Juin

Yobe luzingu lwa mbote lweri nandi. Tindiku tia mbote tieri nandi na Yehova. Kanda diadinene dieri nandi diaba mu bumosi, mpe nkatika mvwama yeri. (Yobe 1:​1-5) Kâ, mu tilumbu timosi kwa, Yobe wahombesa bima biabiansoni. Ntete, wahombesa bimvwama biandi. (Yobe 1:​13-17) Ha manima, bala bandi babansoni ba keri zoloko bayizi fwa. Buna banza’eti mpasi maniongo na tiari tieri na Yobe na mukento’andi bu bawâ ti bala bawu ba 10 bafwiri. Ka weri’â wa nzitukulu ko mu ntangu Yobe yi katenda binkuti biandi bu kasa dizi, mpe yi kabwa ha mutoto! (Yobe 1:​18-20) Satana wahana timbevo tia ngolo kwe Yobe, mpe wasa ti bantu ka bavutuandi mu zitisa. (Yobe 2:​6-8) Ku mbatukulu, Yobe zitisa beri mu zitisaka. yandi beri kwizi mu monekenaka mu mu lomba malongi. (Yobe 31:18) Ha manima, babatika mu mu dioka. Mpangi zandi, ndiku zandi na bisari bia yandi beni mpe bamulosa!—Yobe 19:​13, 14, 16. w22.06 21 par. 5-6

Ha manima ma bateme, beto bansoni tufweti landa malongi ma hana Paulo kwe Bakristo ba ku Efeze. Wabatindisa mu kwizi bâ Bakristo ba yela. (Efz. 4:13) Mu mpila yakaka watâ: ‘Tatamaneno mu kula.’ Diangana Yehova Yandi tomo zoloko. Kâ luzolo lwaku mu Yandi lulendi vutu tomo kula. Ngano bwe? Ntumwa Paulo wazonzela mpila yimosi mu Bisi-Filipe 1:9. Paulo wasambila ngatu luzolo lwa Bisi-Filipe ‘lwatomo sampa.’ Buna, tulendi kurisa luzolo lweto mu Yehova. Tulendi lwa kurisa bu tubaka luzabu lwa matieleka na lenda dia swasikisa dia lunga. Luzabu lweto mu Yehova bu lukwe kuri, luzolo lweto mpe mu Yandi mbo lukwe kuri, mpe mbo tukwizi zolo timuntu tiandi na mpila yi kayirikilaka misamu. Nsatu’eto ya mu tâ nsayi mbo yikula, mpe kani kabwe ka tuzolo’â ko mu mu niongesa. Mbo tusarilaka ngolo mu bakula luzolo lwandi, mpe bwe tulendi lwa sarila. w22.08 2-3 par. 3-4

Buna, misamu mi batsoneka mu mukanda wo ka batsoneka mio ko mu bungu dia bantu babansoni, kâ mu bungu dia beto twe bisari bia Nzambi. Bu twena kanda dia Nzambi, ka tufweti’â tayitukuku ko bu tukwizi bakulaka ti mbo tusalaka mu ndungananu za mbikululu ze mu mukanda wa Nzabukusu. Ntumwa Za wazonzela ntangu yaketi lungana mbikululu yo. Yandi watâ: “Mu nzila ya mpeve santu, nayizi bâ mu tilumbu tia Mfumu.” (Nza. 1:10) Za bu katsoneka misamu mi mu 96 M.B., “tilumbu tia Mfumu” ka tiatibatikila ko. (Mat. 25:​14, 19; Like 19:12) Kâ tintwari na mbikululu za Bibila, tilumbu tio tiabatika mu 1914 mu ntangu Yezu yi kayizi bâ Mutinu ku mazulu. Tûka muvu wo, mbikululu ze mu Nzabukusu, zitariri kanda dia Nzambi, zabatika mu lungana. Wa matieleka, lumbu ti “mu tilumbu tia Mfumu” twena!—Nza. 1:3. w22.05 2 par. 2-3

Ba bole babalosa ba moyo ku zanga dia tiya mpe die na sufre. Guvernema zo ze mbeni za Nzambi mbo zitatamana mu tuma mu ntangu yi bakwizi za fukisa mankululu. Ngano bwe wuta zolo tâ mu bungu dia beto? Bu twena Bakristo, tufweti bâ ba kwikama kwe Nzambi na kwe Timfumu tiandi. (Za 18:36) Ka tufweti’â takotaka misamu mia politike mia nza yi ko. Wulendi bâ musamu wa nkatika mpasi mu lembo kota misamu mia politike mu bungu ti guvernema za nza yi mbo zizoloko ti tabayika moko mu nzonzolo na mu nsalulu. Bô bakwizi tambulaka mu tiya tu babasaka, mbo bakwizi bakaka tidimbu tia tibulu tia sangi. (Nza. 13:​16, 17) Muntu wubaka tidimbu tio, Yehova ka vutu’â mu tambula ko, mpe kabaka luzingu lwa mankululu ko. (Nza. 14:​9, 10; 20:4) Buna, mfunu wena kwe beto mu lembo kotaka misamu mia politike, ni bu sa ti batusiri tiya kwe guvernema mu ba yika moko! w22.05 10-11 par. 12-13

