Yehova luzolo lwa mutima lwe nandi mu nge

1. Nti bikuturilaka mu mabanza bu banzaka Yehova?

NGANO weka banza Yehova ka bwe kena? Bu mu zonzelaka mu lusambulu, nti bikuturilaka mu mabanza? Ni bu sa ti ka monekaka ko, Bibila mbo dimuzonzelaka mu mpila zazingi. Yehova mbo bamutâka ntangu na tibabulu, mpe na tiya tuyokaka. (Mik. 84:11; Ebr. 12:29) Mbo bamumonekesaka ntiana tari dia ntalu di batâka safire, ntiana tisengo tihezimaka, mpe ntiana lukandu (arc-en-ciel) luhezimaka. (Ezk. 1:​26-28) Mpila zakaka zi bazonzelaka Yehova zilendi tomo tu yitukusu peleko zilendi tu tâ bunkuta.

2. Nti bilendi kabakasa bantu bakaka mu pusana kwe Yehova?

² Mu bungu ti ka tulendi’â tamona Yehova ko, wulendi bâ musamu wa mpasi kwe beto mu kwikila ti beto kazololo. Bakaka mbo babanzaka ti kani kabwe Yehova ka lendi’â kabazolo ko mu bungu dia luzingu lweri nawu mu ntama. Kampe batata bawu ka beri’â ba zoloko ko. Yehova mbanzulu zo za kabakulaka na mpila yi zitusobesela. Mu tu bakisa, mbo katuzonzelaka timuntu tiandi mu Zu diandi.

3. Mu bungu dia nti tufweti tomo taluzula luzolo lwa Yehova?

³ Ntelo yitomo zonzelaka Yehova ni luzolo. (1 Za 4:8) Yehova nkwa luzolo. Mbo kayirikaka misamu miamiansoni mu luzolo. Mu bungu ti luzolo lwa Nzambi nguria ngolo lwena, buna mbo kazoloko mpe bantu balembolo mu zolo. (Mat. 5:​44, 45) Mu timoko ti, mbo tutomo zonzela Yehova na luzolo lwandi. Bu tulongoka miamingi mu Nzambi’eto, mbo tutomo kwizi mu zolo.

YEHOVA BETO KATOMONO ZOLO

4. Bwe monaka mu bungu dia luzolo lwa Yehova? (Tala mpe tifwani.)

⁴ “Yehova luzolo lwa mutima lwe nandi.” (Zaki 5:​11, NWT) Mu Bibila, Yehova mbo katifwanakasaka na nguri ye na luzolo. (Iza. 66:​12, 13) Banza nguri yita kipa mwana’andi wa fioti na luzolo lwalwansoni. Mbo kata mu sakasa ha makoto mandi, mpe mbo kata mu zonzela mu zu dia lembama mpe dia dzuna. Mwana bu wudilaka, peleko bu wumonaka mpasi, mbo kadingaka mu zaba ka nti bie nandi nsatu. Bu tubâka mu mpasi, tulendi sikirila luzolo lwa Yehova. Titsoniki tia Mikunga tiatsoneka: “Maniongo bu makundiyabama, nge wakumbomba mpe wakundembeka.”—Mik. 94:​19, NWT.

5. Luzolo lwa kwikama lwa Yehova ntia nsasa lwena kwe nge?

⁵ Yehova wa kwikama wena. (Mik. 103:8) Ka tu bikaka ko bu tuyirikaka musamu wa mbi. Kanda dia Israele mbo dieri niongesaka Yehova mbala zazingi; kâ bu bayizi bâ mu tiari mu bungu dia misamu mia mbi mi bayirika, mpe bu bayizi mia bika, Yehova wabasongela luzolo lwandi lwa kwikama, bu kabatêla: ‘Ntalu wena ha meso mani, mukembo we naku, nikuzololo mpe.’ (Iza. 43:​4, 5) Luzolo lwa Nzambi ka lwasoba ko. Lumbu ti mpe tulendi mu sikirila. Ni bu sa ti masumu ma manene tuyirikiri, Yehova ka tu bika ko. Bu tusoba mabanza, mpe bu tukâla kwe Yehova, mbo tumona ti beto kwa katiri zolo. Kanisini ti: ‘Mbo katomo lemvokelaka.’ (Iza. 55:7) Bibila mbo ditâka ti mulemvo wo mbo wunata “ntangu za tidzunu za [. . .] Yehova Yandi beni.”—Bis. 3:​19, NWT.

