Makani Akusebensesha amu Kabuku Kamabungano Abuumi Anciito
© 2025 Watch Tower Bible and Tract Society of Pennsylvania
JULY 7-13
BUBONI BUCANIKA MUMASWI AKWE LESA TUSHIMPI 21
Njiisho Shabusongo Sheenga Shamucafwa Kuba Alusangalalo Mucikwati
Mbweenga Mwasalawo Kabotu Cakucita Ndyemutoshibana Angomusuni Kweebanaakwe
13 Ino mulyeelete kutola ciindi cilaamfu buyani kamushibana kabotu? Liinji shintu tasheendi kabotu na mweengana kusalawo shakucita. (Tus. 21:5) Aboobo palyeelete kwiindaako ciindi kwaamba ayi muntu ngomusuni kweebanaakwe mumushibe kabotu. Nacibi boobo, tamweelete kutola ciindi cilaamfu abuumbi kamushibanabo. Alimwi Baibo ilaamba ayi: “Cilacisisha moyo na koolangila kapongo kafwite.” (Tus. 13:12) Kwiilikaawo, na kamucanika bunene pomwi, inga camubeta ciyumu abuumbi kukoma lusuno lwakoonana. (1 Koli. 7:9) Muciindi cakubikila maano kuciindi ncomwatola kushibana kabotu, inga mwaliipusha ayi, ‘Sa kuli shimwi nshontoyandika kushiba pamuntu uyu kantana kusalawo cakucita?’
Nsheenga Mwaciita Kwaamba Ayi Mube Alusangalalo Mucikwati
3 Yehova uyo wakalenga cikwati alisuni kwaamba ayi beebene banooba alusangalalo mucikwati cabo. Mukwiinga beebene tabamaninite, cimwi ciindi inga bapusana mushintu shimwi. Paulo wakaamba ayi abo banjila mucikwati balaakucana mapensho. (1 Koli. 7:28) Beebene bamwi balaambana liinji, aboobo inga bayeeya ayi mpashi tabatokweendelana. Na bakonkela bantu bamucishi, inga batalika kuyeeya ayi kulekana nkweenga kwabacafwa. Inga batalika kuyeeyabo pakulikondelesha akubona anga kulekana nkweenga kwabapa kuba alusangalalo.
4 Tulyeelete kuleya kunooyeeya ayi kulekana nkweenga kwamana mapensho mucikwati. Tulicishi kwaamba ayi bulale ngomulandu weenkabo wamu Malembo weenga wapa kwaamba ayi cikwati cimane. (Mate. 5:32) Aboobo na twacana mapensho Paulo ngakaambawo, tatweelete kulinyumfwa kwiinda mukutalika kuyeeya ayi: ‘Ngonjebeneakwe tatoombikako maano alimwi tantondeshi lusuno lweelete. Mpashi inga ndababo alusangalalo na ndeeba mwanakashi umwi na kweebwa kumusankwa umwi.’ Na katuyeeya boobo ingayi tutoobikilabo maano kukulikondelesha, muciindi cakuyeeyelako ngotweebenaakwe. Bantu bamucishi inga bamuyuminisha ayi amucite nshomusuni akucimanishabo cikwati kwaamba ayi mulisangalashe. Ano Maswi akwe Lesa alayuminisha ayi mulyeelete ‘kubikila maano kushintu shicafwa bamwi, kuteshibo kusheesho shicafwa ndimwe nweenka.’ (Fili. 2:4) Yehova alisuni kwaamba ayi mutolelele kuba mucikwati, kuteshi kulekana. (Mate. 19:6) Alisuni kwaamba ayi munootanguna kuyeeya pali nguwe, kuteshi pali ndimwe nweenka.
5 Beebene balyeelete kutondeshanya lusuno abulemu. (Amubelenge Bene Efeso 5:33.) Baibo ilatwiisha ayi tulyeelete kubikila maano kukupa kuteshi kukutambula. (Milimo 20:35) Ino ngumubo nshi weenga wacafwa beebene kutondeshanya lusuno abulemu? Nkuliceesha. Beebene baliceesha tababikilibo maano kushintu sheenga shakondeleshabo womwi, sombi kusheesho sheenga shabacafwa boonse bobilo.—1 Koli. 10:24.
w06 9/15 pe. 28 pala. 13
“Koosangalalila Mumwanakashi Ngowakeeba Koocili Mwanike”
13 Ino nshiinshi beebene nsheenga bacita na bali mumapensho ceebo cakwaamba ayi tabasungani kabotu? Balyeelete kusebensa cankusu kwaamba ayi bamane mapensho. Mpashi cimwi ceenga capa kwaamba ayi babe mumapensho, nkusebensesha maswi atabete kabotu ndyebatobandikishanya. (Tushimpi 12:18) Kweelana anshetwakeeya mumutwi wamana, kusebensesha maswi atabete kabotu inga kwapa kwaamba ayi mucikwati mube mapensho. Lilembo limwi lya tushimpi lilaamba ayi: “Ncibotu kwikala muluyanga kwiinda kwikala amwanakashi shikutobwa ucite kamoyo kaniini.” (Tushimpi 21:19) Na muli mwanakashi weebetwe, amuliipushe ayi, ‘Sa mibo njeencite ilapa kwaamba ayi beebaangu batanosuna kubandika andime?’ Baibo ilalwiita basankwa beebete ayi: “Amwebo nobasankwa amusune bamakaanu, tamweelete kuba alunkutwe.” (Bene Kolose 3:19) Na muli musankwa weebete, amuliipushe ayi, ‘Sa citoopa kwaamba ayi mukaangu anoosuna bamwi kumusangalasha nceebo cakwaamba ayi nebo nshimubikiliko maano?’ Nacibi boobo, ishi teshi nsheenga shapa muntu kucita bulale. Ano ceebo cakwaamba ayi ici inga cacitika inga cabota kubandikishanya cakwaanguluka na mwacana mapensho.
