Ha pa 10 maˬ

Chi beuꞈ teˇ co˗e Yaˬhoˉvaˬ yawˇ ve chaw htaꞈ haꞈ shaˉ chehˇ ve tehꞈ ngaˬ hui shaˉ hkiˆ laiˉ ceuˬ mawˬ ve yoˬ. Awˬ lawn chi htaꞈ dawˇ nyi sheˍ. Ngaˬ hui miˬ guiˬ chi hkʼoˆ lo hto toˇ leh awˬ tehˬ ve htaꞈ maˍ chehˇ ve yoˬ. (Maꞈ 28:19, 20) Chi htaꞈ pa taw Saˍtanˍ ve awˬ lawn ngaˬ hui hpeuꞈ maw piˇ chehˇ ve yoˬ. Saˍtanˍ te gʼa ve kʼo, ngaˬ hui ve kanˉ htaꞈ jehˇ tcuh gaˇ ve yoˬ. Yaꞈ hkʼaˇ, yawˇ te maˇ gʼa. Hkʼe te leh neˇ teˇ hpaˍ htaꞈ ngaˬ hui kawˆ tuˬ maˇ loˍ. Ngaˬ hui Yaˬhoˉvaˬ htaꞈ ka tiꞈ yeˬ ve kʼo, neˇ teˇ hpaˍ ngaˬ hui htaꞈ co co taiˍ taiˍ te luˬ laˇ maˇ gʼa. Yaꞈ hkʼaˇ, teˇ gʼaˇ le le neˇ teˇ hpaˍ htaꞈ tawˍ daꞈ leh Yaˬhoˉvaˬ htaꞈ gʼaˇ va sheˍ. Ngaˬ hui chi hkʼe te ve kʼo, awˬ bon maˇ maˇ gʼa leh, Saˍtanˍ ngaˬ hui htaꞈ maˇ heˍ laˇ gʼa. Chi hkʼoˆ kaꞈ ngaˬ hui neˇ teˇ hpaˍ htaꞈ kawˆ leh teꞈ chiˉ te maˇ gʼa ve maˇ heˆ. A yeˇ uiˍ jaˇ ve lehˬ ngaˬ hui Yaˬhoˉvaˬ geh meuˆ daꞈ ve yoˬ. Yaˍkoˆ kʼoˆ ve, “Neˇ haiˬ htaꞈ tawˍ taˍ˗oꞈ. Nawˬ hui lo yawˇ hpaw tawˆ˗e tuˬ yoˬ. Gʼuiˬ sha geh jiˆ laˬ˗oꞈ. Hkʼe te kʼo, yawˇ nawˬ hui geh jiˆ laˬ tuˬ yoˬ.”—Yaˍ 4:7, 8. w19.04 24 ¶15; 25 ¶18

“Yaˇ ehˉ teˇ hpaˍ lehˬ Gʼuiˬ sha peꞈ laˇ ve laꞈ shawnˍ hpehꞈ ve yoˬ.” Laꞈ shawnˍ chi htaꞈ haꞈ shaˉ tuˬ nawˬ ve awˬ vuiˬ yoˬ. Nawˬ hkʼaˬ hkʼe te haꞈ shaˉ gʼa tuˬ le? Awˉ lawˉ teˇ ceuˬ lehˬ, yaˇ htaꞈ pehꞈ ve tzuhˆ ve hpawˇ naˬ taweh te piˇ ve awˬ lawn nawˬ hkʼaˇ nawˬ kaꞈ hkʼa dehꞈ na gʼa cawˇ ve yoˬ. Chi hkʼe te yaꞈ ve lehˬ hkʼaˬ hkʼe ve chaw le? Yawˇ hui yaˇ htaꞈ hkʼaˬ hkʼe heˍ piˇ ve le? Hkʼaˬ hkʼe ve awˬ yanˇ htaˇ kawˆ tuˬ cawˬ ve ngaˬ hui hkʼa dehꞈ gʼa chaˬ nyi ve yoˬ. (Tawˇ 22:3; 24:3) Chi hkʼe te yaꞈ ve chaw lehˬ maˇ˗awˍ ve kʼo yaˇ shiˍ leh meuˆ daꞈ ve chaw hpehꞈ ve tehꞈ tawnˇ taˍ sheˍ. Nyiˇ ceuˬ teˇ ceuˬ lehˬ, yaˇ geh hkʼaˬ htaˆ kaꞈ tawˇ yaw daꞈ cawˇ ve yoˬ. (Bon 6:6, 7; Yaˍ 1:19) Chi kʼoˆ gaˇ ve lehˬ nawˬ hui yaˇ htaꞈ hkʼa dehꞈ na taˍ piˇ cawˇ ve yoˬ. Yaˇ chi hkʼe gʼa hpuˇ ve kʼo, maˇ kʼoˆ haˆ tehꞈ tawnˇ taˍ sheˍ. Yaˇ shu maˇ yonˍ la ve htaꞈ kawˆ ve, maˇ heˆ kʼo haiˬ ve te piˇ ve chaw, yaˇ htaꞈ nyiˉ piˇ leh maˇ kʼoˆ tcuh ve yoˬ hehˉ. Yaˇ teˇ pawˆ le le htaꞈ maˇ shuˍ ve kʼo, laiˉ ceuˬ na piˇ leh yeunˇ hkanˍ ve hkʼaw hkʼa dehꞈ na taˍ piˇ sheˍ. Shehˆ ceuˬ teˇ ceuˬ lehˬ, yaˇ htaꞈ hkʼa dehꞈ maˍ piˇ cawˇ ve yoˬ. Chaw teˇ gʼaˇ yaˇ htaꞈ maˇ keunˍ ve hkʼaw ca shoˆ la ve kʼo, hkʼaˬ hkʼe gʼa kʼoˆ leh te cawˇ ve kaꞈ yaˇ htaꞈ maˍ piˇ cawˇ ve yoˬ. w19.05 13 ¶19-22

Aˬ htoꞈ ma te Yaˬhoˉvaˬ yawˇ hui htaꞈ canˇ ve le? Uiˍ muiˬ caˆ muiˬ ve chaw lehˬ Saˍtanˍ hkʼe hpehꞈ leh yawˇ awˬ to htaꞈ haꞈ jaˇ. Dawˇ nyi sheˍ. Yaˬhoˉvaˬ Yeˍsuˆ htaꞈ cuˇ leh teˇ ceuˬ le le hpanˍ tcuh ve htawˇ, Saˍtanˍ Yeˍsuˆ hkui tcuhˉ teh leh yawˇ htaꞈ oˉ kʼoˍ pui cawˇ ve tehꞈ dawˇ sheˍ ve yoˬ! (Maꞈ 4:8, 9; Kawˇ 1:15, 16) Nyi ma uiˍ ve chaw te hkʼaˇ dawˇ hkʼaˇ ngaˬ hui htaꞈ hpeuꞈ maw laˇ ve, miˬ guiˬ ve cuˇ yiˍ Gʼuiˬ sha mehˆ gʼuˇ suhˍ lo cuˇ yiˍ maˇ cawˬ. (1 Kawˇ 3:19) Ngaˬ hui a shu yawˇ awˬ to htaꞈ keunˍ lawꞈ cawˇ lawꞈ ve hkʼe dawˇ tuˬ leh haꞈ shaˉ tuˬ kaꞈ Liꞈ hpu hkʼaw maˍ laˇ ve yoˬ. “Nawˬ awˬ to htaꞈ haꞈ ve hkʼe nawˬ awˬ paˇ awˬ kui chehˇ ve chaw htaꞈ haꞈ˗oꞈ” tehꞈ Yeˍsuˆ kʼoˆ ve yoˬ. (Maꞈ 19:19) Chi kʼoˆ gaˇ ve lehˬ ngaˬ hui a shu yawˇ loˍ ve htaꞈ kaꞈ dawˇ nyi cawˇ ve yoˬ. Yaꞈ hkʼaˇ, ngaˬ hui shu aꞈ kehˉ a yeˇ uiˍ ve tehꞈ maˇ gʼa dawˇ tuˬ Liꞈ hpu hkʼaw maˍ laˇ ve yoˬ. Liꞈ hpu hkʼaw kʼoˆ sheˍ ve, “hkʼaˬ ve teˇ ceuˬ htawˇ maˇ kʼoˆ, tawˇ gʼawˬ daꞈ leh nyi ma uiˍ ve awˬ hkʼaw lo taˇ te. Yaꞈ hkʼaˇ, nyi ma nuˇ nehˬ ve awˬ hkʼaw lo, teˇ gʼaˇ leh teˇ gʼaˇ a shu yawˇ awˬ to aꞈ kehˉ shu htaꞈ taˍ uiˍ taˍ mvuh piˇ˗oˆ.”—Hpi 2:3; Roˉ 12:3. w19.05 24 ¶13-14

Nawˬ Liꞈ hpu tanˬ henˇ leh Gʼuiˬ sha ve kanˉ te tuˬ dawˇ cheˆ htaˇ, aˬ htoꞈ ma gʼa pa cawˇ ve dawˇ nyi sheˍ. Ngaˬ hui kaꞈ maˇ daꞈ ve dawˇ hkʼaˇ htaꞈ gʼa pa cawˇ ve yoˬ. (1 Kawˇ 6:9-11) Yaˬhoˉvaˬ ngaˬ hui htaꞈ ga laˇ leh maˇ daꞈ ve dawˇ hkʼaˇ yuˬ baˬ gʼa ve ha lehˬ jaˇ! Ngaˬ hui teꞈ chiˉ maˇ gʼa pa cawˇ˗o ve tehꞈ taˇ dawˇ. Ngaˬ hui Baˆtiˆsaˬ maˇ haꞈ yuˬ sheˍ htaˇ venˇ baˆ uiˍ jaˇ ve htaꞈ te yaꞈ jaw ve htawˇ, ngaˬ hui awˉ lawˉ htaˇ hkʼe kʼawꞈ te tuˬ beˬ laˇ ve htaꞈ jaw hpaw˗e cawˇ ve yoˬ. Chi htaꞈ pa taw ngaˬ hui nyiˇ ceuˬ htaꞈ gʼa te ve yoˬ. Awˉ lawˉ teˇ ceuˬ “chi miˬ guiˬ yaˇ ve awˬ liˇ awˬ hkʼaˇ teˇ hpaˍ awˬ hkʼaˇ suh taˇ kʼai.” Nyiˇ ceuˬ teˇ ceuˬ “nyi ma awˬ suhˉ kʼawꞈ pa leh, chaw awˬ suhˉ hpehꞈ la piˇ˗oˆ.” A shu yawˇ awˬ to pa cawˇ ve tehꞈ Pawˇluꞈ kʼoˆ htaˇ, awˬ htaꞈ hpawˇ ceh pa ve maˇ heˆ. Chi ngaˬ hui te ve teˇ ceuˬ le le hpawˇ heuˆ la kuiˬ cawˬ ve yoˬ. Ngaˬ hui ve dawˇ hkʼaˇ awˬ suhˉ kʼawꞈ pa cawˇ ve yoˬ. Chi ngaˬ hui ve nyi ma hkʼaw cawˬ ve dawˇ hkʼaˇ hkʼa peu˗eˬ htaꞈ kʼoˆ gaˇ ve yoˬ. w19.06 9 ¶4-6

