Octobre

Beto bansoni tulendi sa ti tukutakanu twayôkela mu mpila ya mbote bu tutanga mikunga tintwari, mpe bu tuhana mvutu zi tutomono kubika. Kwe bantu bakaka musamu wa mpasi wubâka mu tanga peleko mu hana mvutu ha lungiri bantu. Ngano ni bo monaka? Tala ti ni bo, taluzula nti bantu bakaka basa mu telamana bunkuta bwawu. Bu batangaka, bakaka bubote bamonaka mu tanga mutima wa mukaka. Musamu wa mfunu wu tutangilaka mikunga ku tukutakanu tweto, ni mu kembela Yehova. Buna, bu kubamaka mu bungu dia tukutakanu, kubamaka mpe mu bungu dia mikunga. Mpe dingaka tintwari tie ha kati dia mikunga na misamu mi bazonzela ku lukutakanu. Mpe, mpila yo mbo yikubakisaka mu tûla mabanza maku mu misamu mie mu mikunga, kani watûla mo mu lenda diaku dia tanga. Hana mvutu ku tukutakanu wulendi bâ musamu wa mpasi kwe bakaka. Nti bilendi hana lubakusu? Yêla mu vulu bwa saka. Bambuka ti, mvutu ya mbote ni yo ya nkufi, yilembolo mpasi mpe ya delakana na diambu di bata zonzela. Yehova tomono zolo luhemo lu tusarilaka mu mu kembela mu timvuka. w22.04 7-8 par. 12-15

Ntelo ya ‘tibakisi’ mbo yisongelaka tifwani tia muntu wuta dioka mu kwe bakisa muntu wuta lomba lubakusu. Banza’eti Yehova ta sa manzangu mu kwe bakisa muntu we mu mpasi. Ntembe kâni mbo ta tambula ti tifwani tio tisongele luzolo lwa Yehova—yee, nsatu’andi—mu bâ Tibakisi tieto. Na Yehova ku lweka lweto, tulendi korela mpasi na nsayi yayansoni. Bwe Yehova kasaka mu tu bakisa? Mu baka mvutu, tabongeno mwa verse za buku dia Izaya. Mu bungu dia nti? Mbikululu zazîngi za tsoneka Izaya mu lutwalusu lwa mpeve santu bisari bia Nzambi bia lumbu ti zitarilaka. Izaya Yehova kavulu zonzelaka mu mpila yilembolo mpasi mu bakula. Mu tifwani tabonga Izaya 30. Mu timoko tio, Izaya bifwani kasarilaka bisongelaka bwe Yehova kabakisilaka kanda diandi. Watsoneka ti Yehova beto katubakisaka 1) bu katomo wirikilaka, mpe bu kahaninaka tusambulu tweto mvutu, 2) bu katutwarisaka, mpe 3) bu katusakumunaka lumbu ti na bu katusakumuna ku matu. w22.11 8 par. 2-3

Mu nsangu za hana Yezu kwe timvuka tia Simirine na tia Filadelefi, yandi watâ kwe Bakristo bo ti, ka babândi na bunkuta mu bwabana na nkwamusu, mu bungu ti tifu tiawu tia kwikama mbo baketi tia senda. (Nza. 3:10) Tufweti zaba ti nkwamusu mbo zitula, mpe tufweti bâ ba kubama mu korela zo. (Mat. 24:​9, 13; 2 Kor. 12:10) Mukanda wa Nzabukusu wutâka ti kanda dia Nzambi mbo bakwamisa dio mu ntangu ya beto—mu “tilumbu tia Mfumu.” (Nza. 1:10) Nzabukusu 12 yitâka ti buna kwa bu batûla Timfumu tia Nzambi, muzingu wadituka ku mazulu. Mikayele—Yezu Kristo —na mbazi zandi, banwanisa Satana na bademo bandi. (Nza. 12:​7, 8) Buna, mbeni zo za Nzambi banunga zo, balosa zo ha mutoto, mpe zanata mpasi zazingi ha mutoto.—Nza. 12:​9, 12. w22.05 5 par. 12-13

Mfundusu za Yehova za sungama kwa zibâka. Kena na tihambula ko. Kani kabwe Yehova ka lemvokelaka muntu ko mu bungu ti wa mbote monekaka, mvwama yena, mfunu kena, peleko lenda die nandi. (1 Sam. 16:7; Zaki 2:​1-4) Ka kwena muntu ko wulendi sa Yehova tiya peleko wulendi mu hana nsweki. Mfwemoso peleko nkesi ka binataka nsobolo mu nzengelo zandi ko. (Ndu. 34:7) Ntembe kâni, mpila Yehova yi kabakurilaka misamu na lenda diandi dia swasikisa, mbo bisaka ti kabâ Mfundisi yiyôkele. (Lub. 32:4) Bantu batsoneka Matsonoko ma hebre babakula ti mulemvo wa Yehova wa nzitukulu wena. Ntangu zakaka, basarila ntelo yimosi ya hebre yi babangulaka mu buku dimosi. Buku dio ebu ditâka: “Ntelo yo mulemvo wu hanaka Nzambi kwe muntu wusumukini kwa yitarilaka, mpe ka basarilaka yo ko mu zonzela mulemvo we na ndilu wu hanaka muntu kwe mpwana’andi muntu.” Yehova kwa we na lenda dia lemvokela muntu wuyirikiri masumu mpe wusobele mabanza. w22.06 4 par. 10-11

