Septembre

Bu tusarilaka lenda dia zonza mu mpila ya mbote, kwe bantu tusongelaka ti beto bisari bia Yehova biena. Bantu batuzungiriri tubakisa mu tomo mona luswaswanu lwe ha kati dia ‘wô sarilaka Nzambi na wô lembo mu sarilaka.’ (Mal. 3:18) Tataleno bwe musamu wo, we wa matieleka mu tifwani tia mpangi ya yikento ye na nkumbu Kimberly. Bamuhana devware ya sala na mpwana’andi ya ku lycée. Bu bamana sala tintwari, ndiku’andi ya ku lukolo wamona ti Kimberly wa swaswana wena na bala ba lukolo bakaka. Keri’â tsâlaka bampwana’andi ko, keri’â tolaka bantu bakaka mu mpila ya mbi ko, misamu mitindisaka keri tâka, mpe keri’â sarilaka nzonzolo ya bola ko. Ndiku ya ku lukolo ya Kimberly wayituku, mpe watambula ndongokolo ya Bibila. Diangana Yehova nsayi yibâka nandi mu ntangu yi tuzonzaka mu mpila yibendaka bantu mu matieleka! Beto bansoni tuzololo tazonzaka mu mpila yikembesaka Yehova. w22.04 5-6 par. 5-7

Yezu wakûla Mariya dia ku Magdala mu lutumu lwa bademo za 7! Tifu tiandi tia tonda tiamutuma mu bâ mulongoki wa Yezu, na mu yika moko tisalu tia Yezu. (Like 8:​1-3) Ni bu sa ti Mariya watomo tonda mu mio mia yirika Yezu mu bungu dia yandi, kampe keri’â tomo bakulaka misamu mia minene mia keti yirika Yezu mu bungu dia yandi ku matu ko. Yandi luzingu lwandi kaketi hana ngatu bô basarilaka timinu mu yandi bamona nsayi ya luzingu lwa mankululu. (Za 3:16) Kâ, Mariya wasongela ti watonda Yezu, bu kabâ wa kwikama. Mu ntangu Yezu yi keri monaka mpasi ha poto dia matimuna, Mariya ha ndeko keri mu bungu ti Yezu keri belokelaka lwaka, mpe wazolo mu tindisa bantu bakaka beri hô. (Za 19:25) Ha manima ma lufwa lwa Yezu, Mariya na bakento bole bakaka, banata bima bi baketi yebesa Yezu mu mpiema’andi. (Mak. 16:​1, 2) Mariya nsayi yeri nandi bu kabwabana na Yezu ha manima ma mvumbukulu’andi kwe ba fwa, na bu kazonza nandi—diangana milongoki miamingi mialembo baka bweso bo.—Za 20:​11-18. w23.01 27 par. 4

Ka tufweti’â tasikamana kwa ko mu mio mi tayirika mu tisalu tia Yehova mu ntama. Ni bu sa ti misamu miamingi mitukanzakasaka lumbu ti, tufweti tatamana mu bâ na tisalu tiatingi mu tisalu tia Mfumu, mu tatamana mu bâ na meso ma tia tii ku nsuka. (1 Kor. 15:58; Mat. 24:13; Mak. 13:33) Tufweti bâ na luhemo, mpe tufweti hana mutima’eto wawansoni mu nsambululu’eto. Nsangu za hana Yezu kwe timvuka tia Lawodise musamu wakaka weri nawu zeri songelaka. Lungolobi (tiédeur) lweri nawu mu nsambululu’awu. Mu bungu ti ka beri’â na lwaka ko, Yezu wabatêla ti mu mpasi mpe mu tiari beri. Wafwanakana basongela luhemo lwalwingi mu bungu dia Yehova na mu bungu dia nsambululu’andi. (Nza. 3:​16, 17, 19) Ntia malongi tuta baka? Tala ti ka tusiri’â na luhemo lwalwingi ko, tufweti kurisa luzolo lweto mu bungu dia bimvwama bia timpeve bie neto. (Nza. 3:18) Kani kabwe, ka tuzololo’â ko ti luzingu lwa nsayi lwatukabakasa, mpe lwasa ti tatûla misamu mia timpeve ku manima. w22.05 3-4 par. 7-8

Tûka mivu miamingi, Yehova buku dia nzitukulu katsonekaka. Mu buku dio nkumbu ze mô; ya ntete ni ya Abele weri Mbangi ya ntete ya kwikama. (Like 11:​50, 51) Ha manima, Yehova wavutu yika nkumbu mu buku dio mpe lumbu ti nkumbu zazingi ze mô. Mu Bibila buku dio die na nkumbu “buku dia mbambukulu moyo,” na “buku dia luzingu.” (Mal. 3:16; Nza. 3:5; 17:8) Mu buku dio dia nzitukulu mwe na nkumbu za bantu babansoni basarilaka Yehova, bamutînaka peleko bamuzitisaka mpe bazololo nkumbu’andi. Bawu bweso bwa luzingu lwa mankululu babaka. Lumbu ti nkumbu’eto yilendi bâ ya tsonama mu buku dio tala ti tukurisi tindiku tia ngolo na Yehova tisikamanaka mu mukayulu wa Mwana’andi Yezu Kristo. (Za 3:​16, 36) Beto bansoni tuzololo ti nkumbu zeto za tsonama mu buku dio ni bu tuba na tivuvu tia kwe bâ ku mazulu peleko tiabâ ha mutoto. w22.09 14 par. 1-2

