‘Kusena Pafwiifwi a Lesa’ Nkubotu Abuumbi!

1-2. (a) Ino nciinshi ncotweelete kucita kwaamba ayi tube abushicibusa buyumu amuntu umwi? (b) Ino tutokwiiya nshi mumutwi uyu?

SA KULI shicibusa ngomunyumfwanaakwe abuumbi? Ino mwakacita buyani kwaamba ayi mube bushicibusa anguwe? Mpashi mwakalinga kucana ciindi cakuba pomwi anguwe, kushiba mapensho ngakeendaamo alimwi akushiba nshaasuni anshaatasuni. Alimwi mpashi mwakabona mibo ibotu njaacite amwebo njeenga mwasuna kubaayo. Lyalo mwakatalika kunyumfwana anguwe.

² Kwaamba ayi mube abushicibusa buyumu amuntu umwi, mulyeelete kunoocana ciindi cakuba pomwi anguwe. Ubu bweenka mbocibete na tulisuni kuba abushicibusa buyumu a Yehova. Mumutwi uyu tutobandika nsheenga twaciita kwaamba ayi tusene pafwiifwi a Yehova ashoolwe nsheenga twacaana na twacita boobo. Sombi amuleke tutaangune kubandika ncocibetele kabotu kusena pafwiifwi a Yehova, Shicibusa wesu wiinditewo.

3. Ino nceebonshi tulyeelete kunookutumana kuyeeya pashibotu sheenga shaswaamo na twasena pafwiifwi a Yehova? Amwaambe cakubonenaako.

³ Ncakutatoonsha kwaamba ayi amwebo mulicishi ayi kusena pafwiifwi a Yehova nkubotu. Sombi kukutumana kuyeeya pashibotu shiswaamo na twacita boobo, inga kwatuyuminisha kutolelela kusena pafwiifwi anguwe. (Kulu. 63:​6-8) Kucakubonenaako, tulicishi ayi kulya shakulya shibotu, kucita shiyumya mubili, kucana ciindi cikwene cakookesha alimwi akunwa maanshi aanji bushiku abushiku, inga kwatucafwa kuba abuumi buli kabotu. Nacibi boobo, bantu baanji tababikili maano kushintu ishi kwaamba ayi babe abuumi buli kabotu. Sombi na liinji katukutumana kuyeeya pakucita shintu ishi mbweenga kwatupa kuba abuumi buli kabotu, tulaakuyuminishikwa kutolelela kushicita. Ubu bweenka mbweenga caba na tulisuni kuba abushicibusa buyumu a Yehova. Inga katucishi ayi kusena pafwiifwi anguwe nkubotu, sombi kukutumana kuyeeya pashibotu shiswaamo na twacita boobo, inga kwatuyuminisha kutolelela kusena pafwiifwi anguwe.—Kulu. 119:​27-30.

4. Ino nshiinshi nshakaamba wakalemba Kulumbaisha 73:28?

⁴ Amubelenge Kulumbaisha 73:28. Wakalemba Kulumbaisha 73 wakalinga mwine Lefi wakasalwa kwaamba ayi alakwe anokwiimba nyimbo pa tempele yakwe Yehova. Cilyeelete paciindi ici kaali wakasebensela Yehova cakushomeka kwamyaaka iinji. Sombi wakalinga kucishi ayi kutolelela ‘kusena pafwiifwi a Yehova’ nkubotu, alimwi wakalinga kusuni kucafwa bamwi kushiba ayi na baba abushicibusa a Lesa balaakucana shoolwe. Ino nshoolwe nshi shimwi nsheenga twacaana na twamushiba kabotu Lesa akuyumya bushicibusa bwesu anguwe?

‘KUSENA PAFWIIFWI A LESA’ KULATUPA KUBA ALUSANGALALO

5. (a) Ino nceebonshi kusena pafwiifwi a Lesa kulatupa kuba alusangalalo? (b) Kweelana a Tushimpi 2:​6-16, amwaambe shakubonenaako sha mbweenga busongo bwakwe Yehova bwamucafwa akumushitilisha.

⁵ Tulaba alusangalalo abuumbi na twasena pafwiifwi a Yehova. (Kulu. 65:4) Kuli shiinji shipa kwaamba ayi tube alusangalalo na twacita boobo. Kucakubonenaako, na katubelenga Baibo akukonkela nshotwiiya, tulaba basongo. Lyalo busongo ubo bulatushitilisha kushintu sheenga shatuletela mapensho akutucafwa kuleya kucita shilubo shinene. (Amubelenge Tushimpi 2:​6-16.) Ncoceeco Baibo ncoyaambila ayi: ‘Alisangalete muntu uyo ucana busongo, ee, muntu uba amaano akunyumfwisha shintu.’—Tus. 3:13.

