Nobacanike—Ino Buumi Bwanu Bulaakuba Buyani?

1. Ino ngumukuli nshi unene Joashi, Usiya alimwi a Josiya ngobakapekwa?

AMUYEEYE ayi mwasalwa kuba mwaami wa bantu bakwe Lesa kamulibo mwanike na cikulabwangu! Ino inga mwashisebensesha buyani nkusu nsheenga mwapeekwa? Baibo ilaamba pabacanike baanji bakaba baami ba baJuda. Kucakubonenaako, Joashi wakaba mwaami kaacite myaaka 7, Usiya kaacite myaaka 16, lyalo Josiya kaacite myaaka 8. Sombi uyu wakalinga mukuli unene abuumbi! Nacibi boobo, nabi kwaamba ayi wakalinga mukuli unene, Yehova alimwi abamwi bakabacafwa kucita shintu shiinji shibotu.

2. Ino nceebonshi tulyeelete kwiiya cakubonenaako cakwe Joashi, Usiya, alimwi a Josiya?

² Nabi kwaamba ayi tatubete bamaami, inga tweeya shiiyo shiyandika kuswa kubasankwa aba baambwa mu Baibo. Kuli shintu shibotu nshobakacita, sombi paciindi cimwi bakasalawo kucita shintu shitabete kabotu. Shakubonenaako shabo shitootucafwa kushiba kuyandika kwa kusala kabotu beshicibusa, kutolelela kuliceesha alimwi akutolelela kuyumya bushicibusa bwesu a Yehova.

AMUSALE KABOTU BESHICIBUSA

3. Ino Jeoiyada wakamucafwa buyani Mwaami Joashi kusala kabotu shakucita?

³ Nsheenga mweeya kushintu shili kabotu Joashi nshaakasalawo kucita. Joashi ndyaakalinga mwanike, baishi bakafwa lyalo Mupailishi Munene Jeoiyada wakamubwesa ayi anokalaakwe, alimwi wakamwiisha pali Yehova. Joashi wakalinga musongo mukwiinga wakakonkela nshakeeya kuli Jeoiyada. Ceebo ca cakubonenaako cibotu cakwe Jeoiyada, Joashi wakasalawo kusebensela Yehova akucafwa bantu kucita boobo. Alimwi wakabika bubaambo bwakubamba cipya ŋanda yakwe Yehova.—2 Maka. 24:​1, 2, 4, 13, 14.

4. Ino kusuna akukonkela milawo yakwe Yehova kulatucafwa buyani? (Tushimpi 2:​1, 10-12)

⁴ Na bashali banu nabi muntu umwi atomwiisha kusuna Yehova akukonkela njiisho shakwe, ingayi atoomupa cipo ciyandika. (Amubelenge Tushimpi 2:​1, 10-12.) Bashali inga baiisha bana babo munshila shipusenepusene. Amuyeeye pacakubonenaako cakwe nankashi waliina lya Katya, uyo baishi ngobakacafwa kunoosala kabotu shakucita. Lyoonse ndyebakalinga kumutola kucikolo, bakalinga kubandika anguwe lilembo lya bushiku. Wakaamba ayi, “Mibandi iyi yakancafwa kunokoma mapensho ngeenga ndacaana bushiku ubo.” Bashali banu inga bamupa milawo yeendelana anjiisho shamu Baibo, sombi mpashi inga kamulinyumfwa ayi milawo iyo taitoomupa lwaanguluko lwakucita shintu nshomusuni. Ino nciinshi ceenga camucafwa kunobanyumfwila? Nankashi waliina lya Anastasia wakaamba ayi, bashali bakwe bakalinga kucana ciindi cakumusansulwita ncobakalinga kumupeta milawo imwi. Wakaamba ayi, “Ici cakancafwa kunyumfwishisha ayi tabakalinga kumpa milawo kwaamba ayi banonjendelesha, sombi nceebo cakwaamba ayi bakalinga kusuni kushitilisha mukwiinga balinsuni.”

5. Ino nshomucita shilaakubakuma buyani bashali banu alimwi a Yehova? (Tushimpi 22:6; 23:​15, 24, 25)

⁵ Bashali banu balaakusangalala, na kamukonkela kululika kwamu Baibo nkobamupa. Alimwi ciyandika abuumbi, mulaakusangalasha Lesa alimwi bushicibusa bwanu anguwe bulaakuyuminaako. (Amubelenge Tushimpi 22:6; 23:​15, 24, 25.) Ishi nsheebo shibotu sheelete kumupa kukonkela cakubonenaako cakwe Joashi ndyaakalinga mwanike.