Buku dia Nzabukusu ‘drago yeri na langi wa tiya’ dizonzelaka. (Nza. 12:3) Drago yo yanwanisa Yezu na mbazi zandi. (Nza. 12:​7-9) Kanda dia Nzambi yinwanisaka, mpe timfumu yihanaka kwe guvernema za bantu. (Nza. 12:17; 13:4) Ngano drago ni nani? Ni “nioka ya ku mbatukulu, yi batâka nkumbu Diabulu, na Satana.” (Nza. 12:9; 20:​2, NWT) Ni yandi yikaka mbeni zakaka za Yehova moko. Nti biturila drago? Nzabukusu 20:​1-3 mbo yibangulaka ti mbazi yimosi yilosa Satana mu abime, wuzololo tâ ti mbo kabâ mu boloko. Bu kabâ mu boloko, Satana ka vutu’â wubakasa makanda ko tii bu wa mvula 1000. Ha manima, Satana na bademo bandi mankululu babafukisa, mfukulu yo bamonekese yo na ntangu yi babalosa mu ‘zanga dia tiya mpe die na sufre.’ Yêla’eti mu banza nza yilembolo Satana na bademo bandi. Diangana ntangu ya nsayi yibâ! w22.05 14 par. 19-20

Yezu tisari tia ngolo tieri. Mu mivu miandi mia ntete ha mutoto, wasala tisalu tia mabaya. (Mak. 6:3) Ntembe kâni, bibuti biandi mbo bieri yangalalaka mu lubakusu lu keri ba hanaka bu beri sarilaka ngolo zawu mu lungisa nsatu za kanda diawu dia dinene. Mu bungu ti Yezu wa lunga weri, lenda dieri nandi dia sala tisalu tia lunga. Buna, kampe bantu babingi beri zoloko bima bi keri yirikaka! Kampe Yezu tisalu tiandi tia keri zoloko. Bu keri salaka tisalu tiandi tia tinsuni, Yezu ntangu mpe keri sârisaka ya sala bisalu bia timpeve. (Za 7:15) Ha manima, bu keri tisamuni tia ntangu zazansoni, wayizi longa bantu beri mu wirikilaka mu mpila eyi: ‘Ka lusalandi mu bungu dia bidia bilosokaka, kâ mu bungu dia bidia bitatamanaka mu luzingu lwa mankululu.’ (Za 6:27) Mpe mu tinzonzi ha zulu mongo, Yezu watâ: ‘Ku lufweti lundila bimvwama, ni ku zulu.’ (Mat. 6:20) Ndwenga za Nzambi beto zibakisaka mu bâ na mabanza ma delakana mu tisalu tieto tia tinsuni. Bu twena Bakristo beto balongesaka mu sala ngolo na mu sala tisalu tia mbote. w22.05 22 par. 9-10

Enise tifwani tia mbote kasongela kwe Timote. Ntembe kâni yandi wabakula ti, luzolo lwa ngolo mu Yehova lweri tumaka nsalulu za nguri’andi. mpe nguri’andi mu nsayi keri, mu bungu ti Yehova keri sarilaka. Mpila mosi mpe lumbu ti, mama zazingi zayizi bakisa makanda mawu mu sarila Yehova ‘bawu ka batê diambu.’ (1 Pi. 3:​1, 2) Lulendi sila bo. Mu bwe? Tûla tindiku tiaku na Yehova ha tibuka tia ntete. (Lub. 6:​5, 6) Ntiana kwa mama zazîngi, misamu miamingi yirikaka. Ntangu’aku, mbongo zaku hanaka, mbo sulukaka tolo, misamu miakaka mpe yirikaka mu lungisa nsatu za tinsuni za bala baku. Kâ misamu miamiansoni mi yirika mu lungisa nsatu za bala baku, ka mifweti’â miakukabakasa ko mu yika tindiku tiaku na Yehova ngolo. Vulu bâka na ntangu ya sambilaka, ya saka ndongokolo ya Bibila ya nge beni na ya kubikaka tukutakanu twa timvuka. Bu sila bo, timpeve tiaku yika ngolo, mpe tifwani tia mbote songela kwe kanda diaku na kwe bantu bakaka. w22.04 16 par. 1; 19 par. 12-13

