Ha pa 6 maˬ

Tcuh kaˍ paˍ Saˍmo˗eˍlaˆ ve awˬ e Haˍnaˆ laiˉ hkʼawꞈ yaˇ maˇ cawˬ gʼa ve pa taw, yawˇ tuꞈ hkanˍ jaˇ. (1 Saˍ 1:2) Iˉsaˍreˍlaˆ chaw hui ve chaw liˇ vaˇ liˇ kʼo a shu teˇ gʼaˇ chaw meh ma hpehꞈ ve kʼo, hkeu piˇ taˍ ve htaꞈ gʼa hkanˍ ve tehꞈ hpeuꞈ maw laˇ ve yoˬ. Chi Haˍnaˆ yaꞈ taw jaˇ. (Awˬ 30:1, 2) Chi hkʼoˆ kaꞈ, Peˍniˇnaˆ yaˇ cawˬ gʼa ve pa taw, Haˍnaˆ tuꞈ hkanˍ jaˇ tuˬ te piˇ ve yoˬ. Peˍniˇnaˆ Haˍnaˆ htaꞈ maˇ shawˍ maˇ caˆ te piˇ ve yoˬ. Awˉ lawˉ htaˇ Haˍnaˆ dawˇ haˍ jaˇ leh haꞈ yuˬ maˇ gʼa. Yawˇ nyi ma luˬ leh “dawˇ haˍ jaˇ.” Yawˇ “maˇ caˇ maˇ dawˬ leh hawˬ chehˇ ve yoˬ.” (1 Saˍ 1:7, 10) Yawˇ nyi ma sha la tuˬ aˬ htoꞈ ma ga piˇ ve le? Haˍnaˆ nyi ma hkʼaw cawˬ ve Yaˬhoˉvaˬ geh bon lawˬ ve hkʼaw kʼoˆ piˇ peuˬ hkʼawꞈ nawˉ, paw hkuˇ Eˇliˆ htaꞈ kaꞈ kʼoˆ piˇ ve yoˬ. Eˇliˆ yawˇ htaꞈ kʼoˆ piˇ ve, “gawˬ lehˍ ve hkʼaw kʼoꞈ˗e loˬ. Iˉsaˍreˍlaˆ ve Gʼuiˬ sha lehˬ nawˬ lawˬ ve hkʼe awˬ bon naꞈ laˇ piˇ˗oˆ.” Haˍnaˆ “caˇ tuˬ kʼawꞈ caˇ ve yoˬ. Chi teˇ pawˆ yawˇ lehˬ maˇ kʼawꞈ dawˇ haˍ˗o.” (1 Saˍ 1:17, 18) Bon lawˬ ve lehˬ Haˍnaˆ nyi ma gawˬ lehˍ cawˬ la tuˬ ga piˇ ve yoˬ. w20.02 21 ¶4-5

Maˇ maw kʼo, Yaˬhoˉvaˬ miˬ guiˬ chi peuˬ˗e tcuh tuˬ yoˬ. Awˬ tehˬ ve htaꞈ haꞈ yuˬ ve chaw tiˉ gʼa ponˬ tuˬ yoˬ. (Tcuh 13:48) Hkʼe te leh yehˬ kʼa hkʼaw ve chaw leh awˬ viˉ awˬ nyi Yaˬhoˉvaˬ htaꞈ oˉ kʼoˍ pui la tuˬ ngaˬ hui ga piˇ gaˇ ve yoˬ. Haꞈ pehnˇ uiˍ ve Awˬ pa Yaˬhoˉvaˬ lehˬ “chaw hkʼa peu˗eˬ venˇ baˆ htaꞈ dawˇ hpfuhˆ leh teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ” ve yoˬ (2 Peˍ 3:9) Shu gʼa ponˬ tuˬ ngaˬ hui hto maˍ piˇ htaˇ, daꞈ ve leh maˇ daꞈ ve kaꞈ cawˬ ve tehꞈ tawnˇ taˍ cawˇ ve yoˬ. Maˇ shiˍ daꞈ ve chaw geh hto maˍ piˇ htaˇ shaˍ tiꞈ te ve yoˬ. Yaꞈ hkʼaˇ, yehˬ kʼa hkʼaw ve chaw leh awˬ viˉ awˬ nyi geh hto maˍ piˇ htaˇ, teˇ pawˆ pawˆ kʼo shaˍ tiꞈ maˇ te leh hteˇ˗ehˍ kʼoˆ piˇ ve yoˬ. Yehˬ kʼa hkʼaw ve chaw leh awˬ viˉ awˬ nyi htaꞈ hto maˍ piˇ ve awˉ lawˉ teˇ pawˆ ve htaꞈ dawˇ nyi htaˇ, chi hkʼe maˇ kʼoˆ piˇ cawˇ tehꞈ dawˇ leh laiˉ gʼaˇ nyi ma luˬ ve yoˬ. Yawˇ hui htaꞈ hto maˍ piˇ htaˇ, Pawˇluꞈ yaꞈ nyi ve Liꞈ hpu awˬ tawn beˆ maˍ laˇ hkawˇ htaꞈ ngaˬ hui gʼaꞈ te ve kʼo daꞈ ve yoˬ. Chi hkʼe maˇ te ve kʼo ngaˬ hui hkawˇ maˇ na gaˇ taˬ. w19.08 14-15 ¶3-5

Yeˍsuˆ htaꞈ caˉ daꞈ ve nawˬ gʼa henˇ htaˇ, hkʼaˬ hkʼe dawˇ ve le? Yeˍsuˆ lehˬ Yaˬhoˉvaˬ awˬ hawˉ lo ve teˇ gʼaˇ hpehꞈ ve yoˬ. Yeˍsuˆ htaiˍ hkʼawꞈ shehˍ hpaˇ hpehꞈ leh yawˇ ve a shaꞈ ngaˬ hui awˬ pon tanˇ laˇ ve yoˬ. Yawˇ htaiˍ hkʼawꞈ laˇ ve awˬ hpfuhˇ htaꞈ ngaˬ hui hpeuꞈ maw piˇ htaˇ, venˇ baˆ hpehˇ laˇ ve htaꞈ gʼa tuˬ yoˬ. Ngaˬ hui Gʼuiˬ sha geh meuˆ daꞈ leh co co taiˍ taiˍ ve a shaꞈ gʼa tuˬ yoˬ. (Yoˇ 3:16) Chi hkʼoˆ kaꞈ, Yeˍsuˆ paw hkuˇ lonˉ hpehꞈ ve yoˬ. Ngaˬ hui htaiˍ hkʼawꞈ ve htaꞈ gʼa leh Gʼuiˬ sha geh meuˆ daꞈ tuˬ yawˇ ga laˇ ve yoˬ. (Heˍ 4:15; 7:24, 25) Chi hkʼoˆ kaꞈ, Yeˍsuˆ Gʼuiˬ sha ve mvuhˇ miˬ hkʼaw Jawˇmawˇ kaꞈ hpehꞈ ve yoˬ. Yaˬhoˉvaˬ Yeˍsuˆ htaꞈ cuˇ leh yawˇ ve awˬ meh htaꞈ yawˆ yan tuˬ, haiˬ ve htaꞈ te luˬ tuˬ, leh miˬ guiˬ awˬ suhˉ hkʼaw ngaˬ hui htaꞈ awˬ bon naꞈ laˇ tuˬ yoˬ. (Maꞈ 6:9, 10; Hpeuꞈ 11:15) Yeˍsuˆ htaꞈ ngaˬ hui henˇ yuˬ cawˇ ve yoˬ. Gʼuiˬ sha ve a loˍ htaꞈ gʼaꞈ te tuˬ, Yeˍsuˆ te maˍ laˇ ve htaꞈ ngaˬ hui henˇ yuˬ gʼa ve yoˬ. (Yoˇ 4:34) Gʼuiˬ sha ve Yaˇ Yeˍsuˆ htaꞈ caˉ daꞈ ve Liꞈ hpu hkʼaw maˍ laˇ ve htaꞈ nawˬ yonˍ htaˇ, nawˬ kaꞈ yawˇ htaꞈ haꞈ tuˬ yoˬ. Yeˍsuˆ te ve hkʼa shuˍ haꞈ pehnˇ ve chi nawˬ Yaˬhoˉvaˬ ve a loˍ htaꞈ te gaˇ tuˬ te laˇ ve yoˬ. w20.03 10 ¶12-13

Yeˍsuˆ miˬ guiˬ hkʼoˆ chehˇ ve awˬ leh meuˇ teˇ nyi htaˇ, hkʼaˬ htaˆ kaꞈ bon lawˬ ve yoˬ. Yeˍsuˆ yawˇ suh˗e ve dawˇ nawˇ tuˬ hpawnˬ daꞈ ve te htaˇ, hkaoˍ monˇ leh a pehˉ meuˇ gʼuiˬ awˬ pon yawˇ bon htaꞈ chiˇ mvuh ve yoˬ. (1 Kawˇ 11:23-25) Paˍsaˍhkaˍ pawehˇ te ve hkʼaw maˇ tawˆ˗e sheˍ htaˇ, yawˇ kaꞈ tcuh yaˇ geh bon lawˬ ve yoˬ. (Yoˇ 17:1-26) Yeˍsuˆ leh tcuh yaˇ oˇ ve teˇ haˉ Shaˍlonˍ hkʼaw hkʼoˆ lo gaˬ˗e htaˇ, yawˇ bon laiˉ pawˆ lawˬ ve yoˬ. (Maꞈ 26:36-39, 42, 44) Yeˍsuˆ maˇ suh sheˍ htaˇ awˬ leh meuˇ teˇ pawˆ tawˇ yaw ve lehˬ bon lawˬ ve yoˬ. (Luˉ 23:46) Awˬ leh meuˇ teˇ nyi yawˇ gʼa hpuˇ ve hkʼa peu˗eˬ, Yeˍsuˆ bon lawˬ ve hkʼaw Yaˬhoˉvaˬ htaꞈ kʼoˆ piˇ ve yoˬ. Yeˍsuˆ yawˇ Awˬ pa htaꞈ gʼaˇ va leh bon lawˬ ve pa taw, shoꞈ shaꞈ ve htaꞈ yeunˇ hkanˍ gʼaˇ ve yoˬ. Yaꞈ hkʼaˇ, tcuh yaˇ chi hkʼe maˇ te. Yawˇ hui oˇ ve teˇ haˉ bon hkʼa dehꞈ maˇ lawˬ. Yawˇ hui shoꞈ shaꞈ ve gʼa hpuˇ htaˇ haꞈ hanˉ ve hkʼa dehꞈ maˇ cawˬ. (Maꞈ 26:40, 41, 43, 45, 56) Ngaˬ hui shoꞈ shaꞈ ve gʼa hpuˇ htaˇ Yeˍsuˆ htaꞈ henˇ yuˬ leh “bon lawˬ leh shaw taˍ” ve kʼo, ka tiꞈ yeˬ tuˬ yoˬ. Ngaˬ hui aˬ htoꞈ ma awˬ pon bon lawˬ gʼa ve le? w19.04 9 ¶4-5

