November

Na muli bashali, amucafwe bana banu kulibambila shikumbulo kweelana aciimo ncobabeteewo. Cimwi ciindi paciiyo inga katwiiya pamakani alemu, mbuli makani aamba pacikwati na aamba pa kulilemeka. Nacibi boobo, inga kwaba palagilafu yomwi nabi obilo baana ngeenga bakumbulawo. Alimwi amucafwe bana banu kushiba ayi teshi lyoonse ndyeenga babatondeka na batambika lyaansa. Kucita boobo, kulaakubacafwa kutalinyumfwa cibiibi na batondeka bamwi ayi bakumbulewo muciindi cakutondeka mbabo. (1 Timo. 6:18) Soonse inga twacikonsha kulibambila shikumbulo shiyuminisha sheenga shapa kwaamba ayi Yehova alemekwe akuyuminisha Beneklistunyineesu. (Tus. 25:11) Nabi kwaamba ayi cimwi ciindi inga twaambaako paniini pa shakatucitikila, tulyeelete kuleya kunokwaamba bunene pashintu shakatucitikila mubuumi bwesu. (Tus. 27:2; 2 Koli. 10:18) Muciindi cakucita boobo, tuleelesha kubikila maano kwaamba pali Yehova, Maswi akwe alimwi apa bantu bakwe.—Ciyu. 4:11. w23.04 mape. 24-25 mapa. 17-18

Tulayandika lusuno kwaamba ayi tutolelele kuba balibambite akuba bacenjete. (Mate. 22:​37-39) Kusuna Lesa kulatucafwa kutolelela kushimikila nabi ndyetutokwiinda mumapensho. (2 Timo. 1:​7, 8) Tulatolelela kushimikila bantu mukwiinga tulibasuni. Alimwi cimwi ciindi tulabashimikila kwiinda mukubalembela makalata na kubatumina fooni. Alimwi tulatolelela kulangila ayi bantu abo inga baaluka akutalika kucita shintu shiluleme. (Esek. 18:​27, 28) Kwiilikaawo, tulibasuni bamakwesu abenankashi. Tulatondesha ayi tulisunene kwiinda “mukuyuminishanya akuyakana.” (1 Tesa. 5:11) Aswebo tulayuminishanya bweenka bashilumamba bali kulubasu lomwi mbobacafwana munkoondo. Inga tatukalashi bamakwesu abenankashi cakashanga na kuboosha cibiibi pacibiibi. (1 Tesa. 5:​13, 15) Alimwi tulatondesha lusuno kwiinda mukulemeka bamakwesu batanjilila mulibungano.—1 Tesa. 5:12. w23.06 pe. 10 pala. 6; pe. 11 mapa. 10-11

Nshila yomwi mbweenga twayumya lushomo lwesu, nkukutumana kuyeeya pacilubula. Cilubula cilatucafwa kushoma ayi shishomesho shakwe Lesa shilaakukumanishikwa. Kuyeeya cakubikila maano pacakapa kwaamba ayi Yehova atupe cilubula, anshaakacita kwaamba ayi atupe cilubula kulatucafwa kushoma cakutatonsha ayi cishomesho cakwe cakutupa buumi butamaani mucishi cipya, cilaakukumanishikwa. Ino nciinshi nceenga twaambila boobo? Ino nshiinshi Yehova nshaakacita kwaamba ayi atupe cilubula? Yehova wakatuma Mwanaakwe wakashalwabo eenka alimwi ngwaasuni abuumbi, kuswa kwiculu akusa mukushalwa pacishi capanshi mbuli muntu umaninite. Yesu ndyaakalinga pacishi wakaliyumya mumapensho apusenepusene. Lyalo wakapenshekwa akufwa lufu lucisa. Yehova wakatutondesha lusuno abuumbi ndyaakatupa cilubula! Lesa wesu shilusuno naakwiinga taakwe kusuminisha Mwanaakwe kupenshekwa akufwa, naakwiinga wakalinga kusuni ayi tukekale kabotu kwamyaaka iniinibo. (Joni 3:16; 1 Pit. 1:​18, 19) Mukwiinga Yehova wakatupa Mwanaakwe ngwaasuni abuumbi kwaamba ayi atucaafwe, alaakushinisha kwaamba ayi tukekale kwamuyayaya mucishi cipya. w23.04 pe. 27 mapa. 8-9

Sa ncakwiila Yehova alisunishishi kubusha bantu bakafwa? Ncakutatoonsha. Wakatanjilila bantu bamwi bakalemba Baibo kulemba pacishomesho ca kubushikwa kwa bafu. (Isa. 26:19; Ciyu. 20:​11-13) Alimwi lyoonse Yehova alakumanisha nshaashomesha. (Joshu. 23:14) Ncakwiila Yehova alisunishishi kubusha baabo bakafwa. Amuyeeye pamaswi Jobo ngakaamba. Wakalinga kushomete ayi nabi wafwa, Yehova wakalinga kusunishishi kumubusha. (Jobo 14:​14, 15) Ubu bweenka Yehova mbwaalinyumfwa pabasebenshi bakwe boonse bakafwa. Alisunishishi kubabusha kwaamba ayi bakabe abuumi buli kabotu akuba alusangalalo. Ino Yehova alalinyumfwa buyani pabaabo boonse bakafwa kabatana kuba acoolwe cakwiiya cancine pali nguwe? Lesa wesu shilusuno alisunishishi kubabusha abalo. (Milimo 24:15) Alisuni kwaamba ayi abalo bakabe acoolwe cakuba beshicibusa bakwe akukala kwamuyayaya pacishi.—Joni 3:16. w23.04 pe. 9 mapa. 5-6

