Ha pa 9 maˬ

Yaˬhoˉvaˬ Yeˍsuˆ htaꞈ kanˇ paˆ piˇ leh chaw yaˇ shoꞈ shaꞈ ve gʼa hpuˇ chehˇ ve hkʼa peu˗eˬ htaꞈ gu tcuh ve yoˬ. Yeˍsuˆ te ve anˇ tuˬ lehˬ chaw yaˇ gu maˇ gʼa ve shoꞈ shaꞈ ve hkʼa peu˗eˬ htaꞈ kanˇ paˆ yehˇ leh gu laˇ tuˬ yoˬ tehꞈ hpeuꞈ maw laˇ ve yoˬ. Tawˇ pa haˉ te kʼo, chaw yaˇ venˇ baˆ htaꞈ pa taw naˬ ve gawˬ ve leh suh ve gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ Yeˍsuˆ kanˇ paˆ yehˇ leh gu laˇ tuˬ yoˬ. (Maꞈ 9:1-6; Roˉ 5:12, 18, 19) Yeˍsuˆ te ve anˇ tuˬ lehˬ, naˬ ve gawˬ ve teˇ ceuˬ le le htaꞈ yawˇ gu na˗e piˇ leh suh ve htaꞈ kaꞈ kʼawꞈ teꞈ tu la piˇ gʼa ve tehꞈ hpeuꞈ maw laˇ ve yoˬ. (Maꞈ 4:23; Yoˇ 11:43, 44) Chi hkʼoˆ kaꞈ, Yeˍsuˆ lehˬ mvuhˇ yeˬ mvuhˇ haw htaꞈ jehˇ piˇ gʼa leh neˇ htaꞈ kaꞈ gʼaꞈ kʼoˬ piˇ gʼa ve kanˇ paˆ cawˬ ve yoˬ. (Mk 4:37-39; Luˉ 8:2) Yaˬhoˉvaˬ Yeˍsuˆ htaꞈ kanˇ paˆ chi hkʼe ve piˇ ve ngaˬ hui ha lehˬ jaˇ ve yoˬ. Gʼuiˬ sha yawˇ ka tiꞈ te taˍ ve hkʼe, yawˇ ve mvuhˇ miˬ lehˬ daꞈ ve awˬ ceuˬ te laˇ tuˬ yoˬ tehꞈ ngaˬ hui hkʼa dehꞈ yonˍ gʼa ve yoˬ. Yeˍsuˆ anˇ tuˬ te ve lehˬ yawˇ Jawˇ mawˇ te leh miˬ guiˬ hkʼoˆ lo uˉ peunˍ htaˇ, yawˇ teˇ ceuˬ le le te gʼa ve tehꞈ ngaˬ hui shiˍ tuˬ te laˇ ve yoˬ. w23.04 3-4 ¶5-7

Hkriꞈ yaˇ awˬ moˍ hto toˇ ve chaw maˇ jaˇ ve hkʼaw nawˬ chehˇ ve pa taw, nawˬ maˇ gʼa hkʼawꞈ ve tehꞈ dawˇ ve kʼo, nawˬ awˬ gʼaˇ nuˇ ve yoˬ hehˉ. Yaꞈ hkʼaˇ, coˇ caˇ leh hkʼawꞈ sheˍ. Hpawnˬ daꞈ kuiˬ hkʼaw hkʼawꞈ tuˬ laiˉ tawn gu taˍ sheˍ. Awˉ lawˉ teˇ tawn sheh kʼai paˍ nawˬ htaꞈ hkʼawꞈ tuˬ maˇ kuˬ laˇ ve kʼo, nawˬ awˬ nu ve awˬ tawn hkʼawꞈ gʼa sheˍ ve yoˬ. Shaw nyi kuiˬ Taꞈ yehˬ gu htaˇ teˇ tawn leh teˇ tawn a yeˇ uiˍ ve awˬ lawn htaꞈ hkʼaˬ hkʼe caˉ daꞈ ve dawˇ nyi sheˍ. Nawˬ chi hkʼe te ve kʼo, teˇ tawn le le htaꞈ nawˬ hkʼa dehꞈ hkʼawꞈ gʼa tuˬ yoˬ. Chi hkʼoˆ kaꞈ, tcuhˉ kuiˬ naˉ ve awˬ nu ve chaw maˇ hkʼawꞈ ve htaꞈ nawˬ hkʼa dehꞈ gu leh hkʼawꞈ gʼa ve yoˬ. Yaꞈ hkʼaˇ, hpawnˬ daꞈ ve laiˉ pawˆ awˬ hkʼaw lo nawˬ maˇ gʼa hkʼawꞈ sheˍ ve kʼo, hkʼaˬ hkʼe te tuˬ le? Hpawnˬ daꞈ ve maˇ tanˬ sheˍ htaˇ, sheh kʼai paˍ geh nawˬ hkʼaˬ ve teˇ tawn hkʼawꞈ gaˇ ve kʼoˆ piˇ sheˍ. w23.04 21-22 ¶9-10

Yoˇsehꞈ lehˬ Yaˬhoˉvaˬ beˆ maˍ piˇ hkawˇ laꞈ haˉ yuˬ yehˇ leh chi yawˇ daꞈ ve awˬ hpawˇ hpehꞈ tuˬ ga piˇ ve yoˬ. Yoˇsehꞈ ve yehˬ kʼa htaꞈ caˉ daꞈ ve Yaˬhoˉvaˬ beˆ maˍ piˇ ve 3 pawˆ cawˬ leh Yaˬhoˉvaˬ yawˇ htaꞈ beˆ maˍ piˇ ve maˇ sha leh a shaꞈ teꞈ kuiˬ hkʼaw gʼa pa jaˇ ve htawˇ, yawˇ na yuˬ leh laꞈ haˉ gʼaꞈ te ve yoˬ. (Maꞈ 1:20; 2:13-15, 19-21) Yoˇsehꞈ lehˬ Yaˬhoˉvaˬ beˆ maˍ piˇ ve htaꞈ gʼaꞈ te htaˇ, chi yawˇ ve awˬ miˇ ma htaꞈ haꞈ shaˉ gʼa tuˬ ga piˇ ve yoˬ. Yoˇsehꞈ te ve awˬ ceuˬ Maˍriˆ yawˇ htaꞈ haꞈ leh yawˆ yan tuˬ te piˇ ve yoˬ. Awˬ hpawˇ hpehꞈ ve chaw˗oˬ, yehˬ kʼa htaꞈ caˉ daꞈ ve beˆ maˍ laˇ hkawˇ Liꞈ hpu hkʼaw hpfuhˆ nyi leh Yoˇsehꞈ htaꞈ henˇ yuˬ gʼa˗aw laˇ? Liꞈ hpu hkʼaw beˆ maˍ laˇ hkawˇ nawˬ yuˬ yehˇ htaˇ, nawˬ laiˉ ceuˬ gʼa pa ve tehꞈ shiˍ ve htawˇ, nawˬ awˬ miˇ ma htaꞈ haꞈ ve, leh teˇ geh chehˇ ve htaꞈ ha lehˬ gʼa ve yoˬ. Awˬ viˉ awˬ nyi yaˇ miˇ Va˗na˗a˗to meh ve heuˆ daꞈ ve 20 hkʼawꞈ hpaˆ gaˬ˗oˬ ve kʼoˆ ve, “ngaˬ ve awˬ hpawˇ Yaˬhoˉvaˬ ve beˆ maˍ laˇ hkawˇ htaꞈ ca leh yuˬ yehˇ htaˇ, ngaˬ yawˇ htaꞈ yawˆ yan leh yawˇ dawˇ cheˆ ve htaꞈ yonˍ gʼa ve yoˬ.” w23.05 21 ¶5

Yuˇdaꞈ chaw Baˍbuˍlonˍ venˇ lo kʼawꞈ˗la ve lehˬ, Yaˬhoˉvaˬ ve “chaw hpehꞈ la piˇ taˍ peuˬ” ve yoˬ. (Bon 7:6) Yaꞈ hkʼaˇ yawˇ hui Yaˬhoˉvaˬ nyi hkʼaˇ suh ve te piˇ tuˬ te hkʼaˇ dawˇ hkʼaˇ maˇ gʼa pa˗o ve tehꞈ kʼoˆ gaˇ ve maˇ heˆ. Baˍbuˍlonˍ venˇ lo paw ve Yuˇdaꞈ chaw maˇ˗awˍ ve lehˬ Baˍbuˍlonˍ venˇ hkʼaw ve chaw hkʼe awˬ liˇ awˬ hkʼaˇ gʼaꞈ te leh dawˇ hkʼaˇ kaꞈ yawˇ hui htaꞈ shuˍ ve yoˬ. Yuˇdaꞈ chaw Iˉsaˍreˍlaˆ mvuhˇ miˬ lo kʼawꞈ˗e ve laiˉ chi hkʼawꞈ peuˬ hkʼawꞈ nawˉ uˉ peunˍ paˍ Neˍhaˍmiˆ Iˉsaˍreˍlaˆ mvuhˇ miˬ lo kʼai htaˇ, choˬ kaˬ lo paw ve yaˇ teˇ hpaˍ Heˍbrehˇ hkawˇ maˇ yaw gʼa ve htaꞈ yawˇ gʼa mawˬ htaˇ cheˆ˗ehˬ kʼai ve yoˬ. (Bon 6:6, 7; Neˍ 13:23, 24) Oˇ ve teˇ yanˇ Liꞈ hpu Heˍbrehˇ hkawˇ bvuhꞈ taˍ ve htaꞈ maˇ na gʼa ve kʼo, yaˇ teˇ hpaˍ hkʼaˬ hkʼe te Yaˬhoˉvaˬ htaꞈ haꞈ leh yawˇ htaꞈ oˉ kʼoˍ pui gʼa tuˬ le? (Ezr 10:3, 44) Chi htaꞈ pa taw, Yuˇdaꞈ chaw chi teˇ hpaˍ laiˉ ceuˬ gʼa pa ve yoˬ. Daꞈ kehˬ ve oˉ kʼoˍ pui kuiˬ kʼawꞈ gu te chehˇ ve pa taw, yawˇ hui Iˉsaˍreˍlaˆ mvuhˇ miˬ lo chehˇ htaˇ laiˉ ceuˬ pa tuˬ sha ve yoˬ.—Neˍ 8:8, 9. w23.05 15-16 ¶6-7

