Amutolelele Kuba Alusangalalo Ndyemutolama Bamwi

1-2. Ino Yehova alalinyumfwa buyani pashintu nshomucita kwaamba ayi mucafwe wacinene na mulwashi ngomutolama? (Tushimpi 19:17) (Amubone ashikope.)

BA JIN-YEOL baku Korea bakaamba ayi: “Twekala mucikwati amukaangu kwamyaaka iindilila 32. Nacibi boobo, kwamyaaka 5 yainda bakaangu balaciswa bulwashi bwa lukanko alimwi tabacikonshi kweenda. Ndibasuni abuumbi alimwi ndanyumfwa kabotu kubalama. Lyoonse na kwashiya baloona pabulo bulibetele muŋanda yesu, lyalo ndoona pafwiifwi ambabo kambacatite mulyaansa.”

² Mpashi amwebo kuli wacinene na mulwashi umwi ngomutolama. Mpashi mbashali banu, ngomwebenaakwe, mwanaanu na shicibusa wanu. Ncakutatoonsha kwaamba ayi mulanyumfwa kabotu kucafwa wooyo ngomutolama mukwiinga mulimusuni alimwi mulisuni Yehova. (1 Timo. 5:​4, 8; Jemu. 1:27) Nacibi boobo, kuli mapensho ngomwiindaamo mpashi bamwi ngobataboni. Alimwi mpashi cimwi ciindi inga kamulinyumfwa ayi ndimwebo nweenka nomutopenga. Bamwi inga kababona ayi mulisangalete, sombi inga kabatacishiiwo ayi cimwi ciindi mulalila. (Kulu. 6:6) Ano nabi kwaamba ayi bamwi inga kabatacishiiwo mapensho ngomutokwiindaamo, Yehova lakwe alicishi. (Amweelanye a Kulonga 3:7.) Alabona kulila kwanu alimwi alalumba pashintu shoonse nshomucita kwaamba ayi mucafwe wooyo ngomutolama. (Kulu. 56:8; 126:5) Alaakumupa shoolwe pashintu shoonse nshomucita mukwiinga kuli nguwe cili anga ni nkongole.—Amubelenge Tushimpi 19:17.

3. Ino nceebonshi mpashi tacakalinga cuubu kuli Abulaamu a Saala kulama Tela?

³ Mu Baibo muli shakubonenaako shiinji sha bantu bakalinga kulama wacinene na mulwashi. Kucakubonenaako, amuyeeye pali Abulaamu a Saala. Ndyebakalonga kuswa ku Ulu, baishi Abulaamu ba Tela bakalinga kucite myaaka 200. Bakeenda mushinso wa makilomita ali 960 kuswa ku Ulu kuya ku Alani. (Mata. 11:​31, 32) Abulaamu a Saala bakalinga kumusuni Tela, nabi kwaamba ayi tacakalinga cuubu kumulama bunene bunene ndyebakalinga palweendo ulu. Cilyeelete bakeendela pa ngamela na pamadonki. Ano mpashi cakalinga ciyumu kuli Tela kweendela pa shifubwa ishi mukwiinga wakalinga wacembela. Cimwi ciindi Abulaamu a Saala bakalinga kulema abuumbi ceebo cakulama baishiwabo. Nacibi boobo, Yehova wakabapa nkusu shakutolelela kulama baishiwabo. Aboobo amwebo alaakumucafwa bweenka mbwaakacafwa Abulaamu a Saala.—Kulu. 55:22.

4. Ino tutobandika nshi mumutwi uyu?

⁴ Na kamusangalala, inga mwacikoonsha kutolelela kucafwa wacinene na mulwashi ngomutolama. (Tus. 15:13) Ano sa inga cakonsheka kuba alusangalalo nabi ndyemutokwiinda mubukaalo buyumu abuumbi? Ee. (Jemu. 1:​2, 3) Comwi ceenga camucafwa nkupaila kuli Yehova akumusenga kwaamba ayi amucaafwe kunoobona shintu munshila ili kabotu. Mumutwi uyu, tutobandika pashintu ashimwi nsheenga mwaciita kwaamba ayi mutolelele kuba alusangalalo. Alimwi tutobandika apashintu bamwi nsheenga bacita kwaamba ayi bamucaafwe kutolelela kuba alusangalalo. Sombi amuleke tutaangune kubandika sheenga shapa kwaamba ayi mucileeke kuba alusangalalo, na kuli wacinene na mulwashi ngomutolama.

