Juillet

Nzengolo ya katula muntu mu timvuka kwe Yehova yatûka. Musamu wo ni mu bungu dia mbote ya beto bansoni na ya wô siri masumu. Bantu bakaka mu timvuka balendi tâ ti nzengolo yi babongele mu katula muntu mu timvuka ka yena ya mbote ko, kâ bambukaka ti, bantu bô ka bavulu’â zonzelaka misamu mia mbi miyirikiri muntu wu bakaturi mu timvuka ko. Ka tuzebi’â misamu miamiansoni ko. Bâ na lukwikulu ti bakuluntu babêle mu komite ya nsembolo ngolo basariri mu landa mitieno mia Bibila mpe mfundisi zena ha tibuka tia Yehova.” (2 Nta. 19:6) Bu singasa nzengolo yi bongele bakuluntu mu katula muntu wu zololo mu timvuka lendi bakisa muntu wo mu kâla kwe Yehova. Elizabeth têle: “Musamu wa nkatika wa mpasi weri mu lembo vutu bâ tintwari na mwana’eto wa bakala wa kula. Ha manima bu kakâla kwe Yehova watâ ti wafwanakana bamukatula mu timvuka. Wavutu tâ ti malongi ma mbote mamingi kalongoka.” w21.09 28-29 par. 11-12

Dimbitila mu mufwiri wo. Ntembe kâni wazolo mu hana kabu dia dinene kwe Yehova. Kâ, wasa miamiansoni mi kalenda; tima tieri ntalu kwe yandi, wahana tio kwe Yehova. Mpe Yezu watâ ti kabu diandi ntalu dieri ha meso ma Tata’andi. Malongi ma ntalu ma tuta baka mu musamu wo ni ema: Yehova nsayi yibâka nandi bu tumuhanaka bima bieto bia ntalu​—bu tumusarilaka mu mutima’eto wawansoni na mu tilundi tieto tiatiansoni. (Mat. 22:37; Kol. 3:23) Bu tusaka miamiansoni mi tulenda, mpe bu katumonaka, Yehova nsayi yibâka nandi! Musamu wo mpe wutariri ngolo zi tusarilaka na ntangu yi tuyôkesaka mu sa nsambululu, ntiana tisalu tia samuna na tifu tia kwendaka ku tukutakanu. Bwe lendi sarila malongi me mu tinsamu tia mufwiri wo? Yêla mu dimbitila mu bantu bê na nsatu lutindusu mu bungu dia ngolo zi basarilaka mu tâ Yehova nsayi. Kulendi bâ mpangi ya nuna ya yikento yimonaka ti kena salu ko, mu bungu ti timbevo tie nandi peloko ka sâla na ngolo ko mu sala tisalu tia samuna ntiana bu keri tia sarilaka mu ntama. w21.04 6 par. 17, 19-20

Yehova ntangu yifwanakane mu tûla nsuka mu nza yi ya mbi ya kazebi. Mu bungu ti luvivululu lwe nandi, bantu babingi babâ na lenda dia mu zaba, mpe bwawu bu milio za bantu zimusarilaka. Babansoni mu nsayi bena mu bungu ti Yehova wakorela tûka ntangu yayingi ngatu babutuka, balongoka mu mu zolo, mpe batihana kwe Yandi. Mu ntangu milio ya bantu yi bakwizi korela tii ku nsuka, mbo wumoneka ti Yehova nzengolo ya mbote kabonga mu vivirila! Ntono mbi na mpasi zi tulumunaka Satana, Yehova mbo katatamanaka mu bâ Nzambi ya nsayi. (1 Tim. 1:11) Beto mpe tulendi tatamana mu bâ mu nsayi, bu tukwe kêle na luvivululu lwalwansoni ti Yehova kasantukisa nkumbu’andi, kasongela ti ni Yandi kwa we na nswa wa yâla, kamanisa mbi yayansoni, mpe katûla nsuka mu misamu miamiansoni mie neto lumbu ti. Bika tabongeno nzengolo ya korela na ya bâ na buntindi mu bungu ti Tata’eto die ku mazulu mbo kakorelaka mpe. w21.07 13 par. 18-19

Bantu babîngi mu mbandu ya ntete balembo bêla na timinu mu Yezu. Kwe bawu weri kwa mwana wa mputu yimosi yeri salaka tisalu tia mabaya. Mpe watûka ku Nazarete, hata di beri bongelaka ntiana hata dia fioti. Ntiangu Natanayele, wayizi bâ mulongoki wa Yezu ha manima, katâ: ‘Ku Nazarete mpe tima tia tibote tilendi tûka ko?’ Yandi mabanza ma Mika 5:2 meri nandi mu mutu, matâka ti Masiya ku Beteleyeme kaketi butukila, ka ku Nazarete’â ko. Mbikuri Izaya wabikula ti mbeni za Yezu ka zaketi’â kipa misamu mitariri ntukulu ya Masiya ko. (Iza. 53:8) Tala ti bantu bô babonga ntangu ya taluzula misamu mio miamiansoni, mbo baketi bakula ti Yezu ku Beteleyeme kabutukila, mpe mwana wa Davide weri. (Like 2:4-7) Buna, mbuka ya butukila Yezu mbo yikwelanaka na mbikululu ye mu Mika 5:2. Kâ musamu kwe weri? Bantu bayizi kulu bonga nzengolo. Misamu miamiansoni ka bazaba mio ko. Musamu wo wasa ti batâ makuba. w21.05 2-3 par.  4-6

