Ha pa 9 maˬ

Yaˬhoˉvaˬ leh Yeˍsuˆ kanˉ maˇ maˇ te ve hkʼe ngaˬ hui hkʼaˬ htaˆ kaꞈ gʼa te ve htaꞈ kʼoˆ gaˇ ve laˇ? Maˇ heˆ. Awˬ tehˬ kʼo Yaˬhoˉvaˬ kanˉ te peuˬ hkʼawꞈ nawˉ, heuˬ ve maˇ cawˬ leh gʼaˇ jehˇ tuˬ maˇ loˍ. Yaꞈ hkʼaˇ, Liꞈ hpu hkʼaw kʼoˆ ve, Gʼuiˬ sha mvuhˇ naw ma leh miˬ guiˬ htaꞈ hpanˍ peuˬ hkʼawꞈ nawˉ yawˇ “kanˉ maˇ te leh gʼaˇ jehˇ chehˇ taˍ ve yoˬ.” (Tawˆ 31:17) Chi kʼoˆ gaˇ ve lehˬ Yaˬhoˉvaˬ teˇ ceuˬ le le htaꞈ hpanˍ leh yawˇ hpanˍ taˍ ve awˬ ceuˬ htaꞈ ha lehˬ chehˇ ve yoˬ. Yeˍsuˆ miˬ guiˬ hkʼoˆ chehˇ ve awˬ yanˇ yawˇ kanˉ te hkeuꞈ ve htawˇ, yawˇ gʼaˇ jehˇ ve leh awˬ chawˇ geh awˍ caˇ tuˬ awˬ yanˇ ca ve yoˬ. (Maꞈ 14:13; Luˉ 7:34) Gʼuiˬ sha ve kanˉ te ve chaw ha lehˬ ve cawˬ tuˬ Liꞈ hpu hkʼaw awˬ gʼaˇ peꞈ laˇ ve yoˬ. Yawˇ hui kaiˬ ve chaw gʼa hpehꞈ ve yoˬ. (Tawˇ 15:19) Teˇ pawˆ pawˆ kʼo, nawˬ yehˬ kʼa gʼa caˇ tuˬ kanˉ gʼa te ve yoˬ. Yeˍsuˆ ve awˬ laꞈ gʼawˇ teˇ gʼaˇ le le kaꞈ hto toˇ ve awˬ vuiˬ cawˬ ve htawˇ, gʼaˇ gʼa jehˇ cawˇ ve yoˬ. w19.12 2 ¶2; 3 ¶4-5

Neˇ teˇ hpaˍ ve awˬ lawn kʼoˆ daꞈ ve htaꞈ jaw kʼai˗oˆ. Awˬ lawn chi ve hkʼaw Yeˍsuˆ ve awˬ lawn htaꞈ ngaˬ hui henˇ yuˬ gaˇ ve yoˬ. Yeˍsuˆ miˬ guiˬ hkʼoˆ maˇ laˬ sheˍ htaˇ yawˇ mvuhˇ naw ma hkʼoˆ chehˇ leh Saˍtanˍ leh neˇ teˇ hpaˍ ve awˬ lawn yawˇ shiˍ ve yoˬ. Yaꞈ hkʼaˇ, yawˇ hui aˬ htoꞈ ma te ve Yeˍsuˆ maˇ gʼa kʼoˆ laˇ taˍ. Yeˍsuˆ Yaˬhoˉvaˬ ve awˬ lawn shaˉ hkiˆ hkanˍ gaˇ ve, Saˍtanˍ htaꞈ awˬ gʼaˇ maˇ piˇ gaˇ. Ngaˬ hui Yeˍsuˆ htaꞈ henˇ yuˬ gaˇ ve pa taw, neˇ ve awˬ lawn maˇ kʼoˆ daꞈ. Yaꞈ hkʼaˇ, daꞈ ve awˬ lawn teˇ hpaˍ hpehꞈ la ve pa taw ngaˬ hui ha lehˬ ve yoˬ. Chi lehˬ awˬ tehˬ ve htaꞈ kʼoˆ ve yoˬ. (Chiˇ 45:1) Neˇ teˇ hpaˍ htaꞈ taˇ kawˆ. Miˬ guiˬ hkʼoˆ maˇ biˇ ve pa taw ngaˬ hui htaꞈ maˇ daꞈ ve heuˆ la ve yoˬ. Kawˆ tuˬ, naˬ ve gawˬ ve, maˇ heˆ leh suh ve ngaˬ hui maˇ dawˇ maˇ gaˇ ve hkʼaw hpehꞈ la gʼa ve yoˬ. Yaꞈ hkʼaˇ, maˇ mawˬ gʼa ve awˬ ha ku chi hkʼe te laˇ ve tehꞈ ngaˬ hui maˇ dawˇ cawˇ. Liꞈ hpu hkʼaw kʼoˆ ve, awˬ ceuˬ chi ve teˇ gʼaˇ le le maˇ dawˇ maˇ gaˇ ve hkʼaw hpehꞈ la puiˉ ve yoˬ. (Cuˇ 9:11) Yaˬhoˉvaˬ lehˬ neˇ teˇ hpaˍ aꞈ kehˉ kanˇ paˆ cawˬ jaˇ. w19.04 23-24 ¶13-14

Yaˇ htaꞈ pehꞈ ve tzuhˆ ve hpawˇ naˬ taweh te piˇ ve gʼa kaˇ htaˇ, nyi haꞈ shaˉ paˍ mvuhˇ miˬ ve awˬ liˇ htaꞈ gʼaꞈ te leh mvuhˇ miˬ kanˉ te paˍ htaꞈ kʼoˆ piˇ tuˬ laˇ? Kʼoˆ piˇ tuˬ yoˬ. Yawˇ hui ve mvuhˇ miˬ hkʼaw awˬ liˇ tawˇ hkawˇ chi hkʼe cawˬ ve kʼo, yawˇ hui gʼa gʼaꞈ te ve yoˬ. Awˬ liˇ chi teˇ hpaˍ Gʼuiˬ sha ve awˬ liˇ htaꞈ maˇ yaꞈ. (Tcuh 5:28, 29) Hkʼe te leh, awˬ lawn chi hkʼe ve nyi haꞈ shaˉ paˍ gʼa kaˇ htaˇ, yawˇ hui hkʼaˬ hkʼe gʼa te cawˇ ve awˬ hkʼaˇ gʼa ca ve yoˬ. Yaˇ haiˬ ve gʼa hpuˇ ve, yaˇ ve awˬ pa awˬ e, leh awˬ nu ve chaw awˬ lawn chi htaꞈ shiˍ ve geh nyi haꞈ shaˉ paˍ tawˇ yaw daꞈ htaˇ, yawˇ hui mvuhˇ miˬ kanˉ te paˍ htaꞈ kʼoˆ piˇ tuˬ a hkaw˗anˬ cawˬ ve tehꞈ haꞈ pehnˇ ve hkʼaw kʼoˆ maˍ piˇ ve yoˬ. Yaꞈ hkʼaˇ, haiˬ ve te ve chaw awˬ viˉ awˬ nyi hpehꞈ leh hkʼawꞈ nawˉ htaˇ chaw laiˉ gʼaˇ shiˍ la ve kʼo hkʼaˬ hkʼe te tuˬ le? Mvuhˇ miˬ kanˉ te paˍ htaꞈ ca kʼoˆ piˇ ve chaw yawˇ Gʼuiˬ sha ve awˬ meh luˬ tuˬ te piˇ ve tehꞈ dawˇ nyi cawˇ˗aw laˇ? Maˇ dawˇ nyi cawˇ. Gʼuiˬ sha ve awˬ meh luˬ tuˬ te piˇ ve chaw lehˬ te yaꞈ ve chaw yoˬ. w19.05 10 ¶13-14

Awˬ hpawˇ awˬ miˇ ma yawˆ yan daꞈ cawˇ leh heuˆ daꞈ htaˇ hkanˍ taˍ ve htaꞈ gʼaꞈ te cawˇ ve tehꞈ Liꞈ hpu hkʼaw maˍ laˇ ve yoˬ. Yawˇ huiˉ maˬ coˇ caˇ leh hkʼaˬ htaˆ kaꞈ teˇ geh chehˇ tuˬ Liꞈ hpu hkʼaw beˆ maˍ laˇ ve yoˬ. “Hawˉ hkʼaˆ lehˬ yawˇ ve awˬ pa awˬ e htaꞈ hpaˆ daꞈ taˉ leh, yawˇ ve awˬ miˇ ma htaꞈ caˉ daꞈ ve awˬ hkʼaw lo yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” (Awˬ 2:24) Yaꞈ hkʼaˇ, miˬ guiˬ ve cuˇ yiˍ gʼaꞈ te ve chaw kʼoˆ ve, awˬ hpawˇ awˬ miˇ ma a shu yawˇ loˍ ve htaꞈ awˉ lawˉ dawˇ nyi cawˇ ve yoˬ. Baˬ daꞈ ve htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “chaw liˇ vaˇ liˇ teˇ ceuˬ ceuˬ kʼo, yawˇ hui heuˆ daꞈ htaˇ hkanˍ taˍ ve hkʼaw ‘a shaꞈ teꞈ chehˇ ve teˇ co˗e’ tawˇ hkawˇ chi lehˬ ‘haꞈ daꞈ chehˇ sheˍ ve’ tehꞈ kʼawꞈ pa ve yoˬ.” Dawˇ hkʼaˇ chi hkʼe ve htaꞈ pa taw, yehˬ kʼa hpaˆ daꞈ tuˬ leh laiˉ gʼaˇ nyi ma naˬ jaˇ tuˬ te piˇ ve yoˬ. Heuˆ daꞈ ve htaꞈ caˉ daꞈ ve miˬ guiˬ ve dawˇ hkʼaˇ cuˇ yiˍ maˇ cawˬ ve tehꞈ ngaˬ hui hkʼa dehꞈ gʼa mawˬ ve yoˬ. w19.05 23 ¶12