Ngaˬ hui dawˇ teh taˍ ve htaꞈ te gaˇ ve nyi ma hkʼaˬ hkʼe taw cawˬ ve, maˇ heˆ leh a shu yawˇ awˬ to htaꞈ awˬ liˇ hkʼaˬ hkʼe taw teh ve htawˇ, ngaˬ hui dawˇ teh taˍ ve htaꞈ maˇ te gʼa tuˬ teˇ ceuˬ ceuˬ te laˇ ve yoˬ. Tawˇ pa haˉ te kʼo, “maˇ dawˇ maˇ gaˇ ve awˬ lawn” ngaˬ hui dawˇ teh taˍ ve htaꞈ ceh tiˉ maˇ dawˇ nyi tuˬ leh dawˇ teh taˍ ve htaꞈ te tuˬ awˬ yanˇ kaꞈ maˇ cawˬ tuˬ te laˇ ve yoˬ hehˉ. (Cuˇ 9:11) Leh ngaˬ hui awˬ gʼaˇ nuˇ tuˬ te laˇ ve shoꞈ shaꞈ ve awˬ lawn kaꞈ gʼa hpuˇ ve yoˬ hehˉ. (Tawˇ 24:10) Leh ngaˬ hui maˇ biˇ ve chaw hpehꞈ ve pa taw, ngaˬ hui te yaꞈ leh dawˇ teh taˍ ve htaꞈ te maˇ gʼa tuˬ te laˇ ve yoˬ hehˉ. (Roˉ 7:23) Leh ngaˬ hui heuˬ jaˇ ve yoˬ hehˉ. (Maꞈ 26:43) Hkʼe kʼo, ngaˬ hui htaꞈ aˬ htoꞈ ma ga laˇ gʼa ve le? Nawˬ dawˇ teh taˍ ve htaꞈ gʼaꞈ te maˇ gʼa sheˍ ve kʼo, aˬ htoꞈ ma te awˬ gʼaˇ maˇ nuˇ cawˇ ve htaꞈ tawnˇ taˍ cawˇ ve yoˬ. Liꞈ hpu hkʼaw kʼoˆ ve ngaˬ hui shoꞈ shaꞈ ve laiˉ ceuˬ gʼa hpuˇ leh laiˉ pawˆ paiˍ˗e ve yoˬ. Yaꞈ hkʼaˇ, ngaˬ hui dawˇ taˍ ve awˬ ti lo gaˬ˗e gʼa tuˬ yoˬ. Nawˬ dawˇ teh taˍ ve haˍ jaˇ tehꞈ dawˇ ve htawˇ coˇ caˇ leh te ve kʼo, nawˬ Yaˬhoˉvaˬ ha lehˬ tcuh gaˇ ve tehꞈ hpeuꞈ maw piˇ chehˇ ve yoˬ. Nawˬ chi hkʼe te htaˇ, yawˇ hkʼaˬ hkʼe taw nyi hkʼaˇ suh ve htaꞈ dawˇ nyi sheˍ. w23.05 30-31¶14-15

Gʼuˇ suhˍ peuˍ ve te ve yaˇ nehˬ lehˬ, awˬ viˉ awˬ nyi chaw liˇ vaˇ liˇ maˇ shuˍ daꞈ ve chaw geh kanˉ teˇ geh te gʼa tuˬ awˬ hkʼaˇ shiˍ ve yoˬ. Hpu pehˇ yehˇ tuˬ awˬ hkʼaˇ kaꞈ shiˍ ve yoˬ. (Hpi 4:11-13) Nawˬ Gʼuiˬ sha ve kanˉ awˬ yanˇ hkʼa biˇ te tuˬ dawˇ teh taˍ ve kʼo, teˇ tcuhˉ teˇ yanˇ gʼuˇ suhˍ peuˍ ve awˉ lawˉ te nyi cawˇ ve yoˬ. Hkʼaˬ htaˆ kaꞈ gʼuˇ suhˍ peuˍ ve chaw te gʼa tuˬ teˇ tcuhˉ teˇ yanˇ gʼuˇ suhˍ peuˍ ve awˉ lawˉ te gʼa ve yoˬ. Nawˬ gʼuˇ suhˍ peuˍ ve te ve lehˬ, Yaˬhoˉvaˬ ve kanˉ ha lehˬ ha kʼa ve hkʼaw laiˉ ceuˬ te gʼa tuˬ ga laˇ ve yoˬ. Tawˇ pa haˉ te kʼo, Gʼuiˬ sha ve kanˉ yehˬ te ve hpawˇ maˇ heˆ leh Beˍteˍlaˆ hkʼaw kanˉ te ve yoˬ. Awˬ viˉ awˬ nyi hawˉ hkʼaˆ nyi haꞈ shaˉ paˍ lehˬ, Hkriꞈ yaˇ awˬ moˍ hkʼaw leh awˬ viˉ awˬ nyi htaꞈ ga piˇ tuˬ dawˇ teh taˍ gʼa ve yoˬ. Liꞈ hpu hkʼaw kʼoˆ ve, nyi haꞈ shaˉ paˍ te gaˇ ve chaw lehˬ, “daꞈ ve kanˉ htaꞈ” kaꞈ te gaˇ ve yoˬ. (1 Tiˆ 3:1) Awˬ viˉ awˬ nyi hawˉ hkʼaˆ ga piˇ shehˍ hpaˇ awˉ lawˉ gʼa te sheˍ ve yoˬ. Ga piˇ shehˍ hpaˇ lehˬ nyi haꞈ shaˉ paˍ geh awˬ viˉ awˬ nyi htaꞈ gʼa ga nyi haꞈ shaˉ piˇ ve yoˬ. Nyi haꞈ shaˉ paˍ leh ga piˇ shehˍ hpaˇ nyi ma nuˇ nehˬ te leh, awˬ viˉ awˬ nyi htaꞈ ga piˇ leh kaiˬ ve hkʼaw gʼa hto toˇ ve yoˬ. w23.12 28 ¶14-16

Jawˇ mawˇ Yawˇshiˆ yaˇ nehˬ htaˇ kaꞈ Yaˬhoˉvaˬ ve kanˉ tanˬ te ve yoˬ. Yawˇ lehˬ Yaˬhoˉvaˬ htaꞈ caˉ daꞈ ve leh yawˇ ve a loˍ htaꞈ gʼaꞈ te tuˬ henˇ gaˇ ve yoˬ. Yaꞈ hkʼaˇ, yawˇ ve a shaꞈ teꞈ kuiˬ hkʼaw maˇ sha. Oˇ ve teˇ yanˇ maˇ˗awˍ ve chaw shaˉ hoꞈ htaꞈ oˉ kʼoˍ pui ve yoˬ. Yawˇshiˆ shaˉ hoꞈ htaꞈ te luˬ tuˬ, haꞈ hanˉ ve gʼa cawˬ ve yoˬ. Yawˇ awˬ tehˬ awˬ na chi hkʼe te ve yoˬ. Yawˇshiˆ 20 hkʼawꞈ maˇ gaˬ sheˍ htaˇ, yawˇ ve mvuhˇ miˬ hkʼaw shaˉ hoꞈ htaꞈ te luˬ ve yoˬ. (2 Raˍ 34:1, 2) Nawˬ yaˇ nehˬ hpehꞈ ve htawˇ, Yawˇshiˆ htaꞈ henˇ yuˬ gʼa ve yoˬ. Yaˬhoˉvaˬ leh yawˇ ve te hkʼaˇ dawˇ hkʼaˇ daꞈ jaˇ ve htaꞈ caˉ daꞈ ve henˇ yuˬ tuˬ dawˇ teh taˍ sheˍ. Chi hkʼe te ve lehˬ nawˬ Yaˬhoˉvaˬ htaꞈ awˬ to chiˇ aꞈ piˇ tuˬ ga laˇ gʼa ve yoˬ. Nawˬ awˬ to Yaˬhoˉvaˬ htaꞈ chiˇ aꞈ piˇ ve lehˬ, a shaꞈ teꞈ kuiˬ hkʼaw teˇ nyi le le awˬ bon hkʼaˬ hkʼe cawˬ ve le? Lonˆ meh ve 14 hkʼawꞈ htaˇ Baˆtiˆsaˬ haꞈ yuˬ ve kʼoˆ ve, “oˇ teˇ hkui tanˬ leh ngaˬ Yaˬhoˉvaˬ ve kanˉ te ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ leh yawˇ ha lehˬ tuˬ te piˇ tuˬ dawˇ teh taˍ ve yoˬ.” (Mk 12:30) Nawˬ Lonˆ hkʼa shuˍ shuˍ te ve kʼo, nawˬ a shaꞈ teꞈ kuiˬ hkʼaw ha lehˬ jaˇ tuˬ yoˬ. w23.09 11 ¶12-13

Hteˇsaˍlawˇniˆ venˇ lo chehˇ ve awˬ viˉ awˬ nyi htaꞈ tcuh yaˇ Pawˇluꞈ liꞈ bvuhꞈ piˇ htaˇ, oˇ kaˬ lo Hkriꞈ yaˇ awˬ moˍ cawˬ ve hkʼaˬ nyiˇ hkʼawꞈ maˇ gaˬ sheˍ ve yoˬ. Nyi haꞈ shaˉ paˍ kaꞈ awˬ lawn hkʼa dehꞈ maˇ shiˍ leh te yaꞈ puiˉ ve yoˬ. Chi hkʼe hpehꞈ ve htawˇ, yawˇ hui lehˬ awˬ viˉ awˬ nyi yawˆ yan piˇ ve htaꞈ gʼa keunˍ ve yoˬ. Tuꞈ jaˇ hkanˍ jaˇ ve gaˬ la paˇ neˇ htaˇ, nyi haꞈ shaˉ paˍ ngaˬ hui htaꞈ chi teˇ hkui aꞈ kehˉ beˆ maˍ laˇ tuˬ gʼaˇ gʼa va cawˇ ve yoˬ. Oˇ ve teˇ yanˇ hkʼaw awˬ tcuhˆ puiˍ lonˉ, maˇ heˆ leh awˬ tcuhˆ puiˍ lo ngaˬ hui caˉ daꞈ maˇ gʼa ve yoˬ. Chi htaꞈ pa taw, chi teˇ hkui kaꞈ ngaˬ hui Hkriꞈ yaˇ awˬ moˍ hkʼaw ve nyi haꞈ shaˉ paˍ htaꞈ haꞈ leh yawˆ yanˍ tuˬ a yeˇ uiˍ jaˇ ve yoˬ. Aˬ htoꞈ ma hpehꞈ la ve htawˇ, ngaˬ hui shaˍ tiꞈ gʼa cawˬ cawˇ ve yoˬ. Yawˇ hui ve yaꞈ kuiˬ htaꞈ ceh tiˉ maˇ nyi ve yoˬ. Yaˬhoˉvaˬ Yeˍsuˆ htaꞈ cuˇ leh yawˇ hui htaꞈ beˆ maˍ piˇ chehˇ ve tehꞈ ngaˬ hui a yeˇ yuˬ cawˇ ve yoˬ. Chi ve hkʼa shuˍ shuˍ, sho uˉ tcuhˍ maꞈ yaˇ ve oˉ kʼoˍ htaꞈ haꞈ shaˉ piˇ ve hkʼe, ponˬ ve dawˇ law kuiˬ kaꞈ ngaˬ hui ve dawˇ hkʼaˇ htaꞈ haꞈ shaˉ laˇ gʼa ve yoˬ. Ngaˬ hui miˬ guiˬ hkʼoˆ lo cawˬ ve awˬ ceuˬ hkʼa peu˗eˬ lehˬ, awˬ bon maˇ cawˬ ve tehꞈ shiˍ ve yoˬ. (Hpi 3:8) Dawˇ law kuiˬ lehˬ ngaˬ hui nyi ma gawˬ lehˍ cawˬ tuˬ ga laˇ leh, yonˍ yeˬ ve cawˬ tuˬ kaꞈ ga laˇ ve yoˬ. w23.06 11-12 ¶11-12