6. Ino mbaani Joashi mbaakasalawo kunoonyumfwila, alimwi ino nshiinshi shakaswaamo? (2 Makani 24:​17, 18)

⁶ Nsheenga mweeya kushintu shitabete kabotu Joashi nshaakasalawo kucita. Jeoiyada ndyaakafwa, Joashi wakasalawo kuba bushicibusa abantu batabete kabotu. (Amubelenge 2 Makani 24:​17, 18.) Wakatalika kukonkela nshobakalinga kumulwiita bamatanjilili ba baJuda abo batakalinga kusuni Yehova. Mpashi amwebo mutoosumina ayi Joashi takalinga kweelete kuba bushicibusa abantu abo bakalinga kucita shibiibi. (Tus. 1:10) Wakasalawo kunokutika kumiyeeyo itabete kabotu njobakalinga kumulwiita. Alimwi Sekaliya mupyala wakwe ndyakeelesha kumululika, Joashi wakalwiita bantu ayi bamucaaye. (2 Maka. 24:​20, 21; Mate. 23:35) Wakacita cintu cibiibi abuumbi alimwi cabuluya! Pakutaanguna Mwaami Joashi wakalinga kushomeka kuli Yehova, sombi mukuya kwaciindi wakapondoka akuba mucayi. Mukweelaako, basebenshi bakwe bakamucaya. (2 Maka. 24:​22-25) Ishi shoonse naakwiinga tashikwe kumucitikilaawo, naakwiinga wakatolelela kukutika kuli Yehova akubaabo bakalinga kusuni Yehova! Ino nciiyo nshi ncomutokwiiyako kucakubonenaako cakwe Joashi?

7. Ino mulyeelete kusala kuba bushicibusa abantu bali buyani? (Amubone acikope.)

⁷ Ciiyo comwi nceenga tweeya kucintu citabete kabotu Joashi ncaakasalawo kucita ncakwaamba ayi, tulyeelete kusala beshicibusa basuni Yehova alimwi basuni kumusangalasha. Beshicibusa abo balaakutucafwa kunoocita shintu shili kabotu. Tulyeelete kuba bushicibusa abantu bashiimo shipusenepusene. Joashi wakalinga mwanike abuumbi kuli Jeoiyada shicibusa wakwe. Amuliipushe ayi: ‘Sa beshicibusa bangu balancafwa kuyumya lushomo lwangu muli Yehova? Sa balacita nsheenga bacikonsha kwaamba ayi bamunyumfwile akunjuminisha kucita boobo? Sa balaamba pali Yehova apashintu nshobeeya mu Baibo? Sa balandulika na ntoyandika kululikwa?’ (Tus. 27:​5, 6, 17) Cancine ncakwaamba ayi, na beshicibusa banu tabasuni Yehova, tamweelete kutolelela kuba bushicibusa ambabo. Sombi na beshicibusa banu balisuni Yehova, balaakunoomucafwa lyoonse!—Tus. 13:20.

8. Ino nshiinshi nshotweelete kuyeeyawo na tulasebensesha intaneti kubandika abamwi?

⁸ Munshiku shino kuli nshila shibotu mbweenga katubandika abeshicibusa na beshikamukowa kusebensesha intaneti. Nacibi boobo, bantu baanji balasalawo kubika shintu shimwi pa intaneti, kwaamba ayi bamwi banobakumbwa. Kucakubonenaako, balabikawo shikope amavidyo, shitondesha shintu nshobakoola alimwi anshobakacita. Na mulasebensesha intaneti kubandika abamwi, amuliipushe ayi: ‘Sa ndacita boobo ceebo cakusuna ayi bantu banokumbwa shintu nshooncite? Sa nconsuni nkuyuminisha bamwi na ayi bamwi banoondumbaisha? Sa anebo ndatalika kuyeeya, kwaamba akucita shintu shitabete kabotu bweenka mbuli bantu bamwi basebensesha intaneti mbobacita?’ Mukwesu Nathan Knorr uyo wakalinga omwi wa bamu Likoto Litanjilila, wakaamba ayi: “Mutanokweelesha kucita shintu kwaamba ayi musangalashe bantu. Na mwacita boobo taakuwo ngweshi mukasangalashewo. Amusangalashe Yehova, lyalo mulakusangalasha bantu boonse basuni Yehova.”