Ino nshiinshi nsheenga mwaciita kwaamba ayi muyumye kulangila kwanu? Na mulalangila kukala kwamuyayaya pacishi capanshi, amubelenge makani amu Baibo aamba mu Paladaiso mbweshi mukabe akukutumana kuyeeyawo. (Isa. 25:8; 32:​16-18) Amukutumane kuyeeya buumi mbweshi bukabe mucishi cipya. Amuyeeye ayi muli mucishi cipya. Na lyoonse katukutumana kuyeeya buumi mbweshi bukabe mucishi cipya, tunanobona ayi “mapensho oobu ngotutoobona teshi aciindi cilaamfu.” (2 Koli. 4:17) Kulangila Yehova nkwaakamupa inga kwamucafwa kuliyumya ndyemutokwiinda mumapensho. Kuli shintu shiinji Yehova nshaakamupa sheenga shamucafwa kuba ankusu. Aboobo na mutoyandika lucafwo kwaamba ayi mucikoonshe kukumanisha mukuli umwi, kuliyumya ndyemutokwiinda mumapensho, na kutolelela kuba alusangalalo, amupaile kuli Yehova kuswa panshi lya moyo akucita ciiyo capalwaanu kwaamba ayi amucaafwe. Amusumine kuyuminishikwa kuswa kubashominyinaanu. Lyoonse munoocana ciindi cakukutumana kuyeeya pakulangila nkomucite. Lyalo Lesa “alaakumuyuminisha ankusu shakwe shoonse kweelana abulemu bwankusu shakwe kwaamba ayi mutolelele kuliyumya cakukalika moyo alimwi calusangalalo.”—Kolo. 1:​11, NWT. w23.10 pe. 17 mapa. 19-20

Kuli sheebo shiinji sheelete kutupa kulumba Yehova mumipailo. Inga twamulumba pashintu shoonse shibotu nshetucite mukwiinga shipo shoonse shibotu shilaswa kuli nguwe. (Jemu. 1:17) Kucakubonenaako, inga twalumba Yehova pacishi cibotu ncaakatupa apa shintu shibotu nshaakalenga. Alimwi inga twamulumba pacipo ca buumi ncetucite, mukwashi ngotucite, beshicibusa mbotucite akulangila nkotucite. Alimwi inga twalumba Yehova pakutupa coolwe cakuba abushicibusa bubotu anguwe. Mpashi inga twayandika kuyeeyawo cakubikila maano pa sheebo sheelete kutupa kulumba Yehova. Tulekala mucishi muli bantu baanji bataluumbi. Liinji bantu balabikilabo maano kushintu nshebasuni, muciindi cakubikila maano ku nsheenga bacita kwaamba ayi batondeshe kulumba pashintu nshebacite. Aswebo na twatalika kucita boobo, liinji mipailo yesu inga kaibabo yakusenga shintu kuli Yehova. Kwaamba ayi tuleye kucita boobo, tulayandika kutolelela kwiiya kuba bantu balumba akulumba Yehova pashintu shoonse nshaatucitila.—Luka 6:45. w23.05 pe. 4 mapa. 8-9

Mbuli Ishiwesu shilusuno, Yehova taasuniiwo kwaamba ayi tunoopenga. (Isa. 63:9) Nacibi boobo, taatushitilishi kumapensho oonse, ayo eenga akoshanishikwa ku milonga na kumulilo. (Isa. 43:2) Sombi wakatushomesha ayi alaakutucafwa ndyeshi ‘tukanokwiinda’ mumapensho. Alimwi alaakushinisha kwaamba ayi watucafwa kutolelela kuba abushicibusa buyumu anguwe. Kwiilikaawo, Yehova alatupa mushimu usalashi uyo utucafwa kuliyumya. (Luka 11:13; Filip. 4:13) Aboobo inga twashooma ayi lyoonse Yehova ananootupa nshetuyandika kwaamba ayi tucikonshe kuliyumya akutolelela kushomeka kuli nguwe. Yehova alatulangila kunoocinka manungo muli nguwe. (Ebu. 11:6) Cimwi ciindi inga twalinyumfwa ayi teshi tucikoonshe kuliyumya mumapensho ngotutokwiindaamo. Mpashi inga twatalika akutoonsha na Yehova alaakutucafwa. Sombi Baibo ilatushomesha ayi inga twacikonsha “kuuluka malinga” kwiinda munkusu shakwe Lesa. (Kulu. 18:29) Aboobo muciindi cakutolelela kutoonsha, tulyeelete kupaila kuli Yehova katushomete cakutatoonsha ayi alaakukumbula mipailo yesu.—Jemu. 1:​6, 7. w23.11 pe. 22 mapa. 8-9

