayizi sa salaka mpe wahana tinkuti tia toma kwe mwana’andi wasoba mabanza. Yehova we ntiana tata dia tifwani tio. Mpangi zeto za kota tiozi Yehova za kazololo mpe zololo ti zakâla kwe Yandi. Bu tulanda tifwani tia Yehova, tulendi ba bakisa mu kâla. Ntiangu wufwanakane tasongela luvivululu, tiari tia bakaka na luzolo. w20.06 25-26 par. 8-9

Yezu watâ ti bakaka batambulaka matieleka “na nsayi yayansoni,” kâ timinu tiawu mbo tiwolaka bu tikotaka mu ntontolo. (Mat. 13:3-6, 20, 21) Kampe ka babakula ko ti bô balandaka Yezu mbo babâ na mpasi. (Mat. 16:24) Peleko mbo babanzaka ti na kani mpasi ka zibaturila ko, peleko Nzambi mbo kakwe wanguri kwa mpasi zawu. Kâ, mu nza ya lumbu ti mbo mu bâ mpasi. Misamu milendi soba mu luzingu lweto mpe milendi tu katula nsayi’eto ntangu fioti. (Mik. 6:6; Ekl. 9:11) Mpangi zeto zazîngi mbo zibâka na lukwikulu ti matieleka me nawu. Mu bungu dia nti tuta têla bo? Lukwikulu lwawu ka luwolaka ko ni bu sa ti mpangi ye kô yibalwekese peleko yeka na ndiatulu yilembolo ya Bakristo. (Mik. 119:165) Ntangu zazansoni zi babwabanaka na misamu, timinu tiawu ngolo titomo kwizi bâka, ka tiwolaka ko. (Zaki 1:2-4) Tufweti tunga timinu tia ngolo tia mpila yo. w20.07 8 par. 1; 9 par. 4-5

Ntete watanga Bibila, lomba kwe Yehova kakubakisa mu zaba ka bwe lendi bakila ndandu za misamu mi tanga. Mu tifwani, tala ti malongi ta dinga mu telamana musamu we naku, lomba kwe Yehova kakutwarisa mu baka mitieno mikutwarisa. (Flp. 4:6, 7) Lenda dimosi Yehova di kakuhana ni dia banza. Mu ku bakisa mu bâ mu kati dia tinsamu tia Bibila, yêla mu banza, mpe bâ ha tibuka tia muntu wu bata zonzela. Yêla mu mona misamu mieri monaka muntu wo, mpe yêla mu banza misamu mi keri monaka ku mutima. Mpe, dimbitilaka. Dimbitila ni banza na bunsungu bwabwansoni mu bungu dia misamu mi ta tanga mpe ni dinga mu zaba ka bwe misamu mio mita ku tarila. Mbo wukubakisa mu vukasa mabanza na mu tomo bakula musamu wu ta tanga. Tala ti tengi Bibila, kâ kuta dimbitila ko, mbo wubâ ntiana pièces peleko bisengo bia velo bi balembolo vukasa bie mu carton. Dimbitila mbo kutubakisaka mu bâ na mabanza mamansoni. w21.03 15 par. 3-5

Ntumwa Paulo mbo kaketi tûla mabanza mandi mu misamu mia ntama, mbo kaketi banza ti, tala ti ka sola ko mu bâ Mukristo weri na luhemo, ka baketi’â mu kanga ko. Mbo kaketi bakila nkesi mpangi za ku Azi zasâ mu yambirika mpe kaketi’â vutu bâ na lukwikulu mu mpangi zandi zakaka ko. Kâ Paulo ka diatila bo ko. Ni bu sa ti Paulo wazaba ti ntamana mbo bamuhonda, ka zimbakana ko ti musamu wuyôkele mfunu ni mu hana nkembo kwe Yehova. Mpe watatamana mu banza mpila yi kaketi tindisila bantu bakaka. Wasikirila Yehova mu nzila ya tusambulu twa ntangu zazansoni. Paulo ka tatamana mu tûla mabanza mandi ko mu mpangi zasâ mu yambirika, kâ watonda mu mpila ndiku zandi zeri mu yikilaka moko, mpe mu mpila yi beri mu bakisilaka na luzolo lwalwansoni. Paulo watatamana mu longoka Zu dia Nzambi. (2 Tim. 3:16, 17; 4:13) Musamu wuyôkele mfunu, Paulo lukwikulu lweri nandi ti Yehova na Yezu yandi beri zoloko. w21.03 18 par. 17-18