Pawˇluꞈ yawˇ hui htaꞈ dawˇ haˍ ve yoˬ. Hkriꞈ yaˇ teˇ hpaˍ maˇ cawˇ ve dawˇ hkʼaˇ cawˬ ve pa taw, Saˍtanˍ ve miˬ guiˬ te tcuh gaˇ ve hkʼe te ve yoˬ. (Efs 4:17-19) Chi ve ngaˬ hui geh kaꞈ hpehꞈ la gʼa ve yoˬ. Ngaˬ hui Yaˬhoˉvaˬ ve kanˉ maˇ gʼa te tuˬ Saˍtanˍ coˇ caˇ jaˇ. Yawˇ miˬ guiˬ ve gʼuiˬ sha hpehꞈ ve pa taw, awˬ hkʼaˇ laiˉ hkʼaˇ yehˇ ve yoˬ. Tawˇ pa haˉ te kʼo, ngaˬ hui a yeˇ uiˍ ve leh awˬ meh bvuhˬ ve chaw hpehꞈ gaˇ ve kʼo, awˬ ceuˬ chi ve htaꞈ yehˇ leh ngaˬ hui Yaˬhoˉvaˬ geh maˇ gʼa meuˆ daꞈ tuˬ te laˇ ve yoˬ. Ngaˬ hui aˉ hkʼaw lo chehˇ htaˇ te ve, liꞈ henˇ yehˬ lo chehˇ htaˇ te ve, leh ngaˬ hui awˬ paˇ awˬ kui lo chehˇ ve chaw te ve awˬ ceuˬ htaꞈ cuˇ leh yawˇ hkʼe dawˇ tuˬ te laˇ ve yoˬ. Ngaˬ hui ve nyi ma hkʼaw cawˬ ve maˇ daꞈ ve awˬ ceuˬ htaꞈ yuˬ baˬ tuˬ te gʼa˗aw laˇ? (2 Kawˇ 10:4) Pawˇluꞈ kʼoˆ ve, “tawˇ gʼawˬ daꞈ ve awˬ ceuˬ teˇ hpaˍ htaꞈ maˇ kʼoˆ, Gʼuiˬ sha htaꞈ maˇ gʼa shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ maˇ kʼoˆ, ngaˬ hui yuˬ baˬ hpaˆ baˬ ve yoˬ. Dawˇ hkʼaˇ teˇ maˬ le le htaꞈ ngaˬ hui hpeh yuˬ leh, Hkriꞈ htaꞈ na yuˬ piˇ lawˬ ve yoˬ.” (2 Kawˇ 10:5) Yaˬhoˉvaˬ ga laˇ tcuh ve kʼo, ngaˬ hui maˇ daꞈ ve dawˇ hkʼaˇ yuˬ baˬ gʼa ve yoˬ. w19.06 8 ¶1-3

Haˍnaˆ, Daˬviˆ, chiˇ mvuh ve liꞈ bvuhꞈ paˍ dawˇ haˍ jaˇ ve htawˇ, Yaˬhoˉvaˬ ga laˇ tuˬ yawˇ hui gʼaˇ va ve yoˬ. Yawˇ hui bon lawˬ leh dawˇ haˍ ve hkʼa peu˗eˬ Gʼuiˬ sha htaꞈ kʼoˆ piˇ ve yoˬ. Hkʼe te leh Yawˇ hui hkʼaˬ htaˆ kaꞈ Yaˬhoˉvaˬ htaꞈ oˉ kʼoˍ pui˗e ve yoˬ. (1 Saˍ 1:9, 10; Chiˇ 55:22; 73:17; 122:1) Haꞈ pehnˇ ve hkʼaw Yaˬhoˉvaˬ teˇ gʼaˇ leh teˇ gʼaˇ ve bon lawˬ hkawˇ htaꞈ hkʼawꞈ piˇ ve yoˬ. Haˍnaˆ nyi ma gawˬ lehˍ cawˬ la ve yoˬ. (1 Saˍ 1:18) Daˍviˆ kʼoˆ ve, “daꞈ ve chaw lehˬ dawˇ haˍ tuˬ awˬ ceuˬ laiˉ ceuˬ htaꞈ gʼa hpuˇ ve yoˬ. Yaꞈ hkʼaˇ, Gʼuiˬ sha yawˇ htaꞈ ponˬ piˇ ve yoˬ.” (Chiˇ 34:19) Chiˇ mvuh ve liꞈ bvuhꞈ paˍ kʼoˆ ve, Yaˬhoˉvaˬ˗oˬ ‘ngaˬ ve laꞈ sheh htaꞈ vawˆ taˍ laˇ˗oˆ.’ Chi kʼoˆ gaˇ ve lehˬ, Yaˬhoˉvaˬ haꞈ pehnˇ ve hkʼaw yawˇ htaꞈ beˆ maˍ piˇ ve yoˬ. (Chiˇ 73:23, 24) Chi teˇ hpaˍ ngaˬ hui htaꞈ aˬ htoꞈ ma maˍ laˇ ve le? Laiˉ pawˆ kʼo, ngaˬ hui shoꞈ shaꞈ ve gʼa hpuˇ ve pa taw, dawˇ haˍ leh awˬ gʼaˇ nuˇ ve yoˬ. Yaꞈ hkʼaˇ, Yaˬhoˉvaˬ awˬ nu ve chaw htaꞈ ga piˇ ve awˬ hkʼaˇ dawˇ nyi htaˇ, yawˇ geh bon lawˬ ve, leh yawˇ kʼoˆ laˇ ve awˬ ceuˬ htaꞈ ngaˬ hui gʼaꞈ te htaˇ tawˍ daꞈ gʼaˇ tuˬ yoˬ.—Chiˇ 143:1, 4-8. w19.06 17 ¶14-15

Shu kʼoˆ ve leh te ve htaꞈ pa taw, nawˬ Yaˬhoˉvaˬ ve Shaˉhkiˆhkanˍ ve chaw hpehꞈ ve taˇ yaꞈ taw. (Miˆ 4:5) Yeˍsuˆ suh peuˬ hkʼawꞈ nawˉ tcuh yaˇ hui Yeˍruˆsaˍlehnˍ venˇ hkʼaw te ve awˬ ceuˬ, ngaˬ hui kawˆ ve maˇ cawˬ tuˬ maˍ laˇ ve yoˬ. Yuˇdaꞈ chaw bon awˬ hoˉ yawˇ hui htaꞈ hkʼaˬ hkʼe taw nyi bawˬ ve yawˇ hui shiˍ ve yoˬ. (Tcuh 5:17, 18, 27, 28) Yaꞈ hkʼaˇ, tcuh yaˇ hui bon yehˬ lonˉ hkʼaw teˇ nyi le le bon maˍ leh, Yeˍsuˆ ve awˬ laꞈ gʼawˇ hpehꞈ ve tehꞈ shu htaꞈ hpeuꞈ maw piˇ ve yoˬ. (Tcuh 5:42) Kawˆ ve htaꞈ pa taw, yawˇ hui bon maˇ maˍ haˆ tuˬ maˇ te laˇ tcuh. Liꞈ henˇ kuiˬ, kanˉ te kuiˬ, ngaˬ hui awˬ paˇ awˬ kui chehˇ ve chaw htaꞈ ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ shiˍ tcuh tuˬ taˇ kawˆ. (Tcuh 4:29; Roˉ 1:16) Tcuh yaˇ hui shu nyi bawˬ piˇ ve htawˇ, aˬ htoꞈ ma te ha lehˬ ve le? Yawˇ hui Yaˬhoˉvaˬ ve a loˍ htaꞈ gʼaꞈ te ve pa taw, shu nyi bawˬ leh fawˉ mehˍ piˇ ve htawˇ ha lehˬ ve yoˬ. (Luˉ 6:23; Tcuh 5:41; 1 Peˍ 2:19-21) Ngaˬ hui cawˇ ve htaꞈ te ve pa taw shu nyi bawˬ laˇ ve htawˇ, Yaˬhoˉvaˬ ve kanˉ caˉ leh te tuˬ yoˬ. w19.07 7 ¶19-20

Yeˍsuˆ leh yawˇ ve awˬ laꞈ gʼawˇ Yuˇdaꞈ chaw hpehꞈ ve Moˉseˍ ve awˬ liˇ tawˇ hkawˇ awˬ hawˉ loˍ chehˇ ve pa taw, shinˉ nyi htaꞈ taˍ uiˍ ve yoˬ. Yaꞈ hkʼaˇ, Yeˍsuˆ kʼoˆ ve leh te ve shinˉ nyi htaꞈ taˍ uiˍ ve tehꞈ hpeuꞈ maw piˇ ve yoˬ. Shinˉ nyi htaˇ daꞈ ve htaꞈ te leh shu htaꞈ ga piˇ ve daꞈ ve awˬ ceuˬ hpehꞈ leh te gʼa ve yoˬ. (Maꞈ 12:9-11) Chi hkʼoˆ kaꞈ, Gʼuiˬ sha shinˉ nyi cawˬ tcuh laˇ ve lehˬ Yeˍsuˆ te ve awˬ ceuˬ a yeˇ uiˍ ve tehꞈ hpeuꞈ maw piˇ ve yoˬ. Awˬ nyi oˇ ve mvuhˇ miˬ yaˇ gʼaˇ jehˇ ve pa taw, yawˇ hui Gʼuiˬ sha htaꞈ oˉ kʼoˍ pui gaˇ tuˬ te piˇ ve yoˬ. Gʼuiˬ sha geh meuˆ daꞈ tuˬ shinˉ nyi htaˇ gʼaˇ jehˇ ve yehˬ kʼa hkʼaw Yeˍsuˆ kaꞈ uiˍ la ve yoˬ. “[Yeˍsuˆ] uiˍ la kuiˬ Naˍzaˍrehˆ venˇ lo kʼawꞈ gaˬ la leh, yawˇ awˬ liˇ cawˬ taˍ ve hkʼe shinˉ nyi htaˇ bon yehˬ taˆ˗e ve yoˬ. Liꞈ hpu htaꞈ gʼaw tuˬ yawˇ tu” huˉ ve ngaˬ hui yawˇ ve awˬ lawn gʼaw htaˇ gʼa shiˍ ve yoˬ. (Luˉ 4:15-19) Chi hkʼoˆ kaꞈ, Yeˍsuˆ ve awˬ laꞈ gʼawˇ hui shinˉ nyi ve awˬ liˇ htaꞈ taˍ uiˍ jaˇ. Yawˇ hui shinˉ nyi maˇ peuˬ ve kʼo, Yeˍsuˆ suh ve awˬ pon sha hawnˉ maˇ gu.—Luˉ 23:55, 56. w19.12 4 ¶10