Aya ngamaswi abotu abuumbi asansulula lusuno lwancinencine mbolubete! Alimwi ngamaswi ayuminisha kubeebene mukwiinga inga bacikonsha kunootondeshanya lusuno lwancinencine. Beebene balyeelete kunosebensa cankusu kwaamba ayi banootondeshanya lusuno lwancinencine kwa buumi bwabo boonse. Kucakubonenaako, mulilo ulatolelela kunyaka na kamuusoonsela akubikaako nkuni. Na mwabula kucita boobo, mulilo ulashimika. Abalo beebene inga batolelela kusunana abuumbi na batolelela kuyumya bushicibusa bwabo. Cimwi ciindi, beebene inga balinyumfwa ayi bacileka kusunana abuumbi, bunene bunene ndyebatokwiinda mumapensho mbuli kubula maali, kuciswa ciswa na ceebo ca mukuli wakulela baana. Aboobo beebene balyeelete kusebensa cankusu kuyumya bushicibusa bwabo a Yehova kwaamba ayi bataleki ‘mulilo wakwe Yehova’ kushimika. w23.05 mape. 20-21 mapa. 1-3

Ino nshiinshi nshotweelete kucita kwaamba ayi tube bantu bataloondi? Bashali besu inga batuyuminisha kuba bantu bataloondi, sombi inga tabapi kwaamba ayi tube amubo uyu na balo mbantu bataloondi. Kwiiya kuba bantu bataloondi kuli anga nkwiiya kucita cintu cimwi. Nshila yomwi mbweenga mweeya kucita cintu cimwi, nkwiinda mukulangilisha cakubikila maano uyo utomwiisha mbwatoocita, lyalo akukonkela cakubonenaako cakwe. Aswebo inga tweeya kuba bantu bataloondi, kwiinda mukulangilisha cakubikila maano bamwi mbobatondesha mubo uyu, lyalo akukonkela cakubonenaako cabo. Bweenka mbuli Danyelo, tulyeelete kwaashiba kabotu Maswi akwe Lesa. Tulyeelete kuyumya bushicibusa bwesu a Yehova kwiinda mukunoobandika anguwe lyoonse, akunoomulwiita mbotutolinyumfwa. Alimwi tulyeelete kucinka manungo muli Yehova, akushoma cakutatonsha ayi ananootucafwa lyoonse. Lyalo na lushomo lwesu lukeeleshekwe, cilaakuba cuubu kutondesha kutaloonda.Liinji bantu batondesha kutaloonda balapekwa bulemu kubamwi alimwi inga bapa kwaamba ayi bamwi basune kwiiya pali Yehova. Ncakutatoonsha kwaamba ayi kuli sheebo shibotu sheelete kutupa kwiiya kuba bantu bataloondi. w23.08 pe. 2 pala. 2; pe. 4 mapa. 8-9

Liswi lya mu ciGiliki lyakasansululwa ayi “amushinishe,” lyakalinga kusebenseshekwa kusansulula mbobakalinga kweelesha mabwe mbuli golodi na silifa kwaamba ayi bashibe na ngancinencine. Aboobo tulayandika kweelesha kwaamba ayi tushinishe na nshetunyumfwa anshotubelenga nshancine. Kucita boobo kulaakuyandika abuumbi kuli ndiswe bunene bunene mapensho anene ndyaatoya cisena pafwiifwi. Muciindi cakushomabo makani ali woonse ngotwanyumfwa, tulyeelete kubona na makani ayo ngotwabelenga na kunyumfwa atokweendelana a Baibo nshoyaamba alimwi a libunga lyakwe Yehova nsholyaamba. Kucita boobo kulaakutucafwa kutacenjeekwa amakani akubeca ayo atanjililwa ashibanda. (Tus. 14:15; 1 Timo. 4:1) Tulicishi kwaamba ayi bantu bakwe Yehova balaakupuluka mapensho anene. Nacibi boobo, womwi awomwi wandiswe taacishiiwo sheenga shacitika ciilo. (Jemu. 4:14) Sombi tulaakutambula buumi butamaani na twatolelela kushomeka, inga caba ayi mapensho anene alaakucana twafwa kale nabi katucili boomi. Aboobo soonse atutolelele kubikila maano kukulangila kubotu nkotucite akwikala katulibambite ndyetutolindila bushiku bwakwe Yehova! w23.06 pe. 13 mapa. 15-16

Tatucishiwo bushinshimi bumwi bwamu Baibo mbweshi bukakumanishikwe. (Danye. 12:​8, 9) Ano na swebo katutacishi kabotu bushinshimi bumwi mbweshi bukakumanishikwe, tacaambi ayi teshi bukakumanishikweewo. Inga twashoma cakutatoonsha ayi Yehova alaakutucafwa kunyumfwishisha makani amwi paciindi ceelete, bweenka mbwaakacita kale kale. Shishi shilakwaambilisha ayi kuli “luumuno akuliiba.” (1 Tesa. 5:​3, NWT) Lyalo mfulumeende sha bantu shilaakulwana bupailishi bwakubeca akubunyonyoola. (Ciyu. 17:​16, 17) Pesule lyakucita boobo, shilaakulwana bantu bakwe Lesa. (Esek. 38:​18, 19) Lyalo nkoondo yakweelaako ya Amagedoni ilaakutalika. (Ciyu. 16:​14, 16) Inga twashoma cakutatonsha ayi shintu ishi shilaakucitika conoono. Kushikila ciindi ico cikashiike, atutolelele kutondesha kulumba kuli Ishiwesu wakwiculu kwiinda mukubikila maano ku bushinshimi bwamu Baibo akucafwa bamwi kucita boobo. w23.08 pe. 13 mapa. 19-20