Tala ti nge kaka sansaka bala, peleko muntu wu lwakwelena ka lwena dibundu dimosi ko, bâ na lukwikulu ti tifwani tiaku tia kwikama mbo titindisa bantu bakuzungiriri. Ngano bwe sa tala ti mwana’aku ka wuta sa nsobolo ko mu ngolo zita sarila mu mu bakisa? Bambukaka ti ntangu yidinganaka mu kubika mwana. Wamana kuna muti, ntangu zakaka lendi tiyula tala ti mbo wukula mpe mbo wubuta mbutu. Ni bu sa ti kuzebi’â ko tala ti mbo wubuta mbutu peleko kâni, mbo tatamana mu mwanga wo mamba, ngatu wabakisa wo mu buta mbutu. (Mak. 4:​26-29) Mpila mosi mpe, ntangu zakaka, mama yilendi tiyula tala ti ngolo zi kata sarila bala bandi zita tomo bakisa mu zolo Yehova. Kulendi’â wazaba nzengolo zazansoni ko zi bongaka bala baku. Kâ tala ti tatamane mu sa miamiansoni mu ba kubika, mbo ba hana bweso buyôkele bwa bâ ndiku za Nzambi. w22.04 19-20 par. 16-17

Bu keri tisari tia kwikama tia Yehova, Salomo mabanza ma delakana meri nandi mu yandi beni. Bu keri ntwenia, na kuluka kwakwansoni wazaba ndilu zandi, mpe walomba lutwalusu lwa Yehova. (1 Mit. 3:​7-9) Bu kabatika mu tuma, Salomo wazaba mpe mpasi zinataka lulendo. Musamu wa tiari, ha manima, Salomo ka landa malongi mandi ko. Ntangu fioti ha manima, bu kayôka ha timfumu, wayizi bâ na lumpampani mpe wabatika mu kolamana ntumunu za Nzambi. Mu tifwani, musiku weri kô weri tâka ti mutinu wa Hebre ka wufweti’â wabâ na bakento babingi ko ngatu mutima’andi ka wuwubakanandi. (Lub. 17:17) Salomo wakolamana musiku wo, mpe wayizi bâ na bakento 700 na makangu 300! (1 Mit. 11:​1-3) Kampe Salomo wabanza ti misamu miamiansoni mia keri zabirilaka. Salomo wayizi bwabana na mpasi za mu natina bukolo bwandi kwe Yehova.—1 Mit. 11:​9-13. w22.05 23 par. 12

Lumbu ti bantu bafweti bonga nzengolo ya mfunu. Ngano Yehova bayika moko we Ntwarisi yiyôkele mu nza, peleko Satana we mbeni’andi? Ka kwena muntu ko wulendi bâ ha kati. Nzengolo yi babonga mbo yisa ti bazinga mankululu peleko kâni. (Mat. 25:31-33, 46) Mu ntangu ya mpasi ziyôkele, mbo babaka tidimbu tia mvukulu peleko tia mfukulu. (Nza. 7:14; 14:​9-11; Ezk. 9:​4, 6) Tala ti solele mu yika moko lutumu lwa Yehova, nzengolo ya ndwenga bongele. Bwawu bu timina die naku dia bakisa bantu bakaka mu sa nsololo ya mbote. Bô bayikaka moko lutumu lwa Yehova na kwikama kwakwansoni, mbo babaka tusakumunu. Musamu wa mbote wena mu longokaka matieleka mo ma mfunu. Ndongokolo yo mbo yiyika ngolo nzengolo’eto ya tatamana mu sarila Yehova. Misamu mi tulongoka, tulendi mia sarila mu bakisa bantu bakaka mu bonga nzengolo ya sarila Yehova na ya tatamana mu mu sarila. w22.05 15 par. 1-2

Tufweti wirikilaka Yehova, ka mbeni zeto’â ko. Yobe kutu keri tomo tekaka, Yehova bu keri mu zonzelaka. Nzambi wazonza na Yobe bu katâ ti: ‘Misamu mikuturiri mia nzebi. Ngano nge ta banza ti ka ndendi’â nakukipa ko?’ Yobe wahana mvutu na kuluka kwakwansoni, mpe watonda mu bungu dia mbote ya Yehova. Yandi watâ: ‘Mu kutu kwa nakuwîri nsangu, kâ bwawu bu disu diani dikumweni.’ (Yobe 42:5) Kampe Yobe wazakala kwa weri ha bombi, nitu’andi mputa yeri, mu ntangu yi katâ misamu mio. Ni bu sa ti ni bo, Yehova wasongela luzolo lwandi kwe Yobe, mpe wasa ti kabâ na tivuvu ti yandi keri tambulaka. (Yobe 42:​7, 8) Lumbu ti mpe, balendi tu bongela ntiana bantu balembolo salu. Balendi yêla mu bebesa nkumbu ya muna muntu ha kati dieto peleko ya organizasio’eto, mpe balendi tu ‘butila bungungu bwa mpila na mpila.’ (Mat. 5:11) Tinsamu tia Yobe titulongese ti Yehova lukwikulu lwe nandi ti mbo tutatamana mu bâ ba kwikama bu tubwabana na misamu mia mpasi. w22.06 24 par. 15-16