Mu mbandu ya nzole (2^e siècle) ya ntangu ya beto, Bakristo ba bungungu batambula ndongosolo za bapaye zeri swekaka matieleka ma Zu dia Nzambi, babatika mu fuluka mu timvuka tia Bakristo ba matieleka. Tuka ntangu yo na tii nsuka ya mbandu ya 19, ka kwabâ timvuka tia kubama ko tia bisari bia Nzambi ha mutoto. Bakristo ba bungungu bayizi bâ babingi ntiana matiti ma mabi ku musitu. Mu bungu dia musamu wo, weri musamu wa mpasi mu zaba banani beri Bakristo ba matieleka. (Mat. 13:36-43) Mu bungu dia nti we mfunu mu zaba musamu wo? Mu bungu ti Daniele tikapu tia 11 mbo tisongelaka ti mutinu wa ku nore na mutinu wa ku side, ka baketi’â bâ mitinu peleko guvernema ko tuka muvu wa 100 tii muvu wa 1870. Ka kwabâ timvuka tia kubama tia kanda dia Nzambi ko ti baketi nwanisa. Ntiangu, ntangu fioti kwa ha manima ma 1870, mbo taketi vutu mona mutinu wa ku nore na mutinu wa ku side. w20.05 3 par. 5

Yoele têle ti makonko mbo makotela nsi ya Israele mpe mbo mabebesa yo,mbo madia miti miamiansoni mia ku nsi ya Israele! (Yoel. 1:4) Tuka mivu mamingi, mbo tweri banzaka ti mbikululu yo mbo yitâka ti kanda dia Yehova mbo diaketi tatamana mu samuna mpe ka baketi’â dia kabakasa ko. Mbo tweri banzaka ti, tisalu tia samuna mbo tiaketi sobesa “nsi,” peleko bantu bê mu lutumu lwa mfumu za mabundu. Kâ, bu tutaluzula misamu miamiansoni mitariri mbikululu yo, mbo tumona ti nsatu ye neto ya soba ngwilu’eto. Tataleno kani dia sa Yehova mu musamu wutariri nkotolo ya makonko: “Wô watûka ku nore [makonko] mbo nimunata mala na beno.” (Yoel. 2:20) Tala ti makonko ni Mbangi za Yehova zitumamanaka ntumunu ya Yezu ya samuna na ya kubika milongoki, mu bungu dia nti Yehova kakanisini kabakuma (kabanata mala)? (Ezk. 33:7-9; Mat. 28:19, 20) Diangana, Yehova kata kuma bisari biandi bia kwikama ko, kâ tima peleko muntu wulembo zoloko kanda diandi kata kuma. w20.04 3 par. 3-5

Ngano nti tufweti sa tala ti tumweni ti Yehova ka ta kulu hana mvutu mu lusambulu lweto ko? Zaki tu têlele ti, tufweti “tatamana mu lomba” kwe Nzambi. Yehova ka fwatikaka ko mu tu wirikila bu tutatamanaka mu mu lomba ndwenga. Ka tu bakila nkesi ko. Tata’eto die ku mazulu mbo katuhanaka ndwenga na nsayi yayansoni mu korela mpasi, bu tumusambilaka. (Mik. 25:12, 13) Bu katumonaka mu mpasi mbo katufwilaka tiari mpe mbo kadingaka mu kulu tu bakisa. Mbo wusaka ti tabâ na nsayi yayingi! Ngano Yehova bwe katuhaninaka ndwenga? Mu nzila ya Zu diandi. (Bin. 2:6) Mu baka ndwenga tufweti longoka Zu dia Nzambi na mikanda misikamanaka mu Bibila. Ka tusukisinakandi kwa mu longokaka. Kâ tufweti sarilaka ndwenga za Nzambi mu luzingu lweto bu tukwe sariri malongi mandi. Zaki watsoneka ti: ‘Ka lubândi kwa bantu bawirikilaka kâ beno bantu basarilaka Zu.’ (Zaki 1:22, NWT) Bu tusarilaka malongi ma Nzambi mbo tubâka na tidzunu, na mabanza ma delakana mpe na tiari tia bantu bakaka. (Zaki 3:17) Bifu bio mbo bitu bakisa mu korela mpasi za mpila na mpila na mu lembo hombesa nsayi’eto. w21.02 29 par. 10-11

