Ha pa 8 maˬ

Awˬ na hpawˇ lo ve chiˇ mvuh ve liꞈ hkʼaw ngaˬ hui htaꞈ maˍ laˇ ve a yeˇ uiˍ ve 2 lawn htaꞈ teˇ geh nyi sheˍ. (1) Daꞈ ve chaw hpehꞈ ve htawˇ, a shaꞈ teꞈ kuiˬ hkʼaw shoꞈ shaꞈ ve maˇ gʼa hpuˇ ve maˇ heˆ. (2) Ngaˬ hui shoꞈ shaꞈ ve gʼa hpuˇ ve htaꞈ Yaˬhoˉvaˬ ponˬ laˇ tuˬ yoˬ. Hkʼe kʼo yawˇ ngaˬ hui htaꞈ hkʼaˬ hkʼe ga laˇ gʼa tuˬ le? Awˬ hkʼaˇ teˇ hkʼaˇ lehˬ, ngaˬ hui a shaꞈ teꞈ kuiˬ hkʼaw hpehꞈ chehˇ ve awˬ ceuˬ htaꞈ haꞈ yuˬ gʼa tuˬ, Gʼuiˬ sha ga laˇ tuˬ yoˬ. Ngaˬ hui Yaˬhoˉvaˬ ve kanˉ te ve hkʼaw ha lehˬ ve cawˬ tuˬ yoˬ tehꞈ yawˇ ka tiꞈ te taˍ laˇ ve htawˇ, ngaˬ hui shoꞈ shaꞈ ve maˇ gʼa hpuˇ taˬ tehꞈ yawˇ maˇ kʼoˆ taˍ laˇ? (Isy 66:14) Yaˬhoˉvaˬ ngaˬ hui htaꞈ awˬ gʼuˇ suhˍ hpawˇ ve a yeˇ yuˬ tcuh gaˇ ve lehˬ, ngaˬ hui co co taiˍ taiˍ ve a shaꞈ gʼa leh yawˇ ngaˬ hui htaꞈ ha lehˬ ve cawˬ tcuh gaˇ ve yoˬ. (2 Kawˇ 4:16-18) Yaꞈ hkʼaˇ, ngaˬ hui chi teˇ hkui teˇ nyi leh teˇ nyi yeunˇ hkanˍ gʼaˇ tuˬ yawˇ ga laˇ leh yawˇ ve kanˉ caˉ leh kʼawꞈ te kʼai gʼa tuˬ kaꞈ ga laˇ ve yoˬ. (Dawˇ 3:22-24) Liꞈ hpu ve awˬ co˗e htaˇ, leh ngaˬ hui ve awˬ co˗e htaˇ, Yaˬhoˉvaˬ ve kanˉ te ve ngaˬ hui htaꞈ hkʼaˬ hkʼe maˍ laˇ ve le? Ngaˬ hui maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ ve yoˬ. Yaꞈ hkʼaˇ, ngaˬ hui hkʼaˬ htaˆ kaꞈ Yaˬhoˉvaˬ htaꞈ gʼaˇ va ve kʼo, yawˇ ngaˬ hui htaꞈ ga laˇ tuˬ yoˬ.—Chiˇ 55:22. w23.04 14-15 ¶3-4

Mvuhˇ miˬ uˉ peunˍ paˍ hkawˇ na yuˬ tuˬ Yoˇsehꞈ leh Maˍriˆ daꞈ jaˇ ve henˇ yuˬ tuˬ hpehꞈ ve yoˬ. Yawˇ huiˉ maˬ haˍ jaˇ ve htawˇ na yuˬ ve yoˬ. (Luˉ 2:1-6) Maˍriˆ yaˇ hu ve 9 ha pa gaˬ htaˇ, Roˉmaꞈ mvuhˇ miˬ htaꞈ uˉ peunˍ paˍ jawˇ mawˇ Kehˉsaˍ Awˇguˇtuˆ teˇ gʼaˇ le le awˬ meh ca keu tuˬ tawˇ piˇ ve yoˬ. Yoˇsehꞈ leh Maˍriˆ Behˍlehˍhehnˍ venˇ lo kʼai tuˬ aˬ laˬ hkʼe 150 kiˇ loˇ gʼa kʼai ve yoˬ. Oˇ kaˬ lo kʼai ve yaꞈ kʼaw lehˬ, hkʼaw laiˉ hkʼaw htaꞈ gʼa hpanˍ kʼai ve pa taw, maˇ sha ve yoˬ. Chi teˇ pawˆ kʼai ve lehˬ Maˍriˆ awˬ pon haˍ jaˇ ve yoˬ hehˉ. Maˍriˆ leh gʼoˇ peˬ hkʼaw ve yaˇ kawˆ tuˬ cawˬ la ve htaꞈ yawˇ hui dawˇ haˍ leh Maˍriˆ yaˇ paw la ve kʼo hkʼaˬ hkʼe te tuˬ kaꞈ dawˇ haˍ ve yoˬ. Maˍriˆ gʼoˇ peˬ hkʼaw ve yaˇ ehˉ lehˬ, Meˍsiˉyaꞈ hpehꞈ leh laiˉ gʼaˇ dawˇ law chehˇ ve yoˬ. Yawˇ hui awˬ hkʼaˇ chi ve htaꞈ pa taw mvuhˇ miˬ uˉ peunˍ paˍ tawˇ piˇ ve htaꞈ maˇ na yuˬ tuˬ ve laˇ? Yoˇsehꞈ leh Maˍriˆ laiˉ ceuˬ htaꞈ dawˇ haˍ ve htawˇ, jawˇ mawˇ Kehˉsaˍ Awˇguˇtuˆ tawˇ piˇ ve htaꞈ na yuˬ ve yoˬ. Yawˇ hui chi hkʼe te ve htaꞈ Yaˬhoˉvaˬ awˬ bon naꞈ piˇ ve yoˬ. Maˍriꞈ Behˍlehˍhehnˍ venˇ lo gaˬ leh yawˇ ve yaˇ paˍ paw la ve pa taw, Liꞈ hpu hkʼaw ve tcuh kaˍ paˍ ve tawˇ hkawˇ awˬ tehˬ biˇ la ve yoˬ.—Miˆ 5:2. w23.10 8 ¶9; 9 ¶11-12