Kani dimosi di lendi bâ naku ni dia longoka tisalu tilendi bakisa. Tamana kurisa lenda dieto, mbo tubâ ba kubama mu baka madema makaka. Dimbitila mu nzanda bisari bidinganaka mu tunga Betele, Nzo za tukutakanu twa tunene na Nzo za Nsambululu. Mpangi zazingi zayizi longoka mu zaba bisalu bu beri salaka tintwari na mpangi zakaka mu bisalu bio. Lumbu ti, bampangi ndongosolo babakaka mu kipa nzo za tukutakanu twa tunene na Nzo za Nsambululu. Mu mpila zo na zakaka, Nzambi’eto Yehova, “Mutinu wa ntangu zazansoni,” na Yezu Kristo, Mutinu wa mitinu, mbo bayirikaka misamu mia nzitukulu mu nzila ya bisari bie na lenda. (1 Tim. 1:17; 6:15; Bin. 22:29.) Tuzololo tasala ngolo mpe tasarila bisalu bi tuzebi mu kembesa Yehova, kani tatikembesa beto beni.—Za 8:54. w22.04 24 par. 7; 25 par. 11

Salomo bimvwama biabingi bieri nandi, mpe nzo ya nkatika ya toma yeri nandi. (1 Mit. 10:​7, 14, 15) Ku lweka lwakaka, Yezu keri’â na bima biabingi ko, mpe keri’â na tibuka tia bêla ko tia zabakana. (Mat. 8:20) Kâ, bantu bo bâ bole mabanza ma delakana meri nawu mu bima bia tinsuni, mu bungu ti ndwenga zawu kwe Yehova Nzambi’eto zeri tûkaka. Salomo watâ ti mbongo beto zibakisaka mu sumba bima bia mfunu bia luzingu na mu lungisa nsatu zeto za fioti-fioti. Ni bu sa ti Salomo bimvwama biabingi bieri nandi, mbo keri bakulaka ti bima bie kô bie nguria mfunu yôka mbongo. Mu tifwani, watâ ti: ‘Tinsangu tia mbote tiyôkele bimvwama biabingi.’ (Bin. 22:1) Salomo wabakula mpe ti bantu bazololo mbongo ka bavulu’â yangalalaka ko mu bio bie nawu. (Ekl. 5:​10, 12) Mpe watulwengesa mu lembo tûla lukwikulu lweto lwalwansoni mu mbongo, mu bungu ti ni bu sa ti mbongo zazingi ze neto, zilendi kulu zimbakana.—Bin. 23:​4, 5. w22.05 21 par. 4-5

Bu tudimbitilaka mu tusakumunu tweto twa lumbu ti, tindiku tieto mu Yehova tuyikaka ngolo. Mpe bu tudimbitila mu tusakumunu yi tu hana Yehova, tivuvu tieto tia mu sarila ntangu zazansoni mbo tikwizi tomo bâ tia matieleka. Mio miamiansoni mbo miyika nsayi’eto ya sarila Yehova bwawu bu. Yehova mbo katelama mu bungu dia beto, bu kakwizi sa nsuka mu nza yi ya mbi. Lukwikulu lwe neto ti Yehova—“Nzambi ya buderede”—ka bika nza yi Satana ko yatatamana mu zingila ntangu yayingi. (Iza. 25:9) Tintwari na Yehova mbo tukêlaka na luvivululu lwalwansoni ti, tilumbu tio tia nkûlulu tiatula. Bu tuta kwe kêle, nzengolo tubongele ya tatamana mu zolo bweso bwa sambila, bwa longoka, bwa sarila Zu dia Nzambi, mpe bwa dimbitila mu tusakumunu tweto. Bu tusila bo, Yehova mbo katubakisa mu korela na nsayi mu nsambululu yi tumusilaka. w22.11 13 par. 18-19

Ni bu sa ti Bibila ka dizonzelaka bateme ya Timote ko, ka wena musamu wa mpasi ko mu banza nsayi yeri na Enise mu tilumbu tîna. (Bin. 23:25) Enise walongesa mwana’andi mu zolo Yehova na Yezu Kristo. Bibuti bia Timote ka bieri’â dibundu dimosi ko. Tata’andi Greke yeri, mpe nguri’andi na nkaka’andi Bayuda beri. (Bis. 16:1) Kampe Timote ntwenia kwa yeri mu ntangu Enise na Loyise yi bayizi bâ Bakristo. Kâ, tata’andi keri’â Mukristo ko. Ngano Timote ntia nzila kaketi landa? Lumbu ti mpe, bamama bê Bakristo makanda mawu ma bazololo. Musamu wa mfunu kwe bawu, ni mu bakisa bala bawu mu kurisa tindiku tia ngolo na Yehova. Mpe Nzambi’eto nsayi yibâka nandi mu ngolo zi basarilaka. (Bin. 1:​8, 9) Yehova mama zazingi kabakisaka mu longesa bala bawu mu mu zolo na mu mu sarila. w22.04 16 par. 1-3