6. Ino nciinshi cakapa kwaamba ayi shikulumbaisha acileeke kuba alusangalalo?

⁶ Cimwi ciindi, nabibo basebenshi bakwe Yehova balalinyumfwa cibiibi. Kucakubonenaako, wakalemba Kulumbaisha 73 wakalinga wacileka kuba alusangalalo ndyaakatalika kuyeeya pashintu nshaakalinga kubona ayi tashibete kabotu. Ndyaakabona ayi bantu batakalinga kunyumfwila Lesa batokala kabotu, wakakalala akutalika kubanyumfwila munyono. Wakalinga kuyeeya ayi bantu bakalinga bakali alimwi balisumpula bakalinga babile, bakalinga kucite buumi buli kabotu alimwi ayi tabakalinga kupengaawo. (Kulu. 73:​3-7, 12) Shikulumbaisha wakalinyumfwa cibiibi abuumbi cakwaamba ayi wakatalika kuyeeya ayi kusebensela Yehova nkunyonyoolabo nkusu. Ndyaakalinga kulinyumfwite cibiibi abuumbi, wakaamba ayi: ‘Ncakwiila ndakalipenshabo kusalasha moyo wangu akusaamba kumaansa kutondesha ayi nshicite mulandu.’—Kulu. 73:13.

7. Ino nshiinshi nsheenga twaciita na twalinyumfwa cibiibi? (Amubone acikope cili papeeji yakutaanguna.)

⁷ Nabi kwaamba ayi Shikulumbaisha wakalinga kulinyumfwa cibiibi abuumbi, wakacitaawo comwi kwaamba ayi aalule mbwaakalinga kuyeeya. Wakenjila “mumusena usalalite wakwe Lesa,” lyalo Yehova wakamucafwa kwaalula mbwaakalinga kuyeeya. (Kulu. 73:​17-19) Yehova Shicibusa wesu wiinditewo, alashiba na twalinyumfwa cibiibi. Na twalinyumfwa cibiibi, inga twapaila kuli Yehova kwaamba ayi atucaafwe kushiba shakucita. Nshaatulwiita mu Maswi akwe akuyuminishikwa kuswa ku bamakwesu abenankashi, inga shatucafwa kutolelela kumusebensela nabi ndyetwalinyumfwa cibiibi. Nabi na twalisukama abuumbi cakwaamba ayi twabuula ashakucita, Yehova inga watucafwa kukalikana mumoyo.—Kulu. 94:19.a

‘KUSENA PAFWIIFWI A LESA’ INGA KWATUCAFWA KUBA ABUUMI BULI KABOTU AKULANGILA

8. Ino ninshila nshi shobilo kusena pafwiifwi a Lesa mbokutucafwa?

⁸ Kuli nshila ashimwi shobilo shiyandika kusena pafwiifwi a Lesa mbokutucafwa. Cakutaanguna, kulatucafwa kuba abuumi buli kabotu. Cabili, kulatucafwa kushoma cakutatoonsha ayi nshetutolangila shilaakukumanishikwa. (Jele. 29:11) Amuleke twiiye shiinji pashoolwe ishi shobilo.

9. Ino nceebonshi kusena pafwiifwi a Yehova kulatupa kuba alusangalalo?

⁹ Na twaba abushicibusa buyumu a Yehova, inga twaba abuumi buli kabotu. Bantu baanji munshiku shino tabashomiwo ayi Lesa nkwaali. Aboobo tabacishiiwo bantu ncobakabetaako pacishi alimwi balashoma ayi kunembo bantu boonse balaakuloba. Nacibi boobo, kweelana anshotwakeeya mu Maswi akwe Lesa, tulashoma cakutatoonsha ayi Lesa nkwaali alimwi tulicishi ayi ‘alapa shilambu kubantu abo bamuyandoola.’ (Ebu. 11:6) Alimwi Yehova wakatulenga munshila yakwaamba ayi tunosuna kumusebensela. Aboobo kumusebensela kulatupa kuba alusangalalo lwancinencine.—Duto. 10:​12, 13.

