Décembre

Yezu wafwanakasa tindiku tiandi na milongoki miandi, na mpila yi bêlaka muvungi na bimeme biandi. (Za 10:14) Tifwani tio tia delakana tiena. Bimeme mbo bizabaka muvungi’awu, mpe mbo bihanaka mvutu bu biwâka zu diandi. Muntu wumosi wukwe se nzietolo wamona wo mu mbala’andi ya ntete. Yandi watâ: “Weri neto tabaka bio foto, mpe tayêla mu sa ti bizi kwe beto. Kâ, ka biatulanda ko mu bungu ti ka biazaba mazu meto ko. Ha manima, mwana wumosi wa fioti weri muvungi wayiza; buna kwa bu katâ bio mbila, biamulanda.” Musamu watâ muntu wô weri kwe se nzietolo, mbo wuta tu bambula misamu mia tâ Yezu mu bungu dia bimeme biandi​—milongoki miandi. Yandi watâ: “Mbo biwâ zu diani.” Kâ Yezu ku mazulu kena. Bwe tulendi têla ti zu diandi tuta wirikila? Mpila ya mfunu yi tulendi songela ti Mfumu’eto tuta wirikila, ni mu sarila ndongosolo zandi mu luzingu lweto.​—Mat. 7:24, 25. w21.12 16 par. 1-2

Ntumwa Paulo wakwamisa Bakristo na luhemo lwalwansoni. Kâ ha manima, wayizi bakula ti misamu mi keri yirikaka mia mbi mieri, mpe wayizi soba ndiatulu na timuntu tiandi. (1 Tim. 1:12-16) Na lubakusu lwa Yehova, Paulo wayizi bâ muvungi wa luzolo, weri na tiari tia bantu, mpe wa kuluka. Yandi wasola mu kwikila mu mulemvo wa Yehova, kani katûla mabanza mandi mamansoni mu misamu mi kalembo lenda mu yirika. (Rom. 7:21-25) Keri’â kêlaka ko ti kabâ wa lunga. Kani kasila bo, wasarila ngolo mu tomesa timuntu tiandi tia bukristo, mpe na kuluka kwakwansoni wasikirila lubakusu lwa Yehova mu sala tisalu tiandi. (1 Kor. 9:27; Flp. 4:13) Bakuluntu ka babanomaka ko mu bungu ti ba lunga bena. Kâ, Yehova mbo kazoloko ti batambulaka fote zawu, mpe basarilaka ngolo mu tomesa timuntu tiawu tia bukristo. (Efz. 4:23, 24) Mukuluntu wufweti titaluzulaka mu nzila ya Zu dia Nzambi ngatu kasa nsobolo zifwanakane. Buna, Yehova mbo kamubakisa mu bâ na nsayi na mu bâ mukuluntu wa mbote.​—Zaki 1:25. w22.03 29-30 par. 13-15

Nti tufweti sa tala ti tubakuri ti mpangi zeto tufundisaka? Tufweti bambukaka ti tufweti zolo mpangi zeto. (Zaki 2:8) Tufweti mpesambila Yehova na bunsungu bwabwansoni mu mu lomba katubakisa mu lembo fundisaka bampwana’eto. Tulendi sala tintwari na tusambulu tweto bu tubonga nzengolo ya yôkesa ntangu na muntu wu tutsâlaka. Tulendi mu lomba tasamuna nandi peleko takabana tima tia dia. Bu tudinga mu tomo zaba mpangi’eto, mbo tuyêla mu landa tifwani tia Yehova na tia Yezu mu tala kwa bifu biandi bia mbote. Bu tusila bo, mbo tusongela ti ntumunu ya muvungi wa mbote tuta landa yitâka ti tabika mu fundisa. Ntiana kwa bimeme biwirikilaka zu dia muvungi’awu, milongoki mia Yezu mpe mbo miwâka zu diandi. Ni bu tubâ mu “twila dia fioti” peleko mu “bimeme biakaka,” tatatamaneno mu wirikila na mu tumamana zu dia muvungi wa mbote.​—Like 12:32; Za 10:11, 14, 16. w21.12 19 par. 11; 21 par. 17-18

Roboame bu kayizi bâ mutinu wa Israele, bantu ba keri tumaka bayizi mu lomba tima. Bamulomba mu dimina dema dia ba hana tata’andi Salomo. Roboame, wasarila ndwenga bu kayula bambuta ba ku Israele mu zaba ntia mvutu kaketi hana kwe bantu bo. Bambuta balonga mutinu ti, bu kaketi yirika misamu mieri lombaka bantu bo, mbo baketi tatamana kwa mu mu sarila. (1 Mit. 12:3-7) Kampe, Roboame ka yangalala ko mu malongi ma bamuhana, ntiangu kaye monekena bampwana’andi ba kakula na bo. Bawu bamutêla ti kayika dema dia bantu ba keri tumaka. (1 Mit. 12:9-11) Roboame lenda dia bâ nandi dia yula Yehova mu zaba ntia malongi kaketi sarila. Kani kasila bo, yandi wawâ malongi ma bantwenia. Musamu wo wanata misendo mia mbi kwe Roboame na kwe kanda dia Israele. Beto mpe, ntangu zakaka malongi ma tubakaka ka madelakanaka ko na misamu mi tuzololo mu wâ. Kâ, tala ti mu Zu dia Nzambi matûkiri, tufweti ma tambula. w22.02 9 par. 6