‘Cuˇ yiˍ maˇ cawˬ ve yaˇ miˇ’ kuˬ laˇ ve hkawˇ htaꞈ kaˇ ve chaw, yawˇ jehˬ piˇ ve htaꞈ gʼaꞈ te tuˬ ve, maˇ gʼaꞈ te tuˬ ve, leuˆ yuˬ gʼa ve yoˬ. Ngaˬ hui haˉ chawˇ haˉ paˆ maˇ gʼa te yaꞈ tuˬ awˬ hkʼaˇ laiˉ hkʼaˇ cawˬ ve yoˬ. ‘Cuˇ yiˍ maˇ cawˬ ve yaˇ miˇ’ kʼoˆ ve, “hkʼawˇ yuˬ taˍ ve iˉ kaˆ lehˬ mehˬ jaˇ ve yoˬ.” (Tawˇ 9:17) Leh “hkʼawˇ yuˬ taˍ ve iˉ kaˆ lehˬ” aˬ htoꞈ ma le? Liꞈ hpu hkʼaw awˬ hpawˇ awˬ miˇ ma teˇ geh zuhꞈ ve lehˬ nyi ma sha tuˬ te laˇ ve iˉ kaˆ htaꞈ tehˆ taˍ ve yoˬ. (Tawˇ 5:15-18) Awˬ hpawˇ awˬ miˇ ma awˬ liˇ awˬ hkʼaˇ cawˇ ve hkʼaw heuˆ daꞈ taˍ ve chaw ceh tiˉ ha lehˬ ve hkʼaw teˇ geh zuhꞈ gʼa ve yoˬ. Yaꞈ hkʼaˇ, “hkʼawˇ yuˬ taˍ ve iˉ kaˆ” htaꞈ peun daꞈ jaˇ ve yoˬ. Chi ve lehˬ haˉ chawˇ haˉ paˆ te yaꞈ ve htaꞈ kʼoˆ gaˇ ve yoˬ. Chi hkʼe te ve lehˬ shu ve mawˇ hkʼawˇ ve htaꞈ tehˆ taˍ ve yoˬ. Te yaꞈ ve chaw lehˬ shu maˇ shiˍ taˬ tehꞈ dawˇ ve pa taw, ‘hkʼawˇ yuˬ taˍ ve shu ve iˉ kaˆ’ mehˬ jaˇ ve tehꞈ dawˇ ve yoˬ. Yaꞈ hkʼaˇ, chi awˬ tehˬ maˇ heˆ. Yaˬhoˉvaˬ teˇ ceuˬ le le htaꞈ mawˬ ve yoˬ. Yaˬhoˉvaˬ nyi hkʼaˇ maˇ suh tuˬ te piˇ ve awˬ ceuˬ lehˬ haiˬ jaˇ ve yoˬ. Chi htaꞈ pa taw, chi ve lehˬ mehˬ jaˇ ve tehꞈ ngaˬ hui kʼoˆ maˇ gʼa. Awˬ lawn kʼo, chi ve lehˬ nyi ma luˬ jaˇ ve awˬ ceuˬ hpehꞈ ve yoˬ.—1 Kawˇ 6:9, 10. w23.06 22-23 ¶7-9

Yaꞈ hkʼaˇ, peuˬ kʼai ve awˬ yanˇ nawˬ bon lawˬ ve lawˬ peuˬ kaꞈ lawˬ leh, Yaˬhoˉvaˬ ve kanˉ te ve ha lehˬ ve hkʼa dehꞈ maˇ cawˬ ve kʼo, hkʼaˬ hkʼe te tuˬ le? Yaˬhoˉvaˬ geh daꞈ kehˬ ve awˬ ha hpu maˇ gʼa ve tehꞈ nawˬ taˇ dawˇ. Chi hkʼe ve dawˇ hkʼaˇ lehˬ maˇ biˇ ve chaw yaˇ teˇ gʼaˇ le le cawˬ ve yoˬ. Nawˬ Gʼuiˬ sha ve kanˉ te ve nyi ma hkʼa dehꞈ maˇ pfuhˇ tehꞈ dawˇ ve kʼo, tcuh yaˇ Pawˇluꞈ ve awˬ lawn htaꞈ dawˇ nyi sheˍ. Yawˇ Yeˍsuˆ htaꞈ henˇ yuˬ tuˬ coˇ caˇ jaˇ ve htawˇ, Yaˬhoˉvaˬ ve kanˉ te ve teˇ pawˆ le le nyi ma hkʼa dehꞈ maˇ pfuhˇ ve yoˬ. Pawˇluꞈ Gʼuiˬ sha ve kanˉ hkʼa dehꞈ maˇ te gaˇ ve htawˇ caˉ leh te ve yoˬ. Chi ve hkʼa shuˍ shuˍ, te gaˇ ve nyi ma nawˬ aˬ htoꞈ ma te tuˬ, maˇ heˆ leh maˇ te tuˬ, taˇ te laˇ tcuh. Nawˬ maˇ te gaˇ ve htawˇ, cawˇ ve awˬ ceuˬ htaꞈ caˉ leh te sheˍ. Awˬ lawn kʼo, nawˬ cawˇ ve awˬ ceuˬ htaꞈ caˉ leh te ve kʼo, awˬ yanˇ maw la htaˇ nawˬ ha lehˬ ve cawˬ tuˬ yoˬ.—1 Kawˇ 9:16. w24.03 11-12 ¶12-13

Ngaˬ hui kaꞈ awˬ viˉ awˬ nyi htaꞈ haꞈ ve tehꞈ hpeuꞈ maw piˇ gʼa ve lehˬ, yawˇ hui geh awˬ chawˇ teˇ geh te ve yoˬ. (2 Kawˇ 6:11-13) Hkriꞈ yaˇ awˬ moˍ hkʼaw awˬ viˉ awˬ nyi hpehꞈ laˬ jaw ve, awˬ hoꞈ awˬ han, leh te hkʼaˇ dawˇ hkʼaˇ kaꞈ maˇ shuˍ daꞈ ve yoˬ. Awˬ viˉ awˬ nyi htaꞈ daꞈ ve hpawˇ ngaˬ hui nyi ve kʼo, teˇ gʼaˇ le le htaꞈ haꞈ tuˬ yoˬ. Yaˬhoˉvaˬ nyi ve hkʼe ngaˬ hui kaꞈ nyi ve kʼo, yawˇ hui htaꞈ haꞈ ve tehꞈ hpeuꞈ maw piˇ chehˇ ve yoˬ. Tuꞈ jaˇ hkanˍ jaˇ ve awˬ yanˇ htaˇ haꞈ daꞈ ve lehˬ a yeˇ uiˍ jaˇ. Tuꞈ jaˇ hkanˍ jaˇ ve tanˬ htaˇ, Yaˬhoˉvaˬ ngaˬ hui htaꞈ hkʼaˬ hkʼe haꞈ shaˉ laˇ tuˬ ve htaꞈ teˇ geh nyi sheˍ. Uiˍ ve Baˍbuˍlonˍ yawˇ hui htaꞈ ca bawˆ la htaˇ, Yaˬhoˉvaˬ yawˇ ve chaw htaꞈ aˬ htoꞈ ma te tcuh tuˬ teˇ geh nyi sheˍ. Yaˬhoˉvaˬ kʼoˆ ve, “ngaˬ ve chaw teˇ hpaˍ˗oˬ, nawˬ hui a shu yawˇ ve yehˬ lo kʼoꞈ˗e leh, yehˬ miˉ hkʼa dehꞈ hoˆ taˍ˗oꞈ. Gʼuiˬ sha nyi ma zuhˆ ve awˬ yanˇ peuˬ kʼai htaˇ hkʼa gaˬ, nawˬ hui teˇ hkui teˇ yanˇ ca hpaw vaꞈ taˍ˗oꞈ.” (Isy 26:20) Tuꞈ jaˇ hkanˍ jaˇ htaˇ, ngaˬ hui kaꞈ nyi˗a kʼo tawˇ hkawˇ chi hkʼe ve htaꞈ gʼa gʼaꞈ te cawˇ ve yoˬ. w23.07 6-7 ¶14-16