Diangana mu tidzunu tubâka, bu tuzabaka ti ka twena na dema ko dia bonga nzengolo yitariri mpila yi bafweti fundisila bantu! Bu kena Mfundisi yiyôkele Yehova Yandi beni kipa musamu wo wa mfunu. (Rom. 14:​10-12) Tulendi bâ na lukwikulu ti Yehova mbo kafundisa tintwari na mitieno miandi mia lunga mitariri mbote na mbi. (Mba. 18:25) Diangana, kani kabwe ka yirika musamu ko wukondo buderede! Na timina diadiansoni tukêlaka ntangu Yehova yi kakatula misamu miamiansoni mia mbi mia nata masumu. Mu ntangu yîna, mputa zazansoni zatunatina misamu mio mbo ziwasa. (Mik. 72:​12-14; Nza. 21:​3, 4) Ka tuvutu’â mia bambukila ko. Ntete ntangu yo ya mbote yatula, mbo tutondaka Yehova mu lenda di katuhana dia landa tifwani tiandi tia lemvokela. w22.06 13 par. 18-19

Mfundisi ya mbote yifweti tomo bakula misiku. Wa fwanana ka tomo zaba mbi na mbote. Ngano mfundisi ya mbote nti biakaka bi fweti bâ nandi? Fweti bâ na lenda dia tomo taluzula misamu buna bu miena ntete kahana nzengolo. Buna, Yehova ni Mfundisi yiyôkele mu bungu ti ntangu zazansoni misamu miamiansoni mia kazabaka. Yehova ka fundisaka ntiana bu fundisilaka bantu ko, mu bungu ti misamu miamiansoni mia kabakulaka mu mpila ya lunga. (Mba. 18:​20, 21; Mik. 90:8) Ka sukisinaka ko kwa mu mio mi monaka bantu peleko mu mio mi bawâka. Mu mpila ya lunga katomo bakulaka bifu na misamu mia biarila muntu kwe bibuti biandi, mpila yi bamukurisila, mbuka yi kabêlaka na mbanzulu zandi. Yehova mitima mpe katangaka. Mio mitumaka muntu katomo bakulaka, makani mandi, na nsatu zandi. Ka kwena tima ko tilendi swamana kwe Yehova. (Ebr. 4:13) Buna, mulemvo wa Yehova mu luzabu lwandi lwa lunga lwa misamu wu sikamanaka. w22.06 4 par. 8-9

Tufweti saka keba mu mpila Satana zi kasarila kwe Yobe, mu bungu ti ni zo kwa mpe kasarilaka lumbu ti. Satana mbo katâka ti ka tuzoloko’â Yehova Nzambi’eto mu matieleka ko, mpe mbo tumuteka manima tala ti tufweti vukisa luzingu lweto. Satana mbo katâka mpe ti Nzambi ka tu zololo’â ko, mpe ka monaka ngolo zi tusarila ko mu mu tâ nsayi. Mu bungu ti ndwengosolo yo ye neto, beto twe na tivuvu mu Yehova nsalulu za Satana za tuzebi. Tufweti bongelaka misamu mia mpasi ntiana bweso bwa tizaba. Mpasi zabwabana na Yobe zamubakisa mu zaba misamu mi kalembo bêla na mio ngolo na mu delakasa mio. Walongoka ti wafweti toko kurisa tifu tiandi tia kuluka. (Yobe 42:3) Beto mpe tulendi longoka misamu miamingi bu tubwabanaka na misamu mia mpasi. Bu tukwizi zabaka misamu mi tulembolo na mio ngolo, tulendi sarila ngolo mu delakasa mio. w22.06 23 par. 13-14

Yehova lubakusu lwandi katukanisinaka. Mu tifwani, ntete katâ: “Beno mbangi zani zena,” Yehova watâ ti: ‘Bu sabuka mamba, meno mbo nibâ naku, bu sabuka nzari, ka zikuyabama ko. Wamana diata tiya, kuya ko, mpe milaku mia tiya ka mikuniengesa ko.’ (Iza. 43:2) Ntangu zakaka, mu tisalu tia samuna makuba mafwanakane na niamba tubwabanaka na zo, na ntontolo za ngolo ntiana tiya. Ni bu sa ti ni bo, na lubakusu lwa Yehova, mbo tutatamanaka mu samuna. (Iza. 41:13) Bantu babîngi lumbu ti bakalaka nsangu zeto. Tubambukiri ti ka wuzololo’â tâ ko ti tisalu tieto tia Mbangi za Yehova talembana. Butindi na ngolo tubâka na bo mu bungu ti tuzebi ti Yehova nsayi yibâka nandi bu tutatamanaka mu samuna nsangu zandi na kwikama kwakwansoni. Ntumwa Paulo watâ: ‘Muna muntu mbo kabaka mfutulu, buna bu têla tisalu tiandi.’—1 Kor. 3:8; 4:1, 2. w22.11 4 par. 5-6

