Yesu Ngu Mupailishi Wesu Munene Utunyumfwila Nkuumbu

1-2. (a) Ino nceebonshi Yehova ncaakatumina Yesu kusa pacishi? (b) Ino tutokwiiya nshi mumutwi uyu? (Bene Ebulu 5:​7-9)

PAFWIIFWI amyaaka 2,000 yainda, Yehova wakatuma Mwanaakwe ngwasuni abuumbi kusa pacishi. Ino nceebonshi ncaakamutumina? Ceebo comwi nkusa mukulubula bantu kuswa kububi alufu akupa kwaamba ayi cikakonsheke kunembo kukushawo mapensho oonse Satana ngaakaleta. (Joni 3:16; 1 Joni 3:8) Alimwi Yehova wakalinga kucishi ayi na Yesu akekale pacishi mbuli muntu, cilaakumucafwa kusebensa kabotu mbuli Mupailishi Munene mukwiinga alaakunotuyeeyelaako akutunyumfwila nkuumbu. Ano ino ndilili Yesu ndyaakatalika kusebensa mbuli Mupailishi Munene? Wakatalika mu 29 C.E pesule lyakubombekwa.a

² Mutwi uyu utootucafwa kushiba Yesu mbwaakaba Mupailishi Munene utuyeeyelaako ceebo cakwaamba ayi wakekalawo pacishi mbuli muntu. Kunyumfwishisha makani aya kulayandika mukwiinga kutootucafwa kunopaila cakwaanguluka kuli Yehova akuyumya bushicibusa bwesu anguwe, bunene bunene na tutolinyumfwa cibiibi pashilubo nshotwakacita.—Amubelenge Bene Ebulu 5:​7-9.

LESA WAKATUMA MWAANAKWE NGWAASUNI KUSA PACISHI

3-4. (a) Ino nshiinshi Yesu nshakalyaaba kushiya ndyaakesa pacishi? (b) Ino shintu shakalinga buyani mubuumi bwakwe Yesu ndyaakalinga pacishi?

³ Sobaanji twakalongaawo kale akushiya ŋanda ibotu, beshikamukowa abeshicibusa besu. Cancine ncakwaamba ayi teshi cuubu kucita boobo. Sombi taakuwo muntu wakalyaaba kushiya shintu shiinji mbuli Yesu mbwaakacita. Ndyaakalinga kwiculu wakalinga ngomunjelo wakutaanguna alimwi wabili pali Lesa. Kwiilikaawo, Yehova wakalinga kumusuni abuumbi Mwanaakwe, alimwi Yesu wakalinga kusangalete kusebensela pomwi a Baishi. (Kulu. 16:11; Tus. 8:30) Nacibi boobo, pa Bene Filipi 2:7 Baibo ilatulwiita ayi Yesu wakalyaaba ‘kushiya shoonse’ akusa pacishi mukukala abantu batamaninite.

⁴ Amuyeeye apashakacitika ndyepakeendabo nshiku shiniini kuswa ciindi Yesu ndyakashalwa. Ciindi ndyecakashika kwaamba ayi bashali bakwe babenge mulambu pa tempele, bakabengabo tuyuni tobilo tuniini. Ici cilatondesha ayi bashali bakwe bakalinga bakandu. (Lefi. 12:8; Luka 2:24) Lyalo ndyepakeenda myeenshi iniini, Mwaami Elodi uyo wakalinga kucite moyo ubiibi, wakanyumfwa ayi Mesiya washalwa. Aboobo wakalinga kusuni kumucaya. Kwaamba ayi Yesu atacaikwi, bashali bakwe bakamutola ku Ijipiti uko nkobakaya mukuba baswamashi. (Mate. 2:​13, 15) Ishi shoonse shilatondesha ayi buumi bwakwe Yesu bwakaaluka abuumbi mubupusano ambocakalinga ndyaakalinga kwiculu!