Buboni Bwakumushimu
Amutolelele Kukalika Moyo
9 Kwiilikaawo, kukalika moyo inga kwatucafwa kunoosala kabotu shakucita. Muciindi cakwiingana kusalawo shakucita, tulaakucana ciindi cakulangoola makani akuyeeya pasheesho nshetusuni kucita. (Amubelenge Tushimpi 21:5.) Kucakubonenaako, na tutoolangoola ncito, mpashi inga twasumina kunjila ncito ili yoonse njeenga twacaana, nabi kwaamba ayi incito iyo inanoopa kwaamba ayi cimwi ciindi tunoolofwa kumabungano na kutanokwaabanamo lubasu lyoonse muncito yakushimikila. Nacibi boobo, na katukalika moyo, tulaakutaanguna kuyeeya mushinso ngweshi tunokweenda kuya kuncito, mawoola ngeshi tunooyandika kusebensa, alimwi a nciito iyo mbweshi ikakume mukwashi wesu abushicibusa bwesu a Yehova. Na katukalika moyo, inga twaleya kusala kucita shintu shitabete kabotu.
JULY 14-20
BUBONI BUCANIKA MUMASWI AKWE LESA TUSHIMPI 22
Njiisho Shabusongo Sheenga Shamucafwa Kulela Baana
Sa Bana Banu Balaakusebensela Lesa na Bakakule?
7 Na muli mucikwati alimwi mulisuni kuba abaana, amuliipushe ayi: ‘Sa tuli bantu baliceesha alimwi babikila maano kushintu shakumushimu bweenka bwakalinga Josefu a Maliya, bantu Yehova mbeenga wasala ayi balame kateta uyandika abuumbi?’ (Kulu. 127:3, 4) Na mwakaba kale mushali, amuliipushe ayi: ‘Sa ntokwiisha bana bangu kushiba bubotu bwakusebensa cankusu?’ (Shiku. 3:12, 13) ‘Sa ndashitilisha bana bangu kumapensho na kushintu shibiibi nsheenga bacana mucishi cakwe Satana?’ (Tus. 22:3) Inga tamucikoonshi kushitilisha baana kumapensho oonse ngeenga bacana. Mukwiinga ico inga tacikonsheki. Sombi inga mwabacafwa kulibambila limwi kwiinda mukutolelela kubaiisha munshila yalusuno mbweenga bacinka manungo mu Maswi akwe Lesa ndyebacana mapensho. (Amubelenge Tushimpi 2:1-6.) Kucakubonenaako, na shikamukowa wacileka kusebensela Yehova, amusebenseshe Maswi akwe Lesa kucafwa bana banu kushiba kuyandika kwa kutolelela kushomeka kuli Yehova. (Kulu. 31:23) Na muntu ngomusuni wafwa, amucafwe bana banu kwiinda mukubatondesha Malembo eenga abacafwa kuliyumya akucana luumuno.—2 Koli. 1:3, 4; 2 Timo. 3:16.
Nobashali—Amwiishe Bana Banu Kusuna Yehova
17 Amutalike kwiisha baana ndyebacili baniini. Cilacafwa abuumbi na bashali batalika kwiisha baana kabacili baniini. (Tus. 22:6) Amuyeeye cakubonenaako cakwe Timoti uyo wakesa mukutalika kusebensa a mutumwi Paulo. Timoti wakayiishikwa abanyina ba Yunisi alimwi abankambuyakwe banakashi ba Loisi kuswabo “kubwanike.”—2 Timo. 1:5; 3:15.
18 Ba Jean-Claude abakaabo ba Peace baku Côte d’Ivoire, abalo bakaiisha bana babo boonse bali 6 kusuna Yehova akumusebensela. Ino nciinshi cakabacafwa? Bakakonkela cakubonenaako cakwe Yunisi a Loisi. Ba Jean-Claude abakaabo bakaamba ayi: “Twakaiisha bana besu Maswi akwe Lesa kuswabo ciindi ndyebakalinga baniini. Twakalinga kutalika kwiisha mwaana pesule lya nshiku shiniinibo kuswa ciindi ndyaakashalwa.”—Duto. 6:6, 7.
19 Ino ‘kwiisha’ baana Maswi akwe Yehova cilaamba nshi? Liswi lyamuci Ebulu ndyobakasansulula ayi ‘munookwiisha’ ilyo ndyetucana pa lilembo lya Dutolonomi 6:7, lilasansulula “kwiisha muntu cintu comwi comwi mankanda aanji kwaamba ayi anyumfwishishe.” Aboobo kwaamba ayi bashali banokwiisha kabotu baana, balyeelete kunooba abo ciindi cilaamfu. Cimwi ciindi bashali inga banyumfwa butolo kunokwiisha bana babo cintu comwi comwi. Nacibi boobo, balyeelete kushiba kwaamba ayi kucita boobo inga kwapa kwaamba ayi baana banyumfwishishe Maswi akwe Lesa akukonkela nshaamba.
w06 4/1 pe. 9 pala. 4
Nobashali—Amutondeshe Cakubonenaako Cibotu Kubana Banu
Kwalo, ncakwiila kwaamba ayi baana cimwi ciindi balaba amaano abwanike, alimwi bamwi balasuna kunocitabo nshobasuni, alimwi inga baba batanyumfwi. (Matalikilo 8:21) Ino nshiinshi bashali nsheenga bacita? Baibo ilaamba ayi: “Buluya bulekala mumoyo wa mwanike, sombi na woomwa amusako, buleendela palaamfu.” (Tushimpi 22:15) Bamwi balabona anga kululika mwaana munshila ya mushobo uyu ndunkutwe alimwi ayi ncakale kale. Alimwi Baibo ilakasha kulwana kwamushobo uli woonse. Nabi kwaamba ayi cimwi ciindi “musako” inga kwaba kukwiipa kwiine, sombi uleemikaninako nkusu bashali nshobacite nsheenga basebensesha calusuno alimwi munshila yeelete kucafwa bana babo mukwiinga balabikila maano kubuumi baana mbweenga babaabo kunembo.—Bene Ebulu 12:7-11.