Hkriꞈ yaˇ teˇ le le nyi ma nuˇ nehˬ ve chaw htaꞈ ca ve awˬ vuiˬ cawˬ ve yoˬ. Tawˇ pa haˉ chi ve, yaˇ ehˉ mehˉ˗e ve htaꞈ tehˆ taˍ ve yoˬ. Awˬ lawn chi hkʼa hkʼe shuˍ daꞈ ve le? Awˬ tehˬ ve awˬ lawn teˇ lawn htaꞈ dawˇ nyi sheˍ. Yaˇ paˍ ehˉ 3 hkʼawꞈ ve teˇ gʼaˇ mehˉ˗e ve yoˬ. Chaw 500 gʼaˇ hpaˆ yawˇ htaꞈ ca hpfuhˆ˗e ve yoˬ. Ponˬ kʼai ve awˬ yanˇ 20 naˍ riˍ gaˬ leh yaˇ ehˉ htaꞈ sha ma miˬ hkʼaw mawˬ ve yoˬ. Ca hpfuhˆ ve chaw teˇ gʼaˇ yawˇ htaꞈ mawˬ ve yoˬ. Yaꞈ hkʼaˇ, yawˇ chiˇ mvuh piˇ ve htaꞈ maˇ haꞈ yuˬ. Yawˇ kʼoˆ ve, “ngaˬ hui yaˇ ehˉ chi teˇ gʼaˇ htaꞈ ca mawˬ ve lehˬ laiˉ ha gʼaˇ teˇ moˍ tiˉ te ve htaꞈ pa taw yoˬ.” Chi beuꞈ ve chaw laiˉ ha gʼaˇ yaˇ ehˉ oˇ ve teˇ gʼaˇ yaꞈ kaw yaꞈ chehˇ ve hkʼe hpehꞈ ve yoˬ. Yawˇ hui dawˇ law kuiˬ maˇ cawˬ leh ga laˇ tcuh gaˇ ve yoˬ. Ngaˬ hui 8 lanˬ gʼaˇ hpaˆ, nyi ma pfuhˇ leh haꞈ yuˬ gaˇ ve chaw htaꞈ ca chehˇ ve yoˬ. Nawˬ geh Liꞈ hpu henˇ gaˇ ve chaw ca maˇ gʼa ve yoˬ hehˉ. Yaꞈ hkʼaˇ, hto toˇ kuiˬ awˬ ti hkʼaw teˇ geh hto toˇ ve chaw Liꞈ hpu hkʼaw awˬ tehˬ shiˍ gaˇ ve chaw htaꞈ ca mawˬ ve yoˬ hehˉ. Awˬ viˉ awˬ nyi teˇ gʼaˇ nyi ma pfuhˇ ve chaw htaꞈ ca mawˬ leh awˬ leh meuˇ htaˇ Yeˍsuˆ ve awˬ laꞈ gʼawˇ hpehꞈ la ve pa taw, awˬ viˉ awˬ nyi teˇ gʼaˇ le le kaꞈ ha lehˬ ve yoˬ. w19.07 16-17 ¶9-10

Tcuh yaˇ Pawˇluꞈ ‘laꞈ shawnˍ htaꞈ gʼa htaˇ hkʼa gaˬ gʼaꞈ yuˬ tcuhˉ taˍ ve’ hkʼe yawˇ hui htaꞈ kaꞈ te tcuh gaˇ ve yoˬ. Pawˇluꞈ chi hkʼe beˆ maˍ piˇ ve cawˇ jaˇ. Hpiˇliˇpiˆ Hkriꞈ yaˇ awˬ moˍ tanˬ htaˇ kaꞈ fawˉ mehˍ ve gʼa hpuˇ ve yoˬ. 50 hkʼawꞈ htaˇ, “Maˍkeˍdawˇniˆ mvuhˇ miˬ lo laˬ leh ngaˬ hui htaꞈ ga laˇ˗oˆ” tehꞈ kʼoˆ ve htaꞈ Pawˇluꞈ, Siˍlaˆ na yuˬ leh Hpiˇliˇpiˆ venˇ lo gaˬ la ve yoˬ. (Tcuh 16:9) Yawˇ hui oˇ kaˬ lo yaˇ miˇ teˇ gʼaˇ Luˍdiˇ meh ve htaꞈ mawˬ daꞈ ve yoˬ. Yawˇ daꞈ ve awˬ lawn sha tanˇ htaꞈ ‘na yuˬ tuˬ Yaˬhoˉvaˬ yawˇ ve nyi ma htaꞈ hpaw piˇ ve yoˬ.’ (Tcuh 16:14) Maˇ maw yawˇ leh yehˬ kʼa hkʼaw ve chaw Baˆtiˆsaˬ haꞈ yuˬ ve yoˬ. Yaꞈ hkʼaˇ, Neˇhaiˬ shoꞈ shaꞈ tuˬ laꞈ haˉ te piˇ ve yoˬ. Venˇ yaˇ Pawˇluꞈ leh Siˍlaˆ htaꞈ venˇ awˬ hoˉ mehˆ gʼuˇ suhˍ gʼawˬ veu laˇ leh, yawˇ hui shoꞈ shaꞈ tuˬ te shehˍ hpaˇ hpehꞈ ve tehꞈ heˍ leh kʼoˆ piˇ ve yoˬ. Hkʼe te leh yawˇ huiˉ maˬ shu jawꞈ leh htawnˍ hkʼaw lo yuˬ keu piˇ leh peuˬ hkʼawꞈ nawˉ venˇ hkʼaw tawˆ kʼai tuˬ lawˬ ve yoˬ. (Tcuh 16:16-40) Yawˇ huiˉ maˬ awˬ gʼaˇ nuˇ leh Gʼuiˬ sha ve kanˉ maˇ te˗o ve laˇ? Maˇ heˆ! Hkriꞈ yaˇ awˬ moˍ awˬ suhˉ hkʼaw ve awˬ viˉ awˬ nyi kaꞈ yeunˇ hkanˍ ve yoˬ! Pawˇluꞈ leh Siˍlaˆ ve awˬ lawn yawˇ hui htaꞈ awˬ gʼaˇ piˇ ve yoˬ. w19.08 2 ¶1-2

“Hteˇ ve cawˇ ve awˬ shiˍ” lehˬ nawˬ hui Yaˬhoˉvaˬ htaꞈ haꞈ leh awˬ viˉ awˬ nyi htaꞈ haꞈ ve kaꞈ caˉ daꞈ ve yoˬ. Chi hkʼoˆ kaꞈ Yeˍsuˆ ve awˬ lawn leh daꞈ jaˇ ve dawˇ law kuiˬ shu htaꞈ kʼoˆ piˇ ve kaꞈ caˉ daꞈ ve yoˬ. Shu Yeˍsuˆ ve awˬ laꞈ gʼawˇ hpehꞈ la tuˬ kanˉ chi ngaˬ hui te htaˇ, ngaˬ hui “hteˇ ve cawˇ ve awˬ shiˍ” nawꞈ la chehˇ ve yoˬ. (Maꞈ 28:18-20) Ngaˬ hui chehˇ ve awˬ tcuhˉ awˬ yanˇ hkʼaˬ hkʼe hpehꞈ ve htawˇ, awˬ gʼeuˆ ba piˇ gʼa ve yoˬ. Teˇ pawˆ pawˆ kʼo ngaˬ hui hto toˇ ve chi shu hkui htiˇ poˬ tuˬ hkʼe hpehꞈ ve htawˇ, ngaˬ hui hto toˇ gaˇ tuˬ te laˇ ve yoˬ. Tcuh yaˇ Pawˇluꞈ Hpiˇliˇpiˆ venˇ lo awˬ viˉ awˬ nyi htaꞈ liꞈ bvuhꞈ piˇ htaˇ, Roˉmaꞈ venˇ aˉ hkʼaw lo haw tiˍ taˍ ve yoˬ. Pawˇluꞈ sho caˆ keu taˍ piˇ ve htawˇ, htawnˍ nyi haꞈ shaˉ paˍ leh yawˇ geh ca guiˇ la ve chaw htaꞈ bon maˍ piˇ ve yoˬ. Chi hkʼe gʼa hpuˇ ve htawˇ, Pawˇluꞈ nyi ma pfuhˇ ve hkʼaw bon maˍ ve yoˬ. Hkʼe te leh awˬ viˉ awˬ nyi co ha hpawˇ uiˍ la mvuh la tuˬ te piˇ leh ‘nyi ma haꞈ hanˉ ve hkʼaw Gʼuiˬ sha ve tawˇ hkawˇ maˍ piˇ tuˬ yawˇ hui maˇ kawˆ.’—Hpi 1:12-14; 4:22. w19.08 12 ¶15-16