Muntu wa kuluka na wuzabaka ndilu zandi, ka wutûlaka mabanza mandi ko mu misamu mi lembolo zaba bantwenia, kâ mbo katûlaka mabanza mandi mu ngolo zawu. Ka basilaka timbanda ko, kâ mbo kasalaka nawu tintwari. Bantu ba nuna mbo bamonaka ti bantwenia makabu mena ma Yehova, mpe mbo batondaka mu mio mi yirikaka bantwenia. Mu ntangu ngolo zawu zita kwe dimini, bantu ba nuna mbo batondaka mu bungu ti bantwenia mbo bazoloko mu sarila ntangu’awu, ngolo zawu na lenda diawu mu lungisa nsatu za timvuka. Tifwani tia Naomi tie mu Bibila tia nkatika tia mbote tiena tia muntu wa nuna watambula lubakusu lwa muntu wa ntwenia. Ha mbatukulu, Naomi walomba kwe buko bwandi weri mufwiri, Rite, kakâla kwe kanda diandi. Kâ, mu ntangu Rite yi kasa tiya mu turisa Naomi ku Beteleyeme, Naomi watambula lubakusu lwa Rite. (Rite 1:7, 8, 18) Mpe musamu wo wa mbote weri mu bungu dia bakento bo ba bole! (Rite 4:13-16) Tifu tia kuluka mbo tibakisa mpangi za nuna mu landa tifwani tia Naomi. w21.09 10-11 par. 9-11

Tata’eto dia ku mazulu mbo kabakula mio mi lendi yirika muna muntu mu beto. Lendi bâ na lenda dia yirika misamu miamingi yôka bantu ba zebi mpe ba zololo. Peleko lendi lembo bâ na lenda dia yirika misamu miamingi ntiana bantu bakaka, kampe mu bungu dia mvula zaku, tikolela tiaku, peleko madema ma mu kanda. Kunôkanadi. (Nga. 6:4) Yehova ka zimbakana tisalu tiaku ko. Tala ti siri miamiansoni mi lenda, mpe siri bo na mabanza ma delakana, mbo kayangalala. Yehova zebi mpe misamu mi dingaka mu yirika. Mpe Zololo ti wayangalala mu nsambululu yi lendi mu sila. Lumbu ti, tidzunu tia mutima tie neto mu bungu ti tuzebi ti Yehova mbo kabakisaka bisari biandi bu babwabanaka na misamu mia mpasi. (Iza. 41:9, 10) Ntembe kâni, misamu mia mbote misaka ti tayangalala bu tusilaka Tata’eto dia luzolo nsambululu, Yandi ‘fwanakane mu tambula nkembo [na] nsangu’ za bima biabiansoni bi kasala!​—Nza. 4:11. w22.03 24 par. 16; 25 par. 18

Ka tufweti’â tanôka ko tala ti ka tuta lenda mu landa tifwani tia Yezu ko mu mpila ya lunga. (Zaki 3:2) Muntu wuta longoka tima ka wulendi’â wabâ ntiana muntu wuta mu longesa ko. Kâ bu kalongoka mu makuba mandi, mpe bu kasarila ngolo mu tomo landa muntu wuta mu longesa, mbo katatamana mu sa nsobolo za mbote. Mpila mosi mpe, tala ti tusariri misamu mi tulongokaka mu ndongokolo ya Bibila ya beto beni, bu tukwe sariri ngolo mu tomesa bifu bieto bia mbi, tulendi kwizi bâ na lenda dia landa tifwani tia Yezu. (Mik. 119:59) Mu nza ya fuluka mu bwimi tubêlaka. Kâ kanda dia Yehova dia swaswana diena. Tifu tieri na Yezu tia bakisaka bampwana’andi mbo titusimbaka mutima, mpe nzengolo tubongele ya landa tifwani tiandi. (1 Pi. 2:21) Bu tusarila ngolo mu landa tifwani tiandi, beto mpe, mbo tukwizi bâ na nsayi ya zaba ti Yehova beto katambulaka. w22.02 24 par. 16; 25 par. 18

Mpila mosi Yehova yi kahaninaka lutwalusu kwe kanda diandi lumbu ti ni mu nzila ya Zu diandi, Bibila. Tala ti tubongele ntangu ya dimbitila mu mio mi tu longesaka Yehova, mbo tubâ na lenda dia landa lutwalusu lwandi na dia sala tisalu tieto tia samuna. (1 Tim. 4:15, 16) Mpila yakaka Yehova yi katuhaninaka lutwalusu ni mu nzila ya “ngamba ya kwikama na ya ndwenga.” (Mat. 24:45, NWT) Ntangu zakaka, ngamba yo yilendi tu hana lutwalusu lu tuta lembo tomo bakula. Mu tifwani, balendi tu hana ntumunu zitukubika mu vuka mu catastrophe naturelle yi tuta banza ti ka yilendi’â yatula ko mu mbuka yi tubâka. Ngano nti tufweti sa bu tubanzaka ti ntumunu zi batuhanaka ka zena za ndwenga ko? Banza’eti binsamu bia Bibila bi tutangaka. Ntangu zakaka, kanda dia Nzambi diabaka lutwalusu lweri monekenaka ti ka lwena lwa mbote ko, kâ lwavukisa luzingu lwawu.​—Mfu. 7:7; 8:10. w22.03 18-19 par. 15-16

