Amukonkele Butanjilishi Bwakwe Lesa Ndyemutoosalawo Shakucita

1. Ino nceebonshi mutumwi Paulo wakalinga kusangalete pa ncaakasalawo kucita mubuumi bwakwe?

MUTUMWI Paulo wakalinga kucishi ayi alaakucaikwa conoonobo. Sombi ndyakayeeya pashintu nshaakacita mubuumi bwakwe, wakasangalala abuumbi. Wakaamba ayi: ‘Ndamanisha kucica lubilo alimwi ndasunga lushomo lwangu.’ (2 Timo. 4:​6-8) Paulo wakasalawo kabotu kusebensela Yehova, alimwi wakalinga kushomete ayi Yehova alisangalete pa ncaakasalawo kucita. Aswebo tulisuni kunoosala kabotu shakucita kwaamba ayi tunosangalasha Yehova. Ino nshiinshi sheenga shatucafwa kucita boobo?

2. Ino Paulo wakalinga kusansulula nshi ndyaakaamba maswi ngotucana pa 2 Bene Kolinto 5:7?

² Paulo wakaamba pali nguwe apa Beneklistu bamwi bashomeka ayi: “Cinene mubuumi bwesu buno nkushoma, kuteshi kubona.” (2 Koli. 5:7) Ino wakalinga kusansulula nshi? Bantu batacite lushomo muli Yehova balasalawo shakucita kwiindabo mushintu nshobabona, nshobanyumfwa alimwi ambobalinyumfwa. Sombi muntu ushoma muli Yehova alayeeya pa sheenga shasangalasha Lesa ndyatoosalawo shakucita. Nshaasalawo kucita shilatondesha ayi alashoma cakutatoonsha ayi na wakonkela butanjilishi bwakwe Yehova bucanika mu Baibo, alaakuba abuumi buli kabotu pacecino ciindi alimwi Yehova alaakumupa shoolwe shiinji kunembo.—Kulu. 119:66; Ebu. 11:6.

3. Ino nshibotu nshi sheshi shikasweemo na katusala shakucita ceebo ca lushomo ndotucite muli Yehova? (2 Bene Kolinto 4:18)

³ Cimwi ciindi soonse tulasalawo shakucita kweelana anshotubona, nshotunyumfwa alimwi ambotulinyumfwa. Ano na katusala shakucita shiyandika kwiindabo mushintu nshotubona anshotunyumfwa, inga twasalawo kucita shintu shitabete kabotu. Ino nceebonshi? Mukwiinga teshi lyoonse ndyeenga twashoma nshotubona anshotunyumfwa. Na katusalawo shakucita kwiindabo mushintu nshotubona, nshotunyumfwa alimwi ambotulinyumfwa, bushiku bumwi tulaakucita cintu Yehova ncatasuni. (Shiku. 11:9; Mate. 24:​37-39) Sombi na katusalawo shakucita ceebo ca lushomo ndotucite muli Yehova, tulaakunoosala kucita shintu ‘shisangalasha Mwaami.’ (Efe. 5:10) Kukonkela butanjilishi bwakwe Lesa kulaakutupa kuba aluumuno alusangalalo lwancinencine. (Kulu. 16:​8, 9; Isa. 48:​17, 18) Alimwi na twatolelela kunokonkela butanjilishi bwakwe Lesa ndyetutoosalawo shakucita, tulaakukala kwamuyayaya.—Amubelenge 2 Bene Kolinto 4:18.

4. Ino muntu inga washiba buyani nshaakonkela ndyatoosalawo shakucita?

⁴ Soonse tulyeelete kuliipusha ayi: Ino nshiinshi nshonkonkela ndyentosalawo shakucita? Sa ndasalawo shakucita kweelana ashintu nshontobona na ndakonkela butanjilishi bwakwe Yehova? Amuleke tubandike pa bukaalo botatwe buyandika ndyetweelete kutolelela kukonkela butanjilishi bwakwe Yehova: ndyetutoosala ncito, ndyetutoosala wakweebanaakwe alimwi ana twatambula butanjilishi kuswa kulibunga lyesu. Ndyeshi tunobandika bukaalo bomwi abomwi, tutoobona nshotweelete kuyeeyawo kwaamba ayi tusale kabotu shakucita.