6. Ngano Zakari 2:8 nti yitulongesaka mu Yehova?

⁶ Tanga Zakari 2:8. Mu bungu ti beto kazololo, Yehova mabanza meto ma kakipaka, mpe nsatu ye nandi ya tu kengerela. Bu tubâka ba nionga, Yandi mpe mbo kaniongaka. Buna tulendi bâ na lukwikulu ti mbo kahana mvutu mu lusambulu lweto bu tumutêla: ‘Kunkengerela ntiana ngo ya disu diaku.’ (Mik. 17:8) Disu tinama tia nitu tiena tia peta mpe tia ntalu. Buna, Yehova bu katufwanakasaka na ngo ya disu diandi, wena ntiana Yandi tâka: ‘Wô kwa lu mwisa mpasi, beno kanda diani, tima tie ntalu kwe meno kata mwisa mpasi.’

7. Mu bungu dia nti tufweti kurisila lukwikulu lweto mu luzolo lwa Yehova?

⁷ Yehova zololo ti tabâ na lukwikulu ti muna muntu mu beto kazoloko. Kâ zebi ti mu bungu dia misamu mi tabwabana na mio mu ntama, tulendi tiyula tala ti lendi tu zolo. Peleko, kampe misamu mia mpasi tuta bwabana na mio bwawu bu mita sa ti tabâ na ntembe ti Yehova beto kazololo. Nti biyika ngolo lukwikulu lweto? Ni mu longoka ka bwe Yehova kasongelaka luzolo lwandi kwe Yezu, kwe bantu ba tumbu na kwe bantu babansoni.

BWE YEHOVA KASONGELAKA LUZOLO LWANDI

8. Mu bungu dia nti Yezu keri na lukwikulu mu luzolo lwa Tata’andi?

⁸ Tûka ntangu zilembolo na lutangu, Yehova na Mwana’andi wu kazololo bayizi sa tindiku tia ngolo, mpe bayizi tomo zolosono. Ka kwena tindiku ko tieka zingila ntiana tia bawu. Yehova watomo songela luzolo lwandi mu Yezu, ntiana bu tutangaka mu Matie 17:5. Yehova lenda dieri nandi mu tâ kwa: ‘Ni yandi ntamburi.’ Kâ, wazolo ti tazaba ka ntia luzolo lwe nandi mu Yezu, ntiangu kamutâ, ‘Mwana’ani, wu ntomono zolo.’ Yehova mbo keri yangalalaka Yezu na mu misamu mi kaketi yirika. (Efz. 1:7) Mpe Yezu keri’â na ntembe ko mu mbanzulu zeri na Tata’andi mu yandi. Mu bungu ti luzolo lwa Yehova lwa nguria lwa matieleka lweri kwe Yezu, buna mbo lweri tomo mu simbaka mutima. Mbo keri vulu tâka na lukwikulu lwalwansoni ti Tata yandi kazololo.—Za 3:35; 10:17; 17:24.

9. Ntia ntelo yizonzelaka luzolo lwa Yehova mu Bakristo ba tumbu? Bangula. (Bisi-Rome 5:5)

⁹ Yehova wasongela mpe luzolo lwandi mu bantu ba tumbu. (Tanga Bisi-Rome 5:5.) Tala ntelo ya ‘lwahombolo.’ Diksionere yimosi ya Bibila yitâka “mbo lutukwizilaka ntiana nto.” Diangana, tifwani tio ngolo tiena mu songela luzolo lwalwîngi lwe na Yehova mu bantu ba tumbu! Bantu ba tumbu bazebi ti Nzambi bawu kazololo. (Yude 1) Ntumwa Za wazonzela mbanzulu za Bakristo ba tumbu bu katsoneka: ‘Taleno ka ntia luzolo Tata katuzololo: batutêle bala ba Nzambi.’ (1 Za 3:1) Ngano luzolo lwa Yehova kwe Bakristo ba tumbu kwa lusukisinaka? Kâni, Yehova wasongela luzolo lwandi kwe beto bansoni.

