Ha pa 5 maˬ

Yaˇ Yaˬhoˉvaˬ htaꞈ haꞈ tuˬ awˬ pa awˬ e hkʼaˬ hkʼe te gʼa ve le? Maˍnawˍ hkʼa shuˍ, Yaˬhoˉvaˬ ga laˇ tuˬ bon lawˬ sheˍ. Chi hkʼoˆ kaꞈ, daꞈ ve henˇ yuˬ tuˬ te sheˍ. Awˬ pa awˬ e kʼoˆ maˍ ve a yeˇ uiˍ jaˇ. Yaꞈ hkʼaˇ, te maˍ ve yaˇ mawˬ ve kʼo awˬ bon gʼa jaˇ. Yoˇsehꞈ leh Maˍriˆ yaˇ henˇ yuˬ tuˬ daꞈ jaˇ ve tehꞈ ngaˬ hui yonˍ gʼa ve yoˬ. Yeˍsuˆ kaꞈ henˇ yuˬ ve yoˬ. Yoˇsehꞈ yehˬ kʼa gʼa caˇ tuˬ kanˉ te hkeuꞈ jaˇ, yaˇ Yaˬhoˉvaˬ ve kanˉ te leh yawˇ htaꞈ oˉ kʼoˍ pui tuˬ kaꞈ maˍ piˇ ve yoˬ. (Bon 4:9, 10) Yawˇ Yeˍruˆsaˍlehnˍ venˇ lo “teˇ hkʼawꞈ le le” Paˍsaˍhkaˍ pawehˇ te tuˬ yehˬ kʼa hkʼaw ve chaw htaꞈ shiˍ kʼai ve yoˬ. (Luˉ 2:41, 42) Oˇ htaˇ teˇ co˗e ve awˬ pa teˇ hpaˍ yehˬ kʼa hkʼaw ve chaw htaꞈ shiˍ kʼai htaˇ, hpu peuˬ leh awˬ yanˇ shonˇ jaˇ tehꞈ dawˇ ve yoˬ. Yaꞈ hkʼaˇ, Yoˇsehꞈ Gʼuiˬ sha htaꞈ oˉ kʼoˍ pui ve a yeˇ uiˍ jaˇ tehꞈ yaˇ htaꞈ maˍ piˇ ve yoˬ. Maˍriˆ kaꞈ Liꞈ hpu hkʼaw ve awˬ lawn hkʼa dehꞈ shiˍ ve yoˬ. Yawˇ kʼoˆ ve leh te ve yaˇ Gʼuiˬ sha ve tawˇ hkawˇ htaꞈ haꞈ tuˬ maˍ piˇ ve tehꞈ ngaˬ hui yonˍ gʼa ve yoˬ. w19.12 24-25 ¶9-12

Yaˬhoˉvaˬ yawˇ ve yehˬ kʼa miˬ guiˬ hkʼoˆ lo ve shoꞈ shaꞈ ve awˉ lawˉ teˇ pawˆ gu piˇ htaˇ, Yaˬhoˉvaˬ ngaˬ hui htaꞈ haꞈ ve tehꞈ hkʼa tawˍ lehˆ gʼa mawˬ ve yoˬ. Aˍdanˍ mvuhˇ naw ma hkʼoˆ Awˬ pa hkawˇ maˇ na htaˇ, yawˇ leh yawˇ ve awˬ yaˇ awˬ duˬ Gʼuiˬ sha ve yehˬ kʼa ha lehˬ ve hkʼaw maˇ kʼawꞈ gʼa chehˇ. (Roˉ 5:12) Yaꞈ hkʼaˇ, Aˍdanˍ ve awˬ yaˇ awˬ duˬ htaꞈ ga piˇ tuˬ Yaˬhoˉvaˬ teˇ ceuˬ ceuˬ te ve yoˬ. Yaˬhoˉvaˬ Aˍdanˍ htaꞈ ciˍ yanˍ piˇ ve htawˇ, yawˇ ve awˬ yaˇ awˬ duˬ htaꞈ dawˇ law kuiˬ maˇ cawˬ leh chiˇ baˬ piˇ taˍ ve maˇ heˆ. Aˍdanˍ Yaˬhoˉvaˬ htaꞈ hpfuhˆ peuˬ hkʼawꞈ nawˉ, na yuˬ ve chaw teˇ gʼaˇ le le yawˇ ve yehˬ kʼa hkʼaw gʼa kʼawꞈ chehˇ tuˬ tehꞈ ka tiꞈ laꞈ haˆ te ve yoˬ. (Awˬ 3:15; Roˉ 8:20, 21) Yaˬhoˉvaˬ ka tiꞈ htaꞈ gʼaꞈ te ve pa taw, yawˇ haꞈ jaˇ ve Yaˇ paˍ ngaˬ hui htaꞈ htaiˍ hkʼawꞈ laˇ tcuh ve yoˬ. Chi ve htaꞈ nyi ve teˇ yanˇ, Yaˬhoˉvaˬ ngaˬ hui htaꞈ haꞈ jaˇ. (Yoˇ 3:16) Gʼuiˬ sha lehˬ teˇ gʼaˇ le le cawˬ gaˇ ve Awˬ pa hpehꞈ ve yoˬ. Gʼuiˬ sha ngaˬ hui ve bon lawˬ hkawˇ na laˇ ve, a shaꞈ teꞈ kuiˬ hkʼaw loˍ ve awˬ ceuˬ ga laˇ ve, yawˇ geh meuˆ daꞈ tcuh laˇ ve, maˍ leh hkʼaˬ htaˆ kaꞈ ga laˇ ve, leh awˬ gʼuˇ suhˍ hpawˇ daꞈ jaˇ ve gu teh taˍ laˇ tuˬ yoˬ. Mvuhˇ naw ma hkʼoˆ ve Awˬ pa ngaˬ hui htaꞈ haꞈ leh a yeˇ yuˬ laˇ ve tehꞈ shiˍ htaˇ, nyi ma sha jaˇ. w20.02 6 ¶16-17; 7 ¶20

Nawˬ dawˇ haˍ dawˇ hkiˉ jaw˗aw laˇ? Shu kʼoˆ ve leh te ve htaꞈ pa taw, nawˬ dawˇ haˍ dawˇ hkiˉ ve yoˬ hehˉ. Nawˬ kʼoˆ ve leh te ve htaꞈ cawˬ ve yoˬ. Tawˇ pa haˉ te kʼo, nawˬ te yaꞈ leh Yaˬhoˉvaˬ nawˬ htaꞈ venˇ baˆ maˇ hpehꞈ laˇ taˍ tehꞈ dawˇ haˍ ve yoˬ hehˉ. Nawˬ dawˇ haˍ dawˇ hkiˉ jaˇ htaˇ, nawˬ yonˍ ve maˇ cawˬ leh maˇ daꞈ ve chaw hpehꞈ ve tehꞈ dawˇ la ve yoˬ. Yaꞈ hkʼaˇ, awˬ tehˬ awˬ na chi hkʼe hpehꞈ aw˗laˇ? Liꞈ hpu hkʼaw ve awˬ lawn teˇ hpaˍ htaꞈ teˇ geh nyi sheˍ. Tcuh kaˍ paˍ Saˍmo˗eˍlaˆ ve awˬ e Haˍnaˆ yonˍ yeˬ jaˇ. Yaꞈ hkʼaˇ, yawˇ ve yehˬ kʼa hkʼaw ve chaw yawˇ htaꞈ maˇ daꞈ ve te piˇ ve pa taw, yawˇ dawˇ haˍ jaˇ. (1 Saˍ 1:7) Tcuh yaˇ Pawˇluꞈ yonˍ yeˬ jaˇ. Yaꞈ hkʼaˇ, yawˇ ve nyi ma hkʼaw “Hkriꞈ yaˇ awˬ moˍ hkʼa peu˗eˬ awˬ pon dawˇ haˍ dawˇ hkiˉ” ve yoˬ. (2 Kawˇ 11:28) Jawˇmawˇ Daˍviˆ yonˍ yeˬ jaˇ leh Yaˬhoˉvaˬ kaꞈ yawˇ htaꞈ haꞈ leh nyi hkʼaˇ suh jaˇ. (Tcuh 13:22) Yaꞈ hkʼaˇ, Daˍviˆ venˇ baˆ uiˍ jaˇ ve htaꞈ te yaꞈ leh yawˇ dawˇ haˍ jaˇ. (Chiˇ 38:4) Yaˬhoˉvaˬ ve kanˉ te ve chaw 3 gʼaˇ nyi ma sha la tuˬ yawˇ ga piˇ ve yoˬ. w20.02 20 ¶1-2

Awˬ to chiˇ aꞈ ve lehˬ Yaˬhoˉvaˬ ve kanˉ hkʼaˬ htaˆ kaꞈ te tuˬ yoˬ tehꞈ nyi ma awˬ tawˬ hkʼa gaˬ bon lawˬ ve yoˬ. Nawˬ Gʼuiˬ sha htaꞈ awˬ to chiˇ aꞈ piˇ htaˇ, nawˬ kaꞈ a shu yawˇ ve a loˍ htaꞈ maˇ te˗o. Awˬ to chiˇ aꞈ piˇ leh nawˬ Yaˬhoˉvaˬ ve chaw gʼa hpehꞈ ve daꞈ jaˇ. (Roˉ 14:8) Chi teˇ hkui kaꞈ tanˬ leh nawˬ a shaꞈ teꞈ kuiˬ hkʼaw Yaˬhoˉvaˬ ve kanˉ te leh a shu yawˇ ve a loˍ htaꞈ maˇ te˗o tehꞈ nawˬ Yaˬhoˉvaˬ htaꞈ kʼoˆ piˇ ve yoˬ. Nawˬ awˬ to chiˇ aꞈ piˇ ve lehˬ Gʼuiˬ sha geh hkanˍ leh ka tiꞈ te ve yoˬ. Gʼuiˬ sha ngaˬ hui htaꞈ hkanˍ tuˬ maˇ nyiˉ laˇ ve htawˇ, yawˇ geh hkanˍ˗oˬ ve kʼo, gʼaꞈ te tuˬ tehꞈ yawˇ dawˇ law ve yoˬ. (Chiˇ 116:12, 14) Awˬ to chiˇ aꞈ ve lehˬ nawˬ leh Yaˬhoˉvaˬ ve awˬ lawn hpehꞈ leh teˇ gʼaˇ˗ehꞈ kaꞈ maˇ shiˍ. Baˆtiˆsaˬ haꞈ yuˬ ve lehˬ shu mehˆ gʼuˇ suhˍ gʼa haꞈ yuˬ ve yoˬ. Baˆtiˆsaˬ haꞈ yuˬ ve lehˬ hpawnˬ daꞈ lonˉ 1 nyi maˇ heˆ leh hpawnˬ daꞈ lonˉ 3 nyi htaˇ yoˬ. Baˆtiˆsaˬ haꞈ yuˬ htaˇ, nawˬ Yaˬhoˉvaˬ htaꞈ awˬ to chiˇ aꞈ piˇ˗oˬ ve tehꞈ shu htaꞈ shiˍ tcuh ve yoˬ. Nawˬ Yaˬhoˉvaˬ Gʼuiˬ sha htaꞈ nyi ma awˬ tawˬ hkʼa gaˬ gʼa haꞈ ve, nawˬ ve co ha, nawˬ ve dawˇ hkʼaˇ leh nawˬ ve awˬ gʼaˇ awˬ shaˉ hkʼa peu˗eˬ Yaˬhoˉvaˬ ve kanˉ te tuˬ shu htaꞈ shiˍ tcuh sheˍ.—Mk 12:30. w20.03 9 ¶4-5

