Mars

Ntumwa Piere watindisa mpangi zandi mu sarila makabu mawu peleko lenda diawu mu tindisa mpangi zakaka. Piere watsoneka ti: ‘Muna muntu kahana buna bu têla kabu di kabakiri, mu sarisa bampwana’andi, ntiana bisari bia mbote bia bweso bwa Nzambi bwa mpila na mpila.’ (1 Pi. 4:10) Tufweti saka miamiansoni mi tulenda mu sarila lenda dieto, mpe ka tutînakandi ti bantu bakaka batusila timbanda peleko bizi banôka. Mpe ngatu lwalembo fuluka mu lulendo. (1 Kor. 4:6)Tufweti bambukaka ti lenda ni lenda di lendi bâ neto kabu dia Nzambi diena. Tufweti sarilaka makabu meto mu tunga timvuka, ka wena ko ti mu moneka. (Flp. 2:3) Bu tusarila ngolo zeto na lenda dieto mu sarila luzolo lwa Nzambi, mbo tubâ mu nsayi—ka wuta zolo tâ ko ti tuyôkele bantu bakaka peleko beto babote na bawu, kâ mu bungu ti tuzololo mu sarila makabu meto mu kembela Yehova. w22.04 11-12 par. 7-9

Yezu Matsonoko ma santu ma keri zoloko, mpe mbikululu ye mu Mikunga 40:8 misamu mi keri monaka ku mutima mu bungu dia Zu dia Nzambi yizonzelaka. Verse yitêle: “Ndiyangalale mu sarila luzolo lwaku, O Nzambi’ani, mpe musiku’aku ku kati diani wena.” Buna, wabâ mu nsayi mpe walenda mu sarila Yehova. Beto mpe tulendi bâ mu nsayi mpe tulendi lenda tala ti tutengi Zu dia Nzambi, mpe tubikiri dio diasobesa mitima mieto. (Mik. 1:​1-3) Tintwari na misamu mia tâ Yezu, na tifwani tiandi, tatomeseno ntangulu’eto ya Bibila. Tulendi kwizi tomo bakula verse za Bibila bu tusambila, bu tutanga malembe-malembe, bu tutiyula biyuvu, mpe bu tubonga note. Tulendi sarila lenda dia swasikisa bu tutaluzula misamu mi tutangaka na bunsungu bwabwansoni, mpe bu tusarila mikanda mieto misikamanaka mu Bibila. Mpe tulendi bika Zu dia Nzambi diatusobesa bu tutatamana mu bâ na mabanza ma delakana bu tutangaka. Bu tusarila malongi mô, mbo tukwizi tomo baka ndandu mu ntangulu’eto ya Bibila, mpe mbo tukwizi vutu pusana kwe Yehova.—Mik. 119:17; Zaki 4:8. w23.02 13 par. 15-16

Sola kani di lendi lungisa mpe kubika misamu mu lungisa kani diaku. Bwe lendi bwa sila? Mu tifwani, lendi dinga mu tomesa lenda diaku dia longesa. Na bunsungu bwabwansoni, lendi longoka mukanda wa Tomo tihana mu ntangulu na mu ndongosolo. Bu bakuhanaka devware ku lukutakanu lwa luzingu na tisalu tia Bakristo, lendi lomba mpangi ya yela mu ku wirikila ntete wasa yo ku lukutakanu, mpe kakuhana malongi makubakisa mu sa nsobolo. Ka bakuzabilandi kwa mu nkumbu ya muntu we na lenda dia yirika misamu, kâ ntiana muntu wusalaka na manzangu mamansoni mpe wu balendi sikirila. (2 Kor. 8:22) Ngano bwe tutâ tala ti tima ti tazolo mu longoka tima ti lembolo na tio lenda mu yirika tita tarila? Kubikandi! Ngano Timote wayizi bâ nzonzi ya mbote peleko mulongi wa nzitukulu? Bibila ka ditâka wo ko. Kâ ntembe kâni, malembe-malembe Timote wayizi bâ na lenda diadingi dia nata madema mandi bu keri kwe landi malongi ma Paulo.—2 Tim. 3:10. w22.04 24-25 par. 8-11

Ngano tibulu tia sangi tie na mitu 7 ni nti? Tumweni ti tibulu tio tie ntiana ngo (léopard), kâ malu ma urse me nandi, munwa wa ngolo-mbulu, na mampoka kumi. Bibulu bi bazonzelaka mpe mu Daniele 7 bidimbu ni bio bie nawu. Kâ, bidimbu bi zonzelaka Nzabukusu kwe tibulu timosi kwa biena, kani biabâ kwe bibulu bia biyà. Tibulu tio tia sangi ka timonekesaka kwa guvernema yimosi ko. Batâka ti tibulu tio makanda, mazu na nsi zazansoni tiyâlaka. Buna, tibulu tio tima tia tinene tiyôkele guvernema ni guvernema ya ku nsi yimosi timonekesaka. (Nza. 13:7) Tibulu tio tia sangi, timonekese guvernema zazansoni ze mu nza ziyâlaka tii lumbu ti. (Ekl. 8:9) Mpila yakaka yi basarilaka lutangu lwa kumi ni mu zonzela bima bia lunga. w22.05 9 par. 6