Nawˬ hpawnˬ daꞈ ve hkʼaw maˇ hkʼawꞈ haˆ ve kʼo, hkʼaˬ hkʼe te tuˬ le? Hpawnˬ daꞈ tuˬ awˬ pon hkʼa dehꞈ gu ve lehˬ awˬ bon cawˬ ve yoˬ. (Tawˇ 21:5) Awˬ lawn awˬ tanˇ htaꞈ nawˬ hkʼa dehꞈ na gʼa ve kʼo, haꞈ hanˉ ve hkʼaw nawˬ hkʼa dehꞈ hkʼawꞈ haˆ tuˬ yoˬ. Chi hkʼoˆ kaꞈ, chi suhˉ˗ehˍ hkʼawꞈ sheˍ. (Tawˇ 15:23; 17:27) Chi suhˉ˗ehˍ hkʼawꞈ ve lehˬ nawˬ hkʼawꞈ haˆ tuˬ ga laˇ ve yoˬ. Chi suhˉ˗ehˍ hkʼawꞈ ve kʼo, nawˬ awˬ lawn awˬ tanˇ hkʼa dehꞈ gu leh na gʼa˗oˬ ve tehꞈ hpeuꞈ maw piˇ ve yoˬ. Beˆ maˍ laˇ ve teˇ ceuˬ ceuˬ htaꞈ nawˬ gʼaꞈ te˗oˬ htaˇ, teˇ pawˆ maˇ heˆ leh 2 pawˆ awˬ leuˉ nawˬ maˇ hkʼawꞈ haˆ ve kʼo, hkʼaˬ hkʼe te tuˬ le? Nawˬ hkʼawꞈ tuˬ awˬ pon coˇ caˇ leh te gʼa ve hkʼe te ve htaꞈ Yaˬhoˉvaˬ awˬ hpfuhˇ shiˍ ve tehꞈ yonˍ gʼa ve yoˬ. (Luˉ 21:1-4) Nawˬ te maˇ gʼa ve awˬ leuˉ te tuˬ Gʼuiˬ sha maˇ dawˇ law. (Hpi 4:5) Nawˬ hkʼaˬ hkʼe taw te gʼa ve, nawˬ te gʼa tuˬ dawˇ teh taˍ ve, nawˬ maˇ veˆ jaˇ tuˬ Yaˬhoˉvaˬ ga laˇ tuˬ bon lawˬ sheˍ. Nawˬ awˉ lawˉ teˇ pawˆ hkʼawꞈ htaˇ, chi suhˉ˗ehˍ hkʼawꞈ tuˬ dawˇ teh taˍ gʼa ve yoˬ. w23.04 21 ¶6-8

Maꞈ yaˇ shaˍ tiꞈ te leh maꞈ bawˆ tuˬ nyi ma pui htaꞈ htanˬ tuˬ veuꞈ deh taˍ ve hkʼe, ngaˬ hui chi htaꞈ shuˍ ve tehꞈ tcuh yaˇ Pawˇluꞈ tehˆ taˍ ve yoˬ. Maꞈ bawˆ ve awˬ yanˇ htaˇ, maꞈ yaˇ canˇ paˍ htaꞈ bawˆ tuˬ gʼa gu hehnˇ taˍ ve yoˬ. Chi ve hkʼa shuˍ shuˍ, Yaˬhoˉvaˬ ve awˬ nyi gaˬ la tuˬ ve htaꞈ ngaˬ hui gʼa gu hehnˇ taˍ cawˇ ve yoˬ. Yonˍ ve leh haꞈ pehnˇ ve teˇ ceuˬ nyi ma pui htaꞈ htanˬ tuˬ hkʼe veuꞈ deh leh dawˇ law ve tehꞈ kʼoˆ ve sho uˉ tcuhˍ htaꞈ hkʼawˆ taˍ˗a veuˬ. Nyi ma pui htaꞈ htanˬ tuˬ maꞈ yaˇ htaꞈ haꞈ shaˉ piˇ gʼa ve hkʼe, yonˍ ve leh haꞈ pehnˇ ve kaꞈ ngaˬ hui ve nyi ma htaꞈ haꞈ shaˉ laˇ gʼa ve yoˬ. Chi ngaˬ hui Yaˬhoˉvaˬ ve kanˉ te leh Yeˍsuˆ awˬ hkʼaˇ suh caˉ leh gʼaꞈ te tuˬ ga laˇ ve yoˬ. Ngaˬ hui nyi ma awˬ tawˬ hkʼa gaˬ Yaˬhoˉvaˬ htaꞈ ca ve kʼo, yawˇ laꞈ shawnˍ peꞈ laˇ tuˬ yoˬ tehꞈ, ngaˬ hui yonˍ gʼa tuˬ te laˇ ve yoˬ. (Heˍ 11:6) Chi hkʼoˆ kaꞈ, ngaˬ hui tuꞈ ve hkanˍ ve gʼa hpuˇ ve htawˇ, yonˍ ve lehˬ ngaˬ hui htaꞈ sheh kʼai shehˍ hpaˇ Yeˍsuˆ htaꞈ ka tiꞈ yeˬ tuˬ ga laˇ ve yoˬ. Ngaˬ hui yonˍ yeˬ ve cawˬ maˇ ve kʼo, a shaꞈ teꞈ kuiˬ hkʼaw shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ ga laˇ ve yoˬ. Ngaˬ hui htaꞈ fawˉ mehˍ laˇ ve, maˇ heˆ leh ca caˇ gʼaꞈ caˇ hpawˇ heuˆ la kuiˬ cawˬ ve htawˇ, chi teˇ hkui awˬ viˉ awˬ nyi ka tiꞈ yeˬ ve htaꞈ dawˇ nyi ve kaꞈ ga laˇ gʼa ve yoˬ. A shaꞈ teꞈ kuiˬ hkʼaw caˇ lawꞈ dawˬ lawꞈ te leh Gʼuiˬ sha ve mvuhˇ miˬ htaꞈ awˉ lawˉ ca ve chaw htaꞈ ngaˬ hui henˇ yuˬ ve kʼo, ngaˬ hui hpu htaꞈ haꞈ ve chaw maˇ gʼa hpehꞈ tuˬ ga laˇ ve yoˬ. w23.06 10-11 ¶8-9

