October

Sa cimwi ciindi cilamubeta ciyumu kunyumfwila? Ubu mbocakalinga ku Mwaami Defedi. Aboobo wakapaila kuli Lesa ayi: “Amuncaafwe kuba amoyo ulibambite kumunyumfwila.” (Kulu. 51:​12, NWT) Nabi kwaamba ayi Defedi wakalinga kumusuni Yehova, cimwi ciindi cakalinga kumubeta ciyumu kunyumfwila. Alimwi ubu mbocibete akulindiswe. Ino nceebonshi? Cakutaanguna, twakapyana bubi bwakutasuna kunyumfwila. Cabili, Satana aleelesha kutuyunga kwaamba ayi tupondokele Yehova bweenka lakwe mbwakacita. (2 Koli. 11:3) Catatu, tulekala abantu batanjililwa a “mushimu ubiibi uyo weendelesha bantu batanyumfwili Lesa.” (Efe. 2:2) Aboobo tulyeelete kusebensa cankusu kwaamba ayi tukome bubi mbotwakapyana, kuleya kuyungwa a Satana alimwi akukaka mushimu wacishi wakutanyumfwila. Tulyeelete kweelesha cankusu kunoonyumfwila Yehova alimwi abaabo mbwaakapa nkusu shakutanjilila. w23.10 pe. 6 pala. 1

Ino nshiinshi nsheenga tweeya kuswa ku caankamiko Yesu ncaakacita cakwaalula maanshi kuba waini? Cilatwiisha kuba amubo wakuliceesha. Yesu taakwe kulilumbaisha pa caankamiko ncaakacita; alimwi taakalinga kulilumbaisha pashintu shili shoonse nshaakalinga kucikonsha kucita. Muciindi cakucita boobo, wakalinga kuliceesha akupa kwaamba ayi Baishi balemekwe akulumbaishikwa mushintu shoonse nshaakalinga kucita. (Joni 5:​19, 30; 8:28) Na twakonkela cakubonenaako cakwe Yesu kwiinda mukutolelela kuba bantu baliceesha, teshi tukanoolilumbaisha pashintu nshetucikonsha kucita. Tatweelete kulilumbaisha sombi kulumbaisha Lesa wesu uli kabotu ngotusebensela. (Jele. 9:​23, 24) Tulyeelete kumulumbaisha pashintu shoonse nshetucikonsha kucita mukwiinga taakuwo nceenga twaciita kwakubula lucafwo lwakwe Yehova. (1 Koli. 1:​26-31) Na katuliceesha, teshi tunoolilumbaisha pashintu shibotu nshetucitila bamwi. Tulanyumfwa kabotu kushiba ayi Yehova alabona alimwi alalumba pashintu nshetucita. (Amweelanye a Mateyo 6:​2-4; Ebu. 13:16) Ncakutatoonsha kwaamba ayi tulasangalasha Yehova na twakonkela cakubonenaako cakwe Yesu cakuliceesha.—1 Pit. 5:6. w23.04 pe. 4 pala. 9; pe. 5 mapa. 11-12

Kwiinda mukutanjililwa amushimu usalashi, mutumwi Paulo wakayuminisha Beneklistu kunoobikila maano kushintu shicafwa bamwi. Ino inga twacita buyani kwaamba ayi tukonkele kululika uku ndyetutobungana? Nkwiinda mukunokwiibaluka ayi bamwi abalo balisuni kukumbulawo. Amuyeeye paceeci: Sa ndyemutobandika abeshicibusa banu, inga kamusuni kunookwaambabo nweenka balo kutanokwaambaawo? Kwalo inga tamuciti boobo! Mulisuni kwaamba ayi abalo banokwaambaawo. Ubu mbotusuni kunoocita andyetuli kumabungano. Tulisuni kwaamba ayi baanji banokumbulawo. Alimwi nshila yomwi ibotu mbweenga twayuminisha bamakwesu abenankashi kutondesha lushomo lwabo, nkwiinda mukupa kwaamba ayi abalo bakumbulewo. (1 Koli. 10:24) Kwaamba shikumbulo shifwiifwi kulapa kwaamba ayi baanji bakumbulewo. Alimwi nabi kwaamba ayi mwaamba cikumbulo cifwiifwi, amuleye kwaamba shiteente shiinji. Na mwaamba shiteente shoonse shili mupalagilafu, bamwi balaakubula shakukumbulawo. w23.04 mape. 22-23 mapa. 11-13

Tulyeelete kwiibaluka kuyandika kwakutolelela kucafwako bamwi bunene bunene kwiinda mukubashimikila. Tulyeelete kuba balibambite kwaaluka ndyetutoshimikila. Ndyetutoshimikila tulacana bantu bapusenepusene bashoma shintu shipusenepusene pali Lesa, bakaswa mumisena ipusenepusene alimwi bakakomenena mubukaalo bupusenepusene. Mutumwi Paulo wakalinga kulibambite kwaaluka ndyaatooshimikila. Aswebo inga twakonkela cakubonenaako cakwe ndyetuli muncito yakushimikila. Yesu wakasala Paulo kuba “mutumwi kubaswamashi bakunsengwe.” (Loma. 11:13) Aboobo, Paulo wakalinga kushimikila ku baJuda, ba Giliki, bantu beeite, bantu bakalinga kukala mumishi, bacinenenene bamu mfulumeende aku bamaami. Kwaamba ayi Paulo acikoonshe kubashika pamoyo bantu aba boonse bapusenepusene, ‘wakaba shintu shoonse kubantu bamishobo yoonse.’ (1 Koli. 9:​19-22) Wakalinga kubikila maano kushintu bantu nshobashoma alimwi ankulilo yabo, lyalo akwaalula mubandi kweelana abantu mbwaacana. Aswebo inga katusebensa kabotu muncito yakushimikila na katuba balibambite kwaalula mubandi kweelana abantu mbotwacana. w23.07 pe. 23 mapa. 11-12