Ngano banani babaka tusakumunu to twa mbote? Ntete-ntete ni yungi dia bantu divuka ku muzingu wa Armagedo, na bala balendi kwizi butuka mu nza ya môna. Kâ Nzabukusu 20 mbo yikanisinaka ti bantu ba fwa mbo bavumbuka. (Nza. 20:​11-13.) Bantu ba kwikama ba sungama bafwa mu ntama na balembolo ba sungama balembo bwa bweso bwa longoka misamu mitariri Yehova, mbo bavumbuka. (Bis. 24:15; Za 5:​28, 29) Ngano wuzololo tâ ti bantu babansoni ba fwa mbo bavumbuka mu ntangu ya luyalu lwa mvula 1 000? Kâni. Bô bakala mu sarila Yehova na miangu miamiansoni ntete lufwa lwawu, ka bavumbuka ko mu baka luzingu. Bweso bweri nawu bwa sarila Yehova, kâ basongela ti ka bafwanakana ko mu baka luzingu ku Paradi ha mutoto.—Mat. 25:46; 2 Tes. 1:9; Nza. 17:8; 20:15. w22.05 18 par. 16-17

Mu nzila ya “ngamba ya kwikama na ya ndwenga,” Yezu wakubika organizasio ya nzitukulu ha mototo mu simbirila nsambululu ya verela. (Mat. 24:45) Ngano bwe bongelaka organizasio yo? Kampe, misamu mia tâ ntumwa Piere kwe Yezu ta banza mie mu verse ya lumbu ti. Ngano kwe taketi bâ tala ti ka tayizi’â kota mu organizasio ya Yehova ko? Mu nzila ya organizasio yo, Kristo miamiansoni kasaka ngatu tabaka bima bie neto nsatu mu tatamana mu bâ ba kwikama kwe Nzambi. Beto kakubikaka mpe ngatu tasala tisalu tia samuna na ngolo zazansoni. Musamu wakaka, beto kabakisaka mpe mu lwata ‘timuntu tia môna,’ ngatu tatâ Yehova nsayi. (Efz. 4:24) Yezu lutwalusu lwa ndwenga kahanaka mu ntangu za mpasi. Ndandu za lutwalusu lo zayizi moneka mu ntangu coronavirus yabatikiri. Bantu babingi mu nza babele lembo zabaka bwe baketi sa, kâ Yezu wasiri ti tabaka malongi ma delakana ngatu tatatamana mu tikengerela. w22.07 12 par. 13-14

Yehova walomba kwe bala ba Israele mu vulu longesaka bala bawu misamu mimutariri. (Lub. 6:​6, 7.) Bibuti bio, bweso bwabwingi bweri nawu mu tilumbu mu zonza na bala bawu na mu ba bakisa mu kurisa luzolo lwa Yehova mu mutima’awu. Mu tifwani, mwana wa bakala ntangu yayingi weri yôkesaka na tata’andi mu kwe kuni bima peleko mu kwe tie bima biyelele. Mwana wa mukento mbo weri yôkesaka ntangu yayingi na nguri’andi mu tunga bima na mu bisalu biakaka bia mu nzo. Mu bungu ti bibuti na bala ntangu yayingi beri yôkesaka tintwari, bweso bweri nawu mu zonzela misamu miamingi mia mfunu. Mu tifwani, lenda dieri nawu dia zonzela mbote ya Yehova na ya dimbitila mu mpila yi keri bakisilaka kanda. Mu nsi zazîngi, bibuti na bala ka balendi’â bayôkesa ntangu yayingi ko mu tilumbu. Bibuti bilendi bâ ku tisalu mpe bala balendi bâ ku lukolo, kâ bibuti bafweti dingaka ntangu yi balendi zonza na bala bawu.—Efz. 5:​15, 16. w22.05 28 par. 10-11

Muntu wusiri masumu ma manene, musiku wa Nzambi kadiataka. Tala ti Mukristo masumu ma manene kayirikiri, fweti pusana kwe Yehova mu lusambulu, mpe fweti kwe monekena bakuluntu ba mu timvuka. (Mik. 32:5; Zaki 5:14) Ngano bakuluntu ntia dema di bâka nawu? Ni Yehova kwa we na lenda dia tomo lemvokela masumu, mpe mu nzila ya nkûlulu katulemvokelaka. Kâ Yehova, wahana dema kwe bakuluntu dia bonga nzengolo mu nzila ya Matsonoko tala ti muntu wusumukini wulendi tatamana mu bâ mu timvuka. (1 Kor. 5:12) Mu misamu mi bayirikaka mu lenda mu sila bo, mvutu za biyuvu ebi badingaka mu baka: Ngano masumu mandi waya kaweyi mo? Ngano wadingiri mu swekela bantu bakaka masumu mandi? Ngano tûka ntama kakwe yiriki masumu mo? Mpe biyôkele mfunu, ngano bidimbu bie kô bita songela ti muntu wo watomono soba mabanza? Ngano bidimbu bie kô bita songela ti Yehova wamulemvokele?—Bis. 3:19. w22.06 9 par. 4