5. (a) Ino nshiinshi Yesu nshaakabona ndyaakalinga pacishi? (b) Ino kukala pacishi kwakamucafwa buyani kuba Mupailishi Munene utunyumfwila nkuumbu? (Amubone acikope.)

⁵ Yesu ndyaakalinga pacishi, wakabona bantu bapusenepusene bakalinga kupenga. Alimwi alakwe wakanyumfwa mbocinyumfwika kufwitwa shikamukowa, mukwiinga baishi bakumucanaamo mpashi bakafwa kaatana kuboolela kwiculu. Alimwi ncakutatoonsha kwaamba ayi kuli bantu baanji bakafwa ndyaakalinga pacishi, abo mbwakalinga kushibeneabo. Kwiilikaawo, ndyaakatalika kushimikila wakalinga kukumanya bantu bakalinga balwashi manata, boofu, balema myeendo abamashali bakafwitwa baana. Wakabanyumfwila nkuumbu bantu bamushobo uyu. (Mate. 9:​2, 6; 15:30; 20:34; Maako 1:​40, 41; Luka 7:13) Ncakwiila kwaamba ayi Yesu ndyaakalinga kwiculu, wakalinga kubona bantu mbobakalinga kupenga. Ano ndyaakesa pacishi, ndyaakanyumfwishisha kabotu bantu mbobalinyumfwa na batoopenga. (Isa. 53:4) Ino nceebonshi nceenga twaambila boobo? Mukwiinga alakwe wakalinga kulema, kulefuka akuba abuumba.

YESU ALATUYEEYELAAKO

6. Ino bushinshimi mbotucana pa Isaya 42:3 bulatwiisha nshi pali Yesu?

⁶ Yesu ndyaakalinga kushimikila, wakalinga kubatondesha nkuumbu bantu bakalinga kucitilwa shintu shitabete kabotu. Ndyaakacita boobo wakakumanisha bushinshimi mbotucana mulibuku lyakwe Isaya. Mu Malembo amu ciEbulu, bantu babile alimwi bacite buumi buli kabotu liinji balakoshanishikwa kumuunda utililwa kabotu na kushisamu shilaamfu alimwi shitafwambaani kutyoka. (Kulu. 92:12; Isa. 61:3; Jele. 31:12) Sombi bantu bakandu alimwi balyatililwa balakoshanishikwa ku litete lisendeme na kulilampi lisuni kushimika. (Amubelenge Isaya 42:3) Yehova wakatanjilila mushinshimi Isaya kulemba shikoshanyo ishi, kwaamba ayi atucaafwe kushiba Yesu mbwaakalinga kusa mukutondesha lusuno ankuumbu kubantu bakalinga kusuulwa akupenshekwa kubamwi.

7-8. Ino nshiinshi Yesu nshaakacita shakatondesha ayi wakakumanisha bushinshimi Isaya mbwakaamba?

⁷ Mateyo wakaamba pali Yesu ayi: ‘Teshi akatyole litete lisendeme kale, nabi kushimya lilampi lisuni kushimika.’ (Mate. 12:20) Mateyo ndyaakalemba maswi aya, wakatondesha ayi Yesu wakakumanisha bushinshimi Isaya mbwaakaamba. Shaankamiko shimwi Yesu nshaakacita shakacafwa bantu bakalinga kusuulwa alimwi bakalinga kubona ayi shintu teshi shikaboteewo mubuumi bwabo. Kucakubonenaako, Yesu wakashilika musankwa wakalinga mulwashi manata. Mpashi musankwa uyo taakalinga kuyeeyawo ayi bushiku bumwi inga woola lyalo akuba pomwi abamumukwashi wakwe abeshicibusa bakwe. (Luka 5:​12, 13) Yesu wakakumanya amusankwa wakalinga kushinkite matwi alimwi cibuulu. Ano amuyeeyebo musankwa uyo mbwaakalinga kulinyumfwa na wabona bantu kababandika akuseka sombi lakwe kaatanyumfwiiwo nabi comwi. (Maako 7:​32, 33) Kuli ashimwi Yesu nshaakacita.