Ngaˬ hui nyi ma nuˇ nehˬ ve chaw hpehꞈ ve lehˬ Yaˬhoˉvaˬ ha lehˬ tcuh gaˇ ve pa taw yoˬ. Hkʼe te leh Tcuh yaˇ Peˍtruˆ yaꞈ nyi ve Liꞈ hpu awˬ tawn kʼoˆ maˍ laˇ ve yoˬ. Liꞈ kʼoˆ “Ngaˬ hkʼaˇ suh laˬ˗oꞈ” awˬ lawn 3, awˬ tawn 23 chi ve hkʼaw Peˍtruˆ ve awˬ lawn kʼoˆ taˍ ve, “caˆ muiˬ puiˉ jaˇ ve lehˬ naˆ tsuhˇ awˬ tawꞈ ma htaꞈ shuˍ leh luˬ tuˬ te laˇ gʼa ve yoˬ. Caˆ muiˬ puiˉ ve chaw lehˬ laiˉ ceuˬ te gʼa ve htawˇ, Yaˬhoˉvaˬ awˬ pon kʼo awˬ hpfuhˇ maˇ cawˬ. Nyi ma nuˇ nehˬ ve chaw lehˬ laiˉ ceuˬ maˇ te gʼa ve htawˇ, Yaˬhoˉvaˬ awˬ pon kʼo awˬ hpfuhˇ cawˬ jaˇ. Nawˬ nyi ma nuˇ nehˬ ve pa taw [Yawˇ] laꞈ shawˍ peꞈ laˇ tuˬ yoˬ.” Yaˬhoˉvaˬ ha lehˬ tuˬ te piˇ ve lehˬ teˇ ceuˬ le le aꞈ kehˉ daꞈ jaˇ. Nawˬ chi hkʼe dawˇ˗aw laˇ? (Tawˇ 23:15) Nyi ma nuˇ nehˬ ve chaw hpehꞈ ve lehˬ Yaˬhoˉvaˬ ha lehˬ tuˬ te piˇ leh ngaˬ hui awˬ pon kaꞈ awˬ bon laiˉ ceuˬ cawˬ ve yoˬ. Shu ngaˬ hui htaꞈ awˬ chawˇ te gaˇ ve yoˬ. Aˬ htoꞈ ma te chi hkʼe hpehꞈ ve le? Nawˬ hkʼaˬ hkʼe ve chaw htaꞈ awˬ chawˇ te gaˇ ve dawˇ nyi sheˍ.—Maꞈ 7:12. w19.09 4 ¶8-9

Nyi haꞈ shaˉ paˍ awˬ viˉ awˬ nyi htaꞈ ga piˇ tuˬ kanˉ te hkeuꞈ jaˇ. Yawˇ hui kanˇ paˆ cawˬ ve htawˇ uiˍ muiˬ caˆ muiˬ ve maˇ te. Yawˇ hui Hkriꞈ yaˇ awˬ moˍ hkʼaw awˬ viˉ awˬ nyi htaꞈ hkʼa dehꞈ nyi haꞈ shaˉ ve yoˬ. (1 Hteˇ 2:7, 8) Yawˇ hui nyi ma nuˇ nehˬ leh shu htaꞈ haꞈ ve pa taw, yawˇ hui geh ha kʼaˉ ve hkʼaw yaw daꞈ ve yoˬ. Ehn˗du nyi haꞈ shaˉ paˍ laiˉ hkʼawꞈ te jaw ve kʼoˆ ve, “nyi haꞈ shaˉ paˍ nyi ma daꞈ jaˇ leh awˬ chawˇ te daꞈ sha jaˇ ve kʼo, yawˇ te ve awˬ ceuˬ awˬ viˉ awˬ nyi nyi ma hkʼaw gaˬ jaˇ. Chi awˬ viˉ awˬ nyi nyi haꞈ shaˉ paˍ geh kanˉ teˇ geh te gaˇ tuˬ te piˇ ve yoˬ.” Htoˇniˬ nyi haꞈ shaˉ paˍ laiˉ hkʼawꞈ te jaw ve kʼoˆ ve, “ngaˬ Hpiˇliˇpiˆ liꞈ 2:3 hkʼaw yuˬ yehˇ leh shu ngaˬ aꞈ kehˉ daꞈ ve tehꞈ hkʼaˬ htaˆ kaꞈ dawˇ tuˬ coˇ caˇ ve yoˬ. Shu ngaˬ hkawˇ na tuˬ maˇ nyiˉ piˇ gaˇ.” Yaˬhoˉvaˬ nyi ma nuˇ nehˬ ve hkʼe nyi haꞈ shaˉ paˍ kaꞈ nyi ma nuˇ nehˬ cawˇ ve yoˬ. Yaˬhoˉvaˬ uiˍ jaˇ mvuhˇ jaˇ ve htawˇ, yawˇ lehˬ “jeꞈ meu˗e hkʼaw chehˇ taˍ ve haˍ ve gʼawˇ ve chaw hui htaꞈ chiˇ taˆ piˇ” ve yoˬ. (Chiˇ 18:35; 113:6, 7) Liꞈ hpu hkʼaw kʼoˆ ve, Yaˬhoˉvaˬ lehˬ uiˍ muiˬ caˆ muiˬ ve chaw htaꞈ maˇ dawˇ cawˇ. w19.09 16-17 ¶11-12

Yeˍsuˆ ve taˆ tuˬ htaꞈ taˆ gʼa tuˬ ngaˬ hui cawˇ ve dawˇ hkʼaˇ gʼa cawˬ ve yoˬ. Ngaˬ hui Yaˬhoˉvaˬ ve kanˉ te ve pa taw, yawˇ ve awˬ hkʼaˇ htaꞈ te cawˇ ve yoˬ. Ngaˬ hui lehˬ kanˉ te ve chaw hpehꞈ leh yawˇ lehˬ Awˬ shehˍ hpaˇ hpehꞈ ve yoˬ. (Luˉ 17:10) Ngaˬ hui dawˇ taˍ ve hkʼe te ve kʼo, taˆ tuˬ htaꞈ taˆ ve lehˬ haˍ jaˇ. Awˬ nu ve teˇ hkʼaˇ lehˬ ngaˬ hui Yaˬhoˉvaˬ ve awˬ hkʼaˇ htaꞈ gʼaꞈ te ve kʼo, te maˇ gʼa tehꞈ dawˇ ve htawˇ te gʼa ve yoˬ. Leh shoꞈ shaꞈ ve laiˉ ceuˬ htaꞈ kaꞈ tawˍ daꞈ maˇ gʼaˇ tehꞈ dawˇ ve htawˇ tawˍ daꞈ gʼaˇ ve yoˬ. Yaˬhoˉvaˬ htaꞈ teˇ gʼaˇ kaꞈ tawˍ taˍ maˇ gʼa tehꞈ nawˬ tawnˇ taˍ sheˍ! (Roˉ 8:31; 1 Yoˇ 4:4) Yaˬhoˉvaˬ htaꞈ awˬ meꞈ awˬ hponˇ gʼa tcuh gaˇ ve pa taw, ngaˬ hui Yeˍsuˆ ve taˆ tuˬ htaꞈ taˆ ve yoˬ. Yeˍsuˆ ve awˬ co˗e htaˇ, yawˇ geh laˬ ve chaw lawˇ hpaꞈ uiˍ leh a shu yawˇ awˬ pon tiˉ dawˇ nyi ve pa taw, ha lehˬ kuiˬ maˇ cawˬ leh Yeˍsuˆ ve taˆ tuˬ htaꞈ baˬ taˉ ve yoˬ. (Yoˇ 6:25-27, 51, 60, 66; Hpi 3:18, 19) Yeˍsuˆ geh laˬ ve chaw Gʼuiˬ sha htaꞈ haꞈ leh a shu yawˇ awˬ pon maˇ dawˇ nyi leh shu htaꞈ haꞈ ve pa taw, yawˇ hui miˬ guiˬ hkʼoˆ a shaꞈ teꞈ chehˇ ve teˇ co˗e ha lehˬ leh mvuhˇ naw ma hkʼoˆ Yeˍsuˆ geh teˇ geh gʼa uˉ peunˍ tuˬ dawˇ law kuiˬ cawˬ ve yoˬ. Chi hkʼa shuˍ Yeˍsuˆ ve taˆ tuˬ htaꞈ cawˇ ve hkʼaw taˆ ve kʼo, hkʼaˬ htaˆ kaꞈ ha lehˬ tuˬ yoˬ. w19.09 20 ¶1; 24-25 ¶19-20

Chi hkʼoˆ kaꞈ, nawˬ maˇ heˆ heˆ ve uˉ peunˍ ve awˬ hawˉ lo maˇ gʼa chehˇ˗o ve htaꞈ dawˇ nyi sheˍ. Hpehˇ laˇ ve chi ha lehˬ jaˇ! Awˬ gʼuˇ suhˍ hpawˇ nawˬ hpehˇ laˇ ve chi aꞈ kehˉ gʼa tuˬ sheˍ. Maˇ maw ve awˬ yanˇ maˇ heˆ heˆ ve bon liˇ leh chaw yaˇ uˉ peunˍ ve heˍ ve hkʼa peu˗eˬ htaꞈ Yeˍsuˆ te luˬ tuˬ yoˬ. “Chaw awˬ moˍ lonˉ” yawˇ ve kanˉ te ve leh miˬ guiˬ awˬ suhˉ hkʼaw yawˇ hui awˬ bon maˇ maˇ gʼa tuˬ ve htaꞈ Yaˬhoˉvaˬ nyi haꞈ shaˉ tuˬ yoˬ. (Hpeuꞈ 7:9, 14) Chaw maˇ maˇ htaꞈ kʼawꞈ teꞈ tu la tcuh leh Aˍdanˍ te taˍ ve venˇ baˆ htaꞈ pa taw luˬ ve awˬ ceuˬ hkʼa peu˗eˬ hpehˇ laˇ ve htaꞈ gʼa tuˬ yoˬ.(Tcuh 24:15) Yeˍsuˆ uˉ peunˍ ve teˇ hinˉ hkʼawꞈ awˬ hkʼaw lo yawˇ leh yawˇ geh uˉ peunˍ ve chaw, chaw yaˇ biˇ ve chaw hpehꞈ tuˬ te laˇ tuˬ yoˬ. Yawˇ hui Gʼuiˬ sha geh meuˆ daꞈ tuˬ yoˬ. Oˇ ve teˇ yanˇ kʼawꞈ gu te ve leh Iˉsaˍreˍlaˆ chaw hpehˇ piˇ ve awˬ hkʼawꞈ ha lehˬ ve hkʼe, hpehˇ laˇ ve htaꞈ gʼa tuˬ yoˬ. Yaˬhoˉvaˬ htaꞈ ka tiꞈ yeˬ ve chaw teˇ gʼaˇ le le biˇ ve chaw hpehꞈ leh venˇ baˆ maˇ kʼawꞈ cawˬ. w19.12 12-13 ¶14-16