A shu yawˇ awˬ to htaꞈ uˉ peunˍ ve lehˬ yawˇ ve te hkʼaˇ dawˇ hkʼaˇ htaꞈ caˉ daꞈ ve yoˬ. Chi lehˬ, ngaˬ hui dawˇ teh taˍ ve htaꞈ gʼaꞈ te gʼa tuˬ, haˍ jaˇ ve maˇ heˆ leh hkʼa dehꞈ maˇ te gaˇ ve awˬ ceuˬ htaꞈ kaꞈ te cawˇ ve tehꞈ kʼoˆ gaˇ ve yoˬ. A shu yawˇ awˬ to htaꞈ uˉ peunˍ ve lehˬ, Gʼuiˬ sha geh gʼa ve daꞈ kehˬ ve awˬ ha hpu hpehꞈ ve tehꞈ tawnˇ taˍ cawˇ ve yoˬ. Chi htaꞈ pa taw, nawˬ te hkʼaˇ dawˇ hkʼaˇ a yeˇ uiˍ jaˇ ve cawˬ gʼa tuˬ, Yaˬhoˉvaˬ geh daꞈ kehˬ ve awˬ ha hpu gʼa tuˬ lawˬ sheˍ. (Luˉ 11:13; Gaˍ 5:22, 23) Teˇ ceuˬ le le cawˬ˗oˬ htaˇ hehꞈ te˗a tehꞈ taˇ dawˇ. Ngaˬ hui Saˍtanˍ uˉ peunˍ ve awˬ hawˉ lo chehˇ ve yoˬ. Ngaˬ hui a shaꞈ teꞈ chehˇ kuiˬ hkʼaw shoꞈ shaꞈ ve maˇ gʼa hpuˇ taˬ tehꞈ taˇ dawˇ. Ngaˬ hui teˇ ceuˬ le le cawˬ˗oˬ htaˇ hehꞈ te ve kʼo, dawˇ teh taˍ ve htaꞈ te maˇ gʼa taˬ. Ngaˬ hui dawˇ teh taˍ ve te gʼa tuˬ haˍ jaˇ teh dawˇ ve pa taw, ngaˬ hui te gaˇ ve nyi ma maˇ cawˬ ve yoˬ. Nawˬ chi hkʼe dawˇ ve kʼo, i ve awˬ ceuˬ leh sha ve awˬ ceuˬ htaꞈ awˉ lawˉ te nyi sheˍ. Nawˬ dawˇ teh taˍ ve lehˬ, Hkriꞈ yaˇ ve te hkʼaˇ dawˇ hkʼaˇ cawˬ tuˬ coˇ caˇ ve kʼo, nawˬ dawˇ teh taˍ ve i ve awˬ ceuˬ htaꞈ awˉ lawˉ te nyi sheˍ. Maˇ heˆ leh nawˬ Liꞈ hpu hkʼa peu˗eˬ gʼaw peuˬ tuˬ dawˇ teh taˍ ve kʼo, nawˬ maˇ gʼaw maˇ leh hkʼaˬ htaˆ kaꞈ gʼaw tuˬ awˬ yanˇ shawˍ teh sheˍ. w23.05 29-30 ¶11-13

Awˬ leh meuˇ ve awˬ yanˇ hkʼaw Yaˬhoˉvaˬ yawˇ ve kanˉ hkʼaˇ htaꞈ cuˇ leh caˇ tuˬ htaꞈ shuˍ ve co ha hpawˇ ve cuˇ yiˍ maˇ maˇ gu teh taˍ laˇ ve htaꞈ ngaˬ hui gʼa mawˬ ve yoˬ. Chi ve lehˬ ngaˬ hui teˇ gʼaˇ le le “daꞈ kehˬ ve yaꞈ kʼaw” hkʼoˆ caˉ leh toˇ kʼai tuˬ ga laˇ ve yoˬ. (Isy 35:8; 48:17; 60:17) A shu teˇ gʼaˇ Liꞈ hpu tanˬ henˇ chehˇ ve kʼo, yawˇ lehˬ “daꞈ kehˬ ve yaꞈ kʼaw” hkʼoˆ toˇ la ve yoˬ. Yaꞈ hkʼaˇ, chaw teˇ hpaˍ kʼo yaꞈ kʼaw chi ve hkʼoˆ toˇ ve maˇ maw, peuˬ hkʼawꞈ nawˉ tawˆ˗e ve yoˬ. Chaw teˇ hpaˍ kʼo yaꞈ kʼaw chi htaꞈ awˬ leh meuˇ hkʼa gaˬ toˇ ve yoˬ. Hkʼe kʼo yaꞈ kʼaw chi ve awˬ leh meuˇ hkʼaˬ kaˬ lo le? Mvuhˇ naw ma hkʼoˆ taˆ˗e tuˬ dawˇ law taˍ ve chaw lehˬ “daꞈ kehˬ ve yaꞈ kʼaw” mvuhˇ naw ma hkʼoˆ lo “Gʼuiˬ sha ve Paˍraˍdiˇsuˆ awˬ hkʼaw lo” yawˇ hui htaꞈ shiˍ kʼai ve yoˬ. (Hpeuꞈ 2:7) Miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve chaw kʼo, yaꞈ kʼaw chi ve lehˬ Yeˍsuˆ uˉ peunˍ ve 1,000 hkʼawꞈ ve awˬ leh meuˇ awˬ yanˇ hkʼaw lo yawˇ hui htaꞈ shiˍ kʼai ve yoˬ. Oˇ ve teˇ yanˇ biˇ ve chaw hpehꞈ tuˬ yoˬ. Nawˬ yaꞈ kʼaw chi ve htaꞈ kʼai chehˇ ve kʼo, hkʼawꞈ nawˉ lo taˇ hpfuhˆ nyi. Miˬ guiˬ awˬ suhˉ gaˬ htaˇ hkʼa gaˬ yaꞈ kʼaw chi ve htaꞈ nawˬ toˇ kʼai cawˇ ve yoˬ. w23.05 17, 19 ¶15-18