Ngaˬ hui dawˇ haˍ htaˇ Hkriꞈ yaˇ hpawnˬ daꞈ ve kʼai ve kʼo ngaˬ hui awˬ gʼaˇ kʼawꞈ gʼa ve yoˬ. Hpawnˬ daꞈ htaˇ, Yaˬhoˉvaˬ lehˬ ngaˬ hui htaꞈ ‘dawˇ sha la piˇ leh ga laˇ shehˍ hpaˇ’ hkʼe hpehꞈ ve yoˬ. Ngaˬ hui htaꞈ awˬ gʼaˇ peꞈ laˇ tuˬ yawˇ daꞈ kehˬ ve awˬ hpu, Liꞈ hpu, leh yawˇ ve chaw htaꞈ cuˇ ve yoˬ. Hpawnˬ daꞈ htaˇ, “teˇ gʼaˇ htaꞈ teˇ gʼaˇ awˬ gʼaˇ piˇ daꞈ” gʼa ve yoˬ. (Roˉ 1:11, 12) Awˬ viˉ awˬ nyi Soˍfiˇ˗aꞈ kʼoˆ ve, “Yaˬhoˉvaˬ leh awˬ viˉ awˬ nyi ngaˬ yeunˇ hkanˍ gʼaˇ tuˬ ga laˇ ve yoˬ. Hkriꞈ yaˇ hpawnˬ daꞈ ve ngaˬ awˬ pon a yeˇ uiˍ jaˇ. Ngaˬ gʼaˇ hteꞈ hto toˇ˗e leh Hkriꞈ yaˇ awˬ moˍ geh chehˇ htaˇ, dawˇ haˍ ve kaꞈ hkʼa dehꞈ maˇ cawˬ˗o.” Ngaˬ hui awˬ gʼaˇ nuˇ htaˇ chi htaꞈ tawnˇ taˍ sheˍ. Awˬ gʼuˇ suhˍ hpawˇ ngaˬ hui maˇ kʼawꞈ gʼa dawˇ haˍ˗o tehꞈ Yaˬhoˉvaˬ ka tiꞈ te taˍ laˇ ve yoˬ. Yaꞈ hkʼaˇ, chi teˇ hkui ngaˬ hui dawˇ haˍ ve gu gʼa tuˬ kaꞈ Yaˬhoˉvaˬ ka tiꞈ te taˍ laˇ ve yoˬ. Ngaˬ hui awˬ gʼaˇ nuˇ leh dawˇ law kuiˬ maˇ cawˬ ve htaꞈ tawˍ daꞈ gʼaˇ tuˬ “te gaˇ ve nyi ma” kʼawꞈ cawˬ tuˬ yawˇ peꞈ laˇ tuˬ yoˬ.—Hpi 2:13. w19.06 19 ¶17-18

Yeˍsuˆ kʼawꞈ teꞈ tu la peuˬ hkʼawꞈ nawˉ, te ve awˉ lawˉ teˇ ceuˬ lehˬ awˬ laꞈ gʼawˇ htaꞈ mawˬ daꞈ tuˬ tinˍ daꞈ ve yoˬ. Yawˇ a yeˇ uiˍ jaˇ ve awˬ ceuˬ yawˇ hui htaꞈ kʼoˆ piˇ gaˇ ve yoˬ. Yeˍsuˆ awˬ laꞈ gʼawˇ htaꞈ mawˬ daꞈ htaˇ, a yeˇ uiˍ jaˇ ve kanˉ te tuˬ kʼoˆ piˇ ve yoˬ. Chi beuꞈ ngaˬ hui te chehˇ ve hkʼa shuˍ yoˬ. Yawˇ kʼoˆ ve, ‘nawˬ hui kʼai leh chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o. Ngaˬ nawˬ hui htaꞈ piˇ taˍ ve tawˇ hkawˇ hkʼa peu˗eˬ na yuˬ leh te tuˬ, yawˇ hui htaꞈ maˍ piˇ˗oˆ.’ (Maꞈ 28:19, 20) Yeˍsuˆ yawˇ awˬ hkʼaˇ suh gʼaꞈ yuˬ ve chaw teˇ gʼaˇ le le htaꞈ hto toˇ tcuh gaˇ ve yoˬ. Ka tiꞈ yeˬ ve tcuh yaˇ 11 gʼaˇ htaꞈ kʼoˆ piˇ ve ceh maˇ heˆ. Aˬ htoꞈ ma te awˬ lawn chi ngaˬ hui shiˍ ve le? Awˬ lawn kʼo, Gaˍliˍlehˇ hkʼaw pui hkʼoˆ lo Yeˍsuˆ bon maˍ htaˇ, tcuh yaˇ hui ceh oˇ kaˬ lo chehˇ taˍ ve maˇ heˆ. Mvuhˇ naw ma tcuh yaˇ, yaˇ miˇ hui htaꞈ kʼoˆ piˇ ve dawˇ nyi sheˍ. Yawˇ kʼoˆ ve, nawˬ Gaˍliˍlehˇ mvuhˇ miˬ lo Yeˍsuˆ htaꞈ mawˬ tuˬ yoˬ. (Maꞈ 28:7) Yeˍsuˆ kʼoˆ htaˇ yawˇ hui oˇ kaˬ lo gʼa chehˇ taˍ cawˇ ve yoˬ. w20.01 2-3 ¶1-4

Ngaˬ hui tawˍ laˇ ve htaꞈ gʼa hpuˇ tuˬ yoˬ tehꞈ Yeˍsuˆ kʼoˆ maˍ laˇ ve yoˬ. Ngaˬ hui miˬ guiˬ htaꞈ maˇ caˉ daꞈ ve pa taw, miˬ guiˬ yaˇ canˇ tuˬ yoˬ tehꞈ yawˇ kʼoˆ taˍ ve yoˬ. Fawˉ mehˍ ve gʼa hpuˇ htaˇ, Yaˬhoˉvaˬ ngaˬ hui htaꞈ awˬ bon maˇ naꞈ laˇ˗o ve maˇ heˆ. Ngaˬ hui fawˉ mehˍ ve htaꞈ gʼa hpuˇ ve kʼo, cawˇ ve htaꞈ te ve tehꞈ kʼoˆ gaˇ ve yoˬ! Chaw yaˇ tawˍ laˇ ve lehˬ ngaˬ hui uiˍ jaˇ mvuhˇ jaˇ ve Gʼuiˬ sha Yaˬhoˉvaˬ htaꞈ oˉ kʼoˍ maˇ pui tuˬ te laˇ maˇ gʼa. Laiˉ gʼaˇ ngaˬ hui ve kanˉ htaꞈ jehˇ tcuh laˇ jaw˗oˬ. Yaꞈ hkʼaˇ te maˇ gʼa. Maꞈ lonˉ nyiˇ pawˆ teˇ pawˆ htaˇ ve htaꞈ dawˇ nyi sheˍ. Oˇ ve teˇ yanˇ mvuhˇ miˬ laiˉ mvuhˇ miˬ Yaˬhoˉvaˬ ve chaw htaꞈ fawˉ mehˍ piˇ jaˇ. Jaˬmaˬniˬ mvuhˇ miˬ Naˍziˬ awˬ moˍ ceh fawˉ mehˍ piˇ ve maˇ heˆ. Awˆsuh˗teˇriˇaˇ, Kaˬneˬdaˬ, leh awˬ nu ve mvuhˇ miˬ kaꞈ fawˉ mehˍ piˇ ve yoˬ. Yaꞈ hkʼaˇ, 1939 hkʼawꞈ maꞈ tanˬ htaˇ ve htaꞈ dawˇ nyi sheˍ. Oˇ ve teˇ yanˇ hto toˇ ve chaw hkʼa peu˗eˬ 72,475 gʼaˇ cawˬ ve yoˬ. Yaꞈ hkʼaˇ, 1945 hkʼawꞈ maꞈ peuˬ htaˇ hto toˇ ve chaw hkʼa peu˗eˬ 156,299 gʼaˇ cawˬ leh Yaˬhoˉvaˬ awˬ bon naꞈ laˇ ve htaꞈ gʼa mawˬ ve yoˬ. Hto toˇ ve chaw 2 pun hkʼe taw kʼawꞈ maˇ la ve yoˬ! w19.07 9 ¶4-5

Chi teˇ hkui nawˬ geh Liꞈ hpu henˇ ve chaw maˇ cawˬ ve htawˇ, nawˬ shu awˬ laꞈ gʼawˇ hpehꞈ la tuˬ ca te ve awˬ vuiˬ cawˬ ve yoˬ. Hpawnˬ daꞈ la gehˇ sheˍ ve chaw htaꞈ haꞈ yuˬ leh nawˬ awˬ chawˇ te piˇ sheˍ. Awˬ tehˬ ve Hkriꞈ yaˇ teˇ gʼaˇ leh teˇ gʼaˇ haꞈ daꞈ ve pa taw, yawˇ yonˍ gʼa tuˬ te piˇ ve yoˬ. Chi hkʼoˆ kaꞈ hpawnˬ daꞈ kuiˬ hkʼaw nawˬ ve dawˇ hkʼaˇ chi˗suhˉ˗ehˍ hkʼawꞈ ve kʼo, hpawnˬ daꞈ la gehˇ sheˍ ve chaw awˬ gʼaˇ gʼa leh yawˆ yan tuˬ te piˇ ve yoˬ. Awˬ nu ve teˇ hkʼaˇ lehˬ hto toˇ ve chaw awˬ suhˉ geh hto toˇ leh yawˇ Liꞈ hpu hkʼaw ve awˬ lawn yehˬ shehˍ hpaˇ htaꞈ kʼoˆ maˍ piˇ puiˉ tuˬ ga piˇ ve yoˬ. Chi hkʼe te htaˇ, yawˇ Yeˍsuˆ Hkriꞈ htaꞈ henˇ yuˬ chehˇ ve nawˬ maˍ piˇ gʼa ve yoˬ. (Luˉ 10:25-28) Hkriꞈ yaˇ laiˉ gʼaˇ kanˉ maˇ jaˇ ve pa taw maˇ tanˇ. Yaꞈ hkʼaˇ, yawˇ hui awˬ yanˇ yuˬ tanˇ leh shu htaꞈ Liꞈ hpu maˍ piˇ ve ha lehˬ jaˇ. w19.07 17 ¶11, 13