Yaˬhoˉvaˬ neˇ teˇ hpaˍ htaꞈ nyi bawˬ jaˇ! Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, “nawˬ hui ve tuˉ tanˇ kuiˬ hkʼoˆ lo, nawˬ hui ve yaˇ teˇ hpaˍ htaꞈ maˇ gʼa tuˉ tanˇ piˇ. Nawˬ hui ve chaw teˇ hpaˍ htaꞈ htawˇ, neˇ maˇ gʼa te tcuh. Maˇ gʼa mawˉ nyi tcuh. Faˍ maˇ gʼa te tcuh. Suh peuˬ ve chaw htaꞈ tawˇ na nyi ve, chi hkʼe ve teˇ hpaˍ kaꞈ maˇ gʼa te tcuh. Chi hkʼe te ve chaw hui htaꞈ Gʼuiˬ sha canˇ ve yoˬ.” (Bon 18:10-12) Yaˬhoˉvaˬ Iˉsaˍreˍlaˆ chaw htaꞈ awˬ liˇ tawˇ hkawˇ piˇ taˍ ve awˬ hawˉ lo Hkriꞈ yaˇ maˇ kʼawꞈ chehˇ˗o. Yaꞈ hkʼaˇ, neˇ teˇ hpaˍ htaꞈ canˇ ve awˬ hkʼaˇ, yawˇ maˇ pa jaw tehꞈ ngaˬ hui shiˍ ve yoˬ. Saˍtanˍ yehˇ leh chaw yaˇ htaꞈ te luˬ tuˬ awˬ hkʼaˇ yawˇ shiˍ ve pa taw, neˇ teˇ hpaˍ ve awˬ lawn Yaˬhoˉvaˬ ngaˬ hui htaꞈ shaˍ tiꞈ peꞈ laˇ ve yoˬ. Saˍtanˍ neˇ teˇ hpaˍ ve awˬ hkʼaˇ htaꞈ yehˇ leh heˍ ve yoˬ. Suh˗oˬ ve kʼo, suh mvuhˇ miˬ hkʼaw teˇ kaˬ kaˬ lo teꞈ chehˇ sheˍ ve tehꞈ kʼoˆ leh heˍ ve yoˬ. (Cuˇ 9:5) Saˍtanˍ neˇ teˇ hpaˍ ve awˬ hkʼaˇ htaꞈ yehˇ leh chaw yaˇ kawˆ tuˬ leh Yaˬhoˉvaˬ geh maˇ meuˆ daꞈ tuˬ kaꞈ te piˇ ve yoˬ. Neˇ teˇ hpaˍ htaꞈ caˉ daꞈ ve chaw yaˇ lehˬ Yaˬhoˉvaˬ aꞈ kehˉ neˇ teˇ hpaˍ htaꞈ yonˍ tuˬ Saˍtanˍ dawˇ law ve yoˬ. w19.04 21 ¶5-6

Yaˇ htaꞈ pehꞈ ve tzuhˆ ve hpawˇ naˬ taweh te piˇ ve venˇ baˆ uiˍ jaˇ ve hpehꞈ ve yoˬ. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve yaˇ yawˇ htaꞈ yonˍ jaˇ ve htawˇ yawˇ yaˇ htaꞈ hpfuhˆ leh haiˬ ve hpuˇ tcuh tuˬ nyiˉ piˇ ve yoˬ. Yaˇ teˇ hpaˍ chi hkʼe maˇ gʼa hpuˇ tuˬ ngaˬ hui gʼa haꞈ shaˉ ve yoˬ. Chi hkʼe gʼa hpuˇ ve chaw htaꞈ ngaˬ hui ga piˇ leh awˬ gʼaˇ piˇ cawˇ ve yoˬ. (1 Hteˇ 5:14) Hkriꞈ yaˇ awˬ moˍ hkʼaw ve chaw yaˇ htaꞈ chi hkʼe te yaꞈ piˇ ve kʼo, yawˇ Hkriꞈ yaˇ awˬ moˍ ve awˬ meh luˬ tuˬ te piˇ ve yoˬ. (Maꞈ 5:16; 1 Peˍ 2:12) Venˇ baˆ te yaꞈ leh maˇ dawˇ hpfuhˆ ve leh Hkriꞈ yaˇ awˬ moˍ ve awˬ meh htaꞈ te luˬ laˇ ve chaw htaꞈ ngaˬ hui Hkriꞈ yaˇ awˬ moˍ hkʼaw maˇ chehˇ tcuh gaˇ. Hkriꞈ yaˇ awˬ moˍ hkʼaw ve chaw teˇ gʼaˇ awˬ liˇ htaꞈ te yaꞈ ve kʼo, yawˇ mvuhˇ miˬ uˉ peunˍ ve awˬ liˇ te yaꞈ chehˇ ve yoˬ. (Tcuh 25:8 htaꞈ tehˆ daꞈ sheˍ) Hkriꞈ yaˇ awˬ moˍ hkʼaw ve nyi haꞈ shaˉ paˍ mvuhˇ miˬ awˬ liˇ htaꞈ cuˇ leh shu htaꞈ ciˍ yanˍ piˇ tuˬ a hkaw˗anˬ maˇ cawˬ. Yaꞈ hkʼaˇ, yawˇ hui te yaꞈ ve chaw htaꞈ mvuhˇ miˬ uˉ peunˍ ve maˇ mawˬ tcuh tuˬ faˉ taˍ ve kaꞈ maˇ te. w19.05 9 ¶4-7

Yaˬhoˉvaˬ uiˍ jaˇ mvuh jaˇ ve saˍ laꞈ lonˉ hpehꞈ ve yoˬ. Hkʼe te leh ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ gu gʼa ve yoˬ. (Isy 30:20, 21) Liꞈ hpu lehˬ ngaˬ hui “daꞈ ve kanˉ teˇ ceuˬ le le awˬ pon gu taˍ ve chaw hpehꞈ la tuˬ” maˍ laˇ ve yoˬ. (2 Tiˆ 3:17) Liꞈ hpu hkʼaw maˍ laˇ ve htaꞈ gʼaꞈ te htaˇ, “miˬ guiˬ ve cuˇ yiˍ” yehˇ cawˇ ve tehꞈ kʼoˆ ve chaw aꞈ kehˉ ngaˬ hui cuˇ yiˍ cawˬ tuˬ yoˬ. (Chiˇ 119:97-100) Miˬ guiˬ ve cuˇ yiˍ ngaˬ hui awˬ suhˍ awˬ shaˍ hpawˇ nyi hkʼaˇ suh tuˬ te laˇ gʼa ve yoˬ. Hkʼe te leh miˬ guiˬ yaˇ hkʼe dawˇ leh te ve htaꞈ ngaˬ hui tawˍ baˬ tuˬ haˍ jaˇ ve yoˬ hehˉ. Chi htaꞈ pa taw, Liꞈ hpu hkʼaw kʼoˆ ve, ‘chaw teˇ gʼaˇ kaꞈ cuˇ yiˍ maˍ yiˍ leh tcuhˉ kuiˬ maˇ cawˬ ve heˍ ve tawˇ hkawˇ htaꞈ yehˇ leh nawˬ hui htaꞈ maˇ gʼa hpeh yuˬ veu tuˬ, shaˍ tiꞈ taˍ˗oꞈ. (Kawˇ 2:8) Tawˇ hkawˇ oˇ ve teˇ hpaˍ lehˬ chaw yaˇ teˇ caˉ peuˬ teˇ caˉ piˇ taˍ ve ceh hpehꞈ ve yoˬ.’ Awˬ leh meuˇ ve awˬ yanˇ hkʼaˬ hkʼe hpehꞈ tuˬ Liꞈ hpu hkʼaw kʼoˆ taˍ ve hkʼe, “miˬ guiˬ ha lehˬ tuˬ teˇ hpaˍ htaꞈ haꞈ ve chaw” cawˬ maˇ la ve yoˬ. (2 Tiˆ 3:4) Chi hkʼoˆ kaꞈ, miˬ guiˬ ve cuˇ yiˍ kʼaˍ jaˇ ve pa taw, eˍ (AIDS) leh teˇ geh zuhꞈ ve a naˍ nehˉ ve awˬ nu ve kaꞈ cawˬ maˇ la ve yoˬ.—2 Peˍ 2:19. w19.05 21 ¶1-2; 22 ¶4-5

