Aliri ni kana kau ngʉ kpakpa Yova na

KRɄ choro, bbo na mana kʉ ná chembø adi ngʉ bí kutaniko na. Addinga ngbabbø ma “hwè e bbo ra nǎ” nari djo njati ddikpa le ngʉ Yova ro ró! (Lu. 15:7, 10) Njati rie kutaniko nǎ ni ngʉ ri ró, ni ka ni uri nari kʉ, malaika ma, Yova ma nanga jini bbo ni ki ngʉ bbʉbbʉlo kana nari dho. Ro ni jiri ni kana kau ngʉ chøchø Yova na ró, ni ka ni bani kpakpalo na ngba. Føri ká kʉ ngba kpakpalo ndirigoti addui ká ka ndi kó ni tsotso?

RI KÁ KɄ NGBA KPAKPALO?

Bí kʉ ná nrŭ adi ndima mbu d’idhé kutaniko nǎ ndima ngʉ nari goti. Njaro ni famu ngbaribbai ma Pi Daudi ngʉ ndi mbu nari ngba. Ngba mai kedhó chenga zø njingʉeni ro, ke pongʉeri: “Madzá kosa d’e ma ronga tso d’e.” (Zb. 40:12; 65:3) Yova ro le ngʉ nari goti, le ka le mbu le che ndirigoti do ma ka ndi pa ddi le djo bicha. Isabelle ngʉe mutengwa cho 20 djolu.a Yova ro le ngʉ narigoti le pori, “Yova ka ndi nji ma zø nji ná føri nzɨ ma ngʉ adi u ri.” Njati ni thí bʉni bʉ ró, ni ka ni djødjø kiroho nǎ. (Mez. 24:10) Nzɨ bbari ni thí bʉni.

Nja nrŭ adi riddi nari kʉ ndima nzá ka ndima nji Yova ma na ka ndi liri le kana ngae chøchø nalo krʉ ri. Antoine ngʉngʉe kutaniko nǎ nari goti, ke pongʉeri, “Yova dzá Dimu ma ngʉe ná saa na, ma ngʉ adi nji nalo nga ma vingʉe vi.” Nja nrŭ adi fø di nalo ddi nari dho, kpa nanga adi rɨnirɨ kiroho nǎ nja njí ndima ka ndima njí nari dho.

Lorojina, njati rie sa ddikpa ke bbá dza vʉvʉ sangʉe ri ró, ke ka ndi mbu ndi che njati ke di ngaddi fø dzá thika thɨdha dho ndi ka ndi dzi ná saa djo ró. Føri bbai rie sa ni kana nga sangʉeni Yova na ni njingʉe ná bbo kosa dho ri ró, ni ka ni njari nari kʉ ndiro nidhó kiroho ngʉ bblo d’e, ni dho ringani ni njí kpakpanga bbo. Ro nja nrŭ ka ndima kó ni tsotso ngba.

Yova rinzi ko tso: “Kpadjo anisi ndirigoti akothɨ ko kana lo thika.” (Isa. 1:18) Njaro ni nji bbo kpakpanga b’lo ndiro “ni thɨ ni kana lo thika d’e.” Yova ji ni bbo ni nji ná fø kpakpanga dzá lo dho. Anzi ngaddi di: Ni ngʉ Yova ró nari na, ni ridho Shetani kʉ kali ba!​—Mez. 27:11.

Føri ni nji nari chulu ni kana nga ngʉ chøchø Yova na, ndirigoti ke tsoni nari kʉ ndi ma si ngʉ chøchø ddi ni ro. (Yak. 4:8) Nja nrŭ di rinja ni ngʉ Yova ró ná føri kʉ bblo pli kʉ nalo. Ro ni dho ringani ni njí nja lo ki maddi. Nidho ringani ni b’o ni kana jidha ronga nidzá Baba, ndirigoti nidzá kau Yova na. Føri ká ni ka ninji ngbaribbai?

ALI NGBA KA NDI KA NI DHO NÁ MURADI NI NJI

Amburi ni li ngba ka ndi ka ni dho ná muradi. Njaro ni adi Yova djo ndirigoti paradiso djo ni chu ná bbobbo lo nga no ni. Ro kpadjo nidho ringani nili bblo kʉ ná muradi ki ni nji, lorojina adi lod’ra bí ina, adi si njudha dhi ngana ndirigoti adi saa ba ndiro ni di le-djoi ma, le-vei ma na d’e. Akonja i muradi.