Ntamana, Yehova mbo katûla mbanzulu zandi mu mitima mia guvernema za politike, ngatu ‘za yirika mina mi kaweyi.’ Ngano ntia ndandu zimoneka? Guvernema zo za politike zi batâka, “mitinu kumi” mbo zinwanisa mabundu ma bungungu mpe mbo zifukisa mo. (Nza. 17:​1, 2, 12, 16) Bwe tuzabiri ti nsuka ya Babilone ya yinene yeka penepene? Mu baka mvutu ya tiyuvu tio, mbo wubâ musamu wa mbote mu bambuka ti mu ntangu ya ntama, mumvuka wa Babilone, mamba ma nto ya ngolo yi batâka Efrate meri wa kengerelaka. Buku dia Nzabukusu mbo difwanakasa milio za bantu bayikaka Babilone ya yinene moko na “mamba” makengerelaka. (Nza. 17:15) Kâ, mbo basongelaka mpe ti mamba mo mbo ‘masika,’ wuzololo tâ ti Babilone ya yinene ka yivutu’â bâ na bantu babingi ko bayika yo moko. (Nza. 16:12) Lumbu ti mbikululu yo ya yita lungana mu bungu ti bantu babingi balembolo mu mabundu mpe badingaka mpila zakaka zi bayirikila misamu miawu. w22.07 5-6 par. 14-15

Bu tulemvokelaka mbo tusongelaka ti matondo tuvutulaka mu bungu dia tiari tia lemvokela tia Yehova. Mu tifwani timosi, Yezu wafwanakasa Yehova na mfumu yimosi yayamburila ngamba’andi mfuka yi kafweti mu futa. Kâ ngamba yi balemvokela ka songela tiari tia lemvokela kwe mpwana’andi ko, yeri mu defaka mbongo za fioti. (Mat. 18:​23-35) Ntia musamu Yezu katulongesa? Tala ti mbo tutondaka tiari tia lemvokela ti tu songelaka Yehova mbo tubâ na nsatu ya lemvokela bampwana’eto. (Mik. 103:9) Nzo ya Zangama ya Munkengi yazonzela musamu wo bu yatâ: “Ni bu tulemvokela bampwana’eto mbala zazingi, ka zidelakana na mbala zazansoni ko zi tu lemvokelaka Nzambi’eto mu nzila ya Yezu Kristo.”Bô balemvokelaka mbo ba balemvokela. Yehova tiara tia lemvokela kasongelaka kwe bô basongelaka tio kwe bampwana’awu. (Mat. 5:7) Yezu watomo wa singasa bu kalongesa kwe milongoki miandi bwe bafweti sambirila.—Mat. 6:​14, 15. w22.06 10 par. 8-9

Yezu wayiza ha mutoto mu nitu ya tinsuni. Walanda timuntu tia Tata’andi mu mpila ya lunga. (Za 14:9) Buna ni mu nzila’andi talongokela mu zaba na mu zolo Yehova. Ndandu tubakaka mpe mu ndongosolo za Yezu na malongi ma kahanaka bu katwarisaka timvuka tia Bakristo lumbu ti. Watulongesa mu bêla mu mpila yitubakisa mu yangirika Yehova. Mpe beto bansoni ndandu tubakaka mu lufwa lwa Yezu. Yezu bu kavumbuka kwe bafwa, wahana menga mandi ma ntalu, meri mukayulu wa lunga wakusuna masumu meto mamansoni.” (1 Za 1:7) Yandi weka mutinu wulembo fwa ka. Titamana, Yezu mbo kakosakasa mutu wa nioka. (Mba. 3:15) Tia mpila mbombolo yi ba, mu bungu dia bantu babansoni ba kwikama bu tula nsuka ya Satana! Buna ka tu bikandi. Nzambi’eto bunsungu bwe nandi. Yandi mbo hana tusakumunu twatwingi kwe “makanda mamansoni ma ha mutoto.” w22.07 18 par. 13; 19 par. 19