Awˬ meh bvuhˬ ve chaw lehˬ, awˬ hkʼaˇ ca puiˉ ve chaw hpehꞈ ve yoˬ. Nawˬ awˬ to htaꞈ na nyi cawˇ ve, ‘ngaˬ awˬ hkʼaˇ ca puiˉ ve chaw hpehꞈ leh shu awˬ hawˉ lo chehˇ ve tehꞈ laiˉ gʼaˇ kaꞈ shiˍ˗aw laˇ? Maˇ heˆ leh ngaˬ teˇ ceuˬ htaꞈ ceh tiˉ vawˆ tiˍ taˍ ve chaw hpehꞈ˗aw laˇ? Ngaˬ shu kʼoˆ ve htaꞈ na leh te gʼa ve kʼo yawˇ lawˬ laˇ ve htaꞈ gʼaꞈ te˗aw laˇ?’ Ngaˬ hui awˬ hkʼaˇ ca puiˉ ve chaw hpehꞈ ve kʼo, Yaˬhoˉvaˬ leh Yeˍsuˆ htaꞈ henˇ yuˬ chehˇ ve tehꞈ hpeuꞈ maw piˇ chehˇ ve yoˬ. A shaꞈ teꞈ kuiˬ hkʼaw pa ve cawˬ htaˇ, awˬ hkʼaˇ ca puiˉ ve chaw hpehꞈ ve lehˬ a yeˇ uiˍ jaˇ ve yoˬ. A shaꞈ teꞈ kuiˬ hkʼaw pa ve cawˬ htaˇ, maˇ dawˇ maˇ gaˇ ve hkʼaw shoꞈ shaꞈ ve cawˬ tuˬ te laˇ gʼa ve yoˬ. Tawˇ pa haˉ te kʼo, ngaˬ hui laꞈ tcuh laꞈ haˉ naˬ jaˇ ve, maˇ heˆ leh ngaˬ hui ve chehˇ kuiˬ mvuhˇ miˬ hkʼaw caˇ tuˬ dawˬ tuˬ leh mawˇ hkʼa peu˗eˬ awˬ hpfuhˇ hkʼaˆ jaˇ ve, maˇ heˆ leh mvuhˇ miˬ hpawˇ uˉ peunˍ paˍ pa ve pa taw, ngaˬ hui htaꞈ heuˆ la kuiˬ cawˬ jaˇ ve yoˬ. (Cuˇ 9:11) Ngaˬ hui htaꞈ awˬ vuiˬ pa laˇ ve, maˇ heˆ leh awˬ nu ve teˇ kaˬ lo Gʼuiˬ sha ve kanˉ gʼa ca te ve kʼo, ngaˬ hui awˬ pon haˍ jaˇ ve yoˬ. Ngaˬ hui awˬ hawˉ lo ve 4 ceuˬ htaꞈ gʼaꞈ te ve kʼo, pa tuˬ sha ve yoˬ. (1) Hpehꞈ chehˇ ve htaꞈ haꞈ yuˬ ve, (2) awˬ gʼuˇ suhˍ hpawˇ ve htaꞈ dawˇ nyi ve, (3) daꞈ ve hpawˇ nyi ve, leh (4) awˬ nu ve chaw awˬ pon te ve yoˬ. w23.07 21-22 ¶7-8

Tcuh kaˍ paˍ Daˍyeˍlaˆ lehˬ yaˇ nehˬ htaˇ, Baˍbuˍlonˍ chaw ve awˬ ceˬ te tuˬ shiˍ kʼai ve yoˬ. Yawˇ kʼai ve awˬ ti lehˬ vuiˇ jaˇ ve yoˬ. Yaꞈ hkʼaˇ, Baˍbuˍlonˍ hkʼaw ve a maꞈ lonˉ lehˬ Daˍyeˍlaˆ htaꞈ nyi ma cawˇ jaˇ ve yoˬ. Yawˇ hui “awˬ htaꞈ hpawˇ ve awˬ hkiˇ awˬ naˬ htaꞈ ceh nyi” leh, Daˍyeˍlaˆ “awˬ hkiˇ awˬ naˬ daꞈ leh cuˇ yiˍ gehˬ ve” awˬ hkʼoˆ kaꞈ, jawˇ mawˇ ve awˬ ceˬ awˬ hkʼaˇ kaꞈ hpehꞈ ve yoˬ. (1 Saˍ 16:7) Chi htaꞈ pa taw, Baˍbuˍlonˍ hkʼaw ve chaw Daˍyeˍlaˆ htaꞈ a maꞈ lonˉ te tcuh tuˬ dawˇ teh taˍ ve yoˬ. (Daˍ 1:3, 4, 6) Yaˬhoˉvaˬ Daˍyeˍlaˆ htaꞈ haꞈ ve lehˬ, yawˇ leuˆ yuˬ ve awˬ ceuˬ htaꞈ pa taw yoˬ. Yaˬhoˉvaˬ Noˉaꞈ leh Yawˇbaˆ htaꞈ kʼoˆ htaˇ, Daˍyeˍlaˆ htaꞈ kaꞈ kʼoˆ ve yoˬ. Yawˇ hui 3 gʼaˇ hteˇ ve cawˇ ve yoˬ tehꞈ, Gʼuiˬ sha kʼoˆ ve yoˬ. Dawˇ nyi sheˍ, oˇ ve teˇ yanˇ Daˍyeˍlaˆ lehˬ aˬ laˬ hkʼe 20 hkʼawꞈ ceh tiˉ sheˍ ve yoˬ. Noˉaꞈ leh Yawˇbaˆ Yaˬhoˉvaˬ ve kanˉ ka tiꞈ yeˬ ve hkʼaw laiˉ chi hkʼawꞈ te leh daꞈ ve awˬ meh cawˬ ve hkʼe, Daˍyeˍlaˆ kaꞈ hteˇ ve cawˇ ve chaw hpehꞈ ve tehꞈ, Gʼuiˬ sha shawˍ ve yoˬ. (Awˬ 5:32; 6:9, 10; Yb 42:16, 17; Ysk 14:14) Leh Daˍyeˍlaˆ a shaꞈ teꞈ chehˇ ve teˇ co˗e Yaˬhoˉvaˬ yawˇ htaꞈ haꞈ ve yoˬ.—Daˍ 10:11, 19. w23.08 2 ¶1-2

Nawˬ yehˬ teˇ yehˬ vuiˬ tuˬ dawˇ cheˆ htaˇ, yehˬ chi ve teˇ yehˬ htaꞈ caˉ daꞈ ve hkʼa peu˗eˬ htaꞈ nawˬ hkʼaˇ nawˬ hkʼa dehꞈ chaˬ nyi gaˇ tuˬ yoˬ. Ngaˬ hui Liꞈ hpu gʼaw htaˇ leh Liꞈ hpu henˇ htaˇ chi ve hkʼa shuˍ te gʼa ve yoˬ. Nawˬ Liꞈ hpu haˆ haˆ gʼaw ve kʼo, “Gʼuiˬ sha ve tawˇ hkawˇ awˬ lawn lonˉ ma teˇ hpaˍ” htaꞈ ceh shiˍ gʼa ve yoˬ. (Heˍ 5:12) Chi htaꞈ pa taw, nawˬ yehˬ hkʼaw lo hkʼa dehꞈ nyi ve hkʼa shuˍ, nawˬ hkʼa dehꞈ na gʼa tuˬ Liꞈ hpu henˇ htaˇ hkʼa dehꞈ gʼa chaˬ nyi ve yoˬ. Daꞈ jaˇ ve awˬ hkʼaˇ teˇ hkʼaˇ lehˬ, Liꞈ hpu hkʼaw ve awˬ lawn teˇ hpaˍ hkʼaˬ hkʼe te caˉ daꞈ ve, leh nawˬ yonˍ ve awˬ tehˬ ve htaꞈ na gʼa ve ceh maˇ heˆ ve tehꞈ, hkʼa dehꞈ chaˬ nyi sheˍ. Aˬ htoꞈ ma pa taw, nawˬ chi hkʼe yonˍ ve htaꞈ kaꞈ gʼa na gʼa cawˇ ve yoˬ. Liꞈ hpu hkʼaw awˬ tehˬ ve htaꞈ nawˬ hkʼa dehꞈ na gʼa tuˬ, Liꞈ hpu hkʼaw tcuhˉ kuiˬ naˉ jaˇ ve awˬ lawn htaꞈ ngaˬ hui gʼa henˇ cawˇ ve yoˬ. Tcuh yaˇ Pawˇluꞈ yawˇ ve awˬ co˗e htaˇ ve Hkriꞈ yaˇ htaꞈ ‘hkʼaˬ ma kʼehˬ ve, hkʼaˬ ma zuhˬ ve, hkʼaˬ ma mvuh ve, leh hkʼaˬ ma naˉ ve htaꞈ hkʼa dehꞈ shiˍ hpehꞈ tuˬ’ Liꞈ hpu hkʼaw hkʼa dehꞈ henˇ tehꞈ awˬ gʼaˇ piˇ ve yoˬ. Leh yawˇ hui yonˍ hkʼaˇ hpawˇ “nyi ma awˬ hkʼaw lo chehˇ yeˬ” gʼa ve yoˬ. (Efs 3:14-19) Ngaˬ hui kaꞈ chi ve hkʼa shuˍ shuˍ gʼa te ve yoˬ. w23.10 18-19 ¶1-3

Liꞈ hpu hkʼaw yeunˇ hkanˍ ve laiˉ gʼaˇ ve awˬ lawn cawˬ ve yoˬ. Aˬ htoꞈ ma te yawˇ hui ve awˬ lawn hpfuhˆ nyi leh maˇ henˇ nyi ve le? Tawˇ pa haˉ te kʼo, Daˍviˆ a shaꞈ i chehˇ sheˍ htaˇ kaꞈ Iˉsaˍreˍlaˆ chaw ve jawˇ mawˇ te tuˬ leuˆ yuˬ piˇ ve htawˇ, yawˇ jawˇ mawˇ gʼa te tuˬ laiˉ hkʼawꞈ gʼa law sheˍ ve yoˬ. Chi hkʼoˆ kaꞈ, Suˉmonˍ leh Aˍnaˆ ve awˬ lawn kaꞈ cawˬ ve yoˬ. Ka tiꞈ te taˍ ve hkʼe Meˍsiˉyaꞈ htaꞈ gʼa mawˬ tuˬ yawˇ hui law chehˇ ve awˬ yanˇ htaˇ, yawˇ hui ka tiꞈ yeˬ ve hkʼaw Yaˬhoˉvaˬ ve kanˉ te ve yoˬ. (Luˉ 2:25, 36-38) Yeunˇ hkanˍ ve chaw ve awˬ lawn nawˬ henˇ chehˇ ve awˬ yanˇ htaˇ, a shu yawˇ awˬ to htaꞈ na nyi cawˇ ve, ‘yawˇ yeunˇ hkanˍ gʼaˇ tuˬ aˬ htoꞈ ma ga piˇ ve le? Yawˇ yeunˇ hkanˍ ve aˬ htoꞈ ma awˬ bon gʼa ve le? Ngaˬ yawˇ htaꞈ hkʼaˬ hkʼe henˇ yuˬ gʼa ve le?’ Chi hkʼoˆ kaꞈ, maˇ yeunˇ hkanˍ ve chaw awˬ lawn nawˬ henˇ htaˇ, nawˬ htaꞈ aˬ htoꞈ ma maˍ laˇ sheˍ ve le? (1 Saˍ 13:8-14) Nawˬ a shu yawˇ awˬ to htaꞈ nyi na cawˇ ve, ‘aˬ htoꞈ ma te yawˇ maˇ yeunˇ hkanˍ ve le? Leh yawˇ htaꞈ heuˆ la kuiˬ hkʼaˬ hkʼe cawˬ ve le?’ w23.08 25 ¶15