Yaˬhoˉvaˬ hkʼaˬ hkʼe hpehꞈ ve, chaw yaˇ leunˇ˗e tuˬ Saˍtanˍ te piˇ ve yoˬ. Yeˍsuˆ ve awˬ laꞈ gʼawˇ awˬ leh meuˇ teˇ gʼaˇ suh peuˬ hkʼawꞈ nawˉ, chaw teˇ hpaˍ hpaˍ Hkriꞈ yaˇ hpehꞈ ve tehꞈ kʼoˆ leh maˇ heˆ heˆ ve tanˬ maˍ ve yoˬ. (Tcuh 20:29, 30) Yaˬhoˉvaˬ ve kenˉ hkʼaˇ htaꞈ tawˍ daꞈ ve chaw teˇ hpaˍ lehˬ, chaw yaˇ awˬ tehˬ ve Gʼuiˬ sha htaꞈ maˇ shiˍ tuˬ te piˇ ve yoˬ. Tawˇ pa haˉ te kʼo, yawˇ hui Liꞈ hpu hkʼaw Gʼuiˬ sha ve awˬ meh htaꞈ maˇ yehˇ˗oˬ leh yawˇ ve awˬ meh awˬ tan “Jawˇmawˇ” tehꞈ yehˇ ve yoˬ. Chi hkʼe te ve lehˬ, Liꞈ hpu gʼaw ve chaw teˇ hpaˍ Yaˬhoˉvaˬ lehˬ “Jawˇmawˇ teˇ hpaˍ” htaꞈ hkʼaˬ hkʼe peun daꞈ ve maˇ nyi mawˬ tuˬ yawˇ hui te piˇ ve yoˬ. (1 Kawˇ 8:5) Yawˇ hui Yaˬhoˉvaˬ leh Yeˍsuˆ htaꞈ kaꞈ “Jawˇmawˇ” tehꞈ kʼoˆ ve yoˬ. Chi htaꞈ pa taw Yaˬhoˉvaˬ leh yawˇ ve Yaˇ paˍ teˇ gʼaˇ tiˉ maˇ heˆ ve htaꞈ chaw yaˇ shiˍ tuˬ haˍ jaˇ. (Yoˇ 17:3) Chi htawˇ dawˇ nawˬ dawˇ cawˬ la leh 3 gʼaˇ teˇ to tiˉ maˍ ve cawˬ la ve yoˬ. Maˍ ve chi Liꞈ hpu hkʼaw maˇ cawˬ. Chi htaꞈ pa taw laiˉ gʼaˇ dawˇ ve Gʼuiˬ sha lehˬ yawˇ htaꞈ maˇ shiˍ tuˬ te laˇ leh yawˇ hui Gʼuiˬ sha htaꞈ maˇ shiˍ gʼa. Chi lehˬ heˍ puiˉ jaˇ!—Tcuh 17:27. w19.06 5 ¶11

Ngaˬ hui Gʼuiˬ sha ve kanˉ biˇ la htaˇ hkʼa gaˬ te ve awˬ hkʼaˇ teˇ hkʼaˇ lehˬ coˇ caˇ leh hto toˇ puiˉ la tuˬ te ve yoˬ. (Tawˇ 1:5; 1 Tiˆ 4:13, 15) Yaˬhoˉvaˬ geh kanˉ “teˇ geh” gʼa te ve lehˬ daꞈ jaˇ ve awˬ vuiˬ hpehꞈ ve yoˬ! (1 Kawˇ 3:9) Aˬ htoꞈ ma a yeˇ uiˍ ve awˉ lawˉ nawˬ shiˍ leh, a shaꞈ teꞈ kuiˬ hkʼaw Gʼuiˬ sha ve kanˉ te ve a yeˇ uiˍ jaˇ tehꞈ nawˬ shawˍ ve kʼo, Yaˬhoˉvaˬ htaꞈ oˉ kʼoˍ pui ve ha lehˬ jaˇ tuˬ yoˬ. (Hpi 1:10; Chiˇ 100:2) Nawˬ Gʼuiˬ sha ve kanˉ te ve chaw hpehꞈ ve kʼo, shoꞈ shaꞈ ve gʼa hpuˇ ve htawˇ te gʼa ve hkʼe ceh te leh, nawˬ Gʼuiˬ sha ve kanˉ biˇ la htaˇ hkʼa gaˬ te gʼa tuˬ nawˬ loˍ ve hkʼe Gʼuiˬ sha ga laˇ tuˬ yoˬ tehꞈ yonˍ gʼa ve yoˬ. (2 Kawˇ 4:1, 7; 6:4) Nawˬ hkʼa dehꞈ hto toˇ maˇ gʼa ve htawˇ, nawˬ nyi ma awˬ tawˬ hkʼa gaˬ te ve kʼo “ha lehˬ tuˬ yoˬ.” (Gaˍ 6:4) Nawˬ Gʼuiˬ sha ve kanˉ biˇ la htaˇ hkʼa gaˬ te ve kʼo, Yaˬhoˉvaˬ leh awˬ chawˇ awˬ paˆ htaꞈ haꞈ ve tehꞈ hpeuꞈ maw piˇ ve yoˬ. “Nawˬ awˬ to htaꞈ maˇ kʼoˆ, nawˬ ve hkawˇ htaꞈ gʼa kaˇ ve chaw teˇ hpaˍ htaꞈ maˇ kʼoˆ, nawˬ htaiˍ hkʼawꞈ piˇ tuˬ yoˬ.”—1 Tiˆ 4:16. w19.04 6 ¶15; 7 ¶17

Saˍtanˍ leh yawˇ ve awˬ laꞈ gʼawˇ hui, chaw yaˇ htaꞈ heˍ ve teˇ hkʼaˇ lehˬ neˇ teˇ hpaˍ htaꞈ caˉ daꞈ ve awˬ hkʼaˇ yoˬ. Neˇ teˇ hpaˍ htaꞈ caˉ daꞈ ve chaw lehˬ chaw yaˇ maˇ shiˍ leh te maˇ gʼa ve awˬ ceuˬ yawˇ hui shiˍ leh te gʼa ve tehꞈ kʼoˆ ve yoˬ. Tawˇ pa haˉ te kʼo, teˇ hpaˍ hpaˍ kʼo awˬ gʼuˇ suhˍ hpawˇ ve awˬ lawn htaꞈ shiˍ tuˬ, awˬ hkʼawꞈ awˬ nyi leh laꞈ hkʼaˇ nyi gʼa ve tehꞈ kʼoˆ ve yoˬ. Awˬ nu ve chaw teˇ hpaˍ yawˇ hui suh peuˬ ve chaw htaꞈ tawˇ yaw daꞈ gʼa ve hkʼe te ve yoˬ. Chaw teˇ hpaˍ hpaˍ faˍ te ve, mawˉ nyi ve, leh shu htaꞈ kaꞈ hkeu piˇ ve yoˬ. 18 mvuhˇ miˬ Laˍtinˍ, Aˍmeˬriˆkaꞈ leh Kaˬriˆbiˬyanˬ hkʼaw chaˬ nyi tehˆ nyi mawˬ ve, 3 gʼaˇ ve hkʼaw 1 gʼaˇ yonˍ ve mawˉ nyi ve, faˍ te ve, maˇ heˆ leh shaˉ hpehˇ pehˍ ve awˬ tehˬ cawˬ ve tehꞈ kʼoˆ ve yoˬ. Leh suh˗oˬ ve chaw htaꞈ tawˇ yaw daꞈ gʼa ve tehꞈ chaw yaˇ teˇ pun tawˬ teˇ pun yonˍ ve yoˬ. 18 mvuhˇ miˬ hkʼaw Aˍfaˍriˆkaˆ miˬ guiˬ awˬ hawˉ hpawˇ lo kaꞈ teˇ maˬ kʼawꞈ chaˬ nyi mawˬ ve yoˬ. Oˇ kaˬ lo maˇ˗awˍ ve chaw mawˉ nyi ve awˬ tehˬ cawˬ ve tehꞈ yonˍ ve yoˬ. Ngaˬ hui hkʼaˬ kaˬ lo chehˇ ve htawˇ, neˇ teˇ hpaˍ htaꞈ shaˍ tiꞈ gʼa te ve yoˬ. w19.04 20-21 ¶3-4