Buboni Bwakumushimu
Munoosangalala Muncito Njemusebensela Yehova
11 Aswebo inga twaba alusangalalo abuumbi, na katusebensa cankusu incito iliyoonse njetucite muncito yakwe Yehova. ‘Amubikile maano abuumbi’ kuncito yakushimikila alimwi akusebensa cankusu mulibungano. (Milimo 18:5; Ebu. 10:24, 25) Amulibambile kabotu mabungano kwaamba ayi mukaambe shikumbulo shiyuminisha. Munoobona lubasu luliloonse lwa shikwiiya ndweenga mwapeekwa mumabungano amukati kansondo kwaamba ayi lulayandika. Na bamusenga ayi musebenseko ncito imwi mulibungano, amukumanishe ncito iyo akwiimanisha muciindi ceelete. Tamweelete kuyeeya ayi incito njemwapekwa taiyandiki, aboobo tamweelete kusebenselawo. Amweeleshe cankusu kushiba kabotu bwakusebensa ncito iyo. (Tus. 22:29) Na kamusebensa cankusu muncito yakwe Yehova, bushicibusa bwanu anguwe bulaakuyuminaako alimwi mulaakutolelela kuba alusangalalo. (Gala. 6:4) Alimwi cilaakumubeta cuubu kusangalala na bamwi bapekwa mukuli ngomwalinga kusuni.—Loma. 12:15; Gala. 5:26.
JULY 21-27
BUBONI BUCANIKA MUMASWI AKWE LESA TUSHIMPI 23
Njiisho Shabusongo Sheenga Shamucafwa Kusala Kabotu Pamakani Akunwa Bwalwa
Munoobona Bwalwa Bweenka Lesa Mbwaabubona
Bamwi balalinyumfwa ayi inga banwa bwalwa buunji abuumbi kwakubula kukolwa. Nacibi boobo, ico inga cabaletela mapensho anene. Baibo ilaamba cakuteenda mweela ayi kuba “busha kukunwa waini uunji” inga kwapa kwaamba ayi muntu acite shilubo shinene akunyonyoola bushicibusa bwakwe a Yehova. (Taitasi 2:3, NWT; Tus. 20:1) Alimwi Yesu wakacenjesha ayi ‘bucakolwa’ inga bwapa kwaamba ayi muntu atakenjili mucishi cipya. (Luka 21:34-36) Aboobo ino nshiinshi sheenga shacafwa Mwineklistu kuleya mapensho esa ceebo cakunwa bwalwa?
Munoobona Bwalwa Bweenka Lesa Mbwaabubona
Nacibi boobo, Beneklistu bakapekwa butanjilishi buli kabotu kuswa ku Mulengi wabo shilusuno. Kucakubonenaako, wakatulwiita shintu shibiibi abuumbi shiswaamo na muntu kaanwa cakwiindilila. Mpashi twakabelengaawo kale pa Tushimpi 23:29-35 apo pasansulula kabotu muntu mbwaaba na wakolwa amapensho amwi ngaacana. Munene umwi mulibungano waliina lya Daniel uyo ukala ku Europe, aleebaluka mbwaakalinga kaatana kuba Mwineklistu wancine. Wakaamba ayi: “Kunwa bwalwa cakwiindilila kwakapa kwaamba ayi ntanoosala kabotu shakucita. Alimwi ndakacita shintu shibiibi abuumbi isho shimpa kulinyumfwa cibiibi na ndashiyeeya.”
Buboni Bwakumushimu
w04 11/1 pe. 31 pala. 2
Miipusho Kuswa Kubeshikubelenga
Kucakubonenaako, kwiina bunene ncitondesho cakwaamba ayi muntu ngu mulyabi sombi teshi boonse beenite bunene balyabi. Bamwi inga beena bunene ceebo cakwaamba mbalwashi. Bamwi inga kabeenite bunene ceebo cakwaamba ayi mbobabete mumukowa. Alimwi tulyeelete kunokwiibaluka ayi kwiina bunene tulakubona ceebo ca mubili mbouboneka sombi bulyabi tatububoniwo. Kwiina bunene cilasansulula “kufulisha kwa mafuta mumubili,” lyalo bulyabi cilasansulula “bwiinyu na kulya cakwiindilila.” Aboobo, bulyabi teshi njinino ya muntu sombi ni ndiito ya shakulya. Muntu inga waba mulyabi nabi kaacite mubili ulibo kabotu nabi na kaakokete. Bantu nshebayeeya pa kwiina kuli kabotu na ambonekelo ili kabotu shilapusana pusana kweelana amusena.
JULY 28–AUGUST 3
BUBONI BUCANIKA MUMASWI AKWE LESA TUSHIMPI 24
Amube Balibambite Kumapensho Ngeenga Mwacaana
“Amwiimikane Mulushomo Cakutatenkaana”
15 Amwiiye Maswi akwe Lesa akukutumana kuyeeyawo. Bweenka cisamu mbociimikana cakutatenkaana na miyanda yakaya panshi abuumbi, aswebo tulaakwiimikana cakutatenkaana na katucite lushomo luyumu muli Yehova. Cisamu ndyecitooya cikomena, miyanda imwi ilaya panshi abuumbi lyalo imwi ilaya mweela. Ndyetutokwiiya Maswi akwe Lesa akukutumana kuyeeyawo, tulayumya lushomo lwesu alimwi tulashoma cakutatoonsha ayi nshaatulwiita kucita shili kabotu. (Kolo. 2:6, 7) Amuyeeye Yehova mbwaakacafwa basebenshi bakwe kale kale, kwiinda mukubatanjilila akubashitilisha. Kucakubonenaako, Esekelo wakabikilako maano abuumbi munjelo ndyaakalinga kupima cakubikila maano tempele Esekelo njaakabona mucili anga nciloto. Cili anga nciloto ici cakamuyuminisha Esekelo, alimwi cilatucafwa kushiba mbweenga twakonkela njiisho shakwe Yehova nshaamba pakulambila kusalalite. (Esek. 40:1-4; 43:10-12) Aswebo tulaakucafwikwa na katucana ciindi cakwiiya akukutumana kuyeeya pamakani ayumu kunyumfwisha acanika mu Maswi akwe Lesa.