Yezu watindisa milongoki miandi mu landa buderede. (Mat. 5:6) Wuzololo tâ ti tufweti bâ na nsatu yayingi ya bâ ba sungama, ba mbote mpe ba verela ha meso ma Nzambi. Ngano matieleka na buderede bia zololo? Lukwikulu lwe neto ti bia zololo. Bungungu yinaka na misamu miamiansoni mia mbi na mia miangu. (Mik 119:128, 163) Bungungu timuntu tia Satana bumonekesaka, yandi yâlaka nza yi. (Za 8:44; 12:31) Kani dimosi dia Satana ni mu tâ bungungu mu nkumbu ya santu ya Yehova. Satana bungungu kamwangasaka mu Nzambi’eto tûka bu kamukolamana ku Edene. Yandi katâka ti Yehova Ntwarisi ye na bwimi mpe yilembolo na bunsungu yena, yilembo hanaka bima bia mbote kwe bantu. (Mba. 3:1, 4, 5) Bungungu bwa tâ Satana mu Yehova bwatatamana mu bebesa mabanza na mitima mia bantu. Bantu bu basolaka mu lembo zolo matieleka, Satana lenda dibâka nandi mu ba nata mu sarila mpila zazansoni za kondo kwa buderede na mbi.—Rom. 1:​25-31. w23.03 2 par. 3

Bu sarilaka ngolo mu telamana tifu tia tibi, ntangu zakaka lendi vutu kwizi sarila tifu tio. Lendi kwizi bâ na timina peleko na tiari mu bungu ti ntangu yayingi yifwanakane mu lungisa kani diaku. Nti bikubakisa mu korela? Tifu timosi tia mfunu—luzolo mu Yehova. Luzolo lwaku mu Yehova, tifu tia mbote tiena; tifu tiyôkele bubote mu bifu biabiansoni bie naku. (Bin. 3:​3-6) Luzolo lwa ngolo mu Nzambi lulendi ku bakisa mu lenda mu telamana misamu mia mpasi. Bibila luzolo lwa kwikama lwe na Yehova mu bisari biandi divulu zonzelaka. Luzolo lwa kwikama mbo lusongelaka ti Yehova ka zimbakana bisari biandi ko, mpe ka bika ko mu ba zolo. Mu tifwani tia Nzambi bakusarila. (Mba. 1:26) Bwe lendi songela luzolo lwa mpila yo? Mu batika songela ti tonda tondaka. (1 Tes. 5:18) Bilumbu biabiansoni tiyulaka: ‘Bwe Yehova kakunsongelaka luzolo?’ Ha manima, tonda Yehova mu tusambulu twaku, bu zonzela misamu mi kayirikiri mu bungu dia nge. Bakula ti Yehova misamu mia mbote kayirikiri mu bungu dia nge mu bungu ti nge kazololo. w23.03 12 par. 17-19

Yezu wabongela ntumwa za 12 na nsayi mpe na luzolo lwalwansoni. Ngano ntia malongi tuta baka? Nguria musamu ka wena ko kwa mio mi yirikaka bantu bakaka, kâ mpe mvutu yi tuhanaka mu makuba mawu peleko mu mfwemoso zawu. Bu tubâka na nkesi mu bungu dia mpangi’eto, tulendi tiyula: ‘Mu bungu dia nti musamu wu kayirikiri wutomono kumfwemesa? Ngano fwema ko kusongele ti tifu tia mbi tie nani ti mfweti tomesa? Ngano muntu wukumfwemese lendi bâ na musamu wuta mu kwamisa? Ni bu sa ti mpemba ye nani bu mfwemene, ngano ndendi songela luzolo lwa kondo bwimi bu niyôkesa kwa musamu wo?’ Bu tuvulu kwe bongele bampwana’eto na luzolo, mbo tutomo kwizi songela ti milongoki mia Yezu mia matieleka twena. Tifwani tia Yezu mbo titulongesaka mpe mu bakula mpangi zeto. (Bin. 20:5) Wa matieleka Yezu lenda dieri nandi dia tanga mitima. Ka twena na lenda dio ko. Kâ, tulendi sarila luvivululu mu mpangi zeto bu batufwemesaka. (Efz. 4:​1, 2; 1 Pi. 3:8) Musamu wa fioti wena mu sila bo tala ti tudingiri mu zaba ntûkulu zawu. w23.03 30 par. 14-16