Chaꞈ chiˆ ve kanˉ hkʼa peu˗eˬ htaꞈ Yaˬhoˉvaˬ canˇ jaˇ. (Chiˇ 5:4-6) Hkʼe te leh yaˇ htaꞈ pehꞈ ve tzuhˆ ve hpawˇ naˬ taweh te piˇ ve yawˇ canˇ jaˇ! Ngaˬ hui yawˇ ve Shaˉhkiˆhkanˍ ve chaw hpehꞈ ve pa taw, ngaˬ hui kaꞈ chi ve htaꞈ canˇ leh Hkriꞈ yaˇ awˬ moˍ hkʼaw maˇ hpehꞈ la tcuh gaˇ. (Roˉ 12:9) Yaˇ htaꞈ pehꞈ ve tzuhˆ ve hpawˇ naˬ taweh te piˇ ve lehˬ “Hkriꞈ ve awˬ liˇ tawˇ hkawˇ” htaꞈ maˇ hawˍ daꞈ! (Gaˍ 6:2) Yeˍsuˆ yawˇ ve awˬ liˇ tawˇ hkawˇ htaꞈ kʼoˆ maˍ leh te maˍ piˇ ve yoˬ. Awˬ liˇ tawˇ hkawˇ chi haꞈ pehnˇ ve htaꞈ cuˇ leh hkʼaˬ htaˆ kaꞈ hteˇ jaˇ cawˇ jaˇ. Awˬ tehˬ ve Hkriꞈ yaˇ awˬ liˇ tawˇ hkawˇ chi htaꞈ na yuˬ ve pa taw, yaˇ ehˉ yaˇ nehˬ shu haꞈ laˇ leh kawˆ tuˬ maˇ cawˬ tehꞈ shiˍ gʼa ve yoˬ. Yaꞈ hkʼaˇ, chi hkʼe te yaꞈ ve chaw lehˬ a shu yawˇ awˬ pon tiˉ dawˇ nyi leh, yaˇ ehˉ yaˇ nehˬ teˇ gʼaˇ˗ehꞈ kaꞈ yawˇ hui htaꞈ maˇ haꞈ laˇ leh kawˆ tuˬ cawˬ ve tehꞈ dawˇ tuˬ te piˇ ve yoˬ. Yaꞈ hkʼaˇ yaˇ htaꞈ pehꞈ ve tzuhˆ ve hpawˇ naˬ taweh te piˇ ve awˬ tehˬ ve Hkriꞈ yaˇ htawˇ gʼa hpuˇ ve yoˬ. Aˬ htoꞈ ma pa taw le? “Haiˬ ve chaw leh heˍ puiˉ ve chaw” cawˬ maˇ jaˇ leh, yawˇ hui Hkriꞈ yaˇ awˬ moˍ hkʼaw kaꞈ loꞈ la gaˇ ve pa taw yoˬ. (2 Tiˆ 3:13) Teˇ hpaˍ hpaˍ kʼo yawˇ hui awˬ viˉ awˬ nyi hpehꞈ ve htawˇ, awˬ suhˍ awˬ shaˍ hpawˇ nyi hkʼaˇ suh tuˬ te gaˇ leh oˇ hkʼe te yaꞈ ve yoˬ. w19.05 8 ¶1-3

Nyi ma luˬ chehˇ ve chaw teˇ pawˆ pawˆ kʼo bon maˇ lawˬ haˆ. Yawˇ Yaˬhoˉvaˬ geh bon maˇ lawˬ keunˍ tehꞈ dawˇ ve yoˬ hehˉ. Ngaˬ hui yawˇ htaꞈ awˬ gʼaˇ piˇ gaˇ ve kʼo, yawˇ ve awˬ meh kʼoˆ leh bon teˇ geh lawˬ gʼa ve yoˬ. Ngaˬ hui bon lawˬ htaˇ, ngaˬ hui leh Hkriꞈ yaˇ awˬ moˍ hkʼaw ve awˬ viˉ awˬ nyi yawˇ htaꞈ hkʼaˬ hkʼe taw haꞈ ve tehꞈ Yaˬhoˉvaˬ htaꞈ kʼoˆ maˍ piˇ gʼa ve yoˬ. Yawˇ Yaˬhoˉvaˬ awˬ pon awˬ hpfuhˇ hkʼaˆ jaˇ ve pa taw, yawˇ htaꞈ awˬ gʼaˇ piˇ tuˬ ngaˬ hui lawˬ gʼa ve yoˬ. Bon chi hkʼe lawˬ ve lehˬ yawˇ nyi ma sha tuˬ ga piˇ gʼa ve yoˬ. Tawˇ maˇ yaw sheˍ htaˇ kaꞈ awˉ lawˉ dawˇ nyi sheˍ. Maˇ dawˇ nyi leh yaw ve tawˇ lehˬ yawˇ htaꞈ nyi ma naˬ tuˬ te piˇ lawˬ gʼa ve yoˬ. Ha kʼaˉ ve hkʼaw yaw ve tawˇ lehˬ na˗e la piˇ gʼa ve yoˬ. (Tawˇ 12:18) Ngaˬ hui ve tawˇ hkawˇ yawˇ nyi ma sha tuˬ te piˇ leh awˬ gʼaˇ piˇ gʼa tuˬ, Yaˬhoˉvaˬ ga laˇ tuˬ bon lawˬ sheˍ. Chi hkʼoˆ kaꞈ, Yaˬhoˉvaˬ ve tawˇ hkawˇ yawˇ htaꞈ ga piˇ gʼa jaˇ tehꞈ ngaˬ hui tawnˇ taˍ cawˇ ve yoˬ. (Heˍ 4:12) Ngaˬ hui shu htaꞈ awˬ gʼaˇ piˇ htaˇ, Yaˬhoˉvaˬ haꞈ pehnˇ ve htaꞈ yawˇ dawˇ nyi tcuh gaˇ ve yoˬ. Yaˬhoˉvaˬ lehˬ hteˇ ve cawˇ ve Gʼuiˬ sha kaꞈ hpehꞈ ve yoˬ. Shu maˇ shiˍ ve htawˇ, haiˬ ve gʼa hpuˇ jaw ve teˇ gʼaˇ le le htaꞈ yawˇ shiˍ ve yoˬ. Yaˬhoˉvaˬ lehˬ hkʼa peu˗eˬ htaꞈ mawˬ leh, te yaꞈ ve chaw venˇ baˆ maˇ dawˇ hpfuhˆ ve kʼo ciˍ yanˍ piˇ tuˬ yoˬ.—Heh 14:18. w19.05 18 ¶18; 19 ¶19, 21

Ngaˬ hui Yaˬhoˉvaˬ htaꞈ oˉ kʼoˍ maˇ pui tuˬ Saˍtanˍ te tcuh gaˇ ve yoˬ. Chi hkʼe hpehꞈ tuˬ yawˇ coˇ caˇ leh ngaˬ hui ve dawˇ hkʼaˇ htaꞈ pa laˇ ve yoˬ. Ngaˬ hui ve dawˇ hkʼaˇ yawˇ uˉ peunˍ ve awˬ hawˉ lo chehˇ leh yawˇ hkʼe dawˇ tcuh gaˇ ve yoˬ. Saˍtanˍ ngaˬ hui htaꞈ heˍ leh yawˇ hkʼe te tuˬ ngaˬ hui dawˇ cawˇ ve awˬ ceuˬ htaꞈ yehˇ ve yoˬ. (Kawˇ 2:4) Saˍtanˍ heˍ ve awˬ tehˬ kawˆ tuˬ cawˬ˗aw laˇ? Cawˬ ve yoˬ! Awˬ lawn chi htaꞈ tawnˇ taˍ sheˍ. Kawˇlawˇsehˇ liꞈ 2:8 hkʼaw shaˍ tiꞈ peꞈ laˇ ve chi Pawˇluꞈ maˇ yonˍ ve chaw htaꞈ maˇ gʼa bvuhꞈ piˇ. Yaꞈ hkʼaˇ, yawˇ daꞈ kehˬ ve awˬ ha hpu leuˆ yuˬ taˍ ve Hkriꞈ yaˇ htaꞈ bvuhꞈ piˇ ve yoˬ. (Kawˇ 1:2, 5) Awˉ lawˉ peuˇ ve Hkriꞈ yaˇ shaˍ tiꞈ gʼa te leh, chi beuꞈ teˇ co˗e ngaˬ hui kaꞈ hkʼa shuˍ gʼa te ve yoˬ. (1 Kawˇ 10:12) Aˬ htoꞈ ma pa taw le? Saˍtanˍ miˬ guiˬ hkʼoˆ lo chehˇ leh Gʼuiˬ sha ve kanˉ te ve ka tiꞈ yeˬ ve chaw htaꞈ heˍ tuˬ yawˇ dawˇ teh taˍ ve yoˬ. (Hpeuꞈ 12:9, 12, 17) Chi hkʼoˆ kaꞈ “haiˬ ve chaw leh heˍ puiˉ ve chaw teˇ hpaˍ lehˬ, shaˬ te shaˬ haiˬ la tuˬ” ve awˬ yanˇ awˬ hkʼaw lo ngaˬ hui chehˇ ve yoˬ.—2 Tiˆ 3:1, 13. w19.06 2 ¶1-2

Jawˇmawˇ ma Yeˍsaˍbeˍlaˆ Eˇliˇyaꞈ htaꞈ tiˇ pehˍ tuˬ kʼoˆ piˇ htaˇ yawˇ kawˆ jaˇ. Chi htaꞈ pa taw, yawˇ Beˍraˍsheˍbaˆ venˇ lo hpaw˗e ve yoˬ. Yawˇ dawˇ haˍ jaˇ ve pa taw, “ngaˬ suh gaˇ jaˇ” tehꞈ bon lawˬ ve yoˬ. Aˬ htoꞈ ma pa taw yawˇ chi hkʼe dawˇ ve le? Eˇliˇyaꞈ maˇ biˇ ve chaw hpehꞈ leh “ngaˬ hui hkʼa shuˍ shuˍ chaw yaˇ hpehꞈ” ve yoˬ. (Yaˍ 5:17) Yawˇ dawˇ haˍ jaˇ leh heuˬ jaˇ ve pa taw, teꞈ chiˉ maˇ te gaˇ˗o ve yoˬ hehˉ. Chaw yaˇ Yaˬhoˉvaˬ htaꞈ oˉ kʼoˍ kʼawꞈ pui la tuˬ Eˇliˇyaꞈ awˬ gʼaˇ piˇ gaˇ ve yoˬ. Yaꞈ hkʼaˇ, yawˇ te ve awˬ bon teꞈ chiˉ maˇ cawˬ tehꞈ dawˇ ve yoˬ. Iˉsaˍreˍlaˆ mvuhˇ miˬ lo teꞈ chiˉ daꞈ la kuiˬ maˇ cawˬ leh yawˇ teˇ gʼaˇ ceh tiˉ Gʼuiˬ sha htaꞈ oˉ kʼoˍ pui ve tehꞈ dawˇ ve yoˬ. (1 Jawˇ 18:3, 4, 13; 19:10, 14) Yaˬhoˉvaˬ Eˇliˇyaꞈ ve dawˇ hkʼaˇ htaꞈ shiˍ ve yoˬ. Eˇliˇyaꞈ chi hkʼe dawˇ ve htawˇ Yaˬhoˉvaˬ maˇ deˇ piˇ. Yaꞈ hkʼaˇ, Eˇliˇyaꞈ awˬ gʼaˇ kʼawꞈ cawˬ la tuˬ Gʼuiˬ sha ga piˇ ve yoˬ. (1 Jawˇ 19:5-7) Peuˬ leh Eˇliˇyaꞈ dawˇ hkʼaˇ pa tuˬ, Yaˬhoˉvaˬ nuˇ nehˬ ve hkʼaw kanˇ paˆ hpeuꞈ maw piˇ ve yoˬ. Hkʼe te leh Iˉsaˍreˍlaˆ mvuhˇ miˬ hkʼaw Baˍlaˆ gʼuiˬ sha htaꞈ oˉ kʼoˍ maˇ pui ve chaw 7,000 gʼaˇ cawˬ sheˍ ve tehꞈ, Yaˬhoˉvaˬ yawˇ htaꞈ kʼoˆ piˇ ve yoˬ. (1 Jawˇ 19:11-18) Yaˬhoˉvaˬ yawˇ htaꞈ haꞈ ve tehꞈ hpeuꞈ maw piˇ ve yoˬ. w19.06 15-16 ¶5-6