Tcuh yaˇ Peˍtruˆ lehˬ ka tiꞈ yeˬ ve chaw hpehꞈ leh yawˇ Yeˍsuˆ awˬ hkʼaˇ suh maˇ gʼa kʼai tuˬ teˇ ceuˬ kaꞈ maˇ tawˍ laˇ tcuh. Awˬ lawn chi ve Yeˍsuˆ tcuh yaˇ hui htaꞈ teˇ ceuˬ ceuˬ kʼoˆ piˇ leh yawˇ hui maˇ na gʼa ve htaꞈ ngaˬ hui hkʼa tawˍ lehˆ gʼa mawˬ ve yoˬ. (Yoˇ 6:68) Awˬ laꞈ gʼawˇ laiˉ gʼaˇ maˇ kʼoˆ maˍ laˇ tcuh sheˍ ve kaꞈ Yeˍsuˆ awˬ hkʼaˇ suh laꞈ haˉ maˇ gʼaꞈ kʼai˗o ve yoˬ. Yaꞈ hkʼaˇ, Peˍtruˆ chi hkʼe maˇ te. Yawˇ Yeˍsuˆ htaꞈ ka tiꞈ yeˬ leh Yeˍsuˆ ceh tiˉ “co tiꞈ ha tiꞈ ve tawˇ hkawˇ cawˬ taˍ ve yoˬ” tehꞈ Peˍtruˆ kʼoˆ ve yoˬ. Peˍtruˆ leh tcuh yaˇ hui Yeˍsuˆ htaꞈ baˬ taˉ laˇ tuˬ yoˬ tehꞈ Yeˍsuˆ shiˍ ve yoˬ. Yaꞈ hkʼaˇ, Peˍtruˆ Yeˍsuˆ geh kʼawꞈ hpfuhˆ kʼawꞈ la tuˬ yoˬ tehꞈ yawˇ yonˍ gʼa leh, Peˍtruˆ Yeˍsuˆ htaꞈ caˉ leh ka tiꞈ yeˬ ve yoˬ. (Luˉ 22:31, 32) Peˍtruˆ “te gaˇ ve nyi ma cawˬ htawˇ, awˬ suhˍ awˬ shaˍ lehˬ awˬ gʼaˇ nuˇ ve yoˬ” tehꞈ Yeˍsuˆ shiˍ ve yoˬ. (Mk 14:38) Chi htaꞈ pa taw, Peˍtruˆ Yeˍsuˆ htaꞈ maˇ shiˍ tehꞈ chiˇ baˬ piˇ htaˇ, Yeˍsuˆ kaꞈ Peˍtruˆ htaꞈ dawˇ law chehˇ sheˍ ve yoˬ. Leh Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ awˬ to Peˍtruˆ htaꞈ mawˬ tcuh ve yoˬ. Nyi˗a kʼo oˇ ve teˇ yanˇ Peˍtruˆ teˇ gʼaˇ tiˉ chehˇ taˍ ve yoˬ hehˉ. (Mk 16:7; Luˉ 24:34; 1 Kawˇ 15:5) Oˇ ve teˇ yanˇ Peˍtruˆ nyi ma luˬ jaˇ ve htawˇ, awˬ gʼaˇ hkʼaˬ hkʼe taw gʼa ve htaꞈ dawˇ nyi leh chi yawˇ awˬ gʼaˇ gʼa tuˬ te piˇ ve yoˬ. w23.09 22-23 ¶9-10

A shu teˇ gʼaˇ Yaˬhoˉvaˬ htaꞈ yonˍ ve kʼo, Yaˬhoˉvaˬ yawˇ htaꞈ venˇ baˆ hpehˇ piˇ leh venˇ baˆ htaꞈ beh hoˆ piˇ taˍ ve yoˬ. Gʼuiˬ sha yawˇ htaꞈ awˬ tehˬ awˬ na venˇ baˆ hpehˇ piˇ leh yawˇ te yaꞈ ve tehꞈ maˇ kʼawꞈ shawˍ˗o. (Chiˇ 32:1, 2) Yawˇ yonˍ ve htaꞈ pa taw Gʼuiˬ sha haꞈ yuˬ piˇ leh yawˇ venˇ baˆ taˍ kuiˬ maˇ cawˬ ve tehꞈ shawˍ piˇ tuˬ yoˬ. Aˍbraˍhanˍ, Daˍviˆ, leh Yaˬhoˉvaˬ ve kanˉ te ve awˬ nu ve chaw htaꞈ, Gʼuiˬ sha nyi ma cawˇ ve chaw hpehꞈ ve tehꞈ kʼoˆ ve yoˬ. Yaꞈ hkʼaˇ, yawˇ hui venˇ baˆ yaˇ hpehꞈ leh maˇ biˇ ve chaw hpehꞈ ve yoˬ. Chi hkʼe hpehꞈ ve htawˇ, yonˍ ve maˇ cawˬ ve awˬ nu ve chaw htaꞈ yawˇ hui tehˆ daꞈ ve kʼo, yawˇ hui yonˍ ve cawˬ jaˇ ve yoˬ. Chi ve lehˬ yawˇ hui venˇ baˆ taˍ kuiˬ maˇ cawˬ ve chaw hpehꞈ ve tehꞈ, Gʼuiˬ sha shawˍ tuˬ te piˇ ve yoˬ. (Efs 2:12) Tcuh yaˇ Pawˇluꞈ ve liꞈ hkʼaw gʼa mawˬ ve hkʼe, ngaˬ hui Gʼuiˬ sha geh meuˆ daꞈ tuˬ yonˍ ve awˬ ceuˬ lehˬ a yeˇ uiˍ jaˇ. Aˍbraˍhanˍ leh Daˍviˆ Gʼuiˬ sha htaꞈ yonˍ ve pa taw, yawˇ hui Gʼuiˬ sha geh awˬ chawˇ te gʼa ve yoˬ. Ngaˬ hui kaꞈ yonˍ ve cawˬ ve kʼo, Gʼuiˬ sha geh awˬ chawˇ te gʼa ve yoˬ. w23.12 3 ¶6-7

Chi beuꞈ teˇ co˗e ve Hkriꞈ yaˇ Yaˬhoˉvaˬ htaꞈ gʼa tuˉ tanˇ piˇ ve daꞈ jaˇ ve awˬ ceuˬ lehˬ, Gʼuiˬ sha ve mvuhˇ miˬ awˬ pon awˬ yanˇ yehˇ ve, awˬ gʼaˇ yehˇ ve, leh hpu shi mawˇ jeˬ yehˇ ve yoˬ. Ngaˬ hui Yaˬhoˉvaˬ htaꞈ oˉ kʼoˍ gʼa pui ve awˬ hpfuhˇ shiˍ ve tehꞈ hpeuꞈ maw piˇ tuˬ, yawˇ awˬ pon te gʼa ve hkʼe teˇ ceuˬ le le te ve yoˬ. Tcuh yaˇ Pawˇluꞈ ngaˬ hui Yaˬhoˉvaˬ htaꞈ oˉ kʼoˍ pui ve hkʼaw hkʼaˬ htaˆ kaꞈ gʼa te cawˇ ve teˇ ceuˬ ceuˬ htaꞈ kʼoˆ ve yoˬ. (Heˍ 10:22-25) Awˬ ceuˬ chi ve teˇ hpaˍ lehˬ, Yaˬhoˉvaˬ geh bon lawˬ ve, awˬ nu ve chaw htaꞈ hto maˍ piˇ ve, leh hpawnˬ daꞈ ve hkʼaw awˬ gʼaˇ piˇ daꞈ ve yoˬ. ‘Yaˬhoˉvaˬ ve awˬ nyi oˇ ve teˇ nyi gaˬ la paˇ neˇ ve htaꞈ nawˬ hui shiˍ ve pa taw, leuˉ leh awˬ gʼaˇ piˇ daꞈ chehˇ˗oˆ.’ Chi ve a yeˇ uiˍ jaˇ. Hpeuꞈ maˍ ve liꞈ awˬ leh meuˇ teˇ tawn lo Yaˬhoˉvaˬ ve mvuhˇ naw ma tcuh yaˇ “Gʼuiˬ sha htaꞈ oˉ kʼoˍ pui˗o” tehꞈ 2 pawˆ kʼoˆ ve htaꞈ ngaˬ hui gʼa mawˬ ve yoˬ. (Hpeuꞈ 19:10; 22:9) Co ha hpawˇ ve Yaˬhoˉvaˬ ve bon yehˬ lonˉ htaꞈ caˉ daꞈ ve awˬ tehˬ ve ngaˬ hui hkʼa dehꞈ chaˬ nyi tuˬ taˇ leunˇ. Uiˍ jaˇ mvuh jaˇ ve Yaˬhoˉvaˬ htaꞈ ngaˬ hui oˉ kʼoˍ gʼa pui ve daꞈ jaˇ ve htaꞈ awˬ hpfuhˇ shiˍ sheˍ. w23.10 29 ¶17-18

Ngaˬ hui “teˇ gʼaˇ leh teˇ gʼaˇ haꞈ daꞈ” gaˇ ve yoˬ. Yaꞈ hkʼaˇ, ngaˬ hui Yeˍsuˆ shaˍ tiꞈ peꞈ laˇ ve htaꞈ tawnˇ taˍ ve a yeˇ uiˍ jaˇ. Oˇ kaˬ lo kʼoˆ ve, “chaw maˇ maˇ haꞈ pehnˇ ve teˇ ceuˬ i kʼai yawnˇ kʼai tuˬ yoˬ.” (Maꞈ 24:12) Yeˍsuˆ yawˇ ve awˬ laꞈ gʼawˇ maˇ˗awˍ ve maˇ haꞈ daꞈ˗o ve htaꞈ kʼoˆ gaˇ ve maˇ heˆ. Yaꞈ hkʼaˇ, chi beuꞈ teˇ co˗e Saˍtanˍ uˉ peunˍ ve awˬ hawˉ lo chehˇ ve chaw maˇ haꞈ daꞈ ve yoˬ. Chi htaꞈ pa taw, chaw chi teˇ hpaˍ hkʼe leˇ ve dawˇ hkʼaˇ ngaˬ hui maˇ cawˬ tuˬ shaˍ tiꞈ gʼa te cawˇ ve yoˬ. Awˬ lawn chi ve htaꞈ ngaˬ hui dawˇ nyi htaˇ, na hkawˇ teˇ maˬ htaꞈ caˉ daꞈ ve ngaˬ hui teˇ geh henˇ tuˬ yoˬ. Chi ve lehˬ, ngaˬ hui hkʼaˬ htaˆ kaꞈ awˬ viˉ awˬ nyi htaꞈ haꞈ chehˇ sheˍ ve laˇ tehꞈ hkʼaˬ hkʼe te shiˍ gʼa tuˬ le? Ngaˬ hui awˬ viˉ awˬ nyi htaꞈ hkʼaˬ htaˆ kaꞈ haꞈ chehˇ sheˍ ve laˇ tehꞈ shiˍ tuˬ awˬ hkʼaˇ teˇ hkʼaˇ lehˬ, maˇ dawˇ maˇ gaˇ ve teˇ ceuˬ ceuˬ hpehꞈ la htaˇ ngaˬ hui hkʼaˬ hkʼe te tuˬ le? (2 Kawˇ 8:8) Peˍtruˆ kʼoˆ ve, “teˇ gʼaˇ leh teˇ gʼaˇ, gʼaˇ hteꞈ haꞈ daꞈ˗oꞈ. Tawˇ chi lehˬ, uiˍ jaˇ ve tawˇ teˇ hkawˇ hpehꞈ ve yoˬ. Awˬ lawn kʼo, haꞈ pehnˇ ve teˇ ceuˬ lehˬ, maˇ jaˇ ve venˇ baˆ teˇ hpaˍ htaꞈ beh taˍ ve yoˬ.” (1 Peˍ 4:8) Chi htaꞈ pa taw, awˬ viˉ awˬ nyi te hkʼaˇ dawˇ hkʼaˇ teˇ ceuˬ ceuˬ maˇ daꞈ ve htaꞈ ngaˬ hui mawˬ ve, maˇ heˆ leh awˬ viˉ awˬ nyi ngaˬ hui nyi ma naˬ tuˬ te laˇ ve kʼo, hkʼaˬ hkʼe te tuˬ ve le? Ngaˬ hui te ve awˬ ceuˬ lehˬ, awˬ viˉ awˬ nyi htaꞈ hkʼaˬ htaˆ kaꞈ haꞈ chehˇ sheˍ ve laˇ tehꞈ hpeuꞈ maw piˇ gʼa ve yoˬ. w23.11 10-11 ¶12-13