10. Ino nshiinshi Yehova nshakashomesha baabo bashoma muli nguwe? (Kulumbaisha 37:29)

¹⁰ Bantu baanji tabacitewo kulangila mubuumi. Balabikilabo maano kukusebensa, kweeba na kweebwa, kuba abaana akulibambila mbweshi bakanoolilama na bakacileeke kusebensa. Tabacishiiwo Lesa nshakashomesha kutucitila kunembo. Sombi tulicishi kwaamba ayi Yehova alababikilako maano basebenshi bakwe. (Kulu. 25:​3-5; 1 Timo. 6:17) Tulamushoma abuumbi Lesa wesu alimwi tulicishi ayi alaakukumanisha nshaakatushomesha. Tutolangila shintu shiinji shibotu kwiilikaawo acoolwe cakumulambila kwamuyayaya mu Paladaiso.—Amubelenge Kulumbaisha 37:29.

11. Ino kuba abushicibusa a Lesa kulatucafwa buyani, alimwi ino inga walinyumfwa buyani?

¹¹ Kuli nshila ashimwi shiinji kusena pafwiifwi a Lesa mbokutucafwa. Kucakubonenaako, Yehova wakashomesha ayi ananotulekelela shilubo shesu na twaana. (Isa. 1:18) Aboobo tatweelete kutolelela kulinyumfwa cibiibi pashilubo nshotwakacita kale kale. (Kulu. 32:​1-5) Alimwi tulasangalala na twacita sheenga shasangalasha Yehova. (Tus. 23:15) Kuli shibotu ashimwi nsheenga mwayeeya shiswaamo ceebo cakuba abushicibusa a Yehova. Ano amuleke tubandike nsheenga twaciita kwaamba ayi tuyumye bushicibusa bwesu a Lesa.

MBWEENGA TWATOLELELA ‘KUSENA PAFWIIFWI A LESA’

12. Ino nshiinshi nshomwakacita kwaamba ayi mube abushicibusa a Lesa?

¹² Katutana kubombekwa akuba Bakamboni Bakwe Yehova, twakacita shiinji kwaamba ayi tube abushicibusa anguwe. Twakeeya cancine pali Yehova a Yesu Klistu, kwaana kuswa kushilubo shesu, kutondesha ayi tulicite lushomo muli Lesa akucita nsheenga twacikonsha kwaamba ayi tunokonkela milawo yakwe. Nacibi boobo, tulyeelete kutolelela kucita shintu ishi kwaamba ayi tube abushicibusa buyumu a Lesa.—Kolo. 2:6.

13. Ino nshintu nshi shotatwe nsheenga twaciita kwaamba ayi tutolelele kuyumya bushicibusa bwesu a Yehova?

¹³ Ino nshiinshi nsheenga twaciita kwaamba ayi tutolelele kuyumya bushicibusa bwesu a Yehova? (1) Tulyeelete kutolelela kubelenga akwiiya Baibo. Ndyetutocita boobo, tatweelete kweelabo pakushiba shiinji pali Lesa. Sombi tulyeelete kweelesha kunyumfwishisha Yehova mbwayeeya anshaasuni ayi tunoocita, lyalo akunoocita nshaasuni. (Efe. 5:​15-17) (2) Tulyeelete kuyumya lushomo lwesu muli nguwe kwiinda mukunookutumana kuyeeya panshila shiinji mbwatutondesha lusuno. (3) Tulyeelete kutolelela kuleya kucita shintu Yehova nshaapatite akuleya kuba abushicibusa abantu bacita shibiibi.—Kulu. 1:1; 101:3.

14. Kweelana a 1 Bene Kolinto 10:​31, ino nshiinshi nshotweelete kucita kwaamba ayi tunoosangalasha Yehova bushiku abushiku? (Amubone ashikope.)

¹⁴ Amubelenge 1 Bene Kolinto 10:31. Cilayandika abuumbi kunoocita shintu nshotucishi ayi shilasangalasha Yehova. Tatweelete kweelabo pakunooya muncito yakushimikila akucanika kumabungano. Bushiku abushiku tulyeelete kunoocita shintu shisangalasha Yehova. Kucakubonenaako, tulasangalasha Yehova na katushomeka mushintu shoonse akupako bamwi nshotucite. (2 Koli. 9:7; Ebu. 13:18) Alimwi alisuni ayi tunoolumba abuumbi pabuumi mbwakatupa. Aboobo tulaleya kulya nabi kunwa cakwiindilisha alimwi tulacita ashintu shimwi sheenga shatucafwa kuba abuumi buli kabotu. Na Yehova wabona ayi tutokweelesha kumusangalasha mushintu shoonse nshotucita, alatusuna abuumbi.—Luka 16:10.