NDYETUTOOSALA NCITO

5. Ino nshiinshi nshotweelete kuyeeyawo ndyetutoosala ncito njeenga twasebensa?

⁵ Soonsebo tulisuni kunoocikonsha kulilama akulangweta mukwashi wesu shiyandika. (Shiku. 7:12; 1 Timo. 5:8) Incito shimwi bantu balafola maali aanji. Muntu usebensa ncito shamushobo uyo inga kaacikonsha kulilama akubikako maali amwi kwaamba ayi akasebenseshe kunembo. Ano ncito shimwi muntu inga kaafolabo maali aniini akwanabo kuula shiyandika mumukwashi. Ndyetutoosala ncito njeenga twasebensa, tulataanguna kuyeeya pa maali ngeshi tunoofola. Ano na twayeeyabo pa maali ngeshi tunoofola, nkokwaamba ayi tutosalawo shakucita kweelana anshotubona.

6. Ino inga twatondesha buyani ayi tulashoma muli Yehova ndyetutoosala ncito njeenga twasebensa? (Bene Ebulu 13:5)

⁶ Na katushoma muli Yehova, tulaakuyeeya ambweenga kunjila ncito iyo kwakuma bushicibusa bwesu anguwe. Inga twaliipusha ayi: ‘Sa incito iyi ileelikaawo akucita shintu Yehova nshaapatite?’ (Tus. 6:​16-19) ‘Sa ilaakupa kwaamba ayi cimwi ciindi noolofwa kumabungano akutanocana ciindi cinene cakucita ciiyo capalwaangu akwaabanamo lubasu muncito yakushimikila? Alimwi sa ndaakuyandika kunoshiya mukwashi wangu kwaciindi cilaamfu?’ (Filip. 1:10) Na cikumbulo ni ee kumwiipusho uli woonse pamiipusho iyi, inga cabota kutanjila ncito iyo nabi kwaamba ayi pacecino ciindi nciyumu kucana ncito. Ceebo cakwaamba ayi tulashoma muli Yehova, tulasalawo kucita shintu shitondesha ayi tulashoma cakutatoonsha ayi alaakutucafwa kucana nshetuyandika.—Mate. 6:33; amubelenge Bene Ebulu 13:5.

7-8. Ino mukwesu Javier wakatondesha buyani ayi alashoma muli Yehova? (Amubone acikope.)

⁷ Mukwesu waliina lya Javier,a ukala ku South America, wakabona ayi cilayandika abuumbi kushoma muli Yehova. Wakaamba ayi: “Ndakalemba foomu kwaamba ayi mpekwe ncito ya kunoofola maali aanji kwiinda ngondakalinga kufola pancito njondakalinga kusebensa pakampani iyo. Alimwi incito iyo yakalinga ibotu.” Nacibi boobo, ba Javier bakalinga kusunishishi akunosebensa mbuli painiya. Bakatolelela akwaamba ayi: “Bakanjita kwaamba ayi banjipushe miipusho na inga ndeelela kutalika kusebensa ncito iyo. Kaantana kuya mukwiipushikwa miipusho, ndakapaila kuli Yehova kwaamba ayi ancaafwe mukwiinga ndakalinga kushomete ayi alicishi kabotu nshonjandika. Ndakalinga kusuni ayi bakampolomote kuncito akunungilaawo maali akunomfolesha. Sombi nshindakalinga kusuniiwo kunjila ncito iyo na ilaakupa kwaamba ayi nkaalilwe kucita shiinji muncito yakwe Yehova.”

⁸ Ba Javier bakaamba ayi: “Ndyendakalinga kwiipushikwa miipusho, munene wancito wakandwiita ayi liinji ndaakuyandika kunosebensa nabi pesule lyakwaamba ayi ciindi ca kukotoka cakwana. Cabulemu alimwi munshila ili kabotu, ndakamusansulwiita ayi inga nshicikoonshiiwo kunoocita boobo ceebo cakwaamba ayi ndyeelete kuba aciindi cakucita shintu shakumushimu.” Aboobo ba Javier tabakwe kunjila ncito iyo. Ndyepakeenda nsondo shobilo, bakatalika bupainiya. Lyalo ndyepakeendabo myeenshi iniini, bakacana ncito imwi ya kunosebensaako kwanshiku shiniini munsondo. Bakaamba ayi: “Yehova wakakumbula mipailo yangu alimwi wakancafwa kucana ncito impa ciindi cakusebensa bupainiya. Ndisangalete abuumbi kunosebensa ncito ipa kwaamba ayi nooba aciindi cinene cakusebensela Yehova akucafwa bamakwesu abenankashi.”