Tufweti bâka mpe na mabanza ma delakana bu tusolaka mu bâ na makani. Mu bungu dia nti? Mu bungu ti ka tutomono’â zaba ko bwe misamu miyôkela ku matu. Mu tifwani: Ntumwa Paulo wahana lubakusu mu kubika timvuka tia môna tia ku Tesalonike. Mpe ntembe kâni, kani dieri nandi dia tatamana mu bâ kô ngatu kabakisa Bakristo bô ba môna. Kâ, bambeni batuma Paulo mu ngolo mu katuka ku mumvuka wo. (Bis. 17:​1-5, 10) Paulo bu kaketi tatamana mu bâ kô, mbo kaketi tûla mpangi zandi mu mpasi. Kâ, ka bika ko. Kani kasila bo, wadinga mu yirika misamu mieri nandi lenda mu ntangu ya nsobolo yo. Ha manima, watambika Timote ngatu kakipa nsatu za timpeve za mpangi zo za môna za ku Tesalonike. (1 Tes. 3:​1, 2) Diangana mpangi zo za ku Tesalonike, nsayi yeri nawu bu ba mumona. Tulendi longoka misamu miamingi mu misamu miabwabana na Paulo ku Tesalonike. Tulendi bâ na kani, kâ misamu milendi soba mpe milendi tu kabakasa mu lungisa kani dieto. (Ekl. 9:11) Tala ti musamu ni wo we naku, bâ wa kubama mu sola kani diakaka di lendi lungisa. w22.04 25-26 par. 14-15

Yehova beto katindisaka mu nzila ya tivuvu tia bilumbu bia ku matu. Tataleno mwa mabanza ma Bibila malendi tu tindisa bu tubâka mu mpasi. Mu Bibila, Yehova mbo katutêlaka ti na kani tima—mu kati na misamu mia mpasi mia ngolo—“ka tilendi’â tiatuhambasa ko na luzolo [lwandi].” (Rom. 8:​38, 39) Watutêla mpe ti ‘penepene kena na babansoni bô bamubingulaka’ mu lusambulu. (Mik. 145:18) Yehova tu têlele ti tala ti tumusikiriri, tulendi telamana mpasi ni mpasi, mpe tulendi bâ mu nsayi mu mpasi zeto. (1 Kor. 10:13; Zaki 1:2) Zu dia Nzambi beto ditubambulaka mpe ti mpasi zeto za ntangu fioti kwa zena tamana za fwanakasa na ndandu za ntangu zazansoni zi tubaka. (2 Kor. 4:​16-18) Yehova tu heni tivuvu tia matieleka ti mbo kakatula mudza wa mpasi zeto—Satana na bô balandaka nsalulu zandi za mbi. (Mik. 37:10) Ngano verse ze kô wasimba mu mutu zikubakisa mu korela misamu mia mpasi milendi ku turila? w22.08 11 par. 11

Ngano lwaka lubâka naku mu zaba tala ti mbo lenda mu tatamana landa mitieno mia Yehova mia buderede bilumbu biabiansoni, peleko mivu miamiansoni? Yehova kanisini ti buderede bweto bulendi bâ ‘ntiana matuma ma mubu.’ (Iza. 48:18) Banza’eti, ha ndeko mubu wa wunene wena, matuma ta tala mata tatamana mu landasana. Ku mbuka yo ya toma, ngano bendzi ti tilumbu tie kô matuma mo ka mavutu’â tatamana ko? Kâni! Zebi ti mbo matatamana mu kwiza. Buderede bwaku bulendi bâ ntiana matuma ma mubu! Mu bwe? Ntete wabongaka nzengolo, toko dingaka mu zaba bwe Yehova kazololo wasa. Buna, sarila bo mu nzengolo ni nzengolo yi bonga ya mpasi, Tata’aku dia luzolo ho kabâ mu ku hana ngolo na mu ku bakisa mu tatamana mu yirika misamu mia sungama bilumbu biabiansoni.—Iza. 40:​29-31. w22.08 30 par. 15-17

Ku nsuka ya mvula 1000, Satana mbo bamudukisa ku boloko. Ha manima mbo kadinga mu wubakasa bantu ba lunga. Mu ntangu yo ya ntontolo, bantu babansoni ba lunga ha mutoto mbo babwa bweso bwa songela tala ti nkumbu ya Nzambi bazitisa, mpe lutumu lwandi basingasa. (Nza. 20: 8-10) Misamu mi bayirika mu ntangu yo, mbo misongela tala ti nkumbu zawu zifweti tsonama mankululu mu buku dia luzingu. Bibila mbo ditutêlaka ti bantu bakaka mbo babâ ntiana Adame na Eva, bu bakala lutumu lwa Yehova. Ngano nti bibaturila? Nzabukusu 20:15 mbo yitutêlaka: ‘Bô babansoni balembo bâ na nkumbu za tsonama mu buku dia luzingu, babalosa mu zanga dia tiya.’ Diangana, bantu babansoni bakolama, mbo bafuka mankululu. Kâ, bantu babîngi ba lunga mbo banunga ntontolo yo. w22.09 23-24 par. 15-16