Bantu balibombya tacaambi ayi tabacitewo nkusu. Kwaamba ayi muntu atondeshe mubo uyu, alayandika kulicata ndyaali mubukaalo buyumu. Kulibombya ndubasu lwa “shisepo sha mushimu usalashi.” (Gala. 5:​22, 23) Liswi lyamu ciGiliki lyakasansululwa ayi “kulibombya,” cimwi ciindi lyakalinga kusebenseshekwa kusansulula lihosi lyamuluundu ndyobakafuba. Nabi kwaamba ayi lihosi ilyo inga lyaba libombu, lilatolelela kuba ankusu. Ino inga twacita buyani kwaamba ayi twiiye kutondesha kulibombya nabi ndyetucite nkusu? Inga tatucikonshi kucita boobo munkusu shesu. Tulyeelete kusenga mushimu usalashi kuli Yehova kwaamba ayi atucaafwe kuba amubo uyu ubotu. Kuli baanji bakacikonsha kutondesha mubo uyu. Kucakubonenaako, bamakwesu abenankashi baanji bakatondesha kulibombya bantu bamwi ndyebakabakalasha. Kucita boobo kwakapa kwaamba ayi bamwi banooyeya shibotu pa Bakamboni Bakwe Yehova.—2 Timo. 2:​24, 25. w23.09 pe. 15 pala. 3

Mucili anga nciloto cikankamika mutumwi Joni ncaakabona, wakabona bamaloba bali 24 kabalambila Yehova kwiculu. Bakalinga kulumbaisha Lesa akwaamba ayi aleelela kutambula ‘bulemu ankusu.’ (Ciyu. 4:​10, 11) Banjelo bashomeka abalo balicite sheebo shiinji shakulumbaisha akulemeka Yehova. Balekala kwiculu pomwi anguwe alimwi balimwishi kabotu. Balabona mibo njaacite kwiinda mushintu nshaacita. Na babona shintu Yehova nshaacita, balamulumbaisha. (Jobo 38:​4-7) Aswebo tulisuni kunoolumbaisha Yehova mumipailo yesu. Inga twacita boobo kwiinda mukumulwiita shintu nshetusuni pali nguwe alimwi acitupa kumulemeka. Ndyemutobelenga akwiiya Baibo, amweeleshe kubona mibo Yehova njaacite iyo njemusuni abuumbi. (Jobo 37:23; Loma. 11:33) Lyalo amumulwiite Yehova mbomulinyumfwa pamibo iyo. Alimwi inga twalumbaisha Yehova ceebo cakwaamba ayi alatucafwa akucafwa bamakwesu abenankashi nsengwe yoonse. Lyoonse alatubikilako maano akutushitilisha.—1 Samwe. 2:​1, 2. w23.05 mape. 3-4 mapa. 6-7

Mu 1919, bantu bakwe Lesa bakaswa mu Babiloni munene. Mumwaaka weenka uyu, ‘musebenshi ushomeka alimwi ucite maano’ wakatalika kusebensa kwaamba ayi acafwe bantu balibambite kwiiya kutalika kweenda mu “Nshila Isalalite.” (Mate. 24:​45-47; Isa. 35:8) Incito bamwi njobakasebensa kale kale kwaamba ayi babambe nshila iyi, yakacafwa bantu bakatalika kweenda munshila iyi inene yacikoshanyo, kwiiya shiinji pali Yehova akuyanda kwakwe. (Tus. 4:18) Kwiilikaawo, bakacikonsha kwaalula buumi bwabo akutalika kukonkela njiisho shakwe Yehova. Yehova taalangili bantu bakwe kwaalula buumi bwabo na shintu nshobashoma, paciindi comwi. Muciindi cakucita boobo, alasalasha bantu bakwe paniini paniini. Tulaakusangalala abuumbi paciindi soonse ndyeshi tukanoosangalasha Lesa mushintu shoonse nshetucita! Ciindi aciindi, nshila ili yoonse ilayandika kunooibamba. Kuswabo mu 1919, incito yakubamba “Nshila Isalalite” yatolelela, kwaamba ayi cibe cuubu kubantu baanji kuswa mu Babiloni munene. w23.05 pe. 17 pala. 15; pe. 19 pala. 16

Bamakwesu bali mu Likoto Litanjilila baleeisha beshikubacafwilisha bali mu makomiti a Likoto Litanjilila. Beshikubacafwilisha aba batosebensa mikuli iinji mulibunga pacecino ciindi. Balilibambite kusebensa ncito yakulama kabotu mbelele shakwe Klistu na bananikitwe bakaye kwiculu. Na bananikitwe bacaliteewo bakaye kwiculu kumamanino amapensho anene, kulambila kusalalite kulaakutolelela pacishi. Kwiinda mubutanjilishi bwakwe Yesu Klistu, bantu bakwe Lesa balaakutolelela kumulambila cakushomeka. Tulicishi kwaamba ayi paciindi ici, bantu bakwe Lesa balaakulwanwa kuli Gogi waku Magogi, nkokwaamba ayi kucatana pomwi kwashishi. (Esek. 38:​18-20) Sombi kulwanwa uku kwakaciindi kaniini, teshi kukape kwaamba ayi bantu bakwe Lesa bacileeke kulambila Yehova. Alaakubafuna! Mucili anga nciloto mutumwi Joni ncaakabona, wakabona bamu “likoto linene” lya mbelele shimwi. Joni wakalwiitikwa ayi “likoto linene” ili lilaakupula “mumapensho anene.” (Ciyu. 7:​9, 14) Aboobo tulishomete ayi Yehova alaakubapulusha! w24.02 mape. 5-6 mapa. 13-14