Yehova Alaakumucafwa Ndyemuli Mubukaalo Buyumu
9 Nshotuyandika kucita kwaamba ayi Yehova atucaafwe. Na mwalefuka ceebo cakulinyumfwa cibiibi abuumbi, amucite nsheenga mwacikonsha kwaamba ayi mutolelele kupaila, kucanika kumabungano akushimikila. Kwalo inga tamucikoonshi kucita shiinji mbuli mbomwakalinga kucita kamutana kwiinda mumapensho, sombi munokwiibaluka ayi Yehova taamulangili kucita nsheenga tamucikoonshi. (Amweelanye a Luka 21:1-4.) Kwiilika pakucita shintu ishi nshotwabandikawo, munoocana ciindi cakucita ciiyo capalwaanu akukutumana kuyeeyawo. Ino nceebonshi? Kwiinda mulibunga lyakwe, Yehova wakatubambila makani aanji aamba shamu Baibo eenga atucafwa kutatenkaanishikwa ndyetuli mubukaalo buyumu. Kwaamba ayi mucane makani ngomutoyandika, inga mwasebensesha shisebensesho nshetusebensesha kulangoola makani mbuli, JW Library appu, Watch Tower Publications Index, alimwi alibuku lyamu Chitonga lyaamba ayi, Bbuku Ligwasya Kuvwuntauzya lya Bakamboni ba Jehova. Ba Monika mbotwalinga twaambaawo bakaamba ayi, bakasebensesha shisebensesho ishi ndyebakatalika kulinyumfwa cibiibi abuumbi. Kucakubonenaako, bakalangoola makani aamba pa “kukalala.” Lyalo pashiindi shimwi, bakalangoola makani aamba pa “kupondoka” na “kushomeka.” Lyalo bakalinga kutalika kubelenga kushikila balinyumfwako kabotu. Bakaamba ayi: “Na ndyendatalikabo kulangoola makani ndakalinga kulisukama abuumbi. Sombi na ndatolelela kubelenga, ndakalinga kulinyumfwa anga Yehova wamfukata. Ndyendakalinga kubelenga, ndakesa mukushiba ayi Yehova wakalinga kunyumfwishisha mbondakalinga kulinyumfwa munshila shipusenepusene alimwi wakalinga kuncafwa.” Alimwi lucafwo lwakwe Yehova inga lwamucafwa kutanoolinyumfwa cibiibi lyalo akuba aluumuno abuumbi.—Kulu. 119:143, 144.
Miipusho Kuswa Kubeshikubelenga.
Tushimpi 24:16 ilaamba ayi: “Muntu ululeme nabi awe mankanda osanwe aobilo, ulabuka alimwi.” Sa lilembo ili lilaamba pamuntu ubooshawo kucita cibiibi ayi alalekelelwa a Lesa?
Kwalo, aya teshi ngomakani atokwaamba vesi iyi. Vesi iyi ilaamba pamuntu wiinda mumapensho apusenepusene sombi ucikonsha kuliyumya.
Aboobo twabona kwaamba ayi liswi lyakwaamba ayi ‘kuwa’ ndyetucana pa Tushimpi 24:16 talisansululi kucita cilubo, sombi lilasansulula kwiinda mumapensho apusenepusene, mankanda aanji. Mucishi cino cibiibi, muntu ululeme inga waciswa na mpashi kuba amapensho amwi. Na mpashi mfulumeende inga shatalika kumupensha ceebo ca sheesho nshaashoma. Nacibi boobo, inga washoma ayi Lesa alaakutolelela kuba anguwe alimwi alaakumucafwa kuliyumya mumapensho. Amuyeeye shintu mboshibeendela kabotu bantu bakwe Lesa. Ino nciinshi cipa kwaamba ayi shintu shinoobeendela kabotu? Nceebo cakwaamba ayi tulishomete ayi ‘Yehova ngoobusha boonse abo bawa, alimwi ngoocatilila boonse abo balefuka.’—Kulu. 41:1-3; 145:14-19.
Buboni Bwakumushimu
w09 10/15 pe. 12
Miipusho Kuswa Kubeshikubelenga
Muciindi camu Baibo musankwa na alisuni kuba aŋanda yaakwe nabi na alisuni kweeba akuba abaana, wakalinga kweelete kuliipusha ayi, ‘Sa ndalibambila kulama mukaangu abaana mbeenga twabaabo?’ Musankwa kaatana kweeba wakalinga kutaanguna kuba anciito yakusebensa alimwi akuba amyuunda. Nceceeco, Baibo ya Today’s English Version pavesi iyi ilaamba ayi: “Taweelete kuyaka ŋanda yako akuba mukwashi kushikila ciindi ndyeshi ukatebule akuba ashakulya shikwene.” Ano sa njiisho iyi icisebensa a munshiku shino?