Bu tukatula bifwani bia mbi bilwengesaka bi tuzonzele, Bibila mbo dizonzelaka bifwani bia mbote bia bantu babaka lusakumunu mu bungu ti batambula malongi. Tazonzeleno Yobe. Ni bu sa ti Nzambi keri tînaka, muntu wa masumu weri. Nkwamusu bu zayôka, wahana mabanza malembo bâ ma delakana. Buna yandi wanbaka malongi matûka kwe Elihu na kwe Yehova. Ngano Yobe bwe kasa? Yandi watâ: ‘Nazonzele me ka nizabi [. . .] Ntiangu nita bika kwa, nita soba mabanza ha kati dia mfumfuta za mutoto na ha bombi.’ (Yobe 42:3-6, 12-17) Yandi Wasongela tifu tia kuluka bu katambula malongi ma mu hana Eliwu, ni bu sa ti Eliwu ntwenia kwa yeri. (Yobe 32:6, 7) Beto mpe tifu tia kuluka mbo titubakisa mu sarila malongi, ni bu tumona ti malongi ka mata tu fwanakana ko peleko muntu wutulongele ntwenia kwa yena na beto. Nani ha kati dieto fweti lembo kula mu mpila ya sarila mbutu ya mpeve na mu tisalu samuna? w22.02 11 par. 8; 12 par. 12

Muna muntu mu timvuka dema die nandi dia sala ngatu mu timvuka mwabâ luzolo na tidzunu, mpe na kani muntu ka wutimonandi yandi kaka. Misamu mi tuyirikaka na mi tutâka milendi tomo tindisa bantu bakaka! Ngano nti lendi sa mu bakisa bantu balembolo na kanda mu timvuka ngatu bamona ti Mpangi zawu bawu bazololo? Yêla mu sa tindiku na bantu ba môna mu timvuka. Na nsayi yayansoni, tulendi batika mu bwanaka bantu ba môna mu timvuka. (Rom. 15:7) Kâ, ka tusukisinakandi kwa mu ba hana mbote. Tuzololo tasa bindiku bia ngolo mpe bizingilaka. Buna, bâ na nsayi mpe songela ti bô ba môna ba zololo. Yêla mu bakula misamu mi bata bwabana na mio kâ, zitisa misamu mia luzingu lwawu. Kwe bakaka, musamu wa mpasi wena mu zonzela mabanza mawu, buna kutomoandi ba sa tiya mu zonza. Kâ ba yulaka biyuvu bia fioti-fioti, mpe na luvivululu kêla mvutu zawu. Mu tifwani, lendi ba yula bwe bayizi zabila matieleka. w21.06 11 par. 13-14

Mbo tutomo tondaka Yehova mu bungu ti lenda die neto dia mu sarila na mpangi zeto ntiana ‘twila’ dimosi die na ‘muvungi’ wumosi! Buku dia Organisés pour faire la volonté de Jéhovah, tinima 165, mbo ditâka: “Mu bungu ti bumosi nsayi bukutâka, dema die naku dia yika moko mu simbirila bo mu timvuka.” Buna tufweti longoka “mu mwina mpangi zeto mu mpila Yehova yi kabamwinaka.” Kwe Yehova, beto bansoni ‘bala ba’ ntalu twena. Ngano ni bo mwinaka mpangi zaku? Yehova mbo kamonaka, mpe mbo kazoloko misamu miamiansoni mi yirikaka mu ba bakisa na mu ba kipa. (Mat. 10:42) Mpangi zeto za tuzololo. Buna tabongeno nzengolo ya lembo ‘tambila bampwana’eto tima ti batêla kuba, keti tilendi ba bwisa.’ (Rom. 14:13) Mbo tusongelaka ti mpangi zeto zituyôkele, mpe mbo tuzoloko mu ba lemvokela mu mutima wa mukaka. Ka tubikandi ti bantu batufwemesa. Kâ, tasoleno mu dinga “bima bisingasaka tidzunu na bima bitukurisaka beto na beto.”​—Rom. 14:19, NWT. w21.06 24 par. 16-17

Tala ti tubongele ntangu ya longoka na ya sarila malongi ma tubakaka mu Zu dia Nzambi na mu organizasio’andi, malembe-malembe mbo tukwizi bâ na timuntu tia bukristo. Mbo tukwizi tomo zaba Nzambi. Tataleno tifwani tia Yezu mu musamu wo. Yezu wasarila tifwani tisongelaka bwe nsangu za Timfumu zi tusamunaka zena ntiana mbutu ya fioti yikulaka malembe-malembe mu mitima mia bantu ba nsungu. yandi watâ: ‘Mbutu ni mu tomboka (mena), ni mu kula, [tikuni] yandi kazabi. Mutoto yandi beni tetese mbutu, menese muturila, heni bifulu, mboko ni mbutu zilebamane mu [bifulu].’ (Mak. 4:27, 28) Yezu watâ ti ntiana kwa muti wukulaka malembe-malembe, muntu wutambulaka nsangu za Timfumu mpe malembe-malembe wukulaka mu timpeve. Mu tifwani, mu ntangu milongoki mieto mia bunsungu mipusanaka kwe Yehova, mbo tumonaka nsobolo za mbote zi basaka. (Efz. 4:22-24) Kâ, tufweti bambukaka ti ni Yehova kurisaka mbutu. w21.08 8-9 par. 4-5