Mutumwi Paulo ndyaakalinga kwaamba pa lushomo, kulangila, alimwi alusuno, mukweelaako wakaamba ayi “cinene ndusuno.” (1 Koli. 13:13) Ino nceebonshi ncaakaambila boobo? Na shishomesho shakwe Yehova shaamba pacishi cipya shikakumanishikwe, teshi tukayandike lushomo akulangila. Sombi tulaakuyandika kutolelela kusuna Yehova abantu. Alimwi lusuno lwesu lulaakutolelela kuyuminaako kwamuyayaya. Alimwi kusunana kulacafwa bamwi kushiba ayi tuli Beneklistu bancine. Yesu wakalwiita batumwi bakwe ayi: “Na kamusunene—bantu boonse balaakwishiba ayi muli bashikwiiya bangu.” (Joni 13:35) Alimwi kusunana kulatucafwa kutolelela kuba bacatene. Paulo wakaamba ayi lusuno “ndolucatanya shintu shoonse.” (Kolo. 3:14) Mutumwi Joni wakalembela bashominyina ayi: “Uyo usuni Lesa ulyeelete kusuna amubye.” (1 Joni 4:21) Na katusunene, tulatondesha ayi tulisuni Lesa. w23.11 pe. 8 mapa. 1, 3

Baibo ilakoshanisha buumi bwesu bwa Bwineklistu kulubilo lwakupingana. Abo bacica lubilo ulu kushika kumamanino, balaakutambula buumi butamaani. (2 Timo. 4:​7, 8) Tulyeelete kucita nsheenga twacikonsha kwaamba ayi tutolelele kucica, mukwiinga kwacaalabo paniini kwaamba ayi tushike kumamanino alubilo ulu. Mutumwi Paulo wakaamba ceenga catucafwa kwaamba ayi tucikonshe kushika kumamanino alubilo ulu. Wakatulwiita ‘kusowa shoonse shitulemena . . . alimwi akucica cakuliyumya mulubilo ulu lwakupingana ndotucite panembo lyesu.’ Sa Paulo wakalinga kusansulula ayi taakuwo mukuli uli woonse Mwineklistu ngwaeelete kunyamuna? Sobwe, ico teshi ncaakalinga kusansulula. Sombi wakalinga kusansulula ayi tulyeelete kusowa mukuli uli woonse utayandiki. Mukuli wamushobo uyo inga wapa kwaamba ayi citubete ciyumu kucica, alimwi inga watulemya. Kwaamba ayi tucikonshe kuliyumya, tulyeelete kufwambaana kushiba mukuli uli woonse utayandiki lyalo akuusowa, mukwiinga inga watulemya. Nacibi boobo, tatweelete kusowa mikuli njetweelete kunyamuna. Mukwiinga na twasowa mikuli iyo, inga tatutoleleli kucica mulubilo ulu lwakubuumi.—2 Timo. 2:5. w23.08 pe. 26 mapa. 1-2

Kutayuminina pashintu inga kwatucafwa kunoolemeka bamwi mbobabona shintu. Kucakubonenaako, benankashi bamwi balisuni bunene shakulipenta penta, sombi bamwi tabasuni bunene shakulipenta penta. Beneklistu bamwi balanyumfwa kabotu kunwako bwalwa mukweelanya, sombi bamwi balasalawo kutanwa. Beneklistu boonse balasuna kuba abuumi buli kabotu, sombi balasala nshila shakushilikwa shipusenepusene. Na katuyeeya ayi swebo nshetucita nshoshili kabotu akweelesha kukakatisha bamakwesu abenankashi kucita nshetucita, inga twabakalasha akupa kwaamba ayi mulibungano mutabi lucatano. (1 Koli. 8:9; 10:​23, 24) Yehova taatulwiiti nshotweelete kufwala, sombi wakatupa njiisho nshotweelete kukonkela. Tulyeelete kufwala shakufwala shilemeka Lesa, shabulemu alimwi shitondesha ayi ‘tulalibombya.’ (1 Timo. 2:​9, 10) Aboobo, tatusuni kufwala munshila yeenga yapa kwaamba ayi bamwi banobikilabo maano kumbotutoboneka. Alimwi njiisho shamu Baibo inga shacafwa bamanene kuleya kubika milawo pamakani ambotufwala ambotubotesha misusu yesu. w23.07 mape. 23-24 mapa. 13-14

Yehova alisuni kwaamba ayi atucaafwe kushiba mbweenga twacaana shoolwe kunembo. Abo basumina bwiite kuswa ku “mwanakashi muluya” baleelesha kucana lusangalalo mukucita bufuule. Nshobatoocita shilaakubatola “panshi mumusena wa bafu.” (Tus. 9:​13, 17, 18) Sombi abo basumina bwiite kuswa ku mwanakashi wacikoshanyo wiimikaninako “busongo bwancine,” balicite kulangila kubotu! (Tus. 9:1) Pacecino ciindi tutokwiiya kusuna Yehova nshaasuni akupata nshaapatite. (Kulu. 97:10) Alimwi tulisangalete mukwiinga tutokwiitako bamwi kwaamba ayi abalo bacafwikwe kuswa ku “busongo bwancine.” Tuli anga mbasebenshi abo bali ‘peculu lya musena wiindaawo kulaampa mundabala inene, akwiita bantu ayi: ‘Kamwisa noonse nomutacite maano.’’ Shoolwe nshotucana pomwi abaabo basumina bwiite ubu teshibo sha pakaciindi kaniini. Shoolwe ishi nshamuyayaya alimwi shilaakupa kwaamba ayi tukekale kwamuyayaya ndyetutotolelela kweendela “munshila ya maano akunyumfwisha shintu.”—Tus. 9:​3, 4, 6. w23.06 pe. 24 mapa. 17-18