TULAYANDIKA KUTOLELELA KULICEESHA

9. Ino nshiinshi Yehova nshaakacafwa Usiya kukumanisha? (2 Makani 26:​1-5)

⁹ Nsheenga mweeya kushintu shili kabotu Usiya nshaakasalawo kucita. Mwaami Usiya ndyaakalinga wacanike, wakalinga kuliceesha. Wakeeya kusebensela Lesa wancine cakushomeka. Alimwi Yehova wakamupa shoolwe mushintu shiinji nshaakacita kwamyaaka 68 njaakekala pacishi. (Amubelenge 2 Makani 26:​1-5.) Usiya wakakoma balwani bakwe baanji akushinisha kwaamba ayi Jelusalemu yashitilishikwa kabotu. (2 Maka. 26:​6-15) Ncakutatoonsha kwaamba ayi Usiya wakalinga kusangalete mushintu shoonse Yehova nshaakamucafwa kukumanisha.—Shiku. 3:​12, 13.

10. Ino nshiinshi shakacitikila Usiya?

¹⁰ Nsheenga mweeya kushintu shitabete kabotu Usiya nshaakasalawo kucita. Mwaami Usiya wakalinga washibila kulwiita bantu shakucita. Mpashi ici cakamupa kunoyeeya ayi inga wacita cintu cili coonse ncaasuni. Bumwi bushiku, Usiya wakenjila mutempele yakwe Yehova kwaamba ayi ateente tunukila kabotu pacipaililo, sombi uyu tawakalinga mukuli wabamaami. (2 Maka. 26:​16-18) Asaliya mupailishi munene ndyakeelesha kumululika, Usiya wakakalala abuumbi. Cakabicako ncakwaamba ayi, Usiya taakwe kutolelela kushomeka alimwi Yehova wakapa kwaamba ayi aciswe bulwashi bwa manata. (2 Maka. 26:​19-21) Ishi naakwiinga tashikwe kumucitikilawo naakwiinga wakatolelela kuliceesha!

11. Ino nshiinshi sheenga shatucafwa kutolelela kuliceesha? (Amubone acikope.)

¹¹ Usiya ndyakaba ankusu pabwaami, wakacileka kulumba Yehova pashintu shoonse shibotu shakamucitila. Ino nciiyo nshi ncotutokwiiyako? Tulyeelete kunokwiibaluka ayi Yehova ngotupa shintu shoonse shibotu nshotucite alimwi amikuli njetucite muncito yakwe. Muciindi cakulisumpula pashintu nshotwakacita, tulyeelete kulumba Yehova pashintu nshetucikonsha kukumanisha.b (1 Koli. 4:7) Tulyeelete kuliceesha akushiba ayi tatumaninite alimwi tulayandika kululikwa. Mukwesu umwi ucite myaaka pafwiifwi a 60 wakalemba ayi: “Ndakeeya ayi nsheelete kukalala nabi kulefuka na bamwi babona shintu shimwi nshentaciti kabotu. Na ndalulikwa pacintu cimwi citabete kabotu nceenga ndaciita, ndeelesha kusebenselawo akutolelela kucita nsheenga ndacikonsha muncito yakwe Yehova.” Cancine ncakwaamba ayi na katunyumfwila Yehova akutolelela kuliceesha, tulaakuba alusangalalo lwancinencine mubuumi.—Tus. 22:4.

AMUTOLELELE KUYUMYA BUSHICIBUSA BWANU A YEHOVA

12. Ino nshiinshi Josiya nshaakacita ndyaakalinga mwanike shakatondesha ayi wakalinga kusuni kutolelela kuba abushicibusa buyumu a Yehova? (2 Makani 34:​1-3)

¹² Nsheenga mweeya kushintu shili kabotu Josiya nshaakasalawo kucita. Josiya wakalinga kucite myaaka 16 ndyaakatalika kweelesha kuyumya bushicibusa bwakwe a Yehova. Wakalinga kusuni kwiiya pali Yehova akucita kuyanda kwakwe. Nacibi boobo, ici tacakalinga cuubu ku mwaami uyu wacanike. Paciindi ici, bantu baanji bakalinga kulambila balesa bakubeca, aboobo Josiya wakalinga kuyandika kutondesha kutaloonda kwaamba ayi akashe bantu kulambila shibumbwabumbwa. Alimwi wakacikonsha kutondesha kutaloonda! Josiya kaatana kuba amyaaka 20 wakatalika kukusha kulambila kwakubeca pakati kabantu bakwe Lesa.—Amubelenge 2 Makani 34:​1-3.