Tulendi baka nsayi tala ti tudingiri yo ku mbuka ya mbote. Muntu wuyangalalaka “mu bima bi monaka meso” mbo wuzoloko bima bie nandi lumbu ti. Kâ, muntu wukwe landi nsatu zandi mbo katatamanaka mu kwe dingi bima bi kalendi lembo baka. Buna ntia malongi tuta baka? Mu baka nsayi, tufweti tûla mabanza meto mu bima bie neto mpe mu makani ma twe na mo lenda mu lungisa. Ngano, tulendi bâ na nsayi mu bima bie neto? Bantu babingi babanzaka ti ka tulenda ko mu bungu ti, tufweti tatamana mu longoka bima bia môna. Kâ tulendi lenda. Tulendi yangalala mpe tulendi zolo “bima bi monaka meso meto.” Bwe tulendi wa sila? Tataluzuleno tifwani tia hana Yezu tia talent tie mu Matie 25:14-30 mpe tutaluzula misamu mi tulendi longoka mitariri mpila yi tulendi bakila nsayi, mpe yi tulendi yikila nsayi’eto mu tusakumunu twe neto bwawu bu. w21.08 21 par. 5-6

Yehova mbo katomo belokelaka lwaka bantu “ba baniekonaka na ba kuluka.” Beto bansoni tulendi tindisa mpangi zeto, ka diena kwa dema dia bakuluntu ko. Mpila yimosi yi tulendi ba tindisila ni mu ba songela ti, bawu tubelokelaka lwaka. Yehova zololo ti tabasongela ti bawu katomono zolo. (Bin. 19:17) Tulendi mpe bakisa mpangi zeto bu tubâ ba kuluka na bu tuzaba ndilu zeto. Ka tuzololo’â ko ti batalaka kwa beto ngatu mpangi zeto balembo bâ na tifu tia dienokena. Kâ mbo tukwe sariri misamu mi twe na mio lenda na luzabu lweto, mu kwe titindisi beto na beto. (1 Pi. 4:10, 11) Tulendi longoka misamu miamingi mu mpila yi tulendi bongela bantu bakaka, bu tutaluzula tifwani tia Yezu mu mpila yi keri bongelaka milongoki miandi. Ka kweri’â muntu ko weri ntiana yandi. Kâ wa lembama mpe wa kuluka weri. (Mat. 11:28-30) Bu keri longesaka, mbo keri sarilaka nzonzolo ya peta, na bifwani bieri simbaka mitima mia bô ba kuluka.​—Like 10:21. w21.07 23 par. 11-12

Bongaka ntangu ya zonzaka na mpangi za nuna. Kampe meso mawu ka masala tomo mone ko, ka basala kwe yende ntinu ko mpe malembe kwa bayika zonzaka. Kâ sala kwa batiri sala, mpe bayizi sala mu bâ na “nkumbu ya mbote” kwe Yehova. (Ekl. 7:1) Bambukaka mu bungu dia nti bê ntalu kwe Yehova. Tatamana mu ba songela ti ntalu bena. Bâ ntiana Elize. Wasa fuki ngatu kabâ penepene na Eliya mu tilumbu tiawu tia mansukina. Elize mbala zitatu katâ: “Ka nikubika ko.” (2 Mit. 2:2, 4, 6) Songela ti mpangi za nuna za tomo kipaka bu pusana kwe bawu na nsayi yayansoni. (Bin. 1:5; 20:5; 1 Tim. 5:1, 2) Bayula biyuvu ntiana: “Bu weri ntwenia, nti biakuhana lukwikulu ti matieleka wabaka?” “Misamu mi wabwabana na mio bwe miasila ti watomo pusana kwe Yehova?” “Nti biakubakisa mu tatamana mu bâ na nsayi mu tisalu tia Yehova?” (1 Tim. 6:6-8) Ha manima ba wirikila bu bazonzela tinsamu tiawu. w21.09 5 par. 14; 7 par. 15

Bu sarilaka ngolo zaku mu tumamana ntumunu ya samuna na ya kubika milongoki, mbo songelaka luzolo lwaku mu Nzambi. (1 Za 5:3) Banza’eti: Mbo samunaka kwe bantu mu bungu ti Yehova zololo. Ngano ntumunu yo ka yena mpasi ko mu tumamana? Kampe kâni. Bu wabatika mu samuna bwa ntete mu nzo na nzo, ngano ka weri’â na bunkuta ko? Ntembe kâni, bunkuta bweri naku! Kâ wazaba ti tisalu ni tio Yezu kazololo wasala, mpe watumamana ntumunu yo. Kampe ntangu bu yeri kwe yôke, ka wayizi’â bâ musamu wa mpasi ko kwe nge mu sala tisalu tia samuna. Kâ bwawu bu, bwe tulendi tâ mu bungu dia musamu wutariri twarisa ndongokolo ya Bibila? Ngano bu banzaka wo bunkuta wukutâka? Kampe. Kâ, tala ti sambiri Yehova mpe mu lombele lubakusu ngatu kakuhana butindi mu twarisa ndongokolo ya Bibila, lendi ku bakisa mu bâ na nsatu ya kubika milongoki. w21.07 3 par. 7