Na lukwikulu lwalwansoni, Yezu watâ misamu mia verse ya tilumbu ti. Yezu wazaba ti luzingu lwandi mu bilumbu bia ku matu ha moko ma Yehova lweri, mpe lukwikulu lweri nandi ti Yehova mbo kaketi mu bambukila moyo. Ntia malongi tulendi baka mu misamu mia tâ Yezu? Tatamana mu bâ wa kwikama ni bu sa ti luzingu lwaku mu mpasi lwena. Mu sila bo, fweti “tûla vuvu tiaku mu Yehova mu mutima’aku wawansoni.” (Bin. 3:5) Tataleno tifwani tia Joshua, weri Mbangi ya Yehova yeri na mvula 16, mpe weri na timbevo tinataka ku lufwa. Wakala mpila ya bukila yilembo kwelanaka na Musiku wa Nzambi. Ntangu fioti ntete kafwa, watâ kwe nguri’andi: “Mama, mu moko ma Yehova ndiena. [. . .] Mama, na lukwikulu lwalwansoni, mbo nita ku têla musamu ewu: Yehova mbo kakumvumbula kwe ba fwa. Mu mutima’ani katangaka, mpe Yandi ntomono zolo.” Mbo wubâ musamu wa mbote kwe beto bansoni mu tiyula tiyuvu eti: ‘Tala ti timinu tiani tikotele mu ntontolo mu musamu wulendi ku nata ku lufwa, ngano mbo nitatamana mu bâ wa kwikama, mpe mbo nibâ na lukwikulu ti Yehova mbo kakumbambukila?’ w21.04 12-13 par. 15-16

Kanda dia Yehova ngolo dibakaka mu nzila ya tisalu tia samuna. Bu tuzonzelaka matieleka ma Bibila kwe bantu bakaka, mbo tumonaka bubote, ni bu sa ti bantu mbo batambulaka mu wâ peleko kâni. Mu bungu dia misamu mie nawu, bantu bakaka balendi mona ti, ka balendi’â basala kwakwingi ko mu tisalu tia samuna. Tala ti ni bo monaka, bambuka ti Yehova mbo kayangalalaka tala ti siri miamiansoni mi lenda. Yehova mbo kamonaka, mpe mbo kazoloko nsatu’eto ya samuna, ni bu sa ti takota nzo. Lendi tu hana bweso bwa samuna kwe bantu batukipaka peleko kwe badoktere. Tamana fwanakasa tisalu ti tuta sala bwawu bu na ti tweri salaka mu ntama, tulendi kwizi nôka. Kâ, tala ti tubakuri bwe Yehova kata tu bakisila lumbu ti, mbo tubâ na ngolo ze neto nsatu za telamana musamu ni musamu wa mpasi, na nsayi yayansoni. Ka tuzebi’â ko ntia mbutu ya matieleka yimena mpe yibatika mu kula.​—Ekl. 11:6. w21.05 24-25 par. 14-17

Bundiafu bwatuma mutinu Davide kazimbakana bima bia mu hana Yehova, ntiana bimvwama, timfumu na lenda dia nunga mbeni zandi. Davide watonda bu katâ ti makabu ma Nzambi mingi mena mu zonzela mo! (Mik. 40:5) Kâ, Davide wayizi bâ na bundiafu Ni bu sa ti bakento babingi beri nandi, Davide wabatika mu zolo mukento wa muntu wakaka, kâ musamu wo Yehova wa kayimina. Mukento wango nkumbu’andi yeri Bateseba, mpe bakala diandi dieri na nkumbu Uriya, Muhitite weri. Na mabanza ma bwimi, Davide wavukasa nitu na Bateseba mpe ha manima Bateseba wabaka zimi. Musamu wa yirika Davide wa mbi weri, kâ wavutu yirika musamu wakaka wa nguria wa mbi; Davide wasa miamiansoni mu hondesa Uriya! (2 Sam. 11:2-15) Ngano Davide bwe keri banzaka? Ngano wabanza ti Yehova ka keti’â mu mona ko? Tisari tio tia kwikama tia Yehova tiabwa mu mutambu wa bundiafu mpe musamu wo wamunatina mpasi zazingi. Ha manima, Davide wafungula masumu mandi mpe wasoba mabanza. Wayizi vutu tonda Yehova mu bungu ti wamulemvokela.​—2 Sam. 12:7-13. w21.06 17 par. 10

Tulendi banza ti ka tulenda ko mu twarisa ndongokolo ya Bibila. Kampe mbo tubanzaka ti tufweti bâ na luzabu lwalwingi, peleko tufweti bâ mulongi wuyôkele ntete twe talongoka na muntu. Tala ti ni bo monaka, tatala misamu mitatu mikubakisa mu bâ na lukwikulu ti lendi lenda mu longoka na muntu. Wa ntete, Yehova mbo kamonaka ti lenda die naku dia longesa bantu bakaka. Wa nzole, Yezu we na lutumu lwalwansoni ku mazulu na ha mutoto, wakuhana nzila ya longesaka. (Mat. 28:18) Wa ntatu, lendi sikirila lubakusu lwa bantu bakaka. Yezu wasikirila misamu mia mu longesa Tata’andi mu zonzela, nge mpe lendi sila bo. (Za 8:28; 12:49) Kâ mpe, lendi lomba lubakusu mu batika na mu twarisa ndongokolo ya Bibila kwe ntwarisi ya tikunku tia bisamuni, kwe mupasuri-nzila wa yela peleko kwe tisamuni tia yela. Mpila yakaka yi lendi bêla na lukwikulu mu nge beni ni mu kwe turisaka bisamuni bio bu bikwe twarisaka ndongokolo ya Bibila. w21.07 6 par. 12