Awˬ viˉ awˬ nyi hawˉ hkʼaˆ teˇ gʼaˇ, gʼaˇ va gʼa ve beˆ maˍ laˇ ve htaꞈ gʼaꞈ te ve kʼo, ngaˬ hui shoꞈ shaꞈ ve laiˉ ceuˬ maˇ gʼa hpuˇ taˬ. Tawˇ pa haˉ te kʼo, mvuhˇ miˬ teˇ maˬ ngaˬ hui ve kanˉ te tuˬ a hkaw˗anˬ maˇ peꞈ laˇ ve hkʼaw, hto toˇ˗e htaˇ liꞈ kʼoˆ teˇ hpaˍ taˇ piˇ tehꞈ awˬ viˉ awˬ nyi hawˉ hkʼaˆ awˬ vuiˬ cawˬ ve beˆ maˍ laˇ ve yoˬ. Yaꞈ hkʼaˇ, gʼuˇ suhˍ peuˍ ve hawˉ hkʼaˆ teˇ gʼaˇ yawˇ shu aꞈ kehˉ shiˍ ve tehꞈ dawˇ ve yoˬ. Hkʼe te leh yawˇ hto toˇ kuiˬ mawˬ ve chaw htaꞈ liꞈ kʼoˆ piˇ ve yoˬ. Hkʼaˬ hkʼe hpehꞈ la ve le? Yawˇ leh awˬ viˉ awˬ nyi hto toˇ kuiˬ maˇ chehˇ htaˇ hto toˇ peuˬ hkʼawꞈ nawˉ maˇ maw, taˍ nuꞈ yawˇ hui htaꞈ yuˬ kʼai leh na piˇ ve yoˬ. Yawˇ hui hto toˇ htaˇ taˍ nuꞈ awˬ hkʼaˇ suh gʼaꞈ caˆ leh yawˇ hui shu htaꞈ piˇ ve liꞈ kʼoˆ kaꞈ yuˬ gʼa ve yoˬ. Chi ngaˬ hui htaꞈ aˬ htoꞈ ma maˍ laˇ ve le? Ngaˬ hui maˇ dawˇ cawˇ ve htawˇ beˆ maˍ laˇ ve htaꞈ gʼa gʼaꞈ te ve yoˬ. Yaˬhoˉvaˬ leuˆ yuˬ leh ngaˬ hui htaꞈ shehˍ kʼai tcuh laˇ ve awˬ viˉ awˬ nyi hawˉ hkʼaˆ hkawˇ na yuˬ ve kʼo, yawˇ awˬ bon naꞈ laˇ tuˬ yoˬ.—Heˍ 13:7, 17. w19.07 12 ¶17

Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ ve awˬ laꞈ gʼawˇ hpehꞈ ve chaw teˇ gʼaˇ le le htaꞈ shu canˇ tuˬ yoˬ tehꞈ yawˇ kʼoˆ ve yoˬ. (Yoˇ 17:14) Chi beuꞈ hkʼa gaˬ Yaˬhoˉvaˬ htaꞈ oˉ kʼoˍ maˇ pui ve chaw lehˬ yawˇ ve chaw ka tiꞈ yeˬ ve htaꞈ fawˉ mehˍ ve yoˬ. Chi beuꞈ awˬ leh meuˇ gaˬ la paˇ neˇ ve pa taw, canˇ paˍ ngaˬ hui htaꞈ gʼaˇ hteꞈ tawˍ laˇ tuˬ yoˬ. (Maꞈ 24:9) Fawˉ mehˍ ve gʼa hpuˇ tuˬ aˬ htoꞈ ma te chi teˇ hkui kaꞈ ngaˬ hui gu hehnˇ taˍ gʼa ve le? Oˇ ve teˇ yanˇ ngaˬ hui hkʼaˬ hkʼe gʼa hpuˇ tuˬ taˇ dawˇ nyi. Chi hkʼe te ve kʼo, ngaˬ hui kawˆ tuˬ leh dawˇ haˍ ve tiˉ cawˬ tuˬ yoˬ. Fawˉ mehˍ ve maˇ gʼa hpuˇ sheˍ ve kaꞈ ngaˬ hui kawˆ jaˇ ve kʼo, Yaˬhoˉvaˬ ve kanˉ maˇ te la ve yoˬ. (Tawˇ 12:25; 17:22) Kawˆ ve lehˬ ‘canˇ paˍ neˇ haiˬ’ ve laꞈ caˉ hpehꞈ ve yoˬ. Yawˇ laꞈ caˉ chi htaꞈ yehˇ leh ngaˬ hui htaꞈ te luˬ laˇ tuˬ yoˬ. (1 Peˍ 5:8, 9) Hkʼe te leh, chi teˇ hkui ngaˬ hui Yaˬhoˉvaˬ geh meuˆ daꞈ ve a yeˇ uiˍ jaˇ ve yoˬ. w19.07 2 ¶1-3

Yeˍsuˆ teꞈ tu la peuˬ hkʼawꞈ nawˉ, awˬ laꞈ gʼawˇ hui hkʼaw pui hkʼoˆ lo laˬ tuˬ Yeˍsuˆ kʼoˆ piˇ ve yoˬ. Yawˇ hui ha lehˬ jaˇ tuˬ yoˬ. (Maꞈ 28:16) Chi lehˬ “awˬ viˉ awˬ nyi 500 gʼaˇ hpaˆ htaꞈ kaꞈ yawˇ awˬ to kʼawꞈ maw piˇ” htaˇ yoˬ hehˉ. (1 Kawˇ 15:6) Aˬ htoꞈ ma te Yeˍsuˆ yawˇ hui htaꞈ kuˬ piˇ ve le? Yawˇ hui htaꞈ ha lehˬ jaˇ ve awˬ vuiˬ piˇ tuˬ yoˬ. Yawˇ kʼoˆ ve, “nawˬ hui kʼai leh, chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o.” (Maꞈ 28:18-20) Yeˍsuˆ kʼoˆ ve htaꞈ gʼa kaˇ ve awˬ laꞈ gʼawˇ hui lehˬ, awˉ lawˉ peuˇ ve Hkriꞈ yaˇ awˬ moˍ hkʼaw ca chehˇ la ve yoˬ. Yawˇ hui ve awˬ vuiˬ lehˬ shu awˬ laꞈ gʼawˇ hpehꞈ la tuˬ ca te ve yoˬ. Chi beuꞈ teˇ co˗e Hkriꞈ yaˇ awˬ moˍ hkʼa peu˗eˬ teˇ shehnˉ kaˬ hpaˆ cawˬ leh oˇ htaˇ leh chi beuꞈ kaꞈ awˬ vuiˬ shuˍ daꞈ ve yoˬ. w19.07 14 ¶1-2

Nawˬgʼo˗eˇ mvuhˇ miˬ lo toˇ nyi shehˍ hpaˇ kʼoˆ ve, chaw teˇ gʼaˇ Gʼuiˬ sha ve awˬ lawn maˇ yaw daꞈ gaˇ ve htawˇ, awˬ paˇ awˬ kui hpehꞈ chehˇ ve kʼo, yaw daꞈ gaˇ ve yoˬ. Yawˇ yehˬ shehˍ hpaˇ htaꞈ na piˇ ve, “awˬ gʼuˇ suhˍ hpawˇ daꞈ la gʼa˗aw hehˉ laˇ? Mvuhˇ miˬ uˉ peunˍ paˍ, chaˬ nyi tehˆ nyi paˍ, leh teˇ gʼaˇ gʼaˇ ga laˇ gʼa aw˗laˇ?” Yehˬ shehˍ hpaˇ hkʼawꞈ laˇ ve htaꞈ na leh, Liꞈ hpu tawn awˬ gʼuˇ suhˉ hpawˇ caˉ daꞈ ve kʼoˆ piˇ ve yoˬ. Liꞈ hpu hkʼaw ka tiꞈ te taˍ laˇ ve, miˬ guiˬ chi co co yeˬ chehˇ leh hteˇ ve cawˇ ve chaw hui oˇ kaˬ lo co co taiˍ taiˍ gʼa chehˇ tuˬ ve htaꞈ laiˉ gʼaˇ shiˍ gaˇ ve yoˬ. (Chiˇ 37:29) Shu geh tawˇ tanˬ yaw daꞈ tuˬ laiˉ hkʼaˇ yehˇ sheˍ. Aˬ htoꞈ ma pa taw le? Teˇ gʼaˇ na gaˇ ve kʼo awˬ nu ve teˇ gʼaˇ maˇ na gaˇ. Teˇ hpaˍ kʼo, Liꞈ hpu hkʼaw ve awˬ lawn leh Gʼuiˬ sha ve awˬ lawn ngaˬ hui geh yaw daꞈ gaˇ ve yoˬ. Yaꞈ hkʼaˇ, teˇ hpaˍ kʼo awˬ nu ve awˬ lawn awˉ lawˉ gʼa yaw daꞈ sheˍ. Hkʼaˬ hkʼe hpehꞈ ve htawˇ, teˇ chaw ceuˬ le le htaꞈ ngaˬ hui tawˇ gʼa yaw daꞈ ve yoˬ. (Roˉmaꞈ 1:14-16) Cawˇ ve htaꞈ haꞈ ve chaw nyi ma hkʼaw uiˍ la mvuh la piˇ shehˍ hpaˇ Yaˬhoˉvaˬ teˇ gʼaˇ ceh tiˉ te gʼa ve yoˬ.—1 Kawˇ 3:6, 7. w19.07 22-23 ¶10-11