Iˉsaˍreˍlaˆ chaw awˬ paˇ awˬ kui lo chehˇ ve maˇ heˆ heˆ ve awˬ liˇ awˬ hkʼaˇ hkʼe gʼaꞈ te htaˇ hehꞈ, awˬ ceuˬ oˇ ve teˇ hpaˍ daꞈ la gʼa tuˬ tehꞈ Saˍtanˍ yawˇ hui htaꞈ yonˍ tcuh ve yoˬ. Awˬ liˇ awˬ hkʼaˇ teˇ ceuˬ ceuˬ te htaˇ hehꞈ Gʼuiˬ sha mvuhˇ yeˬ laˬ tcuh laˇ ve tehꞈ awˬ paˇ awˬ kui chehˇ ve chaw yonˍ ve yoˬ. Yaˬhoˉvaˬ htaꞈ maˇ yonˍ ve chaw yawˇ hui mvuhˇ goˇ ve htaꞈ gu gʼa tuˬ chi hkʼe gʼa te ve tehꞈ yonˍ ve yoˬ. Hkʼe te leh yawˇ hui Baˍlaˆ gʼuiˬ sha htaꞈ yawˆ yan tuˬ maˇ heˆ heˆ ve awˬ liˇ awˬ hkʼaˇ htaꞈ tanˬ te ve yoˬ. Saˍtanˍ pehꞈ ve tzuhˆ ve hpawˇ te gaˇ ve nyi ma htaꞈ cawˬ tcuh laˇ ve yoˬ. Awˬ nu ve mvuhˇ miˬ hkʼaw chehˇ ve chaw yawˇ hui ve gʼuiˬ sha htaꞈ oˉ kʼoˍ pui leh pehꞈ ve tzuhˆ ve hpawˇ te gaˇ ve nyi ma htaꞈ kaꞈ caˉ daꞈ ve yoˬ. Yawˇ hui oˉ kʼoˍ pui kuiˬ hkʼaw yaˇ miˇ leh hawˉ hkʼaˆ awˬ to hawˇ ve kaꞈ cawˬ ve yoˬ. Hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ pehꞈ ve tzuhˆ ve htaꞈ te leh pehꞈ ve tzuhˆ ve hpawˇ te gaˇ ve awˬ nu ve kaꞈ a hkʼe leˇ ceh hpehꞈ ve yoˬ! (Bon 23:17, 18; 1Jawˇ 14:24) Maˇ heˆ heˆ ve gʼuiˬ sha htaꞈ yonˍ ve chaw yawˇ hui kʼoˆ ve, chi hkʼe te htaˇ mvuhˇ miˬ daꞈ la tuˬ tehꞈ yonˍ ve yoˬ. Iˉsaˍreˍlaˆ chaw laiˉ gʼaˇ htaꞈ pehꞈ ve tzuhˆ ve awˬ liˇ awˬ hkʼaˇ te tuˬ heˍ piˇ leh, maˇ heˆ heˆ ve gʼuiˬ sha htaꞈ kaꞈ oˉ kʼoˍ pui ve yoˬ. w19.06 2 ¶3; 4 ¶7-8

Awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te ve laiˉ gʼaˇ leh Beˍteˍlaˆ hkʼaw kanˉ te ve awˬ vuiˬ awˬ suhˉ gʼa ve chaw kaꞈ yawˇ hui ve awˬ vuiˬ maˇ gʼa te˗oˬ ve nyi ma luˬ jaˇ ve yoˬ hehˉ. Yaˬhoˉvaˬ geh hkʼaˬ htaˆ kaꞈ meuˆ daꞈ tuˬ nawˬ teˇ nyi le le Liꞈ hpu gʼaw leh gʼaw ve awˬ lawn htaꞈ hkʼa dehꞈ gʼa dawˇ nyi ve yoˬ. Chi hkʼoˆ kaꞈ, Hkriꞈ yaˇ awˬ moˍ awˬ suhˉ geh hto toˇ ve te gʼa ve hkʼe te sheˍ. Oˇ htaˇ hkʼe awˬ vuiˬ maˇ te gʼa˗oˬ ve htawˇ ka tiꞈ yeˬ leh hkʼaˬ htaˆ kaꞈ te ve chaw htaꞈ Yaˬhoˉvaˬ leunˇ tuˬ ve maˇ heˆ. Hkʼaˬ htaˆ kaꞈ a shaꞈ teꞈ hkʼaˇ caˇ lawꞈ dawˬ lawꞈ te sheˍ. Nawˬ a shaꞈ teꞈ kuiˬ hkʼaw miˬ guiˬ ve dawˇ haˍ tuˬ Hkriꞈ yaˇ ve te hkʼaˇ dawˇ hkʼaˇ htaꞈ taˇ “hoˆ taˍ” tcuh. (Maꞈ 13:22) A shaꞈ teꞈ hkʼaˇ hkʼaw hpu chi ma ma cawˬ tuˬ Gʼuiˬ sha ve kanˉ maˇ te ve chaw, awˬ chawˇ, maˇ heˆ leh awˬ viˉ awˬ nyi kʼoˆ laˇ ve htaꞈ taˇ na. (1 Yoˇ 2:15-17) Ngaˬ hui ve yonˍ hkʼaˇ yeˬ tuˬ, nyi ma sha tuˬ, hpu shi mawˇ jeˬ chi teˇ hpaˍ ngaˬ hui loˍ htaˇ, Yaˬhoˉvaˬ ka tiꞈ te taˍ laˇ ve htaꞈ yonˍ gʼa ve yoˬ.—Heˍ 4:16; 13:5, 6. w19.08 20 ¶4; 21-22 ¶7-8

Nawˬ dawˇ haˍ ve gʼa hpuˇ chehˇ˗aw laˇ? Yaˬhoˉvaˬ ngaˬ hui ve dawˇ hkʼaˇ htaꞈ na gʼa ve ngaˬ hui shiˍ htaˇ awˬ gʼaˇ gʼa jaˇ! Ngaˬ hui te gʼa ve, te maˇ gʼa ve, leh nyi ma hkʼaw cawˬ ve hkʼa peu˗eˬ Yaˬhoˉvaˬ shiˍ ve yoˬ. (Chiˇ 103:14; 139:3, 4)Yaˬhoˉvaˬ htaꞈ gʼaˇ va ve kʼo, ngaˬ hui dawˇ haˍ ve gʼa hpuˇ htaˇ yawˇ ga laˇ tuˬ yoˬ. Ngaˬ hui dawˇ haˍ htaˇ, daꞈ la tuˬ maˇ cawˬ tehꞈ dawˇ ve yoˬ hehˉ. Chi ngaˬ hui awˬ gʼaˇ nuˇ tuˬ te laˇ ve yoˬ. Chi hkʼe hpehꞈ ve kʼo, nawˬ dawˇ haˍ ve gu gʼa tuˬ Yaˬhoˉvaˬ ga laˇ gʼa ve tehꞈ tawnˇ taˍ sheˍ. Yawˇ hkʼaˬ hkʼe te tuˬ le? Nawˬ shoꞈ shaꞈ ve leh dawˇ haˍ ve yawˇ htaꞈ kʼoˆ laˇ tcuh gaˇ ve yoˬ. Yawˇ nawˬ lawˬ ve hkawˇ htaꞈ hkʼawꞈ laˇ tuˬ yoˬ. (Chiˇ 5:3; 1 Peˍ 5:7) Chi htaꞈ pa taw, nawˬ gʼa hpuˇ ve awˬ lawn yawˇ geh teˇ hkui teˇ hkui bon lawˬ sheˍ. Yawˇ nawˬ geh yaw daꞈ tuˬ ve maˇ heˆ. Yaꞈ hkʼaˇ, yawˇ nawˬ geh yaw daꞈ tuˬ Liꞈ hpu leh Gʼuiˬ sha ve kanˉ hkʼaˇ htaꞈ cuˇ ve yoˬ. Liꞈ hpu hkʼaw ve awˬ lawn nawˬ gʼaw ve kʼo, awˬ gʼaˇ leh dawˇ law kuiˬ peꞈ laˇ tuˬ yoˬ. Awˬ viˉ awˬ nyi kaꞈ nawˬ htaꞈ awˬ gʼaˇ peꞈ laˇ gʼa ve yoˬ.—Roˉ 15:4; Heˍ 10:24, 25. w19.06 16 ¶7-8

Fawˉ mehˍ ve gʼa hpuˇ htaˇ, nawˬ bon lawˬ ve, “nyi ma awˬ tawˬ hkʼa gaˬ yawˇ htaꞈ lawˬ hkawˉ˗oˆ.” Nawˬ aˬ htoꞈ ma kawˆ leh dawˇ haˍ ve awˬ ceuˬ Awˬ pa Yaˬhoˉvaˬ htaꞈ kʼoˆ piˇ sheˍ. (Dawˇ 2:19) Nawˬ bon gʼaˇ hteꞈ lawˬ ve kʼo, Yaˬhoˉvaˬ geh meuˆ daꞈ tuˬ yoˬ. (Roˉ 8:38, 39) Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve hkʼa peu˗eˬ awˬ tehˬ hpehꞈ la tuˬ yonˍ sheˍ. (Heh 23:19) Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve nawˬ hkʼa dehꞈ maˇ yonˍ ve kʼo, Saˍtanˍ leh yawˇ ve chaw nawˬ htaꞈ kawˆ ve te laˇ tuˬ sha jaˇ. (Tawˇ 24:10; Heˍ 2:15) Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve leh ka tiꞈ chi nawˬ awˬ pon awˬ tehˬ hpehꞈ gʼa ve htaꞈ a shu yawˇ hkʼaˇ yawˇ Liꞈ hpu henˇ leh dawˇ nyi sheˍ. Chi hkʼe te ve hkʼaˬ hkʼe ga laˇ gʼa ve le? Saꞈtehnˬliˇ Conˍ yonˍ ve htaꞈ pa taw, htawnˍ hkʼaw lo 7 hkʼawꞈ gʼa chehˇ ve htaꞈ dawˇ nyi sheˍ. Yawˇ ka tiꞈ yeˬ tuˬ aˬ htoꞈ ma ga piˇ ve le? Yawˇ kʼoˆ ve, “Gʼuiˬ sha ve mvuhˇ miˬ htaꞈ caˉ daꞈ ve ngaˬ shiˍ ve pa taw, chi ngaˬ htawˇ dawˇ nawˬ dawˇ maˇ cawˬ, co ha hpawˇ uiˍ la mvuh la leh ka tiꞈ yeˬ gʼa ve yoˬ.” Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve htaꞈ nawˬ hkʼa dehꞈ yonˍ ve kʼo, yawˇ ve kanˉ te ve maˇ kawˆ.—Tawˇ 3:25, 26. w19.07 2 ¶1; 3 ¶6-7