Mulongoki wa Bibila mbo wutomo sa nsobolo zifwanakane ngatu wabatusu, tala ti wubakiri lubakusu lwa bantu bakaka mu timvuka. Bisamuni biabiansoni bilendi sala ngatu timvuka tiakula. (Efz. 4:16) Mupasuri-nzila wumosi wutêle ti: “Tingana tie kô titâka ebu: Mwana ka wena wa muntu wumosi ko. Mbo nita banza ti wa matieleka wena mu musamu wutariri kubika kwa milongoki; vula-vula, timvuka tisalaka ngatu muntu wizi mu matieleka.” Bantu ba kanda, bandiku, na baprofesere mbo basalaka ngatu babakisa mwana mu kula mpe mu yela. Mbo basilaka bo, bu batindisaka mwana, mpe bu bamulongesaka malongi ma mfunu. Mpila mosi mpe, bisamuni mbo bihanaka malongi, mbo bitindisaka, mpe mbo bihanaka tifwani tia mbote kwe milongoki mia Bibila mu ba bakisa mu batusu. (Bin. 15:22) Mu bungu dia nti tisamuni titwarisaka ndongokolo ya Bibila tifweti tambula lubakusu lu lendi hana bisamuni biakaka kwe mulongoki? Mu bungu ti babingi balendi bakisa mulongoki mu kula mu timpeve. w21.03 8 par. 1-3

Bakristo babansoni, bantwenia na bambuta, bafweti sa keba mu songelaka kwe bantu ti Yehova basarilaka, kâ mu mansweki mbi’awu bakwe sariri. Ntumwa Za watâ ti ka tulendi’â tadiatila mu matieleka ko tala ti ndiatulu ya bunsuza ye neto. (1  Za 1:6) Tala ti tuzololo tatâ Yehova nsayi, ntangu zazansoni tufweti bambukaka ti Yehova misamu miamiansoni mi tuyirikaka mia kamonaka. Mu nzonzolo yakaka, ni bu sa ti bantu bakaka ka bamonaka misamu mi tuyirikaka mu mansweki ko, Yehova mbo kamonaka misamu miamiansoni mi tuyirikaka. (Ebr. 4:13) Tufweti losa mbanzulu za bantu mu musamu wutariri masumu. Mu bilumbu bia Za, ba-aposta mbo beri tâka ti muntu wulendi bâ ndiku ya Nzambi ni bu sa ti misamu mi lembo zoloko Nzambi kayirikaka. Lumbu ti mpe, bantu ba tubâka na bo, mbanzulu ni zo ze nawu. Babingi batâka ti Nzambi bakwikilaka, kâ ka batambulaka mbanzulu zandi ko mu musamu wutariri masumu, nsungula musamu wa vukasa nitu. Ndiatulu ye kô Yehova yi katâka ti ya bunsuza yena mpe ya mbi yena, kâ bantu bo mbo batâka ti ndiatulu yo ya mbote yena kwe muntu wo wuzololo peleko wusolele yo. w20.07 22 par. 7-8

Ngano mbo nwaninaka mpangi zaku za zikento za timpeve mu ntangu yi babâka na nsatu lubakusu lo? Tazonzeleno tinsamu tita landa. Bisamuni biakaka mbo bimonaka mpangi yimosi ya yikento ye na bakala dilembolo Mbangi ya Yehova yivulu landilaka ku tukutakanu, mpe yikulu kwendaka buna kwa tukutakanu bu tuwâka. Mbo bamonaka mpe ti ka vulu’â nataka bala bandi ko. Mpe mbo bamuzonzelaka mu mpila ya mbi mu bungu ti mbo babanzaka ti fweti saka tiya kwe bakala diandi ngatu kamuhana nzila ya nataka bala ku tukutakanu. Kâ, musamu wa matieleka ni wena’eti, mpangi yo mio mi kalendaka ni mio kasaka. Ka tomo’â lendaka mu landa programe’andi ko, mpe ka yandi’â ko bongaka nzengolo za mansukina mu musamu wutariri bala bandi. Tala ti sîkiri mpangi yo ya yikento mpe zonzele misamu mi kayirikaka mia mbote kwe bantu bo bakaka, kampe ka bavutu’â mu zonzela mu mpila ya mbi ko. Bakuluntu bazebi ti Yehova zololo ti babongelaka mpangi za zikento mu mpila ya yibote. (Zaki 1:27) Buna bakuluntu mbo balandaka tifwani tia Yezu mpe mbo babâka na mabanza ma delakana. Balendi sila bo mu ntangu yi balembo hanaka misiku bu wufwanakanaka kwa mu bâ na nsayi na mu ba bakula. (Mat. 15:22-28) Mu ntangu bakuluntu yi basarilaka ngolo mu bakisa mpangi za zikento, mbo babasongelaka ti Yehova na organizasio’andi bawu batomono zolo. w20.09 24-25 par. 17-19

