Février

Yehova zololo ti bisari biandi biabiansoni biabâ mu nsayi. Penepene kena na muna muntu mu beto, mpe bu tubâka mu tiari peleko ba nôka, wa kazabaka. (Mik. 145:18, 19) Banza’eti mpila Yehova yi kabelokela lwaka mbikuri Eliya. Tisari tio tia kwikama tiazinga mu ntangu ya mpasi ya bala ba Israele. Mu ntangu yîna, bisari bia Yehova nguria kwamisa beri bia kwamisaka, mpe mbeni za ngolo zeri telamanaka Nzambi, zadinga mu honda Eliya. (1 Mit. 19:1, 2) Mu bungu ti Eliya mbo keri banzaka ti yandi kaka kwa wasâla mu mbikuri zazansoni zeri sarilaka Yehova, kampe musamu wo watomo vutu mu nôkesa. (1 Mit. 19:10) Na manzangu mamansoni Nzambi wasa tima mu bakisa Eliya. Yehova watambika mbazi mu tindisa Eliya ti, keri’â yandi kaka ko mu bungu ti bala ba Israele babingi beri kô beri sarilaka Yehova na kwikama kwakwansoni! (1 Mit. 19:5, 18) Na nsayi yayansoni Yezu wabatêla ti mbo baketi baka kanda dia timpeve dia dinene. (Mak. 10:29, 30) Mpe Yehova Tata’eto dia ku mazulu, wakanisina ti mbo kabakisa bô bazololo mu mu sarila.​—Mik. 9:10. w21.06 8-9 par. 3-4

Ngano musamu wo wa tuta mona lumbu ti? Yee. Babingi batâka makuba mu bungu ti, ndongosolo zeto zisikamanaka mu Bibila mbo zizabikisaka ndongosolo za mabundu ma bungungu. Mfumu za mabundu mbo zilongesaka mu mabundu mawu ti Nzambi bantu ba mbi kasembaka ku benga dia tiya. Mbo basarilaka ndongosolo zo za bungungu mu lunda bantu mu lutumu lwawu. Mu bungu ti beto bisari bia Yehova bisambilaka Nzambi ya luzolo twena, mbo tuzabikisaka ndongosolo zo. Mfumu za mabundu mbo zilongesaka mpe ti, tilundi ka tifwaka ko. Beto, mbo tuzabikisaka ti nkwikulu yo ku Bapaye yatûka, mpe tala ti nkwikulu yo ya matieleka yena, mvumbukulu ya ba fwa ka yaketi’â vutu sâla salu ko. Mpe, ni bu sa ti mabundu mamingi malongesaka ti misamu mi tuyirikaka mia batikubikila kwe Nzambi peleko kwe mpeve ya ngolo, beto mbo tulongesaka ti muntu ni muntu timpwanza tia sola tie nandi mpe lendi sola mu sarila Nzambi. Ngano mfumu za mabundu nti zisaka bu tuzabikisaka ndongosolo zo za bungungu? Vula-vula mbo babâka mu nkesi Tala ti matieleka ma tuzololo, tufweti kwikila mpe tufweti tumamana misamu mi tâka Nzambi. (Za 8:45, 46) Buna mbo tusikamana mu matieleka mpe ka tubâ ntiana Satana ko. Mpe, ka tuyirika musamu ko wulembo kwelanaka na nkwikulu zeto. (Za 8:44) Nzambi mbo katulombaka mu ‘bela misamu mia mbi’ na mu ‘simbirila misamu mia mbote’ ntiana bwa sa Yezu.​—Rom. 12:9; Ebr. 1:9. w21.05 10 par. 10-11

Bwe tulendi sa tala ti tubwiri mu mutambu wa lulendo peleko wa bundiafu? Tulendi duka! Ntumwa Paulo watâ ti bô ‘ba basimba ba moyo’ kwe Diabulu balendi duka mu mitambu miandi. (2 Tim. 2:26) Kani kabwe ka tuzimbakanakandi ti, Yehova yôkele Satana mu ngolo. Buna, tamana tambula lubakusu lwa Yehova, tulendi dioka mitambu miamiansoni mi tûlaka Diabulu. Musamu wa matieleka ni wena’eti, bubote bwingi tala ti ka tubwiri’â mu mutambu wa lulendo na wa bundiafu ko. Na lubakusu lwa Yehova kwa tulendi lendela. Buna, lombaka kwe Yehova bilumbu biabiansoni, kakubakisa mu zaba tala ti bifu bio biabatikiri mu sobesa mbanzulu zaku na nsalulu zaku. (Mik. 139:23, 24) Sarila ngolo mu lembo bâ na lulendo mpe na bundiafu! Tûka mvula zazingi, Satana mbingu kasaka. Kâ ntamana mbo bamukanga mpe ha manima mbo bamufukisa. (Nza. 20:1-3, 10) Tilumbu tiango nkatika kêla tukêlaka tio. Buna, taseno keba mu mitambu mia Satana. Taseno ngolo mu lembo bika ti lulendo na bundiafu bwatutuma. Tabongeno nzengolo ya ‘telamana Diabulu mpe mbo kadioka mala’ na beto.” w21.06 19 par. 15-17