Aˬ htoꞈ ma te shu awˬ laꞈ gʼawˇ hpehꞈ la tuˬ ca te ve a yeˇ uiˍ jaˇ ve le? Ngaˬ hui Gʼuiˬ sha ve awˬ chawˇ hpehꞈ gʼa tuˬ, yawˇ Yeˍsuˆ ve awˬ laꞈ gʼawˇ gʼa hpehꞈ ve yoˬ. Chi hkʼoˆ kaꞈ Yeˍsuˆ awˬ hkʼaˇ suhˍ gʼaꞈ yuˬ ve chaw lehˬ, chi teˇ hkui kaꞈ a shaꞈ teꞈ hkʼaˇ ha lehˬ leh awˬ gʼuˇ suhˍ hpawˇ htawˇ co co taiˍ taiˍ a shaꞈ gʼa tuˬ yoˬ. (Yoˇ 14:6; 17:3) Yeˍsuˆ a yeˇ uiˍ jaˇ ve awˬ vuiˬ chi ngaˬ hui htaꞈ peꞈ laˇ ve yoˬ. Yaꞈ hkʼaˇ, kanˉ chi ngaˬ hui hkʼaˇ ngaˬ hui te maˇ gʼa. Tcuh yaˇ Pawˇluꞈ Hkriꞈ yaˇ htaꞈ kʼoˆ piˇ ve, “teˇ geh Gʼuiˬ sha ve kanˉ te shehˍ hpaˇ hpehꞈ ve yoˬ.” (1 Kawˇ 3:9) Chaw yaˇ maˇ biˇ ve htawˇ, Yaˬhoˉvaˬ leh Yeˍsuˆ geh kanˉ teˇ geh gʼa te ve daꞈ jaˇ ve awˬ vuiˬ hpehꞈ ve yoˬ! Awˉ lawˉ teˇ ceuˬ lehˬ ngaˬ hui Yaˬhoˉvaˬ htaꞈ shiˍ gaˇ ve chaw htaꞈ gʼaꞈ ca ve yoˬ. Ngaˬ hui Yaˬhoˉvaˬ ve awˬ lawn shu htaꞈ kʼoˆ piˇ htaˇ, Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ hpeuꞈ maw piˇ ve yoˬ. Yeˍsuˆ hto toˇ kʼoˆ laˇ ve te htaˇ, ngaˬ hui awˬ tehˬ ve Hkriꞈ yaˇ hpehꞈ ve tehꞈ shu htaꞈ hpeuꞈ maw piˇ ve yoˬ. w19.07 15 ¶3-5

Awˉ lawˉ teˇ ceuˬ laiˉ gʼaˇ dawˇ cawˇ ve lehˬ Liꞈ hpu hkʼaw awˬ tehˬ yehˇ gʼa ve yoˬ. Awˬ viˉ awˬ nyi yaˇ miˇ teˇ gʼaˇ Neuˆyawˆ venˇ lo Hehˆpaˍ hkawˇ yaw gʼa ve geh kʼai leh kʼoˆ ve, “yawˇ hui yaw ve htaꞈ ngaˬ a yeˇ yuˬ leh hkʼa dehꞈ na taˍ ve tehꞈ shiˍ tcuh ve yoˬ. Yawˇ hui chehˇ la gehˇ sheˍ ve ngaˬ shiˍ htaˇ, na piˇ gaˇ ve, ‘chehˇ gʼa aˬ˗laˇ, hkʼaˬ hkʼe kʼai le? Kanˉ gʼa˗oˬ laˇ? Choˬ ve chaw nyi ma daꞈ˗aˬ laˇ?’” Chi hkʼe te htaˇ, Liꞈ hpu hkʼaw ve awˬ lawn yaw daꞈ tuˬ awˬ yanˇ cawˬ ve yoˬ. Yawˇ na gaˇ sheˍ ve kʼo awˬ viˉ awˬ nyi kʼawꞈ na piˇ ve, “nawˬ dawˇ kʼo shu geh shoꞈ shaꞈ ve maˇ cawˬ tuˬ aˬ htoꞈ ma ga laˇ gʼa ve le? Liꞈ hpu hkʼaw teˇ geh nyi hpehꞈ aw˗laˇ? Choˬ kʼoˆ ve, ‘tawˇ gʼawˬ daꞈ ve lehˬ, iˉ kaˆ gʼuiˬ hkʼaˇ peꞈ tawˆ la ve hkʼe hpehꞈ ve yoˬ. Maˇ jaˇ la sheˍ htaˇ kaꞈ haˆ haˆ gu cawˇ ve yoˬ.’ Nawˬ dawˇ kʼo, beˆ maˍ laˇ hkawˇ chi daꞈ˗aˬ laˇ?” (Tawˇ 17:14) Tawˇ chi hkʼe tanˬ yaw ve lehˬ a shu teˇ gʼaˇ geh kʼawꞈ guiˇ˗e gʼa tuˬ shiˍ ve yoˬ. w19.07 23 ¶13

Awˬ viˉ awˬ nyi awˬ vuiˬ awˬ suhˉ gʼa ve kʼo, ha kʼaˉ laˇ tuˬ maˇ heˆ, na gʼa laˇ tuˬ htaꞈ loˍ ve yoˬ. Yawˇ hui maˇ chehˇ sha ve, yehˬ kʼa hkʼaw ve chaw naˬ ve, maˇ heˆ leh yawˇ hui haꞈ ve chaw suh˗e leh nyi ma luˬ ve yoˬ. Yawˇ hui kʼoˆ leh maˇ te tawˆ la ve htawˇ, awˬ viˉ awˬ nyi leh awˬ chawˇ htaꞈ gʼa hpaˆ daꞈ ve nyi ma luˬ ve yoˬ. Yawˇ hui teˇ pawˆ tiˉ laiˉ ceuˬ gʼa hpuˇ ve htaꞈ haꞈ yuˬ gʼa tuˬ awˬ yanˇ gʼa yehˇ ve yoˬ. Awˬ yanˇ maw la htaˇ, nawˬ ga piˇ ve lehˬ yawˇ pa ve htaꞈ haꞈ yuˬ gʼa tuˬ sha ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ shu mvuhˇ miˬ lo Gʼuiˬ sha ve kanˉ awˬ yanˇ maw chaweh te jaw ve kʼoˆ ve, “ngaˬ awˬ vuiˬ te jaw ve hkʼe gʼa te htaˇ, teˇ nyi le le Liꞈ hpu maˍ˗e ve yoˬ. Yaꞈ hkʼaˇ, teˇ kaˬ lo kʼawꞈ kʼai htaˇ, Liꞈ hpu leh VDO maˍ piˇ tuˬ chaw kaꞈ maˇ mawˬ. Hkʼe te leh awˬ viˉ awˬ nyi Liꞈ hpu maˍ˗e tuˬ jehˬ laˇ leh teˇ geh kʼai ve yoˬ. Chi ngaˬ nyi ma sha tuˬ leh daꞈ ve hpawˇ kʼawꞈ dawˇ tuˬ ga laˇ ve yoˬ. Chi hkʼoˆ kaꞈ, choˬ kaˬ ve chaw geh hto toˇ ve tawˇ tanˬ yaw daꞈ tuˬ kaꞈ shiˍ la ve yoˬ. Chi ve ngaˬ ha lehˬ tuˬ te laˇ ve yoˬ.” w19.08 22 ¶10; 24 ¶13-14

Eˇvawˇdiˆ leh Suˇtuˆ hkʼe, awˬ viˉ awˬ nyi ve yaꞈ kuiˬ htaꞈ nyi ve pa taw, teˇ pawˆ pawˆ kʼo yawˇ hui htaꞈ haꞈ tuˬ haˍ jaˇ. Yaꞈ hkʼaˇ, ngaˬ hui teˇ nyi le le te yaꞈ ve yoˬ. Ngaˬ hui shu ve yaꞈ kuiˬ htaꞈ tiˉ nyi ve kʼo, yawˇ hui htaꞈ haꞈ tuˬ haˍ jaˇ. Tawˇ pa haˉ te kʼo, awˬ viˉ awˬ nyi teˇ gʼaˇ hpawnˬ daꞈ kuiˬ hkʼaw daꞈ kehˬ tuˬ maˇ gʼa te laˇ ve kʼo, ngaˬ hui nyi ma maˇ sha. Awˬ viˉ awˬ nyi oˇ ve teˇ gʼaˇ te yaꞈ jaw ve htaꞈ ngaˬ hui kʼawꞈ dawˇ nyi ve kʼo, nyi ma maˇ sha leh yawˇ htaꞈ haꞈ tuˬ haˍ jaˇ. Nawˬ chi hkʼe gʼa hpuˇ htaˇ, chi htaꞈ dawˇ nyi sheˍ. Ngaˬ hui leh awˬ viˉ awˬ nyi te yaꞈ ve htaꞈ Yaˬhoˉvaˬ mawˬ ve yoˬ. Yaꞈ hkʼaˇ, Yaˬhoˉvaˬ ngaˬ hui leh awˬ viˉ awˬ nyi htaꞈ kaꞈ haꞈ ve yoˬ. Chi htaꞈ pa taw, ngaˬ hui Yaˬhoˉvaˬ htaꞈ henˇ yuˬ leh awˬ viˉ awˬ nyi htaꞈ daꞈ ve hpawˇ hkʼaˬ htaˆ kaꞈ nyi sheˍ. Ngaˬ hui awˬ viˉ awˬ nyi htaꞈ haꞈ tuˬ coˇ caˇ htaˇ, nyi ma dawˇ hkʼaˇ taˍ hkʼaˇ teˇ hkʼaˇ tiˉ cawˬ la ve yoˬ.—Hpi 2:1, 2. w19.08 9-10 ¶7-8