SHEENGA SHAPA KWAAMBA AYI MUCILEEKE KUBA ALUSANGALALO NA KULI NGOMUTOLAMA

5. Ino nshiinshi sheenga shacitika na twacileka kuba alusangalalo na kuli ngotutolama?

⁵ Na katuyeeyabo pamapensho ngotutokwiindaamo ceebo ca wacinene na mulwashi ngotutolama, inga twacileka kuba alusangalalo. (Tus. 24:10) Lyalo inga twacileka kunoomubikilako maano akumucafwa kweelana ambweenga katusuni. Ino nshiinshi sheenga shapa kwaamba ayi tucileeke kuba alusangalalo na kuli ngotutolama?

6. Ino nceebonshi bamwi balama wacinene na mulwashi balalema abuumbi?

⁶ Cimwi ciindi inga kamulinyumfwa kulema abuumbi. Nankashi waliina lya Leah wakaamba ayi: “Kulama wacinene nabi kucisisha kulalemya abuumbi, nabi kwaamba ayi pabushiku ubo muntu uyo wabukako kabotu. Cimwi ciindi pakumana kwa bushiku ndalinyumfwa kulema abuumbi cakwaamba ayi ndaalilwa nabibo kukumbula na muntu wantumina meseji.” Bamwi cilababeta ciyumu kucana ciindi cikwene cakookesha nabi kwaamba ayi kookesha kulayandika. Kucakubonenaako, nankashi waliina lya Inés wakaamba ayi: “Ndaalilwa kucana ciindi cikwene cakookesha, ceebo cakwaamba ayi na twaya mukoona, liinji ndabuka na peendabo mawoola obilo kwaamba ayi mbone na bapongoshi bangu banakashi balibo kabotu. Alimwi peenda myaaka iinji nebo abeebaangu kutayawo mukufwakasha kumusena kumwi, ceebo cakwaamba ayi lyoonse tulyeelete kunooli pafwiifwi abapongoshi bangu.” Bamwi na kuli ngobatolama balaalilwa kucana ciindi cakuba pomwi abeshicibusa babo na kukaka kusebensako ncito shimwi mulibunga lyakwe Yehova ceebo cakwaamba ayi lyoonse balyeelete kunooli pafwiifwi awooyo ngobatolama. Aboobo balalinyumfwa kuumuninwa ceebo cakwaalilwa kucita shoonse nsheenga kabasuni.

7. Ino nceebonshi bamwi balama wacinene na mulwashi balalipa mulandu na kulinyumfwa cibiibi?

⁷ Inga kamulipa mulandu na kulinyumfwa cibiibi. Nankashi waliina lya Jessica wakaamba ayi: “Liinji ndalinyumfwa ayi ndyeelete kunoocita shiinji kwaamba ayi ncafwe bata. Alimwi na ndokeshaako, ndalinyumfwa ayi nshintobatondesha lusuno.” Bamwi balalisukama ceebo cakuyeeya ayi tabatoocita shiinji kwaamba ayi bacafwe wooyo ngobatolama. Alimwi cimwi ciindi inga kabalinyumfwa ayi teshi bacikoonshe kutolelela kumulama. Lyalo na balema, mpashi inga baamba maswi atabete kabotu, na kucita cintu citabete kabotu kuwooyo ngobatolama. Ishi shoonse inga shabapa kulinyumfwa cibiibi maningi. (Jemu. 3:2) Bamwi balalinyumfwa cibiibi ceebo cakubona muntu ngobasuni kaaya bucisilwakobo. Kucakubonenaako, nankashi waliina lya Barbara wakaamba ayi: “Ndalinyumfwa cibiibi maningi ceebo cakubona shicibusa wangu kaaya bucisilwakobo bushiku abushiku.”