Awˉ lawˉ peuˇ ve awˬ co˗e htaˇ, nyi ma nuˇ nehˬ ve hawˉ hkʼaˆ teˇ gʼaˇ Yaˬhoˉvaˬ htaꞈ yehˇ tcuh gaˇ ve Yoˇsehꞈ yoˬ. (Tcuh 4:36, 37) Sawˉluꞈ Hkriꞈ yaˇ awˬ moˍ htaꞈ fawˉ mehˍ jaw ve pa taw, yawˇ Hkriꞈ yaˇ hpehꞈ la htaˇ awˬ viˉ awˬ nyi laiˉ gʼaˇ yawˇ htaꞈ kawˆ ve yoˬ. Yaꞈ hkʼaˇ, Baˍnaˍbaˆ Sawˉluꞈ htaꞈ ga piˇ leh awˬ gʼaˇ piˇ ve yoˬ. (Tcuh 9:21, 26-28) Teˇ pawˆ htaˇ, Yeˍruˆsaˍlehnˍ venˇ lo ve nyi haꞈ shaˉ paˍ Suˇriˆ mvuhˇ miˬ, Anˍtiˆawˍ venˇ hkʼaw ve awˬ viˉ awˬ nyi awˬ gʼaˇ piˇ tuˬ loˍ ve tehꞈ shiˍ ve pa taw, yawˇ hui Baˍnaˍbaˆ htaꞈ oˇ kaˬ lo kʼai tcuh ve yoˬ. Yawˇ hui Baˍnaˍbaˆ htaꞈ leuˆ ve cawˇ jaˇ! Liꞈ hpu hkʼaw Baˍnaˍbaˆ lehˬ “yawˇ hui nyi ma yeˬ leh Jawˇmawˇ Yeˍsuˆ htaꞈ vawˆ tcuhˉ taˍ tuˬ, yawˇ yawˇ hui hkʼa peu˗eˬ htaꞈ awˬ gʼaˇ piˇ ve yoˬ.” (Tcuh 11:22-24) Chi beuꞈ teˇ co˗e kaꞈ hkʼa shuˍ, Yaˬhoˉvaˬ ngaˬ hui htaꞈ yehˇ leh awˬ viˉ awˬ nyi htaꞈ “awˬ gʼaˇ piˇ” tcuh laˇ ve yoˬ. Haꞈ ve chaw suh˗e ve, naˬ chehˇ ve chaw, maˇ heˆ leh dawˇ maˇ ve a naˍ cawˬ ve chaw htaꞈ tawˇ yaw tuˬ awˬ hkʼeun hkʼaw awˬ gʼaˇ piˇ tuˬ Gʼuiˬ sha ngaˬ hui htaꞈ te tcuh gaˇ ve yoˬ. Yaˬhoˉvaˬ Baˍnaˍbaˆ htaꞈ yehˇ ve hkʼe nawˬ htaꞈ kaꞈ yehˇ tcuh˗aw laˇ?—1 Hteˇ 5:14. w19.10 22 ¶8

Teˇ pawˆ pawˆ kʼo, awˬ viˉ awˬ nyi geh Gʼuiˬ sha ve kanˉ teˇ geh te ve pa taw, maˇ daꞈ ve te hkʼaˇ kaꞈ mawˬ ve yoˬ. Chi hkʼe hpehꞈ ve kʼo hkʼaˬ hkʼe te yawˇ hui geh meuˆ daꞈ gʼa tuˬ le? Awˬ viˉ awˬ nyi maˇ te yaꞈ leh daꞈ ve tiˉ te ve htaꞈ ngaˬ hui maˇ dawˇ law cawˇ. Chi htaꞈ pa taw, ngaˬ hui meuˆ daꞈ jaˇ ve awˬ chawˇ cawˬ ve kʼo, awˬ chawˇ te daꞈ ve gʼa yeˬ tcuh ve yoˬ. Awˬ chawˇ te yaꞈ ve kʼo yawˇ htaꞈ beˆ maˍ piˇ leh ga piˇ tuˬ, Liꞈ hpu hkʼaw ve awˬ liˇ awˬ hkʼaˇ hteˇ˗ehꞈ kʼoˆ maˍ piˇ cawˇ ve yoˬ. Yaꞈ hkʼaˇ, haꞈ pehnˇ ve hkʼaw te sheˍ. (Chiˇ 141:5) Awˬ chawˇ ngaˬ hui nyi ma naˬ tuˬ te laˇ ve kʼo, nyi ma awˬ tawˍ hkʼa gaˬ venˇ baˆ hpehˇ piˇ leh awˬ lawn oˇ ve htaꞈ maˇ kʼawꞈ dawˇ nyi˗o. Haˍ jaˇ ve awˬ yanˇ htaˇ awˬ viˉ awˬ nyi htaꞈ yaꞈ ve hpawˇ maˇ nyi leh daꞈ ve hpawˇ nyi tuˬ a yeˇ uiˍ jaˇ. Ngaˬ hui chi hkʼe te ve kʼo, yawˇ hui geh gʼaˇ hteꞈ meuˆ daꞈ tuˬ yoˬ. Uiˍ jaˇ ve tuꞈ ve hkanˍ ve awˬ yanˇ htaˇ, ngaˬ hui meuˆ daꞈ jaˇ ve awˬ chawˇ gʼa cawˬ cawˇ ve pa taw, awˬ lawn chi a yeˇ uiˍ jaˇ. w19.11 6 ¶13, 16

Ngaˬ hui ‘chaw ceuˬ hkʼa peu˗eˬ awˬ laꞈ gʼawˇ hpehꞈ la tuˬ leh yawˇ hui Yeˍsuˆ kʼoˆ ve hkʼe gʼaꞈ te tuˬ’ ngaˬ hui Liꞈ hpu maˍ piˇ htaˇ, te gʼa ve hkʼe te cawˇ ve yoˬ. Yaˬhoˉvaˬ htaꞈ oˉ kʼoˍ pui leh yawˇ ve mvuhˇ miˬ uˉ peunˍ ve hpawˇ chehˇ ve a yeˇ hkʼaˬ hkʼe taw uiˍ ve yawˇ hui na gʼa tuˬ maˍ piˇ cawˇ ve yoˬ. Chi ve tcuhˉ kuiˬ lehˬ yawˇ hui henˇ taˍ ve htaꞈ yuˬ yehˇ ve, Yaˬhoˉvaˬ htaꞈ awˬ to chiˇ aꞈ piˇ ve leh Baˆtiˆsaˬ haꞈ yuˬ tuˬ ngaˬ hui ga piˇ ve htaꞈ kʼoˆ gaˇ ve yoˬ. Chi hkʼe te htaˇ, yawˇ hui Yaˬhoˉvaˬ ve awˬ nyi htaꞈ gʼa ponˬ tuˬ yoˬ. (1 Peˍ 3:21) Kʼoˆ peuˬ ve hkʼe, haiˬ jaˇ ve miˬ guiˬ leh la paˇ neˇ ve yoˬ. Chi htaꞈ pa taw, ngaˬ hui Liꞈ hpu maˍ piˇ ve chaw Yeˍsuˆ ve awˬ laꞈ gʼawˇ maˇ hpehꞈ gaˇ ve chaw geh ngaˬ hui awˬ yanˇ taˇ shonˇ chehˇ. (1 Kawˇ 9:26) Ngaˬ hui haˆ haˆ gʼa te ve yoˬ. Awˬ lawn kʼo, awˬ yanˇ cawˬ sheˍ htaˇ chaw maˇ maˇ Gʼuiˬ sha ve mvuhˇ miˬ awˬ lawn gʼa kaˇ cawˇ ve yoˬ. w19.10 11-12 ¶14-15

Teˇ hkʼawꞈ le le venˇ baˆ hpehˇ ve awˬ nyi htaˇ, Iˉsaˍreˍlaˆ chaw ca mawˬ daꞈ la leh paw hkuˇ lonˉ kaꞈ to nuˇ to shaˆ yuˬ leh tuˉ tanˇ ve yoˬ. Iˉsaˍreˍlaˆ chaw venˇ baˆ gʼa ponˬ tuˬ tuˉ tanˇ tuˬ chi teˇ hpaˍ yawˇ hui htaꞈ shaˍ tiꞈ piˇ ve yoˬ! Awˉ lawˉ htaˇ, paw hkuˇ daꞈ kehˬ ve sha hawnˉ aˬ miˍ hkʼoˆ ngeuˍ pfuhˍ ve, hkʼe te leh bawehˇ oˇ ve hkʼaw awˬ shaˉ hawnˉ ve yoˬ. Ngaˬ hui htaꞈ hkʼaˬ hkʼe maˍ laˇ ve le? Liꞈ hpu hkʼaw kʼoˆ ve, Yaˬhoˉvaˬ htaꞈ ka tiꞈ yeˬ ve chaw bon lawˬ hkawˇ lehˬ sha hawnˉ htaꞈ shuˍ ve yoˬ. (Chiˇ 141:2; Hpeuꞈ 5:8) Venˇ baˆ hpehˇ ve awˬ nyi htaˇ, paw hkuˇ lonˉ sha hawnˉ ka leh Yaˬhoˉvaˬ mehˆ gʼuˇ suhˍ yawˆ yan ve hkʼaw huˉ taˍ ve yoˬ. Chi ve hkʼa shuˍ ngaˬ hui Yaˬhoˉvaˬ geh bon lawˬ htaˇ yawˆ yan ve hkʼaw gʼa lawˬ ve yoˬ. Gʼuiˬ sha hkʼa peu˗eˬ hpanˍ shehˍ hpaˇ hpehꞈ ve htawˇ ngaˬ hui yawˇ geh meuˆ daꞈ tcuh laˇ ve, tawˇ yaw daꞈ tcuh laˇ ve, leh awˬ pa yaˇ htaꞈ meuˆ daꞈ ve hkʼe yawˇ geh meuˆ daꞈ tcuh laˇ ve, Gʼuiˬ sha htaꞈ awˬ bon uiˍ jaˇ kʼoˆ piˇ gaˇ ve yoˬ. (Yaˍ 4:8) Chi hkʼoˆ kaꞈ, yawˇ ngaˬ hui htaꞈ awˬ chawˇ tehꞈ shawˍ laˇ ve yoˬ! (Chiˇ 25:14) Chi daꞈ jaˇ ve awˬ hkʼaˇ hpehꞈ leh yawˇ nyi ma luˬ tuˬ maˇ te gaˇ. w19.11 20-21 ¶3-5