13. Ino kusalawo kwaaba buumi bwanu kuli Yehova kulaakukuma buyani shintu nsheshi mukanoocita mubuumi bwanu?

¹³ Nabi kwaamba ayi muli banike abuumbi, inga mwakonkela cakubonenaako cakwe Josiya kwiinda mukwiiya shiinji pali Yehova apa mibo ibotu njacite. Kucita boobo kulaakupa kwaamba ayi musalewo kwaaba buumi bwanu kuli nguwe. Ino kwaaba buumi bwanu kuli Yehova kulaakukuma buyani shintu nsheshi mukanoocita mubuumi bwanu? Luke uyo wakabombekwa kaacite myaka 14, wakaamba ayi, “Kuswa sunu, ndanoobika panembo kusebensela Yehova mubuumi bwangu alimwi akweelesha kucita shimusangalasha.” (Maako 12:30) Mulaakucana shoolwe shiinji abuumbi na amwebo mukasaleewo kwaaba buumi bwanu kuli Yehova!

14. Amwaambe shakubonenaako shitondesha bacanike bamwi mbobatokonkela cakubonenaako ca Mwaami Josiya.

¹⁴ Ino ngamapensho nshi amwi basebenshi bakwe Yehova bacanike ngeenga bacana? Johan uyo wakabombekwa kaacite myaaka 12, wakaamba ayi beshicikolonyina bakalinga kumukakatisha kufweba kusebensesha kamashini. Kwaamba ayi acikoonshe kukaka bweelesho ubu, Johan alatolelela kwiibaluka ayi kufweba inga kwanyonyoola buumi bwakwe alimwi abushicibusa bwakwe a Yehova. Rachel uyo wakabombekwa kaacite myaaka 14, wakaamba shimucafwa kukoma meelesho ngaacana kucikolo. Wakalemba ayi: “Ndeelesha kuyeeya pashintu sheenga shanjibalusha pamakani amu Baibo apali Yehova. Kucakubonenaako, na kucikolo tutokwiiya pamakani amwi aamba pashintu shakacitika kale kale, ndayeeya pamakani amwi amu Baibo na bushinshimi. Lyalo cimwi ciindi na ntobandika aumwi kucikolo, ndayeeya palilembo ndyeenga ndamulwiitako.” Mpashi mapensho ngeenga mwacaana inga apusana aayo Josiya ngaakacana. Sombi inga mwasalawo kucita shintu shili kabotu akutolelela kushomeka bweenka lakwe mbwaakacita. Kukoma meelesho ngomutokwiindaamo pacecino ciindi ndyemucili bacanike, kulaakumucafwa kukoma meelesho ngeshi mukeendeemo kunembo.

15. Ino nciinshi cakacafwa Josiya kutolelela kusebensela Yehova cakushomeka? (2 Makani 34:​14, 18-21)

¹⁵ Mwaami Josiya ndyaakalinga kucite myaaka 26, wakatalika ncito yakubamba tempele. Paciindi tempele ndyeyakalinga kubambwa, bakacana ‘libuku lya Milawo yakwe Yehova’ iyo njaakapa bantu bakwe kwiinda muli Mose. Mwaami ndyaakanyumfwa milawo yakalinga kulembetwe mulibuku ilyo, peenkaapo wakasala kukonkela shakalinga kulembetweemo. (Amubelenge 2 Makani 34:​14, 18-21.) Sa inga mwasuna kunobelenga Baibo lyoonse? Mpashi mwakatalika kale kweelesha kubelenga Baibo bushiku abushiku. Sa mutosangalala kucita boobo? Sa mulabikila maano ku mavesi eenga amucafwa palwaanu? Luke ngotwalinga twaambaawo, alalemba mulibuku shiteente shimwi shisangalasha nsheenga wacana. Mpashi kucita boobo amwebo inga kwamucafwa kunokwiibaluka mavesi amwi, na shiiyo nsheenga mweeya kuswa ku mavesi ayo. Kwiiya shiinji pamakani amu Baibo alimwi akusuna nshoyaamba, kulaakumucafwa kusunishisha kusebensela Yehova. Alimwi bweenka Maswi akwe Lesa mbwaakacafwa Josiya kutolelela kucita shintu shiluleme, amwebo alaakumucafwa.