8. Ino bamwi balalinyumfwa buyani na uyo ngobatolama wabalumba?

⁸ Inga kamulinyumfwa ayi bamwi tabamuluumbi pashintu nshomubacitila. Mpashi inga kamulinyumfwa boobo ceebo cakwaamba ayi teshi liinji ndyebamuluumba pakusebensa cankusu akulyaaba kwanu. Sombi na kabamulumba pashintu nshomubacitila, inga mwayuminishikwa maningi (1 Tesa. 5:18) Nankashi waliina lya Melissa wakaamba ayi: “Cimwi ciindi ndalila ceebo cakulema na kulefuka maningi. Ano ndayuminishikwa abuumbi na abo mbontolama bandwiita ayi, ‘Ndalumba abuumbi pashintu shoonse nshoncitila!’ Ici cilanjuminisha kutolelela kunoobacafwa bushiku abushiku.” Ba Ahmadu abakaabo balalama mwaana mwanakashi muniini uyo uciswa kashita. Ba Ahmadu bakaamba mbobalinyumfwa na mwaana uyo wabalumba. Bakaamba ayi: “Mwaana uyo inga taanyumfwishishi shoonse nshotumucitila kwaamba ayi tumucaafwe. Sombi tulasangalala abuumbi na watulumba nabi kutulwiita ayi alitusuni.”

NSHEENGA MWACIITA KWAAMBA AYI MUTOLELELE KUBA ALUSANGALALO

9. Ino inga mwatondesha buyani ayi tamulilangili kucita nsheenga tamucikoonshi?

⁹ Mutanolilangila kucita nsheenga tamucikoonshi. (Tus. 11:2) Taakuwo muntu weenga wacikonsha kucita shintu shoonse nsheenga kaasuni. Aboobo amushibe nsheenga mwacikonsha kucita ansheenga tamucikoonshi. Lyalo cimwi ciindi na bantu bamusenga kucita cintu cimwi, palibo kabotu kukaka mukwiinga kucita boobo kulatondesha ayi tamulilangili kucita nsheenga tamucikoonshi. Alimwi munoosumina na bamwi kabasuni kumucafwa. Mukwesu waliina lya Jay wakaamba ayi: “Bushiku abushiku munoocitabo nsheenga mwacikonsha kweelana aciindi ncomucite alimwi patokweela nkusu shanu. Kucita boobo kulaakumucafwa kutolelela kuba alusangalalo.”

10. Ino nceebonshi kunyumfwishisha shintu kulayandika na kuli ngomutolama? (Tushimpi 19:11)

¹⁰ Amube muntu unyumfwishisha shintu. Pa Tushimpi 19:11 palaamba ayi: ‘Muntu unyumfwisha shintu taafwambaani kukalala, alimwi kusuula shilubo nshaacitilwa kulamuletela bulemu.’ Aboobo kunyumfwishisha shintu kulaakumucafwa kutafwambaana kukalala na uyo ngomutolama waamba na kucita shintu shitabete kabotu. Mulaakweelesha kushiba citoopa kwaamba ayi muntu uyo anoocita shintu munshila ipuseneeko. Malwashi amwi alapa kwaamba ayi muntu anoocita shintu nsheenga taaciti na kaalibo kabotu. (Shiku. 7:7) Kucakubonenaako, mpashi inga watalika kupikishanya andimwe, kutongooka maningi akucenena. Sombi na alibo kabotu kaataciti boobo. Na mutolama muntu wamushobo uyu, inga cabota kushiba shiinji pa bulwashi mbwatoociswa, mukwiinga kucita boobo kulaakumucafwa kushiba ayi nkuciswa kutolengesha ayi anoocita shintu munshila ipuseneeko.—Tus. 14:29.

11. Ino nshintu nshi shiyandika abuumbi nshomweelete kunoocita bushiku abushiku nabi kwaamba ayi mulicite shakucita shiinji? (Kulumbaisha 132:​4, 5)

¹¹ Munoocana ciindi cakuyumya bushicibusa bwanu a Yehova. Nabi kwaamba ayi inga kamucite shakucita shiinji, munoocana ciindi cakucita shintu ‘shiyandika abuumbi’ mbuli kuyumya bushicibusa bwanu a Yehova. (Filip. 1:10) Mwaami Defedi alakwe wakalinga kucite shakucita shiinji mubuumi. Sombi wakalinga kubikila maano kukulambila Yehova. (Amubelenge Kulumbaisha 132:​4, 5.) Amwebo munoocana ciindi cakubelenga Baibo akupaila kuli Yehova nabi kwaamba ayi mulicite shakucita shiinji. Kucita boobo nkokucafwa nankashi waliina lya Eliza.a Wakaamba ayi: “Kupaila akubelenga malembo amwi mulibuku lya Kulumbaisha lyalo akukutumana kuyeeyawo, kulancafwa kutolelela kuba alusangalalo. Ndapaila kuli Yehova mankanda aanji pabushiku kwaamba ayi ancaafwe kukalikana mumiyeeyo.”