Ee icisebensa. Musankwa usuni kweeba alyeelete kulibambilila limwi kabotu kwaamba ayi akacikoonshe kunoolama kabotu mukwashi wakwe. Na alicite nkusu, alyeelete kunosebensa. Musankwa usebensa cankusu kulama mukwashi wakwe taeelete kweelabo pakulangweta mukwashi wakwe shiyandika lwakumubili. Maswi akwe Lesa alaamba ayi musankwa utabikili maano kushiyandika mukwashi wakwe lwakumubili, mbobalinyumfwa, alimwi alwakumushimu inga ayi ngumubiibi kwiinda amuntu utashomi. (1 Timo. 5:8) Aboobo musankwa wacanike atolibambila kweeba akuba abaana alyeelete kuliipusha miipusho mbuli yeeyi: ‘Sa ndilibambite kulangweta mukwashi wangu shiyandika lwakumubili? Sa ndilibambite kuba mutwi wamukwashi weenga wacikonsha kucafwa mukwashi lwakumushimu? Sa lyoonse ndaakunocikosha kutanjilila kulambila kwamukwashi?’ Maswi akwe Lesa alayuminisha basankwa kukumanisha mikuli iyi iyandika abuumbi.—Duto. 6:6-8; Efe. 6:4.
Aboobo musankwa wacanike usuni kweeba alyeelete kuyeeyawo cakubikila maano panjiisho njetucana pa Tushimpi 24:27. Alakwe mwanakashi wacanike alyeelete kuliipusha miipusho kwaamba ayi ashibe na alilibambite kukumanisha mikuli yakwe na weebwa akuba mushali mwanakashi. Abalo beebene bacanike inga baliipusha miipusho ikoshenyeeko ayeeyi na batoyeeya pakuba abaana. (Luka 14:28) Na bantu bakwe Lesa kabakonkela butanjilishi ubu bwakatanjililwa amushimu, balaakuleya mapensho aanji alimwi balaakuba basangalete mumukwashi wabo.
AUGUST 4-10
BUBONI BUCANIKA MUMASWI AKWE LESA TUSHIMPI 25
Njiisho Shabusongo Sheenga Shamucafwa Kwaamba Maswi Abotu
w15 12/15 pe. 19 mapa. 6-7
Amucisebenseshe Kabotu Cipo Cakwaamba
6 Maswi ngotucana pa Tushimpi 25:11 alatucafwa kusala kabotu ciindi ceelete ndyeenga twaamba, alaamba ayi: “Liswi lyeelete paciindi ceelete lilibo anga cisepo ca golodi cabikwa mucintu ca silifa.” Maapo aboneka anga ngu golodi alaboneka kabotu. Sombi na mwaabika pacintu ca silifa alaboneka kabotu kwiindaawo. Ubu bweenka mbocibete apa kwaamba, na katusala kabotu ciindi ndyetweelete kwaamba maswi esu alaakunooba ayuminisha alimwi abotu. Munshila nshi?
7 Maswi esu inga kaalibo kabotu, sombi na twaamba maswi ayo paciindi citeelete inga tayuminishi. (Amubelenge Tushimpi 15:23.) Kucakubonenaako, mu March 2011 citentanshi cakanyamuna maanshi mulweenge cakanyonyoola matauni oonse ali kulubasu lwa kwicwe lya Japan. Bantu beendilila 15,000 bakafwa. Nabi kwaamba ayi Bakamboni bakwe Yehova bakalinga kumusena uko bakafwitwa beshicibusa alimwi abeshikamukowa babo, bakasebensesha Baibo kuyuminisha bantu bakalinga mubuumba. Nacibi boobo, bantu baanji bakalinga kushoma bunene njiisho sha bupailishi bwaci Buddhist alimwi tebakalinga kushi shiinji pa Baibo. Aboobo bamakwesu bakashiba ayi paciindi ici tebakalinga kweelete kushimikila bantu pamakani akulangila kubushikwa kwa bafu. Muciindi cakucita boobo, bakasebensesha cipo cabo cakwaamba kubikila maano kuyuminisha bantu akubasansulwiita kuswa mu Baibo cipa kwaamba ayi shibiibi shinoocitikila abantu bacita shibotu.
w15 12/15 pe. 21 mapa. 15-16
Amucisebenseshe Kabotu Cipo Cakwaamba
15 Tulyeelete kubikila maano mbotwaamba bweenka mbotuyandika kubikila maano kumaswi ngotwaamba. Ciindi Yesu ndyaakalinga kubandika abantu musunagogi yakumishaabo ku Nasaleti, bantu “bakakankamana ambwaakaamba makani cabusongo.” (Luka 4:22) Andiswe na katwaamba munshila ya bulemu bantu balakusangalala abuumbi pa nsheshi tukanokwaamba alimwi tulaakubashika pa moyo. (Tus. 25:15) Inga twakonkela cakubonenaako cakwe Yesu na katwaamba munshila ya nkumbu, yabulemu alimwi akuyeeyelako bamwi mbobalinyumfwa. Yesu ndyaakabona likoto lya bantu bakalinga kusunishishi kukutika nshaakalinga kwiisha, wakabanyumfwila nkumbu lyalo “wakatalika kubeeisha shintu shiinji.” (Maako 6:34) Nabi ndyebakalinga kumutukana, Yesu taana kwaambawo maswi abiibi.—1 Pit. 2:23.
16 Teshi cuubu kwaamba cakulibombya alimwi munshila yeenga taikalashi bamwi bunene bunene na tutokwaamba amuntu ngotushibenaakwe kabotu. Inga twalinyumfwa kwaanguluka kwaamba shili shoonse cakuteenda mweela. Ici inga cacitika ndyetutobandika a shikamukowa na shicibusa ngotunyumfwanaakwe bunene mulibungano. Sa Yesu wakalinyumfwa kwaanguluka kwaamba cabukali abeshikwiiya bakwe ceebo cakwaamba ayi bakalinga beshicibusa mbaakalinga kunyumfwanaabo abuumbi? Sobwe napaceyi! Bashikwiiya bakwe mbaakalinga kunyumfwanaabo ndyebakatolelela kupikishanya pa wakalinga munene, Yesu wakabalulika cankumbu akusebensesha cakubonenaako ca mwaana muniini. (Maako 9:33-37) Bamanene inga bakonkela cakubonenaako cakwe Yesu kwiinda mukululika “cakulibombya.”—Gala. 6:1.