Satana lendi sarila timbevo tia ngolo tilendi tu nata ku lufwa bu kayêlaka mu tu nata mu diata mitieno mia Yehova. Badoktere peleko bantu ba kanda dieto balembolo Mbangi za Yehova balendi tu sa tiya mu diata musiku wa Nzambi bu badingaka ti tatambula batuyika menga. Peleko muntu wulendi dinga mu tu wisa mu tambula mpila ya bukila yilembo delakanaka na mitieno mia Bibila. Ni bu sa ti ka tuzololo’a ko tafwa, tuzebi ti Yehova ka bika ko mu tu zolo ni bu sa ti luzingu lweto lusukiri. (Bisi-Rome 8:​37-39.) Yehova ndiku zandi katatamanaka mu sila nsimu bu zifwaka, ntiana kwa bawu bê ba moyo. (Like 20:37) Timina die nandi dia ba vumbula kwe bafwa. (Yobe 14:15) Yehova wafuta ntalu yayingi ngatu tabaka ‘luzingu lwa mankululu.’ (Za 3:16) Tuzebi ti Yehova beto katomono zolo mpe beto kakipaka. Buna, kani tabika Yehova bu tubâka na timbevo peleko bu batukanikinaka lufwa, butindi tumulombaka, ndwenga na ngolo.—Mik. 41:3. w22.06 18 par. 16-17

Bibila ditêle: ‘Tîna Yehova ni mbatukulu ya ndwenga, mpe luzabu lwa Wô Yôkele Busantu, mô ni mayela.’ (Bin. 9:10) Buna, mu ntangu yi tufweti bonga nzengolo ya mfunu, tufweti ya sikamasa mu mbanzulu za Yehova—‘luzabu lwa Wô Yôkele Busantu.’ Tulendi bwa sa bu tulongoka Bibila na mikanda misikamanaka mu Bibila. Bu tusila bo, mbo tusongela ndwenga za matieleka. (Bin. 2:​5-7) Yehova kwa lendi tu hana ndwenga za matieleka. (Rom. 16:27) Mu bwe tulendi têla ti ndwenga kwe Yehova zitûkaka? Musamu wa ntete, bu kena Mvangi, luzabu lwandi mu bima bi kasala ka lwena na ndilu ko. (Mik. 104:24) Wa nzole, nsalulu zazansoni za Yehova ndwenga zandi zisongelaka ti. (Rom. 11:33) Wa ntatu, ntangu zazansoni malongi ma ndwenga ma Yehova ndandu manataka kwe bô basarilaka mo. (Bin. 2:10-12) Tala ti tuzololo tabaka ndwenga za matieleka, tufweti tambula misamu mio mia nguri mia matieleka, mpe tufweti bika miatwarisa nzengolo zeto na ndiatulu’eto. w22.10 19 par. 3-4

Mu nzonzolo ya Nzabukusu 12, Satana wahombesa muzingu wo, mpe yandi na bademo bandi babalosa ha mutoto. Buna mpasi zakota ha mutoto, mu bungu ti Satana nkesi zazingi ze nandi mpe bantu kanwanisaka.” (Nza. 12: 9-12) Ntia ndandu tulendi baka mu mbikululu zo? Misamu mia mu nza na nsobolo za ndiatulu za bantu beto zibakisa mu bakula ti Yezu wayika Mutinu. Buna kani tabâka mu nkesi mu ntangu bantu yi batubongelaka na bwimi mpe na diki, bambuka tubambukaka ti misamu mio mbikululu za Bibila milungisaka. Tabambukaka ti Timfumu tiabatika mu yâla! (Mik. 37:1) Mpe tulendi kêla ti misamu mia mu nza miavutu tomo beba bu tuta kwe pusane na Armagedo. (Mak. 13:8; 2 Tim. 3:13) Tata’eto dia luzolo die ku mazulu tutomo tondaka mu lubakusu lu katuhanaka mu bakula mu bungu dia nti kwe misamu miamingi mia mpasi mu nza. w22.07 3-4 par. 7-8

Tulendi lomba kwe Yehova kabakisa mpangi zeto za timvuka mu korela bimbevo, catastrophes naturelles, mizingu, nkwamusu peleko misamu miakaka mia mpasi. Tulendi sambila mpe mu bungu dia mpangi zeto zitihanaka mu hana lubakusu kwe bô bê na lo nsatu. Kampe bantu zebi bata bwabana na misamu mia mpila yo. Ngano lendi tâka nkumbu zawu mu tusambulu twaku? Luzolo lwa matieleka tusongelaka bu tulombaka kwe Yehova kababakisa mu korela. Mpangi ze na madema mu timvuka mbo zitondaka bu basambilaka mu bungu dia bawu, mpe tusambulu twa mpila yo bawu tubakisaka. Ntumwa Paulo wazaba ti nsatu tusambulu twa bampwana’andi yeri nandi. Watsoneka ti: ‘Sambileno mpe mu bungu dia meno, ngatu nabaka misamu mi nitâ bu nizibula munwa, ngatu nalenda mu zonza na butindi mu ntangu yi nizabikisa nsweki ya santu ya nsangu za mbote.’ (Efz. 6:19) Lumbu ti mpe, mpangi zazingi ze neto zisalaka tisalu tia ngolo, mpe ze na madema ha kati dieto. Luzololo tubasongelaka bu tulombaka kwe Yehova kasakumuna tisalu tiawu. w22.07 23-24 par. 14-16