Yaˬhoˉvaˬ nawˬ awˬ pon te laˇ ve teˇ ceuˬ le le htaꞈ nawˬ dawˇ nyi htaˇ, nawˬ awˬ hpfuhˇ shiˍ leh yawˇ htaꞈ awˬ to chiˇ aꞈ piˇ gaˇ ve yoˬ. (Chiˇ 116:12-14) Liꞈ hpu hkʼaw kʼoˆ ve, Yaˬhoˉvaˬ lehˬ “daꞈ ve awˬ ceuˬ hkʼa peu˗eˬ leh, biˇ ve laꞈ shawnˍ hkʼa peu˗eˬ” peꞈ laˇ ve yoˬ. (Yaˍ 1:17) Yaˬhoˉvaˬ nawˬ htaꞈ daꞈ jaˇ ve laꞈ shawnˍ peꞈ laˇ ve lehˬ, Yeˍsuˆ nawˬ awˬ pon htaiˍ hkʼawꞈ tcuh laˇ ve yoˬ. Laꞈ shawnˍ chi ve hkʼaˬ hkʼe taw daꞈ jaˇ ve htaꞈ dawˇ nyi sheˍ. Htaiˍ hkʼawꞈ ve chi nawˬ Yaˬhoˉvaˬ geh meuˆ daꞈ tuˬ ga laˇ gʼa leh nawˬ co co taiˍ taiˍ ve a shaꞈ gʼa tuˬ dawˇ law kuiˬ cawˬ tuˬ kaꞈ ga laˇ ve yoˬ. (1 Yoˇ 4:9, 10) Chi htaꞈ pa taw, Yaˬhoˉvaˬ nawˬ htaꞈ haꞈ leh yawˇ nawˬ htaꞈ daꞈ ve awˬ ceuˬ peꞈ laˇ ve htaꞈ nawˬ awˬ bon uiˍ jaˇ tehꞈ kʼoˆ piˇ gaˇ ve pa taw, yawˇ htaꞈ awˬ to chiˇ aꞈ piˇ ve lehˬ, daꞈ jaˇ ve awˬ hkʼaˇ hpehꞈ ve tehꞈ hpeuꞈ maw piˇ ve yoˬ.—Bon 16:17; 2 Kawˇ 5:15. w24.03 5 ¶8

Chi beuꞈ teˇ co˗e miˬ guiˬ hkʼoˆ lo ve awˬ liˇ awˬ hkʼaˇ teˇ hpaˍ htaꞈ ngaˬ hui gʼa mawˬ htaˇ, ngaˬ hui Lawˇtaˍ hkʼa shuˍ dawˇ ve yoˬ. Yaˬhoˉvaˬ haiˬ ve htaꞈ maˇ dawˇ cawˇ ve pa taw, “chaw haiˬ teˇ hpaˍ chaꞈ chiˆ ve awˬ liˇ awˬ hkʼaˇ htaꞈ te ve pa taw, Lawˇtaˍ lehˬ dawˇ haˍ gaˇ haˍ jaˇ ve yoˬ.” (2 Peˍ 2:7, 8) Lawˇtaˍ Yaˬhoˉvaˬ htaꞈ yawˆ yan leh haꞈ jaˇ ve pa taw, yawˇ ve awˬ co˗e miˬ guiˬ yaˇ ve awˬ liˇ awˬ hkʼaˇ haiˬ jaˇ ve htaꞈ yawˇ maˇ gʼaꞈ te ve yoˬ. Chi beuꞈ teˇ co˗e kaꞈ hkʼa shuˍ shuˍ, nga hui awˬ paˇ awˬ kui lo chehˇ ve chaw Yaˬhoˉvaˬ ve awˬ liˇ awˬ hkʼaˇ htaꞈ a yeˇ maˇ yuˬ ve yoˬ. Chi hkʼe hpehꞈ ve htawˇ, ngaˬ hui Yaˬhoˉvaˬ htaꞈ haꞈ leh yawˇ htaꞈ kawˆ leh yawˆ yan tuˬ henˇ ve kʼo, ngaˬ hui daꞈ ve awˬ liˇ awˬ hkʼaˇ cawˬ ve chaw hpehꞈ gʼa sheˍ ve yoˬ. Chi hkʼe te htaˇ, ngaˬ hui awˬ gʼaˇ gʼa tuˬ Yaˬhoˉvaˬ lehˬ Tawˇ naˉ ve liꞈ hkʼaw ngaˬ hui htaꞈ beˆ maˍ laˇ taˍ ve yoˬ. Hawˉ hkʼaˆ, yaˇ miˇ, yaˇ nehˬ, chaw mawˇ Hkriꞈ yaˇ hpehꞈ ve teˇ gʼaˇ le le Tawˇ naˉ ve liꞈ hkʼaw beˆ maˍ laˇ taˍ ve htaꞈ awˬ bon gʼa ve yoˬ. Ngaˬ hui Yaˬhoˉvaˬ htaꞈ kawˆ leh yawˆ yan htaˇ, maˇ daꞈ ve awˬ ceuˬ htaꞈ te ve chaw geh ngaˬ hui awˬ chawˇ maˇ te ve yoˬ. w23.06 20 ¶1-2; 21 ¶5