Diangana mbo wubâ musamu wa nsayi! Ni bu sa ti nsayi yayingi yibâ ku mazulu bu fuka Babilone ya Yinene, musamu wakaka we kô wunata nsayi yiyôkele. (Nza. 19:​1-3) Yo ni ntangu ya nguria mfunu yi zonzelaka mukanda wa Nzabukusu—‘makwela ma Mwana Timeme.’ Ntete muzingu wa Armagedo wabatika, Bakristo 144000 babansoni mbo batibêla ku mazulu. Kâ, ka yibâ ntangu yi batika makwela ma Mwana Timeme ko. (Nza. 21:​1, 2) Makwela ma Mwana Timeme ha manima ma muzingu wa Armagedo mayôka, bu bafukisa mbeni za Nzambi. (Mik. 45:3, 4, 13-17) Ngano makwela ma Mwana Timeme bwe mata zolo tâ? Ntiana kwa makwela mavukasaka mukento na bakala, makwela ma Mwana Timeme mbo mavukasa mutinu Yezu Kristo na Bakristo 144000 bê mukento’andi. Musamu wo wa mfunu mbo wuhana nzila kwe guvernema ya môna mu yôkesa mvula 1000 mu yâla mutoto.—Nza. 20:6. w22.05 17 par. 11-13

Yezu wabikula ti mu ntangu ya mansukina, mbo kaketi noma “ngamba ya kwikama na ya ndwenga” mu hana bidia bia timpeve. Buna beto tukekoloko ti ngamba yo yasala bwabwingi mu bilumbu bi. Mpe misamu ni bo miyôkelaka. Ntwarisi’eto wasarila tikunku tia fioti tia babakala ba tumbu mu hana bidia bia timpeve kwe kanda dia Nzambi na kwe bô batambulaka Zu diandi “mu ntangu yifwanakane.” Babakala bo ka batibongelaka ntiana mfumu za timinu tia bampwana’awu ko. (2 Kor. 1:24) Kâ, bawu babakulaka ti ni Yezu Kristo we Mfumu mpe ntwarisi ya kanda diandi.—Iza. 55:4) Tûka 1919, ngamba ya kwikama yakubika mikanda miamingi miahana bweso kwe bantu beri zoloko mu wâ Zu dia Nzambi mu longoka matieleka ma Bibila mu mbala’awu ya ntete. Mu 1921, ngamba ya kwikama yakubika buku dia La Harpe de Dieu mu bakisa bantu beri zoloko mu longoka matieleka ma nguri ma Bibila. Ntangu bu yeri kwe yôke, mikanda miakaka miayizi duka. Ngano ntia mukanda wakubakisa mu zaba na mu zolo Tata’eto dia ku mazulu? w22.07 10 par. 9-10

Yehova ni Yandi yôkele mu tifu tia kaba. Tima ni tima ti mu hana, ntangu zazansoni mbo kakuvuturila tio na ntenso ya yôka. (Mak. 10:​29, 30) Mbo kakuhana luzingu lwa nkatika lwa toma, lwa nsayi, na lwa nienze tûka lumbu ti mu nza yi yifwa ntamana. Yo mbatukulu kwa yena. Luzingu lubatika tûka mu tilumbu tia bateme’aku ka lusuka ko. Mbo bâ na lenda dia sarila Tata’aku dia luzolo ntangu zazansoni. Luzolo lwaku mu Tata’aku mbo lutatamana mu kula, mpe mbo baka luzingu lwa mankululu, mu bungu ti Yandi mankululu kazingaka. Bu tihana kwe Nzambi mpe bu batusu, bweso bubâ naka bwa hana tima tia nguria ntalu kwe Tata’aku. Yandi wakuhana bima biabiansoni bia mbote na ntangu za nsayi zi weka yôkesa. Buna, lendi hana kwe Nzambi yivwiri zulu na mutoto tima ti keka lembo baka—tisalu tia luzolo na tia kwikama. (Yobe 1:8; 41:11; Bin. 27:11) Bwe lendi sarila luzingu lwaku mu mpila yiyôkele bubote? w23.03 6 par. 16-17

Bu we ntwenia, nsatu ya vukasa nitu yilendi bâ nkatika ngolo, mpe ntangu zakaka lendi bwabana na bakunata mu sarila bo. Satana zololo ti walungisa nsatu zaku. Ngano nti bikubakisa mu bâ na ndiatulu ya verela? (1 Tes. 4:​3, 4) Mu tusambulu twaku, zonzela misamu miaku kwe Yehova. Mu têla mio mie naku ku mutima, mpe mu lomba kakuyika ngolo. (Mat. 6:13) Bambukaka ti Yehova zololo ti kakubakisa, ka zololo’â ko ti kakusemba. (Mik. 103:​13, 14) Kuyêlandi mu yirika misamu mu nge beni. Zonzela misamu miaku kwe bibuti biaku. Wa matieleka, ka wena musamu wa fioti ko mu zonzela misamu mitutariri, kâ mfunu wena mu sila bo. Bu kwe tangi Bibila na bu kwe dimbitiri mu mitieno miandi, mbo wubâ musamu wa fioti mu bonga nzengolo zitâka Yehova nsayi. Mbo kwizi mona ti ka wena na nsatu ko ya misiku mu misamu miamiansoni, mu bungu ti mbo bakula mabanza ma Yehova. w22.08 5 par. 10-12