Tinwani mpu tilwataka mu kengerela mutu’andi. Mu muzingu’eto wa timpeve, tufweti kengerela mbanzulu zeto mu ntontolo za Satana. Mpila zazingi kasarilaka mu tu tonta na mu bebesa mbanzulu zeto. Ntiana kwa mpu yikengerelaka mutu wa tinwani, tivuvu tieto mbanzulu zeto tikengerelaka ngatu tatatamana mu bâ ba kwikama kwe Yehova. Tala ti tivuvu tieto ka tiena ngolo ko, mpe tubikiri mbanzulu za tinsuni zabâ ha tibuka tia ntete mu luzingu lweto, tulendi zimbakana kani dia luzingu lwa mankululu. Tabongeno tifwani tia Bakristo bakaka beri bâka ku Korente. Bayizi hombesa timinu mu kani dia mfunu dia Nzambi—tivuvu tia mvumbukulu ya ba fwa. (1 Kor. 15:12) Paulo watâ ti bantu balembolo na tivuvu mu mvumbukulu ya ba fwa, nsatu za bawu beni kwa badingaka mu lungisa. (1 Kor. 15:32) Lumbu ti bantu babîngi balembolo na tivuvu mu makani ma Nzambi, miamiansoni mi balenda basaka mu bâ na luzingu lwa nsayi bwawu bu. Kâ, beto lukwikulu lweto tutûlaka mu kani dia Nzambi ditariri bilumbu bia ku matu. w22.10 25-26 par. 8-9

Yehova ku lombele mu mu sambilaka. Misamu miaku mia kamonaka, mpe zololo wakwikila ti mbo kawirikila tusambulu twaku ntangu zazansoni. Nsayi yibâka nandi bu kawirikilaka bisari biandi. (Bin. 15:8) Ntia musamu lendi sambirila bu timonaka nge kaka? Ziburila Yehova mutima’aku. (Mikunga 62:8) Mu zonzela maniongo maku, mpe bwe monaka ku mutima. Lomba kwe Yehova kakubakisa mu telamana mbanzulu zaku mpe kakuhana butindi bwe naku nsatu mu zonza. Lendi mu lomba mpe ndwenga za bangurila nkwikulu zaku na buzitu bwabwansoni. (Like 21:​14, 15) Tala ti na mbanzulu za mbi ta nwana na zo, lomba kwe Yehova kakubakisa mu zonzela zo kwe Mukristo wa yela. Lendi lomba mpe lubakusu kwe Yehova mu bungu dia muntu wukuwirikila ngatu kakubakula. Tala bwe kata hanina mvutu mu tusambulu twaku, mpe tambula lubakusu lwa bantu bakaka; kuvutu’â tomo timona nge kaka ko. w22.08 10 par. 6

Timvuka tia môna tia Tesalonike tiabwabana na nkwamusu za ngolo. Bantu beri ba telamanaka “banata mpangi zakaka kwe mfumu za hata.” (Bis. 17:6) Ngano lendi bakula bunkuta bweri na Bakristo bô ba môna? Luhemo lwawu mu tisalu tia Yehova mbo lwaketi dimina, kâ ntumwa Paulo keri’â zoloko ko ti musamu wo watula. Bawu basa ti timvuka tio tia môna tiabâ na tikolela tia mbote. Paulo wabambula kwe Bisi-Tesalonike: ‘Tatambikiri Timote, mpangi’eto [. . .], mu lu siamisa na mu tindisa timinu tieno, ngatu kani muntu kalembo teketa ha kati dia matimuna ma bwawu bu.’ (1 Tes. 3:​2, 3) Ntembe kâni, Timote wamona bwe Paulo keri yikilaka ngolo mpangi za ku Listre. Mu bungu ti wamona lusakumunu lwa hana Yehova, kampe Timote wayika mpangi zandi lukwikulu ti misamu mbo mitoma mu bungu dia bawu mpe.—Bis. 14:​8, 19-22; Ebr. 12:2. w22.08 21 par. 4

Ku nsuka ya mbandu ya 19, tikunku tia Milongoki mia Bibila, tieri na ntwarisi yeri na nkumbu Charles Taze Russell, tiabatika ndongokolo ya Bibila na bunsungu bwabwansoni. Weri nawu bazaba mfunu ya mukayulu wa Yezu na mu zaba mpila yi bafweti kembela lufwa lwandi. Lumbu ti, ndandu tubakaka za ndongokolo zo. Ngano bwe? Tayizi bakula nsasa ya mukayulu wa Yezu na ndandu zi tubaka mu nzila ya mukayulu wo. (1 Za 2:​1, 2) Tayizi longoka mpe ti Bibila bivuvu biole dizonzelaka mu bungu dia bantu bayangirikaka Nzambi—luzingu lwa kondo lufwa ku mazulu na luzingu lwa mankululu ha mutoto mu bungu dia bantu. Kwe Yehova tutomo pusanaka bu tubakulaka luzolo lwe nandi mu beto, mpe bwe tubakilaka ndandu za mukayulu wa Yezu mu luzingu lweto. (1 Pi. 3:18) Buna, ntiana mpangi za kwikama za ntama, bantu bakaka tutikisaka mu kwizi kembela Mbambukulu ya lufwa lwa Yezu na beto mu mpila ya sa longesa Yezu. w23.01 21 par. 6-7