Bakristo bakaka ba mu timvuka tia mbandu ya ntete mu ngolo beri dingaka ti bantu balembo bâ Bayuda bayizi bâ Bakristo bazengoso masutu, kampe, ngatu Bayuda ka babadingilandi miangu. (Nga. 6:12) Kani kabwe, Paulo keri’â tambulaka mabanza mawu ko, kâ kani kadinga mu ngolo ti balanda mabanza mandi, na kuluka kwakwansoni wazonzela musamu kwe bantumwa na bakuluntu ba ku Yerusaleme. (Bis. 15:2) Bu kasila bo, ndiatulu’andi yabakisa Bakristo mu tatamana mu bâ mu nsayi na mu tidzunu mu timvuka. (Bis. 15:​30, 31)Tala ti musamu wa munene wubwiri, tulendi singasa tidzunu bu tulomba malongi kwe bantu Yehova ba kasola mu kipa timvuka. Vula-vula, lubakusu tubakaka mu mikanda mieto misikamanaka mu Bibila peleko mu lutwalusu lu tuhanaka organizasio. Tala ti tulendi lutwalusu lo, kani tasingasa mabanza ma beto beni, tidzunu tusingasa mu kati dia timvuka. w22.08 22 par. 8-9

Ntangu zakaka musamu wa mansweki tudingaka mu zonzela kwe ndiku’eto ya mutima. Ntangu zakaka musamu wa mpasi wubâka. Kampe ka twena na tifu ko tia zonzelaka mabanza meto ma ku kati kwe muntu ni muntu, mpe wulendi tu fwemesa tamana wâ ti ndiku’eto wadukisi musamu’eto wa mansweki kwe bantu bakaka. Ku lweka lwakaka, nsayi yibâka neto bu tubâka na ndiku yi tuzebi ti, ka yidukisa misamu mieto mia mansweki ko! ! Bakuluntu bazebi lunda mansweki bena ntiana tiswamunu mu ntangu ya titembo na mbuka yikengerelaka mu bungu dia mpangi zawu. (Iza. 32:2) Tulendi ba zonzela musamu ni musamu mu bungu ti lukwikulu lwe neto ti ka bazonzela wo ko kwe bantu bakaka. Ka tubasaka tiya ko mu tutêla misamu mia mansweki mi bazebi. Bakento ba bakuluntu tuzitisaka mpe mu bungu ti ka bayêlaka ko mu zaba misamu mia mansweki mi zebi babakala bawu. Diangana musamu wa mbote wena ti, mukento wa mukuluntu ka wuzabandi misamu mia mansweki mia mpangi zandi. w22.09 11 par. 10-11

Tulendi bâ na lukwikulu ti Yehova mbo kavukisa bisari biandi bia kwikama mu ntangu ya “mpasi ziyôkele.” (Mat. 24:21; Dan. 12:1) Mbo kasila bo mu ntangu timvuka tia makanda ti tuzabiri mu nkumbu ya Goge ya ku nsi ya Magoge, tikotela bisari bia kwikama bia Yehova mu nza yayansoni na miangu miamiansoni. Ni bu sa ti mu timvuka tio mwe na nsi 193 ze mu O.N.U. ka zisa tima ko ha matu ma Yandi Watomo Zangama na mukangu’andi wa ku mazulu! Yehova wakanisina ti: “Wa matieleka, mbo nipaparala, mbo nitisantukisa, mpe mbo nitizabikisa ha meso ma nsi zazingi. Mpe wa matieleka mbo bazaba ti meno ni Yehova.” (Ezk. 38:​14-16, 23, NWT) Nkotolo ya Goge mbo yitulumuna muzingu wa mansukina wa Yehova, Armagedo, ye ntangu yi kafukisa ‘mitinu miamiansoni mia ha mutoto.’ (Nza. 16:​14, 16; 19:​19-21) Mpe, “bantu ba sungama kwa babâ ha mutoto mpe bantu ba kwikama kwa babiarila wo.”—Bin. 2:​21, NWT. w22.10 16-17 par. 16-17

Ka tulendi’â tatanga mitima ko; Yehova kwa tangaka mitima. (Bin. 16:2) Yandi bantu ba mpila zazansoni kazololo, ba nsi zazansoni na ba bikulu biabiansoni. Mpe Yehova watutindisa mu tomo zibula mitima mieto. (2 Kor. 6:13) Bantu babansoni ba kanda dieto dia timpeve tu zoloko, ka mu bafundisa ko. Wuzololo tâ ti ka tufweti’â mpe tafundisaka bantu balembolo mu timvuka ko. Ngano lumbu lendi fundisa tibuti tiaku tilembolo Mbangi ya Yehova bu tâ ti: “Yandi kani kabwe ka sa tambula matieleka ko”? Kâni, mbo songela ti lulendo lwe naku na tifu tia dinga mu yôka bantu bakaka. Yehova mbo kata tatamana mu hana bweso kwe bantu babansoni mu soba mabanza. (Bis. 17:30) Ntangu zazansoni, bambukaka ti tifu tia dinga mu yôka bampwana’aku kondo kwa buderede bwena. Bika ti luzolo lweto mu misamu mia buderede mia Yehova mia nata nsayi mpe mia tubakisa mu bâ bifwani bia mbote kwe bantu bakaka ngatu batomo tuzolo, mpe batomo zolo Yehova. w22.08 31 par. 20-22