9. Ino nshiinshi nshomweeya kuswa kucakubonenaako caba Trésor?

⁹ Ino nshiinshi nshotweelete kucita na twashiiba ayi incito njotutosebensa pacecino ciindi taibete kabotu na mpashi ilapa kwaamba ayi cituyumine kutolelela kuba abushicibusa buyumu a Yehova? Amuyeeye pa cakubonenaako caba Trésor bakala ku Republic of Congo. Bakaamba ayi: “Incito njondakacana yakalinga ibotu abuumbi. Ndakalinga kufola maali aanji abuumbi kwiinda ngondakalinga kufola kuncito njondakalinga kusebensa pakutaanguna alimwi bantu bakalinga kumpa bulemu.” Nacibi boobo, liinji ba Trésor tabakalinga kucanikaako kumabungano ceebo cakwaamba ayi bakalinga kusebensa apesule lyakwaamba ayi ciindi ca kukotoka cakwana. Alimwi cimwi ciindi mbobakalinga kusebensaabo bakalinga kubakakatisha kubeca kwaamba ayi bantu batashibi cintu citabete kabotu nceenga kampani yacita. Ba Trésor bakalinga kusuni kucileka kusebensa ncito iyo, sombi bakalinga kulisukama ayi mpashi teshi bakacikoonshe kucana ncito imwi. Ino nciinshi cakabacafwa kusalawo kabotu shakucita? Bakaamba ayi: “Lilembo lya Abakuku 3:​17-19 lyakancafwa kushoma ayi Yehova alaakunondama, nabi kwaamba ayi ndacileka kusebensa ncito iyo alimwi kancanabo maali aniini. Aboobo ndakacileka ncito iyo.” Mukweelaako ba Trésor bakaamba ayi: “Bantu baanji benjisha bamwi incito balayeeya ayi na muntu kasebensa ncito ya kufola maali aanji, inga walyaaba kushiya shintu shoonse mbuli kutanooba aciindi cinene cakuba pomwi amukwashi wakwe acakucita shintu shakumushimu. Ndisangalete ceebo cakwaamba ayi ndakasalawo kucita cintu cakancafwa kutolelela kuba abushicibusa buyumu a Yehova abamumukwashi wangu. Ndyepakeenda mwaaka womwi kuswa ciindi ndyendakacileka ncito, Yehova wakancafwa kucana ncito ili kabotu incafwa kuula shiyandika akuba aciindi cinene cakumusebensela. Na twashoma muli Yehova, cimwi ciindi inga katucanabo maali aniini, sombi alaakutucafwa kuba anshetuyandika.” Na katukonkela butanjilishi bwakwe Yehova akushoma shishomesho shakwe, tulaakutolelela kunoosala kucita shintu shili kabotu alimwi alaakutupa shoolwe.

NDYETUTOOSALA WAKWEEBANAAKWE

10. Ino nshiinshi shiyandika muntu nshaeelete kuyeeyawo ndyatoosala wakweebanaakwe, sombi ino nciinshi ncaateelete kucita?

¹⁰ Cikwati ncipo kuswa kuli Yehova alimwi wakatulenga munshila yakwaamba ayi katusuna kuba mucikwati. Nankashi ndyatoyeeya pakweebwa ku mukwesu umwi, inga wayeeya pa mbwaboneka, mbwaacita shintu, impuwo njaacite, mbwaasebensesha maali, na kuli beshikamukowa bamwi mbwaalama alimwi ana alaamupa kuba alusangalalo.b Kuyeeya pashintu ishi kulayandika. Nacibi boobo, taelete kuyeeyabo pa sheeshi sheenka, mukwiinga na wacita boobo ingayi atosalawo shakucita kweelana anshaabona.

11. Ino inga twatondesha buyani ayi tulashoma muli Yehova ndyetutoosala wakweebanaakwe? (1 Bene Kolinto 7:39)

¹¹ Yehova alasangalala abuumbi na bamakwesu abenankashi bakonkela butanjilishi bwakwe ndyebatoosala wakweebanaakwe! Kucakubonenaako, balakonkela Baibo nshoyaamba akulindila kushikila bakomena ndyeenga batalika kuyeeya sha kuba mucikwati. (1 Koli. 7:36) Alimwi balashinisha kwaamba ayi muntu ngobasuni kweebanaakwe alatondesha mibo Yehova njaabona ayi ilayandika ku musankwa weebete na mwanakashi weebetwe uli kabotu. (Tus. 31:​10-13, 26-28; Efe. 5:33; 1 Timo. 5:8) Na muntu uteshi musebenshi wakwe Yehova wakabombekwa watalika kubatondesha lusuno lwamucikwati, balakaka kutalika bushicibusa anguwe. Balakonkela mulawo wamu Baibo waamba ayi balyeelete kweeba nabi kweebwabo ku “mushomi.” (Amubelenge 1 Bene Kolinto 7:39.) Balasalawo kucita boobo mukwiinga balashoma ayi lyoonse Yehova ananoobacafwa akubayuminisha.—Kulu. 55:22.