Mu bungu ti nsuka ya nza yi ka yisiri’â mala ko, ni mu ntangu yi tufweti bâ na lukwikulu mu mpila Yehova yi kayirikilaka misamu yôka mu ntama. Mu bungu dia nti? Mu bungu ti, mu ntangu ya mpasi ziyôkele tulendi baka ntumunu zimoneka ntiana’eti za nzenza zena, ka zena za delakana ko peleko mpasi zena mu landa. Wa matieleka, Yehova ka tu monekena ko mu tu zonzela. Kampe mbo katuhana lutwalusu mu nzila ya bantu ba kasarilaka. Ka yibâ ntangu ko ya bâ na ntembe mu lutwalusu lwandi peleko ya tiyula: ‘Ngano wa matieleka wena ti lutwalusu lo kwe Yehova luta tûka, peleko mabanza kwa mena ma mpangi zita tu twarisa?’ Ngano mbo bâ na lukwikulu mu Yehova na mu organizasio’andi mu ntangu yo ya mfunu? Mvutu mbo zizabakana mu mpila yi bongelaka lutwalusu lutûkaka kwe bantu Nzambi ba kasarilaka bwawu bu. Wamana bâ na lukwikulu mu lutwalusu lu bakaka lumbu ti, mpe wamana lwa tumamana, kampe ka wubâ musamu wa mpasi ko kwe nge mu tumamana mu ntangu ya mpasi ziyôkele. w22.02 6 par. 15

Na lubakusu lwa Yehova Zedeyo na bantu bandi ba 300 babaka muzingu wu baketi bêla na lulendo lwalwingi. Babakala ba mu kanda dia Efrayime bayizi monekena Zedeyo, ka mu mu sîka ko, kâ mu mu bakasa mu bungu ti ka babalomba ko mu kwizi nwana. (Mfu. 8:1) Gideone wabahana tifwani tiasongela bwe Yehova kabasakumunina. Babakala bo bu bawâ misamu mio “bayizi dzuna.” (Mfu. 8:3) Zedeyo wasarila tifu tia kuluka ngatu kasingasa tidzunu ha kati dia kanda dia Nzambi. Mu tifwani tia Bisi-Efrayime, mbo tuta longoka ti ka tufweti’â tadingaka ko mu kengerela mukembo wu batuhanaka yôka mukembo wa Yehova. Bamfumu-kanda na bakuluntu balendi baka malongi mu tifwani tia Zedeyo. Tala ti muntu wufwemene mu bungu dia musamu wu tuyirikiri, tufweti dinga mu zaba mu bungu dia nti kafwemene. Tulendi mpe sîka muntu wo mu bungu dia musamu wa mbote wu kayirika. Mu sila bo, tufweti bâ ba kuluka. Kâ, tima tiyôkele mfunu ni mu bâ na tindiku tia mbote na mpangi zeto, kani tasongela ti beto tuyôkele. w21.07 16-17 par. 10-12

Yehova wasongela ti ntalu twena kwe Yandi bu katusala mu tifwani tiandi. Mu bungu ti Nzambi watusala mu tifwani tiandi, tulendi longoka, mpe tulendi sarila bifu biandi bia toma, ntiana luzolo, tiari tia mutima, tifu tia kwikama na buderede. (Mik. 86:15; 145:17) Bu tukwe sariri ngolo mu bâ na bifu bio, mbo tukembela Yehova, mpe mbo tusongela ti tonda tumutondaka. (1 Pi. 1:14-16) Bu tudiatilaka mu mpila yitâka Tata’eto dia ku mazulu nsayi, mbo tubâka mu nsayi. Bu katusala mu tifwani tiandi, Yehova watuhana lenda dia bâ mpila ya bantu ba kazololo mu kanda diandi. Yehova watukubikila nzo ya nzitukulu. Ntangu zazingi ntete kasala bakala dia ntete, Yehova watikubikila mutoto mu bungu dia bantu. (Yobe 38:4-6; Yer. 10:12) Mu bungu ti nsayi ye nandi mpe kaba kakabaka, Yehova wasala bima biabingi bia toma mu bungu dia beto, ngatu tamona nsayi. (Mik. 104:14, 15, 24) Ntangu zakaka, bu keri banzaka mu bima bi kasala, mbo keri monaka ti bia nkatika bia mbote bieri.​—Mba. 1:10, 12, 31. w21.08 3 par. 5-6