Tulendi kêla ti bantu bakaka batukwamisa bu tusamunaka. Nkwamusu zo zilendi kwizi yikama ngolo mu bilumbu bita kwiza. (Dan. 11:44; 2 Tim. 3:12; Nza. 16:21) Kâ, tulendi bâ na lukwikulu ti Yehova mbo katuhana lubakusu lwe neto nsatu. Mu bungu dia nti? Yehova ntangu zazansoni, keri bakisaka bisari biandi mu lungisa bisalu biawu—ni bu sa ti mpasi bieri mu sala. Taluzula mbikuri Ezekiele, wasamuna kwe Bayuda ba banata mu ngolo ku Babilone. Ntia mpila bantu Ezekiele kafweti samunina? Yehova watâ ti mbunzu na mitima mia kangama mieri nawu, mpe bukolo bweri nawu. Mbo beri tsokotaka ntiana nsende, mpe nsisi beri ntiana nkala-nseke. Ntiangu Yehova keri vulu têlaka Ezekiele ti: ‘Kubatînandi’! (Ezekiele 2:​3-6) Ezekiele lenda dieri nandi dia lungisa tisalu tiandi tia samuna mu bungu ti 1) Yehova wamutambika, 2) mpeve santu ya Nzambi yeri mu yikaka ngolo, mpe 3) Zu dia Nzambi keri diaka. w22.11 2 par. 1-2

Bima biabîngi biasala Yehova ha mutoto mbo bikwizi fwaka, kâ ka bantu’â ko. Yehova wahana tivuvu tia nzitukulu tia lembo fwa. Yehova watusala mpe na nsatu ya ngolo ya tatamana mu zinga. Mu bungu dia bantu, Bibila ditêle ti Nzambi “watûla mabanza ma luzingu lwa mankululu mu mitima mia bantu.” (Ekl. 3:​11, NWT) Wo ni musamu wumosi wusaka ti tabongela lufwa ntiana mbeni’eto. (1 Kor. 15:26) Ngano bu tubêlaka, moko tuzingaka mpe lufwa tukêlaka? Kâni. Vula-vula doktere tukwe talaka mpe ntangu zakaka bilongo tunwaka mu buka timbevo tieto. Diangana, miamiansoni mi tulenda tusaka mu lembo fwa. Mpe bu fwaka muntu wu tuzololo, ni kabâ ntwenia peleko tibunda, tiari tia ngolo na tiatingi tikwizi bâka neto. (Za 11:​32, 33) Mvangi’eto wa luzolo ka keti’â tu hana nsatu na lenda dia tatamana mu zinga ko, tala ti kani diandi ka dieri’â ko ti tazinga mankululu. w22.12 3 par. 5; 4 par. 7

Babingi mu mpangi zeto balendi ba na malari, bunkunta, peleko bata mona ti bawu kaka kwa bena. Buna sarila ngolo mu vulu zonzaka na mpangi zaku. Epidemi yilendi sa ti ka tuvutuandi bundakanaka peleko ka tuvutuandi kutakanaka na mpangi zeto. Mu ntangu yo, lendi kwizi bâ na mabanza mamosi na ntumwa Za. Weri nandi kamonana na ndiku’andi Gayuse. (3 Za 13, 14) Kâ, Za wazaba ti ka keti’â mona Gayuse ko tûka mwa ntangu. Buna Za wasa mi kalenda; wamutsonekena mukanda. Tala ti ka wena na lenda ko dia kutakana na bampwana’aku, lendi zonza nawu mu mpila zakaka. Bu tatamana mu zonza na mpangi zakaka, kubâ mu bunkuta ko, mpe mbo bâ mu tidzunu. Tala ti lwaka lwe naku, zonza na bakuluntu mpe tambula lutindusu lwa luzolo lu bakuhana.—Iza. 32:​1, 2. w22.12 17-18 par. 6-7

Bibila mbo dizabikisaka ti ntangu yeri kô malu ma Yozefe bakanga mo, mpe ntingu’andi bakanga yo mu bisengo. (Mik. 105:​17, 18) Misamu mia Yozefe ni beba kwa mieri bebaka. Yandi weri ngamba yi beri silaka mutima bayizi mu tûla mu boloko. Ngano nge weka bwabana na musamu weri tatamanaka mu beba ntono tusambulu twaku? Musamu wo wulendi tula. Yehova ka tu kengerelaka ko mu misamu miamiansoni mia mbi mu nza yi yi yâlaka Satana. (1 Za 5:19) Kâ, lendi bâ na lukwikulu elu: Misamu mi ta bwabana na mio Yehova mia kazebi mpe nge kafwilaka tiari. (Mat. 10:​29-31; 1 Pi. 5:​6, 7) Mpe, watukanisina ti: “Kani kabwe, ka nikubika ko, kani kabwe ka nikuyambirika ko.” (Ebr. 13:5) Yehova lendi ku bakisa mu korela ni busa ti musamu’aku kuta wabakila mayela ko. w23.01 16 par. 7-8