Yezu walongesa tusakumunu tu nata Timfumu tia Nzambi. Matondo tuvutulaka mu bungu dia nkûlulu, mu bungu ti bweso yituhanaka bwa bâ na tindiku tia ngolo na Yehova, na Yezu. Bô basarilaka timinu mu Yezu, tivuvu tie nawu tia zinga mankululu na tia vutu mona bantu ba bazolo bafwa. (Za 5:​28, 29; Rom. 6:23) Ka tasa tima ko mu baka tusakumunu tô; kani kabwe ka tulendi’â tafuta Nzambi na Kristo ko mu mio mi bayirika mu bungu dia beto. (Rom. 5:8, 20, 21) Kâ, tulendi songela ti bawu tutomo ba tondaka, Bu tukwe sariri bimvwama bieto mu kurisa tisalu tia Timfumu. Mu tifwani, tulendi sarila lenda dieto mu bakisa mu ntungulu ya Nzo za Nsambululu na mu kipaka zo. w23.01 26 par. 3; 28 par. 5

Kâ, bô bayâla mu Timfumu tia Nzambi lubakusu bahana mu kipa miliare za bantu mu nza yayansoni. Diangana, bweso bwa bunene Yahova kahanaka kwe bantu 144000! Ntiana Yezu, bantu 144000 Mitinu babâ na Banganga-Nzambi. (Nza. 5:10) Mu ntangu ya Musiku wa Mose, ni Banganga-Nzambi batoko bâ na dema dia kengerela tikolela tia bantu, na dia ba bakisa mu bâ penepene na Yehova. Musiku wa Mose tifwani tieri tia misamu miaketi tula, buna wa delakana wena mu tâ ti bantu bayâla na Yezu mbo babakisa bantu mu bâ na tikolela tia mbote, na mu bâ na tindiku na Yehova. (Ebr. 10:1) Tufweti kêla mu zaba bwe mitinu mio mibâ mpe Banganga-Nzambi bazonzela na bantu babâ mu lutumu lwa Timfumu ha mutoto. Misamu ni misamu mi yirika Yehova, tulendi bâ na lukwikulu ti ku Paradi bantu mbo babaka malongi mabâ nawu nsatu.—Nza. 21:​3, 4. w22.12 11 par. 11-13

Musamu wumosi wusaka ti tatikisa bantu bakaka mu kembela Mbambukulu na beto, ni mu bungu ti tuzololo ti bantu ba tutikisaka mu mbala ya ntete, balongoka matieleka matariri misamu mia yirika Yehova na Yezu mu bungu dia beto. (Za 3:16) Tivuvu tie neto ti misamu mi bamona na mi bawâ ku Mbambukulu, mbo mibatuma mu longoka misamu miakaka na mu kwizi bâ bisari bia Yehova. Bantu babika mu sarila Yehova mpe tutikisaka. Mbo tusilaka bo mu ba bambula ti Nzambi bawu kwa kazololo. Babingi mu bawu bakwizaka ku Mbambukulu, mpe nsayi yibâka neto mu ba mona. Mbambukulu mbo yibabambulaka nsayi yeri nawu bu beri sarilaka Yehova mu ntama. (Mik. 103:​1-4) Bantu ni batambula ni bakala mu kwiza, bawu tutatamanaka mu tikisa ku Mbambukulu mu bungu ti tuzebi ti Yehova bantu kakipaka.—Like 15:7; 1 Tim. 2:​3, 4. w23.01 20 par. 1; 22-23 par. 9-11

Mu mpimpa ntete lufwa lwandi, Yezu wasa ndombolo ya nzitukulu kwe Tata’andi dia ku mazulu. Walomba Yehova kakengerela milongoki miandi. (Za 17:​15, 20) Ntangu zazansoni Yehova mbo keri kipaka mpe mbo keri kengerelaka kanda diandi. Kâ, Yezu wazaba ti milongoki miandi mbo miaketi bwabana na nkwamusu za ngolo zaketi tûka kwe Satana, zi balembo toko bwabana na zo. Yezu wazaba mpe ti, mbo baketi bâ na nsatu lubakusu lwa Yehova mu telamana miangu mia ngolo mia Diabulu. Lumbu ti, nza yi ya Satana mbo yinatinaka misamu miamingi mia mpasi kwe Bakristo ba matieleka. Mbo tubwabanaka na misamu milendi tu nôkesa, kâ mpe mikotesaka tifu tieto tia kwikama mu ntontolo. Kâ ka tufweti’â tabâ na bunkuta ko. Yehova beto kakengerelaka—misamu mi tuta bwabana na mio mia kamonaka, mpe wa nguria wa kubama wena mu tu bakisa mu telamana mio. Yee, Yehova “mbo [ka]kengerelaka bô bamutînaka [. . .] mu ba kûla.”—Mikunga 33:​18-20. w22.08 8 par. 1-2