Mu ntangu ya ntama, mbo beri tûlaka tidimbu kwe bangamba mu songela ka nani bavwiri. Mpila mosi mpe, mu ntangu ya beto bantu mbo badinga ti bantu babansoni basongela ka nani bayikaka moko. Mabanza mawu na nsalulu zawu mbo zisongela ntia guvernema basingasaka mpe bayikaka moko. Ngano mbo tutambula tifwani tia tidimbu tio mpe mbo tuyika moko mu guvernema za politike? Bô bakalaka mu tambula tidimbu tio, mbo babwabana na misamu mia mpasi. Mukanda wa Nzabukusu wuvutulu tâ: ‘Muntu pele lendi teka peleko lendi sumba tala kena na tidimbu’ ko. (Nza. 13:17) Kâ kanda dia Nzambi dizebi nti Nzambi kasa kwe bô bê na tidimbu ti bazonzelaka mu Nzabukusu 14:9, 10. Kani batambula tidimbu tio, mbo batsoneka ha koko kwawu, “Yehova kumvwiri.” (Iza. 44:5) Yi ni ntangu yi tufweti bâ na lukwikulu ti kwikama kweto mu Yehova ngolo kwena. Tala ti ni bo, Yehova mbo kabâ na nsayi ya tâ ti ni Yandi tu vwiri! w21.09 18 par. 15-16

Mu lungisa tisalu tieo tia samuna, tulendi baka lubakusu lwa bantu bakaka. Ntumwa Paulo walongesa Timote mpila zandi za samunina na za longesela, mpe wamutindisa mu sarila mpila zango mu bakisa bampwana’andi. (1 Kor. 4:17) Ntiana Timote, tulendi longoka mu tifwani tia mpangi za timvuka tieto zisamunaka tûka ntama. Mpe, tufweti sambila Yehova ngatu kakubakisa. Lombaka lubakusu kwe Yehova ntangu zazansoni zi samunaka. Tala ti lubakusu lwa mpeve santu kâni, na kani muntu ka waketi’â lenda mu sa tima ko. (Mik. 127:1; Like 11:13) Bu lombaka lubakusu lwa Yehova, tomo zonzelaka mabanza me naku. Mu tifwani, mu lomba kakutwarisa kwe muntu we na nsatu ya mu zaba mpe bâ wa kubama mu wirikila. Tufweti kubika mpe ntangu yi tusaka ndongokolo‘eto. Zu dia Nzambi ditêle: ‘Zaba taluzula nge beni luzolo lwa Nzambi ni lwe.’ (Rom. 12:2, NWT) Bu tulongokaka, mbo tukwizi zabaka Nzambi bubote-bubote. Buna bu tukwizi zonzela misamu mitariri Nzambi kwe bantu bakaka, mbo bamona ti misamu mi tuta tâ mia tutomo kwikilaka. w21.05 18 par. 14-16

Ngano nti biyôka tala ti ntono ngolo zaku na tusambulu mu bungu dia yandi, mulongoki ka wutâ kwenda ku matu ko, mpe fweti bika ndongokolo? Mbo tala ti ka weka’eti bakisa muntu ko tii ku bateme? Ngano fweti tilanda mambu, bu kwe banszi ti Yehova kasakumuni’â tisalu tiaku ko? Tala bwe Yehova kamwinaka ti beto tulendele. Yehova ngolo na fuki tieto katalaka. Kwe Yehova, tisalu tieto mbo tibutaka mbutu mu ntangu yi tusalaka tio na manzangu mpe na luzolo lwalwansoni, ni bu sa ti bantu ka bata zolo ko mu tu wirikila. Paulo watsoneka: ‘Nzambi ka kondolo’â buderede ko mu zimbakana tisalu na luzolo lu lusongele mu bungu dia nkumbu’andi, bu lwasarisi na bu luta sarisa basantu.’ (Ebr. 6:10) Yehova mbo kabambukilaka ngolo zeto na luzolo lweto, ni bu sa ngolo zo ka zineti’â ndandu ko. Buna, nge beni lendi misamu mia tâ Paulo mu verse ya lumbu ti. w21.10 25 par. 4-6

Nsayi na luzolo lwa Yezu mbo bieri monekaka mu mpila yi keri bongelaka milongoki miandi. Wazaba ti, lenda dia swaswana dieri nawu mpe misamu mia swaswana mieri nawu. Buna babansoni ka baketi’â nata madema mamosi ko; mpe ka baketi’â sala mpila mosi ko mu tisalu tia samuna. Kâ, mbo keri zoloko ngolo zeri sarilaka muna muntu mu bawu. Yezu wasongela ti bantu keri bakulaka, bu kasarila tifwani tia talents. Mu tifwani tio mfumu wahana tisalu kwe muna ngamba tieri delakanaka na lenda diandi. Mosi mu ngamba zole za mbote, wabaka bima biayôka bia mpwana’andi. Kâ mfumu, mpila mosi kasîkila ngamba zo za zole bu kabatêla: ‘Mia mbote, tisari tia mbote [mpe tia kwikama!” (Mat. 25:14-23) Yezu mu nsayi na mu luzolo katubongelaka. Zebi ti lenda dieto na misamu mieto mia swaswana miena, mpe nsayi yibâka nandi bu tusarilaka ngolo zeto zazansoni. Tufweti landa tifwani tia Yezu mu mpila yi tubongelaka bantu bakaka. w21.07 23 par. 12-14