Bibila luzolo lwa Yehova mu beto disongelaka mu mpila yakaka. Matsonoko mbo matuhanaka lukwikulu ti Nzambi’eto ka tubika ko tala ti tuyirikiri musamu wa mbi. Bala ba Israele Yehova beri kolamanaka mbala zazingi; kâ, bu beri sobaka mabanza na bunsungu bwabwansoni, bawu beri lemvokelaka. Bakristo ba mu mbandu ya ntete bazaba mpe ti Nzambi bawu keri zoloko. Mu ndwengosolo ya mpeve santu, ntumwa Paulo watindisa Bakristo bakaka mu lemvokela na mu tindisa muntu watatamana mu masumu ma manene, kâ wayizi soba mabanza. (2 Kor. 2:​6, 7; 1 Kor. 5:​1-5) Diangana wa nzitukulu wena mu mona ti Yehova ka losa bisari biandi ko mu bungu ti sumuka basumuka! Kâ, mbo keri zoloko mu ba bakisa, mu ba sungika na mu vutu karisa tindiku tiawu. Wakanisina mpe misamu mia mpila yo kwe bantu basumukaka lumbu ti mpe basobaka mabanza. (Zaki. 4:​8-10) Bibila ndwenga za Nzambi, buderede bwandi na luzolo lwandi disongelaka. Buku dio disongele ti Yehova zololo ti tamuzaba. Zololo ti tabâ ndiku zandi. w23.02 7 par. 16-17

Misamu mia mbote misaka ti tataluzula bwe misamu miyôkaka mu nza lumbu ti, milungisilaka mbikululu za Bibila. Mu tifwani, Yezu wazonzela misamu miaketi tu bakisa mu zaba ntia ntangu nsuka ya nza yi ya Satana yaketi tûla. (Mat. 24:​3-14) Ntumwa Piere watutindisa mu sa keba mu ndungananu za mbikululu ngatu timinu tieto tiatatamana mu bâ ngolo. (2 Pi. 1:​20, 21) Tulombele mu bâ na mabanza ma delakana bu tutaluzulaka mbikululu za Bibila. Watutindisa mu lunda tilumbu tia Yehova mu mabanza meto. (2 Pi. 3:​11-13) Mu bungu dia nti? Ka wena ko ti tuzololo mu zaba “tilumbu na heure” Yehova yi kanata Armagedo, kâ mu bungu ti tuzololo tasarila ntangu yisiri neto mu bâ na nsalulu mpe na ndiatulu ya santu, mpe tasongela ti Nzambi tutînaka. (Mat. 24:36; Like 12:40) Tufweti tatamana mu bâ na ndiatulu ya mbote na mu bâ na lukwikulu ti ngolo zeto mu tisalu tia Yehova, luzolo lwalwingi lwe neto mu Yandi disongelaka. Mu tatamana mu bâ na meso ma tia, tufweti sa keba mu beto beni.w23.02 16 par. 4, 6

Misamu mie kô mifweti yirika bimeme biakaka mu bâ ku Paradi. Tufweti songelaka bwe tubongelaka Yezu. Mu tifwani, luzolo lweto mu yandi tusongelaka mu mpila yi tubongelaka Bakristo ba tumbu. Yezu watâ ti bimeme kafundisa mu musamu wo. (Mat. 25:​31-40) Tulendi yika moko na luhemo mu tisalu tia samuna na tia kubika bisamuni. (Mat. 28:​18-20) Ka twena na nsatu ko ya kêla ti takota ku Paradi mu kwizi bâ mpila ya bantu Yehova yi kazololo babêla kûna. Tulendi sarila ngolo bwawu bu mu bâ bantu bê na bunsungu mu nzonzolo na mu nsalulu, mpe bê na luzingu lwa delakana. Mpe tulendi bâ ba kwikama kwe Yehova, kwe muntu wu takwela na kwe mpangi zeto. Bu tutomo kwe sariri ngolo mu landa mitieno mia Yehova mu nza yi ya mbi, ka wubâ musamu wa mpasi ko kwe beto mu landa mitieno mio ku Paradi. Tulendi kurisa mpe lenda peleko bifu bisongela ti mbo tukubamaka mu zinga ku Paradi. w22.12 11-12 par. 14-16