Mfumu-kanda ya Mukristo yifweti bongelaka dema dia kipa kanda diandi mu tinsuni na bunsungu bwabwansoni. Tala ti nge mfumu-kanda yena, kampe bunkuta bwabêle naku bwa lembo bâ na lenda dia dikila kanda diaku na dia futa nzo. Kampe bunkuta bwabêle naku tala ti wahombese tisalu tiaku ka waketi’â vutu baka tiakaka ko. Peleko lendi banza ti kulenda ko mu bâ na mbongo za fioti. Satana babingi kalenda mu baka bu kasarila bunkuta bwa mpila yo. Satana yêla kayêlaka mu tu tuma mu kwikila ti Yehova ka tubelokelaka lwaka ko, mpe musamu wutariri lungisa nsatu za kanda dieto beto kaka kwa wutariri. Buna, tulendi kwizi banza ti tufweti sa miamiansoni mi tulenda mu lembo hombesa tisalu tieto ni bu sa ti tufweti diata mitieno mia Bibila. w22.06 15 par. 5-6

Tuzebi ti Tata’eto wena “Nzambi yifwilaka tiari mpe ye na tiari tia mutima, yilembo kulu bakaka nkesi, mpe ya fuluka mu luzolo lwa kwikama na mu matieleka.” (Ndu. 34:6) Yehova buderede kazololo. (Iza. 61:8) Mpasi kamonaka ku mutima bu katumonaka mu mpasi, mpe wa kubama wena—yee, timina die nandi—mu tûla nsuka mu mpasi zeto zazansoni mu ntangu yifwanane. (Yer. 29:11) Diangana musamu wa nsayi wena! Ka wena musamu wa nzitukulu ko bu tutomo zoloko Yehova! Ngano ntia musamu wakaka wusaka ti tazolo matieleka? Matieleka ndandu zazingi matunatinaka. Ntiana tikâlu tisikamasaka bato, tivuvu tieto tisikamanaka mu Bibila, tilendi tu sikamasa bu tubwabanaka na misamu mia mpasi mu luzingu. Mu verse ya lumbu ti, ntumwa Paulo tivuvu tia kwe bâ ku mazulu tie na Bakristo ba tumbu keri zonzelaka. Kâ, misamu mio Bakristo bazinga ha mutoto ntangu zazansoni mitarilaka mpe. (Za 3:16) Diangana, ndongokolo ya tivuvu tia luzingu lwa mankululu yahana nsasa mu luzingu lweto. w22.08 14-15 par. 3-5

Luzolo ni bandu dia lukwikulu. Tikapu tia 13 tia mukanda wa ntete kwe Bisi-Korente misamu miamingi mitariri luzolo tizonzelaka, milendi tu bakisa mu kwikila na mu vutu bâ na lukwikulu mu mpangi zeto. (1 Kor 13:​4-8) Mu tifwani, verse 4 yitâka ti “luzolo vivirila luvivirilaka mpe lwa mbote lwena.” Yehova luvivululu katusongelaka ni bu sa ti sumuka tusumukaka. Buna, tufweti songelaka luvivululu kwe mpangi zeto tala ti batêle peleko bayirikiri musamu wututêle nkesi, peleko wutufwemese. Verse 5 yitêle: “[Luzolo] ka lubakaka nkesi ko. Ka lusaka lutangu lwa mbi yi bamusiri ko.” Ka tuzololo’â ko tasa ‘lutangu,’ wuzololo tâ tatatamana mu bambukila misamu mi yirikiri mpangi zeto mitufwemese. Ekleziaste 7:9 beto yitêlaka ti ka tufweti’â tabâ ‘na manzangu ko [. . .] mu baka nkesi. Yêla mu mwinaka mpangi zaku mu mpila yi bamwinaka Yehova. Nzambi bawu kazololo, mpe ka kêlaka ko kwa bayirika masumu. (Mik. 130:3) Kani tatûlaka kwa mabanza meto mu misamu miawu mia mbi, tufweti dingaka mu zaba bifu biawu bia mbote.—Mat. 7:​1-5. w22.09 3-4 par. 6-7