Kâ ntangu zazansoni, mutinu Davide keri’â songelaka tiari ko. Mu tifwani, mu ntangu Nabale weri na mutima ngolo yi kazonza na kondo kwa buzitu mpe yi kakala mu hana bidia kwe Davide na kwe bantu bandi, Davide nkesi zamubaka mpe wabonga nzengolo ya kwe mu honda yandi na bantu bandi. Kâ mukento wa Nabale, Abigayile, nsayi yayingi yeri nandi na luvivululu, mpe wasarila manzangu mu hana bima kwe Davide. Buna, Davide ka honda Nabale ko na bantu bandi. (1 Sam. 25:9-22, 32-35) Davide bu keri mu nkesi zazingi wabonga nzengolo ya honda Nabale na bantu bandi babansoni. Ha manima, Davide watâ ti, muntu wa mvwama wazonzela Natane mu tinsamu tiandi, wafwanakana kafwa mu bungu dia musamu wu kayirika. Mu tifwani tio tia nzole tulendi tiyula: mu bungu dia nti muntu weri na luzolo lwalwingi kahanina nsembolo ya ngolo? Tataleno misamu miayôka mu luzingu lwa Davide. Mu ntangu yîna, Davide ngindu’andi semba yeri kwe mu sembe. Tifu tia bâ na mutima ngolo na tia kwe tsâri, bidimbu biena bisongelaka ti muntu kena wa wasa ko mu timpeve. w21.10 12 par. 17-18; 13 par. 20

Mu misamu mio, mbo tulongokaka ti, tulendi landa tifwani tia Yehova, Yandi we tifwani tiyôkele mu musamu wutariri busantu. Tufweti bâ ba santu mu ndiatulu’eto. Mu bungu ti bantu ba masumu twena, tulendi mona ti ka bulendi’â bwa bâ ko. Ntumwa Piere yandi beni watâ makuba mamingi; kâ, tifwani tiandi mbo titusongelaka ti tulendi bâ ba santu. Bantu bu bazonzelaka muntu wa santu, mbo babanzaka ti, ni muntu wulembo sehaka, wulwataka binkuti bia dibundu, mpe wubâka wa zitama ntangu zazansoni. Kâ, ka wena wa matieleka ko. Bibila mbo ditâka ti Yehova, we wa santu, Nzambi ya nsayi yena. (1 Tim. 1:11) Mbo batâka ti bô bamusambilaka nsayi ye nawu. (Mik. 144:15) Yezu wasemba bantu beri lwataka binkuti mu tiswasikisa na bantu bakaka, mpe beri songelaka buderede bwawu ha meso ma bantu mu timonekesa. (Mat. 6:1; Marke 12:38) Bakristo ba matieleka bazebi nsasa ya busantu mu nzila ya misamu mi tâka Bibila. Lukwikulu lwe neto ti kani kabwe, Nzambi’eto ya luzolo ka lendi’â katuhana ntumunu ko yi tulembo lenda mu tumamana. w21.12 2 par. 1, 3

Mu bima biabiansoni bia tu hana Nzambi na nsayi yayansoni, kampe dimosi dia makabu ma manene, ni lenda dia mu sambila. Mbo tusongelaka ti Yehova Yandi tuzololo, bu tutumamanaka ntumunu zandi. (1 Za 5:3) Mu ntumunu Yehova zi kazololo tatumamana, mwe na ntumunu ya hana Yezu ya kubika milongoki na ya ba batisa. (Mat. 28:19) Watulomba mpe mu zolosono beto na beto. (Za 13:35) Yehova mbo katambula bantu batumamanaka ntumunu zandi mu kanda diandi dia mu nza ya mukaka dia bisari biandi bia kwikama. (Mik. 15:1, 2) Songela luzolo kwe bakaka. Luzolo ni tifu tia ntete tia Yehova. (1 Za 4:8) Yehova watoko tu zolo ntete tamuzolo. (1 Za 4:9, 10) Mbo tulandaka tifwani tiandi, bu tusongelaka luzolo kwe bakaka. (Efz. 5:1) Mpila yimosi ya mbote yi tulendi songela kwe bantu ti bawu tuzololo, ni mu ba bakisa mu longoka mu zaba Yehova bwawu bu bu tatiri na ntangu. (Mat. 9:36-38) Bu tubabakisaka, balendi kwizi longoka mu zaba misamu mie nawu nsatu mu kota mu kanda dia Nzambi. w21.08 5-6 par. 13-14