Mivu miamiansoni mu ntangu ya Mbambukulu, matondo tuvutulaka mu misamu mia yirika Yezu bu tubongaka ntangu ya dimbitila mu lusambulu mu mfunu ya lufwa lwandi. Tisalu tieto tia samuna tuzoloko mpe mu kurisa ngatu tatikisa bantu babingi ku Mbambukulu. Mpe, wa matieleka, miamiansoni tusaka ngatu ka kubândi tima titukabakasa mu bâ ku Mbambukulu. Ku Mbambukulu, tinzonzi tuwâka tisikamanaka mu Bibila tihanaka mvutu za delakana mu biyuvu biakaka. Mbo tukwizi longokaka mu bungu dia nti nza ye na nsatu nkûlulu mpe bwe lufwa lwa muntu mosi lulendi katula masumu ma bantu babingi. Nsasa ya dimpa na vinu batubambulaka , mpe nani fweti bia dia. (Like 22:​19, 20) Mu tusakumunu tuta kêla bô bê na tivuvu tia bâ ha mutoto tudimbitilaka mpe. (Iza. 35:​5, 6; 65:​17, 21-23) Diangana matieleka mo mafweti tatamana mu bâ mfunu kwe beto. w23.01 20 par. 2; 21 par. 4

Nzambi watuhana bweso bwa baka luzingu lwa mankululu, bu kahana mwana’andi mu nkûlulu mu zibika masumu meto. (Mat. 20:28) Ntumwa Paulo watsoneka: ‘Diangana, lufwa lwayizila mu muntu wumosi; mvumbukulu ya ba fwa mpe mu muntu wumosi yayizila. Diangana, ntiana’eti babansoni bu bafwaka mu Adame, ni bo mpe babansoni babaka luzingu mu Kristo.” (1 Kor. 15:​21, 22) Yezu walongesa kwe milongoki miandi mu sambila ngatu Timfumu tia Nzambi tizi mpe ngatu luzolo lwa Nzambi lwasalama ha mutoto. (Mat. 6:9, 10) Buna mu kani diandi, Nzambi zololo mpe ti bantu bazinga mankululu ha mutoto. Ngatu walungana, Yehova watûla Mwana’andi Mutinu wa Timfumu tiandi. Nzambi wasola bantu 144 000 ha mutoto, basala na Yezu mu lungisa luzolo lwa Nzambi.—Nza. 5:​9, 10. w22.12 5 par. 11-12

Bu tufwiluluku muntu wu tuzololo, mbo tumonaka ti bulu dia dinene kasisiri mu mutima’eto! Ha mbatukulu, tulendi bâ mu tiari, nsungula tala ti mpasi katokolo mona ntete kafwa. Kâ, ntangu bu yikwe yôke, tulendi bâ mu nsayi bu tubambukila tima ti katulongesa peleko musamu wu katâ mu tu tindisa peleko mu tu tâ nsayi. Mpila mosi mpe, tulendi bâ mu tiari bu tutangaka mpasi za mona Yezu ntete lufwa lwandi. Mu ntangu ya Mbambukulu, ntangu tuvulu bongaka mu dimbitila mu mfunu ya mukayulu wa nkûlulu. (1 Kor. 11:​24, 25) Kâ, nsayi yayingi yibâka neto bu tudimbitilaka mu misamu mia tâ Yezu na mi kayirika bu keri ha mutoto. Tuzololo mpe mu dimbitila mu mio mi kayirikaka lumbu ti, na mu mio mi kayirika mu bilumbu bita kwiza. w23.01 26 par. 1-2

Milongoki tiari tiatingi tieri nawu Yezu bu kafwa. Ka bahombesa kwa muntu wu bazolo ko, kâ bamona mpe ti ka kwa vutu’â sâla tivuvu ko mu bungu dia bawu. (Like 24:​17-21) Kâ, Yezu bu kayizi ba monekena, wabonga ntangu ya ba bakisa mu bakula bwe keri lungisilaka mbikululu za Bibila. Yandi wabahana mpe tisalu tia mfunu. (Like 24:​26, 27, 45-48) Yezu bu kamana naka ku zulu, milongoki ka miavutu’â bâ mu tiari ko, kâ bayizi bâ na nsayi yayingi. Nsayi yayingi yeri nawu bu bazaba ti Mfumu’awu wa moyo weri, mpe wa kubama weri mu ba bakisa mu sala tisalu tiawu tia môna. Nsayi’awu yabatuma mu tatamana mu kembela Yehova. (Like 24:52, 53; Bis. 5:42) Mu landa tifwani tia milongoki mia Yezu tufweti tûlaka Timfumu tia Nzambi ha tibuka tia ntete mu luzingu lweto. Ni bu sa ti tifu tia korela tie neto nsatu mu tatamana mu sarila Yehova, Yandi tu kanisini ti mbo katusakumuna tala ti tusiri bo.—Bin. 10:22. w23.01 30-31 par. 15-16