w95 4/1 pe. 17 pala. 8
Mbweenga Twacafwana Kutondesha Lusuno Lwancinencine Alimwi Akucita Shibotu
8 Ndyetutosebensela Lesa wesu, inga twacafwana womwi awomwi kwiinda mucakubonenaako cesu. Yesu wakayuminisha bakalinga kumukutika. Wakalinga kwiisuni ncito yakushimikila alimwi wakalinga kwiibona ayi ilayandika. Wakaamba ayi cakalingabo anga ncakulya kuli nguwe. (Joni 4:34; Bene Loma 11:13) Kusebensa cankusu kwamushobo uyu inga kwayuminisha bamwi. Amutolelele kuba alusangalalo ndyemutoshimikila bamwi. Amulwiiteko bamwi mulibungano shibotu nshemwacana ceebo ca ncito iyi, sombi amuleye mushimu wakulisumpula ndyemutoocita boobo. Na mwasenga bamwi kwaamba ayi musebensele pomwi, amubone na kuli mbweenga mwabacafwa kucana lusangalalo ndyebatoshimikila bamwi pali Yehova Mulengi wesu Winditeewo.—Tushimpi 25:25.
Buboni Bwakumushimu
it-2 pe. 399
Kwaamba maswi abotu
Muntu waamba maswi abotu alacita boobo ceebo cakwaamba ayi alicite lushomo alimwi aceebo cakwaamba ayi kuli cimupa kucita boobo. Tafwambaani kupilinganishikwa na kucileka kuyeeya kabotu. Cipa muntu kwaamba maswi atabete kabotu nkuloonda, kucimwa, kubula lushomo, kubula kulangila alimwi akusuna kwaamba ayi shintu shibe kabotu peenkaapo. Baibo ilasansulula muntu waamba maswi atabete kabotu ayi: “Muntu ulya utakoonshi kulicata, uli anga nindabala icite lubumbu lumwaikite.” (Tu 25:28) Alaambabo cambaambe kweelana ambweenga kaalinyumfwa na kweelana amiyeeyo ili yoonse itabete kabotu njeenga kaacite, iyo yeenga yamupa kucita shintu shitabete kabotu.
AUGUST 11-17
BUBONI BUCANIKA MUMASWI AKWE LESA TUSHIMPI 26
Amumutalamuke “Muluya”
it-2 pe. 729 pala. 6
Imfula
Shiindi. Shiindi shobilo shakalinga kubako bunene mu Cishi Cakashomeshekwa, nciindi ca cilimo alimwi acamupewo, munshila imwi inga twaamba ayi ciindi ndyekutabi mfula aciindi ndyekuba mfula. (Amweelanye a Kulu 32:4; Lw 2:11) Kuswa pakati kati ka mwenshi wa April kushika pakati kati ka mwenshi wa October imfula tailoki bunene. Ncakwiila muciindi ici cakutebula teshi liinji imfula ndyeeloka. Lilembo lya Tushimpi 26:1 lilatondesha ayi cakalinga kusaya mfula kuloka paciindi cakutebula. (Amweelanye a 1Sa 12:17-19.) Ciindi ca meensa teshi lyoonse mfula ndyeeloka; nshiiku shimwi takubiiwo amakumbi. Ano kulokwa kulaloondesha ceebo cakwaamba ayi muciindi ca meensa kulatontola. (Esil 10:9, 13) Aboobo, kuba muŋanda ibotu kulayandika abuumbi paciindi ici.—Isa 4:6; 25:4; 32:2; Job 24:8.
w87 10/1 pe. 19 pala. 12
Kululikwa Kulashala Shisepo sha Lumuuno
12 Bantu bamwi balayandika kululikwa mbuli bwaamba lilembo lya Tushimpi 26:3 ayi: “Bweenka maaki ambongolo mbosheelete kucailwa mbweeke ubo alakwe muluya mbwaaelete kucitwa.” Cimwi ciindi Lesa wakalinga kuleka bene Isilaeli kwiinda mumapensho ayo ngobakalinga kuliletela beene ceebo cakwaamba ayi: “Bakasuula maswi akwe Lesa, akukaka milasho yakwe Lesa wa kwiculu Wiindaawo. Wakabaaba bakalinga kubakopola ancito iyumu. Bakalinga kuwa sombi tekwakalinga shikubacafwa. Lyalo bakalilila [Yehova] ceebo ca mapensho abo. Ncakwiila alakwe wakabafuna kuswa mubuumba bwabo.” (Kulumbaisha 107:11-13) Bantu bamwi baluya, balaba ashitaala cakwaamba ayi inga tabakonkeliiwo kululika kuli koonse kweenga kwabacafwa. Baibo ilaamba ayi: “Muntu utolelela kuba shincimpamya pesule lyakululikwa mankanda aanji aanji, ulaakunyonyoolwa cakuteengashila alimwi cakutashilikikwaawo.”—Tushimpi 29:1.
it-2 pe. 191 pala. 4
Mulema, Bulema
Bulema bulasebenseshekwa mbuli mwaambo. Mwaami musongo Solomoni wakaamba ayi: “Kutuma muluya makani cilibo anga nkulitimbula mweendo [uko kweenga kwamupa kulemana], nabi kuliletela mapensho.” Ncakwiila, muntu unjisha ncito muntu muluya inga ayi alisunibo kuliletela mapensho mwiine mukwiinga inga taasebensi ncito kweelana ambweenga kaasuni.—Tu 26:6.
Buboni Bwakumushimu
it-1 pe. 846
Muluya
Kukumbula muluya kweelana “abuluya bwakwe” inga caamba kusumina miyeeyo ya muntu muluya utopikisha nabi kwaamba ayi nshaatokwaamba teshi shamaano. Ano kwaamba ayi tutabi anga ngu muntu muluya munshila ya mushobo uyu, Baibo ilatulwiita ayi: “Utakumbuli muluya kweelana abuluya bwakwe.” Sombi alimwi lilembo lya Tushimpi 26:4, 5 lilatondesha ayi kukumbula muluya “kweelana abuluya bwakwe” inga caamba kushiba miyeeyo yakwe itoomupa kupikisha, akumutondesha patuba ayi nshaatokwaamba tashicite maano, alimwi akwaamba ayi ashibe ayi shintu nshaatobona ayi inga shacafwa inga tashicafwiiwo nabibo paniini.