Ino mulalinyumfwa buyani na muntu ngomusebensaakwe nabi shicikolonyinaanu wamwiipusha pa nshomushoma? Sa mulaloonda? Sobaanji mbotulinyumfwa. Sombi na muntu watwiipusha mwiipusho uyu inga catucafwa kunyumfwishisha mbwayeeya alimwi anshaashoma lyalo inga twaba acoolwe ca kumushimikilako makani abotu. Nacibi boobo, cimwi ciindi muntu inga watwiipusha mwiipusho ceebo cakwaamba ayi taashomi nshotushoma na mpashi alisunibo ayi tutalike kupikishanya. Sombi tatweelete kukankamana, mukwiinga bantu bamwi bakanyumfwa makani akubeca pashintu nshotushoma. (Milimo 28:22) Kwiilikaawo, tutokala “munshiku shakweelaako,” bantu baanji ‘ndyebatasuni shipangano’ alimwi ndyebali “bakali.” (2 Timo. 3:​1, 3) Mpashi inga mwaliipusha ayi, ‘Ino inga ndacita buyani kwaamba ayi nkumbule munshila ili kabotu alimwi yeenga yabula kukalasha bamwi na umwi alisuni kutalika kupikishanya andime pashintu nshonshoma?’ Ceenga camucafwa nkulibombya. Muntu ulibombya taafwambaani kukalala na wakalashikwa nabi na tacishi kabotu shakukumbula. w23.09 pe. 14 mapa. 1-2

Pashiindi shimwi, tulatambula butanjilishi kuswa kulibunga ubo butushitilisha. Kucakubonenaako, tulacenjeshekwa pamakani akusunishisha maali apashintu sheenga shapa kwaamba ayi tupwaye milawo yakwe Lesa. Kukonkela butanjilishi bwakwe Yehova bwaamba pamakani aya kulatucafwa. (Isa. 48:​17, 18; 1 Timo. 6:​9, 10) Ncakutatoonsha kwaamba ayi Yehova alaakutolelela kusebensesha bantu kututanjilila muciindi ca mapensho anene kushika amu Buleelo Bwa Myaaka 1,000. Sa tulaakutolelela kukonkela butanjilishi mbweshi bakanootupa? Cilaakutubeta cuubu kucita boobo na katukonkela butanjilishi Yehova mbwatotupa pacecino ciindi. Aboobo lyoonse tunokonkela butanjilishi Yehova mbwaatupa, kwiilikaawo abutanjilishi buswa kubamakwesu bakasalwa kutulama. (Isa. 32:​1, 2; Ebu. 13:17) Inga twakonkela Mutanjilili wesu Yehova katushomete cakutatoonsha ayi alaakututanjilila kabotu, mukwiinga alatucafwa kuleya cili coonse ceenga canyonyoola bushicibusa bwesu anguwe akututanjilila ku buumi butamaani mucishi cipya. w24.02 pe. 25 mapa. 17-18

Mutumwi Paulo wakalinga kusangalete kusebensela Yehova, sombi wakalinga kwiinda mumapensho apusenepusene. Liinji Paulo wakalinga kweenda mishinso ilaamfu alimwi paciindi cilya tacakalinga cuubu kweenda. Pashiindi shimwi Paulo ndyaakalinga palweendo, wakalinga ‘kupulukila kwempe kumaanshi akubapambi.’ Alimwi pashiindi shimwi wakoomwa kubalwani bakwe. (2 Koli. 11:​23-27) Kwiilikaawo, teshi lyoonse bashominyina ndyebakalinga kumulumba pashintu nshaakalinga kucita kwaamba ayi abacaafwe. (2 Koli. 10:10; Filip. 4:15) Ino nciinshi cakacafwa Paulo kutolelela kusebensela Yehova? Paulo wakeeya shiinji pamibo yakwe Yehova kuswa mu Malembo akushintu shakamucitikila. Paulo wakashoma cakutatoonsha ayi Yehova Lesa alimusuni. (Loma. 8:​38, 39; Efe. 2:​4, 5) Alimwi ici cakamupa kusuna Yehova abuumbi. Paulo wakatondesha ayi wakalinga kusuni Yehova kwiinda mukutolelela kucafwa bashominyina.—Ebu. 6:10. w23.07 pe. 9 mapa. 5-6

Bantu baanji balaamba ayi ncibotu kuba amfulumeende alimwi inga bakonkela milawo imwi ya mfulumeende. Sombi mpashi inga tabakonkeli milawo njebatasuni na njobabona ayi taibete kabotu. Baibo ilaamba ayi mfulumeende sha bantu shileendeleshekwa a Satana, shilapa kwaamba ayi bantu banopenga alimwi conoonobo shilaakunyonyoolwa. (Kulu. 110:​5, 6; Shiku. 8:9; Luka 4:​5, 6) Alimwi ilatulwiita ayi “uyo woonse utanyumfwili beendeleshi taatoonyumfwila Lesa.” Pacecino ciindi Yehova wakasuminisha mfulumeende sha bantu kweendelesha kwaamba ayi shintu shinokweenda kabotu, alimwi alatulangila kunooshinyumfwila. Aboobo tulyeelete kulipila misonko yoonse kubeendeleshi, kubalemeka akubanyumfwila. (Loma. 13:​1-7) Mpashi inga katubona ayi mulawo umwi wa mfulumeende nguyumu kukonkela, taubete kabotu na mpashi ayi tulayandika kulipila maali aanji kwaamba ayi tuukonkele. Sombi tulanyumfwila beendeleshi na batulwiita kucita shintu shitatopwaya milawo yakwe Lesa mukwiinga Yehova mbwaatulwiita kucita.—Milimo 5:29. w23.10 pe. 8 mapa. 9-10