Buku dia Daniele mbo dibangulaka mpila yi yôkela misamu mia nzitukulu mu ntangu ya mansukina. Mu tifwani, Daniele 12:1 mbo yibangulaka ti Mikayele, wuzololo tâ Yezu Kristo, telamane ‘mu bungu dia bubote bwa kanda [dia Nzambi].’ Titini ti tia mbikululu tiabatika mu lungana mu 1914, mu ntangu yi batumba Yezu Mutinu wa Timfumu tia Nzambi tia ku mazulu. Kâ, Daniele watâ mpe ti Yezu ‘mbo katelama’ mu ‘ntangu ya mpasi ntiana bu yalembo toko kwa bâ tûka bwa salama nsi ya ntete tii mu ntangu yo.’ ‘Ntangu yo ya mpasi’ ni “mpasi ziyôkele” zi bazonzelaka mu Matie 24:21. Ni ku nsuka ya ntangu yo ya mpasi, wuzololo tâ ku Armagedo, Yezu katelama, peleko kanwanina kanda dia Nzambi. Buku dia Nzabukusu mbo ditâka ti kanda dio ni yungi dia bantu ‘batûkiri ku mpasi ziyôkele.’—Nza. 7:​9, 14. w22.09 21 par. 4-5

Nkumbu ze za tsonama bwabu mu buku dio, balendi zakatula. Ntiana’eti kwa Yehova nkumbu zango mu crayon katsonekena zo. (Nza. 3:5) Tufweti sarila ngolo ngatu nkumbu zeto zatatamana mu bâ mu buku dio tii ntangu yi batsoneka zo mankululu mu encre. Mu tikunku timosi tie na nkumbu za tsonama mu buku dia luzingu mwe na bantu ba basola mu kwe yâla na Yezu ku mazulu. Tintwari na misamu mia tâ ntumwa Paulo kwe Bakristo ba ku Filipe, nkumbu za Bakristo ba tumbu ba batikisa mu kwe bâ ku mazulu za tsonama zena mu buku dia luzingu bwawu bu. (Flp 4:3) Kâ ngatu nkumbu zawu zatatamana mu bâ za tsonama mu buku dio, bafweti bâ ba kwikama. Ha manima bu babakaka tiniemo tia mansukina, ni bu wubâ ntete lufwa lwawu peleko ntete mbatukulu ya mpasi ziyôkele, nkumbu zawu mbo zitsonama mankululu mu buku dia luzingu.— Nza. 7: 3. w22.09 14 par. 3; 15 par. 5-6

Ngano musamu wu wa weka bwabana na wo? Muntu wulembi bidia bi tomo zoloko. Kâ, mu bungu ti ntangu ya fioti ye naku peleko mabanza kwakaka me naku, diri bio mu ntinu-ntinu, mpe kuta dinga mu zaba luwu lwa bima bi ta dia ko. Bu meni manisa mu dia, wizi bakula ti mu ntinu-ntinu diriri, mpe mbo keti zoloko mu dia malembe-malembe ngatu wazaba luwu lwa muna nsunsu. Mpila mosi mpe, ngano weka tanga Bibila mu ntinu-ntinu, mpe wizi bakula ti kubongele’â ntangu ko ya zaba luwu lwa nsangu ze mô? Bongaka ntangu ya tangaka Zu dia Nzambi; taluzulaka mpila ya yôkela binsamu, wâka mazu, mpe banzaka mu mio mi tangaka. Bu sila bo, mbo kwizi bâ mu nsayi. Yezu wanoma “ngamba ya kwikama na ya ndwenga” mu hanaka bidia mu ntangu ya fwanana, mpe bubote tutomo diaka mu timpeve. (Mat. 24:45) Misamu miamiansoni mi dukisaka ngamba ya kwikama mbo misikamanaka mu Zu dia Nzambi.—1 Tes. 2:13. w22.10 7-8 par. 6-8

Bibila diatâ ti mu bilumbu bia mansukina, mbo kwa keti bâ bantu basehesela bampwana’awu. (2 Pi. 3:​3, 4) Bawu ni bo basilaka, mu bungu ti bazololo mu landa nsatu zawu za misamu mia mbi. (Yude 7, 17, 18) Bwe tulendi sila keba mu lembo landa tifwani tia bantu baseheselaka bampwana’awu? Mpila yimosi yi tulendi bwa sila ni mu lembo saka tintwari na bantu ba mpila yo. (Mik. 1:1) Wuzololo tâ ka tufweti’â tawirikilaka mpe ka tufweti’â tatangaka tima ni tima tia ba-aposta ko. Mbo tubakulaka ti tala ti ka tusiri’â keba ko, ka wubâ musamu wa mpasi ko mu bâ na tifu tia seheselaka bantu, na mu batika mu bâ na ntembe mu Yehova na mu lubakusu lu tubakaka mu organizasio’andi. Mu lembo diatila mu mpila yo tulendi tiyula biyuvu ebi: ‘Ngano nzonzolo ya mbi yivulu bâka nani bu tubakaka lutwalusu peleko mbangululu ya môna? Ngano tifu ti vulu bâka nani tia dinga misamu mia mbi kwe bô batutwarisaka?’ Bu tusarilaka manzangu mu tomesa bifu bio, Yehova mbo kayangalalaka mu beto.—Bin. 3:​34, 35. w22.10 20 par. 9-10