⁸ Ndyaakalinga pacishi, baJuda baanji bakalinga kushoma ayi na muntu ngu moofu, ngu mulema nabi na cipansha cimwi ca mubili tacitosebensa kabotu, ngayi lakwe mwiine nabi bashali bakwe kuli ncobakacita. (Joni 9:2) Ceebo cakushoma makani aya akubeca, bantu bamushobo uyo bakalinga kulinyumfwa ayi taakuwo mbobabete. Sombi Yesu wakabashilika akubacafwa kushiba ayi Lesa alababikilako maano. Ino makani aya alatwiisha nshi pali Yesu mbwalinyumfwa pali ndiswe?

9. Ino Bene Ebulu 4:​15, 16 ilatondesha buyani ayi Yesu Mupailishi wesu Munene alatunyumfwila nkuumbu sobantu batamaninite?

⁹ Amubelenge Bene Ebulu 4:​15, 16. Inga twashoma cakutatoonsha ayi Yesu alaakutolelela kunotunyumfwila nkuumbu akutuyeeyelaako mukwiinga alanyumfwishisha mbotulinyumfwa na tutopenga. Liswi lyamu ciGiliki lyakasansululwa ayi “kutunyumfwila nkuumbu” palilembo ili, lilasansulula ayi na tutolinyumfwa cibiibi alimwi tulicite buumba ceebo ca mapensho ngotutokwiindaamo, Yesu alakwe mbwaalinyumfwa. Shaankamiko Yesu nshaakacita shilatucafwa kushiba kabotu mbwaakalinga kulinyumfwa na wabona bantu kabapenga. Wakalinga kubacafwa ceebo cakwaamba ayi wakalinga kubabikilako maano, kuteshi ceebo cakwaamba ayi wakalinga kucite nkusu shakubacafwa. Kucakubonenaako, naakwiinga wakashilika musankwa wakalinga kucite manata kwakubula kumucata. Sombi Yesu wakasalawo kucata musankwa uyo nabi kwaamba ayi bantu tabakalinga kumucataawo mpashi kwamyaaka iinji! Alimwi Yesu ndyaakalinga kusuni kushilika musankwa wakalinga kushinkite matwi, wakamukushaawo pabantu akuya mukumushilika ndyebakalingabo bobilo. Amuyeeye apashakacitika mwanakashi umwi wakalinga kucita shintu shibiibi ndyakaana, akutontosha Yesu kushimpanta kuminsoshi yakwe. Mufalisi umwi wakalwiita mwanakashi uyo maswi atabete kabotu. Sombi Yesu wakamwimikaninaako mwanakashi uyo akumukalalila abuumbi Mufalisi. (Mate. 8:3; Maako 7:33; Luka 7:44) Ishi shoonse shilatondesha ayi Yesu taakalinga kubatalamuka balwashi na abo bakacita shilubo shinene. Sombi wakalinga kubatambula akubatondesha lusuno. Aboobo inga twashoma cakutatoonsha ayi aswebo alatunyumfwila nkuumbu alimwi alitusuni.

