Sa Mutokwiibaluka?

Sa mutokwiibaluka nshotwakeeya kuswa mumitwi ipusenepusene yamu Njashi Yamulindilishi yamu 2023? Amucane shikumbulo kumiipusho itokonkelaawo:

Ino ‘kwaalula miyeeyo yesu’ cilaamba nshi? (Loma. 12:2)

Kwaalula miyeeyo yesu tacaambi ayi tulyeelete kweelabo pakucita shintu shibotu shiniini. Sombi tulyeelete kuyeeya mbotubona shintu kuswa panshi lya moyo akwaalula mbotuyeeya kwaamba ayi tunoocita shintu kweelana anjiisho shakwe Yehova.—w23.01, mape. 8-9.

Ino inga twatondesha buyani ayi tulabona shintu munshila yakweelanya kabotu ndyetutoobona shintu shitoocitika mucishi?

Tulisuni kushiba shintu shitoocitika mucishi mboshitookumanisha bushinshimi. Ndyetutobandika bushinshimi bwamu Baibo abamwi, tulyeelete kuleya kwaamba nshetutooyeeya ayi inga shacitika mukwiinga kucita boobo inga kwalengesha ayi mulibungano mutabi lucatano. Inga cabota kubandika makani ali mumabuku akabambwa alibunga lyakwe Yehova. (1 Koli. 1:10)—w23.02, pe. 16.

Ino kubombekwa kwakwe Yesu kulipusene buyani a kwa bashikwiiya bakwe?

Yesu taakalinga kuyandika kulyaaba kuli Yehova bweenka mbotulyaaba, mukwiinga wakashalilwa mumushobo wakalinga kulyaabite kale kuli Lesa. Taakalinga kuyandika kwaana kuswa kushibiibi, mukwiinga wakalinga kumaninite alimwi taakwe kucitaawo cibiibi cili coonse.—w23.03, pe. 4.

Ino inga twacita buyani kwaamba ayi tucafwe bamwi kukumbulawo kumabungano?

Cintu comwi nceenga twaciita, nkwaamba shikumbulo shifwiifwi. Kucita boobo, kulapa kwaamba ayi baanji bakumbulewo. Alimwi inga twaleya kwaamba shiteente shiinji. Na mwaamba shiteente shoonse shili mupalagilafu, bamwi balaakubula shakukumbulawo.—w23.04, pe. 23.

Ino maswi akwaamba ayi “Nshila Isalalite” aambwa pa Isaya 35:8 alasansulula nshi?

Pakutaanguna, nshila iyi yacikoshanyo yakalinga kwaamba pa baJuda abo bakaswa mubusha ku Babiloni akuboolela kumishaabo. Ino mbuyani munshiku shino? Myaaka iinji mwaaka wa 1919 kootana kushika, kuli shiinji shakacitwa kwaamba ayi nshila iyi ibambwe. Kwiilika pashintu shimwi nshobakacita, bakasansulula akupulinta ma Baibo. Bantu bakwe Lesa batolelela kweenda mu “Nshila Isalalite.” Kucita boobo kulabacafwa kutolelela kulambila Yehova pacecino ciindi akunembo, paciindi Bwaami bwakwe Lesa ndyeshi bukalete shoolwe shibotu pacishi capanshi.—w23.05, mape. 15-19.

Ino makani ngotucana mu Tushimpi capita 9 alaamba pabanakashi bobilo bacikoshanyo bali?

Tushimpi ilaamba pa bwiite kuswa ku “mwanakashi muluya.” Lyalo abo basumina bwiite bwakwe balalicana “mumusena wa bafu.” Alimwi ilaamba apa “mwanakashi musongo” uyo wiimikaninako busongo bwancine. Abo basumina bwiite bwakwe balaba a “maano akunyumfwisha shintu” alimwi balaakukala kwamuyayaya. (Tus. 9:​1, 6, 13, 18)—w23.06, mape. 22-24.

Ino Lesa wakatondesha buyani kuliceesha akutayumininabo pacintu comwi ndyaakalinga kubandika a Loti?

Yehova wakalwiita Loti kuswa mu Sodoma akucicila kumusena watulundu. Loti ndyaakasenga ayi acicile ku Sowa, Lesa wakamusuminisha.—w23.07, pe. 21.

Ino nshiinshi nsheenga mwanakashi wacita na ibaye aleebela shintu shileta miyeeyo yakoonana?

Alyeelete kunokwiibaluka ayi teshi ngwakalengesha. Alyeelete kubikila maano kukuyumya bushicibusa bwakwe a Lesa akukutumana kuyeeya pabanakashi abo bakapaila kuli Yehova kwaamba ayi abayuminishe. Inga wacafwa ibaye kuleya bukaalo bweenga bwapa kwaamba ayi eeleshekwe.— w23.08, mape. 14-17.

Ino kunyumfwishisha shintu inga kwatucafwa buyani kukumbula cakulibombya na bamwi batwiipusha pa nshotushoma?

Muciindi cakuyeeya ayi watwiipusha mwiipusho uyo kwaamba ayi tutalike kupikishanya, inga twayeeya mbweenga mwiipusho uyo watucafwa kushiba mbwayeeya anshaabona kuyandika. Kucita boobo inga kwatucafwa kukumbula cakulibombya.— w23.09, pe. 17.

Ino nshiinshi nsheenga tweeya kuswa kucakubonenaako cakwe Maliya pamakani akuyuminishikwa?

Maliya ndyaakashiba ayi alaakuba mushali wakwe Mesiya, wakayuminishikwa kuswa kubamwi. Gabuliyelo a Lisabeti bakayuminisha Maliya kwiinda mukusebensesha Malembo. Aswebo inga twayuminishikwa ku bashominyineesu.—w23.10, pe. 15.

Ino Yehova alaikumbula buyani mipailo yesu?

Wakatushomesha ayi ananokutika mipailo yesu akuyeeya pakuyanda kwakwe ndyaatokutika kumipailo yesu. (Jele. 29:12) Inga twapailila pashintu shikoshenye, sombi Yehova inga wakumbula mipailo yesu munshila shipusene. Nacibo boobo, alaakutolelela kutucafwa.—w23.11, mape. 21-22.

Bene Loma 5:2 ilaamba pa “kulangila,” ano ino nceebonshi kwakambwaawo alimwi mu vesi 4?

Muntu na wasumina kukutika ku makani abotu, inga walangila kukala buumi bubotu mu paladaiso pacishi. Sombi na weenda mumapensho akuliyumya, akushiba ayi Lesa alikondetwe pali nguwe, kulangila kwakwe kulayuminaako alimwi alakusuna abuumbi.—w23.12, mape. 12-13