Yaˬhoˉvaˬ nyi ma nuˇ nehˬ ve chaw htaꞈ haꞈ ve yoˬ. Nyi ma nuˇ nehˬ ve chaw ceh tiˉ yawˇ geh meuˆ daꞈ gʼa ve yoˬ. Yaꞈ hkʼaˇ, nyi ma uiˍ ve chaw htaꞈ yawˇ canˇ ve yoˬ. Ngaˬ hui Yaˬhoˉvaˬ nyi hkʼaˇ suh leh ha lehˬ tcuh gaˇ ve yoˬ. Chi htaꞈ pa taw, ngaˬ hui nyi ma nuˇ nehˬ ve chaw hpehꞈ gaˇ ve yoˬ. Nyi ma nuˇ nehˬ ve lehˬ nyi ma uiˍ ve htaꞈ peun daꞈ jaˇ. Liꞈ hpu hkʼaw kʼoˆ ve, nyi ma nuˇ nehˬ ve chaw lehˬ Yaˬhoˉvaˬ yawˇ aꞈ kehˉ uiˍ jaˇ ve tehꞈ dawˇ leh shu yawˇ aꞈ kehˉ daꞈ ve tehꞈ shawˍ ve yoˬ. (Hpi 2:3, 4) Chaw teˇ hpaˍ awˬ htaꞈ hpawˇ nyi kʼo, nyi ma nuˇ nehˬ ve htaꞈ shuˍ ve yoˬ. Yaꞈ hkʼaˇ, awˬ tehˬ kʼo yawˇ nyi ma maˇ nuˇ nehˬ. Yawˇ yaꞈ taw puiˉ leh tawˇ maˇ yaw ve yoˬ hehˉ. Chaw liˇ vaˇ liˇ maˇ heˆ leh awˬ pa awˬ e yawˇ htaꞈ maˍ piˇ ve pa taw, yawˆ yan puiˉ ve yoˬ. Awˬ tehˬ kʼo yawˇ caˆ muiˬ puiˉ ve chaw hpehꞈ gʼa ve yoˬ hehˉ. Maˇ maw ve awˬ yanˇ yawˇ hkʼaˬ hkʼe ve chaw hpehꞈ ve shu mawˬ tuˬ yoˬ.—Luˉ 6:45. w19.09 2 ¶1, 3-4

“Jawˇmawˇ Yeˍsuˆ ve ha lehˬ ve bon hkawˇ” yawˇ maˍ ve teˇ ceuˬ le le Liꞈ hpu hkʼaw awˬ tehˬ cawˬ ve yoˬ. Chi ngaˬ hui na yuˬ ve yoˬ. Chi hkʼoˆ kaꞈ, a shaꞈ teꞈ kuiˬ hkʼaw Gʼuiˬ sha ve kanˉ a yeˇ uiˍ jaˇ tehꞈ shawˍ ve, yawˇ ve awˬ liˇ awˬ hkʼaˇ htaꞈ gʼaꞈ te ve, leh Gʼuiˬ sha ve mvuhˇ miˬ hto toˇ ve yoˬ. (Maꞈ 6:33; 24:14) Chi hkʼoˆ kaꞈ, na yuˬ ve lehˬ Yeˍsuˆ ve awˬ viˉ awˬ nyi leuˆ yuˬ taˍ ve miˬ guiˬ hkʼoˆ chehˇ htaˇ a yeˇ uiˍ ve awˬ vuiˬ te ve htaꞈ gʼa ga piˇ ve kʼoˆ gaˇ ve yoˬ. (Maꞈ 25:31-40) Maˇ maw ve awˬ yanˇ yawˇ hui “yawˬ oˇ ve teˇ hpaˍ” htaꞈ ga piˇ tuˬ yoˬ. (Yoˇ 10:16) Yawˇ hui hkʼaˬ hkʼe te gʼa tuˬ le? Leuˆ yuˬ taˍ ve chaw 144,000 gʼaˇ Aˍmaˍgeˍdonˍ maˇ tanˬ sheˍ htaˇ mvuhˇ naw ma hkʼoˆ hkʼa peu˗eˬ taˆ˗e tuˬ yoˬ. Yawˇ hui mvuhˇ naw ma hkʼoˆ maˇ suh puiˉ ve a shaꞈ gʼa tuˬ yoˬ. Yawˇ hui mvuhˇ naw ma tcuh yaˇ geh teˇ geh Gawˆgaˇ htaꞈ bawˆ leh Yaˬhoˉvaˬ ve “chaw awˬ moˍ lonˉ” htaꞈ haꞈ shaˉ tuˬ yoˬ. (Hpeuꞈ 2:26, 27; 7:9, 10) Chaw awˬ moˍ lonˉ lehˬ Yaˬhoˉvaˬ leuˆ yuˬ taˍ ve chaw miˬ guiˬ hkʼoˆ chehˇ sheˍ htaˇ ga piˇ gʼa ve pa taw, chaw awˬ moˍ lonˉ ha lehˬ jaˇ! w19.09 12-13 ¶16-18

Yeˍsuˆ peꞈ laˇ ve awˬ vuiˬ htaꞈ ngaˬ hui te htaˇ, aˬ htoꞈ ma te ha lehˬ ve le? Awˬ lawn kʼo, ngaˬ hui daꞈ jaˇ ve nyi haꞈ shaˉ paˍ cawˬ ve yoˬ. Yaˬhoˉvaˬ lehˬ uiˍ jaˇ ve nyi haꞈ shaˉ paˍ hpehꞈ ve yoˬ. Yawˇ lehˬ ngaˬ hui kanˉ te ve htaꞈ awˬ hpfuhˇ shiˍ ve yoˬ. (Heˍ 6:10) Yawˇ ve kanˉ hkʼa dehꞈ te gʼa tuˬ ngaˬ hui loˍ ve kaꞈ peꞈ laˇ ve yoˬ. (2 Kawˇ 4:7; Gaˍ 6:5) Jawˇmawˇ Yeˍsuˆ kaꞈ nyi haꞈ shaˉ paˍ daꞈ jaˇ ve hpehꞈ ve yoˬ. Yawˇ shu htaꞈ te piˇ ve daꞈ jaˇ. (Yoˇ 13:15) Chi hkʼoˆ kaꞈ Hkriꞈ yaˇ awˬ moˍ hkʼaw ve nyi haꞈ shaˉ paˍ “yawˬ hawˉ shehˍ hpaˇ uiˍ jaˇ ve” Yeˍsuˆ htaꞈ henˇ yuˬ chehˇ ve yoˬ. (Heˍ 13:20; 1 Peˍ 5:2) Nyi haꞈ shaˉ paˍ maˍ laˇ leh ga laˇ htaˇ, yawˇ haꞈ pehnˇ ve, awˬ gʼaˇ peꞈ laˇ ve, leh haꞈ hanˉ ve hpeuꞈ maw laˇ ve yoˬ. Ngaˬ hui daꞈ jaˇ ve awˬ chawˇ kaꞈ cawˬ ve yoˬ. Miˬ guiˬ hkʼoˆ lo chaw yaˇ dawˇ law kuiˬ daꞈ ve ngaˬ hui hkʼe maˇ cawˬ. Leh ngaˬ hui hkʼe leˇ haꞈ daꞈ ve kaꞈ maˇ cawˬ. Ngaˬ hui awˬ viˉ awˬ nyi pehꞈ ve tzuhˆ ve hpawˇ maˇ te ve chaw geh kanˉ gʼa te ve yoˬ. Yawˇ hui shu aꞈ kehˉ a yeˇ uiˍ ve tehꞈ maˇ shawˍ. Yawˇ hui kanˉ teˇ geh te chehˇ ve chaw ceh maˇ dawˇ. Yaꞈ hkʼaˇ, awˬ tehˬ ve awˬ chawˇ shawˍ ve yoˬ. Yawˇ hui ngaˬ hui htaꞈ haꞈ jaˇ leh hkanˍ suh laˇ gʼa ve yoˬ! w19.09 20 ¶1; 23 ¶12-14

“[Yaˬhoˉvaˬ] ve awˬ nyi” htaꞈ shiˍ leh haꞈ yuˬ gʼa tuˬ Pawˇluꞈ ve tawˇ hkawˇ ngaˬ hui htaꞈ ga laˇ ve yoˬ. (1 Hteˇ 5:1-6) “[Yaˬhoˉvaˬ] ve awˬ nyi” chi ve teˇ tawn hkʼaw Pawˇluꞈ kʼoˆ ve tcuhˉ kuiˬ lehˬ, “Uiˍ ve Baˍbuˍlonˍ venˇ” tanˬ te luˬ htaˇ ve htaꞈ kʼoˆ ve yoˬ. Oˇ ve lehˬ miˬ guiˬ hkʼoˆ lo maˇ heˆ heˆ ve bon liˇ hkʼa peu˗eˬ htaꞈ Aˍmaˍgeˍdonˍ hkʼaw te luˬ tuˬ yoˬ. (Hpeuꞈ 16:14, 16; 17:5) “[Yaˬhoˉvaˬ] ve awˬ nyi” htaꞈ shiˍ leh haꞈ yuˬ gʼa tuˬ Pawˇluꞈ ve tawˇ hkawˇ ngaˬ hui htaꞈ ga laˇ ve yoˬ. Ngaˬ hui shu hkʼe ‘zuhꞈ muiˉ taˇ kʼa chehˇ hkʼa dehꞈ shaw taˍ˗oˬ.’ Tawˇ pa haˉ te kʼo, ngaˬ hui choˬ paˉ oˇ paˉ maˇ chehˇ leh mvuhˇ miˬ hpawˇ kaꞈ maˇ caˉ daꞈ. Ngaˬ hui mvuhˇ miˬ hpawˇ caˉ daꞈ ve kʼo, “miˬ guiˬ yaˇ hui” hkʼe hpehꞈ ve yoˬ. (Yoˇ 15:19) Gʼuiˬ sha ve mvuhˇ miˬ ceh tiˉ gawˬ lehˍ ve cawˬ tcuh laˇ gʼa ve tehꞈ ngaˬ hui yonˍ ve yoˬ. Ngaˬ hui shu kaꞈ shaw chehˇ taˍ tuˬ ga piˇ gaˇ leh Liꞈ hpu hkʼaw awˬ tehˬ hpehꞈ la tuˬ ve htaꞈ a yeˇ yuˬ tcuh gaˇ ve yoˬ. Tuꞈ jaˇ hkanˍ jaˇ ve awˬ nyi gaˬ la˗oˬ htaˇ, awˬ nu ve chaw Yaˬhoˉvaˬ ve kanˉ te tuˬ awˬ yanˇ maˇ cawˬ˗o ve tehꞈ ngaˬ hui tawnˇ taˍ cawˇ ve yoˬ. Chi htaꞈ pa taw, chi teˇ hkui kaꞈ ngaˬ hui haˆ haˆ hto toˇ tuˬ a yeˇ uiˍ jaˇ! w19.10 8 ¶3; 9 ¶5-6