Ino inga twacita buyani kwaamba ayi tutambule mushimu usalashi? Inga twapaila kuli Lesa kwaamba ayi atupe mushimu wakwe usalashi, kubelenga Maswi akwe alimwi akuba lubasu lwa libunga lyakwe. Kucita boobo kulaakutucafwa kuba a “shisepo sha mushimu usalashi.” (Gala. 5:​22, 23) Lesa alapabo mushimu wakwe usalashi kubaabo batolelela kuyeeya pashintu shili kabotu alimwi bacita shintu shibotu. Inga taatoleleliiwo kutupa mushimu wakwe usalashi na katuyeeya pashintu shitabete kabotu, akunoocita shintu isho. (1 Tesa. 4:​7, 8) Alimwi kwaamba ayi tutolelele kutambula mushimu usalashi ‘tatweelete kusebanya makani abushinshimi.’ (1 Tesa. 5:20) Muvesi iyi liswi lyakwaamba ayi “bushinshimi,” lilasansulula makani Yehova ngaatulwiita kwiinda mumushimu wakwe usalashi, kwiilikaawo amakani aamba pa bushiku bwakwe Yehova alimwi anshiiku shino shakweelaako nshetutokalaamo. Tatuyeeyi ayi bushiku bwakwe Yehova buli kulaale alimwi ayi Amagedoni ilaakusa katuli twafwa kale. Muciindi cakucita boobo, tulatondesha ayi bushiku bwakwe Yehova bulaakusa conoono kwiinda mukunoocita shintu shibotu akutolelela ‘kusebensela Lesa cakulyaaba.’—2 Pit. 3:​11, 12. w23.06 pe. 12 mapa. 13-14

Ino nciinshi ncotweelete kucita na cakuteengashila twabona cikope cileta miyeeyo yakoonana pafooni yesu na cisebensesho cimwi? Mutalangiiwo, alimwi amucikusheewo cakufwambaana. Cilaakutubeta cuubu kucita boobo na katwiibaluka ayi cintu ciyandika abuumbi kuli ndiswe, mbushicibusa mbotucite a Yehova. Alimwi nabibo shikope shimwi shiboneka anga inga tashileti miyeeyo yakoonana, inga shapa kwaamba ayi muntu abe alunkumbwa lwakoonana. Ino nceebonshi tulyeelete kuleya kweebela shikope isho? Nceebo cakwaamba ayi tatusuniiwo nabibo kuyeeya kucita bufuule mumoyo wesu. (Mate. 5:​28, 29) Munene mulibungano waliina lya David ukala ku Thailand wakaamba ayi: “Ndaliipusha ayi: ‘Nabi kwaamba ayi shikope ishi inga tashileti miyeeyo yakoonana, sa Yehova inga wasangalala na ntolelele kushilangilisha?’ Kuyeeya boobo kulancafwa kusala kabotu shakucita.” Kuloonda kucita cintu ceenga cakalasha Yehova, kulaakutucafwa kusala kabotu shakucita. “Kuloonda Lesa ngomatalikilo a busongo.” w23.06 pe. 23 mapa. 12-13

‘Shipinda shamukati’ mpashi shilemikaninaako mabungano motubete. Na mapensho anene akatalike, Yehova watushomesha ayi alaakutushitilisha na tukatolelele kumusebensela pomwi abamakwesu abenankashi. Aboobo tulyeelete kusebensa cankusu kwaamba ayi tubasune abuumbi bamakwesu abenankashi. Kusuna bamakwesu abenankashi mpashi nkweshi kukape kwaamba ayi tukapuluke! Bushiku bunene bwakwe Yehova’ bulaakupa kwaamba ayi shintu shiyume abuumbi kubantu boonse. (Sefa. 1:​14, 15) Bantu bakwe Yehova abalo balaakwiinda mumapensho amwi. Sombi na twalibambilila limwi pacecino ciindi, tulaakucikonsha kukalika moyo alimwi akucafwako bamwi. Tulaakucikonsha kuliyumya mumapensho ali oonse ngeshi tukeendeemo. Na bamakwesu abenankashi bakapenge, tulaakubatondesha nkumbu kwiinda mukucita nsheenga twacikonsha kwaamba ayi tukabape nsheshi bakanoyandika. Na tweeya kutondesha lusuno kubamakwesu abenankashi pacecino ciindi, tulaakutolelela kubatondesha lusuno apaciindi ca mapensho anene. Lyalo Yehova alaakutupa buumi butamaani, mucishi umo mweshi tukabule kuyeeyawo pa mapensho acitika cakuteengashila nabi mapensho amwi.—Isa. 65:17. w23.07 pe. 7 mapa. 16-17