Daniele muntu wa kuluka mpe malongi ma Yehova keri dingaka ntangu zazansoni. Mu tifwani, Yehova bu kamusarila mu bangula ndozi ya mutinu Nebukadenezare, Daniele ka yizi’â tâ ko ti ni yandi beni wahana mbangululu yango. Kâ, mu bungu ti ndilu zandi za kazaba, wahana mukembo wawansoni kwe Yehova. (Dan. 2:26-28) Ngano ntia malongi tulendi baka? Tala ti bampangi mbo bayangalalaka mu binzonzi bi tusaka peleko ndandu zazingi tubakaka mu tisalu tia samuna, tuzololo tabambukaka ti tufweti hanaka mukembo wawansoni kwe Yehova. Tufweti zabaka ti, tala ti lubakusu lwa Yehova kâni, ka tulendi’â tasa bima bio ko. (Flp. 4:13) Bu tusilaka bo, mbo tulandaka mpe tifwani tia mbote tia Yezu. Yezu wasikirila Yehova. (Za 5:19, 30) Yezu ka yêla ko mu bonga timfumu tia Tata’andi die ku mazulu. Bisi-Filipe 2:6 mbo yitutêlaka ti Yezu “ka bâ na mabanza ko ma wuka tibuka [tia Nzambi], wuzololo tâ ti, kabâ nsinsa na Nzambi.” Yezu Tata’andi keri tomo tumamanaka, wazaba ndilu zandi mpe lutumu lwa Tata’andi keri zitisaka. w20.08 11 par. 12-13

Bantu bakaka bata diokela mu nzila ya luzingu misamu mie nawu mi lendi lembo mona bantu bakaka mpe mi balendi lembo bakula. Tala ti ka wena na tikolela tia mbote ko, peleko tala ti mbo monaka ti bantu ka bakubakulaka ko, tifwani tia Mefibosete tilendi ku tindisa. (2 Sam. 4:4) Mefibosete tifuma tieri nandi, mpe mutinu Davide wamufundisa mu mpila ya yibi. Kâ, ka bika mabanza ma mbi ko mamutuma. Mefibosete watonda mu luzolo lwa mu songela Davide mu ntama. (2 Sam. 9:6-10) Ntiangu mu ntangu ya mu fundisa Davide mu mpila ya yibi, Mefibosete watoko dinga mu zaba misamu miamiansoni. Ka bika mbi ya Davide ko yasa ti kabâ muntu wa mbi. Mpe ka kwikisila Yehova misamu ko mu bungu dia misamu mia mu yirika Davide. Mefibosete mbo keri dingaka mu zaba ka bwe kaketi sa mu tatamana mu bâ mu lutumu lwa mutinu wa tumbu kwe Yehova. (2 Sam. 16:1-4; 19:24-30) Yehova watsonekesa tifwani tia mbote tia Mefibosete mu Zu diandi mu bungu dia beto.​—Rom. 15:4. w20.04 26 par. 3; 30 par. 18-19

Bakaka mu timvuka balendi ba sola mu bâ misionere, mipasuri-nzila mia minene, peleko mipasuri-nzila mia ntangu zazansoni. Mbo basalaka tisalu tia samuna na tia kubika milongoki mu luzingu lwawu. Ni bu sa ti bisamuni bio biabîngi bia ntangu zazansoni ka bivulu’â bâka na bimvwama ko, Yehova wabahana bima biabingi bia mbote. (Mak. 10:29, 30) Mpangi zo za mutima za tutomo zoloko mpe mbo tutondaka mu bungu ti binama biena bia timvuka! Ngano mpangi kwa zi basolaka mu nzila ya mpeve santu na bisari bia ntangu zazansoni bê na tibuka mu timvuka? Kâni! Bisamuni biabiansoni bia nsangu za mbote mfunu biena kwe Nzambi na mu timvuka. (Rom. 10:15; 1 Kor. 3:6-9) Diangana, mu makani mayôkele mfunu mu timvuka mwe na kani dia kubika milongoki mia Mfumu’eto Yezu Kristo. (Mat. 28:19, 20; 1 Tim. 2:4) Bantu babansoni mu timvuka, bisamuni bia batusu na bilembolo bia batusu, mbo bisaka ti tisalu tiango tiabâ tima tia ntete mu luzingu lwawu.​—Mat. 24:14. w20.08 21 par. 7-8