Bvuhꞈ peuˬ htaˇ, Yeˍraˍmiˆ yawˇ ve awˬ chawˇ Baˍruˆ htaꞈ yonˍ gʼa leh mvuhˇ miˬ yaˇ htaꞈ kʼoˆ piˇ tcuh ve yoˬ. (Yrm 36:5, 6) Kawˆ tuˬ cawˬ ve kanˉ chi Baˍruˆ haꞈ hanˉ ve hkʼaw te ve yoˬ. Baˍruˆ bon yehˬ lonˉ gʼuˇ suhˍ lo kʼai leh Yeˍraˍmiˆ lawˬ ve hkʼe gʼaꞈ te ve htaꞈ, Yeˍraˍmiˆ hkʼaˬ hkʼe taw ha lehˬ ve dawˇ nyi sheˍ. (Yrm 36:8-10) Yuˇdaꞈ ve a maꞈ lonˉ teˇ hpaˍ shiˍ htaˇ, liꞈ daw oˇ ve Baˍruˆ yawˇ hui htaꞈ kaꞈ gʼaw maˍ laˇ tcuh ve yoˬ! (Yrm 36:14, 15) A maꞈ lonˉ teˇ hpaˍ gʼa kaˇ ve awˬ lawn dawˇ cheˆ leh jawˇ mawˇ Yawˇyaˍkenˍ htaꞈ ca kʼoˆ piˇ ve yoˬ. Jawˇmawˇ Yawˇyaˍkenˍ gʼa kaˇ htaˇ beuꞈ jaˇ. Jawˇmawˇ liꞈ daw tuˉ baˬ leh Yeˍraˍmiˆ leh Baˍruˆ htaꞈ kaꞈ hpeh yuˬ tcuh ve yoˬ. Yaꞈ hkʼaˇ, Yeˍraˍmiˆ maˇ kawˆ. Yawˇ liꞈ daw teˇ daw Baˍruˆ htaꞈ kʼawꞈ yuˬ piˇ leh Yaˬhoˉvaˬ ve tawˇ hkawˇ Baˍruˆ htaꞈ kʼawꞈ kʼoˆ maˍ piˇ ve yoˬ. “Liꞈ daw oˇ ve htaꞈ jawˇ mawˇ Yawˇyaˍkenˍ aˬ miˍ tuˉ baˬ peuˬ hkʼawꞈ nawˉ, liꞈ daw awˬ suhˉ teˇ maˬ kʼawꞈ yuˬ leh, awˬ lawn oˇ ve teˇ hpaˍ hkʼa peu˗eˬ” Yeˍraˍmiˆ Baˍruˆ htaꞈ kʼawꞈ bvuhꞈ tcuh ve yoˬ.—Yrm 36:26-28, 32. w19.11 3-4 ¶4-6

Yaˬhoˉvaˬ yawˇ ve a loˍ awˬ tehˬ biˇ la tuˬ yawˇ aˬ htoꞈ ma hpehꞈ tcuh gaˇ kaꞈ hpehꞈ gʼa ve yoˬ. Yawˇ lehˬ Saˍlaꞈ, awˬ gʼaˇ piˇ shehˍ hpaˇ, leh daꞈ ve awˬ lawn sha tanˇ maˍ shehˍ hpaˇ hpehꞈ ve yoˬ. Chi lehˬ yawˇ te ve teˇ ceuˬ ceuˬ ceh hpehꞈ sheˍ. (Isy 48:17; 2 Kawˇ 7:6; Gaˍ 3:8) Yaꞈ hkʼaˇ, laiˉ pawˆ kʼo, Yaˬhoˉvaˬ dawˇ taˍ ve hkʼe te biˇ la tuˬ chaw yaˇ htaꞈ yehˇ ve yoˬ. (Maꞈ 24:14; 28:19, 20; 2 Kawˇ 1:3, 4) Yawˇ ve a loˍ biˇ la tuˬ, cuˇ yiˍ, awˬ gʼaˇ, a shu htaꞈ piˇ kaꞈ gʼa ve yoˬ. Cuˇ yiˍ cawˬ paˍ teˇ hpaˍ hpaˍ kʼoˆ ve, chi lehˬ Yaˬhoˉvaˬ ve awˬ meh tcuhˉ kuiˬ htaꞈ kʼoˆ gaˇ ve yoˬ. Ngaˬ hui Yaˬhoˉvaˬ yehˇ ve chaw hpehꞈ gaˇ ve yoˬ. Yaꞈ hkʼaˇ, chaw teˇ hpaˍ Yaˬhoˉvaˬ yawˇ htaꞈ yehˇ sheˍ ve laˇ tehꞈ dawˇ ve yoˬ hehˉ. Aˬ htoꞈ ma te chi hkʼe dawˇ ve le? A shaꞈ maˇ la ve, a shaꞈ teꞈ kuiˬ hkʼaw gʼa hpuˇ ve, maˇ heˆ leh hkʼa dehꞈ te maˇ gʼa ve pa taw, Yaˬhoˉvaˬ ve kanˉ te gaˇ ve hkʼe te maˇ gʼa tehꞈ dawˇ ve yoˬ. w19.10 20 ¶1-2

Mawˇ jeˬ htaꞈ sheˉ lai ve lehˬ ngaˬ hui ve yonˍ ve htanˬ tuˬ htaꞈ a yeˇ maˇ te tuˬ te laˇ ve yoˬ. Tcuh yaˇ Pawˇluꞈ kʼoˆ ve, “maꞈ yaˇ te chehˇ ve chaw hkʼaˬ ve teˇ gʼaˇ maˇ kʼoˆ, a shu yawˇ ve maꞈ poˍ nyi hkʼaˇ suh tuˬ te gaˇ ve pa taw, a shu yawˇ awˬ to awˬ pon kanˉ” maˇ te. (2 Tiˆ 2:4) Awˬ tehˬ kʼo, Roˉmaꞈ ve maꞈ yaˇ tanˇ kaˬ te tuˬ a hkaw˗anˬ maˇ gʼa. Daꞈ ve maꞈ yaˇ hkʼe ngaˬ hui dawˇ teh taˍ ve htaꞈ hkʼaˬ htaˆ kaꞈ dawˇ nyi cawˇ ve yoˬ. Chi ve lehˬ Yaˬhoˉvaˬ leh Yeˍsuˆ nyi hkʼaˇ suh tuˬ awˬ pon yoˬ. Chi ve lehˬ miˬ guiˬ hkʼoˆ lo Saˍtanˍ te tcuh laˇ gaˇ ve aꞈ kehˉ awˬ hpfuhˇ hkʼaˆ jaˇ. Yaˬhoˉvaˬ ve kanˉ te tuˬ awˬ yanˇ leh awˬ gʼaˇ, ngaˬ hui ve yonˍ ve htanˬ tuˬ leh co ha hpawˇ ve laꞈ caˉ, hkʼaˬ htaˆ kaꞈ daꞈ chehˇ sheˍ le naˍ hkʼa dehꞈ gʼa chaˬ nyi ve yoˬ. Yaꞈ hkʼaˇ, ngaˬ hui hkʼaˬ htaˆ kaꞈ shaˍ tiꞈ gʼa te ve yoˬ! Aˬ htoꞈ ma pa taw le? Tcuh yaˇ Pawˇluꞈ shaˍ tiꞈ peꞈ laˇ ve, ‘paw sha la gaˇ ve chaw teˇ hpaˍ lehˬ, yonˍ ve teˇ ceuˬ htaꞈ hpfuhˆ baˬ taˉ’ tuˬ yoˬ.—1 Tiˆmoˉseˍ 6:9, 10. w19.11 17 ¶12, 14-15

‘Yaˬhoˉvaˬ ve awˬ nyi’ maˇ gaˬ la sheˍ htaˇ ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ’ tehꞈ hto laˇ tuˬ yoˬ. (1 Hteˇ 5:1-6) 1 Hteˇsaˍlawˇniˆ liꞈ 5:2 hkʼaw “[Yaˬhoˉvaˬ] ve awˬ nyi” tcuhˉ kuiˬ lehˬ “uiˍ jaˇ ve tuꞈ ve hkanˍ” ve htaꞈ kʼoˆ gaˇ ve yoˬ. (Hpeuꞈ 7:14) Tuꞈ jaˇ hkanˍ jaˇ ve awˬ nyi gaˬ la tuˬ ngaˬ hui hkʼaˬ hkʼe te shiˍ gʼa ve le? Liꞈ hpu hkʼaw kʼoˆ ve tuꞈ jaˇ hkanˍ jaˇ ve awˬ nyi gaˬ la yoˬ te htaˇ, maˇ kaˇ jaw ve awˬ lawn hto laˇ tuˬ yoˬ. “Mvuhˇ miˬ gawˬ la peuˬ leh ngaˬ hui teꞈ chiˉ dawˇ haˍ tuˬ maˇ cawˬ” tehꞈ uˉ peunˍ paˍ teˇ hpaˍ hto laˇ tuˬ yoˬ. Bon awˬ hoˉ teˇ hpaˍ kaꞈ pawnˇ daꞈ tuˬ ve laˇ? Maˇ shiˍ. Yaꞈ hkʼaˇ, hpehꞈ gʼa ve yoˬ. Hto laˇ ve chi Saˍtanˍ geh laˬ leh heˍ ve tehꞈ ngaˬ hui shiˍ ve yoˬ. Chi kawˆ tuˬ uiˍ jaˇ. Neˇ haiˬ chaw yaˇ kawˆ tuˬ maˇ cawˬ˗oˬ tehꞈ dawˇ tcuh htaˇ, maˇ hpehꞈ la jaw ve tuꞈ jaˇ hkanˍ jaˇ ve laˬ chehˇ ve yoˬ. Oˇ teˇ yanˇ “yaˇ paw tuˬ naˬ ve yaˇ miˇ teˇ gʼaˇ naˬ jaˇ ve htaꞈ gʼa hkanˍ ve hkʼe, luˬ ve sheˆ ve teˇ ceuˬ yawˇ hui awˬ hkʼoˆ teˇ cawˬ haˉ gaˬ la tuˬ yoˬ.” Yaˬhoˉvaˬ htaꞈ ka tiꞈ yeˬ ve chaw hkʼaˬ hkʼe hpehꞈ la tuˬ le? Tuꞈ jaˇ hkanˍ jaˇ ve hkʼaˬ htaˆ tanˬ tuˬ ve ngaˬ hui maˇ shiˍ. Chi hpehꞈ la htaˇ ngaˬ hui anˇ jaˇ. Yaꞈ hkʼaˇ, gu hehnˇ taˍ˗oꞈ. w19.09 9 ¶7-8