10. Mu ntia musamu wuyôkele bunene Yehova katomo songela luzolo lwe nandi mu nge?

¹⁰ Mu ntia musamu wuyôkele bunene Yehova katomo songela luzolo lwandi? Nkûlulu—yo ni mpila ya nguria ya nzitukulu ya songela luzolo mu nza! (Za 3:16; Rom. 5:8) Yehova wahana Mwana’andi wa ntalu, wamubika kafwa mu bungu dia bantu babansoni, ngatu balemvokela masumu meto mpe tabâ ndiku zandi. (1 Za 4:10) Bu tuvulu kwe dimbitiri mu ntalu ya futa Yehova na Yezu, mbo tutomo kwizi bakula luzolo lwe nawu mu muna muntu mu beto. (Nga. 2:20) Nkûlulu ka bafuta yo ko kwa mu bungu ti buderede bwa Yehova ni bo busarilaka. Kabu diena dia luzolo. Yehova wasongela luzolo lwandi mu beto bu kahana muntu weri ntalu kwe Yandi mu mukayulu—Yezu. Yehova wabika Mwana’andi wamona mpasi mpe wafwa mu bungu dia beto.

11. Nti tulongokaka mu Yeremi 31:3?

¹¹ Ntiana bu tumweni wo, Yehova ka lundaka mbanzulu zandi ko, kâ mbo kasongelaka luzolo lwandi na tiya twatwansoni. (Tanga Yeremi 31:3.) Yehova watubenda kwe Yandi mu bungu ti beto kazololo. (Fwanakasa na Lubambu 7:​7, 8.) Ka kwena tima peleko muntu ko wulendi tu hambasa na luzolo lwa Yehova. (Rom. 8:​38, 39) Nge bwe monaka mu bungu dia luzolo lo? Tanga Mikunga 23, mpe tala ka bwe luzolo lwa Yehova lwanata nsobolo kwe Davide, mpe ka bwe lulendi natina nsobolo kwe beto bansoni.

BWE MONAKA MU BUNGU DIA LUZOLO LWA YEHOVA?

12. Zonzela Mikunga 23 mu bukufi?

¹² Tanga Mikunga 23:​1-6. Mikunga 23 mukunga wena wuzonzelaka lukwikulu mu luzolo lwa Yehova na mu mpila yi katukipilaka. Davide, titsoniki tia mukunga wo, wazonzela tindiku tia ngolo tieri nandi na Muvungi’andi, Yehova. Davide keri’â mu bunkuta ko bu keri bikaka Yehova kamutwarisa, mpe ntangu zazansoni mbo keri mu sikirilaka. Davide wazaba ti luzolo lwa Yehova mbo lwaketi mu landa bilumbu biabiansoni bia luzingu lwandi. Nti biasa ti kabâ na lukwikulu lwa mpila yo?

13. Mu bungu dia nti Davide keri na lukwikulu ti Yehova mbo keri mu kipaka?

¹³ ‘Ka nikondo’â tima ko.’ Davide mbo keri monaka ti bubote beri mu kipaka, mu bungu ti ntangu zazansoni Yehova mbo keri mu hanaka bio bieri nandi nsatu. Davide mbo keri yangalalaka mpe mu tindiku tieri nandi na Yehova na bweso bu keri mu hanaka. Ntiangu keri na lukwikulu ti mu musamu ni musamu waketi kwiza ku matu, Yehova mbo kaketi tatamana mu kipa nsatu zandi zazansoni. Lukwikulu lwa Davide mu luzolo lwa mutima lwa Yehova nguria ngolo lweri yôka maniongo mandi mamansoni, mpe lwasa ti kayangalala mu bio bieri nandi na mu bâ mu nsayi yayingi.—Mik. 16:11.