Mu bungu ti Yezu luzolo lwalwingi lweri nandi mu Yehova wazolo mu tihana mu bungu dia Tata’andi na mu bungu dia beto. (Za 14:31) Yezu wasongela ti bantu ba keri tomo zoloko mu mpila yi keri natinaka luzingu lwandi ha mutoto. Bilumbu biabiansoni, mbo keri songelaka luzolo na tiari tia mutima, ni bu sa ti bantu bakaka mbo beri mu telamanaka. Mpila ya mfunu yi kasongela luzolo mu bantu ni mu ntangu yi keri ba longesaka misamu mitariri Timfumu tia Nzambi. (Like 4:43, 44) Yezu wasongela mpe luzolo lwandi mu Nzambi na mu bantu bu katambula mu mona mpasi na mu fwa ha moko ma bantu ba masumu. Bu kasila bo, wahana bweso kwe beto bansoni bwa baka luzingu lwa mankululu. Tatihana kwe Yehova mpe tabatusu mu bungu ti Tata’eto dia ku mazulu tu zololo. Buna, ntiana Yezu, tufweti songelaka ti Yehova Yandi tu zololo mu mpila yi tubongelaka bampwana’eto. Ntumwa Za watâ: ‘Wô lembo zolo mpwana’andi wu kamonaka, ka lendi’â kazolo Nzambi ko wu kalembo monaka.’​—1 Za 4:20. w22.03 10 par. 8-9

Ni bu sa ti mbo tuzoloko mu yôkesa ntangu na Yehova, ka wubâka musamu wa fioti ko ntangu zazansoni. Mu bungu ti misamu miamingi mibâka neto mu yirika, ntangu zakaka mbo wubâka musamu wa mpasi kwe beto mu bâ na ntangu ya kipa misamu mia timpeve. Tisalu, madema ma kanda na misamu miakaka mia mfunu bilendi dinga ntangu yayingi, buna tulendi banza ti ka twena na ntangu ko ya sambila, ya longoka peleko ya dimbitila. Tima tiakaka tie kô tilendi tu bonga ntangu. Tala ti ka tusiri’â keba ko, tulendi hana nzila kwe misamu milembolo mia mbi miatulaba ntangu’eto yi tulendi sarila mu pusana kwe Yehova. Tabongeno tifwani mu musamu wutariri nsaka. Mfunu wena mu bâka na ntangu ya saka nsaka. Kâ, nsaka za mbote mpe zilendi sa ti tabâ na ntangu ya fioti mu bungu dia misamu mia timpeve. Tufweti tûlaka nsaka ha tibuka tiawu.​—Bin. 25:27; 1 Tim. 4:8. w22.01 26 par. 2-3

Yehova bu katuma bala ba Israele mu zolo bampwana’awu, keri’â zolo tâka ko ti bafweti songasana kwa luzolo bawu na bawu. Wabatêla mpe ti bafweti zolo banzenza beri ha kati diawu. Musamu wo mbo wutomo monekaka mu Levitike 19:33, 34. Bafweti bongela banzenza ntiana bu beri bongelaka bala ba Israele bakaka, mpe bafweti ba zolo ntiana bawu beni. Mu tifwani, Bala ba Israele bafweti hana nzila ya tota bima ku misitu kwe banzenza na kwe bamputu. (Lev. 19:9, 10) Mutieno wutariri zolo banzenza salu wena mpe kwe Bakristo. (Like 10:30-37) Mu bwe? Bantu babingi babêlaka ku bunzenza lumbu ti, kampe bakaka ni lubandakane nawu. Musamu wa mfunu wena mu bongelaka babakala bo, bakento bo na bala bo na buzitu bwabwansoni. w21.12 12 par. 16

Bu tutomo kwe sikiriri lutwalusu lwa Yehova bwawu bu, mbo tukwizi bâ na lukwikulu mu lenda diandi dia tu vukisa mu bilumbu bita kwiza. Tufweti bâ na timinu, mpe tufweti zolo mu sikirila Yehova mu lomba congé kwe mfumu ya tisalu ngatu twenda ku lukutakanu lwa lunene, peleko mu mu lomba ntangu ya kwendaka ku tukutakanu twatwansoni twa timvuka, na ya samunaka. Ngano bwe tusa tala ti mfumu’eto kariri, mpe tuhombese tisalu tieto? Ngano mbo tubâ na timinu ti kani kabwe Yehova ka tu bika ko peleko ka tu yambirika ko, mpe ntangu zazansoni mbo katuhana bima bia mfunu bie neto nsatu? (Ebr. 13:5) Mpangi zazingi ze mu tisalu tia ntangu zazansoni zilendi zonzela binsamu bisongelaka bwe Yehova kababakisila mu ntangu yi beri na nsatu lubakusu lwandi. Yehova wa kwikama wena. Na Yehova ku matu meto, ka tufweti’â tabâ na bunkuta ko mu bungu dia bilumbu bita kwiza. Tamana tatamana mu tûla Timfumu tiandi ha tibuka tia ntete mu luzingu lweto, kani kabwe Nzambi’eto ka tu yambirika ko. w22.01 7 par. 16-17