Hkriꞈ yaˇ awˬ moˍ hkʼaw ve chaw teˇ hpaˍ htaꞈ ceh tiˉ ngaˬ hui haꞈ ve kʼo, Yeˍsuˆ ve tawˇ hkawˇ htaꞈ ngaˬ hui na yuˬ ve tehꞈ kʼoˆ maˇ gʼa. Yeˍsuˆ kaꞈ awˬ laꞈ gʼawˇ teˇ hpaˍ htaꞈ awˬ nu ve awˬ laꞈ gʼawˇ hui aꞈ kehˉ meuˆ daꞈ ve pa taw, ngaˬ hui kaꞈ awˬ nu ve chaw teˇ hpaˍ htaꞈ awˬ nu ve chaw aꞈ kehˉ meuˆ daꞈ ve lehˬ yaꞈ ve maˇ heˆ. (Yoˇ 13:23; 20:2) Yaꞈ hkʼaˇ, tcuh yaˇ Peˍtruˆ ngaˬ hui htaꞈ shaˍ tiꞈ peꞈ laˇ ve, Hkriꞈ yaˇ awˬ moˍ hkʼaw ve chaw lehˬ, ngaˬ hui ve yehˬ kʼa hkʼaw ve chaw hkʼe hpehꞈ leh ‘awˬ viˉ awˬ nyi htaꞈ haꞈ hpehꞈ tuˬ’ gʼa te cawˇ ve yoˬ. (1 Peˍ 2:17) Peˍtruˆ ngaˬ hui htaꞈ kʼoˆ laˇ sheˍ ve, “nyi ma awˬ tawˬ hkʼa gaˬ teˇ gʼaˇ leh teˇ gʼaˇ haꞈ daꞈ˗oꞈ.” (1 Peˍ 1:22) Awˬ lawn chi ve Heˍlaˍsaˆ ve tawˇ hkawˇ “nyi ma awˬ tawˬ hkʼa gaˬ” kʼoˆ ve lehˬ, peuˬ laˬ htaˇ te jaw ve aꞈ kehˉ te ve yoˬ. Awˬ viˉ awˬ nyi ngaˬ hui nyi ma naˬ tuˬ te laˇ ve, maˇ heˆ leh ngaˬ hui maˇ dawˇ cawˇ ve teˇ ceuˬ ceuˬ htaꞈ te laˇ ve kʼo, ngaˬ hui yawˇ htaꞈ haꞈ ve tehꞈ maˇ hpeuꞈ maw piˇ gaˇ leh kʼawꞈ te hkʼawꞈ gaˇ ve yoˬ. Yaꞈ hkʼaˇ, ngaˬ hui te hkʼawꞈ ve kʼo, Gʼuiˬ sha nyi hkʼaˇ maˇ suh taˬ tehꞈ Peˍtruˆ Yeˍsuˆ geh gʼa henˇ ve yoˬ. (Yoˇ 18:10, 11) Peˍtruˆ kʼoˆ ve, “shu awˬ haiˬ te laˇ ve htawˇ, awˬ haiˬ taˇ kʼawꞈ te hkʼawꞈ. Shu hkʼa mvuhˇ hkʼa na kʼoˆ laˇ ve htawˇ, hkʼa mvuhˇ hkʼa na taˇ kʼawꞈ kʼoˆ hkʼawꞈ. Yaꞈ hkʼaˇ, yawˇ hui htaꞈ naꞈ piˇ˗oˆ.” (1 Peˍ 3:9) Chi htaꞈ pa taw, nawˬ awˬ viˉ awˬ nyi htaꞈ nyi ma awˬ tawˬ hkʼa gaˬ haꞈ ve kʼo, yawˇ htaꞈ daꞈ ve te piˇ leh ha kʼaˉ piˇ ve yoˬ. w23.09 28-29 ¶9-11

Chi beuꞈ teˇ co˗e ve yaˇ uiˍ la vaiˇ jaˇ. Chi lehˬ a hkʼe leˇ hpehꞈ ve yoˬ. Yaꞈ hkʼaˇ, co ha hpawˇ ve chaw mawˇ hpehꞈ ve lehˬ, yawˇ hkʼaˇ yawˇ hpehꞈ la gʼa ve maˇ heˆ. (1 Kawˇ 13:11; Heˍ 6:1) Co ha hpawˇ ve chaw mawˇ hpehꞈ tuˬ ngaˬ hui Yaˬhoˉvaˬ geh gʼa meuˆ daꞈ cawˇ ve yoˬ. Chi hkʼoˆ kaꞈ, ngaˬ hui daꞈ ve te hkʼaˇ dawˇ hkʼaˇ cawˬ tuˬ, awˬ bon cawˬ ve awˬ ceuˬ te jawˬ ve leh, awˬ gʼuˇ suhˍ hpawˇ te tuˬ ve awˬ vuiˬ htaꞈ gu hehnˇ taˍ ve, chi ve teˇ hpaˍ cawˬ tuˬ ngaˬ hui Gʼuiˬ sha ve daꞈ kehˬ ve awˬ ha hpu gʼa ga laˇ tcuh cawˇ ve yoˬ. (Tawˇ 1:5) Yaˬhoˉvaˬ lehˬ chaw yaˇ hawˉ hkʼaˆ leh yaˇ miˇ htaꞈ hpanˍ taˍ ve yoˬ. (Awˬ 1:27) Hawˉ hkʼaˆ leh yaˇ miˇ lehˬ, awˬ hoꞈ awˬ han ceh peun daꞈ ve maˇ heˆ. Yaꞈ hkʼaˇ, awˬ nu ve awˬ ceuˬ kaꞈ peun daꞈ ve yoˬ. Tawˇ pa haˉ te kʼo, Yaˬhoˉvaˬ lehˬ hawˉ hkʼaˆ leh yaˇ miˇ htaꞈ awˬ vuiˬ te tcuh ve kaꞈ maˇ shuˍ daꞈ ve yoˬ. Chi htaꞈ pa taw, yawˇ hui ve te hkʼaˇ dawˇ hkʼaˇ leh awˬ bon cawˬ ve awˬ ceuˬ, yawˇ hui a shu yawˇ ve awˬ vuiˬ teˇ ceuˬ ceuˬ htaꞈ te gʼa tuˬ ga piˇ ve yoˬ.—Awˬ 2:18. w23.12 18 ¶1-2

Yeˍsuˆ lehˬ awˬ nu ve chaw htaꞈ yawˇ ve Awˬ pa Yaˬhoˉvaˬ ve awˬ meh yehˇ tcuh gaˇ˗aw laˇ? Yehˇ tcuh gaˇ ve yoˬ. Yaꞈ hkʼaˇ, Yeˍsuˆ ve awˬ co˗e htaˇ, bon awˬ hoˉ teˇ hpaˍ Gʼuiˬ sha ve awˬ meh daꞈ kehˬ jaˇ leh kʼoˆ maˇ keunˍ tehꞈ yonˍ ve yoˬ. Liꞈ hpu hkʼaw maˇ hawˍ daꞈ ve awˬ liˇ awˬ hkʼaˇ, Yeˍsuˆ Yaˬhoˉvaˬ ve awˬ meh htaꞈ maˇ chiˇ mvuh tuˬ maˇ te laˇ tcuh. Awˬ lawn teˇ lawn htaꞈ teˇ geh nyi sheˍ. Gaˍdaˍraˆ chaw hawˉ hkʼaˆ teˇ gʼaˇ neˇ geh ve htaꞈ Yeˍsuˆ gu˗e piˇ ve yoˬ. Yeˍsuˆ yawˇ htaꞈ gu˗e piˇ peuˬ hkʼawꞈ nawˉ, venˇ hkʼaw chehˇ ve chaw Yeˍsuˆ htaꞈ kawˆ jaˇ leh Yeˍsuˆ oˇ kaˬ lo tawˆ kʼai tuˬ lawˬ hkawˉ piˇ ve yoˬ. Hkʼe te leh, Yeˍsuˆ tawˆ kʼai ve yoˬ. (Mk 5:16, 17) Yaꞈ hkʼaˇ, Yeˍsuˆ lehˬ oˇ kaˬ lo chehˇ ve chaw Yaˬhoˉvaˬ ve awˬ meh htaꞈ shiˍ tcuh gaˇ ve yoˬ. Hkʼe te leh, Yeˍsuˆ lehˬ yawˇ aˬ htoꞈ ma te ve aꞈ kehˉ Yaˬhoˉvaˬ aˬ htoꞈ ma te ve hawˉ hkʼaˆ oˇ ve awˬ nu ve chaw htaꞈ kʼoˆ piˇ tuˬ awˬ vuiˬ piˇ ve yoˬ. (Mk 5:19) Chi beuꞈ teˇ co˗e Yeˍsuˆ ngaˬ hui htaꞈ oˇ ve hkʼa shuˍ te tcuh gaˇ ve yoˬ. Ngaˬ hui lehˬ miˬ guiˬ hkʼoˆ lo chehˇ ve chaw hkʼa peu˗eˬ Yaˬhoˉvaˬ ve awˬ meh htaꞈ shiˍ tcuh gaˇ ve yoˬ! (Maꞈ 24:14; 28:20) Ngaˬ hui chi hkʼe te ve kʼo, ngaˬ hui ve Jawˇ mawˇ Yeˍsuˆ nyi hkʼaˇ suh tuˬ te piˇ chehˇ ve yoˬ. w24.02 10-11¶10