12. Ino nshiinshi nshomweeya kuswa kucakubonenaako caba Rosa?

¹² Amuyeeye pa shakacitikila ba Rosa, abo basebensa mbuli painiya ku Colombia. Kuncito nkobakalinga kusebensa kwakalinga musankwa umwi uteshi Kamboni uyo wakatalika kutondesha ayi alibasuni. Ba Rosa abalo bakabona ayi alibo kabotu. Bakaamba ayi: “Wakalinga kuboneka ayi ngu musankwa uli kabotu. Wakalinga kucafwa bantu kumusena nkwaakalinga kukala alimwi wakalinga kuboneka ayi alicite mibo ibotu. Wakalinga kuncitila shibotu. Alimwi wakalinga kucite mibo njondakalinga kusuni mu musankwa ngweenga ndabaakwe mucikwati. Shoonse shakalingabo kabotu, ano cakabicaakobo ncakwaamba ayi taakalinga Kamboni.” Bakatolelela akwaamba ayi: “Cakalinga ciyumu kumukaka. Paciindi ici ndakalinga kulinyumfwa kuba neenka alimwi ndakalinga kusuni kweebwa, sombi kantana kucana mukwesu wakweebanaakwe.” Ba Rosa tabakwe kubikilabo maano kumusankwa uyo mbwaakalinga. Bakayeeya pa mbweenga bushicibusa bwabo a Yehova bwaba na batalika bushicibusa amusankwa uyo. Aboobo bakasalawo kucileka kunyumfwana anguwe akutolelela kubikila maano kukusebensela Yehova. Ndyepakeendabo ciindi ciniini, bakabeeta kucanika ku Cikolo ca Bashimikila sha Bwaami alimwi pacecino ciindi batosebensa mbuli painiya ulibetele. Ba Rosa bakaamba ayi: “Yehova wampa shoolwe shiinji shipa kwaamba ayi noosangalala abuumbi.” Teshi lyoonse ndyeciba cuubu kucita shintu Yehova nshaasuni, bunene bunene na cintu cimwi katucisunishishi abuumbi. Sombi tulaakucana shoolwe na lyoonse katukonkela butanjilishi bwakwe Yehova.

NA TWATAMBULA BUTANJILISHI KUSWA KU LIBUNGA LYESU

13. Ino nshiinshi mpashi nsheenga twaciita na twatambula butanjilishi kuswa kulibunga lyesu?

¹³ Liinji tulatambula butanjilishi butucafwa kusebensela Yehova, inga caba ayi nkubamanene, ku mutanjilili walubasu, ku ofesi ya musampi nabi kuswa ku Likoto Litanjilila. Sombi cimwi ciindi inga tatunyumfwishishi nceenga bamakwesu batupeta butanjilishi bumwi. Mpashi inga twatalika kutoonsha na kukonkela butanjilishi ubo kulibo kabotu. Alimwi mpashi inga twatalika kuyeeya ayi bamakwesu tabakwe kuyeeyawo kabotu pa butanjilishi ubo mbobatupa.

14. Ino nshiinshi sheshi shikatucaafwe kunokonkela butanjilishi mbotutambula kuswa kulibunga? (Bene Ebulu 13:17)

¹⁴ Tulashoma ayi Yehova atotanjilila libunga lyakwe alimwi alicishi bukaalo mbotubeteemo. Aboobo tulafwambaana kukonkela butanjilishi mbweenga twapeekwa kwakubula kutongooka. (Amubelenge Bene Ebulu 13:17.) Tulicishi ayi na twakonkela butanjilishi, libungano lilaba licatene. (Efe. 4:​2, 3) Tulashoma ayi Yehova alaakutupa shoolwe na katunyumfwila bamakwesu batutanjilila nabi kwaamba ayi tabamaninite. (1 Samwe. 15:22) Alimwi tulashoma ayi na butanjilishi bumwi butoyandika kwaalulwa, Yehova alaakushinisha ayi mukuya kwaciindi bukaalulwe.—Mika 7:7.