Tcuh yaˇ Pawˇluꞈ te jaw ve daꞈ ve htawˇ maˇ daꞈ ve htawˇ, awˬ lawn chi yawˇ Yaˬhoˉvaˬ ve kanˉ te ve htaꞈ maˇ heuˆ la tcuh. “Awˬ gʼuˇ suhˍ lo cawˬ taˍ ve awˬ ceuˬ teˇ hpaˍ htaꞈ gʼaˇ hteꞈ laꞈ sheh che yuˬ” gʼa tuˬ, “ponˬ laˬ peuˬ ve awˬ ceuˬ teˇ hpaˍ htaꞈ ngaˬ leunˇ baˬ taˉ” ve yoˬ tehꞈ yawˇ kʼoˆ ve yoˬ. Pawˇluꞈ kanˉ hkʼa dehꞈ maˇ te˗o tuˬ te piˇ ve aˬ htoꞈ ma cawˬ ve hehˉ le? Awˉ lawˉ teˇ maˬ lehˬ yawˇ Hkriꞈ yaˇ maˇ hpehꞈ sheˍ htaˇ, Yuˇdaꞈ chaw hkʼaw awˬ meh bvuhˬ ve teˇ gʼaˇ hpehꞈ ve yoˬ. Yaꞈ hkʼaˇ, chi hkʼa peu˗eˬ “shonˇ ve awˬ ceuˬ hpehꞈ ve” tehꞈ yawˇ dawˇ ve yoˬ. (Hpi 3:3-8) Nyiˇ maˬ teˇ maˬ lehˬ yawˇ Hkriꞈ yaˇ htaꞈ fawˉ mehˍ piˇ jaw ve pa taw, nyi ma maˇ sha leh awˬ gʼaˇ nuˇ leh kanˉ maˇ te˗o ve maˇ te laˇ tcuh. Shehˆ maˬ teˇ maˬ lehˬ yawˇ Yaˬhoˉvaˬ ve kanˉ te maˇ jaˇ˗o leh kaiˬ ve hkʼaw maˇ te˗o kaꞈ hpehꞈ ve tehꞈ maˇ dawˇ. Shu Pawˇluꞈ htaꞈ htawnˍ hkʼaw lo yuˬ keu piˇ ve, jawꞈ piˇ ve, haˉ pui baˬ hpehˇ piˇ leh, haw loꞈ kʼoˍ luˬ kʼai ve, caˇ tuˬ leh veuꞈ kʼaˇ maˇ cawˬ ve kaꞈ gʼa hpuˇ ve htawˇ, yawˇ Gʼuiˬ sha ve kanˉ hkʼa dehꞈ te gʼa ve yoˬ. (2 Kawˇ 11:23-27) Yaꞈ hkʼaˇ, Pawˇluꞈ laiˉ ceuˬ gʼa te leh gʼa hpuˇ ve htawˇ, caˉ leh gʼa te ve tehꞈ yawˇ shiˍ ve yoˬ. Ngaˬ hui kaꞈ Pawˇluꞈ hkʼa shuˍ gʼa te ve yoˬ. w19.08 3 ¶5

Awˬ viˉ awˬ nyi laiˉ gʼaˇ mvuhˇ miˬ lo teˇ yehˬ peuˬ teˇ yehˬ hto toˇ tuˬ a hkaw˗anˬ maˇ gʼa ve htawˇ, hto toˇ gʼa tuˬ awˬ hkʼaˇ kʼawꞈ ca ve yoˬ. (Maꞈ 10:17-20) Mvuhˇ miˬ teˇ peˆ hkʼaw chi hkʼe gʼa hpuˇ htaˇ, hto toˇ ve chaw a shu yawˇ “chehˇ kuiˬ” lo ceh hto toˇ tehꞈ toˇ nyi shehˍ hpaˇ beˆ maˍ piˇ ve yoˬ. A shu yawˇ ve awˬ viˉ awˬ nyi, awˬ chawˇ, liꞈ teˇ geh henˇ ve chaw, kanˉ teˇ geh te ve chaw, leh shiˍ daꞈ ve chaw teˇ hpaˍ htaꞈ hto maˍ piˇ sheˍ. Ponˬ kʼai ve 2 hkʼawꞈ gaˬ leh Hkriꞈ yaˇ awˬ moˍ kʼawꞈ maˇ la ve yoˬ. Ngaˬ hui hto toˇ tuˬ a hkaw˗anˬ maˇ gʼa ve mvuhˇ miˬ hkʼaw maˇ gʼa chehˇ ve htawˇ, awˬ viˉ awˬ nyi hto toˇ tuˬ awˬ hkʼaˇ shiˍ ve chi ngaˬ hui htaꞈ maˍ laˇ ve yoˬ. Chi htaꞈ pa taw, nawˬ hto toˇ gʼa tuˬ awˬ hkʼaˇ ca sheˍ. Nawˬ chi hkʼe te ve kʼo tuꞈ hkanˍ ve awˬ yanˇ hkʼaw chehˇ ve htawˇ, Yaˬhoˉvaˬ ga laˇ leh nawˬ caˉ leh hto toˇ gʼa tuˬ tehꞈ yonˍ gʼa ve yoˬ. (Hpi 2:13) Daꞈ ve kehˬ ve nyi ma cawˬ ve lehˬ aˬ htoꞈ ma a yeˇ uiˍ ve shiˍ cawˇ ve, hkʼa biˇ te gʼa ve chaw hpehꞈ cawˇ ve, shu ve yonˍ hkʼaˇ hkui htiˇ poˬ tuˬ maˇ gʼa te ve yoˬ. Ngaˬ hui haꞈ pehnˇ ve shaˬ te shaˬ cawˬ leh Awˬ pa Yaˬhoˉvaˬ awˬ meꞈ awˬ hponˇ gʼa tuˬ te sheˍ. w19.08 13 ¶17-18

A shu yawˇ awˬ pon tiˉ dawˇ nyi leh shu hkawˇ maˇ na gaˇ ve chaw geh nawˬ awˬ chawˇ maˇ te gaˇ taˬ. Yaꞈ hkʼaˇ, ‘awˬ viˉ awˬ nyi teˇ gʼaˇ leh teˇ gʼaˇ ha kʼaˉ daꞈ leh nyi ma nuˇ lehˍ te leh, shu awˬ hawˉ lo nyi ma nehˬ lehˍ taˍ’ ve chaw geh awˬ chawˇ te gaˇ ve yoˬ. (1 Peˍ 3:8) Nawˬ chi hkʼe ve chaw hpehꞈ ve kʼo, shu kaꞈ nawˬ htaꞈ awˬ chawˇ te gaˇ tuˬ yoˬ. Nyi ma nuˇ nehˬ ve chaw hpehꞈ ve lehˬ ngaˬ hui ve a shaꞈ teꞈ hkʼaˇ kaꞈ daꞈ ve yoˬ. Teˇ pawˆ pawˆ kʼo maˇ hteˇ maˇ cawˇ ve gʼa mawˬ ve maˇ heˆ leh a shu yawˇ awˬ to gʼa hpuˇ ve yoˬ. Laiˉ ceuˬ te gʼa ve htawˇ, teˇ pawˆ le le chiˇ mvuh ve htaꞈ gʼa ve maˇ heˆ. Teˇ pawˆ pawˆ kʼo, laiˉ ceuˬ maˇ te gʼa ve htawˇ, chiˇ mvuh piˇ ve htaꞈ gʼa ve yoˬ. Ngaˬ hui nyi ma luˬ ve aꞈ kehˉ awˬ tehˬ ve htaꞈ haꞈ yuˬ ve lehˬ daꞈ ve yoˬ tehꞈ jawˇ mawˇ Sawˉlaꞈmonˍ kʼoˆ ve yoˬ. (Cuˇ 6:9) Ngaˬ hui dawˇ taˍ ve hkʼe maˇ hpehꞈ ve htawˇ, nyi ma nuˇ nehˬ ve chaw hpehꞈ ve kʼo, a shaꞈ teꞈ kuiˬ hkʼaw hpehꞈ la ve awˬ ceuˬ htaꞈ haꞈ yuˬ sha ve yoˬ. w19.09 4-5 ¶9-10

Awˬ pa leh awˬ nu ve kanˇ paˆ cawˬ ve chaw, yawˇ hui shu awˬ pon awˬ bon cawˬ tuˬ kaꞈ te piˇ gʼa ve yoˬ. Awˬ pa yehˬ shehˍ hpaˇ te tuˬ Yaˬhoˉvaˬ awˬ vuiˬ piˇ taˍ ve yoˬ. Awˬ pa yaˇ htaꞈ maˍ tuˬ Gʼuiˬ sha dawˇ law taˍ ve yoˬ. (1 Kawˇ 11:3) Awˬ pa yawˇ ve kanˇ paˆ htaꞈ yehˇ leh te gaˇ ve hkʼe te maˇ hpehꞈ. Yaˬhoˉvaˬ yehˬ kʼa cawˬ tcuh laˇ ve pa taw, awˬ pa yehˬ kʼa htaꞈ Yaˬhoˉvaˬ te tcuh gaˇ ve hkʼe gʼa te piˇ ve yoˬ. (Efs 3:14, 15) Awˬ pa chi hkʼe te leh Gʼuiˬ sha ha lehˬ tuˬ te piˇ ve kʼo, yawˇ hui Yaˬhoˉvaˬ awˬ hawˉ lo chehˇ ve tehꞈ hpehꞈ maw piˇ ve yoˬ. Yaˬhoˉvaˬ nawˬ htaꞈ peꞈ laˇ taˍ ve kanˇ paˆ yaꞈ ve hpawˇ taˇ yehˇ. Nawˬ te yaꞈ ve htaꞈ haꞈ yuˬ sheˍ. Shu Liꞈ hpu htaꞈ cuˇ leh beˆ maˍ laˇ ve htaꞈ haꞈ yuˬ sheˍ. Nawˬ chi hkʼe te ve kʼo, nawˬ nyi ma nuˇ nehˬ ve pa taw, yehˬ kʼa hkʼaw ve chaw nawˬ htaꞈ yawˆ yan laˇ tuˬ yoˬ. Yehˬ kʼa hkʼaw ve chaw geh bon lawˬ htaˇ nyi ma hkʼaw cawˬ ve hkʼa peu˗eˬ Yaˬhoˉvaˬ htaꞈ kʼoˆ piˇ sheˍ. Nawˬ Yaˬhoˉvaˬ htaꞈ hkʼaˬ hkʼe taw gʼaˇ va ve yawˇ hui htaꞈ mawˬ tcuh sheˍ. Leh a yeˇ uiˍ jaˇ ve lehˬ nawˬ a shaꞈ teꞈ kuiˬ hkʼaw Yaˬhoˉvaˬ htaꞈ awˉ lawˉ teh sheˍ. (Bon 6:6-9) Nawˬ ve daꞈ ve henˇ yuˬ tuˬ lehˬ yehˬ kʼa hkʼaw ve chaw htaꞈ piˇ gʼa tuˬ daꞈ jaˇ ve laꞈ shawnˍ hpehꞈ ve yoˬ. w19.09 15 ¶8; 17 ¶14; 18 ¶16

