‘ Amutolelele Kulama Lucatano Luswa Kumushimu Usalashi’
MUTUMWI Paulo wakayuminisha Beneklistu baku Efeso kutolelela ‘kulekelelana calusuno, akweelesha cankusu kutolelela kulama lucatano luswa kumushimu usalashi muluumuno ulo lutucatanya pantu pomwi.’—Efe. 4:2, 3.
Mushimu usalashi ngootucafwa kuba bacatene. Nacibi boobo, kweelana a Paulo mbwakaamba, tulyeelete kutolelela kulama lucatano ndotucite. Mwineklistu womwi awomwi alyeelete kucita lubasu lwakwe kwaamba ayi alame ‘lucatano luswa kumushimu usalashi.’
Kucakubonenaako, amuyeeye ayi muntu umwi wamuulila suti ibotu. Ino mbaani beelete kunooilama kwaamba ayi itolelele kunoboneka kabotu? Ndimwe nobeene. Sa inga mwapa mulandu wakamuulila na yafwambaana kufwa ceebo cakwaamba ayi tamwakalinga kwiilama kabotu? Sobwe.
Ubu mbocibete akulucatano ndotucite so Beneklistu bancine. Nabi kwaamba ayi lucatano ndotucite ncipo kuswa kuli Lesa, womwi awomwi alyeelete kucita lubasu lwakwe kwaamba ayi tutolelele kuba bacatene. Na kuli mukwesu nabi nankashi ngotutanyumfwanaakwe, tulyeelete kuliipusha ayi, ‘Sa ntoocita nsheenga ndacikonsha kwaamba ayi tutolelele kuba bacatene mulibungano?’
‘AMWEELESHE CANKUSU’ KUTOLELELA KULAMA LUCATANO
Kweelana a Paulo mbwakaamba, teshi cuubu kutolelela kuba bacatene abamakwesu abenankashi bunene bunene na umwi watukalasha. Sa na mushominyineesu watukalasha tulyeeletebo kuya mukubandikaakwe kwaamba ayi tutalike alimwi kunyumfwana? Teshi lyoonse ndyetuyandika kucita boobo. Inga mwaliipusha ayi, ‘Sa na nje mbandikaakwe pamakani aya tutotalika kunyumfwana na shintu shitobicilaakobo?’ Cimwi ciindi inga twasuulakobo kusheesho nshakacita akumulekelela.—Tus. 19:11; Maako 11:25.
Amuliipushe ayi, ‘Sa na nje mbandikaakwe pamakani aya tutotalika kunyumfwana na shintu shitobicilaakobo?’
Mutumwi Paulo wakatuyuminisha kutolelela ‘kulekelelana calusuno.’ (Efe. 4:2) Libuku limwi lyakaamba ayi maswi aya inga asansululwa ayi “kutambula bamwi bweenka mbobabete.” Ici cilaamba ayi tulyeelete kunokwiibaluka ayi bamakwesu abenankashi tabamaninite alimwi balabisha bweenka mbuli ndiswe. Cancine ncakwaamba ayi tutokweelesha kufwala ‘buntu bupya,’ sombi taakuwo weenga wacita boobo cakumaninina. (Efe. 4:23, 24; Loma. 3:23) Aboobo na katwiibaluka cancine ici, cilaakutubeta cuubu kunolekelela bamwi ico ceshi cikape kwaamba ayi tukacikonshe ‘kulama lucatano luswa kumushimu usalashi.’
Na twalekelela muntu wakatukalasha mpashi kwiinda mukusuulakobo kuceeco ncaakacita, tulaakutolelela kukala ‘muluumuno ulo lutucatanya pantu pomwi.’ Liswi lyamu ciGiliki lyakasansululwa ayi ‘luumuno ulo lutucatanya pantu pomwi’ pa Bene Efeso 4:3, ndiswi lyakwaamba ayi “mishisa.” Mishisa imwi ilanunganya shifuwa mumubili. Aboobo bweenka mishisa imwi mboinunganya shifuwa mumubili, luumuno alusuno ndotucite pa bamakwesu abenankashi shilatucafwa kutolelela kuba bacatene nabi kwaamba ayi cimwi ciindi inga twapusana.
Aboobo na mushominyinaanu wamukalasha, amweeleshe kunyumfwishisha ayi alakwe taamaninite muciindi cakubikila maano kuceeco ncaacita. (Kolo. 3:12) Ceebo cakwaamba ayi soonse tatumaninitewo, amwebo mwakakalashawo kale umwi. Kunokwiibaluka cancine ici kulaakumucafwa ‘kulama lucatano luswa kumushimu usalashi.’