Ntiana buta wasongela verse ya tilumbu ti, bu tubwabanaka na misamu mia mpasi, Yezu mbo katubakisa. Kâ Mu bungu dia nti? Mu bungu ti bilumbu biakaka mpasi bibâka kwe beto mu korela. Mu tifwani, bu tufwiluluku muntu wu tuzololo mpasi zeto na tiari tieto mvula zazingi bizingilaka. Bantu bakaka nkwamusu za bununu batelamanaka. Bantu bakaka mpe bilumbu bia mpasi bibâka nawu mu bungu ti ba nôka bena. Ntono misamu mio, mbo tubakaka ngolo mu korela mu bungu ti tuzebi Yezu ni ke neto ‘bilumbu biabiansoni,’ ni wubâ mu bilumbu bia mpasi bia luzingu lweto. (Mat. 11:28-30) Zu dia Nzambi mbo dituhanaka lukwikulu ti Yehova mbo katubakisaka mu nzila ya mbazi zandi. (Ebr. 1:7, 14) Mu tifwani, bambazi mbo batuhanaka lubakusu bu tusamunaka ‘nsangu za mbote za Timfumu’ kwe bantu ba ‘ku nsi zazansoni, na kwe mawa mamansoni, na kwe mazu mamansoni.’​—Mat. 24:13, 14; Nza. 14:6. w20.11 13-14 par. 6-7

Tuzololo ti milongoki mieto miabakulaka mio mi balongokaka mu Bibila. (1 Tes. 2:13) Bwe tulendi bwa sila? Tindisa mulongoki kazonzelaka misamu mi kalongokaka. Ntangu zazansoni, kani wamubangurilaka verse za Bibila, mu lombaka kakubangurilaka yandi. Bakisaka mulongoki mu mona bwe Zu dia Nzambi dita mu tarila. Mu yulaka biyuvu bimubakisa mu dukisa mabanza mandi mu musamu wutariri verse zi kata tanga. (Like 10:25-28) Mu tifwani, mu yulaka: “Ngano verse yi bwe yita ku bakisila mu mona bifu bia Yehova?” “Bwe misamu mi wizi longoka mita ku bakisila?” “Bwe ta mona mu misamu mi wizi longoka?” Musamu wuyôkele mfunu, ka ni mio mio’â ko mi zebi mulongoki, kâ ni luzolo lwe nandi mu mio mi kata longoka na mpila yi kata mia sarila. Bika Bibila dialongesa. Fweti bâ wa kuluka tala ti zololo wabâ mulongi wa mbote. w20.10 15 par. 5-6

Tulendi bâ na lukwikulu ti tisalu tia samuna mbo tiwa mu ntangu yifwanakane. Tazonzeleno misamu miayôka mu ntangu ya Noa. Yehova wasongela ti mu ntangu yifwanakane kwa kayirikilaka misamu. Mvula kampe 120 ntete delize, Yehova watisolela ntangu yaketi batika delize. Ha manima ma mvula zazingi, Yehova watâ kwe Noa katunga nzaza. Mvula kampe 40 peleko 50 ntete delize yabatika, Noa watatamana mu sala tisalu tia ngolo. Ni bu sa ti bantu ka beri’â mu wirikilaka ko, watatamana mu samuna nsangu za ndwengosolo na tii ntangu Yehova yi katâ ti bafweti kota mu nzaza. Ha manima, ntangu bu yafwana, “Yehova wakanga mwelo.” (Mba. 6:3; 7:1, 2, 16) Ntamana Yehova mbo kamanisa tisalu tia samuna Timfumu; ha manima mbo “kafukisa” nza ya Satana mpe mbo katûla nza ya môna yibâ ya fuluka mu bantu bamutumamanaka. Buna, bika talanda tifwani tia Noa, na tia bantu bakaka balembo humisa moko mawu. Bika tatamana mu tûla tisalu tia samuna ha tibuka tia ntete, tabâ na luvivululu mpe tatatamana mu simbirila timinu tia ngolo mu Yehova na mu makani mandi. w20.09 13 par. 18-19