Laiˉ pawˆ Maˍkuˆ lehˬ Pawˇluꞈ leh Peˍtruˆ geh kanˉ teˇ geh te ve yoˬ. Yawˇ huiˉ maˬ awˬ vuiˬ te htaˇ lehˬ caˇ tuˬ vuiˬ ve, yehˬ ca ve, leh awˬ nu ve awˬ ceuˬ kaꞈ te ve yoˬ. (Tcuh 13:2-5; 1 Peˍ 5:13) Maˍkuˆ lehˬ, “ngaˬ geh teˇ geh Gʼuiˬ sha ve mvuhˇ miˬ awˬ pon kanˉ te chehˇ ve” lehˬ “ngaˬ maˇ maˇ dawˇ sha la” tuˬ awˬ gʼaˇ peꞈ laˇ shehˍ hpaˇ hpehꞈ ve tehꞈ Pawˇluꞈ kʼoˆ ve yoˬ. (Kawˇ 4:11) Maˍkuˆ Pawˇluꞈ ve awˬ chawˇ meuˆ daꞈ jaˇ ve hpehꞈ ve yoˬ. Aˬ laˬ hkʼe 65 hkʼawꞈ Pawˇluꞈ Roˉmaꞈ venˇ htawnˍ hkʼaw lo chehˇ ve awˬ leh meuˇ teˇ pawˆ htaˇ, yawˇ Tiˆmoˉseˍ htaꞈ liꞈ nyiˇ kʼoˆ teˇ kʼoˆ bvuhꞈ piˇ leh Tiˆmoˉseˍ Roˉmaꞈ venˇ lo laˬ leh Maˍkuˆ htaꞈ kaꞈ shiˍ veu laˇ tehꞈ kʼoˆ piˇ ve yoˬ. (2 Tiˆ 4:11) Maˍkuˆ ka tiꞈ yeˬ ve hkʼaw hkʼaˬ htaˆ kaꞈ kanˉ te ve htaꞈ Pawˇluꞈ awˬ hpfuhˇ shiˍ ve yoˬ. A yeˇ uiˍ ve awˬ yanˇ chi ve, Maˍkuˆ yawˇ geh chehˇ la tuˬ lawˬ ve yoˬ. Maˍkuˆ te ve awˬ ceuˬ Pawˇluꞈ htaꞈ ga piˇ gʼa jaˇ. Yawˇ caˇ tuˬ leh liꞈ bvuhꞈ tuˬ awˬ hkʼaˇ gu piˇ ve yoˬ. Ga piˇ leh awˬ gʼaˇ gʼa jaˇ ve chi Pawˇluꞈ suh htaˇ hkʼa gaˬ yeunˇ hkanˍ gʼaˇ tuˬ ga piˇ ve yoˬ. w20.01 11 ¶12-13

Shehˆ hkʼaˇ teˇ hkʼaˇ lehˬ, ngaˬ hui hkʼaˬ htaˆ kaꞈ gʼa yonˍ yeˬ ve yoˬ. Ngaˬ hui Gʼuiˬ sha ve kanˉ maˇ maˇ te tuˬ awˬ yanˇ yuˬ tanˇ ve yoˬ. Ngaˬ hui fawˉ mehˍ ve gʼa hpuˇ tuˬ yoˬ tehꞈ Yeˍsuˆ shaˍ tiꞈ peꞈ laˇ ve yoˬ. Yaꞈ hkʼaˇ, ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ Yaˬhoˉvaˬ awˬ gʼaˇ peꞈ laˇ tuˬ tehꞈ yonˍ gʼa ve yoˬ. Ngaˬ hui gʼaˇ hteꞈ yeunˇ hkanˍ ve kʼo, yonˍ yeˬ ve cawˬ maˇ la tuˬ yoˬ. (Yaˍ 1:2-4) Chi hkʼoˆ kaꞈ, ngaˬ hui loˍ ve awˬ ceuˬ teˇ hpaˍ Yaˬhoˉvaˬ peꞈ laˇ tuˬ, Yeˍsuˆ haꞈ shaˉ laˇ tuˬ, leh awˬ viˉ awˬ nyi awˬ gʼaˇ peꞈ laˇ tuˬ tehꞈ yonˍ gʼa ve yoˬ. (Maꞈ 6:31-33; Yoˇ 10:14; 1 Hteˇ 5:11) Yeˍsuˆ awˬ suhˍ yaꞈ ve gu na˗e piˇ ve yaˇ miˇ oˇ ve teˇ nyi hkʼaw na˗e la ve yoˬ. (Luˉ 8:43-48) Yaꞈ hkʼaˇ, yawˇ Yeˍsuˆ ve awˬ laꞈ gʼawˇ ka tiꞈ yeˬ ve hpehꞈ la ve kʼo, co co taiˍ taiˍ ha lehˬ jaˇ tuˬ yoˬ. Nawˬ dawˇ kʼo yawˇ oˇ hkʼe leuˆ˗aw laˇ? Yeˍsuˆ ve taˆ tuˬ awˬ hawˉ lo chehˇ tuˬ yawˇ leuˆ yuˬ htaˇ, yawˇ Yeˍsuˆ geh teˇ geh mvuhˇ naw ma hkʼoˆ uˉ peunˍ tuˬ laꞈ shawnˍ gʼa ve yoˬ. Yawˇ awˬ yanˇ yuˬ tanˇ leh Yeˍsuˆ awˬ hkʼaˇ suh gʼaꞈ kʼai ve lehˬ teˇ ceuˬ kaꞈ tehˆ maˇ gʼa. Ngaˬ hui mvuhˇ naw ma hkʼoˆ leh, miˬ guiˬ hkʼoˆ lo co co taiˍ taiˍ gʼa chehˇ tuˬ dawˇ law kuiˬ cawˬ ve maˇ kʼoˆ, Yeˍsuˆ “ngaˬ geh laˬ˗oꞈ” kʼoˆ laˇ ve ngaˬ hui awˬ bon uiˍ jaˇ. w19.09 25 ¶21-22

Daˍviˆ leh yawˇ ve chaw jawˇ mawˇ sawˉluꞈ gʼaꞈ yuˬ htaˇ, ga laˇ tuˬ loˍ ve yoˬ. Iˉsaˍreˍlaˆ chaw Naˍbaˍlaˆ paw sha jaˇ ve geh Daˍviˆ ve chaw caˇ tuˬ ca lawˬ˗e ve yoˬ. Yawˇ hui heh puiˉ hkʼaw Naˍbaˍlaˆ ve yawˬ ehˉ htaꞈ ga piˇ jaw ve pa taw, ga laˇ tuˬ lawˬ haˆ ve yoˬ. Yaꞈ hkʼaˇ, Naˍbaˍlaˆ yawˇ awˬ pon tiˉ dawˇ nyi leh maˇ ga piˇ. Daˍviˆ beuꞈ jaˇ leh Naˍbaˍlaˆ leh yawˇ ve yehˬ hkʼaw ve hawˉ hkʼaˆ hkʼa peu˗eˬ htaꞈ tiˇ pehˍ˗a te ve yoˬ. (1 Saˍ 25:3-13, 22) Yaꞈ hkʼaˇ, Naˍbaˍlaˆ ve awˬ miˇ ma Aˍbiˆgeˍlaˆ awˬ hkiˇ awˬ naˬ daꞈ jaˇ leh cuˇ yiˍ cawˬ ve yoˬ. Yawˇ haꞈ hanˉ ve hkʼaw Daˍviˆ geh kʼai leh, hkui paˇ lo boˆ taˍ leh, Daˍviˆ nyi ma zuhˆ leh chaw htaꞈ maˇ gʼa tiˇ pehˍ tuˬ lawˬ hkawˉ piˇ ve yoˬ. Daˍviˆ awˬ lawn chi Yaˬhoˉvaˬ htaꞈ teh taˍ piˇ tuˬ yawˇ Daˍviˆ htaꞈ kʼoˆ piˇ ve yoˬ. Aˍbiˆgeˍlaˆ cuˇ yiˍ cawˬ leh nyi ma nuˇ nehˬ ve hkʼaw tawˇ yaw ve htaꞈ Daˍviˆ dawˇ cawˇ jaˇ. Yaˬhoˉvaˬ Aˍbiˆgeˍlaˆ htaꞈ peun laˇ ve tehꞈ Daˍviˆ shiˍ ve yoˬ. (1 Saˍ 25:23-28, 32-34) Aˍbiˆgeˍlaˆ ve te hkʼaˇ dawˇ hkʼaˇ htaꞈ Yaˬhoˉvaˬ yehˇ gʼa ve yoˬ. Chi beuꞈ teˇ co˗e kaꞈ hkʼa shuˍ awˬ viˉ awˬ nyi yaˇ miˇ yehˬ kʼa hkʼaw leh Hkriꞈ yaˇ awˬ moˍ hkʼaw awˬ gʼaˇ piˇ tuˬ, tawˇ keunˍ daꞈ cawˇ daꞈ ve hkʼaw yaw ve yoˬ.—Tiˇ 2:3-5. w19.10 23 ¶10

Yaˬhoˉvaˬ yawˇ ve chaw htaꞈ te tcuh gaˇ ve awˬ nu ve awˬ ceuˬ cawˬ sheˍ ve tehꞈ Liꞈ hpu awˬ tawn chi teˇ hpaˍ hkʼaw kʼoˆ laˇ ve yoˬ. Awˬ tehˬ ve Hkriꞈ yaˇ lehˬ Uiˍ ve Baˍbuˍlonˍ venˇ htaꞈ maˇ gʼa caˉ daꞈ. Liꞈ hpu henˇ ve chaw teˇ gʼaˇ hto toˇ ve te gaˇ ve kʼo, yawˇ maˇ heˆ heˆ ve bon liˇ htaꞈ caˉ daꞈ jaw ve, bon liˇ hkʼaw ve awˬ liˇ htaꞈ te jaw ve, maˇ heˆ leh awˬ moˍ oˇ ve hkʼaw hpu tanˇ tanˇ piˇ jaw ve kʼo, yawˇ maˇ heˆ heˆ ve bon liˇ htaꞈ maˇ caˉ daꞈ˗o ve tehꞈ gʼa hpeuꞈ maw piˇ ve yoˬ. Yawˇ bon liˇ hkʼaw maˇ heˆ leh Uiˍ ve Baˍbuˍlonˍ venˇ htaꞈ caˉ daꞈ ve awˬ moˍ hkʼaw kaꞈ liꞈ bvuhꞈ piˇ leh gʼa lawˬ tawˆ la ve yoˬ. Awˬ tehˬ ve Hkriꞈ yaˇ lehˬ yawˇ hui kanˉ te ve kaꞈ Uiˍ ve Baˍbuˍlonˍ venˇ htaꞈ maˇ caˉ daꞈ ve tehꞈ hkʼa dehꞈ yonˍ gʼa tcuh ve yoˬ. (2 Kawˇ 6:14-17) Aˬ htoꞈ ma pa taw chi hkʼe maˇ te ve le? Yaˬhoˉvaˬ maˇ daꞈ tehꞈ dawˇ ve awˬ ceuˬ, maˇ heˆ heˆ ve bon awˬ moˍ maˍ ve te hkʼaˇ dawˇ hkʼaˇ htaꞈ ngaˬ hui maˇ caˉ daꞈ gaˇ ve pa taw yoˬ.—Isa. 52:11. w19.10 12 ¶16-17