Yaˬhoˉvaˬ ngaˬ hui htaꞈ haꞈ ve chi, awˬ viˉ awˬ nyi htaꞈ haꞈ tuˬ te laˇ ve yoˬ. (1 Yoˇ 4:20, 21) Ngaˬ hui Yaˬhoˉvaˬ htaꞈ oˉ kʼoˍ pui leh yawˇ ve te hkʼaˇ dawˇ hkʼaˇ daꞈ ve htaꞈ henˇ yuˬ ve pa taw, awˬ viˉ awˬ nyi htaꞈ haꞈ tuˬ sha ve tehꞈ dawˇ ve yoˬ. Chi hkʼoˆ kaꞈ Yeˍsuˆ ve a shaꞈ ngaˬ hui awˬ pon tanˇ laˇ ve haꞈ pehnˇ uiˍ jaˇ ve htaꞈ henˇ yuˬ gaˇ ve yoˬ. Yaꞈ hkʼaˇ teˇ pawˆ pawˆ kʼo, ngaˬ hui htaꞈ haꞈ daꞈ kʼoˆ laˇ ve chi gʼaꞈ te tuˬ maˇ sha. Eˇvawˇdiˆ leh Suˇtuˆ nyi ma pfuhˇ jaˇ leh tcuh yaˇ Pawˇluꞈ “geh kanˉ te” ve yoˬ. Yaꞈ hkʼaˇ, yawˇ huiˉ maˬ diˇ daꞈ leh awˬ chawˇ maˇ te daꞈ˗o. Pawˇluꞈ Hpiˇliˇpiˆ venˇ hkʼaw liꞈ bvuhꞈ feu piˇ htaˇ yawˇ huiˉ maˬ kaꞈ oˇ kaˬ lo ve Hkriꞈ yaˇ awˬ moˍ hkʼaw chehˇ leh Pawˇluꞈ Eˇvawˇdiˆ leh Suˇtuˆ ve awˬ meh kaꞈ kʼoˆ leh “nyi ma hawˍ daꞈ la tuˬ” shaˍ tiꞈ piˇ ve yoˬ. (Hpi 4:2, 3) Pawˇluꞈ Hkriꞈ yaˇ awˬ moˍ hkʼa peu˗eˬ ve htaꞈ kaꞈ gʼa beˆ maˍ piˇ ve tehꞈ shiˍ leh “nawˬ hui hkʼa te ve hkʼa peu˗eˬ awˬ hkʼaw lo, hkʼanˇ ve leh tawˇ kʼawꞈ shaˬ ve teˇ ceuˬ taˇ te” tehꞈ kʼoˆ piˇ ve yoˬ.—Hpi 2:14. w19.08 9 ¶6-7

Awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ kʼawꞈ te gʼa tuˬ, Hkriꞈ yaˇ awˬ moˍ leh awˬ viˉ awˬ nyi laiˉ gʼaˇ ga piˇ ve chiˇ mvuh keunˍ cawˬ jaˇ. Awˬ gʼaˇ piˇ ve, hpu shi mawˇ jeˬ ga piˇ ve, maˇ heˆ leh yawˇ hui ve yehˬ kʼa hkʼaw ve chaw htaꞈ gʼa nyi haꞈ shaˉ piˇ ve yoˬ. Awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te ve, awˬ vuiˬ awˬ suhˉ gʼa leh nawˬ ve Hkriꞈ yaˇ awˬ moˍ hkʼaw ca chehˇ la ve kʼo, yawˇ kanˉ te ve maˇ daꞈ ve maˇ heˆ leh te yaꞈ ve pa taw, gʼa tawˆ la ve tehꞈ taˇ dawˇ. Yawˇ hui pa gʼa tuˬ ga piˇ sheˍ. Chi teˇ hkui yawˇ hui maˇ chehˇ sha leh Gʼuiˬ sha ve kanˉ hkʼa dehꞈ te maˇ gʼa ve htawˇ, yawˇ hui htaꞈ haꞈ yuˬ piˇ leh te gʼa ve awˬ ceuˬ htaꞈ chiˇ mvuh piˇ sheˍ. Nawˬ yawˇ hui htaꞈ shiˍ daꞈ maˇ la tuˬ te sheˍ. Yawˇ hui ve cuˇ yiˍ, maˍ laˇ ve, leh awˬ lawn htaꞈ henˇ yuˬ sheˍ. Awˉ lawˉ htaˇ awˬ viˉ awˬ nyi awˬ vuiˬ awˬ suhˉ gʼa ve chaw lehˬ yehˬ, kʼai kʼai laˬ laˬ ve, kanˉ, maˇ heˆ leh loˍ ve awˬ ceuˬ nawˬ ga laˇ tuˬ loˍ ve yoˬ. w19.08 23-24 ¶12-13

Gawˇgaˆ yawˇ hui ve “kanˇ paˆ” leh maꞈ yaˇ htaꞈ gʼaˇ va tuˬ yoˬ. (2 Raˍ 32:8) Ngaˬ hui Yaˬhoˉvaˬ htaꞈ gʼaˇ va tuˬ yoˬ. Mvuhˇ miˬ teˇ hpaˍ awˬ pon kʼo, kʼaˍ jaˇ tehꞈ dawˇ ve yoˬ. Aˬ htoꞈ ma te yawˇ hui chi hkʼe dawˇ ve le? Uiˍ ve Baˍbuˍlonˍ venˇ kanˇ paˆ uiˍ jaˇ ve pa taw yoˬ. Yaꞈ hkʼaˇ, “haiˬ ve to nuˇ to shaˆ” leh “awˬ hkaw teˇ chi maˬ” cawˬ ve Uiˍ ve Baˍbuˍlonˍ venˇ htaꞈ ca bawˆ la htaˇ shaˉ hoꞈ teˇ hpaˍ ga piˇ maˇ gʼa! (Hpeuꞈ 17:16) Chi htaꞈ pa taw, Gawˇgaˆ leh mvuhˇ miˬ teˇ hpaˍ ngaˬ hui htaꞈ te luˬ sha jaˇ tehꞈ dawˇ ve yoˬ. Yawˇ hui Yaˬhoˉvaˬ ve chaw htaꞈ “miˬ guiˬ hkʼoˆ lo meuˆ laˬ chehˇ ve mvuhˇ haw mvuhˇ yeˬ lonˉ hkʼa shuˍ” bawˆ la tuˬ yoˬ. Maˇ maw ve awˬ yanˇ yawˇ hui va yaw tuˬ yoˬ. Awˬ tehˬ kʼo, yawˇ hui Hpaˍrawˇ hkʼe hpehꞈ leh, Yaˬhoˉvaˬ htaꞈ bawˆ daꞈ chehˇ ve tehꞈ shiˍ la tuˬ yoˬ. (Tawˆ 14:1-4; Ysk 38:3, 4, 18, 21-23) Yeˍsuˆ leh yawˇ ve maꞈ yaˇ Yaˬhoˉvaˬ ve chaw htaꞈ haꞈ shaˉ leh Gawˇgaˆ ve awˬ moˍ hkʼa peu˗eˬ htaꞈ te luˬ piˇ tuˬ yoˬ. (Hpeuꞈ 19:11, 14, 15) Yaꞈ hkʼaˇ, Saˍtanˍ mvuhˇ miˬ teˇ hpaˍ htaꞈ heˍ piˇ leh Yaˬhoˉvaˬ ve chaw htaꞈ Aˍmaˍgeˍdonˍ hkʼaw ca bawˆ la htaˇ, Saˍtanˍ hkʼaˬ hkʼe hpehꞈ la tuˬ le? Yeˍsuˆ lehˬ neˇ haiˬ hkʼa peu˗eˬ htaꞈ miˬ kʼoˍ naˉ jaˇ ve hkʼaw baˬ keu tuˬ yoˬ. Yawˇ hui htaꞈ oˇ kaˬ lo teˇ hinˉ hkʼawꞈ haw ti tuˬ yoˬ.—Hpeuꞈ 20:1-3. w19.09 11-12 ¶14-15

Yaˬhoˉvaˬ ka tiꞈ te taˍ laˇ ve htaꞈ ngaˬ hui law chehˇ ve yoˬ. Yaꞈ hkʼaˇ, dawˇ taˍ ve hkʼe maˇ hpehꞈ la ve kʼo, ngaˬ hui ha lehˬ ve i kʼai la ve leh awˬ gʼaˇ nuˇ la gʼa ve yoˬ. (Tawˇ 13:12) Aˬ laˬ hkʼe 1914 hkʼawꞈ htaˇ, awˬ viˉ awˬ nyi teˇ hpaˍ hpaˍ chi hkʼe hpehꞈ ve yoˬ. Oˇ ve teˇ hkʼawꞈ leuˆ yuˬ taˍ ve chaw laiˉ gʼaˇ mvuhˇ naw ma hkʼoˆ gʼa taˆ˗e tuˬ dawˇ law taˍ ve yoˬ. Chi hkʼe maˇ hpehꞈ la htaˇ, ka tiꞈ yeˬ ve chaw hkʼaˬ hkʼe te ve le? Yawˇ huiˉ maˬ a shaꞈ awˬ pon gʼuiˇ ve maˇ jehˇ. Yawˇ huiˉ maˬ laꞈ shawnˍ gʼa tuˬ ceh maˇ heˆ. Hkʼaˬ htaˆ kaꞈ Gʼuiˬ sha ve a loˍ te tuˬ dawˇ nyi ve yoˬ. Yawˇ huiˉ maˬ awˬ leh hkʼa gaˬ yeunˇ hkanˍ ve hkʼaw gʼuiˇ gaˇ ve yoˬ. Yaˬhoˉvaˬ yawˇ ve awˬ meh daꞈ kehˬ tuˬ te piˇ ve, yawˇ uˉ peunˍ ve cawˇ jaˇ ve tehꞈ hpeuꞈ maw laˇ ve, leh yawˇ ka tiꞈ te taˍ ve htaꞈ hkʼa peu˗eˬ te biˇ tuˬ ve awˬ yanˇ nawˬ kaꞈ mawˬ gaˇ tuˬ yoˬ hehˉ. Yaˬhoˉvaˬ tinˍ taˍ ve awˬ yanˇ gaˬ kʼo, chi ve hkʼa peu˗eˬ hpehꞈ la tuˬ yoˬ. Awˬ yanˇ oˇ ve hkʼa gaˬ ngaˬ hui kaiˬ ve hkʼaw Yaˬhoˉvaˬ ve kanˉ te sheˍ. Dawˇ taˍ ve hkʼe maˇ hpehꞈ la ve htawˇ, awˬ gʼaˇ nuˇ tuˬ taˇ te laˇ tcuh. w19.08 4-5 ¶9-10