Nawˬ a shaꞈ teꞈ kuiˬ hkʼaw Gʼuiˬ sha ve mvuhˇ miˬ a yeˇ uiˍ jaˇ ve tehꞈ shawˍ tuˬ, yehˬ kʼa hkʼaw ve chaw tawˍ laˇ ve, maˇ heˆ leh hpu chi ma ma gʼa tuˬ ve htaꞈ maˇ gʼaꞈ ca ve yoˬ. (Maꞈ 6:33) Chi hkʼe hpehꞈ ve kʼo, nawˬ Yaˬhoˉvaˬ awˬ pon te ve htaꞈ yawˇ mawˬ ve tehꞈ yonˍ gʼa ve yoˬ. (Heˍ 6:10) Yeˍsuˆ ve tawˇ hkawˇ nawˬ awˬ pon awˬ tehˬ hpehꞈ ve tehꞈ gʼa mawˬ ve yoˬ. Oˇ kaˬ lo kʼoˆ ve, “ngaˬ awˬ pon leh ha lehˬ ve bon hkawˇ awˬ pon, a shu yawˇ ve yehˬ, a shu yawˇ ve awˬ viˉ awˬ nyi, a shu yawˇ ve awˬ pa awˬ e, a shu yawˇ ve awˬ yaˇ awˬ duˬ leh a shu yawˇ ve ti mi teˇ hpaˍ htaꞈ baˬ taˉ ve chaw hkʼaˬ ve teˇ gʼaˇ maˇ kʼoˆ, chi teˇ caꞈ naꞈ awˬ hkʼaw lo yehˬ, awˬ viˉ awˬ nyi, awˬ e, awˬ yaˇ awˬ duˬ leh ti mi teˇ hpaˍ htaꞈ 100 pun gʼa ve yoˬ. Chi teˇ hpaˍ geh teˇ geh tuꞈ ve hkanˍ ve htaꞈ htawˇ gʼa ve yoˬ. Awˬ hkʼawꞈ nawˉ teˇ caꞈ naꞈ awˬ hkʼaw lo co tiꞈ ha tiꞈ htaꞈ htawˇ gʼa ve yoˬ.” (Mk 10:29, 30) Chi htaꞈ pa taw, nawˬ shonˇ kʼai ve aꞈ kehˉ chi teˇ hkui kaꞈ awˬ bon gʼa maˇ jaˇ ve yoˬ.—Chiˇ 37:4. w24.03 9 ¶5

Yuˇdaꞈ mvuhˇ miˬ hkʼaw meuꞈ lonˉ kaˆ lonˉ gaˬ la htaˇ, Anˍtiˆawˍ venˇ lo chehˇ ve awˬ viˉ awˬ nyi “teˇ gʼaˇ le le a shu yawˇ puiˉ ve hpehꞈ ve hkʼe, Yuˇdaꞈ mvuhˇ miˬ awˬ hkʼaw lo chehˇ ve awˬ viˉ awˬ nyi teˇ hpaˍ htaꞈ ga piˇ tuˬ dawˇ cheˆ taˍ ve yoˬ.” (Tcuh 11:27-30) Awˬ viˉ awˬ nyi meuꞈ lonˉ kaˆ lonˉ gʼa hpuˇ ve chaw chehˇ vuiˇ jaˇ ve htawˇ, Anˍtiˆawˍ venˇ lo chehˇ ve awˬ viˉ awˬ nyi yawˇ hui htaꞈ ga piˇ tuˬ dawˇ teh taˍ ve yoˬ. (1 Yoˇ 3:17, 18) Awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ ve chaw htaꞈ ngaˬ hui kaꞈ teˇ gʼaˇ leh teˇ gʼaˇ ha kʼaˉ daꞈ ve tehꞈ hpeuꞈ maw piˇ gʼa ve yoˬ. Ngaˬ hui awˬ viˉ awˬ nyi htaꞈ laꞈ haˉ ga piˇ gʼa tuˬ, nyi haꞈ shaˉ paˍ htaꞈ ngaˬ hui hkʼaˬ hkʼe ga piˇ gʼa ve le tehꞈ na nyi piˇ gʼa ve yoˬ. Miˬ guiˬ hkʼa peu˗eˬ hkʼoˆ kanˉ awˬ pon hpu tanˇ tanˇ piˇ ve, leh awˬ viˉ awˬ nyi chi teˇ hpaˍ mvuhˇ yeˬ mvuhˇ haw lonˉ gʼa hpuˇ ve chaw awˬ pon kaꞈ bon lawˬ piˇ gʼa ve yoˬ. Awˬ viˉ awˬ nyi loˍ ve awˬ ceuˬ cawˬ tuˬ ga laˇ tuˬ ve htaꞈ kaꞈ loˍ ve yoˬ. Ngaˬ hui ve Jawˇ mawˇ Yeˍsuˆ suhˉ jehˬ la ve awˬ yanˇ htaˇ, ngaˬ hui teˇ gʼaˇ leh teˇ gʼaˇ ha kʼaˉ daꞈ ve tehꞈ yawˇ htaꞈ mawˬ tcuh gaˇ ve yoˬ. Leh Gʼuiˬ sha ve “mvuhˇ miˬ awˬ hkʼaw lo laˬ chehˇ la˗o” tehꞈ Yeˍsuˆ ngaˬ hui htaꞈ kuˬ laˇ tcuh gaˇ ve yoˬ.—Maꞈ 25:34-40. w23.07 4 ¶9-10; 6 ¶12