Yeˍraˍmiˆ lehˬ Yeˍraˍmiˆ liꞈ leh 1 Jawˇmawˇ 2 Jawˇmawˇ kaꞈ bvuhꞈ ve yoˬ. Yawˇ liꞈ chi teˇ hpaˍ bvuhꞈ ve pa taw, maˇ biˇ ve chaw yaˇ htaꞈ Yaˬhoˉvaˬ haꞈ ve tehꞈ yawˇ shiˍ ve yoˬ. Tawˇ pa haˉ te kʼo, jawˇ mawˇ Aˍhaˆ venˇ baˆ uiˍ jaˇ ve htaꞈ dawˇ hpfuhˆ htaˇ, yawˇ a shaꞈ teꞈ chehˇ htaˇ hkʼa gaˬ Yaˬhoˉvaˬ yawˇ ve yehˬ kʼa htaꞈ maˇ te luˬ piˇ sheˍ. (1 Jawˇ 21:27-29) Chi ve hkʼa shuˍ jawˇ mawˇ Maˍnaˍseˍ lehˬ Aˍhaˆ aꞈ kehˉ haiˬ jaˇ ve htaꞈ te leh Yaˬhoˉvaˬ nyi ma zuhˆ jaˇ ve tehꞈ Yeˍraˍmiˆ shiˍ ve yoˬ. Yaꞈ hkʼaˇ, yawˇ venˇ baˆ dawˇ hpfuhˆ htaˇ Gʼuiˬ sha yawˇ htaꞈ venˇ baˆ hpehˇ piˇ ve yoˬ. (2 Jawˇ 21:16, 17; 2 Raˍ 33:10-13) Yawˇ ve awˬ chawˇ te yaꞈ ve htaꞈ mawˬ htaˇ, awˬ lawn chi Gʼuiˬ sha yeunˇ hkanˍ leh ha kʼaˉ puiˉ ve htaꞈ Yeˍraˍmiˆ henˇ yuˬ tuˬ ga piˇ ve yoˬ. Awˬ yanˇ teˇ yanˇ htaˇ, Baˍruˆ Gʼuiˬ sha ve awˬ vuiˬ aꞈ kehˉ awˬ nu ve awˬ vuiˬ htaꞈ a yeˇ te htaˇ, Yeˍraˍmiˆ hkʼaˬ hkʼe te ve teˇ geh nyi sheˍ. Yeˍraˍmiˆ awˬ chawˇ htaꞈ dawˇ lawˬ leh Gʼuiˬ sha ve awˬ lawn Baˍruˆ htaꞈ hteˇ˗ehꞈ kʼoˆ piˇ ve yoˬ. Yaꞈ hkʼaˇ, haꞈ pehnˇ ve hkʼaw te ve yoˬ. w19.11 6 ¶14-15

Iˉsaˍreˍlaˆ chaw awˬ chawˇ te daꞈ ve tuˉ tanˇ tuˬ “bon htaꞈ chiˇ mvuh ve” Oˉ kʼoˍ pui ve liꞈ hkʼaw ngaˬ hui htaꞈ maˍ laˇ ve yoˬ. (Oˉ 7:11-13, 16-18) Yawˇ chi hkʼe te ve lehˬ gʼa te cawˇ ve htaꞈ pa taw te ve maˇ heˆ, yawˇ te gaˇ ve htaꞈ pa taw te ve yoˬ. Yaˬhoˉvaˬ ve kanˉ te ve lehˬ awˬ chawˇ te daꞈ ve tuˉ tanˇ tuˬ htaꞈ shuˍ ve yoˬ. Chi ngaˬ hui Yaˬhoˉvaˬ htaꞈ hkʼaˬ hkʼe dawˇ ve hpeuꞈ maw piˇ ve yoˬ. Ngaˬ hui Yaˬhoˉvaˬ htaꞈ haꞈ ve pa taw, daꞈ jaˇ ve awˬ ceuˬ yawˇ htaꞈ piˇ ve yoˬ. Laiˉ lanˬ gʼaˇ Yaˬhoˉvaˬ leh yawˇ ve awˬ liˇ awˬ hkʼaˇ htaꞈ haꞈ ve pa taw, yawˇ ve kanˉ ha lehˬ ha kʼa te ve htaꞈ mawˬ htaˇ, yawˇ nyi hkʼaˇ suh jaˇ. Yaˬhoˉvaˬ ngaˬ hui te ve awˬ ceuˬ htaꞈ ceh nyi ve maˇ heˆ, ngaˬ hui te ve awˬ hkʼaˇ htaꞈ yawˇ awˬ hpfuhˇ shiˍ ve tehꞈ tawnˇ taˍ ve kʼo awˬ gʼaˇ gʼa ve yoˬ. Tawˇ pa haˉ te kʼo, nawˬ a shaꞈ maˇ˗oˬ leh Gʼuiˬ sha ve kanˉ te gaˇ ve hkʼe te maˇ gʼa ve kʼo, nawˬ te gʼa ve hkʼe ceh te ve Yaˬhoˉvaˬ na gʼa ve yoˬ. Nawˬ Gʼuiˬ sha ve kanˉ a ciˉ ceh te gʼa ve htawˇ, nawˬ nyi ma hkʼaw te gaˇ ve htaꞈ te gʼa tuˬ Yaˬhoˉvaˬ awˬ gʼaˇ peꞈ laˇ ve yoˬ. Nawˬ daꞈ jaˇ ve awˬ ceuˬ Yaˬhoˉvaˬ htaꞈ piˇ ve yawˇ ha lehˬ jaˇ. w19.11 22 ¶9; 23 ¶11-12

Kanˉ te ve hkʼaw keunˍ lawꞈ cawˇ lawꞈ ve cawˬ tuˬ a yeˇ uiˍ jaˇ. Jawˇmawˇ Sawˉlaꞈmonˍ htaꞈ Gʼuiˬ sha dawˇ pawnˍ piˇ leh bvuhꞈ tcuh ve, ‘awˬ ceuˬ hkʼa peu˗eˬ awˬ pon, awˬ yanˇ cawˬ taˍ ve yoˬ.’ Ti ve, te ve, hawˬ ve, gʼuiˬ ve, kʼaˍ hkʼeˆ ve awˬ yanˇ leh awˬ nu ve teˇ hpaˍ htaꞈ yawˇ kʼoˆ ve yoˬ. (Cuˇ 3:1-8) Ngaˬ hui a shaꞈ teꞈ kuiˬ hkʼaw a yeˇ uiˍ ve 2 ceuˬ cawˬ ve lehˬ kanˉ te ve leh gʼaˇ jehˇ ve awˬ yanˇ yoˬ. Yeˍsuˆ kaꞈ chi hkʼe ve keunˍ lawꞈ cawˇ lawꞈ ve cawˬ ve yoˬ. Tawˇ pa haˉ te kʼo, tcuh yaˇ hui bon maˍ peuˬ leh kʼawꞈ la htaˇ, chaw laˬ maˇ jaˇ ve pa taw “yawˇ hui awˍ kaꞈ caˇ maˇ tanˇ ve yoˬ.” Hkʼe te leh, Yeˍsuˆ yaꞈ nyi ve Liꞈ hpu awˬ tawn kʼoˆ maˍ laˇ ve yoˬ. (Mk 6:30-34) Yeˍsuˆ leh awˬ laꞈ gʼawˇ gʼaˇ jehˇ gaˇ htaˇ maˇ gʼa jehˇ ve htawˇ, awˬ laꞈ gʼawˇ teˇ gʼaˇ le le awˬ pon gʼaˇ jehˇ ve a yeˇ uiˍ ve tehꞈ yawˇ shiˍ ve yoˬ. w19.12 3 ¶6-7

Yaˬhoˉvaˬ yawˇ ve kanˉ te ve ka tiꞈ yeˬ ve chaw htaꞈ nyi haꞈ shaˉ tuˬ ka tiꞈ te piˇ htaˇ, yawˇ ka tiꞈ te taˍ ve htaꞈ gʼaꞈ te ve yoˬ. (Chiˇ 31:1-3) Awˬ nu ve teˇ ceuˬ lehˬ, Yaˬhoˉvaˬ yawˇ ve yehˬ kʼa hkʼaw ve chaw htaꞈ maˇ nyi haꞈ shaˉ ve kʼo, ngaˬ hui nyi ma luˬ ve tehꞈ yawˇ shiˍ ve yoˬ. Ngaˬ hui awˬ to leh co ha hpawˇ Yaˬhoˉvaˬ nyi haꞈ shaˉ laˇ tuˬ ka tiꞈ te˗o htaˇ, yawˇ te tuˬ ve htaꞈ teˇ ceuˬ kaꞈ tawˍ piˇ maˇ gʼa! (Maꞈ 6:30-33; 24:45) Yaˬhoˉvaˬ ka tiꞈ yeˬ ve tehꞈ ngaˬ hui tawnˇ taˍ ve kʼo, ngaˬ hui hpu hpawˇ dawˇ haˍ ve htaꞈ gu gʼa tuˬ awˬ hkʼaˇ yawˇ ga laˇ gʼa ve tehꞈ yonˍ gʼa ve yoˬ. Awˉ lawˉ peuˇ ve Hkriꞈ yaˇ htaꞈ dawˇ nyi sheˍ. Yeˍruˆsaˍlehnˍ venˇ hkʼaw chehˇ ve Hkriꞈ yaˇ awˬ moˍ htaꞈ fawˉ mehˍ jaˇ ve pa taw, ‘tcuh yaˇ teˇ hpaˍ maˇ heˆ kʼo, yawˇ hui hkʼa peu˗eˬ hpaˆ daꞈ leh teˇ kaˬ le le lo hpaw˗e ve yoˬ.’ (Tcuh 8:1) Oˇ ve teˇ yanˇ hkʼaˬ hkʼe hpehꞈ la ve htaꞈ dawˇ nyi sheˍ. Yawˇ hui hpu hpawˇ gʼa dawˇ haˍ ve yoˬ. Yawˇ hui yehˬ, tanˇ kaˬ hkʼaˇ, leh kanˉ kaꞈ maˇ gʼa te ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ maˇ chiˇ baˬ leh hkʼaˬ htaˆ kaꞈ ha lehˬ gʼa sheˍ ve yoˬ. (Tcuh 8:4; Heˍ 13:5, 6; Yaˍ 1:2, 3) Yaˬhoˉvaˬ ka tiꞈ yeˬ ve Hkriꞈ yaˇ chi ve teˇ hpaˍ htaꞈ ga piˇ ve kʼo, ngaˬ hui htaꞈ kaꞈ ga laˇ tuˬ yoˬ.—Chiˇ 37:18, 19. w20.01 17-18 ¶14-15