15. Ino nshiinshi Yehova nshatulangila kucita kubamwi?

¹⁵ Yehova alabacitila shibotu bantu boonse, inga caba ayi balamusebensela nabi sobwe. (Mate. 5:45) Alisuni ayi aswebo tunobacitila shibotu bamwi. Kucakubonenaako, taasuniiwo kwaamba ayi ‘tunokwaambila muntu nabi womwi shibiibi, sombi kuba beshiluumuno, . . . alimwi balibombya kubantu boonse.’ (Taita. 3:2) Aboobo nabi kwaamba ayi bantu bamwi tabashomi muli Yehova, tatweelete kunoyeeya ayi tulayandika kwiinda mbabo. (2 Timo. 2:​23-25) Tulayumya bushicibusa bwesu a Yehova na lyoonse katucita shibotu kubamwi.

AMUTOLELELE ‘KUSENA PAFWIIFWI A YEHOVA’ NABI NDYEMWACITA SHILUBO

16. Ino wakalemba Kulumbaisha 73 wakalinyumfwa buyani paciindi cimwi?

¹⁶ Cimwi ciindi inga mwatalika kulinyumfwa ayi Yehova wakamutalamuka ceebo ca shilubo nshomwakacita. Sombi munokwiibaluka ayi wakalemba Kulumbaisha 73 alakwe ici cakamucitikilaawo. Wakaamba ayi: “Nebo pakacaalabo paniini kuwa mukucileka kushoma. Myeendo yangu pakacaalabo paniini kutelemuka.” (Kulu. 73:2) Mwiine wakaamba ayi ‘moyo wakwe wakaciswa abuumbi’ alimwi wakaba “muluya utanyumfwi” anga “ngumunyama.” (Kulu. 73:​21, 22) Ano sa wakalinyumfwa ayi Yehova inga taamutondeshi lusuno akumulekelela ceebo ca shilubo nshaakacita?

17. (a) Ino nshiinshi shikulumbaisha nshaakacita nabi ndyaakalinyumfwa cibiibi abuumbi? (b) Ino nshiinshi nsheenga tweeya kuswa kucakubonenaako cakwe? (Amubone ashikope.)

¹⁷ Na shikulumbaisha wakalinga walinyumfwa ayi Yehova wamutalamuka, mpashi wakalinyumfwa boobo kwaciindi ciniinibo. Nabi ndyaakalinyumfwa cibiibi abuumbi, wakalinga kucishi ayi alyeelete kusena pafwiifwi a Yehova. Wakaamba ayi: ‘Nacibi boobo, ndaba amwebo lyoonsebo. Mwebo mulancata kulyaansa lyalulyo. Mulantanjilila amilasho yanu nobeene, kumamanino mulaakunjisha mubulemu bwanu.’ (Kulu. 73:​23, 24) Aswebo na lushomo lwesu lwaceya na kulefuka ceebo ca shilubo nshotwakacita, tulyeelete kusenga Yehova kwaamba ayi atupe nkusu shakutolelela kumusebensela. (Kulu. 73:26; 94:18) Nabi kwaamba ayi twakacita shilubo shinene, inga twaboolela kuli Yehova akushoma cakutatoonsha ayi ‘alilibambite kutulekelela.’ (Kulu. 86:5) Na twalefuka abuumbi, ndyetweelete kweelesha cankusu kusena pafwiifwi a Lesa wesu.—Kulu. 103:​13, 14.

INGA TWATOLELELA ‘KUSENA PAFWIIFWI A LESA’ KWAMUYAYAYA

18. Ino nceebonshi inga twatolelela kusena pafwiifwi a Yehova kwamuyayaya?

¹⁸ Inga twatolelela kusena pafwiifwi a Yehova kwamuyayaya alimwi teshi tukacilekeewo kwiiya pali nguwe. Baibo ilaamba ayi busongo, lushibo anshila shakwe Yehova tasheeliiwo. (Loma. 11:33) Tulaakutolelela kwiiya pali nguwe kwamuyayaya.

19. Ino libuku lya Kulumbaisha lilatucafwa kushoma nshi?

¹⁹ Pa Kulumbaisha 79:13 palaamba ayi: ‘Swebo sobana banu, sombelele sha mulitanga lyanu tunanoomulumba lyoonsebo. Kuswa kulishalane kushika akulishalane limwi, tunanoomulumbaisha lyoonse alyoonse.’ Amwebo na mwatolelela kusena pafwiifwi a Yehova, inga mwashoma cakutatoonsha ayi alaakumupa shoolwe kwamuyayaya akwaamba mbuli shikulumbaisha ayi: ‘Lesa nshenkusu shangu, alimwi ngo Lesa wangu kwamuyayaya.’—Kulu. 73:26.