14. Bwe Yehova kalendi tu kipila na luzolo lwalwansoni?

¹⁴ Yehova mbo katukipaka na nsayi yayansoni, nsungula bu tubwabanaka na misamu mia mbi mu luzingu lweto. Claire,a wasala ku Betele tûka mvula yôka 20, watimona yandi kaka mu ntangu kanda diandi dieri bwabanaka na misamu miamingi mia mpasi. Tata’andi wayizi sa AVC, mpangi’andi mosi ya yikento bayizi ya katula mu timvuka, mpe kanda diandi diayizi kota mu mbaya mpe bahombesa nzo’awu. Bwe Yehova kayizi songela ti bawu keri kipaka? Claire têle: “Yehova wasa ti ntangu zazansoni kanda diani diabâ na bima bieri mfunu bilumbu biabiansoni. Ntangu zazansoni bima bieri tu hanaka Yehova, mbo bieri kundiyitukusuku mu bungu ti ka ndieri’â bia banzaka ko! Mbo nivulu banzaka ntangu Yehova zi kakunsongela luzolo lwandi lwa mutima, mpe ka nizimbakanaka zo ko. Misamu mio miakumbakisa mu tatamana mu kwenda ku matu mu ntangu za mpasi.”

15. Mu bungu dia nti Davide kavutu bakila ngolo? (Tala mpe tifwani.)

¹⁵ ‘Tilundi tiani kakwe vuturi ngolo.’ Ntangu zakaka, Davide mu tiari keri mu bungu dia nkwamusu na misamu mia mpasi mieri nandi. (Mik. 18:​4-6) Kâ, luzolo lwa mutima lwa Yehova na kipa ku keri mu kipaka biavutu mu yika ngolo. Yehova wanata ndiku’andi yeri ya fwatika ku ‘musitu we na matiti ma nkunzu’ na ‘kwe mamba ma dzuna.’ Buna, Davide wavutu baka ngolo mpe wabâ na lenda dia tatamana mu sarila Yehova na nsayi yayansoni.—Mik. 18:​28-32.

16. Bwe luzolo lwa Yehova lukuyikilaka ngolo?

¹⁶ Mpila mosi mpe lumbu ti, “Mu bungu dia luzolo lwa kwikama lwa Yehova talembolo zimbakana,” mu misamu mieto mia mpasi na mu mvita zi tunwanaka. (Bid. 3:​22, NWT; Kol. 1:11) Tabongeno tifwani tia Rachel. Wayizi tomo bâ mu tiari bakala diandi bu diabika mu sarila Yehova na bu kahambana nandi mu ntangu ya timbevo tia Covid-19. Ngano Yehova nti kasa mu bungu dia yandi? Têle ti: “Yehova wasa ti namona luzolo. Wakunzungirila mu ndiku zeri yôkesaka ntangu nani, zeri ku natinaka bidia, zeri kuntambikilaka message na verse zitindisaka, zeri sehaka nani, mpe zeri kwama kumbambulaka ti Yehova me keri kipaka. Ntangu zazansoni mbo nitondaka Yehova bu kakungana kanda dia dinene die na luzolo.”

17. Mu bungu dia nti Davide keri lembo tîninaka na kani musamu wa mbi?

¹⁷ ‘Na kani musamu wa mbi wu nitîna, mu bungu ti ni twe naku.’ Luzingu lwa Davide mbo lweri vulu bâka mu mpasi, mpe mbeni za ngolo zazingi zeri nandi. Kâ, luzolo lwa Yehova lwasa ti kabâ wa dzuna mpe kamona ti yandi beri kengerelaka. Davide lenda dieri nandi mu mona ti Yehova ni keri nandi mu misamu miamiansoni, mpe musamu wo wamuyika lukwikulu. Buna, wayizi tanga: “[Yehova] wakunkûriri mu bunkuta bwani bwabwansoni.” (Mik. 34:​4, NWT) Bunkuta bwa Davide bwa matieleka bweri; kâ luzolo lwa Yehova ngolo zingi lweri yôka bunkuta bo.