Mpeve ya Nzambi yayika Ezekiele ngolo mu tisalu tia samuna kwe bantu beri na tungu, na mitima mia kuba mu teritware’andi. Yehova watêla Ezekiele: ‘Ntituri tidiri tiaku tia kangama ntiana bidiri biawu, mbunzu’aku ya kuba ntiana mbunzu zawu. Ntituri mbunzu’aku ya kuba ntiana diamant, yôka bukuba na tari [dia silekse]; kubatînandi, kubândi na bunkuta ha matu mawu.’ (Ezk. 3:​8, 9) Diangana Yehova watâ kwe Ezekiele: ‘Kubikandi tungu dia bantu diakunôkesa. Mbo nikuyika ngolo.’ Ha manima, mpeve ya Nzambi yanata Ezekiele ku teritware yi kafweti samunina. Ezekiele watsoneka: ‘Koko kwa Yehova ngolo kweri mu meno.’ Wafanakana ti mbikuri kayôkesa lumingu lumosi mu longoka nsangu zi kaketi samuna ngatu katâ zo na lukwikulu lwalwansoni. (Ezk. 3:​14, 15) Ha manima, Yehova wamutêla ti kenda ku mbuka yalembo bâ miongo (plaine), mpe kûna mpeve yamukota. (Ezk. 3:​23, 24) Ezekiele wa kubama weri mu batika tisalu tiandi. w22.11 4-5 par. 8-9

Mbikuri Habakuke mpasi zazingi kabwabana na zo. Ntangu yeri kô, kampe wayizi bâ na ntembe ti Yehova yandi keri belokelaka lwaka. Buna wayizi zabikisa mabanza mandi kwe Yehova mu lusambulu. Yehova wahana mvutu mu lusambulu lwa bunsungu lwa tisari tiandi tia kwikama. (Hab. 2:​2, 3) Bu kamana dimbitila mu nsalulu za mvukulu za Yehova, Habakuke wayizi vutu bâ na nsayi yayingi. Wayizi bâ na lukwikulu ti Yehova yandi keri kipaka, mpe yandi kaketi bakisa mu korela misamu mia mpasi. (Hab. 3:​17-19) Ngano ntia malongi tuta baka? Bu bwabanaka na mpasi, sambila Yehova mpe mu têla bwe tamona. Ha manima dinga lubakusu lwandi. Bu sila bo, lendi bâ na lukwikulu ti Yehova mbo kakuhana ngolo ze naku nsatu mu korela. Mpe bu kwizi mona lubakusu lwandi, timinu tiaku mu Yandi mbo titomo kula. Tala ti tatamane mu landa programe’aku ya misamu mia timpeve, ku bika ntontolo peleko ntembe ko za kuhambasa na Yehova.—1 Tim. 6:​6-8. w22.11 15 par. 6-7

Yezu na bimpumbulu biole bieri ha lweka lwandi mpasi beri monaka bu beri fwaka malembe-malembe. (Like 23:​32, 33) Bimpumbulu bio biasehesela Yezu (Mat. 27:44; Mak. 15:32) Kâ mosi wasoba mutima’andi. Watâ ti: “Yezu, kumbambukila moyo bu kwiza mu Timfumu tiaku.” Yezu wamuvuturila na nzonzolo ye mu verse ya lumbu ti. (Like 23:​39-42) Misamu miata Yezu kwe timpumbulu tio mi fweti tutuma mu banza mu mpila yibela luzingu ku paradi. Tulendi longoka misamu mitariri paradi bu tu taluzulaka luyalu lwa tidzunu lwa mutinu Salomon. Mpe tulendi kekolo ti Yezu, yandi yokêle Salomo, mbo kasala tintwari na bo bayâla nandi, mu nata nsobolo za mbote ha zulu ntoto. (Mat. 12:42) Buna, “bimeme biakaka” bifweti taluzula misamu mi bafweti yirika mu ba bantu bazinga mankululu ku paradi.—Za 10:16. w22.12 8 par. 1; 9 par. 4

Izaya beto kahanaka lukwikulu ti Yehova mbo katomo katuwirikila bu tumuyawurila, mpe mbo kakulu hana mvutu mu ndiyawululu zeto. Izaya vutulu tâ ti: ‘Buna kwa bu kakuwâ, mbo kakuhana mvutu.’ Misamu mio mihanaka lukwikulu, beto mitubambulaka ti Tata’etotomono zolo mu bakisa bô bamulombaka lubakusu. Luzabu lwa musamu wo beto lubakisaka mu korela na nsayi yayansoni. Yehova lusambulu lwa muna muntu mu beto katomo wirikilaka. Mu bungu dia nti tulendi têla bo? Mu zu di batsonekena Izaya tikapu 30, ntelo ya ‘ku’ yi basarila mu verse 19, muntu mosi yitarilaka. Mu Hebre, wuzololo tâ ti nsangu muna muntu zita tarila. Izaya watsoneka: ‘kuvutu’â dila ko’; ‘mbo kakufwila tiari’; ‘mbo kakuhana mvutu.’ Bu kena Tata dia luzolo, muna muntu mu beto kakipaka, mpe tusambulu twa muna muntu katomo wirikilaka.— Mik. 116:1; Iza. 57:15. w22.11 9 par. 5-6