Ngano bwe lukwikulu lweto mu bakuluntu lulendi kotela mu ntontolo? Banza’eti ti muntu wu bakaturi mu timvuka ka yena ndiku’eto yena. Tulendi tiyula tala ti bakuluntu misamu miamiansoni mia bataluzuri, peleko nzengolo yi babongele ni yo mpe yi bongele Yehova. Ngano nti bilendi tu bakisa mu mwina nzengolo yo mu mpila ya mbote? Tufweti bambukaka ti katula muntu mu timvuka musamu wena wa kubika Yehova. Mbo wunataka ndandu kwe timvuka na kwe muntu wusumukini. Tala ti muntu wuyirikiri masumu mpe wulembolo soba mabanza wutatamane mu bâ mu timvuka, wulendi tuma bantu bakaka mu yirika masumu. (Nga. 5:9) Mpe muntu wo wulendi mona ti disumu diandi ka diena dia dinene ko, mpe lendi mona ti kena na nsatu ko ya soba mabanza mandi na nsalulu zandi ngatu kavutu bâ na tindiku tia mbote na Yehova. (Ekl. 8:11) Tulendi bâ na lukwikulu ti bu babongaka nzengolo ya katula muntu mu timvuka, bakuluntu mbo babongelaka dema diawu na bunsungu. w22.02 5-6 par. 13-14

Luvivululu na nsayi mbo bibâka mfunu nsungula mu ntangu muntu yi kakalaka malongi masikamanaka mu Bibila. Mukuluntu wufweti saka keba mu lembo kulu bakaka nkesi tala ti malongi ma kaheni ka bakululu’â ma tambula ko peleko ka bakululu’â ma sarila ko. Buna, bu kasambilaka yandi kaka, mukuluntu wulendi lomba kwe Yehova kasakumuna muntu we na nsatu malongi, ngatu kamubakisa mu bakula mu bungu dia nti ke na mo nsatu mpe kafweti ma sarila. Mpangi yi baheni malongi yilendi bâ na nsatu ya ntangu mu dimbitila mu malongi ma bamuheni. Tala ti mukuluntu luvivululu lwe nandi na nsayi, ka wubâ musamu wa mpasi ko kwe muntu wu kata hana malongi mu mu wirikila. Wa matieleka, ntangu zazansoni malongi mafweti sikamanaka mu Zu dia Nzambi. Tuzololo ti malongi meto mabakisaka, kâ mpe mayangirikaka mutima.”​—Bin. 27:9. w22.02 18 par. 17; 19 par. 19

Bu tusambilaka mu baka ngolo za telamana ntontolo peleko bunôkena, tulendi mona ti Yehova zingila kata zingila mu hana mvutu mu tusambulu tweto. Mu bungu dia nti Yehova kalembo haninaka mvutu mu tusambulu tweto ho nkatika bendo? Bu tumusambilaka na bunsungu, mbo kamonaka ti timinu tie neto mu Yandi. (Ebr. 11:6) Yehova nsayi mpe yibâka nandi bu kamonaka ti ngolo tusarilaka mu sala tintwari na lusambulu lweto na mu sarila luzolo lwandi. (1 Za 3:22) Buna, tufweti bâ na luvivululu, mpe tufweti sala tintwari na tusambulu tweto ntangu zazansoni zi tuyêlaka mu telamana tifu tia tibi peleko mu nunga bunôkena. Yezu watubakisa mu bakula ti ntangu zakaka tusambulu tweto ka bahanina to mvutu ho nkatika bendo ko. Yandi watâ: ‘[Tatamaneno] mu lomba mbo baluhana, dingeno mbo lumona, konkoteno mbo baluziburila. Mu bungu ti kanso lomba mbo kabaka, wô dinga mbo kamona kanso konkota mbo bamuziburila.’​—Mat. 7:7, 8. w21.08 8 par. 1; 10 par. 9-10

Mu tunga timinu tiaku mu Mvangi’aku, fweti tatamana mu longoka Zu dia Nzambi. (Yos. 1:8) Tomo sa keba mu mbikululu zandi na mpila yi dikwelanaka diadiansoni. Misamu mio mbo miyika timinu tiaku ngolo ti, Mvangi wa luzolo mpe we na ndwenga watusala ni Yandi vwiri Bibila. (2 Tim. 3:14; 2 Pi. 1:21) Bu longokaka Zu dia Nzambi, dimbitilaka mu malongi mabakisaka me mu kati. Mu tifwani, tûka ntama Bibila dialwengesa ti luzolo lwa mbongo lwa mbi lwena mpe mpasi zazingi lunataka. (1 Tim. 6:9, 10; Bin. 28:20; Mat. 6:24) Buna, ndwengosolo ya Bibila yitâka ti ka tufweti’â tabâ na luzolo lwa mbongo ko ya nkatika ya mbote yena! Ngano lendi dimbitila mu malongi makaka ma Bibila makubakisa? Bu tukwe zolo malongi ma Bibila mbo tutomo kwizi sikirila ndwenga zi tu hanaka Mvangi’eto wa luzolo. (Zaki 1:5) Ha manima, luzingu lweto mbo lubâ lwa nkatika lwa mbote.​—Iza. 48:17, 18. w21.08 17-18 par. 12-13