Beto bansoni dema die neto dia samuna na dia kubika milongoki. (Mat. 28:19, 20; Rom. 10:14) Ngano zololo wavutu tomesa mpila’aku ya sala tisalu tio tia mfunu? Bâ na makani ma zabakana bu longokaka na bu sarilaka malongi ma bakaka mu mukanda wa Ndongosolo. Kufweti’â wazimbakana ko ti kani diyôkele mfunu, ni kani dia bâ na bifu bitâka Nzambi nsayi. (Kol. 3:12; 2 Pi. 1:5-8) Ntembe kâni, beto bansoni tuzololo tasarila miamiansoni mi tulenda mu sala tisalu tiatingi mu bungu dia Yehova bwawu bu. Mu nza ya môna, mbo tubâ na lenda dia sarila Nzambi buna bu tuzololo. Kâ, tala ti tusariri ngolo mu misamu mi tulendi yirika lumbu ti, tulendi kurisa nsayi’eto mpe tulendi dimina maniongo meto mamansoni. Mpe musamu wuyôkele mfunu, mbo tukembesa Yehova, Nzambi’eto ya nsayi. (1 Tim. 1:11) Buna, tabêno na nsayi mu madema me neto! w21.08 25 par. 18-20

Tala ti mu kanda die na Mbangi za Yehova wakurila, kampe wayizi longoka mu zaba Yehova tûka buleke bwaku. Bayizi ku longesa ti ni Yandi wasala bima biabiansoni, bifu bia mbote bie nandi, mpe zololo ti mutoto wabâ Paradi. (Mba. 1:1; Bis. 17:24-27) Kâ, bantu babingi balembo kwikilaka ti Nzambi kô kena, peleko batâka ti ka Yandi’â ko wasala bima biabiansoni. Mbo bakwikilaka ti luzingu mu ta-pulukusu kwa lwabatikila, mpe malembe-malembe. Bantu bakaka bakwikilaka misamu mio, ba nkatika ba tanga bena. kampe mbo batâka ti sianse yasongela ti Bibila bungungu ditâka, mpe bantu bê na timinu mu Mvangi ka bakota ko, ka bena na mayela mamingi ko, peleko huna babahunaka. Ni bu sa ti tûka ntama twe Mbangi ya Yehova peleko kâni, beto bansoni tufweti tatamana mu tunga timinu tieto. Tamana sila bo, ka tuwunakana ko kwe bantu batâka ti Bibila bungungu ditâka.​—Kol. 2:8. w21.08 14 par. 1-3

Abele, Noa, Abrahame na Yobe basongela buzitu na luzolo kwe Yehova mu nzila ya tumama kwawu, ya timinu na ya mikayulu mi basa. Bawu batomo hana mukembo kwe Yehova, mpe nsambululu’awu ya keri tambulaka. Ha manima, Yehova wahana misiku kwe bala ba Israele mu nzila ya Mose. Misiku mio miasongela mpe bwe bafweti sila Yehova nsambululu yi kaketi tambula.Ha manima ma lufwa lwa Yezu na ma mvumbukulu’andi, Yehova keri’â vutu dingaka ko ti bantu bazitisa Musiku wa Mose. (Rom. 10:4) Bakristo bafweti landa musiku wa môna, “musiku wa Kristo.” (Nga. 6:2, NWT) Mbo baketi tumamana “musiku” wo, bu baketi landa tifwani tia Yezu na ndongosolo’andi. Ka weri’â zolo tâka ko ti wafwanakana balanda nzanda ntumunu za misamu mi bafweti yirika na mi bafweti lembo yirika. Lumbu ti mpe, Bakristo mbo basaka miamiansoni mi balenda mu landa Kristo ngatu batâ Yehova nsayi mpe babaka tidzunu.​—Mat. 11:29. w22.03 20-21 par. 4-5

Yehova bala bandi ba kawirikilaka. Yandi tusambulu twatwingi kawirikila twa Mwana’andi mu ntangu yi keri ha mutoto. Yandi wawirikila Yezu bu keri mu sambilaka mu bungu dia nzengolo za zinene, ntiana mu ntangu yi kasola ntumwa za 12. (Like 6:12, 13) Yehova wawirikila mpe tusambulu twa Yezu mu ntangu yi keri na lwaka lwalwingi. Ntete bamuteka, Yezu watomo sambila Tata’andi mu bungu dia misamu mia mpasi miaketi mu turila. Yehova keri’â wirikilaka kwa tusambulu twa Yezu ko, kâ watambika mpe mbazi yayika ngolo Mwana’andi wu katomono zolo. (Like 22:41-44) Lumbu ti, Yehova mbo katatamanaka mu wirikila tusambulu twa bisari biandi, mpe mbo kabahanaka mvutu mu ntangu yifwanakane na mu mpila yiyôkele bubote. (Mik. 116:1, 2) Tataleno bwe mpangi yimosi ya yikento ya ku Inde yamwina mpila Yehova yi kahaninaka mvutu mu tusambulu. Lwaka lwalwingi lweri nandi, mpe wasambila Yehova na bunsungu bwabwansoni mu bungu dia musamu’andi. Yandi têle: “JW Télédiffusion ya mai 2019 yazonzela bwe tulendi sa bu tubâka na maniongo mpe na lwaka, tima tieri tiakumfwanaka. Mvutu ya tusambulu twani yeri.” w21.09 21-22 par. 6-7