Tisalu tia samuna na tia longesa, nsayi na tidzunu titunatinaka ntono nkwamusu. Mu mbandu ya ntete, mfumu za Bayuda bu zatuma bantumwa mu bika mu samuna, babakala bo ba kwikama basola mu tumamana Nzambi. Batatamana mu samuna, mpe tisalu tio nsayi tieri ba tâka. (Bis. 5:​27-29, 41, 42) Wa matieleka, bu basilaka tisalu tieto ndilu, tufweti saka keba bu tusamuna. Kâ tamana sa miamiansoni mi tulenda, mbo tukwizi baka tidzunu titûkaka mu nsayi ya sarila Yehova na ya zonzela nsangu zivukisaka luzingu. Bâ na lukwikulu ti ntono misamu mia mpasi, tulendi bâ mu tidzunu. Mu ntangu zo, fweti bambuka ti tidzunu tie naku nsatu ni tidzunu ti lendi hana kwa Yehova. Mu sikirila mu ntangu yi bwabana na epidemi, katastrofe peleko nkwamusu. Tatamana mu bâ penepene na organizasio’andi. Bambukilaka bilumbu bia nsayi bita ku kêla ku matu. Bu kwe siri bo, ‘Nzambi ya tidzunu [mbo] kabâ’ naku.”—Flp. 4:9. w22.12 21 par. 17-18

Mu sila bo, tufweti sarila ngolo. Diangana, tufweti katula bifu bia mbi ntiana diki, nkesi na miangu. (Efz. 4:​31, 32) Kâ, wulendi bâ musamu wa mpasi. Mu bungu ti bifu biakaka bia mbi biatomo namatana. Mu tifwani, Bibila bantu bakaka ditâka ‘bankwa-nkesi,’ na ‘bankwa-diki.’ (Bin. 29:22) Muntu wa mpila yo fweti sarila ngolo mu sa nsobolo ni bu sa ti ha manima ma bateme. (Rom. 7:​21-23) Sambila Yehova mu bungu dia tifu tia mbi ti ta telamana, mpe bâ na lukwikulu ti mbo kakuwirikila, mpe mbo kakubakisa. (1 Za 5:​14, 15) Ni bu sa ti Yehova ka sa timangu ko mu katula tifu tiaku tia mbi, lendi ku yika ngolo ngatu ka wavutuandi sarila tifu tio. (1 Pi. 5:10) Ha manima, fweti diata tintwari na lusambulu lwaku bu lembo yirika misamu milendi sa ti tifu tio tiavutu kâla. Mbanzulu peleko nsatu za mbi bu zikuturila, sarila ngolo mu kulu za katula.—Flp. 4:8; Kol. 3:2. w23.01 10 par. 7, 9-10

Mpila yimosi yi tusongelaka luzolo, ni mu ntangu yi tusamunaka na luhemo lwalwansoni. Kwe bantu babansoni ba tubwabanaka na bo tuzonzaka. Ka tusolaka bantu ko mu bungu dia mukanda nitu’awu, zu diawu, bimvwama biawu peleko lukolo lu basa. Mu mpila yo, tintwari tusalaka na kani dia Nzambi ‘zololo ti bantu babansoni bavuka, batula mpe ha luzabu lwa butieleka.” (1 Tim. 2:4) Tulendi songela mpe luzolo lweto mu Nzambi na mu Kristo bu tusongela luzolo lweto mu mpangi zeto. Bawu tubelokelaka lwaka bu tubayikaka moko mu ntangu ya mpasi. Bawu tutindisaka bu bafwiluluku muntu wu bazololo, bu tukwe ba talaka bu bâka na timbevo, mpe bu tusarilaka ngolo mu ba tindisa bu bâka ba nôka. (2 Kor. 1:​3-7; 1 Tes. 5:​11, 14) Bawu tutatamanaka mu sambirila bu tubambukaka ti ‘lusambulu lwa muntu wa sungama nguria ngolo lwena.’—Zaki 5:16. w23.01 28-29 par. 7-8

Ntiana kwa muntu wusalaka tisalu tia ntungulu wutomesaka mpila’andi ya sarila, beto mpe tulendi kwizi bâ ngolo mu tunga bampwana’eto. Tulendi bakisa bampwana’eto mu baka ngolo bu tubazonzela bifwani bia bantu balenda mu korela nkwamusu mu ntama. (Ebr. 11:​32-35; 12:1) Tulendi singasa tidzunu bu tuzonzela misamu mia mbote mi tumonaka kwe bantu bakaka, tulendi tia simbirila bu kubâka misamu, mpe tulendi tia kârisa bu tubâka na mabanza ma swaswana. (Efz. 4:3) Mpe tulendi tatamana mu yika timinu tia mpangi zeto ngolo bu tubazonzela matieleka ma Bibila ma mfunu, bu tubahana lubakusu lwe nawu nsatu, mpe bu tuyika moko bô bayikiri na timinu tia wola. Tulendi mona nsayi ya mpila yo, bu tubakisa mpangi zeto mu yika timinu tiawu ngolo. Nzo zi batungaka mbo zibebaka, kâ tisalu tieto tilendi zingila ntangu zazansoni! w22.08 22 par. 6; 25 par. 17-18