AUGUST 18-24
BUBONI BUCANIKA MUMASWI AKWE LESA TUSHIMPI 27
Kuba Abeshicibusa Bancine Mbokutucafwa
Yehova Alibasuni Basebenshi Bakwe Baliceesha
12 Muntu uliceesha ulalumba na bamululika. Kucakubonenaako: Atwaambe ayi muli kumabungano. Pesule lyakubandika abamakwesu abenankashi, mukwesu na nankashi wamwiita palubasu akumulwiita ayi kuli nshemwalinga kulya shacaalila mumeeno. Cakutatoonsha, inga mwanyumfwa nsoni. Ano sa inga tamuluumbi kwaamba ayi wamulwiitaako? Mpashi inga mwalumba akuyeeya ayi naakwiinga umwi wamubona bwangu akumulwiita! Aboobo tulyeelete kulumba na mukwesu na nankashi watululika. Tulyeelete kubona mukwesu na nankashi uyo mbuli shicibusa kuteshi mulwani wesu.—Amubelenge Tushimpi 27:5, 6; Gala. 4:16.
it-2 pe. 491 pala. 3
Shikamukobonyoko
Nacibi boobo, tulyeelete kushoma mubyeesu, alimwi tulyeelete kusenga lucafwo kumuntu wamushobo uyu na twalicana mumapensho, ceebo ayalo Baibo ilatulwiita ayi: “Utasuuli mubyo amubyaabo baiso alimwi na waba amapensho utanoocicila kumukwanu. Ncibotu kuya kuli shikamukobonyoko [sha·khenʹ] uli pafwaafwi kwiinda kuya kumukwanu uli kulaamfu.” (Tu 27:10) Citoboneka ayi shikulemba apa wakalinga kusansulula ayi mubyo ngoonyumfwanaakwe abuumbi alayandika abuumbi alimwi inga wasengako lucafwo kwiinda ashikamukowa na mukwanu ngomwakashalwa lifumo lyomwi, uyo weenga kaali kulaale alimwi weenga mpashi taacikonshi kukucafwa.
Nobacanike—Ino Buumi Bwanu Bulaakuba Buyani?
7 Ciiyo comwi nceenga tweeya kucintu citabete kabotu Joashi ncaakasalawo kucita ncakwaamba ayi, tulyeelete kusala beshicibusa basuni Yehova alimwi basuni kumusangalasha. Beshicibusa abo balaakutucafwa kunoocita shintu shili kabotu. Tulyeelete kuba bushicibusa abantu bashiimo shipusenepusene. Joashi wakalinga mwanike abuumbi kuli Jeoiyada shicibusa wakwe. Amuliipushe ayi: ‘Sa beshicibusa bangu balancafwa kuyumya lushomo lwangu muli Yehova? Sa balacita nsheenga bacikonsha kwaamba ayi bamunyumfwile akunjuminisha kucita boobo? Sa balaamba pali Yehova apashintu nshobeeya mu Baibo? Sa balandulika na ntoyandika kululikwa?’ (Tus. 27:5, 6, 17) Cancine ncakwaamba ayi, na beshicibusa banu tabasuni Yehova, tamweelete kutolelela kuba bushicibusa ambabo. Sombi na beshicibusa banu balisuni Yehova, balaakunoomucafwa lyoonse!—Tus. 13:20.
Buboni Bwakumushimu
Nsheenga Bamanene Beeya Kuswa Kucakubonenaako Cakwe Gidyoni
8 Amulumbaishe Yehova na bamwi bamulumbaisha pashintu nshemucikonsha kucita. Gidyoni ndyebakamulumbaisha pesule lyakukoma bene Midyani, wakalumbaisha Yehova. (Boombo. 8:22, 23) Ino bamanene inga bacikonkela buyani cakubonenaako cakwe Gidyoni? Balyeelete kulumbaisha Yehova pashintu shoonse nshobacikonsha kucita. (1 Koli. 4:6, 7) Kucakubonenaako, na munene bamulumba ceebo cakwaamba ayi alicishi kabotu kwiisha, inga waamba ayi nshaamba shaswa mu Maswi akwe Lesa alimwi soonse tutokwiiya kuswa ku libunga lyakwe Yehova. Cimwi ciindi bamanene balyeelete kuyeeyawo na balaiisha munshila yeenga yapa kwaamba ayi Yehova alumbaishikwe nabi na balasuna bamwi ayi babalumbaishe. Amuyeeye pacakubonenaako ca munene waliina lya Timothy. Ndyaakasalwabo kusebensa mbuli munene, wakalinga kunyumfwa kabotu kwaamba makani a Baibo. Wakaamba ayi: “Ndakalinga kufusha maswi apakutalikila akusebensesha shikoshanyo shilaamfu alimwi shisangalasha. Liinji kucita boobo kwakalinga kupa kwaamba ayi bamwi banoondumbaisha. Aboobo ici cakapa kwaamba ayi bantu batalike kulumbaisha ndime muciindi ca kulumbaisha Yehova na kubona makani amu Baibo mbweenga abacafwa.” Mukuya kwaciindi, ba Timothy bakesa mukushiba ayi bakalinga kuyandika kwaalulako mbobakalinga kwiisha kwaamba ayi batanoobalumbaisha. (Tus. 27:21) Ino nshiinshi shakaswaamo? Bakaamba ayi: “Ano pacecino ciindi bamakwesu abenankashi balandwiita ayi likani limwi ndyendakaamba lyakabacafwa kukoma lipensho limwi, kuliyumya ndyebakalinga kweeleshekwa na kuba abushicibusa buyumu a Yehova. Ndasangalala abuumbi na bandwiita boobo kwiinda mbondakalinga kusangalala na bandumbaisha.”