Daˍviˆ awˬ pa ve yawˬ htaꞈ laˇ caˬ shiˉ leh yehˬ miˉ tawˍ maˇ gʼa cheꞈ tuˬ ga piˇ htaˇ, Yaˬhoˉvaˬ yawˇ htaꞈ ga laˇ ve tehꞈ shiˍ ve yoˬ. Gawˇliˇyaꞈ maꞈ poˍ lonˉ htaꞈ yawˇ gʼaˇ htaˇ, Yaˬhoˉvaˬ ga laˇ ve tehꞈ yawˇ hkʼa dehꞈ shiˍ ve yoˬ. (1 Saˍ 17:37) Daˍviˆ jawˇ mawˇ Sawˉluꞈ htaꞈ hpaw˗e htaˇ, yawˇ a shaꞈ gʼa ponˬ tuˬ Yaˬhoˉvaˬ ga laˇ ve tehꞈ hkʼa dehꞈ shiˍ ve yoˬ. (Chiˇ mvuh ve liꞈ kaˇ nanˉ uiˍ 18 hkʼaw ve awˬ lawn, Miˬ guiˬ awˬ suhˉ yuˬ tawˆ ve Liꞈ hpu) Uiˍ muiˬ cheuˬ muiˬ ve chaw lehˬ yawˇ hui te gʼa ve hkʼa peu˗eˬ yawˇ hui cheuˬ ve tehꞈ dawˇ ve yoˬ. Yaꞈ hkʼaˇ, Daˍviˆ nyi ma nuˇ nehˬ jaˇ. Yaˬhoˉvaˬ yawˇ htaꞈ hkʼaˬ htaˆ kaꞈ ga laˇ ve tehꞈ yawˇ shiˍ ve yoˬ. Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui Yaˬhoˉvaˬ ga laˇ tuˬ ve ceh maˇ lawˬ. Yaꞈ hkʼaˇ, ngaˬ hui htaꞈ hkʼaˬ hkʼe htaˇ ga laˇ ve gʼa shiˍ cawˇ ve yoˬ. Ngaˬ hui nyi ma nuˇ nehˬ ve kʼo, teˇ ceuˬ le le ngaˬ hui te gʼa ve tehꞈ maˇ dawˇ leh Yaˬhoˉvaˬ ga laˇ ve tehꞈ dawˇ ve yoˬ. Yaˬhoˉvaˬ ga laˇ ve htaꞈ mawˬ htaˇ, ngaˬ hui yawˇ geh hkʼa dehꞈ meuˆ daꞈ gʼa ve yoˬ. w19.12 20 ¶18-19

Yaˬhoˉvaˬ ngaˬ hui htaꞈ awˬ hpfuhˇ cawˬ ve tehꞈ yonˍ gʼa tuˬ awˬ nu ve awˬ hkʼaˇ cawˬ sheˍ. Gʼuiˬ sha ngaˬ hui yawˇ geh laˬ tuˬ gʼawˬ veu laˇ leh ngaˬ hui daꞈ ve awˬ lawn sha tanˇ gʼa kaˇ htaˇ, hkʼaˬ hkʼe te tuˬ yawˇ chaˬ nyi taˍ ve yoˬ. (Yoˇ 6:44) Ngaˬ hui Yaˬhoˉvaˬ geh jiˆ kʼai htaˇ, yawˇ kaꞈ ngaˬ hui geh jiˆ laˬ tuˬ yoˬ. (Yaˍ 4:8) Yaˬhoˉvaˬ awˬ yanˇ yehˇ leh ngaˬ hui htaꞈ maˍ laˇ tuˬ coˇ caˇ jaˇ. Ngaˬ hui yawˇ awˬ pon awˬ hpfuhˇ cawˬ ve yoˬ. Chi teˇ hkui ngaˬ hui hkʼaˬ hkʼe hpehꞈ ve yawˇ shiˍ leh ngaˬ hui hkʼaˬ hkʼe taw te gʼa ve kaꞈ yawˇ shiˍ ve yoˬ. Chi hkʼoˆ kaꞈ yawˇ ngaˬ hui htaꞈ haꞈ ve pa taw, maˍ laˇ ve yoˬ. Yaˬhoˉvaˬ ngaˬ hui htaꞈ awˬ hpfuhˇ cawˬ ve tehꞈ shawˍ ve ngaˬ hui hkʼa tawˍ lehˆ gʼa mawˬ ve yoˬ! Jawˇmawˇ Daˍviˆ awˬ hpfuhˇ maˇ cawˬ tehꞈ laiˉ gʼaˇ dawˇ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ haꞈ leh ga laˇ chehˇ ve tehꞈ shiˍ ve yoˬ. Chi hkʼe shiˍ ve lehˬ Daˍviˆ yeunˇ hkanˍ gʼaˇ leh yawˇ hpehꞈ chehˇ ve awˬ ceuˬ teˇ hpaˍ htaꞈ cawˇ ve dawˇ hkʼaˇ cawˬ tuˬ ga piˇ ve yoˬ. (2 Saˍ 16:5-7) Ngaˬ hui awˬ gʼaˇ nuˇ leh shoꞈ shaꞈ ve gʼa hpuˇ htaˇ, Yaˬhoˉvaˬ ngaˬ hui awˬ nu ve awˬ ceuˬ teˇ hpaˍ htaꞈ dawˇ tuˬ leh shoꞈ shaꞈ ve htaꞈ yeunˇ hkanˍ gʼaˇ tuˬ kaꞈ ga laˇ ve yoˬ. (Chiˇ 18:27-29) Yaˬhoˉvaˬ ngaˬ hui htaꞈ ga laˇ ve kʼo, yawˇ ve kanˉ te ve ha lehˬ ve htaꞈ teˇ ceuˬ kaꞈ tawˍ laˇ maˇ gʼa.—Roˉ 8:31. w20.01 15 ¶7-8

Liꞈ hpu maˍ piˇ htaˇ, maˇ henˇ sheˍ htaˇ bon awˉ lawˉ lawˬ sheˍ. Liꞈ hpu henˇ ve chaw geh tanˬ maˍ piˇ htaˇ leh hpehˇ htaˇ bon lawˬ cawˇ ve yoˬ. Ngaˬ hui Liꞈ hpu maˍ piˇ ve 2-3 pawˆ gaˬ kʼo bon lawˬ cawˇ ve yoˬ. Liꞈ hpu henˇ ve chaw Liꞈ hpu hkʼaw ve hkʼa dehꞈ na gʼa tuˬ Gʼuiˬ sha ve daꞈ kehˬ ve awˬ ha hpu ceh tiˉ ga laˇ gʼa ve tehꞈ shiˍ tuˬ ga piˇ sheˍ. Awˬ viˉ awˬ nyi teˇ hpaˍ kʼo Yaˍkoˆ liꞈ 1:5 hkʼaw Liꞈ hpu henˇ ve chaw geh bon lawˬ ve awˬ lawn yaw daꞈ ve yoˬ. Oˇ kaˬ lo kʼoˆ ve, “nawˬ hui awˬ hkʼaw lo teˇ gʼaˇ gʼaˇ cuˇ yiˍ maˇ biˇ ve kʼo, Gʼuiˬ sha geh lawˬ˗oꞈ.” Peuˬ hkʼawꞈ nawˉ Liꞈ hpu henˇ ve chaw htaꞈ na piˇ ve, “ngaˬ hui hkʼaˬ hkʼe te leh Gʼuiˬ sha geh cuˇ yiˍ lawˬ gʼa tuˬ le?” Chi hkʼe te ve lehˬ ngaˬ hui Gʼuiˬ sha geh bon lawˬ cawˇ ve tehꞈ Liꞈ hpu henˇ ve chaw na gʼa tuˬ ga piˇ ve yoˬ. Liꞈ hpu henˇ ve chaw htaꞈ bon lawˬ ve maˍ piˇ sheˍ. Yawˇ nyi ma awˬ tawˍ hkʼa gaˬ bon lawˬ ve Yaˬhoˉvaˬ na gaˇ ve tehꞈ shiˍ tuˬ ga piˇ sheˍ. Yaˬhoˉvaˬ geh a shu yawˇ hkʼaˇ yawˇ bon lawˬ htaˇ, nyi ma hkʼaw cawˬ ve leh shu geh maˇ yaw daꞈ haˆ ve tawˇ kʼoˆ piˇ gʼa ve tehꞈ yawˇ na gʼa tuˬ ga piˇ sheˍ. Awˬ tehˬ kʼo, ngaˬ hui nyi ma hkʼaw hkʼaˬ hkʼe dawˇ ve Yaˬhoˉvaˬ shiˍ ve yoˬ.—Chiˇ 139:2-4. w20.01 2 ¶3; 5 ¶11-12

Leuˆ yuˬ piˇ taˍ ve chaw htaꞈ hkʼaˬ hkʼe htaˇ leuˆ yuˬ tuˬ Yaˬhoˉvaˬ dawˇ cheˆ ve yoˬ. (Roˉ 8:28-30) Yeˍsuˆ teꞈ tu la peuˬ hkʼawꞈ nawˉ, leuˆ yuˬ piˇ taˍ ve chaw htaꞈ Yaˬhoˉvaˬ tanˬ leuˆ yuˬ ve yoˬ. Nyi˗a kʼo awˉ lawˉ peuˇ ve Hkriꞈ yaˇ hkʼa peu˗eˬ leuˆ yuˬ piˇ taˍ ve chaw htaꞈ shuˍ ve yoˬ. Yaꞈ hkʼaˇ, laiˉ ha hkʼawꞈ peuˬ hkʼawꞈ nawˉ Hkriꞈ yaˇ hpehꞈ ve tehꞈ kʼoˆ ve htawˇ, Yeˍsuˆ awˬ hkʼaˇ suh maˇ gʼaꞈ te. Chi hkʼe hpehꞈ ve htawˇ, awˬ tehˬ ve Hkriꞈ yaˇ teˇ hpaˍ hpaˍ htaꞈ Yaˬhoˉvaˬ leuˆ yuˬ piˇ sheˍ. Yawˇ hui caˬ cehˬ hkʼe hpehꞈ leh veˬ kʼawˍ cehˬ geh teˇ geh uiˍ la piˇ sheˍ tehꞈ Yeˍsuˆ kʼoˆ ve yoˬ. (Maꞈ 13:24-30) Awˬ leh meuˇ ve awˬ yanˇ htaˇ, 144,000 gʼaˇ ve hkʼaw Yaˬhoˉvaˬ leuˆ yuˬ chehˇ sheˍ. Chi htaꞈ pa taw awˬ leh meuˇ ve awˬ paˇ neˇ htaˇ, chaw teˇ hpaˍ hpaˍ htaꞈ leuˆ yuˬ piˇ taˍ ve chaw hpehꞈ tuˬ Yaˬhoˉvaˬ dawˇ cheˆ leh leuˆ yuˬ tuˬ yoˬ. Yawˇ te cawˇ ve, maˇ cawˇ ve, ngaˬ hui dawˇ nyi tuˬ maˇ loˍ. (Roˉ 9:11) Kanˉ teˇ naˍ riˍ tiˉ gʼa te ve chaw htaꞈ gʼaˇ hpfuhˇ hkʼa shuˍ piˇ ve pa taw, kanˉ awˉ lawˉ te ve chaw hko shehˍ hpaˇ htaꞈ kʼoˆ piˇ ve, awˬ lawn chi Yeˍsuˆ tawˇ pa haˉ tehˆ maˍ laˇ ve hkʼe maˇ gʼa hpehꞈ tuˬ ngaˬ hui shaˍ tiꞈ gʼa te ve yoˬ.—Maꞈ 20:8-15. w20.01 30 ¶14