Lumbu ti, ndungananu ya mbikululu za Bibila ya tumonaka. Bantu ba “mazu mamansoni ma makanda,” mbo balongokaka mu zonza “zu dia verela” dia matieleka ma Bibila. (Zka. 8:23; Sof. 3:9) Bantu yôka 8000000 bê mu nsi na teritware 240 bayizi vukana na organizasio ya Yehova, mpe mivu miamiansoni mafunda ma bantu makwizi batusuku! Kâ biyôkele lutangu mu mfunu, ni bifu bia timpeve, “timuntu tia môna,” biayizi bâ na milongoki mio mia môna. (Kol. 3:​8-10) Babingi bayizi bika bunsuza, miangu, mabanza ma mbi, mpe masîka ma hata diawu. Mbikululu ye mu Izaya 2:4 ya yita lungana; yitêle: ‘Ka bavutu’â longoka muzingu ko.’ Bu tusarilaka ngolo mu lwata timuntu tia môna, bantu tubendaka mu organizasio ya Nzambi, mpe mu mpila yo mpe tusongelaka ti ntwarisi’eto Yezu Kristo tukwe landi. (Za 13:35) Mu bungu dia nti misamu mio miyilamanaka? Mu bungu ti Yezu lubakusu lwe neto nsatukatuhanaka. w22.07 9 par. 7-8

Bu tusambilaka Yehova, tufweti bâka na buzitu bwabwingi. Banza bimona-meso bia mona Izaya, Ezekiele, Daniele, na Za. Babansoni bazonzela Yehova ntiana Mutinu wa nzitukulu. Izaya ‘wamona Yehova wazakala ha muyâlu watomo zangama.’ (Iza. 6:​1-3) Ezekiele wamona Yehova wazakala ha zulu char’andi ya ku mazulu, mpe mutsamina weri ntiana lukandu (arc-en-ciel) weri mu zungirilaka. (Ezk. 1:​26-28) Daniele wamona “Mbuta ya bilumbu” walwata binkuti bia mpembe, na tiya tweri tûkaka ku muyâlu’andi. (Dan. 7:​9, 10) Mpe Za wamona Yehova wazakala ha muyâlu wu bazungirila mu tima tieri ntiana lukandu lwa émeraude. (Nza. 4:2-4) Bu tudimbitilaka mu mukembo wa nzitukulu wa Yehova, mbo tubambukaka ti bweso bwa bunene bwe neto bwa pusana kwe Yandi mu lusambulu, mpe mfunu tumonaka ya mu sambila na buzitu bwabwansoni. w22.07 20 par. 3

Ntwenia, Satana mbo kayêla mu ku kabakasa mu bâ na timinu tia nkatika ngolo na mu pusana kwe Yehova. Mpila yimosi yi kalendi bwa sila ni mu ku nata mu bâ na ntembe mu ndongosolo zakaka za Bibila. Mu tifwani, kampe bantu bakaka mbo bayêla mu ku wisa ti ka Nzambi’â ko watusala, kâ tala ti ba moyo twena mu bungu ti bima mu ta-pulukusu biayilamana. Kampe bu weri mwana fioti ka weri’â wa banzaka ko, kâ lumbu ti musamu wo wa bakulongesaka ku lukolo. Kampe mweni ti mio mi longesaka milongisi miaku mia delakana miena. Wulendi bâ ti ka beka’eti taluzula bidimbu ko bisongelaka ti Mvangi we kô. Bambukaka mutieno we mu Bingana 18:17 wutâka: ‘Zonza wa ntete ku mfundu, mbo kamoneka wa sungama; kâ tinwanisi tiandi bu kakwiza, ni yandi beka fimpa.’ Kani wakwikilaka mu miamiansoni mi longokaka ku lukolo, fweti longoka Bibila na bunsungu bwabwansoni na mikanda mieto mpe. w22.08 2 par. 2; 4 par. 8

Tuzololo tabakula misamu mi tutangaka mu Zu dia Nzambi. Tala ti kâni, ntangulu’eto ka yitunatina ndandu ko. Mu tifwani, tataluzuleno timoko tia sa Yezu na bakala dimosi diatomo zaba Musiku. (Like 10:​25-29) Bakala dio bu kayula nti kafweti sa mu baka luzingu lwa mankululu, Yezu wamunata mu Zu dia Nzambi bu kamutêla: ‘Bwe batsoneka mu Musiku? Nti tangaka?’ Bakala dio walenda mu hana mvutu ya mbote bu kazonzela verse zizonzelaka luzolo mu Nzambi na mu bampwana’eto. (Lev. 19:18; Lub. 6:5) Kâ, tala musamu wu katâ ha manima: ‘Mpwana’ani ni nani?’ Bakala dio wasongela ti ka tomo’â bakula nsasa ya misamu mi katanga ko. Buna, ka zaba ko bwe kaketi sarila Matsonoko mu mpila ya mbote mu luzingu lwandi. Nsatu lubakusu lwa Yehova lwe neto nsatu mu bakula matsonoko. Buna talombaka mpeve santu’andi mu tula mutima mu mio mi tu tangaka mpe ta lombaka mpe lubakusu mu sarila mio mi tutengi. w23.02 9 par. 4-5