Yeˍsuˆ lehˬ Yaˬhoˉvaˬ hkʼa shuˍ awˬ hkʼaˇ ca puiˉ ve tehꞈ hpeuꞈ maw laˇ ve yoˬ. Yeˍsuˆ miˬ guiˬ hkʼoˆ lo laˬ ve lehˬ, ‘Iˉsaˍreˍlaˆ teˇ yehˬ awˬ pon ceh tiˉ’ bon maˍ piˇ tuˬ laˬ ve htawˇ, yawˇ awˬ hkʼaˇ ca puiˉ ve tehꞈ hpeuꞈ maw laˇ ve yoˬ. Teˇ pawˆ htaˇ, Iˉsaˍreˍlaˆ chaw maˇ heˆ ve yaˇ miˇ teˇ gʼaˇ yawˇ ve yaˇ miˇ “neˇ geh leh gʼa tuꞈ gʼa hkanˍ jaˇ” peuˬ ve htaꞈ a ciˉ gu laˇ˗oˆ tehꞈ lawˬ ve yoˬ. Yeˍsuˆ yawˇ htaꞈ ha kʼaˉ jaˇ ve pa taw, yawˇ lawˬ ve hkʼe ga piˇ leh gu na˗e piˇ ve yoˬ. (Maꞈ 15:21-28) Ngaˬ hui teˇ lawn htaꞈ teˇ geh nyi sheˍ. Yeˍsuˆ kʼoˆ laˇ jaw ve, ‘ngaˬ htaꞈ chiˇ baˬ ve kʼo, yawˇ htaꞈ chiˇ baˬ tuˬ yoˬ.’ (Maꞈ 10:33) Peˍtruˆ Yeˍsuˆ htaꞈ 3 pawˆ chiˇ baˬ htaˇ, Yeˍsuˆ yawˇ htaꞈ chiˇ baˬ˗aw laˇ? Maˇ chiˇ baˬ. Peˍtruˆ nyi ma awˬ tawˬ hkʼa gaˬ dawˇ hpfuhˆ leh yonˍ yeˬ ve cawˬ ve tehꞈ Yeˍsuˆ shiˍ ve yoˬ. Yeˍsuˆ kʼawꞈ teꞈ tu la peuˬ hkʼawꞈ nawˉ, Yeˍsuˆ Peˍtruˆ geh laˬ leh yawˇ htaꞈ haꞈ leh venˇ baˆ hpehˇ laˇ˗oˬ ve tehꞈ kʼoˆ piˇ ve yoˬ. (Luˉ 24:33, 34) Yaˬhoˉvaˬ leh Yeˍsuˆ awˬ hkʼaˇ ca puiˉ ve tehꞈ ngaˬ hui gʼa mawˬ ve yoˬ. Hkʼe kʼo, ngaˬ hui hkʼaˬ hkʼe te cawˇ ve le? Yaˬhoˉvaˬ kaꞈ ngaˬ hui htaꞈ awˬ hkʼaˇ ca puiˉ ve chaw hpehꞈ tcuh gaˇ ve yoˬ. w23.07 21-22 ¶6-7

Miˬ guiˬ awˬ suhˉ ve awˬ lawn Gʼuiˬ sha ka tiꞈ te taˍ laˇ ve htaꞈ maˇ yonˍ ve chaw awˬ pon kʼo, yawˇ hui htaꞈ kʼoˆ maˍ piˇ tuˬ aˬ htoꞈ ma ve awˬ hkʼaˇ cawˬ sheˍ ve le? Awˉ lawˉ teˇ hkʼaˇ lehˬ, ka tiꞈ chi ve Yaˬhoˉvaˬ te taˍ laˇ ve yoˬ. Hpeuꞈ maˍ ve liꞈ hkʼaw kʼoˆ ve, “kʼaw jaw hkʼoˆ lo mui shehˍ hpaˇ kʼoˆ ve, nyi loˬ, awˬ ceuˬ hkʼa peu˗eˬ htaꞈ ngaˬ awˬ suhˉ kʼawꞈ te ve yoˬ.” Yaˬhoˉvaˬ lehˬ cuˇ yiˍ, kanˇ paˆ cawˬ jaˇ leh yawˇ ka tiꞈ te taˍ ve awˬ tehˬ hpehꞈ la tcuh tuˬ yoˬ. 2 hkʼaˇ teˇ hkʼaˇ lehˬ, Yaˬhoˉvaˬ ka tiꞈ te taˍ ve awˬ tehˬ hpehꞈ la tuˬ yoˬ tehꞈ yonˍ gʼa ve yoˬ. Yawˇ kʼoˆ ve lehˬ hpehꞈ la chehˇ˗oˬ ve awˬ ceuˬ htaꞈ shuˍ ve yoˬ. Yawˇ kʼoˆ ve, ‘tawˇ hkawˇ chi teˇ hpaˍ lehˬ, ka tiꞈ yeˬ leh hteˇ ve cawˇ ve yoˬ. Leh awˬ ceuˬ hkʼa peu˗eˬ biˇ la peuˬ.’ 3 hkʼaˇ teˇ hkʼaˇ lehˬ, Yaˬhoˉvaˬ aˬ htoꞈ ma te tuˬ tanˬ˗oˬ ve kʼo, awˬ ceuˬ oˇ ve htaꞈ yawˇ hkʼa dehꞈ te gʼa ve yoˬ. Awˬ lawn chi ve htaꞈ yawˇ kʼoˆ ve, “ngaˬ lehˬ Aˍlaˍhpaˆ leh Awˇmeˍgaˆ hpehꞈ ve yoˬ.” (Hpeuꞈ 21:6) Saˍtanˍ lehˬ heˍ leh dawˇ taˍ ve hkʼe te maˇ gʼa ve tehꞈ Yaˬhoˉvaˬ hpeuꞈ maw laˇ ve yoˬ. Chi htaꞈ pa taw, a shu teˇ gʼaˇ “chi hkʼe taw taw daꞈ ve hpehꞈ kʼai maˇ gʼa taˬ” tehꞈ kʼoˆ laˇ htaˇ, nawˬ Hpeuꞈ maˍ ve liꞈ 21:5, 6 hkʼaw yawˇ htaꞈ gʼaw maˍ piˇ leh Yaˬhoˉvaˬ ka tiꞈ te taˍ laˇ ve chi awˬ tehˬ hpehꞈ la tuˬ yoˬ tehꞈ yawˇ htaꞈ kʼoˆ maˍ piˇ sheˍ.—Isy 65:16. w23.11 7 ¶18-19