Awˬ leh meuˇ ve awˬ yanˇ tuꞈ ve hkanˍ ve gʼa hpuˇ ve htawˇ, ngaˬ hui Yaˬhoˉvaˬ ve kanˉ hkʼaˇ hkʼaw gʼa chehˇ ve daꞈ jaˇ ve yoˬ. Miˬ guiˬ chi lehˬ gʼaˇ hteꞈ luˬ kʼai chehˇ ve htawˇ, Yaˬhoˉvaˬ lehˬ ngaˬ hui htaꞈ teˇ yehˬ kʼa hkʼaw ceh tiˉ hkʼe ve awˬ viˉ awˬ nyi cawˬ tcuh laˇ ve yoˬ. (Chiˇ 133:1) Ngaˬ hui ha lehˬ jaˇ ve yehˬ kʼa cawˬ tuˬ yawˇ ga laˇ ve yoˬ. (Efs 5:33–6:1) Yaˬhoˉvaˬ ngaˬ hui htaꞈ cuˇ yiˍ cawˬ tuˬ peꞈ laˇ leh ngaˬ hui nyi ma gawˬ lehˍ ve cawˬ tuˬ kaꞈ ga laˇ ve yoˬ. Chi hkʼe hpehꞈ ve htawˇ, Yaˬhoˉvaˬ ve kanˉ ka tiꞈ yeˬ ve hkʼaw coˇ caˇ leh te cawˇ ve yoˬ. Aˬ htoꞈ ma pa taw le? Awˬ lawn kʼo, teˇ pawˆ pawˆ shu kʼoˆ ve, leh te ve awˬ ceuˬ, ngaˬ hui nyi ma maˇ sha tuˬ te laˇ ve yoˬ. Leh ngaˬ hui awˬ to kaꞈ te yaꞈ peuˬ kaꞈ te yaꞈ ve htaꞈ nyi ma luˬ ve yoˬ. (1) Awˬ viˉ awˬ nyi ngaˬ hui nyi ma maˇ sha tuˬ te laˇ htaˇ, (2) ngaˬ hui ve awˬ ca ngaˬ hui nyi ma maˇ sha tuˬ te laˇ htaˇ, leh (3) ngaˬ hui dawˇ taˍ ve hkʼe te maˇ gʼa htaˇ, yeunˇ hkanˍ ve hkʼaw Yaˬhoˉvaˬ ve kanˉ caˉ leh te cawˇ ve yoˬ. w24.03 14 ¶1-2

Ponˬ laˬ htaˇ awˬ viˉ awˬ nyi laiˉ gʼaˇ Gʼuiˬ sha ve kanˉ coˇ caˇ leh te ve htaꞈ nawˬ gʼa mawˬ ve yoˬ. Tawˇ pa haˉ te kʼo, chaw teˇ hpaˍ Gʼuiˬ sha ve mvuhˇ miˬ hto toˇ ve liꞈ henˇ yehˬ lo kʼai ve (SKE) maˇ heˆ leh hto toˇ ve chaw loˍ jaˇ kuiˬ lo kaꞈ kʼai ve yoˬ. Nawˬ chi hkʼe te tuˬ dawˇ teh taˍ ve kʼo, daꞈ jaˇ ve yoˬ. Yaˬhoˉvaˬ ve kanˉ te ve chaw teˇ gʼaˇ le le yawˇ ve kanˉ leuˉ leh te gaˇ ve yoˬ. (Tcuh 16:9) Yaꞈ hkʼaˇ, chi teˇ hkui nawˬ oˇ hkʼe te maˇ gʼa sheˍ ve kʼo, hkʼaˬ hkʼe te tuˬ le? Nawˬ awˬ viˉ awˬ nyi hkʼe taw te maˇ gʼa ve tehꞈ taˇ dawˇ. Hkriꞈ yaˇ awˬ pon a yeˇ uiˍ jaˇ ve lehˬ yeunˇ hkanˍ ve hkʼaw caˉ leh ka tiꞈ yeˬ ve yoˬ. (Maꞈ 10:22) Nawˬ te gʼa ve hkʼe Yaˬhoˉvaˬ ve kanˉ hkʼa dehꞈ te ve htaꞈ yawˇ ha lehˬ jaˇ ve tehꞈ nawˬ taˇ leunˇ sheˍ. Chi htaꞈ pa taw, nawˬ caˉ leh Yeˍsuˆ awˬ hkʼaˇ suh kʼai gaˇ ve yoˬ.—Chiˇ 26:1. w24.03 10 ¶11

Ngaˬ hui venˇ baˆ dawˇ hpfuhˆ ve kʼo, Awˬ pa Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ yoˬ tehꞈ ka tiꞈ te taˍ laˇ ve yoˬ. (Chiˇ 86:5) Chi htaꞈ pa taw, ngaˬ hui te yaꞈ jaw ve htaꞈ nyi ma luˬ jaˇ ve kʼo, Yaˬhoˉvaˬ ngaˬ hui htaꞈ awˬ tehˬ awˬ na venˇ baˆ hpehˇ laˇ tuˬ yoˬ tehꞈ, yawˇ ka tiꞈ te taˍ laˇ ve htaꞈ yonˍ gʼa ve yoˬ. Yaˬhoˉvaˬ lehˬ awˬ hkʼaˇ ca puiˉ ve Gʼuiˬ sha hpehꞈ ve tehꞈ tawnˇ taˍ sheˍ. Ngaˬ hui te maˇ gʼa ve awˬ leuˉ Yaˬhoˉvaˬ ngaˬ hui htaꞈ maˇ te tcuh laˇ taˬ. Ngaˬ hui te gʼa ve hkʼe yawˇ awˬ pon te ve htaꞈ yawˇ awˬ hpfuhˇ shiˍ ve yoˬ. Chi hkʼoˆ kaꞈ, Liꞈ hpu hkʼaw Yaˬhoˉvaˬ ve kanˉ nyi ma awˬ tawˬ hkʼa gaˬ te ve chaw awˬ lawn htaꞈ dawˇ nyi sheˍ. Tawˇ pa haˉ te kʼo, tcuh yaˇ Pawˇluꞈ ve awˬ lawn hpehꞈ ve yoˬ. Yawˇ Yaˬhoˉvaˬ ve kanˉ laiˉ hkʼawꞈ te ve yoˬ. Laiˉ hinˉ kiˇ loˇ kʼai leh Hkriꞈ yaˇ awˬ moˍ laiˉ kaˬ cawˬ tuˬ kaꞈ te ve yoˬ. Yaꞈ hkʼaˇ, peuˬ laˬ htaˇ hkʼe yawˇ Gʼuiˬ sha ve kanˉ hkʼa dehꞈ te maˇ gʼa htaˇ, Yaˬhoˉvaˬ yawˇ htaꞈ nyi hkʼaˇ maˇ suh˗oˬ ve tehꞈ yawˇ dawˇ˗aw laˇ? Maˇ dawˇ. Awˬ lawn kʼo, yawˇ te gʼa ve awˬ ceuˬ htaꞈ coˇ caˇ leh te ve pa taw, Yaˬhoˉvaˬ yawˇ htaꞈ awˬ bon naꞈ piˇ ve yoˬ. (Tcuh 28:30, 31) Chi ve hkʼa shuˍ shuˍ, ngaˬ hui Yaˬhoˉvaˬ htaꞈ te piˇ ve awˬ ceuˬ awˬ tcuhˉ awˬ yanˇ pa ve hkʼe gʼaꞈ te ve yoˬ. Yaꞈ hkʼaˇ, Yaˬhoˉvaˬ awˬ pon a yeˇ uiˍ jaˇ ve lehˬ, yawˇ ve kanˉ caˉ leh te ve yoˬ. w24.03 27 ¶7, 9

Yeˍsuˆ lehˬ bon lawˬ ve awˬ laꞈ gʼawˇ awˬ pon daꞈ jaˇ ve henˇ yuˬ tuˬ hpehꞈ ve yoˬ. Yawˇ miˬ guiˬ hkʼoˆ lo Gʼuiˬ sha ve kanˉ te ve awˬ yanˇ htaˇ, yawˇ hkʼaˬ htaˆ kaꞈ bon lawˬ ve yoˬ. Yawˇ kanˉ maˇ jaˇ leh awˬ nu ve chaw yawˇ geh hkʼaˬ htaˆ kaꞈ laˬ ve pa taw, yawˇ bon lawˬ tuˬ awˬ yanˇ ca ve yoˬ. (Mk 6:31, 45, 46) Yeˍsuˆ teˇ gʼaˇ tiˉ bon lawˬ tuˬ awˬ pon mvuhˇ shawˉ teˇ naꞈ tu ve yoˬ. Yeˍsuˆ a yeˇ uiˍ ve awˬ lawn maˇ dawˇ cheˆ sheˍ htaˇ, teˇ haˉ mvuhˇ hkʼa htiˇ Gʼuiˬ sha geh bon lawˬ ve yoˬ. (Luˉ 6:12, 13) Yeˍsuˆ miˬ guiˬ hkʼoˆ lo chehˇ ve awˬ leh meuˇ teˇ haˉ htaˇ, yawˇ haˍ jaˇ ve awˬ vuiˬ htaꞈ te gʼa tuˬ, yawˇ Gʼuiˬ sha geh bon laiˉ pawˆ lawˬ ve yoˬ. (Maꞈ 26:39, 42, 44) Yeˍsuˆ ve awˬ lawn ngaˬ hui htaꞈ maˍ laˇ ve, ngaˬ hui kanˉ maˇ jaˇ ve htawˇ, bon lawˬ tuˬ awˬ yanˇ shawˍ teh cawˇ ve yoˬ. Ngaˬ hui Yeˍsuˆ hkʼa shuˍ gʼa te cawˇ ve lehˬ, hkʼaˬ htaˆ kaꞈ bon lawˬ tuˬ awˬ yanˇ gʼa shawˍ teh cawˇ ve yoˬ. Ngaˬ hui leuˉ leh bon lawˬ gʼa tuˬ, teˇ pawˆ pawˆ kʼo ngaˬ hui teˇ naꞈ tu ve maˇ heˆ leh haˆ maˇ zuhꞈ ve yoˬ. Ngaˬ hui chi hkʼe te ve kʼo, ngaˬ hui bon lawˬ ve htaꞈ awˬ hpfuhˇ shiˍ ve tehꞈ Yaˬhoˉvaˬ mawˬ tuˬ te piˇ ve yoˬ. w23.05 3 ¶4-5

Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “ngeuˍ keu ve” Liꞈ hpu chi teˇ tawn hkʼaw kʼoˆ ve lehˬ “iˉ kaˆ lawˬ yaꞈ la chehˇ ve htaꞈ dawˇ mawˬ tuˬ te laˇ ve” htaꞈ kʼoˆ gaˇ ve yoˬ. Tawˇ pa haˉ chi ve lehˬ, Yaˬhoˉvaˬ leuˆ yuˬ taˍ ve chaw htaꞈ hkʼaˬ hkʼe taw haꞈ ve ngaˬ hui dawˇ mawˬ tuˬ te laˇ ve yoˬ. Leh leuˆ yuˬ taˍ ve chaw kaꞈ Yaˬhoˉvaˬ yawˇ hui htaꞈ haꞈ ve tehꞈ shiˍ ve yoˬ. (Yuˇ 1) Yoˇhanˬ leuˆ yuˬ taˍ ve chaw htaꞈ kʼoˆ ve, “Awˬ pa ngaˬ hui htaꞈ hkʼaˬ ma haꞈ ve htaꞈ dawˇ nyi˗o. Ngaˬ hui htaꞈ Gʼuiˬ sha ve awˬ yaˇ awˬ duˬ” tehꞈ kʼoˆ ve yoˬ. (1 Yoˇ 3:1) Yaꞈ hkʼaˇ, Yaˬhoˉvaˬ leuˆ yuˬ taˍ ve chaw htaꞈ ceh tiˉ haꞈ ve laˇ? Maˇ heˆ. Yawˇ ngaˬ hui teˇ gʼaˇ le le htaꞈ kaꞈ haꞈ ve yoˬ. Yaˬhoˉvaˬ nawˬ htaꞈ haꞈ ve tehꞈ hkʼa tawˍ lehˆ mawˬ tuˬ aˬ htoꞈ ma hpeuꞈ maw laˇ ve le? Chi ve lehˬ htaiˍ hkʼawꞈ laˇ ve yoˬ. Ngaˬ hui htaꞈ haꞈ leh ngaˬ hui awˬ pon chi hkʼe taw taw te laˇ ve teˇ gʼaˇ˗ehˬ kaꞈ maˇ cawˬ!—Yoˇ 3:16; Roˉ 5:8. w24.01 28 ¶9-10

Awˬ na hpawˇ lo ve Liꞈ hpu awˬ tawn Daˍviˆ kawˆ ve htaꞈ gʼaˇ ve teˇ hkʼaˇ htaꞈ kʼoˆ taˍ ve yoˬ. Daˍviˆ ve a shaꞈ teꞈ kuiˬ hkʼaw kawˆ tuˬ cawˬ ve htawˇ, Yaˬhoˉvaˬ yawˇ awˬ pon te laˇ ve awˬ ceuˬ htaꞈ awˬ yanˇ yehˇ leh hkʼa dehꞈ dawˇ nyi ve yoˬ. Daˍviˆ Iˉsaˍreˍlaˆ chaw ve jawˇ mawˇ gʼa te tuˬ Yaˬhoˉvaˬ yawˇ htaꞈ ka tiꞈ te piˇ ve pa taw, awˬ yanˇ gaˬ kʼo Yaˬhoˉvaˬ Daˍviˆ htaꞈ ga laˇ tuˬ yoˬ tehꞈ shiˍ ve yoˬ. (1 Saˍ 16:1, 13) Daˍviˆ awˬ pon kʼo, Yaˬhoˉvaˬ aˬ htoꞈ ma ve awˬ lawn ka tiꞈ te taˍ laˇ ve htawˇ maˇ kʼoˆ, awˬ tehˬ hpehꞈ la tuˬ yoˬ tehꞈ yawˇ yonˍ gʼa ve yoˬ. Nawˬ awˬ pon Yaˬhoˉvaˬ aˬ htoꞈ ma te tuˬ ka tiꞈ te taˍ laˇ ve le? Ngaˬ hui shoꞈ shaꞈ ve maˇ gʼa hpuˇ tuˬ, Yaˬhoˉvaˬ haꞈ shaˉ laˇ tuˬ yoˬ tehꞈ maˇ dawˇ law cawˇ. Yaꞈ hkʼaˇ, awˬ leh meuˇ ve awˬ yanˇ hkʼaw ngaˬ hui shoꞈ shaꞈ ve, maˇ heˆ leh tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, miˬ guiˬ awˬ suhˉ hkʼaw awˬ ceuˬ chi ve hkʼa peu˗eˬ maˇ cawˬ˗o tehꞈ ka tiꞈ te taˍ laˇ ve yoˬ. (Isy 25:7-9) Yaˬhoˉvaˬ lehˬ hpanˍ shehˍ hpaˇ Gʼuiˬ sha hpehꞈ ve pa taw, suh taˍ ve chaw htaꞈ kʼawꞈ teꞈ tu la piˇ gʼa tuˬ, leh naˬ ve gawˬ ve teˇ ceuˬ le le htaꞈ gu na˗e piˇ gʼa tuˬ, leh ngaˬ hui htaꞈ fawˉ mehˍ laˇ ve chaw teˇ gʼaˇ le le htaꞈ te luˬ piˇ gʼa tuˬ kanˇ paˆ cawˬ ve yoˬ.—1 Yoˇ 4:4. w24.01 6 ¶12-13

Nawˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ tuˬ tehꞈ dawˇ teh taˍ sheˍ. Nawˬ chi hkʼe dawˇ cheˆ ve lehˬ, Yaˬhoˉvaˬ hpawˇ chehˇ gaˇ ve pa taw yoˬ. Chi htaꞈ pa taw, oˇ ve teˇ yanˇ nawˬ awˬ tehˬ ve htaꞈ ca mawˬ˗oˬ ve tehꞈ yonˍ gʼa tuˬ aˬ htoꞈ ma ga laˇ gʼa ve htaꞈ dawˇ nyi sheˍ. Nawˬ Yaˬhoˉvaˬ htaꞈ shiˍ daꞈ ve nawˬ yawˇ htaꞈ yawˆ yan leh haꞈ ve pa taw, nawˬ ve Awˬ pa hkʼe shawˍ ve yoˬ. Nawˬ leuˉ leh yonˍ yeˬ ve pa taw, nyi ma pa tuˬ te laˇ ve yoˬ. Nawˬ Yaˬhoˉvaˬ maˇ dawˇ cawˇ ve awˬ ceuˬ htaꞈ maˇ te leh nawˬ a shaꞈ teꞈ kuiˬ hkʼaw yawˇ nyi hkʼaˇ suh tuˬ te ve yoˬ. Yaˬhoˉvaˬ nawˬ htaꞈ venˇ baˆ hpehˇ laˇ˗oˬ ve tehꞈ gʼa shiˍ htaˇ, nawˬ nyi ma sha ve yoˬ. (Chiˇ 32:2) Nawˬ Hkriꞈ yaˇ awˬ moˍ hpawnˬ daꞈ ve hkʼaw kʼai leh Liꞈ hpu hkʼaw daꞈ ve awˬ ceuˬ gʼa henˇ taˍ ve, awˬ nu ve chaw htaꞈ kʼoˆ maˍ piˇ ve yoˬ. Peuˬ hkʼawꞈ nawˉ, Gʼuiˬ sha htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ. Leh chi teˇ hkui nawˬ a shaꞈ gʼa tuˬ ve yaꞈ kʼaw hkʼoˆ lo kʼai chehˇ ve yoˬ. Yaꞈ kʼaw chi teˇ caˆ htaꞈ maˇ tawˆ˗e tuˬ dawˇ teh taˍ gʼa ve yoˬ. (Maꞈ 7:13, 14) Ngaˬ hui hkʼaˬ htaˆ kaꞈ yonˍ yeˬ gʼa tuˬ Yaˬhoˉvaˬ htaꞈ haꞈ leh yawˇ ve tawˇ hkawˇ htaꞈ htawˇ dawˇ nawˬ dawˇ maˇ cawˬ leh na yuˬ sheˍ. w23.07 17-18 ¶14; 19 ¶19

Awˬ to chiˇ aꞈ htaˇ ve bon lawˬ hkawˇ htaꞈ caˉ daꞈ ve nawˬ hkʼa dehꞈ dawˇ nyi ve kʼo, beˬ ve lawˇ ve gʼa hpuˇ ve htaꞈ tawˍ daꞈ gʼaˇ tuˬ ga laˇ gʼa ve yoˬ. Tawˇ pa haˉ te kʼo, nawˬ shu ve awˬ ca htaꞈ maˆ tuˬ laˇ? Nawˬ chi hkʼe maˇ te taˬ. Nawˬ Yaˬhoˉvaˬ nyi ma luˬ tuˬ maˇ te piˇ tehꞈ ka tiꞈ te˗oˬ ve yoˬ. Nawˬ shu ve awˬ ca htaꞈ maˆ tuˬ dawˇ hkʼaˇ maˇ cawˬ tcuh ve kʼo, dawˇ nyi tuˬ kaꞈ awˬ yanˇ maˇ shonˇ. Leh nawˬ “haiˬ ve chaw hui kʼai ve chehˇ kuiˬ lo” maˇ kʼai taˬ. (Tawˇ 4:14, 15) Yaˬhoˉvaˬ maˇ dawˇ cawˇ tuˬ awˬ ceuˬ te piˇ la ve htaꞈ nawˬ shiˍ ve kʼo, nawˬ Yeˍsuˆ hkʼa shuˍ htawˇ dawˇ nawˬ dawˇ maˇ cawˬ leh laꞈ haˉ tawˍ baˬ tuˬ yoˬ. (Maꞈ 4:10; Yoˇ 8:29) Nawˬ beˬ ve lawˇ ve maˇ heˆ leh tuꞈ ve hkanˍ ve gʼa hpuˇ htaˇ, chi ve lehˬ nawˬ Yeˍsuˆ ‘awˬ hkʼaˇ suh kʼai’ tuˬ dawˇ teh taˍ ve tehꞈ hpeuꞈ maw piˇ leh, Yaˬhoˉvaˬ nawˬ htaꞈ ga laˇ tuˬ yoˬ tehꞈ yonˍ gʼa ve yoˬ. w24.03 9-10 ¶8-10