Ngano lendi banza bwe weri musamu wa mpasi kwe Bakristo ba ntete mu sisa bima biawu na batika luzingu lwa môna? Wafwanakana ti babâ na timinu mu sikirila Yehova mu bungu dia bima bia mfunu bia luzingu. Kâ, ka bakondo’â lubakusu ko. Mivu 5 ntete Bisi-Rome bazungirila Yerusaleme, ntumwa Paulo wahana malongi ema ma mfunu kwe Bahebre: ‘Ndiatulu’eno ka yibândi mu luzolo lwa mbongo. Yangalaleno kwa mu bio bie neno, bungu yandi beni watâ: “Kani kabwe, ka nikubika ko, kani kabwe ka nikuyambirika ko.” Ni bungu dio tulendi tâ na butindi: “Yehova, ni tibakisi tiani. Ka nita mona bunkuta ko. Muntu, nti kalendi kundiyirika.”’ (Ebr. 13:5, 6) Musamu wa fioti weri kwe bô balanda malongi ma Paulo mu yangalala mu bio bieri nawu ni bu sa ti bima bia fioti kwa bieri nawu mu luzingu lwawu lwa môna. Lukwikulu lweri nawu ti Yehova mbo kaketi lungisa nsatu zawu za mfunu. w22.01 4 par. 7, 9

Tulendi tâ ti muntu we na tiari, ni muntu we na nsayi mpe wukabaka. Tulendi banza mpe tinsamu tia tâ Yezu tia Musi-Samaria wa mbote. Bakala dio diatûka ku nsi yakaka, wasongela tiari kwe Muyuda wumosi wu bawuka bima, mpe wu bahana nkuba kwe mivi. Tiari na luzolo biatuma Musi-Samaria wo mu sa miamiansoni mu bukisa Muyuda. (Like 10:29-37) Tinsamu tio mbo tisongelaka tifu timosi tia toma tia Nzambi’eto​—tiari. Nzambi mbo kasongelaka tifu tio mu bungu ti beto kazololo, mpe mbo katusongelaka tio bilumbu biabiansoni mu mpila yi katubongelaka. Mpila yakaka ye kô muntu yi kalendi songela tiari. Muntu wusongelaka tiari wulendi bonga nzengolo ya lembo semba muntu wu bafweti semba. Yehova watusongela mpe tiari mu mpila yo. Titsoniki tia Mikunga tiatâ: “Ka tu bongelaka buna bu têlaka masumu meto ko.” (Mik. 103:10) Kâ, ntangu zakaka Yehova mbo kahanaka nsembolo ya ngolo kwe muntu wusumukini. w21.10 8 par. 1-2

Yehova, luzolo lwandi lwa kwikama kwe bantu kwa bê na tindiku na Yandi kasongelaka lo​—bisari biandi. Tulendi bakula musamu wo mu misamu mia tâ mutinu Davide na mbikuri Daniele. Mu tifwani, Davide watâ: “Tatamana mu songela luzolo lwaku lwa kwikama kwe bô bakuzebi.” “Luzolo lwa kwikama lwa Yehova lwa mankululu lwena kwe bô bamutînaka.” Mpe Daniele watâ: “Ô Yehova Nzambi ya matieleka, [. . .] yisongelaka luzolo lwa kwikama kwe bô bamuzololo mpe batumamanaka ntumunu zandi.” (Mik. 36:10; 103:17; Dan. 9:4) Tintwari na verse zo, Yehova mbo kasongelaka luzolo lwa kwikama kwe bisari biandi mu bungu ti Yandi bazebi, Yandi batînaka, Yandi bazololo, mpe mbo batumamanaka ntumunu zandi. Yehova kwe bisari biandi bia matieleka kwa kasongelaka luzolo lwandi lwa kwikama. Ntete tabatika mu sarila Yehova, mbo tweri bakaka luzolo lu kasongelaka kwe bantu babansoni. (Mik. 104:14) Kâ, bu twena bisari biandi, mbo katusongelaka mpe luzolo lwa kwikama. w21.11 4 par. 8-9

Dingana, nzengolo tubongele ya tumamana misamu mia tâ Yezu mu verse yo. Lumbu ti, bantu babingi bazololo mu wirikilaka mfumu za mabundu ze za zabakana. Mu bungu ti mfumu zo za bazololo, mbo batulaka ha titini tia bahana nsambululu. Bantu babingi bakwendaka ku eglize zawu, basumbaka mabuku mawu mpe bahanaka mbongo zazingi mu ba yika moko na mu yika bimvuka biawu moko. Bantu bakaka mbo bakwikilaka misamu miamiansoni mi tâka mfumu zo za mabundu. Tulendi tâ ti, bu bamonaka mfumu zo za mabundu mbo babâka mu nsayi ntiana bawu kwa bamweni Yezu! Kâ bô basambilaka Yehova ka balandaka bantu ko. Ni bu sa ti mbo tuzitisaka ntwarisi zeto, mbo tulandaka ndongosolo ya Yezu yitâka: ‘Beno bansoni bampangi lwena.’ (Mat. 23:8-10) Ka tuhanaka nsambululu kwe muntu ko, ni bu babâ mfumu za mabundu peleko mfumu za politike. Mpe ka tusingasaka makani mawu ko. Kâ, mbo tutatamanaka mu lembo kota misamu mia politike na mu bâ ba hambana na nza. Mu misamu mio, mbo tusongelaka ti ba swaswana twena na mabundu matâka ti Bakristo bena.​—Za 18:36. w21.10 20 par. 6-7