Yehova nsayi yibâka nandi mu ntangu muntu wutambulaka matieleka ma Bibila, mpe bu kazonzelaka mo kwe bantu bakaka. (Bin. 23:15, 16) Ntia mpila nsayi Yehova yibâka nandi bu kamonaka kanda diandi dita samuna mpe dita longesa na luhemo lwalwansoni lumbu ti! Mu tifwani, ntono timbevo tia coronavirus, mu muvu wa tisalu wa 2020, tayizi twarisa ndongokolo za Bibila 7 705 765, mpe tabakisi bantu 241 994 mu tihana kwe Yehova na mu batusu. Milongoki mio mia môna, bawu mpe mbo batwarisa ndongokolo za Bibila, mpe mbo bakubika milongoki miakaka. (Like 6:40) Ntembe kâni, mbo tuyangirikaka Yehova mu ntangu yi tubakisaka bantu bakaka mu kwizi bâ milongoki. Tisalu tia kubika milongoki mpasi tiena, kâ na lubakusu lwa Yehova, tulendi sa mio mi tulenda mu longesa bantu ba môna mu zolo Tata’eto dia ku mazulu. Ngano tulendi bâ na kani dia batika na dia twarisa na kani ndongokolo yimosi ya Bibila? Tulendi kwizi yituku mu misamu miyôka tala ti tusariri ntangu zazansoni zi tubâ na lenda mu lomba kwe bantu ba tubwabanaka na bo tala ti tulendi longoka nawu. w21.07 6-7 par. 14-16

Mutinu Davide wahana bimvwama biandi mu yika moko mu ntungulu ya Tempelo. (1 Nta. 22:11-16) Mu ntangu yi tulembo vutu bâka na ngolo mu sala mu tisalu tia ntungulu tia organizasio ya Yehova, tulendi tatamana mu yika moko mu bungu dia ntungulu zo, bu tuhana makabu buna bu tulendela. Mpe tulendi bakisa bantwenia mu baka ndandu mu misamu mi tuzebi Tazonzeleno tifwani tia tu hana ntumwa Paulo mu musamu wutariri tifu tia kaba. Yandi watikisa Timote ngatu basala tisalu tia bumisionere, mpe Paulo wakaba peleko walongesa mpila zandi za samuna na za longesa kwe Timote. (Bis. 16:1-3) Paulo walongesa Timote mu bâ mulongi mpe tisamuni tia mbote tia nsangu za mbote. (1 Kor. 4:17) Ha manima, Timote wasarila misamu mia mu longesa Paulo mu kubika bantu bakaka. w21.09 12 par. 14-15

Nti tulendi longoka mu tifwani tia mulongoki Apolose na tia ntumwa Paulo? Babakala bo ba bole, luzabu lwa matieleka lwalwingi lweri nawu. Ba bole milongi mia mbote mieri. Mpe ba bole bantu babingi babakisa mu bâ milongoki. Kâ mu ba bole, ka kwena muntu ko wasila mpwana’andi timbanda. (Bis. 18:24) Apolose mbo keri sarilaka lenda diandi mu mpila ya mbote​—mu samuna nsangu za mbote na mu tindisa mpangi zandi. (1 Kor. 16:12) Tulendi bâ mpe na lukwikulu ti Apolose wa kuluka weri. Mu tifwani, Bibila ka ditâka ko ti wafwema mu ntangu Akila na Prisile yi bamubangurila nzila ya Nzambi buna bufwanakane.” (Bis. 18:24-28) Ntumwa Paulo, tisalu tia mbote tieri salaka Apolose tia kazaba. Kâ, Paulo keri’â tînaka ko ti bantu babanza ti bamuyôka. Bu tutangaka misamu mia tsoneka Paulo kwe Bisi-Korente, tulendi bakula ti wa kuluka weri, mpe mabanza ma delakana meri nandi.​—1 Kor. 3:4-6. w21.07 18-19 par. 15-17

Adame na Eva basola mu kolamana Nzambi, buna wafwanakana babakatula mu kanda diandi. Kâ, nti biaketi turila bala bawu? Yehova bantu ba kazololo, ntiangu kahana bweso kwe bala bawu batumamanaka babâ mu kanda diandi. Wasila bo mu nzila ya mukayulu wa Mwana’andi wa wumosi. (Za 3:16) Mu nzila ya mukayulu wo, bantu 144 000 ba kwikama bakwizi bâ bala ba Nzambi. (Rom. 8:15-17; Nza. 14:1) Milio za bantu bakaka ba kwikama basarilaka luzolo lwa Nzambi. Tivuvu tie nawu tia bâ mu kanda dia Nzambi, ha manima ma ntontolo za mansukina zibatika ha manima ma luyalu lwa mvula 1 000. (Mik. 25:14; Rom. 8:20, 21) Tûka lumbu ti mbo batâka Mvangi’awu Yehova: “Tata” (Mat. 6:9) Bô bavumbuka kwe ba fwa, mbo babâ mpe na bweso bwa longoka misamu Yehova mi kakêlaka mu bawu. Bô basola mu tumamana lutwalusu lwandi, bawu mpe mbo bakwizi bâ mu kanda diandi. w21.08 5 par. 10-11