Mu Baibo muli shakubonenaako shiinji sha basebenshi bakwe Lesa bashomeka abo bakalinga kucite nkusu. Sombi teshi lyoonse ndyebakalinga kulinyumfwa kuba ankusu. Kucakubonenaako, pashiindi shimwi Mwaami Defedi wakalinga kulinyumfwa ayi ngumuntu utaloondi alimwi ‘muyumu anga nkalundu,’ sombi pashiindi shimwi ‘wakaloonda.’ (Kulu. 30:7) Mushimu wakwe Lesa wakacafwa Samusoni kuba ankusu shilibetele. Sombi Samusoni wakalinga kucishi ayi kwakubula lucafwo lwa mushimu wakwe Lesa, inga wababo “mbuli bantu bamwi boonse.” (Boombo. 14:​5, 6; 16:17) Yehova ngowakabapa nkusu basebenshi bakwe bashomeka aba. Mutumwi Paulo wakalinga kucishi ayi wakalinga kuyandika lucafwo lwakwe Yehova kwaamba ayi abe ankusu. (2 Koli. 12:​9, 10) Paulo wakalinga kuciswaciswa. (Gala. 4:​13, 14) Pashiindi shimwi, cakalinga kumuyumina kucita shintu shili kabotu. (Loma. 7:​18, 19) Alimwi pashiindi shimwi wakalinga kulisukama akuloonda ceebo cakuyeeya sheenga shamucitikila. (2 Koli. 1:​8, 9) Nacibi boobo, Paulo ndyaakalefuka, wakayuma. Munshila nshi? Yehova wakamupa nkusu nshaakalinga kuyandika kwaamba ayi acikoonshe kuliyumya mumapensho ngaakalinga kwiindaamo. w23.10 pe. 12 mapa. 1-2

Na cimwi ciindi katulinyumfwa ayi taakuwo mbotubete, tunokwiibaluka ayi Yehova mwiine ngwaakatusenya kuli nguwe. (Joni 6:44) Alabona shibotu muli ndiswe swebo nsheenga tatuboni, alimwi alitwishi kabotu mbotubete. (2 Maka. 6:30) Aboobo inga twamushoma na waamba ayi tulayandika abuumbi. (1 Joni 3:​19, 20) Katutana kwiiya cancine, sobamwi twakacita shintu shibiibi isho sheenga shatupa kulinyumfwa cibiibi nabi pacecino ciindi. (1 Pit. 4:3) Nabibo Beneklistu bashomeka bamwi bacilwana lipenshi lya kusuna kucita shilubo. Sa amwebo cimwi ciindi mulalinyumfwa ayi Yehova inga taamulekeleliiwo? Na ubo mbocibete, inga mwayuminishikwa kushiba ayi basebenshi bakwe Yehova bamwi bashomeka abalo bakalinyumfwawo kale boobo. Kucakubonenaako, mutumwi Paulo wakalinga kulinyumfwa ayi taakuwo mbwaabete na wayeeya pashintu shitabete kabotu nshaakacita. (Loma. 7:24) Kwalo, Paulo wakaana kushilubo nshaakacita akubombekwa. Nacibi boobo, wakalyaamba ayi “nshiindi mutumwi nabi womwi” alimwi ayi “nebo ndeendaawo kubica.”—1 Koli. 15:9; 1 Timo. 1:15. w24.03 pe. 27 mapa. 5-6

Ciiyo comwi nceenga tweeya kucintu citabete kabotu Mwaami Joashi ncaakasalawo kucita ncakwaamba ayi, tulyeelete kusala beshicibusa basuni Yehova alimwi basuni kumusangalasha. Beshicibusa abo balaakutucafwa kunoocita shintu shili kabotu. Tulyeelete kuba bushicibusa abantu bashiimo shipusenepusene. Joashi wakalinga mwanike abuumbi kuli Jeoiyada shicibusa wakwe. Amuliipushe ayi: ‘Sa beshicibusa bangu balancafwa kuyumya lushomo lwangu muli Yehova? Sa balacita nsheenga bacikonsha kwaamba ayi bamunyumfwile akunjuminisha kucita boobo? Sa balaamba pali Yehova apashintu nshobeeya mu Baibo? Sa balandulika na ntoyandika kululikwa?’ (Tus. 27:​5, 6, 17) Cancine ncakwaamba ayi, na beshicibusa banu tabasuni Yehova, tamweelete kutolelela kuba bushicibusa ambabo. Sombi na beshicibusa banu balisuni Yehova, balaakunoomucafwa lyoonse!—Tus. 13:20. w23.09 mape. 9-10 mapa. 6-7

Libala lya Alufa ndyelyakutaanguna mumabala aciGiliki, lyalo libala lya Omega ndyolyakweelaako. Aboobo Yehova ndyaakaamba ayi “ndime Matalikilo (na Alufa) alimwi aMamanino (na Omega),” wakalinga kusansulula ayi na watalika kucita cintu cimwi, alashinisha kwaamba ayi wacikumanisha. Pesule lyakulenga Adamu a Efa, Yehova wakabalwiita ayi: ‘Amushalane mufule, akususha cishi ca panshi.’ (Mata. 1:28) Paciindi ici, Yehova wakaamba luyaando ndwaakalengela cishi abantu. Aya akalinga ngamatalikilo, na ‘Alufa.’ Na luyaando lwakwe lukakumanishikwe alimwi bantu banyumfwila bamulunyungu lwakwe Adamu bakasushe cishi akucaalula kuba Paladaiso, ayo alaakuba ngomamanino na ‘Omega.’ Pesule lyakwaamba ayi Yehova wamanisha kulenga ‘liculu acishi ca panshi alimwi ashintu shoonse shiliimo shamana kulengwa,’ wakaamba maswi akatondesha ayi luyaando lwakwe lulaakukumanishikwa. Ici cilatondesha ayi Yehova alaakukumanisha luyaando ndwaakalengela bantu acishi, kumamanino abushiku bwa namba 7.—Mata. 2:​1-3. w23.11 pe. 5 mapa. 13-14