Tuzololo ti Yezu kabâ Mutinu’eto mu bungu ti ntwarisi ya mbote yena. Yehova Yandi beni walongesa Mwana’andi, mpe wamunoma ngatu kayâla. (Iza. 50:​4, 5) Banza’eti mpe mu luzolo lwa songela Yezu bu katihana mu mukayulu. (Za 13:1) Bu kena Mutinu’aku, wufwanakane ti wazolo Yezu. Wabangula ti bô batomono mu zolo—bô ba katâka ndiku zandi—luzolo lwawu basongelaka bu batumamanaka ntumunu zandi. (Za 14:15; 15:​14, 15) Diangana, bweso bwena bwa bâ ndiku ya Mwana wa Yehova! Mbo monaka Yezu ntiana tifwani tia lunga mpe tia kuluka tia Tata’andi. Walongoka ti wadikila bantu beri na nsatu, watindisa bantu beri ba nôka, mpe wawasisa bambevo. (Mat. 14:​14-21) Wayizi longoka mpe bwe katwarisilaka timvuka tiandi lumbu ti. (Mat. 23:10) Mpe zebi ti misamu miamingi kayirika bu kena Mutinu wa Timfumu tia Nzambi. Bwe lendi songela ti yandi zololo? Ni mu landa tifwani tiandi. Lendi batika mu sila bo bu tihana kwe Yehova na bu batusu. w23.03 4 par. 8, 10

Yehova ka fulusa kwa mazulu ko, kâ wafulusa mpe mutoto na mubu mu nzanda bima bia nzitukulu, mpe tulendi longoka misamu miamingi mu bima bio. (Mik. 104:​24, 25) Banza’eti mpe mu mpila Nzambi yi katusala. Watusala na lenda dia mona nsayi mu bima bi kasala. Watuhana mpe lenda dia mona, dia wâ mazu na nsunga, dia bimba na dia simba ngatu tazolo luswaswanu lwe ha kati dia bima bi kasala. Bibila musamu wakaka wa mfunu dizonzelaka difweti tu tuma mu taluzulaka ndiyilukulu. Ndiyilukulu bifu bia Yehova yitulongesaka. (Rom. 1:20) Mu tifwani, taluzula mpila Yehova yi kayirikila bima bie mu nza. Ngano ka bisongelaka ko ti Nzambi ndwenga ze nandi? Banza’eti mpe mu bidia bia swaswana bi tuzoloko. Tidimbu tiena tisongelaka luzolo lwa Nzambi mu bantu. Bu tumonaka timuntu tia Yehova mu bima bi kasala, yandi tukwizi tomo zabaka, mpe beto wutumaka mu tomo pusana kwe Yandi. w23.03 16 par. 4-5

Nza yi bu yita kwe bebe, lukwikulu lweto mu matieleka mbo lukwizi kota mu ntontolo. Bantu balendi kwizi butisa ntembe mu mabanza meto—mu matieleka ma Bibila, peleko tala ti Yehova ngamba ya kwikama na ya ndwenga kasola mu twarisa bisari biandi lumbu ti. Kâ, tala ti lukwikulu lwe neto ti Zu dia Yehova dia matieleka kwa diena, mbo tukwizi bâ na lenda dia lembo hombesa timinu tieto mu misamu mia mpila yo. Mbo tukwizi bâ ba kubama mu tumamana ntumunu za Yehova ntangu zazansoni tii ku nsuka. (Mik. 119:112) Ka tubâ na nsoni ko mu zonzela matieleka ma Bibila kwe bantu bakaka na mu ba tindisa mu sarila malongi mandi. (Mik. 119:46) Na luvivululu mpe na nsayi, mbo tubâ na lenda dia korela misamu mia nguria mpasi, mu kati na nkwamusu.” (Kol. 1:11; Mik. 119:​143, 157) Matieleka mô beto mabakikasa mu bâ mu nza yi yita tomo beba. Beto mahanaka tivuvu tia bilumbu bia ku matu bia toma, bu yâla Timfumu tia Nzambi. w23.01 7 par. 16-17

Mpimpa ntete lufwa lwandi, Yezu wayôkesa ntangu yayingi mu sambirila milongoki miandi, walomba kwe Tata’andi mu ba kengerela mu bungu dia nkwa-mbi. (Za 17:15) Diangana Yezu bawu keri tomo zoloko! Ni bu sa ti wazaba ti ntamana mpasi zazingi kamona; watatamana mu belokela bantumwa bandi lwaka. Mu tifwani tia Yezu, ka tutûlaka kwa mabanza mu nsatu zeto ko. Kâ, ntangu zazansoni mu bungu dia mpangi zeto tusambilaka. Bu tusilaka bo, ntumunu ya Yezu tutumamanaka yitâka ti tufweti zolosono beto na beto, mpe kwe Yehova tusongelaka ti mpangi zeto za tutomono zolo. Bu tusambirilaka mpangi zeto, ka tuhombesaka ntangu’eto ko. Zu dia Nzambi ditutêle: ‘Lusambulu lwa muntu wa sungama nkatika ngolo lwena.’ (Zaki. 5:16) Mpangi zeto za timvuka nsatu lusambulu lweto yibaka nawu mu bungu ti bo babwabanaka na kwamusu za zingi. w22.07 23-24 par. 13-15