Yaˬhoˉvaˬ ve yehˬ kʼa hkʼaw ve chaw htaꞈ ha lehˬ tcuh gaˇ ve yoˬ. Ngaˬ hui shoꞈ shaꞈ ve laiˉ ceuˬ gʼa hpuˇ ve htawˇ, chi teˇ hkui kaꞈ ha lehˬ ve yoˬ. Tawˇ pa haˉ te kʼo, mvuhˇ naw ma hkʼoˆ ve Awˬ pa ngaˬ hui htaꞈ haꞈ ve tehꞈ yonˍ gʼa ve leh Liꞈ hpu hkʼaw cawˇ ve htaꞈ ngaˬ hui shiˍ ve yoˬ. (Yrm 15:16) Chi hkʼoˆ kaꞈ, Yaˬhoˉvaˬ htaꞈ haꞈ ve chaw ceh tiˉ cawˬ ve, yawˇ ve awˬ liˇ awˬ hkʼaˇ htaꞈ haꞈ ve, leh teˇ gʼaˇ leh teˇ gʼaˇ haꞈ daꞈ ve, awˬ nu ve yehˬ kʼa htaꞈ maˇ shuˍ ve daꞈ jaˇ ve yehˬ kʼa hkʼaw ngaˬ hui gʼa chehˇ ve ha lehˬ jaˇ. (Chiˇ 106:4, 5) Chi teˇ hkui aꞈ kehˉ awˬ gʼuˇ suhˍ hpawˇ ngaˬ hui ve a shaꞈ teꞈ hkʼaˇ daꞈ jaˇ ve cawˬ tuˬ tehꞈ yonˍ gʼa ve pa taw, ha lehˬ jaˇ. Maˇ maw ve awˬ yanˇ haiˬ ve awˬ ceuˬ hkʼa peu˗eˬ htaꞈ Yaˬhoˉvaˬ yuˬ baˬ tuˬ yoˬ tehꞈ ngaˬ hui shiˍ ve yoˬ. Gʼuiˬ sha ve mvuhˇ miˬ lehˬ miˬ guiˬ chi hkʼoˆ daꞈ jaˇ ve Paˍraˍdiˇsuˆ teˇ pawˆ kʼawꞈ hpehꞈ tcuh tuˬ yoˬ. Suh peuˬ ve chaw kʼawꞈ teꞈ tu la leh ngaˬ hui geh teˇ geh gʼa chehˇ tuˬ yoˬ tehꞈ daꞈ jaˇ ve dawˇ law kuiˬ cawˬ ve yoˬ. (Yoˇ 5:28, 29) Chi lehˬ ha lehˬ jaˇ. Maˇ maw ve awˬ yanˇ mvuhˇ naw ma hkʼoˆ leh miˬ guiˬ hkʼoˆ chehˇ ve chaw teˇ gʼaˇ le le Yaˬhoˉvaˬ htaꞈ awˬ meꞈ awˬ hponˇ cawˬ tuˬ te piˇ ve, chiˇ uiˍ chiˇ mvuhˇ piˇ tuˬ te ve, chi ve ngaˬ hui ve Awˬ pa gʼa keunˍ ve tehꞈ yonˍ gʼa ve yoˬ. w20.02 13 ¶15-16

Nawˬ venˇ baˆ uiˍ jaˇ ve htaꞈ te yaꞈ ve kʼo, taˇ faˉ taˍ. Yaꞈ hkʼaˇ, nawˬ te yaꞈ ve hkʼa peu˗eˬ Yaˬhoˉvaˬ geh bon lawˬ ve hkʼaw kʼoˆ piˇ sheˍ. Nawˬ chi hkʼe te ve kʼo, maˇ dawˇ haˍ˗o. Yaꞈ hkʼaˇ, nawˬ Yaˬhoˉvaˬ geh awˉ lawˉ htaˇ hkʼe kʼawꞈ meuˆ daꞈ gaˇ ve kʼo, nawˬ te gʼa hkʼe teˇ ceuˬ le le gʼa te ve yoˬ. Maˍ laˇ ve htaꞈ gʼa haꞈ yuˬ ve yoˬ. Daˍviˆ te yaꞈ ve htaꞈ Yaˬhoˉvaˬ tcuh kaˍ paˍ Naˍtanˍ htaꞈ cuˇ leh ca kʼoˆ piˇ tcuh htaˇ, Daˍviˆ maˇ gʼa te yaꞈ tehꞈ maˇ kʼoˆ leh te yaꞈ ve htaꞈ maˇ faˉ taˍ. Yawˇ te yaꞈ ve tehꞈ laꞈ haˉ haꞈ yuˬ ve yoˬ. Baˍtaˍsheˍbaˆ ve awˬ hpawˇ htaꞈ ceh te yaꞈ ve maˇ heˆ. Chi aꞈ kehˉ te yaꞈ jaˇ ve lehˬ Gʼuiˬ sha htaꞈ yoˬ. Daˍviˆ Yaˬhoˉvaˬ maˍ piˇ ve htaꞈ haꞈ yuˬ leh Yaˬhoˉvaˬ yawˇ htaꞈ venˇ baˆ hpehˇ piˇ ve yoˬ. (2 Saˍ 12:10-14) Ngaˬ hui venˇ baˆ uiˍ jaˇ ve htaꞈ te yaꞈ ve kʼo, ngaˬ hui htaꞈ nyi haꞈ shaˉ laˇ tuˬ Yaˬhoˉvaˬ leuˆ teh taˍ ve chaw geh ca yaw daꞈ˗e cawˇ ve yoˬ. (Yaˍ 5:14, 15) Chi hkʼoˆ kaꞈ, ngaˬ hui maˇ gʼa te yaꞈ tehꞈ maˇ kʼoˆ cawˇ. Ngaˬ hui maˍ laˇ ve htaꞈ haꞈ yuˬ leh laꞈ haˉ dawˇ hpfuhˆ ve kʼo, nyi ma gawˬ lehˍ cawˬ leh ha lehˬ tuˬ yoˬ. w20.02 24-25 ¶17-18

Chi teˇ tawn hkʼaw “teˇ chi gʼaˇ” lehˬ miˬ guiˬ hkʼoˆ co co taiˍ taiˍ chehˇ tuˬ dawˇ law taˍ ve chaw htaꞈ kʼoˆ gʼaˇ ve yoˬ. “Yuˇdaꞈ chaw” tcuhˉ kuiˬ lehˬ, Yaˬhoˉvaˬ leuˆ yuˬ taˍ ve chaw htaꞈ awˬ bon naꞈ piˇ leh yawˇ hui geh oˉ kʼoˍ gʼa pui ve ngaˬ hui ha lehˬ jaˇ. Chi teˇ hkui miˬ guiˬ hkʼoˆ chehˇ sheˍ ve leuˆ yuˬ piˇ taˍ ve chaw teˇ gʼaˇ le le ve awˬ meh maˇ shiˍ gʼa. Chi hkʼe hpehꞈ ve kʼo, miˬ guiˬ hkʼoˆ lo dawˇ law taˍ ve chaw teˇ hpaˍ, leuˆ yuˬ piˇ taˍ ve chaw geh hkʼaˬ hkʼe te “kʼai” gʼa tuˬ le? Yaꞈ nyi ve Liꞈ hpu awˬ tawn kʼoˆ laˇ ve yoˬ. Awˉ lawˉ htaˇ Yuˇdaꞈ chaw teˇ gʼaˇ htaꞈ ceh tiˉ kʼoˆ ve yoˬ. Yaꞈ hkʼaˇ, awˬ leh meuˇ htaˇ “nawˬ hui” tcuhˉ kuiˬ lehˬ laiˉ gʼaˇ htaꞈ kʼoˆ gaˇ ve yoˬ. Chi htaꞈ pa taw, chi ve teˇ tawn hkʼaw Yuˇdaꞈ chaw tcuhˉ kuiˬ lehˬ leuˆ yuˬ piˇ taˍ ve chaw teˇ gʼaˇ htaꞈ ceh tiˉ kʼoˆ gaˇ ve maˇ heˆ. Yaꞈ hkʼaˇ, leuˆ yuˬ piˇ taˍ ve chaw hkʼa peu˗eˬ htaꞈ kʼoˆ gaˇ ve yoˬ. Maˇ leuˆ yuˬ taˍ ve chaw htawˇ, leuˆ yuˬ taˍ ve chaw geh Gʼuiˬ sha ve kanˉ te ve yoˬ. Yawˇ hui leuˆ yuˬ piˇ taˍ ve chaw htaꞈ sheh kʼai paˍ tehꞈ maˇ dawˇ. Yeˍsuˆ lehˬ sheh kʼai paˍ hpehꞈ ve yoˬ.—Maꞈ 23:10. w20.01 26 ¶1-2