“Ngano bwe wazabila matieleka?” Ntembe kâni, mbala zazingi weka hanina tiyuvu tio mvutu. Timosi tia biyuvu mu bingi bi lendi tu yula mpangi ya Mukristo tala ti tuzololo tazabasana. Tuzololo mu wirikila mpangi zeto bu batutêlaka bwe bazabila mpe babatika mu zolo Yehova, mpe tuzololo mu ba têla mu bungu dia nti tuzoloko mu bâ Mbangi za Yehova. (Rom. 1:11) Bimoko bio beto bitubambulaka bwe matieleka me ntalu kwe beto. Nzengolo’eto ya tatamana mu diatila mu matieleka ngolo yiyikamaka—wuzololo tâ tuzololo tatatamana mu diatila mu mpila yitunatina lusakumunu lwa Yehova, mpe yisa ti katutambula. Misamu miamingi misaka ti tazolo matieleka. Wutomono yôka mfunu, tuzololo Yehova we Titeko tia matieleka. Mu Zu diandi Bibila, tayizi longoka mu mu zaba ntiana Mvangi we Nkwa-Ngolo-Zazansoni wasala zulu na mutoto, kâ mpe ntiana Tata’eto dia luzolo die ku mazulu ditomo tu kipaka.—1 Pi. 5:7. w22.08 14 par. 1, 3

Ntumwa Paulo watindisa mpangi zandi mu songasana luzolo mu nsalulu za mbote. (Ebr. 10:24) Wabakisa mpangi zandi mu mio mi keri ba têlaka na mu mio mi keri yirikaka. Mu tifwani, mpangi za ku Yude bu zeri mu nsatu, Paulo wabahana lubakusu bu kasala tisalu tia kaba bima bia dia. (Bis. 11:​27-30) Ni bu sa ti Paulo tisalu tiatingi tieri nandi mu samuna na mu longesa, ntangu zazansoni mpila za bakisila bô beri na nsatu ya bima bia tinsuni keri dingaka. Bu kasila bo, wayika lukwikulu lwa mpangi zandi ti Yehova bawu kaketi kipa. Lumbu ti, bu tuhanaka ntangu’eto, ngolo zeto, mpe bu tusarilaka lenda dieto mu hana lubakusu bu bwaka catastrophe naturelle, beto mpe timinu tia mpangi zeto tuyikaka ngolo. Mpila mosi kwa mpe, bu tuhanaka makabu mu bungu dia tisalu tisalamaka mu nza ya mukaka. Mu mpila zo na zakaka, mpangi zeto tubakisaka mu kwikila ti, kani kabwe Yehova ka bayambirika ko. w22.08 24 par. 14

Mu Bibila, mbikululu zazingi ze mô zalungana, zakaka zalungana ha manima ma mvula yôka 100. Misamu mia ntama ndungananu ya mbikululu zo misingasaka. Musamu wo ka wutuyitukusuku’â ko mu bungu ti Muntu wuvwiri Bibila ni Yehova. Banza’eti mu mbikululu zitariri mbwilu ya mumvuka wa Babilone ya mu ntama. Mu mbandu ya 8 N.M.B, mbikuri Izaya wabikula ti mumvuka wa ngolo wa Babilone mbo baketi wa bwisa. Wahana mpe nkumbu ya muntu waketi wa nunga, Sirise, mpe wabikula mpila yi baketi bwisila mumvuka wo. (Iza. 44:27–45:2) Izaya wavutu bikula ti Babilone mbo baketi ya fukisa, mpe ka kwa keti’â vutu bêla muntu ko. (Iza. 13:​19, 20) Bamede na Baperse babwisa mumvuka wa Babilone mu 539 N.M.B., mpe mbuka yeri mumvuka wo, ka kwasala bêle bantu ko. w23.01 4 par. 10

Yehova watusola mu bâ mu kanda dia bisari biandi bia nza ya mukaka. Diangana, bweso bwa bunene bwena bu tu natinaka ndandu zazingi! (Marke 10:​29, 30.) Mu nza ya mukaka, mpangi ze neto zizoloko Yehova mpe basarilaka ngolo zawu mu landa mitieno miandi ntiana beto. Mazu meto, bikulu bieto, mpe ndwatulu’eto bilendi bâ bia swaswana, kâ mbo tumonaka ti penepene twena na bawu ni bu sa ti mu mbala ya ntete tumonane. Vula-vula, tuzololo mu bâ nawu tintwari mu kembela na mu sambila Tata’eto dia luzolo dia ku mazulu, mpe nsatu yayingi ye neto mu baka nawu tintwari. (Mik. 133:1) Ntangu zakaka beto babakisaka mu nata madema meto. (Rom. 15:1; Nga. 6:2) Beto batindisaka mpe mu tatamana mu sala tisalu tia Yehova, na mu tatamana mu bâ na timpeve tia ngolo. (Ebr. 10:23-25) Banza’eti bwe taketi mona tala ti timvuka ka titukengerelaka ko, mpe ka titubakisaka ko mu telamana mbeni zeto—Satana na nza’andi ya mbi. w22.09 2-3 par. 3-4