Paciindi Samusoni ndyaakashalwa, bene Filisiti mbobakalinga kweendelesha bene Isilaeli alimwi bakalinga kubapensha. (Boombo. 13:1) Bene Isilaeli bakapenga abuumbi mukwiinga bene Filisiti bakalinga beshilunkutwe abuumbi. Yehova wakasala Samusoni “kufuna bene Isilaeli mumaansa a bene Filisiti.” (Boombo. 13:5) Samusoni wakalinga kweelete kucinka manungo muli Yehova, kwaamba ayi acikoonshe kukumanisha ncito iyi iyumu. Paciindi cimwi, bashilumamba bene Filisiti bakesa mukucata Samusoni ndyaakalinga ku Leyi, ndabala mpashi yakalinga mucishi ca Juda. Basankwa bene Juda bakaloonda, aboobo bakasalawo kwaaba Samusoni mumaansa abalwani bakwe. Bantu bene mishaabo bakamwaanga ntaambo shipya shobilo akumutola kubene Filisiti. (Boombo. 15:​9-13) Nacibi boobo, ‘mushimu wakwe Yehova wakesa pali [Samusoni] akumupa nkusu.’ Aboobo wakasutoola ntaambo nshobakamwaanga. Lyalo wakacana “mubanga wa mbongolo yakafwa conoono.” Wakaubwesa akucaishako bene Filisiti bali 1,000!—Boombo. 15:​14-16. w23.09 pe. 2 mapa. 3-4

Yehova inga wasebensesha nshila shipusenepusene kwaamba ayi akumanishe kuyanda kwakwe, alimwi lyoonse alaswitilila mukwiinga ‘wakabamba shintu shoonse kwaamba ayi akumanishe kuyanda kwakwe.’ (Tus. 16:4) Alimwi shiswaamo mushintu shoonse Yehova nshaacita, shilaakutolelela kubaako kwamuyayaya. Ino nduyaando nshi Yehova ndwaacite, alimwi ino nshiinshi nshakaalula kwaamba ayi akumanishe luyaando ulo? Lesa wakalwiita bantu bakutaanguna luyaando ndwaakabalengela. Wakabalwiita ayi “amushalane mufule, akususha cishi ca panshi. Amweendeleshe . . . sheenda panshi shoonse.” (Mata. 1:28) Adamu a Efa ndyebakapondoka akupa kwaamba ayi bantu bapyane bubi, luyaando lwakwe Yehova talukwe kwaaluka. Wakaalula mbwaakalinga kusa mukukumanisha luyaando lwakwe. Peenkapo wakabika Bwaami kwiculu ubo bwakalinga kusa mukukumanisha luyaando lwakwe lwa pakutaanguna ndwaakalengela bantu acishi capanshi.—Mate. 25:34. w23.10 pe. 20 mapa. 6-7

Yehova inga watucafwa kwaamba ayi tutolelele kumusebensela. Inga catubeta ciyumu kutolelela kusebensela Yehova, bunene bunene na kuli cimwi citabete kabotu ncotutokweelesha kusebenselaawo kwaciindi cilaamfu. Cimwi ciindi mpashi inga katuli mubukaalo buyumu, kwiinda abukaalo mutumwi Pita mbwaakalingaamo. Sombi Yehova inga watupa nkusu shakutolelela kumusebensela. (Kulu. 94:​18, 19) Kucakubonenaako, mukwesu umwi kaatana kwiiya cancine, wakalinga koonana abasankwanyina kwamyaaka iinji. Mukuya kwaciindi wakacileka cilabo ici citabete kabotu akutalika kukonkela Baibo nshoyaamba. Nacibi boobo, cimwi ciindi wakalinga kuba alunkumbwa lwakoonana abasankwanyina. Ino nciinshi cakamucafwa kutolelela kusebensela Yehova? Wakaamba ayi: “Yehova wakampa nkusu. Kwiinda mulucafwo lwa mushimu wakwe . . . , ndakeeya ayi inga ndacikoonsha kutolelela kukonkela Baibo nshoyaamba . . . Yehova wakampa mikuli ipusenepusene, alimwi watolelela kumpa nkusu nabi kwaamba ayi cimwi ciindi ndaba alunkumbwa lutabete kabotu.” w23.09 pe. 23 pala. 12

Nobamakwesu bacanike, mulyeelete kusebensa cankusu kwaamba ayi mukabe Beneklistu bashimpite lwakumushimu. Mulyeelete kusala shakubonenaako shibotu nsheenga mwakonkela, kwiiya kuyeeya kabotu, kuba muntu bamwi ngweenga bashoma, kwiiya kucita shintu sheenga shamucafwa, alimwi akulibambila kusebensa mikuli njeshi mukabaayo kunembo. Na mwayeeya pashintu shoonse nshomweelete kucita, inga mwayeeya ayi shafulisha. Sombi inga mwacikonsha. Munokwiibaluka ayi Yehova alisunishishi kumucafwa. (Isa. 41:​10, 13) Bamakwesu abenankashi mulibungano abalo balaakumucafwa. Na mwaba Mwineklistu ushimpite lwakumushimu, mulaakuba alusangalalo mubuumi bwanu akulinyumfwa kukwana. Nobamakwesu bacanike, tulimusuni! Alimwi Yehova amupe shoolwe ndyemutoocita nsheenga mwacikonsha kwaamba ayi mube basankwa bashimpite lwakumushimu. w23.12 pe. 29 mapa. 19-20