Yaˬhoˉvaˬ Aˍbraˍhanˍ htaꞈ ka tiꞈ te piˇ htaˇ, yawˇ a shaꞈ 75 hkʼawꞈ gaˬ˗oˬ leh yaˇ maˇ cawˬ sheˍ ve yoˬ. Aˍbraˍhanˍ lehˬ ka tiꞈ chi awˬ tehˬ hpehꞈ la ve htaꞈ gʼa mawˬ˗aw laˇ? Yawˇ hkʼa peu˗eˬ maˇ gʼa mawˬ. Uˉhpaˍraˆ gʼuiˬ ma htaꞈ hkanˍ tawˆ˗e peuˬ hkʼawꞈ nawˉ, yawˇ ve yaˇ paˍ Iˉcaˆ paw la tuˬ ve 25 hkʼawꞈ gʼa law sheˍ ve yoˬ. Leh 60 hkʼawꞈ peuˬ hkʼawꞈ nawˉ, yawˇ ve awˬ hawehˍ Iˉsawˇ leh Yaˍkoˆ htaꞈ gʼa mawˬ sheˍ ve yoˬ. (Heˍ 6:15) Aˍbraˍhanˍ yawˇ ve awˬ ceuˬ awˬ hkʼaˇ chaw ceuˬ lonˉ hpehꞈ la ve htaꞈ maˇ gʼa mawˬ leh, Gʼuiˬ sha ka tiꞈ te taˍ piˇ ve mvuhˇ miˬ hkʼaw yawˇ ve awˬ hawehˍ awˬ haˆ gʼa loꞈ˗e ve htaꞈ kaꞈ yawˇ maˇ gʼa mawˬ ve yoˬ. Yaꞈ hkʼaˇ, Aˍbraˍhanˍ Yaˬhoˉvaˬ geh meuˆ daꞈ ve yoˬ. (Yaˍ 2:23) Awˬ gʼuˇ suhˍ hpawˇ yawˇ kʼawꞈ teꞈ tu la htaˇ, yawˇ yonˍ yeˬ ve htaꞈ gʼa shiˍ ve ha lehˬ jaˇ leh, yawˇ yeunˇ hkanˍ ve htaꞈ pa taw chaw teˇ ceuˬ le le awˬ bon gʼa ve htaꞈ gʼa shiˍ ve kaꞈ ha lehˬ jaˇ ve yoˬ. (Awˬ 22:18) Ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ ka tiꞈ te taˍ ve hkʼa peu˗eˬ awˬ tehˬ hpehꞈ la˗oˬ ve htaꞈ chi teˇ hkui ngaˬ hui maˇ gʼa mawˬ ve yoˬ hehˉ. Yaꞈ hkʼaˇ, ngaˬ hui Aˍbraˍhanˍ hkʼa shuˍ yeunˇ hkanˍ ve kʼo, chi teˇ hkui kaꞈ Yaˬhoˉvaˬ ngaˬ hui htaꞈ laꞈ shawnˍ peꞈ laˇ leh, yawˇ ka tiꞈ te taˍ ve miˬ guiˬ awˬ suhˉ hkʼaw kaꞈ laꞈ shawnˍ maˇ maˇ peꞈ laˇ tuˬ yoˬ tehꞈ yonˍ gʼa ve yoˬ.—Mk 10:29, 30. w23.08 24-25 ¶14

Awˇziˆ a shaꞈ i sheˍ htaˇ yawˇ nyi ma nuˇ nehˬ ve chaw hpehꞈ ve yoˬ. Yawˇ awˬ tehˬ ve Gʼuiˬ sha htaꞈ yawˆ yan tuˬ henˇ ve yoˬ. Yawˇ 68 hkʼawꞈ hkʼa gaˬ a shaꞈ teꞈ chehˇ sheˍ leh yawˇ a shaꞈ teꞈ chehˇ ve teˇ co˗e Yaˬhoˉvaˬ awˬ bon naꞈ piˇ ve yoˬ. (2 Raˍ 26:1-4) Awˇziˆ canˇ paˍ maˇ maˇ htaꞈ bawˆ gʼaˇ leh Yeˍruˆsaˍlehnˍ venˇ htaꞈ hkʼa dehꞈ haꞈ shaˉ gʼa ve yoˬ. (2 Raˍ 26:6-15) Awˇziˆ Yaˬhoˉvaˬ ga piˇ ve pa taw, hkʼa dehꞈ te gʼa ve htaꞈ ha lehˬ jaˇ ve yoˬ. (Cuˇ 3:12, 13) Jawˇ mawˇ Awˇziˆ lehˬ awˬ nu ve chaw yawˇ hkʼa shuˍ gʼaꞈ te tuˬ tawˇ piˇ ve yoˬ. Hkʼe te leh, yawˇ te gaˇ ve htaꞈ te leh Yaˬhoˉvaˬ ve tawˇ hkawˇ htaꞈ a yeˇ maˇ yuˬ kaꞈ hpehꞈ ve tehꞈ yawˇ dawˇ ve yoˬ. Teˇ nyi htaˇ Awˇziˆ lehˬ Yaˬhoˉvaˬ ve bon yehˬ hkʼaw loꞈ˗e leh jawˇ mawˇ tuˉ tanˇ maˇ keunˍ ve htaꞈ yawˇ tuˉ tanˇ ve yoˬ. (2 Raˍ 26:16-18) Paw hkuˇ lonˉ Aˍhaˍziˆ yawˇ htaꞈ tawˍ piˇ ve htawˇ, yawˇ maˇ na leh beuꞈ jaˇ ve yoˬ. Awˇziˆ Yaˬhoˉvaˬ ve kanˉ hkʼaˬ htaˆ kaꞈ ka tiꞈ yeˬ ve hkʼaw te ve htawˇ, teˇ pawˆ htaˇ yawˇ maˇ na yuˬ ve pa taw, yawˇ htaꞈ ciˍ yanˍ piˇ ve lehˬ, hkiˬ tuꞈ a naˍ hpehꞈ tcuh ve yoˬ. (2 Raˍ 26:19-21) Awˇziˆ hkʼaˬ htaˆ kaꞈ nyi ma nuˇ nehˬ ve kʼo, yawˇ chi hkʼe maˇ gʼa hpuˇ taˬ. w23.09 10 ¶9-10