Wulendi bâ musamu wa mpasi mu sarila tifu tia tiyimina bu tusarilaka réseaux sociaux. Tala ti ka tusiri’â keba ko, na kondo kwa waya, tulendi kwizi zonzela misamu mia mansweki kwe bantu babingi. Bu tutûla nsangu mu Internet, ka tuzebi’â ko bwe bantu basarila zo peleko ntia musendo mia mbi zinata. Tifu tia tiyimina beto tibakisaka mpe mu kuta mu ntangu mbeni zeto zitutumaka mu ngolo mu ba hana nsangu zilendi tûla mpangi zeto mu mpasi. Musamu wo wulendi tûla mu ntangu yi tubâka ku nsi yi bayiminaka tisalu tieto peleko ku nsi yi balembo tomo tia haninaka nzila, mpe bapolisie yi batuyulaka misamu mitariri bampangi. Tulendi sarila mutieno wutâka ti tufweti kanga munwa’eto mu misamu mio na miakaka. (Mik. 39:1) Tufweti bâ bantu babakwikilaka kwe bantu babansoni ni bu babâ bantu ba kanda dieto, ndiku zeto na mpangi zeto mu timvuka. Mu bâ muntu wu bakwikilaka, tufweti bâ na tifu tia tiyimina. w22.09 13 par. 16

Mu bâ mu nsayi ya matieleka, tufweti diaka bidia bia timpeve. Mpe nsatu bie neto. Ntiangu Yezu katâ: ‘Muntu ka mu dimpa na dimpa ko kwa kayindukilaka; kâ na mu misamu miamiansoni mitûkaka mu munwa wa Nzambi.’ (Mat. 4:4) Buna, ka tufweti’â tayôkesa tilumbu timosi ko, ti tulembo dia bidia bia timpeve bia Zu dia Nzambi. Mu Bibila, na luzolo lwalwansoni, Yehova wahana mabanza ma mfunu mu mpila yi tulendi bêla na luzingu lwa nsayi. Mu kati tulongokaka nsasa ya luzingu ni nti, bwe tulendi pusana kwe Yandi, mpe bwe tulendi bakila mulemvo mu masumu meto. Mpe tivuvu tia toma ti katukanisina mu bungu dia bilumbu bia ku matu tulongokaka. (Yer. 29:11) Matieleka mo matubakaka mu ndongokolo ya Bibila, mitima mieto mafulusaka mu nsayi! Ntangu zazansoni zi bâka wa nôka mu bungu dia misamu mia luzingu, yôkesaka ntangu mu tanga Zu dia Yehova na mu dimbitila dio. w22.10 7 par. 4-6

Na mabanza ma mbote, Bibila ditutindisi mu lembo tatamana mu bâ bantu balembolo zabaka misamu. Ndwenga tubakaka bu tusarilaka mitieno mia Bibila mu luzingu lweto. Malembe-malembe, tukwizi bakulaka bwe mitieno mia Bibila mitubakisilaka mu sa keba mu misamu, na mu bonga nzengolo za ndwenga. Buna, bubote bwena mu taluzulaka nsobolo zi tusaka mu musamu wo. Tala ti Bibila tulongokaka, mpe ku tukutakanu tukwendaka tûka mwa ntangu, tulendi tiyula mu bungu dia nti tweka lembo bongela nzengolo ya tihana kwe Yehova na ya batusu. Tala ti tabatusu, ngano ngolo tusarilaka mu bâ tisamuni mpe mulongi wa mbote wa nsangu za mbote? Ngano nzengolo zeto zisongele ti mitieno mia Yehova mitutwarisaka? Ngano bifu tusarilaka bia Bakristo mu mpila yi tubêlaka na bantu bakaka? Tala ti tumweni ti mbuka ze kô tufweti tomesa, tasa keba mu mbambukulu za Yehova zilwengesaka ‘muntu wulembolo zaba misamu.’—Mik. 19:7. w22.10 20 par. 8

Ezekiele watomo mona ngolo za mpeve santu. Mu timona-meso, wamona mpila yeri sarilaka mpeve santu mu bivangu bia mpeve na mu mifumba mia minene mia char ya ku mazulu. (Ezk. 1:21) Ngano Ezekiele nti kasa? Watsoneka misamu mi kamona. ‘Bu namona tio, nabwa tidiri ha mutoto.’ Ezekiele watomo yituku, buna wabwa ha mutoto. (Ezk. 1:28) Ha manima, ntangu zazansoni Ezekiele yi keri banzaka timona-meso tio tia nzitukulu, lukwikulu lwandi lwayizi yikama ngolo ti na lubakusu lwa mpeve santu ya Nzambi, mbo kaketi lungisa tisalu tiandi. Yehova watuma Ezekiele: ‘Mwana muntu, telama mu bungu ti zonza nizonza naku.’ Yehova bu katêla Ezekiele ti katelama, mpe bu kamuhana mpeve‘andi, Ezekiele wabaka ngolo zeri nandi nsatu mu telama. (Ezk. 2:​1, 2) Ha manima, mpe ntangu yayansoni yi kayôkesa mu tisalu tiandi, koko kwa Nzambi kwatwarisa Ezekiele—wuzololo tâ mpeve santu ya Nzambi.—Ezk. 3:22; 8:1; 33:22; 37:1; 40:1. w22.11 4 par. 7-8