Lweendo luyumu lwakuswa ku Babiloni kuya ku Isilaeli, mpashi lwakalinga kutola myeenshi 4. Nacibi boobo, Yehova wakabashomesha ayi alaakukushamo cili coonse munshila ceenga capa kwaamba ayi batabooleli kumishaabo. BaJuda bashomeka bakalinga kucishi kwaamba ayi balaakucana shoolwe shiinji na baboolela ku Jelusalemu, kwiinda kulyaaba kuli koonse nkobakalinga kuyandika kucita. Coolwe cinene ncobakesa mukucana nkulambila Yehova. Mu Babiloni tamwakalingaawo tempele yakwe Yehova. Tamwakalingaawo cipaililo bene Isilaeli mpeenga babengela milambu iyo yakaambwa mu Milawo yakwe Mose nabi bubaambo bwakwaamba ayi bapailishi inga babenga milambu iyo. Kwiilikaawo, mundabala iyi mwakalinga bantu baanji abuumbi bakalinga kulambila balesa bakubeca, kwiinda baabo bakalinga kulemeka Yehova na kukonkela milawo yakwe. Aboobo baJuda baanji bakalinga kusuni Yehova, bakalinga kulangila kuboolela kucishi cinemishaabo kwaamba ayi batalike kulambila kusalalite alimwi. w23.05 mape. 14-15 mapa. 3-4

Tulayandika lucafwo lwa mushimu usalashi kwaamba ayi tutolelele “kwikala anga mbantu bekala mumumuni.” Ino nceebonshi? Mukwiinga teshi cuubu kutolelela kuba basalalite mucishi cino cibiibi. (1 Tesa. 4:​3-5, 7, 8) Alimwi mushimu usalashi inga watucafwa kuleya kuyeeya anga mbantu bamucishi abo babona shintu munshila ipusene a Yehova mbwaashibona. Alimwi inga watucafwa kucita ‘shintu shoonse shibotu alimwi shiluleme.’ (Efe. 5:9) Nshila yomwi mbweenga twatambula mushimu usalashi nkwiinda mukupaila. Yesu wakaamba ayi Yehova ‘alaakupa mushimu usalashi kubaabo bamusenga.’ (Luka 11:13) Alimwi tulatambula mushimu usalashi ndyetutolumbaisha Yehova pomwi kumabungano. (Efe. 5:​19, 20) Kutanjililwa amushimu usalashi kulaakutucafwa kunoocita shintu shisangalasha Lesa. w24.03 mape. 23-24 mapa. 13-15

Sa mulayandika kwiiya kunookalika moyo abuumbi? Na ubo mbocibete, amupaile kwaamba ayi mwiiye kunookalika moyo abuumbi. Kukalika moyo ndubasu lwa shisepo shamushimu usalashi. (Gala. 5:​22, 23) Aboobo inga twapaila kuli Yehova kumusenga mushimu usalashi, akumusenga kwaamba ayi atucaafwe kuba ashisepo shamushimu. Na twalicana mubukaalo bweenga bwapa kwaamba ayi citubete ciyumu kukalika moyo, tulyeelete kutolelela kusenga mushimu usalashi kwaamba ayi utucaafwe kukalika moyo. (Luka 11:13) Alimwi inga twasenga Yehova kwaamba ayi atucaafwe kunoobona shintu bweenka mbwaashibona. Lyalo pesule lyakupaila, tulyeelete kucita nsheenga twacikonsha kunookalika moyo bushiku abushiku. Na twatolelela kupaila kwaamba ayi tube bantu bakalika moyo, akweelesha kutondesha mubo uyu, Yehova alaakutucafwa kuba bantu bakalika moyo abuumbi, nabi kwaamba ayi pakutaanguna twakalinga muntu utakaliki moyo. Alimwi kukalika moyo kulatucafwa kukutumana kuyeeya pashakubonenaako shamu Baibo. Mu Baibo muli shakubonenaako shiinji sha bantu bakalinga kukalika moyo. Kukutumana kuyeeya pashakubonenaako isho, inga kwatucafwa kushiba nshila mbweenga twatondesha kukalika moyo. w23.08 pe. 22 mapa. 10-11

Yesu wakacafwa mutumwi Pita kushiba ayi Yehova alaakunoomucafwa kucana shiyandika lwakumubili. Pesule lyakwaamba ayi Yesu wabushikwa, wakacita caankamiko acimwi ndyaakacafwa Pita abatumwi bamwi kucaya nswi shiinji. (Joni 21:​4-6) Ncakutatoonsha kwaamba ayi caankamiko ici cakacafwa Pita kushoma ayi Yehova ananoomucafwa kucana shiyandika lwakumubili. Alimwi mpashi Pita wakeebaluka maswi Yesu ngaakaamba ayi Yehova ananoobapa nshebayandika abo boonse babika sha Bwaami panembo. (Mate. 6:33) Aboobo Pita wakasalawo kubika panembo incito yakushimikila, muciindi cakubikila maano kukucaya nswi. Wakashimikila cakutaloonda pabushiku bwa Pentekositi yamu 33 C.E., akucafwa bantu baanji kusumina makani abotu. (Milimo 2:​14, 37-41) Lyalo wakacafwa bene Samaliya abaswamashi bamwi kuba bashikwiiya bakwe Yesu. (Milimo 8:​14-17; 10:​44-48) Ncakutatoonsha kwaamba ayi Yehova wakacafwa Pita kwaamba ayi acikoonshe kucafwa bantu bamishobo yoonse kusa mulibungano. w23.09 pe. 20 pala. 1; pe. 23 pala. 11