A shu yawˇ awˬ to htaꞈ na nyi cawˇ ve, ‘ngaˬ nuˇ nehˬ ve chaw hpehꞈ ve tehꞈ shu mawˬ˗aw laˇ? Shu a yeˇ maˇ yuˬ ve kanˉ htaꞈ te piˇ˗aw laˇ? Ngaˬ daꞈ ve tawˇ yaw leh shu htaꞈ daꞈ ve te piˇ˗aw laˇ?’ Kanˉ te kuiˬ hkʼaw cawˇ daꞈ tuˬ Yeˍsuˆ te piˇ ve yoˬ. Awˬ laꞈ gʼawˇ hui dawˇ sha gawˬ lehˍ ve cawˬ tuˬ leh yawˇ geh kanˉ teˇ geh te tuˬ kaꞈ maˍ piˇ ve yoˬ. (Luˉ 10:1, 19-21) Yawˇ yawˇ hui htaꞈ nyi ma sha tuˬ te piˇ leh na piˇ ve, yawˇ kaꞈ yawˇ hui ve dawˇ hkʼaˇ shiˍ gaˇ ve yoˬ. (Maꞈ 16:13-16) Suhˆ yeˬ hawˉ kuiˬ lo maˇ daꞈ ve mvuhˇ haw shaˉ maˇ gʼa heuˆ la leh suhˆ yeˬ uiˍ la ve hkʼa shuˍ, Yeˍsuˆ ve awˬ laꞈ gʼawˇ hui yawˇ maˍ piˇ ve awˬ ceuˬ nyi ma hkʼaw gaˬ leh kanˉ te ve hkʼaw uiˍ la mvuh la ve yoˬ. Nawˬ kaꞈ shu hkʼoˆ kanˇ paˆ cawˬ ve chaw teˇ gʼaˇ hpehꞈ˗aw laˇ? Chi hkʼe hpehꞈ ve kʼo a shu yawˇ awˬ to htaꞈ na nyi cawˇ ve, ‘ngaˬ yehˬ kʼa hkʼaw leh kanˉ te kuiˬ hkʼaw cawˇ daꞈ tuˬ te˗aw laˇ? Ngaˬ dawˇ sha gawˬ lehˍ ve cawˬ tuˬ te˗aw laˇ? Ngaˬ shu nyi ma sha tuˬ te leh ngaˬ htaꞈ na nyi laˇ gaˇ tuˬ te piˇ˗aw laˇ? Ngaˬ shu ve dawˇ hkʼaˇ htaꞈ na piˇ˗aw laˇ?’ Hpaˍriˍsehˇ hui maˍ ve awˬ ceuˬ htaꞈ shu htawˇ dawˇ nawˬ dawˇ cawˬ leh yawˇ hui hkʼe maˇ dawˇ ve chaw htaꞈ fawˉ mehˍ piˇ ve pa taw, yawˇ hui hkʼe maˇ hpehꞈ gaˇ.—Mk 3:1-6; Yoˇ 9:29-34. w19.09 20 ¶1; 23 ¶9-11

Mvuhˇ miˬ jawˇ mawˇ teˇ hpaˍ cawˇ daꞈ hawˍ daꞈ tuˬ hkʼa shuˍ kʼoˆ ve yoˬ. Yaꞈ hkʼaˇ, ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ!’ tehꞈ kʼoˆ laˇ ve chi Liꞈ hpu hkʼaw maˇ hawˍ daꞈ. Awˬ lawn kʼo, mvuhˇ miˬ uˉ peunˍ paˍ teˇ hpaˍ dawˇ sha gawˬ lehˍ ve cawˬ tuˬ te laˇ˗oˬ ve tehꞈ chaw yaˇ dawˇ tuˬ yoˬ. Yaꞈ hkʼaˇ, maˇ maw maw ve awˬ yanˇ “luˬ ve sheˆ ve teˇ ceuˬ yawˇ hui awˬ hkʼoˆ teˇ cawˬ haˉ gaˬ la tuˬ yoˬ.” (Maꞈ 24:21) Yawˇ hui hto laˇ tuˬ ve awˬ hkʼaˇ lehˬ teˇ pawˆ tiˉ maˇ heˆ leh laiˉ pawˆ hto laˇ tuˬ ve naˍ ngaˬ hui maˇ shiˍ. Yaꞈ hkʼaˇ, mvuhˇ miˬ uˉ peunˍ paˍ teˇ hpaˍ mvuhˇ miˬ gawˬ la peuˬ kʼoˆ ve htaꞈ ngaˬ hui maˇ yonˍ. Liꞈ hpu hkʼaw kʼoˆ ve, awˬ heˆ chi htaꞈ mawˬ htaˇ, “[Yaˬhoˉvaˬ] ve awˬ nyi” gaˬ la chehˇ ve tehꞈ ngaˬ hui hkʼa dehꞈ law nyi taˍ cawˇ ve yoˬ.—1 Hteˇ 5:2. w19.10 8-9 ¶3-4

Aˍmaˍgeˍdonˍ miˬ guiˬ hkʼoˆ haiˬ jaˇ ve hkʼa peu˗eˬ htaꞈ te luˬ tuˬ yoˬ. Yaꞈ hkʼaˇ, ngaˬ hui kawˆ tuˬ maˇ loˍ. Aˬ htoꞈ ma pa taw le? Chi lehˬ Yaˬhoˉvaˬ ve maꞈ hpehꞈ ve pa taw, ngaˬ hui bawˆ tuˬ maˇ loˍ. (Tawˇ 1:33; Ysk 38:18-20; Zaˍ 14:3) Yaˬhoˉvaˬ lehˬ Yeˍsuˆ Hkriꞈ htaꞈ mvuhˇ naw ma tcuh yaˇ shiˍ leh maꞈ bawˆ tcuh tuˬ yoˬ. Yeˍsuˆ, leuˆ yuˬ taˍ ve chaw, mvuhˇ naw ma tcuh yaˇ awˬ moˍ lonˉ geh pawnˇ daꞈ leh Saˍtanˍ, neˇ haiˬ leh yawˇ ve awˬ moˍ miˬ guiˬ hkʼoˆ chehˇ ve htaꞈ bawˆ tuˬ yoˬ. (Hpeuꞈ 6:2; 17:14) Yaˬhoˉvaˬ ka tiꞈ te ve, “laꞈ caˉ chi teˇ hpaˍ lehˬ, nawˬ hui htaꞈ te luˬ laˇ gʼa tuˬ ve maˇ heˆ.” (Isy 54:17) “Chaw awˬ moˍ lonˉ” ka tiꞈ yeˬ ve hkʼaw Yaˬhoˉvaˬ htaꞈ oˉ kʼoˍ pui ve “tuꞈ jaˇ hkanˍ jaˇ ve” awˬ nyi htaꞈ ponˬ tuˬ yoˬ. Peuˬ hkʼawꞈ nawˉ yawˇ hui ‘Gʼuiˬ sha ve kʼaw jaw awˬ gʼuˇ suhˍ kanˉ’ kʼawꞈ te tuˬ yoˬ. (Hpeuꞈ 7:9, 13-17) Awˬ gʼuˇ suhˍ hpawˇ ve awˬ lawn ngaˬ hui yonˍ gʼa tuˬ Liꞈ hpu hkʼaw ka tiꞈ laiˉ ceuˬ te taˍ laˇ ve yoˬ. “[Yaˬhoˉvaˬ] lehˬ, ka tiꞈ yeˬ ve chaw hui htaꞈ haꞈ shaˉ piˇ” ve tehꞈ ngaˬ hui shiˍ ve yoˬ. (Chiˇ 31:23) Oˇ ve teˇ yanˇ, Yaˬhoˉvaˬ htaꞈ haꞈ leh yawˇ htaꞈ chiˇ mvuh ve chaw yawˇ ve awˬ meh awˬ meꞈ awˬ hponˇ gʼa keunˍ ve tehꞈ hpeuꞈ maw piˇ ve ha lehˬ jaˇ tuˬ yoˬ.—Ysk 38:23. w19.10 18-19 ¶17-18

“Awˬ leh meuˇ ve awˬ nyi awˬ haˉ” gaˬ la paˇ neˇ htaˇ, ngaˬ hui shoꞈ shaꞈ ve laiˉ ceuˬ gʼa hpuˇ ve yoˬ. (2 Tiˆ 3:1) Aˍfaˍriˆkaˆ miˬ guiˬ awˬ na hpawˇ lo mehˇ keu peuˬ hkʼawꞈ nawˉ maˇ cawˇ maˇ hawˍ daꞈ leh maꞈ te daꞈ ve pa taw, oˇ kaˬ lo chehˇ ve awˬ viˉ awˬ nyi 6 ha pa hpaˆ kawˆ tuˬ maˇ gʼa heuˆ la tuˬ gʼa fanˬ taˍ ve yoˬ. Awˬ viˉ awˬ nyi tuꞈ ve hkanˍ ve chi htaꞈ ponˬ gʼa tuˬ aˬ htoꞈ ma ga piˇ ve le? Awˬ viˉ awˬ nyi kawˆ ve maˇ gʼa heuˆ la kuiˬ lo chehˇ ve, yawˇ hui htaꞈ haꞈ yuˬ piˇ ve yoˬ. Awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “tuꞈ ve hkanˍ ve awˬ yanˇ htaˇ, daꞈ ve awˬ chawˇ cawˬ leh awˬ gʼaˇ piˇ daꞈ gʼa ve pa taw ha lehˬ jaˇ.” “Uiˍ jaˇ ve tuꞈ ve hkanˍ ve” tanˬ htaˇ, ngaˬ hui htaꞈ haꞈ ve awˬ chawˇ cawˬ ve ha lehˬ jaˇ. (Hpeuꞈ 7:14) Chi teˇ hkui kaꞈ ngaˬ hui awˬ chawˇ geh gʼaˇ hteꞈ meuˆ daꞈ cawˇ ve yoˬ. (1 Peˍ 4:7, 8) Aˬ htoꞈ ma pa taw le? Canˇ paˍ heˍ leh hpaˆ daꞈ tuˬ te laˇ ve pa taw, ngaˬ hui maˇ cawˇ maˇ hawˍ daꞈ tuˬ te laˇ chehˇ ve yoˬ. Yaꞈ hkʼaˇ, ngaˬ hui haꞈ daꞈ ve yeˬ ve pa taw, te luˬ laˇ maˇ gʼa. Ngaˬ hui haꞈ daꞈ ve htaꞈ teˇ ceuˬ kaꞈ te luˬ laˇ maˇ gʼa. w19.11 2 ¶1-2; 7 ¶19