AUGUST 25-31
BUBONI BUCANIKA MUMASWI AKWE LESA TUSHIMPI 28
Bupusano Buli pa Muntu Ucita Shibiibi Alimwi a Ucita Shiluleme
w93 5/15 pe. 26 pala. 2
Sa Mulakonkela Yehova Camoyo Woonse?
“BALULEME mbayumu myoyo bweenka mbuli nkalamu.” (Tushimpi 28:1) Balatondesha lushomo alimwi cakutatonsha balacinka manungo mu Maswi akwe Lesa alimwi balatolelela kushimikilako bamwi cakutaloonda nabi kwaamba ayi kucita boobo inga kwababika mumapensho.
it-2 pe. 1139 pala. 3
Kunyumfwishisha
Abo bacileka kubikila maano ku Wooyo Utucafwa kunyumfwishisha. Muntu na watalika kubisha alacileka kuyeeya pali Lesa ndyaatosalawo shakucita. (Job 34:27) Muntu wamushobo uyu alatalika kukonkeleshabo moyo wakwe uyo weenga wamubeca akumupa kucileka kubona shintu munshila yeelete. (Kulu 36:1-4) Nabi kwaamba ayi inga kaalyaamba ayi alapaila Lesa; alasuna kukonkela miyeeyo ya bantu kwiinda kukonkela milawo yakwe Lesa. (Isa 29:13, 14) Alacita shintu shibiibi akubona mwakuleyela kunoyeeya anga kucita shibiibi ncisekano (Tu 10:23) akutalika kunocita shintu shibiibi kuba anga shilibo kabotu, kuba alunkutwe, akuyeeya anga ngumuntu muluya cakwaamba ayi watalika akuyeeya ayi Lesa utaboneki taaboniiwo na kushiba shintu shibiibi nshaacita, kuba anga nkusu Lesa nshaacite shakushiba akubona shintu shacileka kusebensa. (Kulu 94:4-10; Isa 29:15, 16; Jel 10:21) Aboobo shintu nshayeeya anshaacita cilababo anga atokwaamba ayi, “Taaku Lesa” (Kulu 14:1-3) alimwi alamulubaako. Alaalilwa kusala kabotu shakucita, kubona shintu munshila yeelete, akubona shimwi shiilikitweemo mu nshaatosala, ceebo cakwaamba ayi taatanjililwi anjiisho shakwe Lesa.—Tu 28:5.
it-1 pe. 1211 pala. 4
Kushomeka
Inga twacikonsha kutolelela kushomeka munshila ya mushobo uyu, na katushoma muli Yehova akucinka manungo muli nguwe alimwi amunkusu nshaacite shakutupulusha. (Kulu 25:21) Lesa alatushomesha ayi alaakuba anga “ndiyawo” kubaabo beenda munshila ya bululami alimwi ‘akubafuna.’ (Tu 2:6-8; 10:29; Kulu 41:12) Kusuna kutolelela kucita shisangalasha Yehova kulatucafwa kutaboolela mwisule ndyetutokwiinda munshila iluleme kwaamba ayi tukacane shibotu kunembo. (Kulu 26:1-3; Tu 11:5; 28:18) Nabi kwaamba ayi Jobo cakulisukama wakabona ayi bantu baluleme inga bapenga ceebo cakweendeleshekwa amubiibi alimwi inga bafwita pomwi abantu bacita shibiibi, Yehova alashomesha ayi teshi akamulubeeko muntu utacite kampenda alimwi muntu uyo alamushomesha kumupa cilambu kunembo cakuba muluumuno, akuba ashintu shibotu nabi cikabe buyani. (Job 9:20-22; Kulu 37:18, 19, 37; 84:11; Tu 28:10) Bweenka mbocakalinga kuli Jobo, cipa kwaamba ayi muntu alemekwe, teshi buboni buunji mbweenga kaacite, sombi nceebo cakushomeka. (Tu 19:1; 28:6) Balicite coolwe baana bacite mushali ushomeka bweenka mbuli Jobo mukwiinga inga baba alusangalalo (Tu 20:7), akuba ampuuwo ibotu ceebo ca cakubonenaako cibotu ca beshiwabo, alimwi abulemu mbobapekwa kubantu.
Buboni Bwakumushimu
w01 12/1 pe. 11 pala. 3
Inga Mwaleya Kuciswa Bulwashi Bwa Kumoyo Lwakumushimu
Kulishoma. Baanji baciswa bulwashi bwa kumoyo cilacanika ayi bakalinga kulishoma ayi inga tabaciswi bulwashi ubu. Liinji cilacanika ayi bakalinga kubona ayi tabayandiki kuya kucipatela kwaamba ayi babone mbobabete mpashi cimwi ciindi akuseka bamwi beenga kabacita boobo. Ubu bweenka mbweenga caba aku Beneklistu, bamwi inga kababona anga ceebo cakwaamba ayi baba mucancine kwa myaaka iinji, taakuwo ceenga cabacitikila. Inga bacileka kubona mumbasu mobatoyandika kusebensela lwakumushimu na kulilanga langa kushikila ndyeenga balicana mulipenshi. Aboobo tulayandika kukonkela maswi akululika mutumwi Paulo ngaakaamba kulansha pa kulishoma akwaamba ayi: “Ono uyo woonse uyeeya kwaamba ayi ngumuyumu mulushomo, acenjele ayi atawi.” Aboobo cintu cabusongo nceenga twaciita, tulyeelete kunokwiibaluka ayi tatumaninite alimwi tulyeelete kunolilanga langa ciindi aciindi kubona mbasu motutatocita kabotu lwakumushimu lyalo akusebenselawo.—1 Bene Kolinto 10:12; Tushimpi 28:14.