12. Ino nceebonshi abo balama bamwi balyeelete kunoocita shintu sheenga shabacafwa kuba abuumi buli kabotu?

¹² Munoocita sheenga shamucafwa kuba abuumi buli kabotu. Mpashi inga kamutacikoonshi kucana ciindi cakuya mukuula na kulangoola shakulya shiyaka mubili. Alimwi cimwi ciindi inga kamutelekabo shakulya shalubilo. Nacibi boobo, kulya shakulya shiyaka mubili akunoocita shiyumya mubili kulayandika kwaamba ayi mube abuumi buli kabotu akunoyeeya kabotu. Aboobo munoocana ciindi cakuteleka shakulya shiyaka mubili akunoocita shiyumya mubili lyoonse. (Efe. 5:​15, 16) Kwiilikaawo, munoocana ciindi cikwene cakoona. (Shiku. 4:6) Bantu bamwi bakeeya pa boongo bwesu mbobusebensa balaamba ayi muntu alayeeya kabotu na kaona tulo tukwene. Alimwi balaamba ayi na muntu kaona tulo tukwene, taalisukami bunene nabi ndyaatokwiinda mubukaalo buyumu. Cimwi ncomweelete kunoocita, nkucana ciindi cakucita shintu shimusangalasha. (Shiku. 8:15) Nankashi umwi wakaamba nshaacita shimucafwa kutolelela kuba alusangalalo. Wakaamba ayi: “Na bushiku ubo kwaca kabotu, ndaswako pansengwe kwaamba njoteleko lumwi. Alimwi linkanda lyomwi mu mweenshi, ndacitako shintu shinsangalasha pomwi ashicibusa wangu.”

13. Ino nceebonshi kuseka nkubotu? (Tushimpi 17:22)

¹³ Munoosekaako. (Amubelenge Tushimpi 17:22; Shiku. 3:​1, 4) Na kuli ngomutolama, ncakutatoonsha kwaamba ayi teshi lyoonse shintu ndyesheenda kweelana ambomwalinga kulangila. Sombi na mwaseka pasheesho shacitika nabi kwaamba ayi tashina kubota, inga camucafwa kutalinyumfwa cibiibi abuumbi akutalisukama bunene. Alimwi na kamusekaako pomwi awooyo ngomutolama, bushicibusa bwanu bulaakuyuminaako.

14. Ino kulwiitako shicibusa ngomushoma mbomutolinyumfwa inga kwamucafwa buyani?

¹⁴ Amulwiiteko shicibusa ngomushoma mbomutolinyumfwa. Cimwi ciindi munanolisukama nabi kwaamba ayi mwacita nsheenga mwacikonsha kwaamba ayi mutolelele kuba alusangalalo. Na mwalinyumfwa boobo, munolwiitako shicibusa ngomushoma uyo weenga weelesha kunyumfwishisha mbomutolinyumfwa. (Tus. 17:17) Alaakumukutika cakubikila maano akumuyuminisha kwaamba ayi mutolelele kuba alusangalalo.—Tus. 12:25.

15. Ino kubandika pansheshi mukacite mu Paladaiso inga kwamucafwa buyani kuba alusangalalo?

¹⁵ Munobandika pansheshi mukacite mu Paladaiso pomwi awooyo ngomutolama. Lyoonse munookwiibaluka ayi teshi mukatolelele kulama wacinene na mulwashi, mukwiinga Yehova ndyaakalenga bantu taakalinga kusuniiwo ayi banocembela nabi kuciswa. (2 Koli. 4:​16-18) Conoonobo mulaakuba abuumi bubotu kweelana a Yehova mbwakalinga kusuni pakutaanguna. (1 Timo. 6:19) Aboobo munobandika pansheshi mukacite mu Paladaiso pomwi awooyo ngomutolama. Kucita boobo kulaakumucafwa kuba alusangalalo. (Isa. 33:24; 65:21) Nankashi waliina lya Heather wakaamba ayi: “Liinji ndalwiita baabo mbondama ayi conoonobo tulaakunotunga shakufwala pomwi, kucica, akucofwa macinga. Alimwi na beshikamukowa abeshicibusa besu bakafwa bakabushikwe, tulaakubapangila buledi akubatelekela shakulya shibotu. Tulalumba Yehova pakulangila nkotucite.”