Saˍtanˍ ‘heˍ ve awˬ pa hpehꞈ’ leh Yaˬhoˉvaˬ leh awˬ viˉ awˬ nyi ve awˬ lawn Saˍtanˍ uˉ peunˍ ve awˬ hawˉ lo chehˇ ve chaw htaꞈ heˍ tcuh ve yoˬ. (Yoˇ 8:44) Tawˇ pa haˉ te kʼo, Yaˬhoˉvaˬ ve kanˉ hkʼaˇ htaꞈ tawˍ daꞈ ve chaw, Yaˬhoˉvaˬ ve kanˉ hkʼaˇ vehˆsaiˉ, TV, leh awˬ lawn sha tanˇ teˇ hpaˍ hkʼaw maˇ heˆ heˆ ve bvuhꞈ keu tcuh ve yoˬ. Chi lehˬ Saˍtanˍ ve “aˬ miˍ to chehˇ ve hkʼaˆ ce” hkʼe hpehꞈ ve yoˬ. Heˍ ve tawˇ chi hkʼe ve shu ngaˬ hui htaꞈ kʼoˆ laˇ htaˇ, hkʼaˬ hkʼe te tuˬ le? Heˍ ve chi teˇ hpaˍ htaꞈ ngaˬ hui maˇ yonˍ. Aˬ htoꞈ ma pa taw le? Ngaˬ hui Yaˬhoˉvaˬ htaꞈ yonˍ leh awˬ viˉ awˬ nyi htaꞈ gʼaˇ va ve pa taw yoˬ. Yaˬhoˉvaˬ ve kanˉ hkʼaˇ htaꞈ tawˍ daꞈ ve chaw geh maˇ caˉ daꞈ. Ngaˬ hui shiˍ gaˇ mawˬ gaˇ ve htaꞈ caˉ daꞈ ve teˇ ceuˬ kaꞈ yawˇ hui geh tawˇ gʼawˬ daꞈ tuˬ taˇ te laˇ tcuh. Nawˬ Yaˬhoˉvaˬ ve kanˉ hkʼaˇ htaꞈ tawˍ daꞈ ve chaw kʼoˆ ve hkawˇ na leh gʼawˬ daꞈ˗aw laˇ? Yaꞈ hkʼaˇ, Saˍtanˍ laꞈ caˉ laiˉ ceuˬ yehˇ leh ngaˬ hui htaꞈ te luˬ gaˇ ve pa taw, shaˍ tiꞈ gʼa te cawˇ ve yoˬ. w19.11 15 ¶8; 16 ¶11

Nawˬ te ve awˬ hkʼaˇ htaꞈ dawˇ nyi sheˍ. Ngaˬ hui te ve awˬ ceuˬ htaꞈ Yaˬhoˉvaˬ a yeˇ yuˬ ve yoˬ. Yawˇ lehˬ ngaˬ hui htaꞈ teˇ hpawˇ le le ka tiꞈ yeˬ tcuh gaˇ ve yoˬ. Chi htaꞈ pa taw, ngaˬ hui a shu yawˇ awˬ to htaꞈ ka tiꞈ gʼa yeˬ tuˬ dawˇ cheˆ˗oˬ htaˇ shu htaꞈ kaꞈ ka tiꞈ gʼa yeˬ ve yoˬ. Ngaˬ hui ka tiꞈ maˇ yeˬ ve kʼo, dawˇ teh taˍ ve htaꞈ te gʼa tuˬ haˍ jaˇ. Tawˇ pa haˉ te kʼo, yaˇ nehˬ teˇ gʼaˇ hkʼaˬ htaˆ kaꞈ gʼuˇ suhˍ peuˍ ve te tuˬ dawˇ cheˆ ve yoˬ. Yaꞈ hkʼaˇ, awˬ naˍ riˍ hkʼa biˇ te gʼa tuˬ haˍ jaˇ tehꞈ dawˇ leh Gʼuiˬ sha ve kanˉ te ve hkʼaw hkʼa dehꞈ maˇ ha lehˬ. Awˉ lawˉ htaˇ yawˇ hkʼaˬ htaˆ kaꞈ gʼuˇ suhˍ peuˍ ve te ve lehˬ Yaˬhoˉvaˬ nyi hkʼaˇ suh tcuh gaˇ ve pa taw yoˬ. Yaꞈ hkʼaˇ, awˬ tehˬ tehˬ kʼo awˬ pa awˬ e maˇ heˆ leh awˬ nu ve chaw nyi hkʼaˇ suh tcuh gaˇ ve pa taw te ve laˇ? Liꞈ hpu henˇ ve chaw teˇ gʼaˇ ve awˬ lawn htaꞈ dawˇ nyi sheˍ. Yawˇ shuˉ maˇ dawˬ tuˬ dawˇ cheˆ ve yoˬ. Yaꞈ hkʼaˇ, hkʼaˬ nyi shinˉ maˇ gaˬ sheˍ kaꞈ yawˇ kʼawꞈ dawˬ ve yoˬ. Awˬ leh meuˇ htaˇ yawˇ maˇ dawˬ˗o. Yaˬhoˉvaˬ htaꞈ haꞈ leh nyi hkʼaˇ suh tuˬ te piˇ gaˇ ve pa taw, yawˇ maˇ daꞈ ve dawˇ hkʼaˇ htaꞈ tawˍ daꞈ gʼaˇ ve yoˬ.—Kawˇ 1:10; 3:23. w19.11 27 ¶9; 29 ¶10

Tcuh yaˬ Pawˇluꞈ awˬ leh hkʼa gaˬ gʼuiˇ leh laꞈ shawnˍ gʼa tuˬ tehꞈ hkʼa dehꞈ yonˍ ve yoˬ. Yawˇ leuˆ yuˬ taˍ ve chaw hpehꞈ ve pa taw, ‘mvuhˇ naw ma lo taˆ˗e tuˬ, Gʼuiˬ sha lehˬ Yeˍsuˆ Hkriꞈ htaꞈ cuˇ leh kuˬ yuˬ ve laꞈ shawnˍ htaꞈ’ yawˇ law chehˇ ve yoˬ. Yaꞈ hkʼaˇ, laꞈ shawnˍ chi htaꞈ gʼa tuˬ, yawˇ “gʼaꞈ yuˬ tcuhˉ taˍ ve yoˬ.” (Hpi 3:14) Hpiˇliˇpiˆ Hkriꞈ yaˇ yawˇ hui ve laꞈ shawnˍ htaꞈ hkʼa dehꞈ dawˇ nyi tuˬ, Pawˇluꞈ tawˇ pa haˉ htaꞈ yehˇ leh kʼoˆ maˍ piˇ ve yoˬ. Hpiˇliˇpiˆ Hkriꞈ yaˇ mvuhˇ naw ma mvuhˇ miˬ yaˇ hpehꞈ ve tehꞈ Pawˇluꞈ tawnˇ taˍ tcuh ve yoˬ. (Hpi 3:20) Aˬ htoꞈ ma te mvuhˇ miˬ yaˇ hpehꞈ ve lehˬ a yeˇ uiˍ jaˇ ve le? Oˇ ve teˇ yanˇ, Roˉmaꞈ ve mvuhˇ miˬ yaˇ hpehꞈ ve lehˬ awˬ hpfuhˇ hkʼaˆ jaˇ. Yaꞈ hkʼaˇ, mvuhˇ naw ma mvuhˇ miˬ yaˇ hpehꞈ ve leuˆ yuˬ taˍ ve Hkriꞈ yaˇ lehˬ Roˉmaꞈ ve mvuhˇ miˬ yaˇ aꞈ kehˉ awˬ bon gʼa leh awˬ hpfuhˇ hkʼaˆ jaˇ! Chi beuꞈ teˇ co˗e, leuˆ yuˬ taˍ ve Hkriꞈ yaˇ mvuhˇ naw ma lo taˆ˗e leh co co taiˍ taiˍ chehˇ tuˬ ve laꞈ shawnˍ htaꞈ gʼaꞈ yuˬ tcuhˉ taˍ ve yoˬ. Yawˇ hui daꞈ ve henˇ yuˬ tuˬ hpehꞈ ve yoˬ. w19.08 6 ¶14-15

Iˉsaˍreˍlaˆ chaw hpehˇ piˇ ve awˬ hkʼawꞈ htaˇ, ha lehˬ ve aꞈ kehˉ chi lehˬ daꞈ jaˇ. Tawˇ pa haˉ te kʼo, hpehˇ piˇ ve awˬ hkʼawꞈ htaˇ yawˇ hui ha lehˬ ve kaꞈ awˬ ceˬ gʼa kʼawꞈ te sheˍ. Leh yawˇ hui kaꞈ gʼa suh tuˬ yoˬ. Yaꞈ hkʼaˇ, Yeˍsuˆ hpehˇ piˇ ve lehˬ co co taiˍ taiˍ awˬ bon gʼa ve yoˬ. Peˍteˍkoˆteˍ awˬ nyi 33 hkʼawꞈ htaˇ, Yaˬhoˉvaˬ lehˬ tcuh yaˇ leh ka tiꞈ yeˬ ve hawˉ hkʼaˆ yaˇ miˇ laiˉ gʼaˇ htaꞈ daꞈ kehˬ ve awˬ ha hpu htaꞈ cuˇ leh leuˆ yuˬ ve yoˬ. Yawˇ hui Gʼuiˬ sha ve yaˇ hpehꞈ ve pa taw, mvuhˇ naw ma hkʼoˆ teꞈ tu˗e leh Yeˍsuˆ geh teˇ geh uˉ peunˍ tuˬ yoˬ. (Roˉ 8:2, 15-17) Naˍzaˍrehˆ venˇ Yuˇdaꞈ chaw hpawnˬ daꞈ kuiˬ hkʼaw hpehˇ piˇ ve htaꞈ gʼa ve awˉ lawˉ teˇ moˍ htaꞈ Yeˍsuˆ kʼoˆ ve yoˬ. Bon awˬ hoˉ maˍ ve leh yawˇ hui ve awˬ liˇ awˬ hkʼaˇ Liꞈ hpu hkʼaw maˇ hawˍ daꞈ ve htaꞈ maˇ gʼaꞈ te tuˬ Yeˍsuˆ maˍ piˇ ve yoˬ. Chi hkʼoˆ kaꞈ, yawˇ hui venˇ baˆ cawˬ leh gʼa suh˗e ve htawˇ, Yaˬhoˉvaˬ mehˆ gʼuˇ suhˍ lo suh ve htaꞈ gʼa ponˬ ve yoˬ. Hkriꞈ yaˇ awˬ pon hpehˇ piˇ ve 33 hkʼawꞈ htaˇ tanˬ ve yoˬ. Oˇ htaˇ Yeˍsuˆ ve awˬ laꞈ gʼawˇ htaꞈ leuˆ yuˬ ve yoˬ. Yeˍsuˆ uˉ peunˍ ve teˇ hinˉ hkʼawꞈ htaˇ peuˬ tuˬ yoˬ. w19.12 11 ¶11-12