Ntumwa Paulo tisalu bamuhana, mpe tûka mivu miamingi mbo keri tia bongelaka ntiana timosi tia bima biyôkele mfunu. Mbo keri samunaka ha lungiri bantu na mu nzo na nzo. (Bis. 20:20) Diangana, mbo keri sarilaka bweso bwabwansoni bweri monekaka mu samuna! Mu tifwani, bu keri kêlaka mpangi zandi ku Atene, wazonzela nsangu za mbote kwe pôka dia bantu ba swaswana, mpe bakaka batambula. (Bis. 17:16, 17, 34) Bu keri mpe ku boloko, Paulo wasamunina bantu beri mu zungirilaka. (Flp. 1:13, 14; Bis. 28:16-24) Paulo wasarila ntangu’andi mu mpila ya mbote. Mbo keri vulu tikisaka bantu bakaka mu sala nandi tintwari. Mu tifwani, mu nzietolo’andi ya ntete ya timisionere, wanata Marke, mpe ya nzole wanata Timote. (Bis. 12:25; 16:1-4) Ntembe kâni, Paulo walongesa babakala bo bwe bakubikilaka timvuka, bwe basarilaka tisalu tia tindisa bampangi, mpe bwe baketi bêla milongi mia mbote.​—1 Kor. 4:17. w22.03 27 par. 5-6

Bantu bakaka ka bakwikilaka mu Mvangi ko mu bungu ti mbo batâka ti mu misamu mi bamonaka kwa bakwikilaka. Kâ, mbo bakwikilaka mu misamu mi balendi lembo mona ntiana ngolo zisaka ti bu tutubaka tima mu zulu tiabwa ha mutoto (force de gravité), mu bungu ti bidimbu bie nawu ti musamu wo wa matieleka wena. Timinu ti bazonzelaka mu Bibila mbo titarilaka mpe bidimbu mu “bima bilembo monekaka.” (Ebr. 11:1) Ntangu yayingi, mpe ngolo zazingi zifwanakanaka mu longoka bidimbu bio mu beto beni, mpe bantu babingi balembo zoloko mu sarila bo. Muntu wulembo longokaka bidimbu mu yandi beni wulendi kwizi tâ ti Nzambi kena kô ko. Bantu bakaka ba sianse bu bayizi longoka bidimbu, bayizi bakula ti ni Nzambi wasala nza. Ku mbatukulu beri banzaka ti ka kwena Mvangi ko, mu bungu ti ku universite ka babalongesaka ko ti bima sala basala bio. Kâ, bwawu bu bayizi longoka mu zaba na mu zolo Yehova. Bwawu bu, beto bansoni tufweti yika mpe timinu tieto ngolo mu Nzambi, ni bu sa ti lukolo lwa lula tasa peleko kâni. w21.08 14 par. 1; 15-16 par. 6-7

Yezu wasarila tifwani tia mwana wawumuka, mu tu bakisa mu bakula bwe Yehova kazololo mu songela tiari. Mwana wo waduka ku nzo’awu mpe waye hombesa bima biandi mu ‘luzingu lwa vwandi.’ (Like 15:13) Ha manima, wasoba mabanza mu luzingu lwandi lwa vwandi, watibetola mpe wakâla ku nzo’awu. Ngano tata’andi nti kasa? Yezu watâ: ‘[Mwana wo] bu keri mala, tata’andi wamudzukula, mpe tiari tiamubaka. Ni kadioka ntinu mu kwe mu bwana, wamubumba mpe wamuhana bize na luzolo lwalwansoni.’ Tata’andi ka mu fwisa nsoni ko. Kâ na nsayi yayansoni walemvokela mwana’andi mpe wamubwana mu kanda. Mwana wo wawumaka masumu mamingi kasa, kâ mu bungu ti wasoba mabanza, tata’andi wamulemvokela. Mu tifwani tio tata die na tiari ni Yehova. Yezu wasongela ti Yehova zololo mu lemvokela bantu basumukaka mpe basobaka mabanza na bunsungu bwabwansoni.​—Like 15:17-24. w21.10 8 par. 4; 9 par. 6