16. Ino nciinshi cakapa kwaamba Josiya acite cilubo cinene alimwi ino nciinshi ncotutokwiiyaako?

¹⁶ Nsheenga mweeya kucintu citabete kabotu Josiya ncaakasalawo kucita. Josiya ndyaakalinga kucite myaaka pafwiifwi a 39, wakacita cilubo cakapa kwaamba ayi acaikwe. Wakacinka manungo mumaano akwe, muciindi cakusenga butanjilishi kuli Yehova. (2 Maka. 35:​20-25) Ino tutokwiiyako nshi? Tacicite mulandu amyaaka njetucite na kufula kwamyaaka njotwabelenga Baibo, tulyeelete kutolelela kuyumya bushicibusa bwesu a Yehova. Ici cileelikaawo kupaila lyoonse kusenga butanjilishi kuli nguwe, kwiiya Maswi akwe, alimwi akusenga kululikwa kuswa ku Beneklistu bashimpite lwakumushimu. Na katucita boobo, mpashi teshi tukacite shilubo shinene alimwi inga twaba alusangalalo abuumbi.—Jemu. 1:25.

NOBACANIKE—INGA MWABA ALUSANGALALO MUBUUMI BWANU

17. Ino nshiiyo nshi shiyandika nshotweeya ku bamaami botatwe ba baJuda?

¹⁷ Kuli shintu shiinji shisangalasha nsheenga mwaciita ndyemucili bacanike. Makani aamba pali Joashi, Usiya, alimwi Josiya alatondesha ayi bacanike inga basalawo kucita shintu shili kabotu akusangalasha Yehova. Kweelana ambotweeya, cimwi ciindi inga twaalilwa kusalawo kucita shintu shili kabotu. Nacibi boobo, inga twasalawo kucita shintu shibotu bamaami aba nshobakacita lyalo akuleya kucita shilubo nshobakacita. Na twacita boobo inga twaba alusangalalo mubuumi bwesu.

18. Ino nshakubonenaako nshi shamu Baibo shitondesha ayi inga mwaba alusangalalo mubuumi bwanu? (Amubone acikope.)

¹⁸ Mu Baibo muli makani aamwi aamba pacanike bamwi bakalinga kucite bushicibusa buyumu a Yehova, bakalinga kucafwikwa kuli nguwe alimwi bakalinga kucite lusangalalo mubuumi bwabo. Defedi ngomwi pabacanike bakalinga kucite bushicibusa buyumu a Yehova. Ndyaakalinga wacanike, wakasalawo kuba abushicibusa a Lesa alimwi mukuya kwaciindi wakesa mukuba mwaami. Nabi kwaamba ayi paciindi cimwi alakwe wakacita shilubo, Lesa wakalinga kumubona ayi ngumusankwa ushomeka. (1 Baam. 3:6; 9:​4, 5; 14:8) Na mweeya pali Defedi, cakubonenaako cakwe cilaakumuyuminisha kusebensela Yehova cakushomeka. Na mpashi inga mwasalawo kwiiya shiinji pacakubonenaako cakwe Maako a Timoti. Bakatalika kusebensela Yehova ndyebakalinga bacanike abuumbi alimwi bakatolelela kumusebensela cakushomeka. Yehova wakalinga kusangalete ceebo cakwaamba ayi bakasalawo kumusebensela alimwi abalo beene bakalinga kusangalete.

19. Ino nshomusalawo kucita pacecino ciindi inga shakuma buyani buumi bwanu mbweshi bukabe kunembo?

¹⁹ Shintu nshomusalawo kucita pacecino ciindi inga shakuma buumi bwanu mbweshi bukabe kunembo. Na munocinka manungo muli Yehova kuteshi mumaano anu akunyumfwisha shintu, alaakunoomucafwa kusala kucita shintu shili kabotu. (Tus. 20:24) Inga mwaba alusangalalo mubuumi bwanu akucana shoolwe shiinji. Munokwiibaluka ayi Yehova alalumba pashintu nshomumucitila. Takuuwo cintu cibotu nceenga mwasalawo kucita mubuumi bwanu, kwiinda kusebensela Ishiwesu wakwiculu shilusuno, Yehova.