Amuyeeye pacakubonenaako ici. Amuyeeye kwaamba ayi mwabungana pomwi abamakwesu abenankashi. Mutosangalala ceebo ca nshemutoocita, alimwi mwakopwa cikope pomwi. Mukuyeeya kwaamba ayi mpashi cakutaanguna tacina kuswa kabotu, mwakopwa shikope ashimwi shobilo lyalo mwaba ashikope shotatwe. Sombi mwaboona ayi pacikope cimwi mukwesu umwi wabisha pameenso. Aboobo inga mwacikushaamo mukwiinga mulicite shikope shimwi shobilo boonse ndyebakamweta mweta, kwiilikaawo amukwesu uyo. Liinji tulebaluka shintu shibotu nshetwakacita ndyetwakalinga pomwi abamakwesu abenankashi. Ano amuyeeye ayi paciindi cimwi mukwesu nabi nankashi wakaamba na kucita cintu cimwi citabete kabotu. Sa tulyeelete kutolelela kuyeeya pancaakacita? Tulyeelete kweelesha kucileka kuyeeya pancaakacita, bweenka mbweenga twakushamo cikope citana kuswa kabotu. (Efe. 4:32) Inga twacikonsha kulubaako na katwiibaluka shintu shibotu nshetwakacitawo pomwi anguwe. Ishi nshoshintu nshotweelete kutolelela kunokwiibaluka. w23.11 mape. 12-13 mapa. 16-17

Maswi amu ciGiliki akasebenseshekwa palilembo ili alatondesha ayi banakashi Beneklistu balyeelete kufwala shakufwala shipa bulemu kuli Lesa, akuyeeyelako bamwi mbweenga balinyumfwa pa shakufwala nshobafwala. Tulimusuni abuumbi nobenankashi nomufwala cakulibombya! Kunyumfwisha shintu ngumubo aumwi benankashi boonse bashimpite lwakumushimu ngobatondesha. Ino kunyumfwisha shintu cilaambanshi? Nkushiba ciluleme acitaluleme lyalo akusalawo kucita ciluleme. Amuyeeye pacakubonenaako cakwe Abigelo. Ibaye wakasalawo kucita cintu cakalinga kusa mukuleta mapensho anene ku bamumukwashi wakwe boonse. Abigelo wakacitawo comwi peenkaapo. Ceebo cakwaamba ayi wakatondesha mubo wa kunyumfwisha shintu, wakapulusha bamumukwashi wakwe. (1 Samwe. 25:​14-23, 32-35) Alimwi kunyumfwisha shintu kulatucafwa kushiba ciindi ndyetweelete kwaamba andyetweelete kuumuna. Alimwi ndyetutobandika abamwi, kulatucafwa kutabepusha pamakani ngotuteelete kushiba na ngeenga babula kwaanguluka kutulwiita.—1 Tesa. 4:11. w23.12 pe. 20 mapa. 8-9

Maswi aya mutumwi Paulo wakaalembela bamulibungano lyaku Loma. Bashominyina bamulibungano ili bakeeya pali Yehova a Yesu, bakaba alushomo alimwi bakaba Beneklistu. Aboobo Lesa wakababona ayi baliluleme “ceebo ca lushomo,” alimwi wakabananika amushimu usalashi. (Loma. 5:1) Ncakwiila bakaba akulangila kubotu, nkobakalinga kushomete ayi kulaakukumanishikwa. Ndipakeenda ciindi, Paulo wakalembela Beneklistu bananikitwe baku Efeso pakulangila Lesa nkwakabapa. Kulangila uko kwakalinga kwiilikaawo kutambula ‘shoolwe shabulemu Lesa nshaakashomesha basalalite.’ (Efe. 1:18) Alimwi Paulo ndyaakalembela bene Kolose, wakaamba ankweshi bakatambwite cilambu cabo. Wakaamba pacilambu ico ayi “Lesa nshaakamubambila kabotu kwiculu.” (Kolo. 1:​4, 5) Aboobo Beneklistu bananikitwe balalangila kubushikwa akuba abuumi butamaani kwiculu uko nkweshi bakeendeleshe pomwi a Klistu.—1 Tesa. 4:​13-17; Ciyu. 20:6. w23.12 pe. 9 mapa. 4-5