Lumbu ti, mfumu za mabundu zazingi zisaka miamiansoni mi balenda mu sweka nkumbu ya Nzambi kwe bantu. Bakatula yo mu mbangululu zawu za Bibila mpe bayimina yo mu eglize zawu. Ngano muntu we kô wulendi kala ti Mbangi za Yehova, ni bawu kwa bazitisaka nkumbu ya Nzambi mpe bahanaka yo mukembo wufwanakane? Mbo tutomo zabikisaka nkumbu ya Nzambi yôka mabundu mamansoni! Mbo tusarilaka ngolo zeto zazansoni mu diatila mu nsasa ya nkumbu’eto ya Mbangi za Yehova! (Iza. 43:10-12) Tayizi dukisa lutangu lwa Bibila yôka milio 240 dia La Bible. Traduction du monde nouveau, diakarisa nkumbu ya Yehova mu mbuka zi bakatula yo mu mbangululu za mabundu makaka. Mpe mbo tudukisaka mikanda misikamanaka mu Bibila mpe mizabikisaka nkumbu ya Yehova mu mazu yôka 1 000! w21.10 20-21 par. 9-10

Mbo tusilaka Yehova nsambululu bu tubakisaka mpangi zeto ze na nsatu lubakusu. Yehova wakanisina ti mbo kaketi sakumuna bala ba Israele beri bakisaka bamputu. (Lub. 15:10) Wa matieleka, ntangu zazansoni zi tubakisaka mpangi zeto ze na nsatu lubakusu, Yehova mbo kabongelaka lo ntiana makabu ma tumuhanaka. (Bin. 19:17) Mu tifwani, mu ntangu Bakristo ba ku Filipe yi batambika makabu kwe Paulo weri ku boloko, Paulo watâ mo ‘mukayulu wa singusu na wa singana kwe Nzambi.’ (Flp. 4:18) Tala mu kati dia timvuka, mpe tiyula: ‘Ngano muntu we kô wu ndendi bakisa?’ Yehova mbo kabâka mu nsayi bu tusarilaka ntangu’eto, ngolo zeto, lenda dieto na bima bieto mu bakisa bantu bê na nsatu lubakusu. Mbo kamonaka ti lubakusu lo mu nsambululu’eto lwena. (Zaki 1:27) Nsambululu ya matielaka ntangu na ngolo yidingaka. Kâ ka biena dema ko. (1 Za 5:3) Mu bungu dia nti? Mu bungu ti, mu luzolo tusilaka yo mu bungu dia Yehova na mpangi zeto. w22.03 24 par. 14-15

Mu songela tiari tia mutima kwe mpangi zeto, tufweti toko zaba ntia misamu mia mpasi mie nawu. Mu tifwani, mpangi ya yikento yilendi bâ na timbevo tia ngolo. Mpe kani kabwe ka zonzelaka timbevo tiandi ko, kâ lendi bâ na nsayi yayingi tala ti bamuheni lubakusu lwe nandi nsatu. Ngano tulendi mu lambila peleko tulendi mu bakisa mu kipa nzo? Mpangi ya yibakala yilendi lembo sâla na tisalu. Ngano tulendi mu sila mwa kabu dia mbongo, mu mansweki, zilendi mu bakisa mu tikipa tii ntangu yi kabaka tisalu tiakaka? Ka tufweti’â takêlaka ko ti mpangi zeto zalomba lubakusu ngatu tabasongela tiari tia mutima. Ntiana Yehova, tulendi yirika misamu mu bungu dia mpangi zeto ntete batulomba lubakusu. Ni bu sa ti katulombaka wo ko, Yehova mbo katudukisilaka ntangu bilumbu biabiansoni! Mpe mwini wu hanaka ntangu, mbo wunataka ndandu kwe bantu babansoni, bô batondaka na bô balembo tondaka. Yehova mbo kasongelaka ti beto kazololo bu katuhanaka bima bie neto nsatu. Yehova Yandi tutomono zolo mu bungu ti nsayi ye nandi mpe kaba kakabaka! w21.09 22-23 par. 12-13

Luzolo lwa kwikama lwa Nzambi mbo lumutumaka mu lemvokela. Yehova bu kamonaka muntu wusumukini wusobele mabanza, mpe wubikiri ndiatulu’andi ya masumu, luzolo lwa kwikama mbo lumutumaka mu lemvokela. Davide watâ ebu mu bungu dia Yehova: “Ka tu bongelaka buna bu têlaka masumu meto ko, mpe ka tu sendaka ko mu mio mitufwanakane mu bungu dia makuba meto.” (Mik. 103:8-11) Davide yandi beni misamu mia mpasi miamuturila, mpe wazaba dema dia ngindu yisembaka. Kâ, walonga mpe ti Yehova “lemvokela kalemvokelaka.” Ngano nti bitumaka Yehova mu lemvokela? Mvutu mu verse ya tilumbu tu yena. Wa matieleka, ntiana bwa tâ wo Davide mu lusambulu, Yehova mbo kalemvokelaka mu bungu ti wa fuluka wena mu luzolo lwa kwikama mu bungu dia bô babansoni bamutâka mbila. Mu ntangu yi tusumukaka, musamu wa mbote wubâka mu tisemba. Wulendi tu bakisa mu lomba mulemvo na mu soba. w21.11 5 par. 11-12