Tala ti timfumu kâni, kanda mbo diaketi bâ mu vwandi, mpe ka diaketi’â bâ mu nsayi ko. Mu tifwani, ka kwena muntu ko waketi zaba ka nani wafweti bonga nzengolo za mansukina, mpe wafweti sa ti bazitisa zo. Tala ti timfumu tia tûla Nzambi musamu wa mbote wena, mu bungu dia nti bakento babîngi babamwisinaka mpasi? Mu bungu ti babakala babîngi ka balandaka mitieno mia Yehova ko, mpe mbo basolaka mu landa tikulu tia hata diawu. Bakaka mbo bamwisaka bakento bawu mpasi mu bungu dia nsatu za bawu beni. Mu tifwani, bakala dilendi diata mukento’andi ngatu katomo bâ na lukwikulu mu yandi beni, peleko mu songela kwe bantu bakaka ti yandi kena wa peta ko. Lendi banza ti ka lendi’â katuma mukento’andi mu ngolo ko mu mu zolo, kâ lendi mu tâ bunkuta. Mpe lendi sarila bunkuta bo mu mu diata. Babakala babanzilaka bo mpe basarilaka misamu mia mpila yo ba nkatika ba mbi bena. Ka bazitisaka bakento ko buna bufwanakane, mpe misamu mi bayirikaka ka mikwelanaka na luzolo lwa Yehova ko.​—Efz. 5:25, 28. w21.02 3 par. 6-7

Mu ntangu yi bâka na lwaka, lendi sambila Yehova ngatu kakubakisa. Yehova lendi hanina tusambulu twaku mvutu bu kakuhana “tidzunu tia Nzambi, tiyôkele misamu miamiansoni mi [lendi bakula bantu].” (Flp. 4:6, 7) Yehova mbo kakuhana tidzunu mu nzila ya mpeve santu’andi ya ngolo. (Nga. 5:22) Mu ntangu yi sambilaka Yehova, mu ziburilaka mutima’aku. Mu têla ntia musamu we naku mpe bwe ta mona ku mutima. Tala ti mpila ye kô ya yirikila musamu we naku, mu lomba kakuhana ndwenga na ngolo za sarila. Tala ti mayela makusukiri, lomba kwe Yehova kakubakisa mu zabirila lwaka lwaku mu bungu dia musamu wo. Bu tâka misamu buna bu miena mu tusambulu twaku, ntangu bu yiyôka mbo kwizi tomo mona bwe Yehova kahanina mvutu mu tusambulu to. Tala ti mvutu ka yita kulu kwiza ko ha manima ma tusambulu twaku, kubikandi mu sambila. Yehova zololo ti kusukinandi kwa mu mu têla musamu buna bu wena, kâ watatamana mu mu sambila mu bungu dia musamu wo.​—Like 11:8-10. w21.01 3 par. 6-7

Mu timvuka lumbu ti, mwe na bantu ba kwelana mpe na makanda. Kâ, mwe mpe na mpangi zilembolo za kwela. Bwe tufweti bongelaka bampumpa (mpangi zo zilembolo za kwela)? Tataleno bwe Yezu keri bongelaka bumpumpa. Mu ntangu yi keri ha mutoto, Yezu ka bâ wa kwela ko. Watatamana mu bâ mpumpa, mpe ntangu zazansoni watûla mabanza mandi mu tisalu tiandi. Kani kabwe, Yezu ka tâ ko ti ntumunu yeri mu kwela peleko mu bâ mpumpa. Kâ, watâ ti Bakristo bakaka mbo baketi sola mu lembo kwela. (Tala note ya Mat. 19:11, 12.) Yezu mbo keri zitisaka bô balembo bâ ba kwela. Keri’â monaka ko ti bantu ba kwela bayôka bantu balembo bâ ba kwela peleko bantu balembo bâ ba kwela, tima tieri ba kondoko mu luzingu lwawu. Ntiana Yezu, ntumwa Paulo watatamana mu bâ mpumpa bu keri kwe sari tisalu tiandi. Kani kabwe, Paulo ka tâ ko ti musamu wa mbi weri kwe Mukristo mu kwela. Wazaba ti nzengolo yeri, muna muntu yi kaketi bonga. w20.08 28 par. 7-8