Pafwiifwi amyaaka yobilo kuswa ciindi bene Babiloni ndyebakanyonyoola Jelusalemu, Nebukadinesa mwaami wa bene Babiloni, wakalota ciloto ciloondesha ca cibumbwabumbwa cinene. Wakaamba ayi atoocaya basongo bakwe boonse kwiilikaawo a Danyelo na baalilwe kumwaambila ciloto ncaalota abusansulushi bwancico. (Danye. 2:​3-5) Danyelo wakalinga kweelete kucitaawo comwi cakufwambaana, mukwiinga bantu baanji nakwiinga bakacaikwa. “Wakaya kuŋanda ya mwaami akumusenga ayi amupe ciindi, kwaamba ayi amusansulwite ciloto ico.” (Danye. 2:16) Ici cakatondesha ayi Danyelo wakalinga musankwa utaloondi alimwi ucite lushomo. Munshila nshi? Baibo taitondeshiiwo ayi paciindi ici Danyelo kaali wakasansululawo kale shiloto. Wakalwiita beshicibusa bakwe botatwe kwaamba ayi “basenge nkuumbu kuli Lesa wa kwiculu ayi abasansulwite cintu ico cishisitwe.” (Danye. 2:18) Yehova wakakumbula mipailo yabo. Kwiinda mulucafwo lwakwe Yehova, Danyelo wakacikonsha kusansulwita Nebukadinesa ciloto ncaakalota. Aboobo Danyelo abeshicibusa bakwe tabakwe kucaikwa. w23.08 pe. 3 pala. 4

Amuyeeye pashibotu shiswaamo na kamukalika moyo. Na katukalika moyo, tulaakuba basangalete alimwi teshi tunoolisukama bunene. Aboobo kukalika moyo inga kwatucafwa kunooyeeya kabotu akuba abuumi buli kabotu. Na katubakalikila moyo bamwi, tulaba abushicibusa bubotu ambabo. Libungano lilaba licatene abuumbi. Na umwi watukalasha, kutafwambaana kukalala inga kwatucafwa kuleya kupa kwaamba ayi shintu shibicileeko. (Kulu. 37:8; Tus. 14:29) Sombi ciyandika abuumbi, tulakonkela cakubonenaako cakwe Ishiwesu wakwiculu akuba abushicibusa buyumu anguwe. Ncakutatoonsha kwaamba ayi kukalika moyo ngumubo ubotu utucafwa soonse! Nabi kwaamba ayi teshi lyoonse ndyeenga catubeta cuubu kukalika moyo, kwiinda mulucafwo lwakwe Yehova, inga twatolelela kwiiya kutondesha mubo uyu. Alimwi ndyetutolindila cakukalika moyo kusa kwa cishi cipya, inga twashoma cakutatonsha kwaamba ayi ‘meenso akwe Yehova ali pa baabo bamulemeka, abo balindila lusuno lwakwe lutamaani.’ (Kulu. 33:18) Soonse atube bashinishite kutolelela kulifwalika kukalika moyo. w23.08 pe. 22 pala. 7; pe. 25 mapa. 16-17

Jemusi wakaamba ayi muntu inga walyaamba ayi alicite lushomo, sombi nshaacita inga shatondesha ayi taaciteewo lushomo. (Jemu. 2:​1-5, 9) Alimwi Jemusi wakaamba pamuntu wakabona ‘mukwesu nabi nankashi utacite shakufwala nabi shakulya,’ sombi utakwe kumucafwa. Nabi kwaamba ayi muntu uyo wakalinga kwaamba ayi alicite lushomo, nshaakacita shakatondesha ayi taacitewo lushomo. (Jemu. 2:​14-16) Jemusi wakaamba pacakubonenaako cakwe Laabu uyo wakatondesha ayi wakalinga kucite lushomo kwiinda mushintu nshaakacita. (Jemu. 2:​25, 26) Wakanyumfwako makani amwi pali Yehova alimwi wakashiba ayi wakalinga kucafwa bene Isilaeli. (Joshu. 2:​9-11) Wakatondesha ayi wakalinga kucite lushomo kwiinda mukushitilisha basenseshi bobilo bene Isilaeli ndyebakalinga kusuni kucaikwa. Aboobo nabi kwaamba ayi Laabu taakalinga kumaninitewo alimwi taakalinga mwine Isilaeli, Lesa wakamubona ayi aliluleme, bweenka mbocakalinga kuli Abulaamu. Cakubonenaako cakwe cilatwiisha ayi cilayandika abuumbi kutondesha ayi tulicite lushomo kwiinda mushintu nshotucita. w23.12 mape. 5-6 mapa. 12-13

Mbuli Beneklistu, tatusuni kweelabo pakwiiya makani amu Baibo oobu kunyumfwisha. Sombi tulisuni kwiiya a “shisisitwe shakwe Lesa,” kwiinda mulucafwo lwa mushimu usalashi. (1 Koli. 2:​9, 10) Inga mweeya makani amwi amu Baibo ateshi oobu kunyumfwisha kwaamba ayi muyumye bushicibusa bwanu a Yehova. Kucakubonenaako, inga mweeya cakubikila maano mbwaakatondesha lusuno ku basebenshi bakwe bakale kale alimwi amakani ayo mbwaatondesha ayi amwebo alimusuni. Alimwi inga mweeya Yehova mbwaakalinga kusuni ayi bene Isilaeli banoomulambila akubona mbwaasuni ayi tunoomulambila pacecino ciindi. Na mpashi inga mweeya cakubikila maano bushinshimi Yesu mbwakakumanisha ndyaakalinga kusebensa ncito yakushimikila pacishi. Inga mwasangalala abuumbi kwiiya makani aya na kamusebensesha Watch Tower Publications Index na libuku lyamu Chitonga lyaamba ayi Bbuku Ligwasya Kuvwuntauzya lya Bakamboni ba Jehova. Kwiiya Baibo cakubikila maano inga kwayumya lushomo lwanu akumucafwa kuba “alushibo loonse lwa pali Lesa.”—Tus. 2:​4, 5. w23.10 mape. 18-19 mapa. 3-5

