Timoseewo Yali Ayagala Okuyamba Abantu

Timoseewo yali muvubuka eyali ayagala ennyo okuyamba abantu. Yatambula mu bifo bingi okuyamba abantu. Ekyo kyamuyamba okufuna essanyu mu bulamu. Wandyagadde okumanya ebisingawo ebikwata ku Timoseewo?—

Timoseewo yakulira mu kibuga ekiyitibwa Lusitula. Bwe yali akyali muto, jjajjaawe Looyi ne maama we Ewuniike, baatandika okumuyigiriza ebikwata ku Yakuwa. Bwe yakula, yayagala nnyo okuyamba abantu okuyiga ebikwata ku Yakuwa.

Timoseewo bwe yali akyali muvubuka, Pawulo yamusaba agende naye babuulire mu bifo ebirala. Yakkiriza! Yali mwetegefu okugenda okuyamba abalala.

Timoseewo yagenda ne Pawulo mu kibuga ky’omu Makedoni ekiyitibwa Ssessalonika. Okusobola okutuukayo baasooka kutambuza bigere olugendo oluwerako, n’oluvannyuma ne balinnya eryato. Bwe baatuukayo baayamba abantu bangi okuyiga ebikwata ku Yakuwa. Naye abantu abamu baabakambuwalira era ne bagezaako okubatuusaako akabi. Pawulo ne Timoseewo baava mu kibuga ekyo ne bagenda ne babuulira mu bitundu ebirala.

Nga wayiseewo emyezi egiwerako, Pawulo yagamba Timoseewo addeyo e Ssessalonika alabe ab’oluganda bwe bali. Okusobola okuddayo mu kibuga ekyo kyali kyetaagisa obuvumu. Naye Timoseewo yaddayo olw’okuba yali afaayo ku b’oluganda. Yaleetera Pawulo amawulire amalungi n’amugamba nti ab’oluganda mu Ssessalonika baali baweereza Yakuwa n’obwesigwa!

Timoseewo yakolera wamu ne Pawulo okumala emyaka mingi. Lumu Pawulo yawandiika nti Timoseewo ye muntu gwe yali asinga okwesiga era gwe yali asobola okusindika okuyamba ebibiina. Timoseewo yali ayagala nnyo Yakuwa era ng’ayagala nnyo n’abantu.

Naawe oyagala nnyo abantu era oyagala okubayamba okuyiga ebikwata ku Yakuwa?— Bwe kiba kityo, ojja kufuna essanyu mu bulamu nga Timoseewo.