Hkʼa dehꞈ dawˇ teh taˍ sheˍ. Nawˬ hkʼa dehꞈ dawˇ teh taˍ ve kʼo, dawˇ teh taˍ ve htaꞈ te gʼa tuˬ sha jaˇ. Tawˇ pa haˉ te kʼo, nawˬ Liꞈ hpu kʼawꞈ gʼaw maˇ tuˬ dawˇ teh taˍ ve yoˬ. Nawˬ awˬ hkʼaˇ hkʼa dehꞈ gu teh taˍ ve maˇ cawˬ ve kʼo, dawˇ teh taˍ ve htaꞈ te maˇ gʼa. Nyi haꞈ shaˉ paˍ awˬ viˉ awˬ nyi htaꞈ awˬ gʼaˇ kʼawꞈ piˇ maˇ tuˬ dawˇ teh taˍ ve yoˬ. Yaꞈ hkʼaˇ, awˬ yanˇ ponˬ kʼai htaˇ yawˇ hui dawˇ teh taˍ ve htaꞈ maˇ gʼaꞈ te. Chi htaꞈ pa taw, yawˇ hui hkʼa dehꞈ te gʼa tuˬ na hkawˇ chi teˇ hpaˍ htaꞈ dawˇ nyi cawˇ ve yoˬ. “Awˬ viˉ awˬ nyi hkʼaˬ ve teˇ gʼaˇ geh awˬ gʼaˇ piˇ tuˬ awˬ yanˇ shawˍ teh˗oˬ laˇ? Yawˇ hui geh awˬ gʼaˇ piˇ tuˬ, awˬ yanˇ tinˍ piˇ˗oˬ ve laˇ?” Awˬ tehˬ ve htaꞈ nyi sheˍ. Awˬ yanˇ, hpu, maˇ heˆ leh te gaˇ ve hkʼe te gʼa ve teˇ gʼaˇ kaꞈ maˇ cawˬ. Chi htaꞈ pa taw, awˬ tehˬ ve htaꞈ nyi leh awˬ hkʼaˇ ca sheˍ. Te gʼa tuˬ awˬ hkʼaˇ maˇ cawˬ ve htaꞈ shiˍ htaˇ, nawˬ teˇ pawˆ gʼa kʼawꞈ dawˇ cheˆ ve yoˬ. w19.11 29 ¶11-12

Iˉsaˍyaˆ liꞈ 65:21-23. Tcuh kaˍ paˍ ve tawˇ hkawˇ chi awˬ gʼuˇ suhˍ hpawˇ hkʼaˬ hkʼe hpehꞈ la tuˬ ve kʼoˆ laˇ taˍ ve yoˬ. Miˬ guiˬ awˬ suhˉ hkʼaw chehˇ ve lehˬ ngaˬ hui teꞈ chiˉ maˇ gʼa te˗o ve laˇ? Maˇ heˆ. Liꞈ hpu hkʼaw kʼoˆ ve, Gʼuiˬ sha ve chaw awˬ bon cawˬ ve kanˉ htaꞈ te leh ha lehˬ tuˬ yoˬ. Yeˍsuˆ uˉ peunˍ ve teˇ hinˉ hkʼawꞈ hkʼaw ngaˬ hui yonˍ gʼa ve, ‘hpanˍ taˍ te taˍ ve lehˬ, luˬ ve sheˆ ve awˬ hawˉ lo gʼa ponˬ leh, Gʼuiˬ sha ve awˬ yaˇ awˬ duˬ teˇ hpaˍ ve awˬ meꞈ awˬ hponˇ htaꞈ caˉ daꞈ ve ponˬ ve teˇ ceuˬ htaꞈ gʼa tuˬ’ yoˬ. (Roˉ 8:21) Iˉsaˍreˍlaˆ chaw kanˉ te ve leh gʼaˇ jehˇ ve htaꞈ keunˍ lawꞈ cawˇ lawꞈ ve Yaˬhoˉvaˬ gu teh taˍ piˇ ve hkʼe, Yeˍsuˆ uˉ peunˍ ve teˇ hinˉ hkʼawꞈ awˬ hkʼaw lo Yaˬhoˉvaˬ yawˇ ve mvuhˇ miˬ yaˇ htaꞈ kaꞈ hkʼa shuˍ te piˇ tuˬ yoˬ. Oˇ ve teˇ yanˇ Gʼuiˬ sha htaꞈ oˉ kʼoˍ pui ve awˬ yanˇ cawˬ tuˬ tehꞈ ngaˬ hui yonˍ gʼa ve yoˬ. Gʼuiˬ sha htaꞈ oˉ kʼoˍ pui ve lehˬ a yeˇ uiˍ jaˇ leh ha lehˬ ve yoˬ. Miˬ guiˬ awˬ suhˉ hkʼaw ngaˬ hui chi hkʼe te ve awˬ yanˇ cawˬ tuˬ yoˬ. Yeˍsuˆ uˉ peunˍ ve teˇ hinˉ hkʼawꞈ ve awˬ hkʼaw lo ka tiꞈ yeˬ ve chaw teˇ gʼaˇ le le ha lehˬ tuˬ yoˬ tehꞈ yonˍ gʼa ve yoˬ. Oˇ ve teˇ yanˇ Gʼuiˬ sha ve kanˉ gʼa te ve ha lehˬ jaˇ. w19.12 12 ¶15; 13 ¶17-18

“Maˍ piˇ tcuhˉ taˍ” ve tcuhˉ kuiˬ lehˬ “maˍ leh teˇ hkui teˇ hkui shaˍ tiꞈ piˇ ve” htaꞈ kʼoˆ gaˇ ve yoˬ. Chi hkʼe te tuˬ awˬ pa awˬ e yaˇ htaꞈ awˬ yanˇ gʼa piˇ ve yoˬ. Teˇ pawˆ pawˆ kʼo yaˇ htaꞈ maˍ piˇ peuˬ kaꞈ gʼa kʼawꞈ maˍ piˇ ve pa taw heuˬ jaˇ. Yaꞈ hkʼaˇ, yaˇ Gʼuiˬ sha ve tawˇ hkawˇ htaꞈ na gʼa leh yuˬ yehˇ tuˬ awˬ pa awˬ e coˇ caˇ leh maˍ piˇ ve yoˬ. Hkʼe te leh yaˇ teˇ gʼaˇ leh teˇ gʼaˇ htaꞈ na gʼa piˇ sheˍ. Chiˇ mvuh ve liꞈ 127 hkʼaw yaˇ hkaˆ ce htaꞈ tehˆ taˍ ve yoˬ. (Chiˇ 127:4) Hkaˆ ce lehˬ laiˉ ceuˬ yuˬ te taˍ leh teˇ maˬ leh teˇ maˬ kaꞈ maˇ shuˍ daꞈ. Yaˇ kaꞈ teˇ gʼaˇ leh teˇ gʼaˇ maˇ shuˍ daꞈ. Chi htaꞈ pa taw, awˬ pa awˬ e yaˇ teˇ gʼaˇ leh teˇ gʼaˇ htaꞈ keunˍ daꞈ ve hkʼaw gʼa maˍ piˇ ve yoˬ. Chi teˇ hkui ve Iˉsaˬleˬlaˆ mvuhˇ miˬ hkʼaw chehˇ ve awˬ hpawˇ awˬ miˇ ma teˇ ca yaˇ 2 gʼaˇ Yaˬhoˉvaˬ hpawˇ chehˇ tuˬ hu ve awˬ hkʼaˇ kʼoˆ maˍ laˇ ve yoˬ. Yawˇ hui kʼoˆ ve, “yaˇ htaꞈ Liꞈ hpu maˍ piˇ htaˇ teˇ gʼaˇ teˇ kaˬ maˍ piˇ ve yoˬ.” Yaˇ htaꞈ Liꞈ hpu maˍ piˇ htaˇ hkʼaˬ hkʼe te cawˇ ve, yehˬ shehˍ hpaˇ gʼa dawˇ cheˆ cawˇ ve yoˬ. w19.12 26-27 ¶18-20

Ngaˬ hui tuꞈ ve hkanˍ ve leh shoꞈ shaꞈ ve gʼa hpuˇ htaˇ, ngaˬ hui loˍ htaˇ ga laˇ ve chaw htaꞈ awˬ hpfuhˇ shiˍ ve yoˬ. Raiˍanˇ awˬ pa maˇ dawˇ maˇ gaˇ ve hkʼaw suh˗e ve yoˬ! Yawˇ kʼoˆ ve, “nyi ma luˬ jaˇ htaˇ teˇ nyi le le te jaw ve kaꞈ te maˇ gʼa. Awˬ viˉ awˬ nyi a ciˉ ceh ga laˇ ve htawˇ, awˬ gʼaˇ gʼa jaˇ”. Nawˬ te ve awˬ ceuˬ shu htaꞈ awˬ tehˬ awˬ na ga piˇ ve kʼo, a ciˉ ceh ga piˇ ve htawˇ awˬ gʼaˇ gʼa jaˇ. Maˍkuˆ awˉ lawˉ peuˇ ve Hkriꞈ yaˇ hpehꞈ ve kanˉ maˇ jaˇ. Chi hkʼe hpehꞈ ve htawˇ, yawˇ tcuh yaˇ Pawˇluꞈ htaꞈ ga piˇ tuˬ awˬ yanˇ ca leh awˬ gʼaˇ piˇ sheˍ. Maˍkuˆ ga piˇ ve Pawˇluꞈ nyi ma sha jaˇ. Ehn˗ce˗la awˬ pi shu tiˇ pehˍ piˇ ve pa taw, yawˇ nyi ma luˬ jaˇ leh shu ga laˇ ve htaꞈ ha lehˬ ve yoˬ. Yawˇ kʼoˆ ve, “awˬ chawˇ awˬ tehˬ awˬ na ga laˇ ve leh ga laˇ tuˬ loˍ htaˇ aˇ naˍ tuˬ maˇ loˍ leh, yawˇ hui ha lehˬ ha kʼa ga laˇ ve yoˬ.” Chi htaꞈ pa taw, a shu yawˇ awˬ to htaꞈ na nyi cawˇ ve, ‘ngaˬ yonˍ hkʼaˇ hkʼa shuˍ ve chaw htaꞈ awˬ gʼaˇ piˇ leh shu loˍ htaˇ ngaˬ awˬ tehˬ awˬ na ga piˇ˗aw laˇ?’ w20.01 11-12 ¶14-16