Liswi lyakwaamba ayi “abuumbi” mutumwi Pita ndyaakasebensesha, lilasansulula “kufungulula cintu cimwi.” Lubasu lwabili lwa vesi iyi lulasansulula nsheenga twaciita na katubasuni abuumbi bamakwesu. Kusuna bamakwesu abuumbi inga kwatucafwa kufweka pashilubo shabo. Amuyeeye pacakubonenaako ca tebulu ishipite na yakamatuluka mumwi. Inga mwabweesa cisani akuciyalaawo kwaamba ayi bamwi bataboni matombe ayo na moyakamatuluka. Aswebo na katubasuni abuumbi bamakwesu, tulaakufweka ‘pa shibiibi shabo shiinji,’ na kubalekelela. Tulyeelete kusuna bamwi abuumbi cakwaamba ayi inga twalekelela bashominyineesu nabi kwaamba ayi kucita boobo teshi cuubu. (Kolo. 3:13) Na katulekelela bamwi, tulatondesha ayi tulibasuni abuumbi alimwi tulisuni kusangalasha Yehova. w23.11 mape. 11-12 mapa. 13-15

Mwaami Josiya ndyaakalinga kucite myaaka 26, wakatalika ncito yakubamba tempele. Paciindi tempele ndyeyakalinga kubambwa, bakacana ‘libuku lya Milawo yakwe Yehova’ iyo njaakapa bantu bakwe kwiinda muli Mose. Mwaami ndyaakanyumwa milawo yakalinga kulembetwe mulibuku ilyo, peenkaapo wakasala kukonkela shakalinga kulembetweemo. (2 Maka. 34:​14, 19-21) Sa inga mwasuna kunobelenga Baibo lyoonse? Mpashi mwakatalika kale kweelesha kubelenga Baibo bushiku abushiku. Sa mutosangalala kucita boobo? Sa mulabikila maano ku mavesi eenga amucafwa palwaanu? Josiya ndyaakalinga kucite myaaka pafwiifwi a 39, wakacita cilubo cakapa kwaamba ayi acaikwe. Wakacinka manungo mumaano akwe, muciindi cakusenga butanjilishi kuli Yehova. (2 Maka. 35:​20-25) Ino tutokwiiyako nshi? Tacicite mulandu amyaaka njetucite na kufula kwamyaaka njotwabelenga Baibo, tulyeelete kutolelela kuyumya bushicibusa bwesu a Yehova. Ici cileelikaawo kupaila lyoonse kusenga butanjilishi kuli nguwe, kwiiya Maswi akwe, alimwi akusenga kululikwa kuswa ku Beneklistu bashimpite lwakumushimu. Na katucita boobo, mpashi teshi tukacite shilubo shinene alimwi inga twaba alusangalalo abuumbi.—Jemu. 1:25. w23.09 pe. 12 mapa. 15-16

Baibo ilaamba pa shakubonenaako shiinji shibotu sha banakashi abo bakalinga kusuni Yehova alimwi bakalinga kumusebensela. Bakatondesha mibo mbuli ‘kutacita shintu cakwiindilisha’ alimwi a ‘kushomeka mushintu shoonse.’ (1 Timo. 3:11) Kwiilikaawo, benankashi bacanike inga bacana shakubonenaako shibotu sha benankashi bashimpite lwakumushimu bali mulibungano lyabo isho nsheenga bakonkela. Nobenankashi bacanike, amuyeeye pabenankashi mbomushi abo bacite cakubonenaako cibotu nceenga mwakonkela. Amubikile maano kumibo ibotu njobacite lyalo akuyeeya mbweenga amwebo mwatondesha mibo iyo. Mubo womwi uyandika Mwineklistu ushimpite lwakumushimu ngwaeelete kubaawo, nkuliceesha. Na mwanakashi kaaliceesha, alaakuba abushicibusa bubotu a Yehova alimwi abamwi. Kucakubonenaako, mwanakashi usuni Yehova cakuliceesha alakonkela butanjilishi Ishi wakwiculu mbwakabikaako bwaamba pabaabo bakapekwa nkusu shakutanjilila mulibungano amumukwashi.—1 Koli. 11:​3, NWT. w23.12 mape. 18-19 mapa. 3-5

Yehova alalangila musankwa kusuna mukaakwe, kumupa nshayandika lwakumubili, kuba shicibusa wakwe uli kabotu, akumucafwa kutolelela kuba abushicibusa buyumu a Ishi wakwiculu. Kwiiya kuyeeya kabotu, kutondesha bulemu kubanakashi, akuba muntu bamwi ngweenga bashoma, shilaakumucafwa kuba musankwa uli kabotu na mukeebe. Pesule lyakwaamba ayi mweeba, inga mwaba mushali musankwa. Ino nshiinshi nsheenga mweeya kuswa kuli Yehova pamakani akuba mushali musankwa ulikabotu? (Efe. 6:4) Yehova wakalwiita Yesu Mwanaakwe ayi alimusuni alimwi ayi alikondetwe pali nguwe. (Mate. 3:17) Na mukabe mushali musankwa, amukashinishe ayi lyoonse mukanoolwiita bana banu ayi mulibasuni. Mukanobalumba pashintu shibotu nsheshi bakanoocita. Bashali basankwa bakonkela cakubonenaako cakwe Yehova balacafwa bana babo kuba basankwa abanakashi bashimpite lwakumushimu. Inga mwalibambila kusebensa mukuli uyu kwiinda mukunotondesha lusuno ku bamumukwashi aku bamulibungano alimwi akunoobalama kabotu. Kwiilikaawo, amwiiye kunoobalwiita ayi mulibasuni alimwi balayandika kuli ndimwe.—Joni 15:9. w23.12 mape. 28-29 mapa. 17-18