15-16. Ino nshiinshi shakacafwa mukwesu umwi kukonkela butanjilishi nabi kwaamba ayi wakalinga kutoonsha na bulaakusebensa? (Amubone acikope.)

¹⁵ Amuyeeye pashakacitika shitondesha shoolwe shiswaamo na katushoma muli Yehova akukonkela butanjilishi mbotutambula kuswa kulibunga. Nabi kwaamba ayi bantu baanji ku Peru balicishi kwaamba ciSpanish, baanji ndyebatobandika balaamba mishobo imwi yamu cishi ici. Mushobo womwi pamishobo iyo, nci Quechua. Kwamyaaka iinji, bamakwesu abenankashi baamba ciQuechua, bakalinga kulangoola bantu baamba mushobo uyu kumusena nkobakalinga kushimikila. Nacibi boobo, kwaamba ayi bakonkele milawo ya mfulumeende, bakaalulako nshila mbobakalinga kulangoola bantu baamba mushobo uyu. (Loma. 13:1) Aboobo bamakwesu abenankashi bamwi bakatalika kutoonsha na cilaakukonsheka kucana bantu baanji baamba mushobo uyu. Sombi ceebo cakwaamba ayi bamakwesu bakakonkela butanjilishi mbobakatambula, Yehova wakabacafwa kucana bantu baanji baamba ciQuechua.

¹⁶ Ba Kevin abo basebensa mbuli munene mulibungano lyaci Quechua, mbomwi pabaabo bakalinga kutoonsha na butanjilishi mbobakatambula bulaakusebensa. Bakaamba ayi: “Ndakaliipusha ayi, ‘Ano tunanocikonsha buyani kucana bantu baamba ciQuechua?’” Ino nshiinshi ba Kevin nshobakacita? Bakaamba ayi: “Ndakayeeya pamaswi acanika pa Tushimpi 3:5. Alimwi ndakayeeya apali Mose. Yehova wakamupa butanjilishi bwakalinga kuboneka anga inga tabusebensiiwo. Wakalwiita Mose kutanjilila bene Isilaeli kuswa mu Ijipiti kuya ku Lweenge Lusalala, uko nkocakaboneka anga teshi cikonsheke kupuluka kubene Ijipiti abo bakalinga kubatandaanya. Sombi Mose wakakonkela nshaakalwiitikwa, alimwi Yehova wakamupa shoolwe kwiinda mukubapulusha munshila ya caankamiko.” (Kulo. 14:​1, 2, 9-11, 21, 22) Ba Kevin bakasalawo kukonkela nshila ipya ya bwakushimikila. Ino nshiinshi shakaswaamo? Bakaamba ayi: “Ndakakankamana kubona Yehova mbwaakatupa shoolwe. Katutana kupekwa butanjilishi bupya, cimwi ciindi twakalinga kweenda mishinso ilaamfu muncito yakushimikila sombi twakalinga kucanabo muntu womwi nabi bobilo baamba ciQuechua. Pacecino ciindi tulaya mumisena mucanika bantu baanji baamba ciQuechua. Aboobo tulacikonsha kubandika abantu baanji, kucita nyeendo shakuboolelaako akutalika shiiyo sha Baibo. Alimwi namba ya bantu batoocanika kumabungano yaya panembo.” Lyoonse Yehova alatupa shoolwe, na katushoma muli nguwe akukonkela butanjilishi bwakwe.

17. Ino nshiinshi nshomweeya mumutwi uyu?

¹⁷ Twabandika pabukaalo botatwe ndyetuyandika kukonkela butanjilishi bwakwe Yehova ndyetutoosalawo shakucita. Sombi tulyeelete kunokonkela butanjilishi bwakwe Yehova mushintu shoonse nshotusala kucita mubuumi mbuli ndyetutoosala shakulikondelesha, lwiiyo ndweshi tukeeye ambweshi tunoolama bana besu. Lyoonse ndyetutoosalawo shakucita, tatweelete kukonkelabo nshotubona, sombi tulyeelete kuyeeya apa bushicibusa bwesu a Yehova, nshaatulwiita kucita, alimwi akushoma cishomesho cakwe cakwaamba ayi alaakunotulama. Na katucita boobo, tulaakucikonsha ‘kunoolambila akunyumfwila Yehova Lesa wesu, kwalyoonse alyoonse.’—Mika 4:5.