Yehova nkumbu’andi ya kazololo, mpe zololo ti bantu babansoni bazitisaka yo. (Iza. 42:8) Kâ, tûka mvula 6 000, mbo bavwezaka nkumbu’andi. (Mik. 74:10, 18, 23) Misamu miabatika Diabulu bu (wuzololo tâ “Ngungu”) kakwikisila Nzambi ti Adame na Eva keri swekelaka tima tieri nawu nsatu. (Mba. 3:1-5) Tûka buna, mbo bakwikisilaka Yehova ti tima tie kô bantu bê na tio nguria nsatu ti kabaswekelaka. Yezu lwaka lweri nandi mu bungu ti nkumbu ya Tata’andi bavweza yo. Ni Yehova kwa Yandi kaka we na nswa wa yâla ku mazulu na ha mutoto, mpe luyalu lwandi ni lo luyôkele. (Nza. 4:11) Kâ Satana wayêla mu wubakasa bantu na bambazi mu banza ti Nzambi kena na nswa wo ko. Ntamana, musamu mbo wuyilama mankululu. Bantu babansoni mbo babakula ti ni luyalu lwa Yehova kwa luyôkele bubote, mpe ni Timfumu tiandi kwa tinata tidzunu tia matieleka ha mutoto. w21.07 9 par. 5-6

Musamu wa delakana wena kwe mfumu-kanda mu hana bidia, binkuti na tibuka tia bêla kwe mukento’andi na kwe bala bandi. Ngano ku mbaya wena? Tala ti ni bo, musamu wa mpasi wena kwe nge. Kâ ni bu sa ti musamu’aku wa nkatika wa mpasi wena, lendi sarila ntangu yo mu tunga timinu tiaku. Sambila Yehova, tanga misamu mia tâ Yezu mie mu Matie 6:25-34 mpe dimbitila mio. Dimbitila mu bifwani bia bantu ba lumbu ti bisongelaka ti Yehova mbo kakipaka bantu batûlaka mabanza mawu mu tisalu tiandi. (1 Kor. 15:58) Bu sila bo, timinu tiaku mbo tiyikama ngolo ti Yehova mbo kakubakisa ntiana bu kabakisa bantu bo babwabana na misamu mia mpasi ntiana nge. Yandi zebi nti bie naku nsatu mpe bwe kalendi tia ku hanina. Bu kwe mone bwe Yehova kakubakisilaka mu luzingu lwaku, timinu tiaku mbo tiyikama ngolo mpe mbo bâ na lenda dia telamana misamu mia minene mikwiza. w21.11 20 par. 3; 21 par. 6

Timinu tia Bakristo babingi tiayizi sikamana mu ndongosolo ya nkûlulu. Batatamana mu samuna ntono nkwamusu, mpe bakorela ntontolo za mpila na mpila tii ku bununu bwawu. Tataleno tifwani tia ntumwa Za. Na kwikama kwakwansoni wasamuna matieleka matariri Yezu na nkûlulu, kampe tûka mvula 60. Ku nsuka ya mivu mia 90, kampe guvernema ya Bisi-Rome mbo yeri mu bongelaka ntiana muntu wa mbi, ntiangu bamutûla ku boloko ku ile ya Patemose. Ngano ntia musamu wa mbi kayirika? ‘Mu bungu dia Zu dia Nzambi na timbangi tia Yezu.’ (Nza. 1:9) Diangana, Za tifwani tia nkatika tia mbote katusisila tia timinu na tia luvivululu! Za wasongela ti Yezu keri zoloko, mpe mbo keri tondaka mu bungu dia nkûlulu mu misamu mi katsoneka mu Bibila. Mu kati dia matsonoko wazonzela nkûlulu peleko ndandu zi nataka nkûlulu mbala yôka 100. (1 Za 2:2) Wa matieleka, Za mbo keri tomo tondaka mu bungu dia nkûlulu. w21.04 17 par. 9-10

Yehova mbo keri zoloko ti kanda diandi diabongelaka bantu bê na bifuma na nsayi yayansoni. Mu tifwani, bala ba Israele ka bafweti’â loka muntu wafwa makutu ko. Loka kô mbo kweri zolo tâka bongela muntu mu mpila ya yibi peleko tâ misamu mia mbi mu bungu dia yandi. Diangana, misamu mio mia nkatika mia mbi miena mu yirika kwe muntu wafwa makutu! Keri’â na lenda ko dia wâ misamu mi beri tâka mu bungu dia yandi, buna ka keti’â tinwanina ko. Mu Levitike 19:14 mpe, mbo tulongokaka ti bisari bia Nzambi ka biafweti’â tûla sâkuba ko ha matu ma muntu wafwa meso. Buku dimosi dizonzelaka bantu bê na bifuma diatâ: ‘Ku Proche-Orient ya ntama, mbo beri vulu sarilaka bantu beri na bifuma, mpe mbo beri ba mwisaka mpasi.’ Muntu we na mutima wa ngolo, wulendi tûla tima ha matu ma muntu wulembo monaka mu mu mwisa mpasi peleko mu mu seha. Mutima wa mubi wusaka bo! Mu nzila ya ntumunu yo, Yehova wabakisa kanda diandi mu bakula ti bafweti songela tiari tia mutima kwe bô balembo bâ na lenda mu misamu miakaka. w21.12 8-9 par. 3-4