MBWEENGA TWAKONKELA CAKUBONENAAKO CA MUPAILISHI WESU MUNENE

10. Ino nshiinshi nsheenga twasebensesha kwaamba ayi tucafwe bashinkite matwi aboofu? (Amubone ashikope.)

¹⁰ Ceebo cakwaamba ayi tulisuni kunokonkela cakubonenaako cakwe Yesu, tuleelesha cankusu kutondesha lusuno ankuumbu kubamwi. (1 Pit. 2:21; 3:8) Inga tatuciti caankamiko kwaamba ayi tushilike bashinkite matwi aboofu, sombi inga twabacafwa kwiiya pali Yehova kwaamba ayi babe abushicibusa anguwe. Kucakubonenaako, mabuku esu aamba shamu Baibo atosansululwa mumishobo iindilila 100 ya bashinkite matwi. Alimwi mabuku esu nkwaali mumishobo iindilila 60 ngeenga twasebensesha kucafwa boofu abaabo batalashi kabotu. Kwiilikaawo, mavidyo esu mumishobo iindilila 100 alaba amaswi atosansulula shitotondeshekwa muvidyo kwaamba ayi boofu abalo bafubileemo. Tulacita sheeshi shoonse kwaamba ayi tucafwe bashinkite matwi aboofu kuba abushicibusa buyumu a Yehova a Mwanaakwe.

11. Ino libunga lyakwe Yehova lilacita buyani kwaamba ayi litondeshe nkuumbu kubantu boonse bweenka mbuli Yesu? (Milimo 2:​5-7, 33) (Amubone ashikope.)

¹¹ Libunga lyakwe Yehova lileelesha cankusu kucafwa bantu boonse kwaamba ayi babe abushicibusa anguwe. Na mutokwiibaluka, pesule lyakwaamba ayi Yesu wabushikwa akuboolela kwiculu, wakapa mushimu usalashi kubashikwiiya bakwe bakalinga kubungene pa Pentekositi yamu 33 C.E. Lyalo bantu boonse bakacanikaako bakatalika kunyumfwa makani abotu, womwi awomwi “mumulaka wakwe mwiine.” (Amubelenge Milimo 2:​5-7, 33.) Kwiinda mukutanjililwa a Yesu, libunga lyesu lilabaamba mabuku aamba shamu Baibo mumishobo iindilila 1,000 nabi kwaamba ayi mishobo imwi ilaambwabo abantu baniini. Kucakubonenaako, mabuku esu nkwaali mumishobo iindilila 160 bantu bamwi bakala kumatwa akumalenge lya America njobaamba. Nabi kwaamba ayi mbantu baniinibo baamba mishobo iyo, tulisuni kwaamba ayi baanji pabantu abo babe acoolwe cakunyumfwa makani abotu. Kwiilikaawo, mabuku esu nkwaali amumishobo iindilila 20 ya bantu baamba mishobo ya CiRomany. Bantu baamba mishobo iyo mbaniini alimwi balacanika kwicwe akumalenge lya Europe. Sombi baanji bakaba acoolwe cakwiiya cancine.

12. Ino nciinshi cimwi libunga lyakwe Yehova ncolicita kwaamba ayi licafwe bantu munshiku shino?

¹² Libunga lyakwe Yehova lilacafwa abaabo bacitikilwa mapensho akuteengashila. Bamakwesu abenankashi baanji balalyaaba kwaamba ayi bacafwe bashominyinaabo batoyandika lucafwo. Alimwi libunga lyesu lilayaka amisena mwakubunganina kwaamba ayi bantu banokwiiya shiinji pali Lesa ambwabasuni.

MUPAILISHI WESU MUNENE INGA WAMUCAFWA

13. Ino nshiinshi shimwi Yesu nshaacita kwaamba ayi atucaafwe?

¹³ Ceebo cakwaamba ayi Yesu ngu mweembeshi wesu uli kabotu, alashinisha kwaamba ayi twaba anshetuyandika kwaamba ayi tutolelele kuba abushicibusa buyumu a Yehova. (Joni 10:14; Efe. 4:7) Cimwi ciindi inga twalefuka abuumbi cakwaamba ayi katulinyumfwabo anga ndilampi lisuni kushimika nabi anga nditete lisendeme lyeenga lyatyoka ciindi cili coonse. Mpashi inga twalinyumfwa boobo ceebo cakuciswa maningi, kuyeeya pacilubo ncotwakacita, na ceebo ca kupusana amushominyineesu umwi mulibungano. Inga twaalilwa kubikila maano kushoolwe shibotu nshetutolangila akunoyeeyabo pabukaalo buyumu mbotutokwiindaamo. Sombi lyoonse munokwiibaluka ayi Yesu alabona nshomutokwiindaamo alimwi alanyumfwishisha mbomutolinyumfwa. Aboobo alaakumucafwa mukwiinga alicite nkuumbu. Inga wamupa mushimu usalashi kwaamba ayi mube ankusu shakuliyumya. (Joni 16:7; Taita. 3:6) Alimwi inga wasebensesha bamakwesu basebensa mbuli ‘shipo mubantu’ abashominyinaanu bamwi kwaamba ayi amuyuminishe akumucafwa.—Efe. 4:8.