Maˇ˗awˍ ve chaw kanˉ te ve htaꞈ hkʼaˬ hkʼe dawˇ ve le? Laiˉ mvuhˇ miˬ hkʼaw ve chaw oˇ htaˇ aꞈ kehˉ kanˉ te maˇ ve yoˬ. Yawˇ hui kanˉ maˇ jaˇ leh jehˇ tuˬ, yehˬ kʼa hkʼaw ve chaw geh chehˇ tuˬ, maˇ heˆ leh bon lawˬ˗e tuˬ kaꞈ awˬ yanˇ maˇ cawˬ. (Cuˇ 2:23) Laiˉ gʼaˇ kʼo bawˬ leh laiˉ ceuˬ kʼoˆ leh kanˉ maˇ te. (Tawˇ 26:13, 14) Maˇ˗awˍ ve chaw keunˍ lawꞈ cawˇ lawꞈ ve dawˇ hkʼaˇ maˇ cawˬ. Yaꞈ hkʼaˇ, kanˉ te ve awˬ hkʼaˇ htaꞈ Yaˬhoˉvaˬ leh Yeˍsuˆ hkʼaˬ hkʼe dawˇ ve teˇ geh chaˬ nyi sheˍ. Yaˬhoˉvaˬ kanˉ te ve htaꞈ dawˇ cawˇ ve ngaˬ hui htawˇ dawˇ nawˬ dawˇ cawˬ tuˬ maˇ loˍ. Yeˍsuˆ kʼoˆ ve, “ngaˬ Awˬ pa lehˬ, chi beuꞈ hkʼa gaˬ kanˉ te chehˇ ve yoˬ. Ngaˬ htawˇ kanˉ te chehˇ ve yoˬ.” (Yoˇ 5:17) Gʼaw maˇ peuˬ ve mvuhˇ naw ma tcuh yaˇ, mvuhˇ naw ma miˬ naˆ ma, maˇ heˆ leh miˬ guiˬ hkʼoˆ daꞈ jaˇ ve awˬ ceuˬ hkʼa peu˗eˬ htaꞈ Yaˬhoˉvaˬ hpanˍ ve ngaˬ hui dawˇ nyi htaˇ, ngaˬ hui kaꞈ chiˇ mvuh ve liꞈ bvuhꞈ paˍ kʼoˆ ve hkʼe dawˇ ve yoˬ. w19.12 2 ¶1-2

Daˍviˆ Yaˬhoˉvaˬ geh meuˆ daꞈ tuˬ aˬ htoꞈ ma te piˇ ve le? Daˍviˆ Yaˬhoˉvaˬ htaꞈ caˉ daꞈ ve hpanˍ taˍ te taˍ ve htaꞈ henˇ yuˬ ve yoˬ. Yaˇ ehˉ htaˇ Daˍviˆ awˬ pa ve yawˬ hawˉ ve yoˬ. Oˇ ve teˇ yanˇ yawˇ Yaˬhoˉvaˬ hpanˍ taˍ ve htaꞈ tanˬ dawˇ nyi ve yoˬ. Mvuhˇ hpeuꞈ htaˇ mvuhˇ naw ma htaꞈ chiˇ nyi leh meuꞈ keu shiˍ teˇ hpaˍ htaꞈ ceh mawˬ ve maˇ heˆ. Meuꞈ keu shiˍ chi teˇ hpaˍ hpanˍ shehˍ hpaˇ ve te hkʼaˇ dawˇ hkʼaˇ htaꞈ kaꞈ shiˍ la ve yoˬ. (Chiˇ 19:1, 2) Yaˬhoˉvaˬ chaw yaˇ htaꞈ hpanˍ ve yawˇ dawˇ nyi htaˇ, Daˍviˆ kaꞈ Yaˬhoˉvaˬ ve cuˇ yiˍ htaꞈ shiˍ la ve yoˬ. (Chiˇ 139:14) Daˍviˆ Gʼuiˬ sha hpanˍ taˍ ve awˬ ceuˬ htaꞈ hkʼa dehꞈ dawˇ nyi htaˇ, yawˇ nyi ma nuˇ nehˬ la ve yoˬ. (Chiˇ 139:6) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Teˇ nyi le le a shaꞈ teꞈ kuiˬ hkʼaw suhˆ cehˬ hawˆ cehˬ, to nuˇ to shaˆ teˇ hpaˍ, leh chaw yaˇ htaꞈ dawˇ nyi ve yoˬ. Awˬ ceuˬ chi ve teˇ hpaˍ htaꞈ nyi htaˇ, Yaˬhoˉvaˬ htaꞈ caˉ daꞈ ve nawˬ htaꞈ hkʼaˬ hkʼe maˍ laˇ ve le? Mvuhˇ naw ma hkʼoˆ ve Awˬ pa nawˬ htaꞈ hkʼaˬ hkʼe taw haꞈ ve shiˍ la ve yoˬ. (Roˉ 1:20) Nawˬ Gʼuiˬ sha htaꞈ haꞈ ve kaꞈ teˇ nyi aꞈ kehˉ teˇ nyi maˇ la ve yoˬ. w19.12 19-20 ¶15-17

Moˉseˍ Gʼuiˬ sha ve kanˉ te tuˬ leuˆ ve yoˬ. Moˉseˍ a shaꞈ 40 hkʼawꞈ hpaˆ htaˇ, “Hpaˍrawˇ yaˇ miˇ ve awˬ yaˇ paˍ tehꞈ kʼoˆ” ve aꞈ kehˉ Gʼuiˬ sha ve chaw Heˍbrehˇ chaw geh chehˇ tuˬ yawˇ leuˆ yuˬ ve yoˬ. Moˉseˍ aˉ yaˇ cawˬ ve awˬ vuiˬ htaꞈ baˬ taˉ ve yoˬ. Yawˇ Gʼuiˬ sha ve chaw htaꞈ ga piˇ htaˇ, Hpaˍrawˇ beuꞈ jaˇ. Hpaˍrawˇ kanˇ paˆ cawˬ ve jawˇ mawˇ hpehꞈ leh Eˇjiˇtuꞈ chaw yawˇ htaꞈ Gʼuiˬ sha hkʼe shawˍ ve yoˬ. Moˉseˍ yonˍ yeˬ jaˇ! Moˉseˍ Yaˬhoˉvaˬ htaꞈ gʼaˇ va ve pa taw, hkʼaˬ htaˆ kaꞈ Yaˬhoˉvaˬ geh meuˆ daꞈ ve yoˬ. (Tawˇ 3:5) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui Gʼuiˬ sha ve kanˉ te tuˬ leh yawˇ ve chaw geh chehˇ tuˬ, Moˉseˍ hkʼe leuˆ˗aw laˇ? Ngaˬ hui Gʼuiˬ sha ve kanˉ te tuˬ teˇ ceuˬ ceuˬ gʼa yuˬ tanˇ cawˇ ve kʼo, yawˇ htaꞈ maˇ shiˍ ve chaw tawˍ laˇ tuˬ yoˬ. Yaꞈ hkʼaˇ, mvuhˇ naw ma hkʼoˆ ve Awˬ pa htaꞈ gʼaˇ va ve kʼo, yawˇ ga laˇ tuˬ yoˬ! w19.12 17 ¶5-6

Gʼuiˬ sha ngaˬ hui htaꞈ jeꞈ yuˬ te taˍ ve yoˬ. Gʼuiˬ sha awˬ pon kʼo, ngaˬ hui jeꞈ aꞈ kehˉ awˬ hpfuhˇ hkʼaˆ jaˇ. Ngaˬ hui Yaˬhoˉvaˬ awˬ pon awˬ hpfuhˇ cawˬ ve tehꞈ shiˍ tuˬ awˬ hkʼaˇ laiˉ hkʼaˇ cawˬ ve yoˬ. Awˉ lawˉ teˇ hkʼaˇ lehˬ Gʼuiˬ sha yawˇ ve te hkʼaˇ dawˇ hkʼaˇ htaꞈ henˇ yuˬ tuˬ chaw yaˇ htaꞈ hpanˍ taˍ ve yoˬ. Chi Gʼuiˬ sha hpanˍ taˍ ve teˇ ceuˬ le aꞈ kehˉ chaw yaˇ lehˬ awˬ hpfuhˇ cawˬ jaˇ. (Awˬ 1:27) Gʼuiˬ sha ngaˬ hui htaꞈ miˬ guiˬ leh to nuˇ to shaˆ nyi haꞈ shaˉ tcuh laˇ ve yoˬ. (Chiˇ 8:4-8) Aˍdanˍ venˇ baˆ te yaꞈ ve htawˇ, Yaˬhoˉvaˬ kaꞈ chaw yaˇ htaꞈ awˬ hpfuhˇ shiˍ sheˍ. Gʼuiˬ sha ngaˬ hui htaꞈ awˬ hpfuhˇ cawˬ ve tehꞈ dawˇ leh yawˇ haꞈ jaˇ ve Yaˇ paˍ teˇ gʼaˇ ceh cawˬ ve htawˇ, ngaˬ hui venˇ baˆ awˬ pon htaiˍ hkʼawꞈ tcuh laˇ ve yoˬ. (1 Yoˇ 4:9, 10) Aˍdanˍ venˇ baˆ te yaꞈ ve pa taw “hteˇ ve chaw kaꞈ maˇ hteˇ ve chaw kaꞈ” gʼa suh˗e ve htawˇ, htaiˍ hkʼawꞈ ve awˬ hpfuhˇ htaꞈ pa taw Yaˬhoˉvaˬ kʼawꞈ teꞈ tu la tcuh laˇ tuˬ yoˬ. (Tcuh 24:15) Ngaˬ hui a shaꞈ hkʼaˬ hkʼe ma gaˬ ve, chehˇ sha cawˬ sha ve, leh hpu cawˬ maˇ cawˬ ve htawˇ, Gʼuiˬ sha ngaˬ hui htaꞈ awˬ hpfuhˇ cawˬ ve tehꞈ shawˍ ve, Liꞈ hpu hkʼaw hpeuꞈ maw laˇ ve yoˬ.—Tcuh 10:34, 35. w20.01 15 ¶5-6