MBWEENGA TWACAFWA BAABO BATOLAMA UMWI

16. Ino nshiinshi nsheenga twaciita kwaamba ayi tucafwe bamakwesu abenankashi balama wacinene na mulwashi? (Amubone acikope.)

¹⁶ Inga twacafwa baabo batolama umwi kwaamba ayi bookesheeko. Bamakwesu abenankashi mulibungano inga balyaaba kuya mukubako pomwi awacinene na mulwashi. Kucita boobo inga kwacafwa wooyo ubalama kookeshaako na kuba aciindi cakucitako shintu shimwi nshaasuni. (Gala. 6:2) Mumabungano amwi, bakasalila limwi beshikushimikila bapusenepusene bakucafwilisha nsondo ansondo. Kucakubonenaako, nankashi waliina lya Natalya uyo ulama beebaye batacikoonshi kweenda, wakaamba ayi: “Nsondo ansondo, mukwesu alesa kumisheesu linkanda lyomwi na mankanda obilo kwaamba ayi abe pomwi abeebaangu. Lyalo balabandika, kusebensela pomwi muncito yakushimikila akweebela mavidyo. Beebangu balanyumfwa kabotu abuumbi alimwi anebo ndaba aciindi cakucitako shintu shimwi, mbuli koololako myeendo.” Bamwi mulibungano inga basalawo kuya mukuba pomwi awacinene na mulwashi mashiku oonse, kwaamba ayi uyo ubalama oneeko.

17. Ino nshiinshi nsheenga twaciita kwaamba ayi tucafwe ulama wacinene na mulwashi kwaamba ayi afubileemo mumabungano?

¹⁷ Inga twacafwa wooyo ulama wacinene na mulwashi ciindi ndyetutobungana. Abo balama bamwi tabafubilimo bunene mumabungano ngotubaawo nsondo ansondo, kubungana kwalubasu akubungana kunene, ceebo cakwaamba ayi ciindi cinene balyeelete kubikila maano kuwooyo ngobalama. Aboobo bamakwesu abenankashi inga balyaaba kukalaakwe kwaamba ayi uyo umulama alakwe afubileemo mumabungano. Mpashi inga bakalaakwe kushikila mabungano amana na kukalaakwe mulubasu lomwi nabi mumbasu shobilo shakubungana. Na uyo utoyandika lucafwo taacikoonshi kweenda kuswa paŋanda, inga twaya mukucaalaakwe kwaamba ayi uyo umulama aye mukubungana ku Ŋanda ya Bwaami.

18. Ino nshiinshi shimwi nsheenga twaciita kwaamba ayi tucafwe baabo balama bamwi?

¹⁸ Munoobalumba akubapaililaako. Ciindi aciindi, bamanene balyeelete kunoyuminisha baabo balama bamwi. (Tus. 27:23) Alimwi soonsebo mulibungano inga twacikonsha kubayuminisha, teshi mulandu abukaalo mbotubeteemo. Inga katubapaililaako akuli Yehova kwaamba ayi abacaafwe kuliyumya akutolelela kuba alusangalalo.—2 Koli. 1:11.

19. Ino nshiinshi nshetutolangila?

¹⁹ Conoonobo, Yehova alaakukushaawo shintu shoonse shitupa kupenga akulinyumfwa cibiibi. Kuciswa akufwa teshi shikabeeko. (Ciyu. 21:​3, 4) ‘Balema myeendo balaakutambala anga ninsefu.’ (Isa. 35:​5, 6) “Shintu shikulukulu shilaakulubwa alimwi teshi shikeebalukweewo napaceyi,” mukwiinga bacembele balaakuboolela kubwanike. Aboobo taakuwo muntu weshi akanoolama wacinene nabi mulwashi. (Isa. 65:17) Sombi inga twashoma cakutatoonsha ayi Yehova alaakutolelela kutucafwa ndyetutolindila kwaamba ayi akakumanishe shishomesho shakwe shibotu. Na twatolelela kucinka manungo muli nguwe, alaakutucafwa ‘kuliyumya cakukalika moyo alimwi calusangalalo.’—Kolo. 1:11.