Luka

3 Tiberio Kaisari dhó pidhinga dzá 15 ri si na ná cho nǎ, Potio Pilato ngʉe Yudea nǎ guverner, Herodi* ngʉ pinyo Galilea nǎ, kedhi djona Filipo ngʉ pinyo Iturea ma, Trakoniti ma na nǎ, ndirigoti Lisania ngʉ pinyo Abilene nǎ, 2 Anas ma, Kayafa ma na ngʉe bbakuhani djó bbobbonga ná saa na, Mungu tso nǎ lo singʉe Zekaria ddù Yohani dhi ngana.

3 Føri dho Yohani bbingʉe Yordani tsotso lu kʉ ná ngø krʉ lu ndirigoti ke ngʉ rid’ra ndrŭ ba batiso ndiri dhǒ ndrŭ leni le nari, ndiro ndrŭ dhó chenga zø njini d’e. 4 Ddiddi nabi Isaya dzá buku nǎ ri ndingʉeni nari bbai: “Ddikpa ke ngajø ngødja nǎ ro: ‘Anithɨ Yova* dzá chu nanga! Aniliri ri é mbrø. 5 Krʉ kʉ ná djǎ nanga tso ringani le dyadya, krʉ kʉ ná bbobbo ngø ma, glʉ ma na ringani le ngʉ kpere, d’yó nanga d’yoni ná chu ringani le ngʉ mbrø, b’ɨ nǎ ritsi ka ndi b’ɨ le kó ná chu nanga ringani le ngʉ klaa. 6 Ndirigoti krʉ ndrŭ si kʉ Mungu dzá gødha* nja.’”

7 Føro ke ngangʉe ri podha tso ɨ ndi dhi ngana ngʉ si batiso ba ná birobiro kʉ ná ndrŭ ni: “Ni idhalolo dhi su nǎ gø, ni dho ká ie jari ni nyi gosi si ná thø? 8 Anidho ni leni ngbà nari nidhó nyi chulu. Nzɨ ni di ripo ɨ: ‘Kodhi baba kʉ Abrahamu,’ dhonalo ma ripo ni dho, Mungu ka ndi pʉ nzø Abrahamu dho i dju nǎ ro maddi. 9 Bbʉbbʉ dhé, lǒ* le li b’lo tsú tɨtɨ ró, nzɨ bblo tsu-kpa ó ná tsú le si krrkrr ndirigoti le si ri bu kazz na.”

10 Føro birobiro kʉ ná ndrŭ ngʉ ridhu ke tso: “Nde, ri ká ngani ko njí addu?” 11 Ke ngʉngʉe logoti ɨ kpa dho: “Aro ró rù kʉ ná ke bbʉ ri ro ddikpa nga ró ri kʉ ná ke ro, ndirigoti nyo kʉ dhó ná ke maddi njiri fø.” 12 Kitas tso ngʉ nju ná kpa ma krʉ singʉe batiso badha dho ndirigoti kpa ngʉ ridhu ke tso: “Mwalimu, ri ká ngani ko njí addu?” 13 Ke ngʉngʉe logoti kpa dho: “Nzɨ ni ko kitas wødha dhi mbø ndrŭ tso, ri dho ngani ná nga djolu.” 14 Føri kina bbasødda maddi ngʉ ridhu ke tso: “Ri ká ngani ko njí addu?” Føro ke ngʉngʉe logoti kpa dho: “Nzɨ ni dhʉ ddikpa le dhó ritsi ro maddi kpakpanga na, inga nzɨ ni bbø ddikpa le ro ma kali dhi lo na. Aniba hwè nì kʉ nidhó ná ritsi* dho.”

15 Ndrŭ ngʉ adi ngab’o ndirigoti krʉ kʉ ná ndrŭ ngʉ riddi ɨ ndima thí nǎ Yohani djo: “Njaro ká i ri ka ndi é nga Kristo ri?” 16 Yohani ngʉngʉe ndrŭ dhó logoti ɨ ndi pongʉeri ndrŭ krʉ dho nari na: “Ma batiso bbʉ ni dho dda na, ro ma goti si ná ke kʉ kpakpa ma djolu, ma ro nzá ka ke kó ró ss mbi tso klodha dho maddi ri. Ke si batiso bbʉ ni dho roho takatifu ma, kazz ma na na. 17 Nyo-kpa ronga le adi lě na ná ritsi kʉ ke thó thi, ke si nyo-kpa ronga ndi adi lě nanga tsù vii ndirigoti ke si ngano li depo na, ro nyo d’ø ke si bɨ nzá ro ka ndi dhéni ná kazz na.”

18 Føri kina, ke chongʉe ndrŭ ronga bí kʉ ná nja lo ki na maddi ndirigoti ke ngʉ ra anzi hwè lo-i ndi d’ra kpa dho nari na. 19 Ro, Galilea nǎ ngʉ pinyo ná ke Herodi na Yohani ongʉe ke kø adjondi bbá le Herodia ndirigoti ke nji ná nja chelo kpari krʉ djó. 20 B’lo ndi nji ná fø chelo kpari krʉ kina, Herodi sʉngʉe Yohani prizo na.

21 Føro b’lo ndrŭ krʉ ba batiso nari goti, Yesu maddi bangʉe batiso. Ndirigoti sala ke ngʉ nji ná saa na, ra pʉngʉe ndi tso. 22 Føro roho takatifu thʉngʉe ke djo bbǎna ró ji na. Føri goti ddikpa lechu singʉe ra nǎ ro: “Ni kʉ madhi Dduna bbo ma ji ná ke, ni tso ma uu.”