Mbikuri Izaya Yehova kata zonzela ntiana Mulongi wutomo kipaka milongoki miandi, wuta kwe yende ku manima mawu, wuta ba songela nzila yi bafweti landa, mpe wuta ta ba hana malongi. Lumbu ti Zu dia Nzambi ku manima meto tuwirikilaka. Mu bwe? Misamu mia zabikisa Nzambi kwe bantu, batsoneka mio tûka ntama, ntete ntangu ya beto. Buna, bu tutangaka Bibila, ntiana beto tu wirikila Zu dia Nzambi dita tûka ku manima meto. (Iza. 51:4) Bwe tulendi tomo bakila ndandu mu lutwalusu lu hanaka Yehova mu nzila ya organizasio’andi na ya Zu diandi? Tufweti bambuka ti Izaya misamu miole katâ. Wa ntete: “Yi ni nzila.” Wa nzole: “Landeno yo.” Ka wufweni’â ko kwa mu zaba “nzila.” Tufweti mpe ya landa. Mu nzila ya Zu dia Yehova, ntiana bu bangulaka dio organizasio’andi, mio mi kekoloko Yehova mu beto tulongokaka. Mbo tulongokaka mpe mu sarila mio mi tulongokaka. Mu tatamana mu sala tisalu tieto mu bungu dia Yehova, tufweti sarila misamu mio mia miole. Ni mu mpila yo kwa tulendi kwizi baka lusakumunu lwa Yehova. w22.11 11 par. 10-11

Ntangu fioti ha manima ma lufwa lwa ntumwa za Yezu, Bakristo ba bungungu bayizi kota mu timvuka. (Mat. 13:​24-27, 37-39) Bayizi tâ misamu mia bungungu mu benda milongoki kwe bawu. (Bis. 20:30) Musamu wumosi wa bungungu wu babatika mu longesa ni wena’eti, Yezu ka fweti’â hana nitu’andi mbala mosi ko mu bungu dia masumu meto ntiana bu tâka wo Bibila, kâ wafweti hana mukayulu’andi mbala zazingi. (Ebr. 9:​27, 28) Lumbu ti bantu babingi ba nsungu bakwikilaka bungungu bo. Mu eglize bavulu vukanaka —ntangu zakaka bilumbu biabiansoni—mu kembela malaki ma batâka “Mukayulu wa mese.” Mabundu makaka ka mavulu’â kembelaka lufwa lwa Yezu ko, mpe ka matomo’â bakulaka nsasa ya mukayulu’andi ko. w23.01 21 par. 5

Mu ntangu ya “funda dia mivu” Yezu mbo kavumbula bantu bafwa, mpe mbo kabakisa bô batumamana Yehova mu kwizi bâ na luzingu lwa lunga. Bô babâ ba sungama ha meso ma Yehova “mbo babiarila mutoto, mpe mbo bazinga mankululu ha zulu mutoto.” (Mik. 37:​10, 11, 29, NWT) Diangana, “lufwa, mbeni ya mansukina mbo bafukisa lo.” (1 Kor. 15:26) Tivuvu tieto tia zinga mankululu tia nkatika tia sikama tiena mu Zu dia Nzambi. Tivuvu tio tilendi tu bakisa mu tatamana mu bâ ba kwikama mu bilumbu bi bia mansukina. Kâ mu yangirika Yehova, ka tufweti’â kwa tabâ na timina dia zinga mankululu ko. Musamu wa ntete wusaka ti tabâ ba kwikama kwe Yehova na kwe Yezu ni mu bungu ti bawu tutomono zolo. (2 Kor. 5:​14, 15) Luzolo lo mbo lututumaka mu landa tifwani tiawu na mu samuna tivuvu tieto kwe bantu. (Rom. 10:​13-15) Bu tukwe longoke mu kipa bantu babansoni na mu kaba, Yehova mbo kazolo mu bâ ndiku’eto. w22.12 6-7 par. 15-16