Yakobe bunkuta bwa bâ nandi ti mpangi’andi kamulundila diki. Buna yandi wasambila Yehova mu bungu dia musamu wo. Ha manima, watambika kabu kwe Ezawu. (Mba. 32:9-15) Mpe Yakobe, bu kamona Ezawu, wamusongela buzitu. Ka sukisina ko kwa mu fukama ha meso ma Ezawu mbala mosi peleko mbala zole, kâ mbala nsambwari! Na kuluka mpe na buzitu bwabwansoni, Yakobe wasa tidzunu na yaya’andi. (Mba. 33:3, 4) Mbo tubakaka malongi mu mpila Yakobe yi kakubamana mu bwabana na yaya’andi Ezawu. Na kuluka kwakwansoni. Yakobe walomba lubakusu kwe Yehova. Ha manima, wasarila misamu mi kalomba bu kasa miamiansoni mi kalenda mu sa tidzunu na yaya’andi. Bu babwabana, Yakobe ka dinga ko mu zaba ka nani weri na mpemba peleko kâni. Kani dieri nandi, ni mu sa tidzunu na yaya’andi. Ngano lendi landa tifwani tia Yakobe?​—Mat. 5:23, 24. w21.12 25 par. 11-12

Bu dimbitilaka ti Yezu wafwa mu bungu dia masumu maku, lendi kwizi tâ: ‘Ka nimonaka ko ti mfwanakane mu baka kabu dio dia ntalu.’ Mu bungu dia nti lendi bêla na mabanza mo? Mutima’eto wulembolo wa lunga wulendi tu wubakasa, wulendi sa ti tamona ti ka twena ntalu ko, mpe ka batuzololo’â ko. (1 Za 3:19) Mu ntangu za mpila yo, tufweti bambukaka ti ‘Nzambi yôkele mitima mieto.’ Ni bu sa ti ebu tumonaka ti Yehova ka tu zololo’â ko peleko ka tu lemvokela ko, Tata’eto dia ku mazulu beto kwa katiri zolo, mpe mbo katulemvokela. tufweti sarila ngolo mu kwikila ti Yehova beto kazololo. Mu sila bo, tufweti vulu longokaka Zu diandi, tufweti mu sambilaka ntangu zazansoni, mpe tufweti kutakanaka ntangu zazansoni na kanda diandi dia kwikama mu nsambululu. Mu bungu dia nti bima bio bie mfunu? Mbo kwizi tomo bakula bifu biabingi bia toma bia Yehova. Mbo kwizi bakula ti nge katomono zolo. Wamana tomo dimbitilaka mu Bibila bilumbu biabiansoni, lendi kwizi bâ na mabanza ma nguria ma delakana, mbo ‘sungika’ mbanzulu zaku na mutima’aku.​—2 Tim. 3:16. w21.04 23-24 par. 12-13

Mu tunga timinu tia ngolo, ka tufweti’â kwa tadinga mu zaba misamu miamingi ko. Tufweti dimbitilaka mu mio mi tulongokaka. Tataluzuleno tifwani tia titsoniki tia Mikunga 77. Lwaka lweri nandi mu bungu ti mbo keri monaka ti Yehova keri’â vutu mu tambulaka ko yandi na bala ba Israele bakaka. Mu bungu dia lwaka lwandi keri’â vutu bwaka tolo ko mu mpimpa. (Verses 2-8) Ngano nti kasa? Yandi watâ kwe Yehova: “Mbo nidimbitila mu bisalu biaku biabiansoni mpe nzololo nabanza mu nsalulu zaku.” (Verse 12) Diangana, titsoniki tia Mikunga wazaba misamu mia yirika Yehova mu bungu dia kanda diandi mu ntama, kâ bakala dio weri na lwaka watiyula: “Ngano Nzambi wazimbakane kwa mu fwila tiari? Peleko, mu nkesi, mutima’andi wakengi wo kwa?” (Verse 9) Titsoniki tia Mikunga tiadimbitila mu bisalu bia Yehova na mu tiari ti kasongela mu ntama. (Verse 11) Ngano ntia ndandu zamoneka? Titsoniki tio tiayizi kwikila ti kani kabwe Yehova ka lendi’â kayambirika kanda diandi ko. (Verse 15) w22.01 30-31 par. 17-18