Wa matieleka, ka tuzololo’â ko tabwa mu mutambu wa bwa Adame na Eva. Tulendi sa keba mu mutambu wo, bu tutatamana mu longoka mu zaba Yehova, mu zolo bifu biandi na bu tuyêla mu bakula mbanzulu zandi. Tamana sila bo, luzolo lweto mu Yehova mbo lukula. Tazonzeleno Abrahame. Yehova yandi keri tomo zoloko. Ni bu sa ti musamu wa mpasi wabâ kwe yandi mu bakula nzengolo za Yehova, Abrahame keri’â kolamaka ko. Kâ, nsatu yabâ nandi mu zaba Yehova mu mpila yiyôkele. Mu tifwani, bu kawâ ti Yehova wabonga nzengolo ya fukisa Sodome na Gomore, ntete Abrahame watîna ti Mfundisi ya mutoto wa mukaka kafukisa bantu ba sungama na bankwa-mbi ha timosi. Abrahame wamona ti musamu wo ka wadelakana ko, buna na kuluka kwakwansoni wayula biyuvu kwe Yehova. Na luvivululu lwalwansoni, Yehova wamuhana mvutu. Ku nsuka, Abrahame wayizi bakula ti Yehova mutima wa muna muntu kataluzulaka, mpe kani kabwe ka lendi’â kafukisa bantu ba sungama na bankwa-mbi ha timosi ko.—Mba. 18:​20-32. w22.08 28 par. 9-10

Mu 455 N.M.B., guvernere Nehemi bu kamana vutu tunga bibaka bia ku Yerusaleme, wadinga bantu ba beri kwikilaka baketi kipa mumvuka. Mu bantu ba sola Nehemi mweri na mfumu ya mbuka ya ngolo, Anania. Bibila Anania dizonzelaka ntiana muntu wu weri tomo kwikila mpe wutînaka Nzambi yôka bantu babingi. (Neh. 7:2) Luzolo mu Yehova na bunkuta bwa lembo fwemesa mutima’andi biatuma Anania mu lungisa madema mandi na bunsungu bwabwansoni. Bifu bio beto bibakisa mu bâ bantu ba balendi sikirila mu tisalu tia Nzambi. Tataleno tifwani tia Tisike, weri muntu ntumwa Paulo wu keri tomo kwikilaka. Paulo wasikirila Tisike mpe wamutâ tisari tia kwikama. (Efz. 6:​21, 22) Paulo wamusikirila mu hana mikanda kwe bampangi ba ku Efeze na ba ku Kolose, kâ mpe mu ba tindisa na mu ba yika ngolo. Tisike beto kabambulaka bantu ba kwikama, ba tulendi sikirila bakipaka nsatu zeto za timpeve lumbu ti.— Kol. 4:​7-9. w22.09 9-10 par. 5-6

Yozefe wabwabana na misamu mia nguria mia mpasi miazingila mvula 13. Kampe Yozefe watiyula tala ti Yehova yandi keri tomo zoloko, mpe tala ti Yehova wamuyambirika bu keri na nsatu lubakusu. Kâ Yozefe ka yizi’â lunda diki ko. Kani kasila bo, watatamana mu bâ na mabanza ma delakana, bu katatamana mu bâ wa dzuna. Bu kabwa bweso bwa karisila mbi kwe bayaya bandi, watiyimina mu sila bo, wabasongela luzolo, mpe wabalemvokela. (Mba. 45:​4, 5) Yozefe wasarila mu mpila yo mu bungu ti lenda dieri nandi dia bâ na mbanzulu za mbote. Keri’â tûlaka mabanza mandi mu misamu miandi mia mpasi ko, kâ watûla mabanza mandi mu mio mieri zoloko Yehova. (Mba 50:​19-21.) Ntia malongi tuta baka? Tala ti bakubongele mu mpila ya mbi, kubakilandi Yehova nkesi, mpe kutiyulandi tala ti kuyambirikiri. Kani wasila bo, dimbitila mu mpila yi kakubakisilaka mu korela ntontolo. Mpe bantu bakaka bu bakubongelaka mu mpila ya mbi, yêlaka mu zibika masumu mawu mu luzolo. w22.11 21 par. 4

Mbikuri Daniele wamona timona-meso tiatomo songela ti lutumu lwa Yehova luyôkele lutumu ni lutumu. Daniele watoko mona bibulu biyà bia binene bimonekesaka tuyalu tuyôkele ngolo mu nza: Babilone, Medo-Perse, Grese na Rome, mpe na lutumu luyôkele ngolo mu nza luta yâla lumbu ti, Anglo-Américain. (Dan. 7:​1-3, 17) Ha manima, Daniele wamona Yehova wazakala ha muyâlu’andi ku mazulu. (Dan. 7:​9, 10) Nzambi wabonga lutumu lwalwansoni lwa guvernema za bantu, mpe wahana lo kwe bantu bakaka bafweti bâ na lo mpe bê na ngolo zazingi. Ngano kwe banani? Kwe “wô we ntiana mwana muntu,” Yezu Kristo na kwe “basantu ba Muntu Watomo Zangama,” Bakristo 144000 bayâla “mankululu.” (Dan. 7:​13, 14, 18) Diangana, “Yandi Watomo Zangama” ni Yehova.” Musamu wa mona Daniele mu timona-meso wudelakane na musamu wu katoko tâ. Daniele watâ ti Nzambi ya ku mazulu “bwisaka mitinu mpe zakasaka mitinu.”—Dan. 2:​19-21. w22.10 14-15 par. 9-11