Mvuhˇ naw ma hkʼoˆ dawˇ law kuiˬ cawˬ ve lehˬ awˬ shinˉ awˬ ka gʼa ve htaꞈ maˇ shuˍ daꞈ. Yaꞈ hkʼaˇ, Gʼuiˬ sha leuˆ yuˬ taˍ ve chaw htaꞈ piˇ ve yoˬ. (1 Hteˇ 2:12) Hkʼe te leh, yawˇ hui nyi ma luˬ ve maˇ heˆ leh nyi ma maˇ sha tuˬ ve awˬ lawn teˇ hpaˍ kaꞈ ngaˬ hui maˇ na nyi piˇ cawˇ. Nawˬ teˇ gʼaˇ ceh tiˉ awˬ hpawˇ maˇ cawˬ leh miˬ guiˬ hkʼoˆ lo co co taiˍ taiˍ chehˇ tuˬ, leuˆ yuˬ piˇ taˍ ve chaw awˬ miˇ ma htaꞈ ngaˬ hui maˇ na nyi piˇ cawˇ. Miˬ guiˬ awˬ suhˉ hkʼaw Yaˬhoˉvaˬ “yawˇ hui nyi hkʼaˇ suh htaˇ hkʼa gaˬ, yawˇ hui loˍ ve awˬ ceuˬ teˇ hpaˍ htaꞈ” piˇ tuˬ tehꞈ ngaˬ hui yonˍ gʼa ve yoˬ. (Chiˇ 145:16) Leuˆ yuˬ piˇ taˍ ve chaw htaꞈ a yeˇ uiˍ jaˇ ve tehꞈ maˇ gʼa te piˇ tuˬ, ngaˬ hui htaꞈ kaꞈ shaˍ tiꞈ peꞈ laˇ ve yoˬ. Aˬ htoꞈ ma te chi hkʼe te ve le? Liꞈ hpu hkʼaw kʼoˆ ve, leuˆ yuˬ piˇ taˍ ve chaw teˇ hpaˍ hpaˍ ka tiꞈ maˇ yeˬ. (Maꞈ 25:10-12; 2 Peˍ 2:20, 21) Yawˇ leuˆ yuˬ piˇ taˍ ve chaw hpehꞈ ve, hkʼa dehꞈ shiˍ daꞈ ve awˬ viˉ awˬ nyi hpehꞈ ve, maˇ heˆ leh Yaˬhoˉvaˬ ve kanˉ te maw jaˇ˗oˬ ve chaw hpehꞈ ve htawˇ, yawˇ hui htaꞈ “chiˇ uiˍ chiˇ mvuh piˇ” ve ngaˬ hui maˇ te. (Yuˇ 16) Teˇ nyi kʼo yawˇ ka tiꞈ maˇ yeˬ leh Gʼuiˬ sha ve kanˉ hkʼaˇ htaꞈ baˬ taˉ ve kʼo, ngaˬ hui ve yonˍ hkʼaˇ leh Yaˬhoˉvaˬ ve kanˉ te ve htaꞈ maˇ chiˇ baˬ. w20.01 29 ¶9-10

Ngaˬ hui Yaˬhoˉvaˬ ve haꞈ ve awˬ yaˇ hpehꞈ ve pa taw, ngaˬ hui te gʼa ve hkʼe yawˇ htaꞈ henˇ yuˬ gaˇ ve yoˬ. Shu htaꞈ haꞈ ve, venˇ baˆ hpehˇ piˇ ve, daꞈ ve te piˇ ve, chi ve ngaˬ hui yawˇ htaꞈ henˇ yuˬ ve tehꞈ hpeuꞈ maw piˇ ve yoˬ. Gʼuiˬ sha htaꞈ maˇ shiˍ ve chaw ngaˬ hui te ve daꞈ ve htaꞈ mawˬ htaˇ, yawˇ Gʼuiˬ sha htaꞈ shiˍ gaˇ tuˬ yoˬ. (1 Peˍ 2:12) Hkriꞈ yaˇ hpehꞈ ve awˬ pa awˬ e yaˇ htaꞈ teˇ ceuˬ ceuˬ te piˇ htaˇ, Yaˬhoˉvaˬ htaꞈ henˇ yuˬ cawˇ ve yoˬ. Chi hkʼe te htaˇ yaˇ mvuhˇ naw ma hkʼoˆ ve Awˬ pa geh meuˆ daꞈ gaˇ tuˬ yoˬ. Ngaˬ hui Yaˬhoˉvaˬ htaꞈ nyi hkʼaˇ suh leh yawˇ ve awˬ lawn shu htaꞈ kʼoˆ piˇ gaˇ ve yoˬ. Ngaˬ hui kaꞈ Daˍviˆ kʼoˆ ve hkʼa shuˍ “[Yaˬhoˉvaˬ] te taˍ peuˬ ve kanˉ teˇ hpaˍ awˬ pon, ngaˬ yawˇ htaꞈ chiˇ mvuh tuˬ yoˬ.” (Chiˇ 34:2) Yaꞈ hkʼaˇ, ngaˬ hui yaꞈ taw puiˉ ve kʼo, hkʼaˬ hkʼe te haꞈ hanˉ tuˬ le? Yaˬhoˉvaˬ hkʼaˬ hkʼe taw ha lehˬ ve maˇ heˆ leh awˬ nu ve chaw Yaˬhoˉvaˬ htaꞈ shiˍ daꞈ htaˇ awˬ bon hkʼaˬ hkʼe taw gʼa ve ngaˬ hui dawˇ nyi htaˇ, haꞈ hanˉ tuˬ yoˬ. Ngaˬ hui haꞈ hanˉ tuˬ Yaˬhoˉvaˬ peꞈ laˇ tuˬ yoˬ. Awˉ lawˉ peuˇ ve awˬ viˉ awˬ nyi haꞈ hanˉ ve Yaˬhoˉvaˬ ga piˇ jaw˗oˬ ve hkʼe, yawˇ ngaˬ hui htaꞈ kaꞈ ga laˇ tuˬ yoˬ.—1 Hteˇ 2:2. w20.02 11 ¶12-13

Laiˉ gʼaˇ Liꞈ hpu henˇ ve uiˍ la mvuh la leh Baˆtiˆsaˬ haꞈ yuˬ ve yoˬ. Chaw teˇ hpaˍ hpaˍ awˬ yanˇ cawˇ cawˇ Liꞈ hpu henˇ ve htawˇ, Yeˍsuˆ ve awˬ laꞈ gʼawˇ hpehꞈ la tuˬ htawˇ dawˇ nawˬ dawˇ cawˬ ve yoˬ. Yawˇ hui Liꞈ hpu henˇ ve dawˇ cawˇ ve htawˇ, Baˆtiˆsaˬ maˇ haꞈ yuˬ sheˍ. Nawˬ geh Liꞈ hpu henˇ ve chaw cawˬ ve kʼo, henˇ taˍ ve htaꞈ gʼaꞈ te leh Yeˍsuˆ ve awˬ laꞈ gʼawˇ hpehꞈ la tuˬ nawˬ ga piˇ gaˇ ve tehꞈ ngaˬ hui yonˍ gʼa ve yoˬ. Chaw yaˇ Yaˬhoˉvaˬ htaꞈ haꞈ leh yawˇ ve kanˉ te tuˬ dawˇ law ve yoˬ. Chi htaꞈ pa taw, Yaˬhoˉvaˬ Liꞈ hpu henˇ ve chaw htaꞈ dawˇ haˍ leh haꞈ ve tehꞈ yawˇ shiˍ tuˬ ngaˬ hui ga piˇ gaˇ ve yoˬ. “Gʼuiˬ sha lehˬ, yaˇ cuˬ shi teˇ hpaˍ leh mehˇ chawˇ ma teˇ hpaˍ htaꞈ haꞈ shaˉ chehˇ ve” tehꞈ yawˇ shiˍ tuˬ ngaˬ hui ga piˇ gaˇ ve yoˬ. (Chiˇ 68:5) Liꞈ hpu henˇ ve chaw Yaˬhoˉvaˬ yawˇ htaꞈ hkʼaˬ hkʼe taw haꞈ ve shiˍ htaˇ, yawˇ kaꞈ Yaˬhoˉvaˬ htaꞈ haꞈ la ve yoˬ. Liꞈ hpu henˇ ve chaw htaꞈ Yaˬhoˉvaˬ ve te hkʼaˇ dawˇ hkʼaˇ maˍ piˇ htaˇ, Yaˬhoˉvaˬ yawˇ htaꞈ co co taiˍ taiˍ a shaꞈ gʼa tcuh gaˇ ve, leh Yaˬhoˉvaˬ yawˇ htaꞈ ga piˇ gaˇ ve tehꞈ shiˍ tcuh sheˍ. w20.01 3 ¶7-8