Sobasebenshi bakwe Yehova bashomeka, tuleenda mubukaalo buyumu akuciswa bweenka mbuli bantu boonse. Alimwi mpashi inga twayandika kuliyumya kupikishikwa na kupenshekwa kubaabo bapatite bantu bakwe Lesa. Nabi kwaamba ayi Yehova taatushitilishi kumapensho aya, wakatushomesha ayi ananootucafwa. (Isa. 41:10) Kwiinda mulucafwo lwakwe, inga twatolelela kuba alusangalalo, kusala kabotu shakucita, akutolelela kushomeka kuli nguwe nabi ndyetutokwiinda mubukaalo buyumu abuumbi. Yehova wakatushomesha ayi alaakutupa “luumuno lwakwe Lesa.” (Filip. 4:​6, 7) Luumuno ulu nkukalikana mumiyeeyo amumoyo nkotulinyumfwa, ceebo cakuba abushicibusa buyumu anguwe. Luumuno ulu ‘luleenda pabusongo bwa bantu boonse’; alimwi ndubotu abuumbi kwiinda ambweenga twaluyeeyela. Kucakubonenaako, sa mwakapailawo kale abuumbi kuli Yehova, lyalo pesule lyakupaila cakutengashila mwalinyumfwa kuba aluumuno abuumbi? Mwakalinyumfwa boobo mukwiinga Yehova wakamupa “luumuno lwakwe Lesa.” w24.01 pe. 20 pala. 2; pe. 21 pala. 4

Abo basuni Lesa balisuni kunolumbaisha liina lyakwe amoyo wabo woonse. Mwaami Defedi wakalinga kucishi ayi kulumbaisha liina lyakwe Yehova nkulumbaisha Yehova. Na twanyumfwa liina lyakwe Yehova, tulayeeya pa mpuwo njaacite, mibo yoonse ibotu njaacite alimwi apashintu shibotu nshaacita. Defedi wakalinga kusuni kwaamba ayi liina lya Baishi lisalashikwe akunolilumbaisha. Wakalinga kusuni kucita boobo ‘abuumi bwakwe boonse’ alimwi amoyo wakwe woonse. Bene Lefi abalo bakalinga kuba panembo mukulumbaisha Yehova. Bakaliceesha akusumina ayi maswi ngeenga baamba kulumbaisha Yehova, inga taalumbaishi liina lyakwe lisalalite cakulishishaawo. (Neye. 9:5) Ncakutatoonsha kwaamba ayi maswi akuliceesha akuswa paanshi lyamoyo ngobakaamba kulumbaisha Yehova, akapa kwaamba ayi asangalale. w24.02 pe. 9 pala. 6

Yehova teshi akamubonewo ayi mwaalilwa ceebo cakwaamba ayi tamuna kucikonsha kukumanisha ceeco ncomwakasala kucita. (2 Koli. 8:12) Amwiiye kushakacitika shakapa kwaamba ayi cibe ciyumu kukumanisha ncomwakasala kucita. Amutolelele kuyeeya pa nshomwakakumanisha kale kucita. Baibo ilaamba ayi “Lesa uliluleme, aboobo teshi akalube ncito njemwakacita.” (Ebu. 6:10) Aboobo amwebo tamweelete kuluba nshomwakacikonsha kucita. Munooyeya pa nshomwakacikonsha kucita mbuli—kuba abushicibusa buyumu a Yehova, kulwiitako bamwi pali nguwe na kubombekwa. Bweenka mbomwakacikonsha kuya panembo akukumanisha nshomwakasala kucita lwakumushimu kale kale, inga mwatolelela kuya panembo akukumanisha nshomwakasala kucita pacecino ciindi. Kwiinda mulucafwo lwakwe Yehova, inga mwacikonsha kukumanisha ncomwakasala. Amwebo ndyemutotolelela kweelesha kukumanisha ncomwakasala kucita lwakumushimu, munoobona Yehova mbwatoomucafwa, lyalo kucita boobo kulaakumucafwa kuba alusangalalo. (2 Koli. 4:7) Na mukabule kuboolela mwisule, mulaakutambula shoolwe shiinji kunembo.—Gala. 6:9. w23.05 pe. 31 mapa. 16-18

Yehova alacana nshila shakutondesha ayi alibasuni bantu bakwe alimwi alikondetwe pali mbabo. Malembo alaamba pashiindi shobilo Lesa ndyaakalwiita Yesu ayi ngu Mwanaakwe ngwasuni abuumbi alimwi alikondetwe pali nguwe. (Mate. 3:17; 17:5) Sa inga mwasuna Yehova kumulwiita ayi alikondetwe pali ndimwe? Yehova taabandiki andiswe kuswa kwiculu, sombi alabandika andiswe kwiinda mu Maswi akwe. Inga “twanyumfwa” Yehova kaatulwiita ayi alikondetwe pali ndiswe na twabelenga maswi Yesu ngakaamba alembetwe mumabuku a Makani Abotu. Yesu wakalinga kukonkela mibo ya Baishi cakumaninina. Aboobo na twabelenga maswi Yesu ngaakalwiita bashikwiiya bakwe bashomeka akwaamba ayi alikondetwe pali mbabo nabi kwaamba ayi tabakalinga kumaninitewo, tunoyeeya ayi Yehova atolwiita ndiswe maswi ayo. (Joni 15:​9, 15) Na tutokwiinda mumapensho teshi kwaamba ayi Yehova taakondetwe pali ndiswe. Sombi mapensho alatupa coolwe cakutondesha Yehova mbotumusuni ambotucinka manungo muli nguwe.—Jemu. 1:12. w24.03 pe. 28 mapa. 10-11