Liswi lyamu ciGiliki lyakasansululwa ayi “kulama” lyakalinga kwaamba pabashilumamba abo bakalinga kulama, na kushitilisha ndabala kubalwani. Bantu bakalinga kukala mundabala yamushobo uyo bakalinga koona muluumuno, mukwiinga bakalinga kucishi ayi balishitilishitwe kubashilumamba. Aswebo na luumuno lwakwe Lesa lwalama myoyo amiyeeyo yesu, tulalinyumfwa kukalikana ceebo cakushiba kwaamba ayi tulishitilishitwe. (Kulu. 4:8) Bweenka mbuli Aana, nabi kwaamba ayi inga twatolelela kwiinda mubukaalo buyumu inga twalinyumfwa kuba aluumuno. (1 Samwe. 1:​16-18) Alimwi na twalinyumfwa kukalikana, liinji cilatubeta cuubu kuyeeya kabotu akusalawo shakucita shili kabotu. Ino nshiinshi nsheenga twaciita? Bweenka bantu bamu ndabala mbobakalinga kwiita mulindilishi kwaamba ayi abashitilishe, amwebo mulyeelete kwiita Yehova kwaamba ayi amushitilishe. Munshila nshi? Mulyeelete kupaila kushikila mwalinyumfwa kuba aluumuno lwakwe Lesa. (Luka 11:9; 1 Tesa. 5:17) Na mutokwiinda mubukaalo buyumu amutolelele kupaila lyalo mulaakuba aluumuno lwakwe Yehova ulo lweshi lukashitilishe moyo amiyeeyo yanu.—Loma. 12:12. w24.01 pe. 21 mapa. 5-6

Kwaamba ayi Yesu asalashe liina lya Baishi, wakaliyumya ndyaakalinga kupenshekwa munshila shipusenepusene, kucobolwa alimwi akubekeshekwa. Taakuwo cintu cakalinga kweelete kumupa kunyumfwa nsoni mukwiinga wakalinga kucishi ayi wakanyumfwila Baishi mushintu shoonse. (Ebu. 12:2) Alimwi wakalinga kucishi ayi Satana wakalinga kumulwana paciindi ici ciyumu. (Luka 22:​2-4; 23:​33, 34) Ncakutatoonsha kwaamba ayi Satana wakalinga kusuni ayi Yesu acileeke kushomeka, sombi wakaalilwa cakumaninina! Mukweelaako, Yesu wakatondesha ayi Satana ngumubeshi mubiibi alimwi ayi Yehova alicite basebenshi bashomeka abo batolelela kushomeka kuli nguwe nabi ndyebatokwiinda mumeelesho ayumu! Sa mulisuni kusangalasha Mwaami wanu utokweendelesha? Amutolelele kulumbaisha liina lyakwe Yehova, akucafwa bamwi kwiiya pamibo ibotu njaacite. Na mwacita boobo, nkokwaamba ayi mutokonkela cakubonenaako cakwe Yesu. (1 Pit. 2:21) Alimwi bweenka mbuli Yesu, mulasangalasha Yehova akutondesha ayi Satana mulwani Wakwe, ngumubeshi utacitewo ansooni! w24.02 mape. 11-12 mapa. 11-13

Mumyaaka 5 yainda, bantu beendilila 1 miliyoni bakabombekwa akuba Bakamboni Bakwe Yehova. Na mwaaba buumi bwanu kuli Yehova, mulasalawo kuba shikwiiya wakwe Yesu Klistu alimwi kucita kuyanda kwakwe Lesa kulaba cintu ciyandika abuumbi mubuumi bwanu. Ino nshiinshi shiilikitwe mukwaaba buumi bwanu kuli Yehova? Yesu wakaamba ayi: ‘Na muntu utooyanda kukonkela ndime, alyeelete kushiya akusuula shintu shoonse shimusangalasha.’ (Mate. 16:24) Maswi amu ciGiliki akasansululwa ayi “kushiya akusuula shintu shoonse” munshila imwi inga asansululwa ayi “kutanoocita shintu nshoosuni omwiine.” Mbuli musebenshi wakwe Yehova wakalyaaba, mulaakuyandika kutacita shintu shoonse shitasangalashi Yehova. (2 Koli. 5:​14, 15) Ici cilaamba ayi mulaakuyandika kucileka kucita “milimo ya buntu,” mbuli bufuule. (Gala. 5:​19-21; 1 Koli. 6:18) Sa kukonkela milawo iyo kulaakupa kwaamba ayi buumi bumuyumine? Teshi cikabe boobo na Yehova mulimusuni alimwi mulishomete ayi kukonkela milawo yakwe kulamucafwa nobeene.—Kulu. 119:97; Isa. 48:​17, 18. w24.03 pe. 2 pala. 1; pe. 3 pala. 4

Yehova alapa mushimu usalashi kubaabo bamusangalasha. (Mate. 12:18) Inga twaliipusha ayi, ‘Sa ndacikonsha kutondesha shisepo shimwi sha mushimu usalashi mubuumi bwangu?’ Sa ndakalika moyo abuumbi kwiinda mbondakalinga kaantana kushiba Yehova? Cancine ncakwaamba ayi na mweeya kunotondesha bunene shisepo sha mushimu usalashi, mulaakunoshoma cakutatoonsha ayi Yehova alikondetwe pali ndimwe! Yehova alapa mpindu ya cilubula kubaabo bamusangalasha. (1 Timo. 2:​5, 6) Ano ino mbuyani na tucilinyumfwa ayi Yehova taakondetwe pali ndiswe nabi kwaamba ayi tulashoma mucilubula alimwi twakabombekwa? Munokwiibaluka ayi teshi lyoonse ndyeenga twashoma mbotulinyumfwa, sombi Yehova inga twamushoma. Alabona baabo bashoma mucilubula ayi mbantu baluleme alimwi alabashomesha ayi alaakubapa shoolwe.—Kulu. 5:12; Loma. 3:26. w24.03 pe. 30 pala. 15; pe. 31 pala. 17