Yezu wazonzela tifu tia mfunu tie neto nsatu tala ti tuzololo mu bakula Zu dia Nzambi—lenda dia swasikisa. (Mat 24:15) Ngano lenda dia swasikisa ni nti? Ni lenda dia mona bwe mabanza mata kwelana, lenda dia swasikisa mabanza makaka na dia mona mabanza ma swekama. Yezu wasongela mpe ti lenda dia swasikisa die neto nsatu mu bakula misamu milungisaka mbikululu za Bibila. Nsatu tifu tio ye neto mpe mu tomo baka ndandu mu mio mi tutangaka mu Bibila. Yehova wahana lenda dia swasikisa kwe bisari biandi. Buna, mu sambila bu mu lomba lubakusu mu kurisa tifu tio. Bwe lendi sarila tintwari na lusambulu lwaku? Tomo taluzula mio mi ta tanga, mpe tala bwe mikwelanaka na misamu mi zebi. Dinga verse yi ta tanga mu Bibila mpe tala bwe lendi ya sarila mu luzingu lwaku. (Ebr. 5:14) Bu sarila lenda dia swasikisa bu tangaka, mbo kwizi tomo bakula Matsonoko. w23.02 10 par. 7-8

Banza’eti ndiku’aku yikuheni tablo ya ntama ye na dessin ya nkatika ya toma. Kâ, yabatika mu sanza, yabaka mvindu, mpe yasa miamvu. Ntono beba kô, tablo yo milio za dollar yafwa. Ntembe kâni, mbo tomo zolo mu kengerela tablo yo. Mpila mosi mpe, Yehova watuhana luzingu die kabu dia ntalu. Diangana, Yehova wasongela ti luzingu lweto ntalu lwena bu kahana Mwana’andi mu mukayulu mu bungu dia beto. (Za 3:16) Yehova ni Titeko tia luzingu. (Mik. 36:9) Ntumwa Paulo matieleka mô ma katambula bu katâ: ‘Mu Yandi twe na luzingu, tukwe diatiri, twe ba moyo.’ (Bis. 17:​25, 28) Buna, wufwanakane mu tâ ti luzingu lweto kabu diena diatûka kwe Nzambi. Mu luzolo lwandi, bio bie neto nsatu katuhanaka mu tatamana mu bâ ba moyo. (Bis. 14:​15-17) Kâ, Yehova ka saka bimangu ko mu kengerela luzingu lweto. Kâ, zololo ti tasa miamiansoni mi tulenda mu kipa tikolela tieto tia tinsuni na tia timpeve.—2 Kor. 7:1. w23.02 20 par. 1-2

Diangana Yehova tutomo tondaka mu bungu dia Bibila! Mu kati dia buku dio, malongi ma ndwenga katuhanaka malendi tu bakisa mu lenda mu telamana misamu mia mpasi mi tubwabanaka na mio lumbu ti. Tivuvu tia mbote katuhanaka mu bungu dia bilumbu bia ku matu. Wuyôkele mfunu, Yehova wasarila Bibila mu tu zabikisa bifu biabîngi bitariri timuntu tiandi. Bu tudimbitilaka mu bifu biandi bia toma, mitima mietomu nsayi mikwizi bâka, mpe mbo tudingaka mu kwizi bâ na tindiku tia ngolo na Yandi. (Mik. 25:14) Yehova zololo ti bantu bamuzaba. Mu ntama, watizabikisa kwe bantu mu nzila ya ndozi, ya bimona-meso na ya bambazi. (Lut. 12:6; Bis. 10:​3, 4) Kâ, bwe taketi longokela ndozi zo, bimona-meso bio na nsangu zo za bambazi tala ti ka batsoneka zo ko? Ntiangu Yehova kalomba kwe bantu mu tsoneka misamu mi kazolo tazaba. Mu bungu ti ‘nzila ya Nzambi ya matieleka ya lunga yena,’ tulendi bâ na lukwikulu ti mpila yi kasola mu zonza na beto ya mbote yena, mpe beto yibakisaka.—Mik. 18: 30. w23.02 2 par. 1-2

Bâ na makani ma mfunu. Bâ na makani mayika timinu tiaku ngolo, mpe makubakisa mu bâ Mukristo wa yela. (Efz. 3:16) Mu tifwani, lendi bonga nzengolo ya tomesa ndongokolo’aku na ntangulu’aku ya Bibila. (Mik. 1:​2, 3) Peleko lendi yêla mu vulu sambilaka mu mutima’aku wawansoni. Kampe nsatu ye naku ya bâ na tifu tia tiyimina mu nsololo ya nsaka zaku na mu mpila yi sarilaka ntangu’aku. (Efz. 5:​15, 16) Mbo kwizi bâ Mukristo wa yela bu kwe bakisi bantu bakaka. Mu tifwani, lendi bâ na kani dia bakisa bantu ba nuna na bô bê na bifuma mu timvuka tiaku. Kampe lendi kwe ba sumbila tima peleko lendi ba bakisa mu sarila appareils électroniques. Mbo songela mpe luzolo kwe bantu balembolo mu timvuka bu ba samunina nsangu za mbote za Timfumu. (Mat. 9:​36, 37) Tala ti bulendi bâ, sarila Yehova mu tisalu tia ntangu zazansoni. w22.08 6 par. 16-17