Leuˆ yuˬ piˇ taˍ ve chaw Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, “maˇ keunˍ ve awˬ hkʼaw lo” hkaoˍ monˇ caˇ leh a pehˉ meuˇ gʼuiˬ dawˬ ve kʼo hkʼaˬ hkʼe te tuˬ le? Yawˇ hkaoˍ monˇ caˇ leh a pehˉ meuˇ gʼuiˬ dawˬ ve htawˇ, Yaˬhoˉvaˬ ve hteˇ ve cawˇ ve awˬ liˇ awˬ hkʼaˇ htaꞈ maˇ gʼaꞈ te kʼo maˇ keunˍ. (Heˍ 6:4-6; 10:26-29) Leuˆ yuˬ piˇ taˍ ve chaw “laꞈ shawnˍ” gʼa gaˇ ve kʼo, yawˇ caˉ leh ka tiꞈ gʼa yeˬ ve yoˬ. ‘Mvuhˇ naw ma lo taˆ˗e tuˬ, Gʼuiˬ sha lehˬ Yeˍsuˆ Hkriꞈ htaꞈ cuˇ leh kuˬ yuˬ ve htaꞈ gʼa htaˇ hkʼa gaˬ gʼaꞈ yuˬ tcuhˉ taˍ ve yoˬ.’ (Hpi 3:13-16) Yaˬhoˉvaˬ ve daꞈ kehˬ ve awˬ ha hpu lehˬ yawˇ ve kanˉ te ve chaw htaꞈ nyi ma nuˇ nehˬ tcuh gaˇ ve yoˬ. Uiˍ muiˬ caˆ muiˬ ve maˇ heˆ. (Efs 4:1-3; Kawˇ 3:10, 12) Chi htaꞈ pa taw, leuˆ yuˬ piˇ taˍ ve chaw shu aꞈ kehˉ daꞈ ve maˇ heˆ leh yawˇ ve daꞈ kehˬ ve awˬ ha hpu yawˇ ve kanˉ te ve chaw aꞈ kehˉ peꞈ laˇ maˇ ve tehꞈ yawˇ hui maˇ dawˇ. Yawˇ awˬ viˉ awˬ nyi aꞈ kehˉ Liꞈ hpu hkʼaw hkʼa dehꞈ na gʼa ve tehꞈ maˇ dawˇ cawˇ. “Nawˬ kaꞈ leuˆ yuˬ piˇ taˍ ve chaw hpehꞈ ve” tehꞈ awˬ viˉ awˬ nyi htaꞈ maˇ kʼoˆ piˇ ve awˬ hkʼoˆ kaꞈ Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, hkaoˍ monˇ caˇ leh a pehˉ meuˇ gʼuiˬ dawˬ cawˇ ve tehꞈ kaꞈ maˇ kʼoˆ piˇ. Chi hkʼe te ve aꞈ kehˉ yawˇ nyi ma nuˇ nehˬ leh, Yaˬhoˉvaˬ teˇ gʼaˇ ceh tiˉ leuˆ yuˬ ve tehꞈ shiˍ cawˇ ve yoˬ. w20.01 27-28 ¶4-5

Yaˬhoˉvaˬ ngaˬ hui yawˇ geh meuˆ daꞈ leh tawˇ yaw daꞈ tcuh gaˇ ve yoˬ. Yaˬhoˉvaˬ ngaˬ hui htaꞈ kʼoˆ laˇ ve, “hkʼaˬ htaˆ kaꞈ bon lawˬ tcuhˉ taˍ˗oꞈ.” (Roˉ 12:12) Yawˇ ngaˬ hui ve hkawˇ hkʼaˬ htaˆ kaꞈ na laˇ ve yoˬ. Yawˇ maˇ taˇ leh heuˬ jaˇ ve pa taw, ngaˬ hui ve hkawˇ maˇ na laˇ ve maˇ heˆ. Ngaˬ hui yawˇ ve hkawˇ na tuˬ Liꞈ hpu gʼaw leh Liꞈ hpu hkʼaw hkʼa dehꞈ na gʼa tuˬ awˬ nu ve teˇ hpaˍ kaꞈ ga laˇ ve yoˬ. Chi hkʼoˆ kaꞈ, hpawnˬ daꞈ kuiˬ hkʼaw Yaˬhoˉvaˬ ve hkawˇ hkʼa dehꞈ na gʼa ve yoˬ. Ngaˬ hui hkʼaˬ htaˆ kaꞈ Yaˬhoˉvaˬ geh yaw daꞈ ve kʼo meuˆ daꞈ tuˬ yoˬ. Yaˬhoˉvaˬ ngaˬ hui nyi ma hkʼaw cawˬ ve yawˇ htaꞈ kʼoˆ maˍ laˇ tcuh gaˇ ve yoˬ. (Chiˇ 62:8) Ngaˬ hui a shu yawˇ awˬ to htaꞈ na nyi cawˇ ve, ‘bon lawˬ htaˇ liꞈ hkʼaw bvuhꞈ taˍ ve hkʼe leˇ kʼoˆ peuˬ kaꞈ kʼoˆ ve maˇ heˆ leh ngaˬ nyi ma hkʼaw cawˬ ve awˬ ceuˬ bvuhꞈ tawˆ taˍ ve hkʼe leˇ kʼoˆ˗aw laˇ?’ Maˇ kʼoˆ taˍ. Nawˬ Yaˬhoˉvaˬ htaꞈ haꞈ leh meuˆ daꞈ gaˇ tuˬ yoˬ. Chi htaꞈ pa taw, nawˬ hkʼaˬ htaˆ kaꞈ yawˇ geh gʼa yaw daꞈ ve yoˬ. Nawˬ dawˇ taˍ ve hkʼe, ha lehˬ ve, dawˇ haˍ ve, leh nawˬ dawˇ haˍ dawˇ hkiˆ ve awˬ ceuˬ yawˇ htaꞈ kʼoˆ maˍ piˇ ve yoˬ. Yawˇ ga laˇ tuˬ lawˬ gʼa ve tehꞈ nawˬ yonˍ gʼa ve yoˬ. w20.02 9 ¶4-5

Yaˬhoˉvaˬ ve chaw htaꞈ nyi haꞈ shaˉ tuˬ a yeˇ uiˍ ve awˬ vuiˬ yawˇ nyi haꞈ shaˉ paˍ htaꞈ piˇ ve yoˬ. Neˍhaˍmiˆ Yaˬhoˉvaˬ ve chaw htaꞈ maˍ piˇ ve awˬ hkʼaˇ nyi haꞈ shaˉ paˍ henˇ yuˬ gʼa ve yoˬ. Neˍhaˍmiˆ Yuˇdaꞈ mvuhˇ miˬ ve jawˇ mawˇ hpehꞈ ve pa taw, yawˇ kanˇ paˆ cawˬ jaˇ. (Neˍ 1:11; 2:7, 8; 5:14) Neˍhaˍmiˆ gʼa hpuˇ ve htaꞈ dawˇ nyi sheˍ. Yuˇdaꞈ chaw Yaˬhoˉvaˬ htaꞈ oˉ kʼoˍ pui ve maˇ yawˆ yan leh bon yehˬ htaꞈ yaꞈ ve hpawˇ yehˇ chehˇ ve, leh Yaˬhoˉvaˬ ve awˬ liˇ tawˇ hkawˇ hkʼaw hpu tanˇ tanˇ taˍ ve Leˍviˆ chaw htaꞈ piˇ kʼoˆ ve hkʼe yawˇ hui maˇ gʼaꞈ te ve tehꞈ Neˍhaˍmiˆ shiˍ la ve yoˬ. Yawˇ hui shinˉ nyi ve awˬ liˇ htaꞈ kaꞈ maˇ gʼaꞈ te, leh Yaˬhoˉvaˬ htaꞈ oˉ kʼoˍ maˇ pui ve awˬ nu ve mvuhˇ miˬ yaˇ htaꞈ heuˆ ve yoˬ. Neˍhaˍmiˆ awˬ lawn chi ve htaꞈ gʼa gu ve yoˬ. (Neˍ 13:4-30) Mvuhˇ miˬ yaˇ yawˇ ve hkawˇ na tuˬ Neˍhaˍmiˆ kanˇ paˆ yehˇ leh nyiˉ piˇ ve maˇ te. Yawˇ Yaˬhoˉvaˬ beˆ maˍ laˇ tuˬ bon hkʼa dehꞈ lawˬ leh chaw yaˇ htaꞈ Yaˬhoˉvaˬ ve awˬ liˇ tawˇ hkawˇ maˍ piˇ ve yoˬ. (Neˍ 1:4-10; 13:1-3) Neˍhaˍmiˆ yawˇ hui geh nyi ma nuˇ nehˬ ve hkʼaw kanˉ teˇ geh te leh Yeˍruˆsaˍlehnˍ lanˇ venˇ awˬ suhˉ kʼawꞈ te ve yoˬ.—Neˍ 4:15. w19.09 16 ¶9-10