Mukristo wuzololo mu bâ wa santu wufweti bâ na lukwikulu ti tindiku tiandi na Nzambi tiyôkele mfunu tima ni tima peleko muntu ni muntu. Mpe mu bungu ti nkumbu ya Mbangi za Yehova tulwataka, nzengolo tubongele ya lembo yirika musamu wulendi bebesa nkumbu ya santu ya Yehova. (Lev. 19:12; Iza. 57:15) Kwe bala ba Israele, tambula ti Yehova ni Nzambi’awu mbo weri zolo tâka ti bazitisa misiku miamingi. Levitike 18:4 mbo yitâka: “Lufweti sarila nzengolo zani za mfundusu na misiku miani, mpe lufweti mia landa. Meno ni Yehova Nzambi’eno.” Tikapu tia 19 mbo tizonzelaka mwa “misiku” miango mia Bala ba Israele. Mu tifwani, verse 5-8, 21, 22 mbo zizonzelaka bibulu bi beri hanaka mu mukayulu. Mikayulu miango bafweti mia hanina mu mpila yaketi lembo ‘bebesa tima tia santu tia Yehova.’ Ntangulu ya verse zo, yifweti tu tuma mu tâ Yehova nsayi na mu mu hana mikayulu mia mukembo mi katambula, ntiana bu tutêlaka wo Bahebre 13:15. w21.12 5-6 par. 14-15

Lumbu ti bantu bakwelane ka ntama ko balendi baka ndandu mu binsamu bia bantu bakaka balongoka mu sikirila Yehova. Kampe bantu bakaka ba kwelana bayôkesa ntangu yayingi mu sarila Yehova mu tisalu tia ntangu zazansoni. Lulendi ba lomba malongi tala ti luzololo lwataluzula makani meno. Yo ni mpila yakaka ya songela ti Yehova lusikirilaka. (Bin. 22:17, 19) Bambuka ti makwela kabu diena diatûka kwe Yehova. (Mat. 19:5, 6) Zololo ti bantu ba kwelana bayangalala mu kabu dio. Beno lukwelane ka ntama ko, taluzuleno mpila yi luta natina luzingu lweno. Ngano mbo luta sa miamiansoni mi lulenda mu songela kwe Yehova ti makabu ma kaluhana ma lutomo zoloko? Zonzeno kwe Yehova mu lusambulu. Dingeno mitieno mu Zu diandi milubakisa mu luzingu lweno. Mpe landeno malongi ma lu hana Yehova. Lulendi bâ na lukwikulu ti mbo lubâ na luzingu lwa nsayi mpe lwa toma, tala ti lutungiri makwela meno mu tisalu tia Yehova! w21.11 19 par. 16, 18

Zaki watatamana mu bâ na mabanza ma mbote mu yandi beni. Zaki keri’â banzaka ko ti kanda di kabutukila peleko madema meri nandi mbo meri saka ti kabâ muntu wa wunene peleko wuyôkele mpangi zandi. Mbo keri tâka bantu ba mu timvuka, mpangi zandi za luzolo. (Zaki 1:16, 19; 2:5) Ka songela ko ti yandi wa lunga weri. Malongi ni me: Bambukaka ti beto bansoni bantu ba masumu twena. Ka tufweti’â tabanzaka ko ti tuyôkele bantu ba tulongesaka. Mu bungu dia nti? Tamana songela kwe mulongoki’eto ti ka tuyayanaka ko, lendi kwizi banza ti kani kabwe ka sa lenda ko mu tumamana ntumunu za Nzambi. Kâ na bunsungu bwabwansoni tamana tambula ti ntangu zazansoni ka wubâka musamu wa fioti ko mu landa mitieno mia Bibila, mpe tamana mu bangurila bwe Yehova katubakisila mu telamana misamu mieto mia mpasi, mbo tubakisa mulongoki’eto mu mona ti yandi mpe lendi sarila Yehova. w22.01 11-12 par. 13-14

Bu tutomo kwe banzi ntiana Yezu, mbo tukwizi tomo sarila ntiana yandi, mpe mbo tukwizi tomo bâ ntiana yandi. (Ebr. 1:3) Tulendi banza: ‘Yezu wa lunga wena. Kani kabwe ka ndendi’â nabâ ntiana yandi ko!’ Tala ti ni bo ta banza, bambukila misamu emi. Musamu wa ntete, bakusala mu bâ ntiana Yehova na Yezu. Buna, lendi sola mu landa tifwani tiawu, mpe lendi lenda, ni bu sa ti ka mu mpila ya lunga ko. (Mba. 1:26) Musamu wa nzole, Mpeve santu ni ngolo ziyôkele mu nza. Na lubakusu lwandi, lendi lungisa misamu mi lendi lembo lungisa mu ngolo za nge beni. Musamu wa ntatu, Yehova ka kêlaka ko ti wasongela bifu bia mbutu ya mpeve mu mpila ya lunga. Kâ, Tata’eto die na luzolo wasârisa mvula 1 000 mu bungu dia bantu bê na tivuvu tia bâ ha mutoto mu kwizi bâ ba lunga. (Nza. 20:1-3) Tima ti tu lombaka Yehova lumbu ti ni mu sarila ngolo zeto na mu sikirila lubakusu lwandi. w22.03 9 par. 5-6