Adi loti Yova na bí ina. Nidzá Baba churi nari kʉ njati nidhó zamiri di ni nzá bbo ni njingʉe ná kosa dzá lo dho ró, ri ka ndie kpakpa ni dho ni nzinga ndi tso. (Ro. 8:26) Fønga ringana, adi “sala nji krʉ saa ró,” ad’ra ngbaribbai ma ni adi ni mbu ni kana kau djo nari ke dho. (Ro. 12:12) Andrej pori i: “Ma ngʉ adi lod’i ma djo bbo ndirigoti ma djo do ngʉ adi pa. Ro sala ma nji nari goti ma ngʉ adi ma mbu bblo ndirigoti ma ngʉ adi ngoi ba bbo.” Njati ni chu sala nǎ ni ka ni po nalo nzá ró, anja Pi Daudi njingʉe le lé leni nari djo ná sala Zaburi 51 ndirigoti 65 nǎ.

Adi Biblia zø krʉ ddoro. Føri ka ndi kó ni tsotso nidhó udha ngʉ kpakpa ndirigoti føri ka ndi liri nidhó jidha dhidhi Yova djo. (Zb. 19:7-11) Felipe pori i: “Biblia le zø nari ma, ri nǎ longa le ne nari ma na dhi programu nga ngʉe ma dhó ri nari dho, ma ngʉngʉe muzaifu ndirigoti ma ngʉ adi njedha bbʉ Yova thí dho. Ma nzá jingʉeri ma njí ddikpa kosa aro ina ri, føri dho ma vʉngʉeri ma di Biblia nǎ lonanga ne ndiri b’o ma ronga d’e.” Ni ma ka ni njiri fø ddi. Njati rie nidhó lo jiri ni vʉ ni ka ni zø nalo ri ró, anziri ni dhó kiroho kʉ bblo ná Mukristo kó ni tsotso.

Aliri ni kana kau e kpakpa ni djoi ma, ni vei ma na. Yova ró ngʉ ná nja nrŭ do adi nji dho nalo kʉ, kpa adi riddi nja nrŭ dhó ngaddidha ka ndie che ndima djo. Larissa pori i: “Ma djo do ngʉ adi pa bbo. Ma ngʉ adi ma mbu che njiri kutaniko nǎ le-djoi ma, le-vei ma na ró naribbai. Ma mbungʉe ma fø bicha.” Achuri nari kʉ wazee ma, dhidhi kiroho nǎ ná nja nrŭ ma nanga ka ndi jini ji ndima kó ni tsotso ndiro ni kana ngae chøchø Yova na d’e. (Anja kisanduku “Wazee ká ka ndima nji addu?”) Kpa nanga adi jini ji ni ngʉ kutaniko nǎ nari dho, ndirigoti kpa jiri ni njí bblo lo!​—Mez. 17:17.

Addui ká ka ndi liri ni kana ngae chøchø kutaniko nǎ nrŭ na? Adi si njudha dhi ngana krʉ saa ro ndirigoti adi lod’ra ni djoi ma, ni vei ma na. Føri ká ka ndi kó ni tsotso ngbaribbai? Felix pongʉeri: “Kutaniko nǎ nrŭ ngʉ adi riji ma ngʉ Yova ro. Ma ngʉ adi ma nja mana na. Kpa kongʉe ma tsotso ndiro ma mbu ma kutaniko nǎ ki kʉ naribbai d’e, kpa kongʉe ma tsotso ndiro ma mbu ma ngba zø Yova nji naribbai ndirigoti ma ra anzi Yova dzá njí na d’e.”​—Anja kisanduku “Ni ká ka ni njí addu?”

NZƗ NJENI!

Shetani ka ndi liri ni bani “kpakpalo na bbo” ndiro nzɨ ni kana nga ngʉ chøchø Yova na ró. (Lu. 4:13) Anji kpakpanga ndiro ni kana ngae chøchø Yova na d’e.

Yova tsoni i, ndidzá chembø dho: “Vivi nari ma si nene, pépe chu nǎ ro nari tso ma si lele, vo ronga vo nari ró kilonda djonga ma si chɨchɨ, ndirigoti nga ró klø kʉ nari dho ma si klø bbʉ.” (Eze. 34:16) Yova korie bí kʉ ná nrŭ tsotso b’lo ndiro ndima kana nga ngʉ chøchø ndi na d’e. Achuri nari kʉ ke riji ndi kó ni tsotso ndiro ni kana nga ngʉ chøchø ndi na d’e.