Ntumwa Za wabâ na luzingu lwa lula mpe misamu miamingi kabwabana na mio. Yandi watelamana misamu miaketi wolesa timinu tiandi. Kâ ntangu zazansoni ngolo keri saka mu tumamana ntumunu za Yezu, na ntumunu yitutumaka mu zolo mpangi zeto. Ntiangu Za kabâ na lukwikulu ti Yehova na Yezu yandi beri zoloko, mpe mbo baketi mu hana ngolo za telamana nkwamusu zazansoni. (Za 14:15-17; 15:10) Satana na nza’andi ka balenda ko mu kabakasa Za mu zolo mpangi zandi na mu songela luzolo mu mio mi keri tâka na mi keri yirikaka. Ntiana Za, mu nza ye mu lutumu lwa Satana na yilembo zoloko bantu twena. (1 Za 3:1, 10) Ni bu sa ti Satana zololo ti tabika mu zolo mpangi zeto, ka lenda ko tala ti beto beni ka tumuheni’â nzila ko. Tabongeno nzengolo ya zolo mpangi zeto, ya songela luzolo mu mio mi tuyirikaka na mu mio mi tutâka. Tamana songela luzolo lwa mpila yo, mbo tubâ na nsayi ya bâ mu kanda dia Yehova, mpe mbo tutomo zolo luzingu.​—1 Za 4:7. w21.01 13 par. 18-19

Luzingu mu nza yi ya Satana lulendi bâ lwa mpasi mpe lwa matimuna. (2 Tim. 3:1) Kâ, ka tufweti’â tabâ na bunkuta ko. Mpasi zeto Yehova za kazebi. Bu tubwaka, tukanisini ti mbo katusimbirila mu koko kwandi kwa lubakala. (Iza. 41:10, 13) Na lukwikulu mu lubakusu lwandi, tulendi baka ndandu mu Matsonoko mpe tuelendi telamana nklwamusu. Video zeto, drame za audio na bimoko bie na mutu-diambu “Landeno tifwani tiawu” mbo bitubakisaka mu tomo bakula binsamu bio bia Bibila. Ntete watala, wawirikila peleko watanga binsamu bio, lomba kwe Yehova kakubakisa mu mona misamu milendi sarila. Bâ ha tibuka tia muntu wu bata vulu zonzela mu tinsamu. Dimbitila mu misamu mia yirika bisari bio bia Yehova, mpe bwe Yehova kababakisila mu telamana mpasi zawu. Mpe sarila malongi mo mu musamu we naku. Tondaka Yehova mu bungu dia lubakusu lu kakuhanaka. Mpe songela ti lubakusu lo lwa zololo bu kwe dingi mpila zi tindisila mpe zikwe yikiri bantu bakaka moko. w21.03 19 par. 22-23

Tala ti ba kwelana lwena mpe luzololo lwabuta, yulasaneno: ‘Ngano bantu ba kuluka twena bazololo Yehova na Zu diandi? Ngano Yehova lendi tu sola mu kipa mwana wa ntalu wubutuka?’ (Mik. 127:4) Tala ti, watibutila, tiyula: ‘Ngano mbo nilongesaka bala bani mfunu ya salaka bwabwingi?’ (Ekl. 3:12, 13) ‘Ngano mfweti sarilaka ngolo zani zazansoni mu kengerela bala bani mu misamu mia mbi milendi tula?’ (Bin. 22:3) Ka lulendi’â lwakengerela bala beno ko mu misamu miamiansoni. Kâ malembe-malembe, mpe na luzolo lwalwansoni, lulendi ba kubika mu misamu milendi ba turila mu luzingu lwawu bu lukwe ba longese mu sikirila malongi ma Zu dia Nzambi. (Bin. 2:1-6) Mu tifwani, tala ti muntu wumosi wa kanda wubikiri mu sarila Yehova, bakiseno bala beno mu longoka mu Bibila mfunu ya tatamana mu bâ wa kwikama kwe Yehova. (Mik. 31:23) Peleko, tala ti muntu wufwiri mu kanda, songeleno verse kwe bala beno mu Bibila zilendi ba bakisa mu telamana musamu wo na mu baka tidzunu.​—2 Kor. 1:3, 4; 2 Tim. 3:16. w20.10 27 par. 7