Tala ti nuna ta nuna, bâ na lukwikulu ti Yehova mbo kabambukilaka tisalu ti wasala mu ntama. Na luhemo lwalwansoni, wayizi yika moko mu tisalu tia samuna, Wayizi korela misamu miamingi mia mpasi​—ni bu sa ti mio mihemonaka mutima—​mpe wayizi tatamana mu sarila mitieno mia buderede mia Bibila, wayizi nata madema, mpe wayizi kubika bantu bakaka. Wayizi sarila ngolo zaku zazansoni mu yukunu na nsobolo zazingi za mu organizasio ya Yehova. Wayizi yika moko, mpe wayizi tindisa bantu bakaka bê mu tisalu tia ntangu zazansoni. Yehova nge katomono zolo mu bungu dia tifu tiaku tia kwikama. Yehova kanisini: “Ka yambirikaka bantu bê ba kwikama kwe Yandi ko”! (Mik. 37:28) Yandi heni lukwikulu: “Tii bu lubâ na nsuki za mpembe, mbo niluyika moko.” (Iza. 46:4) Buna, kutâkandi ti mu bungu dia mvula zaku, kusiri’â mfunu ko mu organizasio ya Yehova. Nguria ntalu wena! w21.09 3 par. 4

Yehova mbo kasongelaka tiari mu bungu ti ni Yandi yôkele mu ndwenga. Bibila mbo ditâka ti ‘ndwenga zitûkaka ku mazulu [. . .] zafuluka zena mu tiari na mu bisalu bia bibote.’ (Zaki 3:17) Ntiana kwa tata die na luzolo, Yehova zebi ti bala bandi mbo babakaka ndandu mu tiari tiandi. (Iza. 49:15) Tiari tia Nzambi mbo tibahanaka tivuvu ntono masumu mawu. Mu bungu ti Yehova wa fuluka wena mu tiari, mbo katufwilaka tiari bu kamonaka ti wufwanakane mu sila bo. Kâ Yehova zebi mpe mu ntia ntangu kafweti lembo songela tiari. Na ndwenga zazansoni, kani kabwe kafwilaka tiari ko mu kanga meso mu misamu mi bafweti hanina nsembolo. Tabongeno tifwani: Tisari tia Nzambi tibongele nzengolo ya bâ na ndiatulu ya masumu. Ngano nti tufweti sa? Paulo watsoneka: ‘Ka lusandi [tintwari] na muntu wo.’ (1 Kor. 5:11) Bantu basumukaka, mpe balembo sobaka mabanza mbo babakatulaka mu timvuka. Mpila yo ya sarila mfunu yena mu kengerela mpangi zeto za kwikama mu tatamana mu sarila Yehova mu mpila ya santu. w21.10 9-10 par. 7-8

Mbo tusilaka Yehova nsambululu bu tuhanaka makabu mu bungu dia tisalu tia Timfumu. Bala ba Israele ka bafweti’â moneka kwe Yehova moko mpamba ko. (Lub. 16:16) Bafweti hana tima mu kabu buna bu baketi lendela. Mu mpila yo, mbo beri songelaka ti Yehova beri tondaka mu miamiansoni mi keri yirikaka mu bungu dia bawu. Ngano bwe tulendi songela luzolo lweto mu bungu dia Yehova, mpe bwe tulendi songela ti mbo tumutondaka mu bima bi katuhanaka? Tulendi bwa sila bu tuhana mbongo mu yika moko timvuka tieto na tisalu tisalamaka mu nza ya mukaka, buna bu tulendela. Ntumwa Paulo wazonzela musamu wo bu katâ: ‘Tala ti mabanza ma mbote na mo, kabu di hana muntu mu bio bie nandi, mbo batambula dio; ka mu bio bi kalembolo na bio’â ko.’ (2 Kor. 8:4, 12) Yehova mbo katomo yangalalaka mu tima ni tima ti tumuhanaka, ni bu sa ti ka tiena tiatingi ko.​—Mak. 12:42-44. w22.03 24 par. 13

Bakuluntu balendi bâ na nsatu lubakusu mu dioka ndiatulu ya mbi. Wa matieleka, bakuluntu ka balendi’â bakatula mpasi zazansoni zi bwabanaka na kanda dia Yehova ko. Ni bu sa ti ni bo, Yehova zololo ti bakuluntu basa miamiansoni mi balenda mu tindisa na mu kengerela bimeme biandi. Bwe bakuluntu bê na tisalu tiatingi tia sala balendi bakila ntangu mu bakisa mpangi zawu? Landa tifwani tia Paulo. Paulo wazolo mu sîkaka mpangi zandi na mu ba tindisaka. Musamu wa mbote wena kwe bakuluntu mu landa tifwani tiandi bu babongela kanda dia Yehova na luzolo lwalwansoni. (1 Tes. 2:7) Paulo watêla mpangi zandi ti Yehova bawu keri zoloko; yandi mpe bawu keri zoloko. (2 Kor. 2:4; Efz. 2:4, 5) Mpangi za mu timvuka ndiku zandi zeri mpe mbo beri yôkesaka ntangu tintwari. Wasongela ti lukwikulu lweri nandi mu bawu bu keri ba zonzelaka misamu mi keri tînaka na mio mi kalembo bêla na lenda mu yirika. (2 Kor. 7:5; 1 Tim. 1:15) Paulo ka tûla mabanza mandi mamansoni ko mu misamu miandi. Kâ wazolo mu bakisa mpangi zandi. w22.03 28 par. 9-10