Nkwamusu zilendi sa ti tahombesa bima bituhanaka tidzunu. Bu batuyiminaka bima bio, tulendi kwizi bâ na lwaka mpe na bunkuta bwa misamu milanda. Mabanza mo ka mena ma mbi ko. Kâ, tufweti sa keba. Yezu watâ ti nkwamusu zilendi têsa milongoki miandi kuba. (Za 16:​1, 2) Ni bu sa ti Yezu watulwengesa ti nkwamusu zitula, watuhana mpe lukwikulu ti tulendi bâ ba kwikama. (Za 15:20; 16:33) Bu bayiminaka tisalu tieto peleko bu basilaka tio ndilu, tulendi baka lutwalusu kwe filiale na kwe bakuluntu. Babasola mu tu kengerela, mu zaba tala ti mbo tutatamana mu baka bidia bia timpeve na mu tu bakisa mu tatamana mu samuna tala ti lenda na dio. Sa miamiansoni mu landa lutwalusu lu baka. (Zaki 3:17) Mpe, kani kabwe kuzonzelandi misamu mitariri mpangi zaku kwe bantu bafweti lembo mia zaba.—Ekl. 3:7. w22.12 20-21 par. 14-16

Lumbu ti, Yezu milongoki miandi katatamanaka mu twarisa bu basamunaka Timfumu tia Nzambi ha mutoto. Walungisa kani diandi. Mu nzila ya organizasio ya Yehova, Yezu beto kakubikaka mu samuna, mpe beto kahanaka bisalulu bie neto nsatu mu mwangasa nsangu za mbote. (Mat. 28:​18-20) Tisalu tia tu hana Yezu tusalaka bu tusaka miamiansoni mu samuna na mu longesa bantu bakaka, na bu tubâka na meso ma tia bu tukwe kêle ti Yehova katûla nsuka mu nza yi ya mbi. Bu tusarila malongi me mu Bahebre 6:​11, 12, mbo tusikama mu tivuvu tieto “tii ku nsuka.” Yehova watisolela tilumbu na heure yi katûla nsuka mu nza yi ya Satana. Lumbu tio bu titula, Yehova mbikululu ze mu Zu diandi kalungisa. Ntangu zakaka, tulendi mona ti nsuka ya nza yi ka yita kulu tula ko. Kâ, tilumbu tia Yehova ka tilandila ko! (Hab. 2:3) Bika tabonga nzengolo ya tatamana mu ‘sungamana Yehova,’ bu tukwe kêle ‘Nzambi ya mvukulu’eto na luvivululu lwalwansoni.’—Mika 7:7. w23.02 19 par. 15-16

Kani dia muntu wunakaka mongo ni mu tula ha zulu mongo. Kâ, mbuka zazingi ze ha zulu mongo zi kalendi kangamana mu tomo tala na nsayi yayansoni. Mpila mosi mpe, vulu bongaka ntangu ya kangama na ya dimbitila mu mpila Yehova yi kakubakisilaka mu lenda, ni bu sa ti mu ntangu yi korelaka mpasi. Ku nsuka ya bilumbu biabiansoni, tiyula: ‘Ngano bwe mwinini tusakumunu twa Yehova lumbu ti? Ni bu sa ti musamu’ani ka weka’eti wa ko, ngano bwe Yehova kata kumbakisila mu korela?’ Tomo dimbitila tala ti lendi bakula misamu mia yirika Yehova mu ku bakisa. Wa matieleka, lendi sambila ngatu musamu wa mpasi wa wa. (Flp. 4:6) Kâ tufweti monaka mpe tusakumunu tu tu hanaka Yehova mu ntangu yo. Yehova watukanisina ti ngolo katuyika, na lubakusu mu korela. Buna, ntangu zazansoni tondaka mu bungu ti Yehova nge kayikaka ngolo. Bu sila bo, mbo mona ti Yehova nge kata bakisa mu lenda, ni bu sa ti mu ntangu ya mpasi.—Mba. 41:​51, 52. w23.01 19 par. 17-18

Tiyula: ‘Ngano, mbelo’ani yisongele ti bakuri ti nsuka ya nza yi nguria penepene yeka? Ngano nzengolo zani mu misamu mitariri lukolo na tisalu mbo zisongelaka ti sarila Yehova ni tima tiyôkele mfumu kwe meno? Ngano timinu tie nani ti Yehova mbo kakungana bima bia tinsuni meno na kanda diani?’ Banza nsayi yibâka na Yehova bu kamonaka ti luzingu lweto tukwelesaka na luzolo lwandi. (Mat. 6:​25-27, 33; Flp. 4:​12, 13) Tufweti taluzulaka mbanzulu zeto ntangu zazansoni, mpe tufweti saka nsobolo zifwanane. Paulo watâ kwe Bisi-Korente ti: “Tatamaneno mu taluzula tala ti mu timinu lwena; tatamaneno mu tala bwe lwena beno beni.” (2 Kor. 13:5) Buna, tufweti tatamana mu tomesa mbanzulu zeto bu tutanga Bibila, bu tulongoka mu bâ na mabanza mamosi na Nzambi, mpe bu tusa miamiansoni mifwanane mu kwelesa luzingu lweto na luzolo lwandi.—1 Kor. 2:​14-16. w23.01 9 par. 5-6