Yeˍsuˆ kʼoˆ ve, ngaˬ nawˬ hui htaꞈ haꞈ ve hkʼe nawˬ hui htawˇ shu htaꞈ haꞈ ve kʼo, nawˬ hui ngaˬ ve awˬ laꞈ gʼawˇ hpehꞈ ve tehꞈ chaw hkʼa peu˗eˬ gʼa shiˍ tuˬ yoˬ. Awˬ lawn chi awˉ lawˉ peuˇ ve Hkriꞈ yaˇ teˇ co˗e htaˇ awˬ tehˬ hpehꞈ leh chi beuꞈ hpehꞈ ve yoˬ. Chi hkʼe te tuˬ chi teˇ hkui ve awˬ yanˇ maˇ sha ve htawˇ, ngaˬ hui teˇ gʼaˇ leh teˇ gʼaˇ haꞈ daꞈ ve a yeˇ uiˍ jaˇ tehꞈ hkʼa tawˍ lehˆ gʼa mawˬ ve yoˬ. ‘Haꞈ daꞈ ve maˇ sha ve htawˇ, awˬ viˉ awˬ nyi coˇ caˇ ve ngaˬ hkʼaˬ hkʼe henˇ yuˬ gʼa ve le?’ a shu yawˇ awˬ to htaꞈ na nyi cawˇ ve yoˬ. Ngaˬ hui maˇ biˇ ve chaw hpehꞈ ve pa taw, teˇ gʼaˇ leh teˇ gʼaˇ nyi ma awˬ tawˬ hkʼa gaˬ haꞈ daꞈ tuˬ haˍ jaˇ. Chi hkʼe hpehꞈ ve htawˇ, Yeˍsuˆ htaꞈ henˇ yuˬ cawˇ ve yoˬ. Yeˍsuˆ maˍ laˇ ve, awˬ viˉ awˬ nyi ngaˬ hui htaꞈ maˇ daꞈ ve hpawˇ dawˇ leh awˬ lawn cawˬ ve htawˇ, cawˇ daꞈ hui daꞈ tuˬ a yeˇ uiˍ jaˇ. (Maꞈ 5:23, 24) Ngaˬ hui Yaˬhoˉvaˬ htaꞈ nyi hkʼaˇ suh tcuh gaˇ ve kʼo, shu geh gʼa hawˍ daꞈ ve tehꞈ Yeˍsuˆ maˍ laˇ ve yoˬ. Ngaˬ hui awˬ viˉ awˬ nyi geh cawˇ daꞈ hui daꞈ tuˬ coˇ caˇ leh te˗oˬ ve kʼo, Gʼuiˬ sha ha lehˬ tuˬ te piˇ ve yoˬ. Yaꞈ hkʼaˇ, ngaˬ hui awˬ viˉ awˬ nyi htaꞈ beuꞈ chehˇ sheˍ leh cawˇ daꞈ hui daꞈ tuˬ maˇ te ve kʼo, ngaˬ hui oˉ kʼoˍ pui ve htaꞈ Yaˬhoˉvaˬ maˇ haꞈ yuˬ laˇ taˬ.—1 Yoˇ 4:20. w20.03 24 ¶1-4

Saˍtanˍ ‘heˍ ve awˬ pa hpehꞈ ve yoˬ.’ Yawˇ Aˍdanˍ leh Eˇvaꞈ htaꞈ tanˬ heˍ ve yoˬ. (Yoˇ 8:44) Yawˇ heˍ ve teˇ hpaˍ lehˬ suh ve leh suh peuˬ hkʼawꞈ nawˉ hkʼaˬ hkʼe hpehꞈ ve kaꞈ maˍ ve yoˬ. Maˇ heˆ heˆ maˍ ve chi laiˉ gʼaˇ dawˇ cawˇ ve chaw liˇ vaˇ liˇ leh, awˬ bon daꞈ maˇ daꞈ ve htaꞈ yonˍ ve cawˬ tuˬ te laˇ ve yoˬ. Aˬ htoꞈ ma pa taw chaw yaˇ laiˉ gʼaˇ heˍ ve htaꞈ gʼa hpuˇ ve le? Chaw yaˇ hkʼaˬ hkʼe dawˇ ve Saˍtanˍ shiˍ ve pa taw, yawˇ chi ve htaꞈ yehˇ leh heˍ ve yoˬ. Ngaˬ hui co co taiˍ taiˍ chehˇ tuˬ hpanˍ taˍ laˇ ve pa taw, maˇ suh gaˇ. (Cuˇ 3:11) Ngaˬ hui awˬ pon kʼo suh ve lehˬ canˇ paˍ hpehꞈ ve yoˬ. (1 Kawˇ 15:26) Saˍtanˍ coˇ caˇ jaˇ ve htawˇ, suh ve htaꞈ caˉ daꞈ ve awˬ tehˬ ve cawˬ sheˍ. Liꞈ hpu hkʼaw kʼoˆ taˍ ve hkʼe suh ve htaꞈ caˉ daꞈ ve awˬ tehˬ ve, leh suh˗oˬ ve chaw dawˇ law kuiˬ, laiˉ gʼaˇ shiˍ leh hto toˇ chehˇ ve yoˬ. (Cuˇ 9:5, 10; Tcuh 24:15) Suh˗oˬ ve htaꞈ maˇ kawˆ leh, suh˗oˬ ve chaw hkʼaˬ hkʼe hpehꞈ ve htawˇ dawˇ nawˬ dawˇ maˇ cawˬ tuˬ awˬ tehˬ ve chi ga laˇ ve yoˬ. w19.04 14 ¶1; 15 ¶5-6

Yaˬhoˉvaˬ htaꞈ oˉ kʼoˍ pui ve chaw yawˇ haꞈ ve yoˬ. Yawˇ yawˇ hui htaꞈ co co taiˍ taiˍ haꞈ tuˬ yoˬ. Yawˇ hteˇ ve cawˇ ve htaꞈ kaꞈ haꞈ ve yoˬ. (Chiˇ 33:5) Hkʼe te leh 2 lawn htaꞈ ngaˬ hui yonˍ gʼa ve yoˬ. (1) Yaˬhoˉvaˬ yawˇ ve chaw maˇ hteˇ maˇ cawˇ ve gʼa hpuˇ htaˇ yawˇ nyi ma luˬ jaˇ. (2) Yawˇ ve chaw maˇ hteˇ maˇ cawˇ ve co co taiˍ taiˍ maˇ gʼa hpuˇ, leh keunˍ daꞈ ve hkʼaw ciˍ yanˍ piˇ tuˬ yoˬ tehꞈ yawˇ ka tiꞈ te taˍ ve yoˬ. Moˉseˍ ve awˬ liˇ tawˇ hkawˇ haꞈ pehnˇ ve geh laˬ ve tehꞈ ngaˬ hui gʼa henˇ ve yoˬ. Awˬ liˇ tawˇ hkawˇ chi teˇ gʼaˇ le le leh awˬ gʼaˇ nuˇ ve awˬ pon kaꞈ yoˬ. (Bon 10:18) Yaˬhoˉvaˬ htaꞈ oˉ kʼoˍ pui ve chaw htaꞈ yawˇ hkʼaˬ hkʼe taw haꞈ ve awˬ liˇ tawˇ hkawˇ chi maˍ laˇ ve yoˬ. Hkriꞈ yaˇ awˬ moˍ 33 hkʼawꞈ tanˬ cawˬ la htaˇ Moˉseˍ ve awˬ liˇ tawˇ hkawˇ maˇ kʼawꞈ yehˇ˗o. Chi haꞈ pehnˇ ve leh hteˇ ve cawˇ ve geh laˬ ve awˬ liˇ tawˇ hkawˇ Hkriꞈ yaˇ maˇ gʼa˗o ve tehꞈ kʼoˆ gaˇ ve laˇ? Maˇ heˆ! Hkriꞈ yaˇ awˬ liˇ tawˇ hkawˇ awˬ suhˉ kʼawꞈ gʼa ve yoˬ. Hkriꞈ yaˇ lehˬ “Hkriꞈ ve awˬ liˇ tawˇ hkawˇ” awˬ hawˉ lo chehˇ ve yoˬ. Yeˍsuˆ awˬ laꞈ gʼawˇ htaꞈ awˬ liˇ tawˇ hkawˇ maˇ gʼa bvuhꞈ piˇ. Yaꞈ hkʼaˇ yawˇ beˆ maˍ piˇ ve, tawˇ piˇ ve, leh yawˇ hui a shaꞈ teꞈ kuiˬ hkʼaw gʼaꞈ te tuˬ awˬ liˇ awˬ hkʼaˇ piˇ ve yoˬ. “Hkriꞈ ve awˬ liˇ tawˇ hkawˇ” lehˬ yawˇ maˍ ve teˇ ceuˬ le le htaꞈ kʼoˆ gaˇ ve yoˬ. w19.05 2 ¶1-3

Chaw yaˇ teˇ gʼaˇ le le awˬ gʼaˇ gʼa tuˬ loˍ ve yoˬ. Ngaˬ hui teˇ gʼaˇ leh teˇ gʼaˇ awˬ gʼaˇ piˇ daꞈ puiˉ ve yoˬ. Tawˇ pa haˉ te kʼo, yaˇ ehˉ pfuh˗e leh hkui tcuhˉ kʼu hkʼaw˗e htaˇ, yawˇ hawˬ leh awˬ pa awˬ e geh gʼuiˇ kʼai tuˬ yoˬ. Awˬ pa awˬ e yaˇ htaꞈ gu na˗e piˇ maˇ gʼa ve htawˇ, awˬ gʼaˇ piˇ gʼa ve yoˬ. Aˬ htoꞈ ma hpehꞈ ve le kʼoˆ leh mehˆ gʼuiˬ shiˆ piˇ leh, naˆ tsuhˇ shehˍ leh hpa nehˉ nehˉ piˇ ve yoˬ. Maˇ maw yaˇ hawˬ ve na˗e leh teˇ pawˆ kʼawꞈ leˍ guiˇ ve yoˬ. Hkʼawꞈ nawˉ htaˇ, hkui tcuhˉ kʼu hkʼaw˗aˍ ve kaꞈ na˗e tuˬ yoˬ. Yaꞈ hkʼaˇ, yaˇ teˇ gʼaˇ gʼaˇ kʼo chi hkʼa shuˍ a ciˉ ceh tiˉ naˬ ve maˇ heˆ. Shu yawˇ hui htaꞈ pehꞈ ve tzuhˆ ve hpawˇ naˬ taweh te piˇ ve yoˬ. Yaˇ teˇ hpaˍ kʼo chi hkʼe ve teˇ pawˆ ceh tiˉ gʼa hpuˇ ve, teˇ hpaˍ hpaˍ kʼo laiˉ hkʼawꞈ gʼa hpuˇ ve yoˬ. Chi yaˇ htaꞈ nyi ma naˬ jaˇ tuˬ te piˇ ve yoˬ. Teˇ pawˆ pawˆ kʼo te yaꞈ ve chaw htaꞈ yuˬ leh ciˍ yanˍ piˇ gʼa ve yoˬ. Yaꞈ hkʼaˇ, teˇ pawˆ pawˆ kʼo yuˬ maˇ gʼa. Oˇ ve teˇ gʼaˇ htaꞈ yuˬ gʼa ve htawˇ, yaˇ ehˉ htaˇ kaꞈ chi hkʼe gʼa hpuˇ ve chaw lehˬ chaw mawˇ hpehꞈ˗oˬ kaꞈ maˇ na sheˍ. w19.05 14 ¶1-2