Tcuh yaˇ Pawˇluꞈ nyi ma nuˇ nehˬ leh awˬ chawˇ geh awˬ gʼaˇ gʼa tuˬ loˍ ve tehꞈ yawˇ shiˍ ve yoˬ. Awˬ chawˇ ga laˇ ve htaꞈ yawˇ haꞈ yuˬ htaˇ, awˬ gʼaˇ nuˇ ve tehꞈ shu kʼoˆ ve htaꞈ yawˇ maˇ kawˆ ve hkʼa tawˍ lehˆ gʼa mawˬ ve yoˬ. Ngaˬ hui nyi ma nuˇ nehˬ leh awˬ gʼaˇ gʼa tuˬ loˍ ve tehꞈ haꞈ yuˬ htaˇ, awˬ viˉ awˬ nyi kaꞈ ngaˬ hui htaꞈ ga laˇ ve ha lehˬ ve yoˬ. Pawˇluꞈ awˬ gʼaˇ gʼa tuˬ Liꞈ hpu ga laˇ gʼa ve tehꞈ shiˍ ve yoˬ. (Roˉ 15:4) Teˇ ceuˬ le le htaꞈ haꞈ yuˬ gʼa tuˬ Liꞈ hpu lehˬ cuˇ yiˍ peꞈ laˇ gʼa ve yoˬ. (2 Tiˆ 3:15, 16) Pawˇluꞈ Roˉmaꞈ venˇ htawnˍ hkʼaw lo nyiˇ pawˆ teˇ pawˆ gʼa chehˇ htaˇ, yawˇ gʼa suh la paˇ neˇ ve tehꞈ shiˍ ve yoˬ. Tiˆmoˉseˍ haˆ haˆ laˬ leh “shaˍ guiˬ kʼuˉ htaꞈ bvuhꞈ taˍ ve liꞈ teˇ hpaˍ” yuˬ veu˗oˆ tehꞈ kʼoˆ piˇ ve yoˬ. (2 Tiˆ 4:6, 7, 9, 13) Aˬ htoꞈ ma pa taw le? Liꞈ daw chi ve hkʼaw Heˍbrehˇ ve tawˇ hkawˇ Liꞈ hpu awˬ tawn bvuhꞈ taˍ ve pa taw, yawˇ hkʼaˇ yawˇ Liꞈ hpu henˇ gʼa ve yoˬ. Ngaˬ hui Pawˇluꞈ htaꞈ henˇ yuˬ leh a shu yawˇ hkʼaˇ yawˇ hkʼaˬ htaˆ kaꞈ Liꞈ hpu henˇ ve kʼo, aˬ htoꞈ ma gʼa hpuˇ ve htawˇ nyi ma sha la tuˬ, Yaˬhoˉvaˬ Liꞈ hpu htaꞈ cuˇ leh ga laˇ tuˬ yoˬ. w20.02 23-24 ¶14-15

Eˇliˇhpaˆ, Biˇlaˍdaˆ, leh Zawˇhpaˆ yawˇ hui Yawˇbaˆ htaꞈ ga piˇ tuˬ maˇ dawˇ nyi ve tehꞈ hpeuꞈ maw laˇ ve yoˬ. Yawˇbaˆ hkʼaˬ hkʼe hpawˇ te yaꞈ ve yawˇ hui chaˬ nyi tuˬ tiˉ dawˇ nyi ve yoˬ. Teˇ pawˆ pawˆ yawˇ hui yaw ve tawˇ cawˇ ve htawˇ, maˇ˗awˍ ve kʼo yawˇ hui Yawˇbaˆ leh Yaˬhoˉvaˬ htaꞈ maˇ daꞈ ve hpawˇ kʼoˆ ve yoˬ. Yawˇ hui Yawˇbaˆ htaꞈ maˇ daꞈ ve chaw tehꞈ dawˇ cheˆ ve yoˬ. (Yb 32:1-3) Awˬ lawn chi Yaˬhoˉvaˬ hkʼaˬ hkʼe dawˇ ve le? Yawˇ beuꞈ jaˇ. Chaw chi 3 gʼaˇ kʼaˍ leh Yawˇbaˆ yawˇ hui awˬ pon bon lawˬ laˇ tuˬ ca lawˬ hkawˉ˗e tehꞈ Gʼuiˬ sha kʼoˆ piˇ ve yoˬ. (Yb 42:7-9) Eˇliˇhpaˆ, Biˇlaˍdaˆ, leh Zawˇhpaˆ ve maˇ daꞈ ve awˬ lawn ngaˬ hui htaꞈ hkʼaˬ hkʼe maˍ laˇ ve le? Awˉ lawˉ teˇ ceuˬ lehˬ ngaˬ hui awˬ viˉ awˬ nyi htaꞈ maˇ dawˇ cheˆ piˇ. (Maꞈ 7:2-5) Ngaˬ hui tawˇ maˇ yaw sheˍ htaˇ shu yaw ve htaꞈ hkʼa dehꞈ na ve, yawˇ awˬ tehˬ kʼo aˬ htoꞈ ma gʼa hpuˇ ve ngaˬ hui gʼa na gʼa piˇ ve yoˬ. (1 Peˍ 3:8) Nyiˇ ceuˬ lehˬ ngaˬ hui tawˇ daꞈ daꞈ yaw leh awˬ tehˬ ve htaꞈ gʼa yaw ve yoˬ. (Efs 4:25) Shehˆ ceuˬ lehˬ ngaˬ hui shu htaꞈ aˬ htoꞈ ma tawˇ yaw piˇ ve Yaˬhoˉvaˬ a yeˇ yuˬ jaˇ. w20.03 22-23 ¶15-16

Shu htaꞈ Yaˬhoˉvaˬ ve awˬ lawn maˍ piˇ htaˇ, ngaˬ hui kaꞈ yawˇ htaꞈ hkʼa dehꞈ shiˍ ve yoˬ. Gʼuiˬ sha htaꞈ awˬ chawˇ te gaˇ ve chaw htaꞈ mawˬ tuˬ yawˇ ha kʼaˉ ve hkʼaw beˆ maˍ laˇ ve yoˬ. (Yoˇ 6:44; Tcuh 13:48) Liꞈ hpu henˇ ve chaw yawˇ awˬ to leh te hkʼaˇ dawˇ hkʼaˇ pa ve htaꞈ gʼa mawˬ htaˇ, Liꞈ hpu hkʼaw ve kanˇ paˆ ngaˬ hui hkʼa tawˍ lehˆ gʼa mawˬ ve yoˬ. (Kawˇ 3:9, 10) Chi hkʼoˆ kaꞈ, Gʼuiˬ sha htaꞈ shiˍ leh a shaꞈ gʼa ponˬ tuˬ ngaˬ hui hto toˇ kuiˬ awˬ ti lo ve chaw htaꞈ laiˉ pawˆ Yaˬhoˉvaˬ yeunˇ hkanˍ laˇ ve ngaˬ hui hkʼa tawˍ lehˆ gʼa mawˬ ve yoˬ. (Roˉ 10:13-15) Yaꞈ hkʼaˇ Yaˬhoˉvaˬ ve kanˉ hkʼaˬ hkʼe maw te˗oˬ ve htawˇ, ngaˬ hui yawˇ geh meuˆ daꞈ ve awˬ hpfuhˇ shiˍ ve tehꞈ gʼa hpeuꞈ maw piˇ ve yoˬ. Ngaˬ hui awˬ hpfuhˇ shiˍ ve hkʼa tawˍ lehˆ te tawˆ la ve teˇ hkʼaˇ lehˬ yawˇ geh bon lawˬ ve yoˬ. Nawˬ chaw teˇ gʼaˇ htaꞈ meuˆ daꞈ gaˇ ve kʼo, yawˇ geh tawˇ gʼa yaw daꞈ cawˇ ve yoˬ. Nawˬ Gʼuiˬ sha geh meuˆ daꞈ gaˇ ve kʼo, yawˇ geh bon gʼa lawˬ cawˇ ve yoˬ. Nawˬ hkʼaˬ hkʼe dawˇ ve Gʼuiˬ sha htaꞈ kʼoˆ piˇ tuˬ taˇ kawˆ. w19.12 19 ¶11, 13-14

Ngaˬ hui awˬ lawn chi htaꞈ shiˍ˗oˬ htaˇ awˬ gʼaˇ gʼa jaˇ! Yeˍsuˆ Gʼuiˬ sha ve mvuhˇ miˬ hkʼaw Jawˇmawˇ te leh, Saˍtanˍ leh yawˇ ve miˬ guiˬ ngaˬ hui htaꞈ te luˬ laˇ ve hkʼa peu˗eˬ Yeˍsuˆ gu tuˬ yoˬ. (Isy 65:17; 1 Yoˇ 3:8; Hpeuꞈ 21:3, 4) Chi ngaˬ hui daꞈ jaˇ ve dawˇ law kuiˬ cawˬ tuˬ te laˇ ve yoˬ! Yeˍsuˆ ngaˬ hui htaꞈ awˬ vuiˬ peꞈ laˇ ve haˍ jaˇ ve htawˇ, yawˇ awˬ leh meuˇ ve awˬ yanˇ ngaˬ hui geh hkʼaˬ htaˆ kaꞈ chehˇ leh ga laˇ tuˬ yoˬ. (Maꞈ 28:19, 20) Awˬ ceuˬ chi ngaˬ hui haꞈ hanˉ ve cawˬ tuˬ ga laˇ jaˇ! Ngaˬ hui nyi ma gawˬ lehˍ, awˬ gʼaˇ, dawˇ law kuiˬ, leh haꞈ hanˉ ve cawˬ tuˬ a yeˇ uiˍ jaˇ. Yaꞈ hkʼaˇ, ngaˬ hui shoꞈ shaꞈ jaˇ ve htaꞈ gʼa hpuˇ htaˇ, hkʼaˬ hkʼe te nyi ma gawˬ lehˍ cawˬ gʼa tuˬ le? Ngaˬ hui Yeˍsuˆ htaꞈ gʼa henˇ yuˬ ve yoˬ. (1) Hkʼaˬ htaˆ kaꞈ bon gʼa lawˬ ve yoˬ. (2) Haˍ jaˇ ve htawˇ, ngaˬ hui Yaˬhoˉvaˬ ve hkawˇ gʼa na yuˬ leh gʼaˇ hteꞈ hto toˇ cawˇ ve yoˬ. (3) Shoꞈ shaꞈ ve htaꞈ gu gʼa tuˬ awˬ chawˇ ga laˇ ve htaꞈ haꞈ yuˬ ve yoˬ. Ngaˬ hui chi hkʼe te ve kʼo, Gʼuiˬ sha lo laˬ ve dawˇ sha gaˇ sha ve ngaˬ hui ve nyi ma leh dawˇ hkʼaˇ htaꞈ haꞈ shaˉ laˇ tuˬ yoˬ. Yeˍsuˆ hkʼa shuˍ ngaˬ hui shoꞈ shaꞈ ve hkʼa peu˗eˬ htaꞈ gʼaˇ tuˬ yoˬ.—Yoˇ 16:33. w19.04 13 ¶16-17