14. Ino nciinshi nceenga twaciita na twalefuka?

¹⁴ Na mwalefuka, munookutumana kuyeeya pa mukuli Yesu ngwaacite wakuba Mupailishi wesu Munene. Yehova wakamutuma pacishi kwaamba ayi aabe buumi bwakwe mbuli cilubula akwaamba ayi anyumfwishishe kabotu mapensho bantu batamaninite ngobeendaamo. Aboobo Yesu alilibambite kutucafwa “paciindi ceelete” na twalefuka ceebo cakuyeeya pashilubo nshotwakacita, na pashintu shimwi nshotwaalilwa kucita kabotu.—Ebu. 4:​15, 16.

15. Ino mbaani bakacafwa ba Stefano kwaamba ayi batalike alimwi kusebensela Yehova?

¹⁵ Yesu alatanjilila abashikwiiya bakwe kwaamba ayi banoocafwa baabo bakacileka kusebensela Yehova kwaamba ayi batalike alimwi kumusebensela. (Mate. 18:​12, 13) Amuyeeye pa mbwaakacafwa ba Stefanob kwaamba ayi baboolele mulibungano. Ndyepakeenda myaaka 12 kuswa ciindi ndyebakakushikwa mulibungano, bakasalawo kucanikaako kumabungano. Bakaamba ayi: “Cakalinga ciyumu kunyamukabo kwaamba ayi nje kumabungano. Sombi ndakalinga kusuni kutalika alimwi kusebensela Yehova pomwi abamakwesu abenankashi. Bamanene bakabandika andime bakancafwa kulinyumfwa ayi balilibambite kuntambula. Nacibi boobo, cimwi ciindi ndakalinga kulinyumfwa cibiibi ceebo cakucileka kusebensela Yehova, cakwaamba ayi ndakalinga kuyeeya ayi mpashi ntolelelebo kunooli kunsengwe. Sombi bamanene bakanjibalusha ayi Yehova a Yesu balisuni ayi mboolele mulibungano. Ndyendakabooshekwa, boonse mulibungano bakantambula camaansa obilo amukwashi wangu. Lyalo ndyepakeenda ciindi, bakaangu bakatalika kwiiya Baibo alimwi pacecino ciindi tutosebensela Yehova pomwi.” Ncakutatoonsha kwaamba ayi Yesu Mupailishi wesu Munene, alasangalala abuumbi na bamakwesu abenankashi mulibungano basebensela pomwi kucafwa muntu waana kutalika alimwi kusebensela Yehova!

16. Ino nceebonshi mulalumba pakuba a Yesu mbuli Mupailishi wesu Munene?

¹⁶ Yesu ndyaakalinga pacishi, wakacafwa bantu baanji. Aboobo inga twashoma cakutatoonsha ayi aswebo alaakutolelela kutucafwa. Alimwi mucishi cipya ico cilibo pafwiifwi, alaakutucafwa kuba bantu bamaninite alimwi batabishi. Tulamulumba abuumbi Yehova Lesa wesu ceebo ca lusuno lwiinditeewo ndwaakatutondesha, ndyaakatupa Mwanaakwe kwaamba ayi abe Mupailishi wesu Munene utunyumfwila nkuumbu!