Yehova bwe kamonaka mu bungu dia babakala na bakento ba kwikama bafwa? Zololo ti kavutu ba mona! (Yobe 14:15) Ngano lendi banza bwe Yehova kadingaka mu vutu mona ndiku’andi Abrahame? (Zaki 2:23) Peleko Mose, wu beri zonzaka “meso mu meso”? (Ndu. 33:11) Mpe timina die nandi dia wirikila Davide na bitsoniki biakaka bia mikunga bu batanga mikunga mia toma mia mukembo! (Mik. 104:33) Ni bu sa ti ndiku zo za Nzambi zafwa, Yehova ka ba zimbakane’â ko. (Iza. 49:15) Mbo kabambukilaka misamu miamiansoni mia timuntu tiawu. Lumbu tie kô ti kabavumbula kwe ba fwa, ti kavutu wâ tusambulu twawu twa bunsungu, mpe ti katambula nsambululu’awu. Tala ti muntu wu zololo wafwilulu, mabanza ma malendi ku bomba, mpe malendi ku yika ngolo. Bukolo bu bwabatika ku Edene, Yehova wazaba ti misamu mbo miaketi tomo beba ntete mizi miatoma. Yehova mbo kayinaka mbi, kondo kwa buderede, na miangu mie mu nza lumbu ti. w21.07 10 par. 11; 12 par. 12

Bu tuzoloko mpangi zeto, mbo tusongelaka mpe tonda tutondaka mu bungu dia nkûlulu. Mu bungu dia nti? Mu bungu ti Yezu ka hana kwa luzingu lwandi mu bungu dia nge ko, kâ mu bungu dia mpangi zeto mpe. Tala ti wa kubama weri mu fwa mu bungu dia bawu, wutomono songela ti nkatika ntalu bena ha meso mandi. (1 Za 3:16-18) Mbo tusongela luzolo mu mpangi zeto mu mpila yi tubabongelaka. (Efz. 4:29, 31–5:2) Mu tifwani, mbo tubabakisaka bu babâka na timbevo peleko bu babwabanaka na misamu mia mpasi na mu makuba ma nza mpe (catastrophes naturelles). Kâ, nti tufweti sa mu ntangu mpangi ya yikento peleko ya yibakala yitufwemesaka? Ngano musamu wa mpasi wubâka kwe nge mu lemvokela? (Lev. 19:18) Tala ti ni bo, landa malongi ema: “Tatamaneno mu tikorela beno na beno mpe mu tilemvokelaka beno na beno, tala ti muntu we na musamu na mpwana’andi. Ntiana Yehova bu kazololo mu lu lemvokela, beno mpe sarileno bo.” (Kol. 3:13, NWT) Ntangu zazansoni zi tulemvokelaka mpangi zeto, mbo tusongelaka kwe Tata’eto die ku mazulu ti mbo tutomo tondaka mu bungu dia nkûlulu. w21.04 18 par. 12-13

Tulendi sala tisalu tia ngolo mu bungu dia Yehova, mpe tulendi bakisa bantu babingi mu kwizi batusu. Kâ, mbo tubalulaka ti misamu mio miamiansoni, na lubakusu kwa lwa Yehova tulungisilaka mio. Malongi makaka tuta baka mu tifwani tia Apolose na ntumwa Paulo. Bu tubâka na madema mu timvuka, bweso bwabwingi bubâka neto mu singasa tidzunu. Mbo tutondaka mu ntangu bakuluntu na bibakisi mu tisalu yi batubakisaka mu bâ na bumosi mpe na tidzunu mu timvuka. Mbo basilaka bo, bu basarilaka Bibila mu hana malongi, kâ mbo babakisaka mpangi za mu timvuka mu tumamana Yezu na mu landa tifwani tiandi. (1 Kor. 4: 6, 7) Muna muntu mu beto lenda die nandi dia mu hana Nzambi. Tulendi banza ti tisalu ti tusalaka tia fioti kwa tiena. Ntiana mwa baya die salu mu bungu dia ntungulu ya nzo, misamu mia fioti-fioti mi tuyirikaka milendi bakisa timvuka mu bâ mu bumosi. Tufweti tatamana mu sarila ngolo, ngatu na kani fioti talembo yêla mu songela ti tuyôkele bantu bakaka. Tabongeno nzengolo mu sa miamiansoni mi tulenda mu singasa tidzunu na bumosi mu timvuka.​—Efz. 4:3. w21.07 19 par. 18-19