18. Bwe lukwikulu mu luzolo lwa Yehova lulendi ku yikila ngolo bu bâka na bunkuta?

¹⁸ Bwe lukwikulu mu luzolo lwa Yehova lutuyikilaka ngolo bu tubwabanaka na misamu mitutâka bunkuta? Mupasuri-nzila we na nkumbu Susi zonzele ka bwe yandi na bakala diandi bamona, mwana’awu bu wayizi tihonda: “Musamu wa ta-pulukusu mbo wubebesaka mbanzulu za muntu, mpe wulendi sa ti kabâ wa nôka, mpe kabâ mu bunkuta. Kâ luzolo lwa mutima lwa Yehova lwatukengerela.” Rachel, wu tutokolo zonzela, têle ti: “Mpimpa mosi, mutima’ani bu weri tomo saka nkesi, mpe bu nabâ na maniongo mamingi na lwaka, nakawurila Yehova mu zu dia ngolo. Ho nkatika bendo, nayizi mona ti wayizi lembeka mutima’ani, mpe wakundzunisa, ntiana bu saka nguri kwe mwana’andi, buna nayizi seka. Kani kabwe ka nizimbakana tilumbu tio ko.” Mukuluntu we na nkumbu Tasos wayôkesa mvula 4 ku boloko mu bungu ti wakala mu bâ militere. Ngano bwe kamwina luzolo lwa Yehova? Têle: “Yehova wakungana bima yôka bieri nani nsatu. Musamu wo wayika lukwikulu lwani ngolo ti ndendi mu sikirila mu misamu miamiansoni. Musamu wakaka, mu nzila ya mpeve’andi, Yehova wakungana nsayi ni bu sa ti ku mbuka yinôkesaka ndieri. Wakumbakisa mu mona ti bu nitatamana mu sala nandi, mbo nitomo kwizi mona mbote’andi. Buna nayizi batika mu sala tisalu tia mupasuri-nzila wa ntangu zazansoni mu boloko.”

PUSANA KWE TATA’AKU DIA LUZOLO

19. a) Zaba ti Nzambi beto kazololo bwe kunatinaka nsobolo mu misamu mi tutâka mu tusambulu tweto? b) Ntia mpila yi songelaka Yehova luzolo yikusimbaka mutima? (Tala kaku “Verse zitubakisaka mu mona luzolo lwa mutima lwa Yehova.”)

¹⁹ Binsamu bi tuzonzele bisongele ti Yehova, “Nzambi ya luzolo,” ni ke neto! (2 Kor. 13:11) Mbo kakipaka muna muntu mu beto. Lukwikulu lwe neto ti luzolo lwandi lwa kwikama lutuzungirilaka. (Mik. 32:10) Bu tuvulu kwe dimbitiri mu mpila yi keka tu songela luzolo lwandi, mbo tukwizi mona ti wa matieleka kô kena, mpe mbo tukwizi tomo bâ penepene na Yandi. Tulendi pusana kwe Yandi buna kwa bu tuzololo, mpe tulendi mu têla ka bwe twe na nsatu luzolo lwandi. Tulendi mu zonzela maniongo meto mamansoni, na lukwikulu ti mbo kabakulaka, mpe zololo mu tu bakisa.—Mik. 145:​18, 19.

20. Bwe luzolo lwa Yehova lutubakisilaka mu bâ nandi penepene?

²⁰ Ntiana kwa tiya bu tutubendaka tala ti tiozi tie kô, luzolo lwa Yehova mbo lutubendaka. Ni bu sa ti luzolo lwa Yehova nguria ngolo lwena, mu bulembami mpe kasongelaka lo. Buna, tambula luzolo lwa Yehova mu luzingu lwaku. Mpe, bika ti beto bansoni tahanina mvutu mu luzolo lo bu tutâ: “Yehova nzololo”!—Mik. 116:1.