Yaˇ daꞈ ve awˬ chawˇ cawˬ tuˬ ga piˇ sheˍ. Yaˇ ve awˬ chawˇ a shu le, leh yawˇ hui aˬ htoꞈ ma te ve le, awˬ pa awˬ e gʼa shiˍ cawˇ ve yoˬ. Chi kʼoˆ gaˇ ve lehˬ awˬ hkʼeun teˇ hpaˍ hkʼaw yaˇ a shu htaꞈ caˉ daꞈ ve leh a shu geh tawˇ yaw daꞈ ve awˬ pa awˬ e gʼa shiˍ cawˇ ve yoˬ. Chi hkʼe caˉ daꞈ ve lehˬ yaˇ ve dawˇ hkʼaˇ leh teˇ hkʼaˇ htaꞈ heuˆ la kuiˬ cawˬ ve pa taw yoˬ. Awˬ pa awˬ e laiˉ gʼaˇ yaˇ htaꞈ Gʼuiˬ sha ve kanˉ hkʼa dehꞈ te ve chaw geh awˬ chawˇ te tcuh gaˇ ve yoˬ. Aiˬvaˬriˬ Koˆ mvuhˇ miˬ lo chehˇ ve Dehˬniˆ leh Bon˗mi htoˇ nyi shehˍ hpaˇ yawˇ hui ve aˉ hkʼaw lo laiˉ pawˆ haˉ la tcuh ve yoˬ. Dehˬniˆ kʼoˆ ve, “chi hkʼe te ve ngaˬ hui ve yaˇ paˍ uiˍ htaꞈ awˬ bon gʼa jaˇ. Yawˇ gʼuˇ suhˍ peuˍ ve tanˬ te leh chi teˇ hkui toˇ nyi shehˍ hpaˇ awˬ tan te chehˇ ve yoˬ.” Awˬ pa awˬ e yaˇ htaꞈ haˆ maˍ piˇ ve kʼo, awˬ bon gʼa tuˬ yoˬ. (Tawˇ 22:6) Tiˆmoˉseˍ ve awˬ pi Lawˇiˆ leh awˬ e Uˇniˆ yawˇ htaꞈ “yaˇ ehˉ hpehꞈ htaˇ kaꞈ” maˍ piˇ ve yoˬ.—2 Tiˆ 1:5; 3:15. w19.12 25 ¶14; 26 ¶16-17

Ngaˬ hui yonˍ gʼa ve awˬ chawˇ gʼa hpehꞈ ve yoˬ. Tawˇ pa haˉ te kʼo, ngaˬ hui awˬ viˉ awˬ nyi htaꞈ ga piˇ tuˬ ka tiꞈ te ve ceh maˇ heˆ. Yaꞈ hkʼaˇ, ngaˬ hui awˬ tehˬ te ve yoˬ. (Maꞈ 5:37; Luˉ 16:10) Ngaˬ hui ga piˇ ve chaw ngaˬ hui ga laˇ tuˬ awˬ tehˬ shiˍ htaˇ, yawˇ hui nyi ma sha leh awˬ gʼaˇ gʼa ve yoˬ. Awˬ viˉ awˬ nyi yaˇ miˇ teˇ gʼaˇ kʼoˆ maˍ laˇ ve, “chi hkʼe shiˍ ve lehˬ ga laˇ tuˬ tehꞈ ka tiꞈ te taˍ ve htaꞈ gʼaꞈ te tuˬ laˇ, ngaˬ hui htawˇ dawˇ nawˬ dawˇ cawˬ tuˬ maˇ loˍ.” Yonˍ gʼa ve awˬ chawˇ htaꞈ gʼa yaw daꞈ htaˇ, shoꞈ shaꞈ ve chi hkʼe gʼa hpuˇ ve chaw lehˬ awˬ gʼaˇ gʼa ve yoˬ. Yonˍ gʼa ve awˬ chawˇ hpehꞈ tuˬ ngaˬ hui gʼa yeunˇ hkanˍ ve yoˬ. Cehn˗nan awˬ hpawˇ baˬ aˉ piˇ ve yoˬ. Yaꞈ hkʼaˇ, awˬ chawˇ meuˆ daꞈ jaˇ ve geh yawˇ ve dawˇ hkʼaˇ gʼa kʼoˆ maˍ piˇ htaˇ, yawˇ nyi ma sha la ve yoˬ. Yawˇ kʼawꞈ kʼoˆ ve, “ngaˬ kʼoˆ peuˬ kaꞈ kʼoˆ ve htawˇ, yawˇ hui yeunˇ hkanˍ ve hkʼaw na taˍ laˇ ve yoˬ.” Nawˬ kaꞈ hkʼa dehꞈ na taˍ piˇ ve kʼo, daꞈ ve awˬ chawˇ hpehꞈ gʼa ve yoˬ. w20.01 10-11 ¶9-11

Liꞈ hpu hkʼa peu˗eˬ hkʼaw, daꞈ kehˬ ve awˬ han hpu gʼa ve chaw laiˉ gʼaˇ ve awˬ lawn cawˬ ve yoˬ. Yaꞈ hkʼaˇ, yawˇ hui mvuhˇ naw ma hkʼoˆ taˆ˗e tuˬ maˇ dawˇ law. Daˍviˆ daꞈ kehˬ ve awˬ ha hpu beˆ maˍ piˇ ve yoˬ. (1 Saˍ 16:13) Daꞈ kehˬ ve awˬ ha hpu chi Daˍviˆ Yaˬhoˉvaˬ ve awˬ lawn hkʼa dehꞈ shiˍ tuˬ ga piˇ leh Liꞈ hpu kaꞈ bvuhꞈ gʼa ve yoˬ. (Mk 12:36) Chi hkʼe hpehꞈ ve htawˇ, tcuh yaˇ Peˍtruˆ Daˍviˆ “mvuhˇ naw ma hkʼoˆ lo taˆ˗e ve” tehꞈ maˇ kʼoˆ. (Tcuh 2:34) Awˬ nu ve teˇ gʼaˇ lehˬ Baˆtiˆsaˬ piˇ paˍ Yoˇhanˬ “daꞈ ve kehˬ ve awˬ ha hpu hkʼa biˇ cawˬ tuˬ yoˬ.” (Luˉ 1:13-16) Yeˍsuˆ kʼoˆ ve, Yoˇhanˬ aꞈ kehˉ uiˍ ve chaw teˇ gʼaˇ kaꞈ maˇ cawˬ. Yaꞈ hkʼaˇ, Yeˍsuˆ kʼawꞈ kʼoˆ ve, Yoˇhanˬ lehˬ Gʼuiˬ sha ve mvuhˇ miˬ htaꞈ maˇ gʼa uˉ peunˍ. (Maꞈ 11:10, 11) Yawˇ hui teˇ ceuˬ le le htaꞈ te gʼa tuˬ, Yaˬhoˉvaˬ daꞈ kehˬ ve awˬ ha hpu piˇ ve tehꞈ ngaˬ hui shiˍ ve yoˬ. Yaꞈ hkʼaˇ, yawˇ daꞈ kehˬ ve awˬ ha hpu htaꞈ cuˇ leh yawˇ hui mvuhˇ naw ma hkʼoˆ taˆ˗e tuˬ maˇ gʼa leuˆ. Chi yawˇ hui hkʼe leˇ ka tiꞈ maˇ yeˬ ve htaꞈ kʼoˆ gaˇ ve laˇ? Maˇ heˆ. Yaˬhoˉvaˬ yawˇ hui htaꞈ Paˍraˍdiˇsuˆ hkʼaw teˇ pawˆ kʼawꞈ teꞈ tu la tcuh tuˬ yoˬ.—Yoˇ 5:28, 29; Tcuh 24:15. w20.01 25 ¶15

Yaˬhoˉvaˬ ngaˬ hui yawˇ ve yehˬ kʼa hkʼaw chehˇ la tuˬ kuˬ laˇ ve yoˬ. Ngaˬ hui ve yehˬ kʼa hkʼaw Gʼuiˬ sha htaꞈ awˬ to chiˇ aꞈ piˇ˗oˬ ve chaw ceh tiˉ cawˬ leh Gʼuiˬ sha ve Yaˇ Yeˍsuˆ htaiˍ hkʼawꞈ laˇ ve awˬ hpfuhˇ htaꞈ yonˍ ve tehꞈ hpeuꞈ maw piˇ ve yoˬ. Ngaˬ hui ve yehˬ kʼa hkʼaw ha lehˬ jaˇ. Ngaˬ hui chi teˇ hkui kaꞈ a shaꞈ teꞈ hkʼaˇ daꞈ leh awˬ gʼuˇ suhˍ hpawˇ mvuhˇ naw ma hkʼoˆ maˇ heˆ leh miˬ guiˬ hkʼoˆ Paˍraˍdiˇsuˆ hkʼaw co co taiˍ taiˍ chehˇ tuˬ dawˇ law kuiˬ cawˬ ve yoˬ. Yaˬhoˉvaˬ ngaˬ hui htaꞈ haꞈ ve pa taw, yawˇ ve yehˬ kʼa hkʼaw chehˇ la tuˬ kuˬ laˇ ve yoˬ. Chi hkʼe te gʼa tuˬ yawˇ awˬ yanˇ yuˬ tanˇ jaˇ. (Yoˇ 3:16) Yawˇ ‘ngaˬ hui htaꞈ vuiˬ hkʼawꞈ taˍ peuˬ.’ (1 Kawˇ 6:20) Htaiˍ hkʼawꞈ ve awˬ hpfuhˇ htaꞈ pa taw, Yaˬhoˉvaˬ ngaˬ hui yawˇ geh meuˆ daꞈ leh gawˬ lehˍ cawˬ tcuh laˇ ve yoˬ. Mvuhˇ naw ma miˬ naˆ ma hkʼoˆ uiˍ jaˇ mvuh jaˇ ve htaꞈ ngaˬ hui Awˬ pa gʼa kʼoˆ ve ha lehˬ jaˇ. Yaˬhoˉvaˬ lehˬ daꞈ jaˇ ve Awˬ pa hpehꞈ leh teˇ gʼaˇ le le cawˬ gaˇ ve Awˬ pa hpehꞈ ve yoˬ. Liꞈ hpu bvuhꞈ paˍ teˇ gʼaˇ hkʼa shuˍ a shu yawˇ awˬ to htaꞈ na nyi cawˇ ve, ‘Gʼuiˬ sha ngaˬ htaꞈ te laˇ taˍ ve daꞈ jaˇ ve kanˉ teˇ hpaˍ awˬ pon ngaˬ yawˇ htaꞈ aˬ htoꞈ ma gʼa tanˇ piˇ tuˬ le?’ (Chiˇ 116:12) Yaˬhoˉvaˬ te laˇ ve hkʼa peu˗eˬ htaꞈ ngaˬ hui te hkʼawꞈ piˇ maˇ gʼa. Gʼuiˬ sha ngaˬ hui htaꞈ haꞈ ve pa taw, yawˇ htaꞈ haꞈ gaˇ tuˬ te laˇ ve yoˬ. w20.02 8 ¶1-3