Ka mu nzila ya lusambulu’â ko kwa tulendi yikila ngolo tindiku tieto na Yehova. Ndongokolo ya Zu dia Nzambi na tifu tia kwendaka ku tukutakanu bilendi tu bakisa mpe mu pusana kwe Nzambi. Ngano tima tie kô ti lendi sa mu sarila ntangu’aku yi longokaka na yi bâka ku tukutakanu mu mpila ya mbote? Lendi tiyula biyuvu ebi: ‘Ngano nti bisaka ti nabâ na mabanza yeko-yeko bu nibâka ku tukutakanu peleko bu nidingaka mu longoka?’ Ngano lendi baka mbila peleko message mu telefone’aku peleko mu appareil électronique yakaka? Bu bâka ku lukutakanu peleko bu longokaka, tala ti bakuri ti mabanza maku kwakaka mata kwenda, lomba lubakusu kwe Yehova. Kampe ka wubâ musamu wa fioti ko mu tûla maniongo mo ha ndeko na mu tûla mabanza maku mu misamu mia timpeve, kâ wufwanakane wasila bo. Sambila mu baka tidzunu tikengerela mutima’aku kâ mpe tikengerela mbanzulu zaku.​—Flp. 4:6, 7. w22.01 29-30 par. 12-14

Mutinu Uziya wakala malongi. Wakota mu mbuka yimosi mu Tempelo ya Yehova, yeri kotaka kwa Banganga-Nzambi mpe wayêla mu yoka encens. Nganga-Nzambi za Yehova zamutêla: “Uziya, ka wena na nswa ko wa yoka encens mu bungu dia Yehova! Banganga-Nzambi kwa bê na nswa wa yoka encens.” Ngano Uziya nti kasa? Tala ti na kuluka kwakwansoni, watambula malongi mpe waduka mu Tempelo, Yehova mbo kaketi mu lemvokela. Kâ, Uziya wayizi baka nkesi. Mu bungu dia nti kakarila malongi ma beri mu hanaka? Mu bungu ti mutinu weri, kampe wabanza ti nswa weri nandi wa yirika misamu miamiansoni mi keri zoloko. Kâ, Yehova keri’â mwinaka misamu mu mpila yo ko. Mu bungu ti wayirika musamu wu kalembo bêla na nswa, Uziya wayizi baka bwazi, mpe bwazi bo bwafwa nandi. (2 Nta. 26:16-21, NWT) Tifwani tia Uziya titulongese ti, ni bu sa ti nani twena, tala ti tukariri malongi masikamanaka mu Bibila, Yehova ka vutu’â tu tambula ko. w22.02 9 par. 7

Muntu wudiatilaka mu timuntu tia ntama, mabanza na nsalulu za tinsuni zivulu bâka nandi. (Kol. 3:9) Lendi bâ na bwimi, mbo kakulu bakaka nkesi, ka tondaka ko, mpe lulendo lubâka nandi. Lendi zoloko mu tala porno na filme za bunsuza peleko za miangu. Ntembe kâni bifu bia mbote bie nandi, mpe lendi bâ na ngindu yimusembaka mu misamu mia mbi mi katâka peleko mi kayirikaka. Kâ, kena na nsatu yayingi ko mu sa nsobolo mu mbanzulu zandi na mu ndiatulu’andi. (Nga. 5:19-21; 2 Tim. 3:2-5) Bantu ba masumu twena, buna ka kwena muntu ko wulendi katula mbanzulu zeto na nsatu zeto zazansoni za mbi mu mitima mieto. Ntangu zakaka mbo tuyirika peleko mbo tutâ musamu wutuniongesa. (Yer. 17:9; Zaki 3:2) Kâ, bu tukatula timuntu tia ntama, bifu na nsalulu za tinsuni ka bivutu’â tu tuma ko. Mbo tukwizi soba.​—Iza. 55:7. w22.03 3 par. 4-5

Bakuluntu, dingakeno mu mona bifu bia mbote bie na mpangi zeno. Babansoni masumu me nawu; kâ, bifu bia mbote mpe bie nawu bi tulendi zolo. Diangana, ntangu zakaka bakuluntu bafweti hanaka malongi kwe bampangi. Kâ ntiana ntumwa Paulo, bakuluntu bafweti sarilaka ngolo mu lembo tûlaka mabanza mawu mu nzonzolo na mu nsalulu zifwemesaka za muntu. Kani basila bo, mbo wubâ musamu wa mbote, tala ti batûriri mabanza mawu mu luzolo lwe na muntu wo mu Yehova, mu fuki tiandi tia sarila Nzambi na mu lenda die nandi dia yirika mbote. Bakuluntu batûlaka mabanza mawu mu bifu bia mbote bia bantu bakaka, mbo babakisaka mpangi zawu za mu timvuka mu mona ti bawu bazololo. Bakuluntu, bambukeno ti Yehova ka ta dinga ko ti lwabâ ba lunga; mbo kata lu lomba ti lwabâ ba kwikama. (1 Kor. 4:2) Lulendi bâ na lukwikulu ti Nzambi mbo kayangalalaka mu tisalu ti lumusarilaka. Kani kabwe, Yehova ka ‘zimbakana tisalu tieno na luzolo lu lwasongele mu bungu dia nkumbu’andi [ko], bu lwasarisi na bu luta sarisa basantu.’​—Ebr. 6:10. w22.03 31 par. 19, 21