Lendi bâ na lukwikulu ti lendi vutu monana na bantu ba wazolo bafwa. Mansangaza ma Yezu, bu keri tindisaka ndiku zandi, masongele ti mvumbukulu ya katomo silaka mutima! (Za 11:35) Lendi tindisa bô bafwilulu muntu. Yezu kadila ko kwa na Marten a Mariya, kâ yandi wawirikila, mpe wazonza mu mpila yitindisaka. (Za 11:25-27) Tulendi sila bo mu bungu dia bantu bafwilulu. Dan, we mukuluntu ku Australie, têle: “Ha manima ma lufwa lwa mukento’ani, nsatu lubakusu yeri nani. Mpangi zazingi za kwelana zeri za kubama mu kungwirikilaka ntangu zazansoni. Bakumbika nabâ mu tiari mpe ka beri’â fwemaka ko bu ndieri dilaka. Bakungana mpe lubakusu lweri nani nsatu ntiana mu sukula kaminio, mu sa zandu na mu lamba bu ndieri lembo bâka na ngolo za sala bisalu bio. Mpe mbo beri vulu sambilaka nani. Basongela ti nkatika ndiku zena, ‘zabutuka mu bungu dia ntangu za mpasi.’”​—Bin. 17:17. w22.01 16 par. 8-9

Yehova bubote bweto kwa kadingaka. (Bin. 4:20-22) Bu katuhanaka malongi mu nzila ya Zu diandi, ya mikanda misikamanaka mu Bibila, peleko ya mpangi ya yela, mbo kasongelaka luzolo lwandi mu beto. (Ebr. 12:9, 10) Tûla mabanza maku mu malongi, kâ ka mu mpila ko yi bakuhanini mo. Ntangu zakaka, mbo tumonaka ti malongi ma batuheni ka batuhanini’â mo mu mpila ya mbote ko. Diangana, bantu bahanaka malongi bafweti sarila ngolo mu hana malongi mu mpila yisa ti tatambula mo na nsayi yayansoni. (Nga. 6:1) Kâ tala ti batulongele, mbo wubâ musamu wa mbote tamana tûla mabanza meto mu misamu mi batutêlele​—Ni bu sa ti tubenzi ti mu mpila ya mbi batutêlele mio. Tulendi tiyula: ‘Ni bu sa ti mpila yi bakunganini malongi ka nzololo’â yo ko, ngano ka ndendi’â nabakila mo ndandu ko? Ngano ndendi zimbakana fote za muntu wukundongele ngatu nabakila malongi mo ndandu?’ Mbo tusarila ndwenga bu tudinga mu baka ndandu mu malongi ma batuhanaka. w22.02 12 par. 13-14

Yehova zebi ti ntangu na ngolo zifwanakane mu sa nsobolo mu mbanzulu zeto na mu bifu bieto bia mbi. (Mik. 103:13, 14) Kâ, mu nzila ya Zu diandi, ya mpeve santu’andi na ya organizasio’andi, Yehova mbo katuhanaka ndwenga, ngolo na lubakusu lwe neto nsatu mu sa nsobolo. Sarila Bibila mu tomo titaluzula. Zu dia Nzambi, mbo disalaka ntiana titâri; dilendi ku bakisa mu taluzula mbanzulu zaku, nzonzolo’aku na nsalulu zaku. (Zaki 1:22-25) Mpe ntangu zazansoni, Yehova wa kubama kwa bâka mu ku bakisa. Yandi ni muntu wuyôkele wulendi tomo ku bakisa; mutima’aku wa kazebi. (Bin. 14:10; 15:11) Buna bâ na tifu tia mu sambilaka na tia longokaka Zu diandi bilumbu biabiansoni. Bâ na lukwikulu ti mitieno mia Yehova ni mio mitomono yôka. Tulendi baka ndandu mu bima biabiansoni bi tu lombaka Yehova mu sa. Bô balandaka mitieno miandi mbo batizitisaka, luzingu lwawu mbo lubâka na nsasa, mpe mbo babâka na nsayi ya matieleka.​—Mik. 19:8-11. w22.03 4 par. 8-10

Mbo tusilaka Yehova nsambululu bu tutungaka mpe bu tukipaka mbuka za nsambululu. Bibila mbo ditâka ti tisalu tia ntungulu ya tabernakle na ya bima biaketi bâ mu kati tieri tisalu tia santu. (Ndu. 36:1, 4) Lumbu ti mpe, Yehova mbo kamonaka ti tisalu tia ntungulu ya Nzo za Nsambululu na ya bima biakaka tia santu tiena. Mpangi zakaka mbo ziyôkesaka ntangu yayingi mu sala bisalu bio. Ngano ka wufwanakane’â ko ti tatondaka mu bungu dia moko ma bayikaka mu tisalu tia Timfumu tia Nzambi? Kâ, mbo basamunaka mpe. Bakaka mu bawu mbo badingaka mu bâ mipasuri-nzila. Bakuluntu ba mu timvuka mbo basongela ti moko bayikaka mu tisalu tia ntungulu bu babika mpangi zo zaba mipasuri-nzila tala ti bifu bifwanakane bie nawu. Ni bu sa ti tisalu tia ntungulu tia tuzebi sala peleko kâni, beto bansoni tulendi sala ngatu nzo zo zaba za tsema mpe za mbote. w22.03 22 par. 11-12