Tcuh yaˇ Peˍtruˆ htaꞈ daꞈ kehˬ ve awˬ ha hpu leuˆ yuˬ piˇ˗oˬ ve htawˇ, yawˇ ve gʼaˇ nuˇ kuiˬ htaꞈ gʼa tawˍ daꞈ chehˇ sheˍ ve yoˬ. 36 hkʼawꞈ C.E. htaˇ, Yaˬhoˉvaˬ Peˍtruˆ htaꞈ awˬ guiˬ meuˇ maˇ shoˍ ve buiˇ shaˆ aˉ naˆ chaw Kawˍneˍliˆ geh kʼai tcuh leh, Kawˍneˍliˆ htaꞈ kaꞈ daꞈ kehˬ ve awˬ ha hpu leuˆ yuˬ piˇ ve Peˍtruˆ gʼa mawˬ ve yoˬ. Chi ve htaꞈ pa taw, “Gʼuiˬ sha lehˬ chaw mehˆ hpfuhˇ htaꞈ maˇ nyi ve” hkʼa tawˍ lehˆ gʼa mawˬ ve yoˬ. Gʼuiˬ sha htaꞈ kawˆ leh yawˆ yan ve buiˇ shaˆ aˉ naˆ chaw teˇ gʼaˇ le le htaꞈ Hkriꞈ yaˇ awˬ moˍ hkʼaw chehˇ la tcuh ve yoˬ. (Tcuh 10:34, 44, 45) Chi ve peuˬ hkʼawꞈ nawˉ, Peˍtruˆ buiˇ shaˆ aˉ naˆ chaw geh awˍ caˇ ve yoˬ. Awˉ lawˉ htaˇ yawˇ buiˇ shaˆ aˉ naˆ chaw geh teˇ geh awˍ maˇ caˇ. Yaꞈ hkʼaˇ, Hkriꞈ yaˇ hpehꞈ ve Yuˇdaꞈ chaw teˇ hpaˍ dawˇ ve, Yuˇdaꞈ chaw leh buiˇ shaˆ aˉ naˆ chaw awˍ teˇ geh maˇ caˇ keunˍ ve yoˬ. Chi hkʼe dawˇ ve chaw Anˍtiˆawˍ venˇ lo laˬ htaˇ, Hkriꞈ yaˇ hpehꞈ ve Yuˇdaꞈ chaw maˇ dawˇ cawˇ la ve htaꞈ kawˆ ve pa taw, Peˍtruˆ buiˇ shaˆ aˉ naˆ chaw Hkriꞈ yaˇ hpehꞈ la ve geh awˍ maˇ caˇ˗o. Tcuh yaˇ Pawˇluꞈ chi hkʼe gʼa mawˬ htaˇ, Peˍtruˆ htaꞈ shu mehˆ gʼuˇ suhˍ lo deˇ piˇ ve yoˬ. (Gaˍ 2:13, 14) Peˍtruˆ chi hkʼe te ve htawˇ, yawˇ awˬ to htaꞈ dawˇ law chehˇ sheˍ leh awˬ gʼaˇ maˇ nuˇ. w23.09 22 ¶8

A shu yawˇ awˬ to htaꞈ hkʼa dehꞈ chaˬ nyi ve lehˬ, hkʼaˬ teˇ kaˬ lo pa cawˇ ve htaꞈ mawˬ tuˬ yoˬ. Yaꞈ hkʼaˇ, awˬ gʼaˇ taˇ nuˇ. ‘Jawˇ mawˇ Yeˍsuˆ ha kʼaˉ puiˉ jaˇ’ leh nawˬ ve te hkʼaˇ dawˇ hkʼaˇ daꞈ la tuˬ ga laˇ gʼa ve yoˬ. (1 Peˍ 2:3) Tcuh yaˇ Peˍtruˆ ngaˬ hui htaꞈ ka tiꞈ te laˇ ve, ‘Gʼuiˬ sha lehˬ, nawˬ hui htaꞈ biˇ la piˇ tuˬ yoˬ.’ Awˉ lawˉ htaˇ Peˍtruˆ yawˇ Yeˍsuˆ awˬ paˇ lo gʼa chehˇ tuˬ maˇ keunˍ tehꞈ dawˇ ve yoˬ. (Luˉ 5:8) Yaꞈ hkʼaˇ, haꞈ pehnˇ ve hkʼaw Yaˬhoˉvaˬ leh Yeˍsuˆ ga laˇ tcuh ve pa taw, yawˇ ka tiꞈ yeˬ ve hkʼaw Yeˍsuˆ awˬ hkʼaˇ suh caˉ leh gʼaꞈ kʼai gʼa ve yoˬ. Chi htaꞈ pa taw, Yaˬhoˉvaˬ Peˍtruˆ htaꞈ ‘ngaˬ hui ve Jawˇ mawˇ leh Htaiˍ hkʼawꞈ paˍ Yeˍsuˆ Hkriꞈ ve co co taiˍ taiˍ yeˬ ve mvuhˇ miˬ awˬ hkʼaw lo gʼa loꞈ˗e tuˬ gu taˍ laˇ tuˬ yoˬ.’ (2 Peˍ 1:11) Chi lehˬ daꞈ jaˇ ve laꞈ shawnˍ hpehꞈ ve yoˬ. Nawˬ Peˍtruˆ hkʼa shuˍ awˬ gʼaˇ maˇ nuˇ leh Yaˬhoˉvaˬ nawˬ htaꞈ maˍ laˇ tcuh ve kʼo, nawˬ kaꞈ co co taiˍ taiˍ ve a shaꞈ laꞈ shawnˍ gʼa tuˬ yoˬ. Peˍtruˆ kʼoˆ ve, ‘nawˬ hui yonˍ ve pa taw, nawˬ hui htaiˍ hkʼawꞈ ve htaꞈ gʼa ve yoˬ.’—1 Peˍ 1:9. w23.09 31 ¶16-17

Oˇ htaˇ teˇ co˗e ve daꞈ kehˬ ve aˉ po kʼo awˬ baˬ hpawˇ lo ve koˇ caˉ ko taˍ leh paw hkuˇ ceh tiˉ choˬ kaˬ lo kanˉ te gʼa ve yoˬ. Choˬ kaˬ lo tuˉ tanˇ kuiˬ hkʼoˆ lo kuiˇ te taˍ ve tuˉ tanˇ kuiˬ cawˬ leh daꞈ kehˬ ve aˉ po kʼo hkʼaw kanˉ maˇ te sheˍ htaˇ, kuiˇ te taˍ ve hkehˇ pe le lonˉ hkʼaw paw hkuˇ teˇ hpaˍ laꞈ sheh hkui sheh gʼa tsuhˇ sheˍ ve yoˬ. (Tawˆ 30:17-20; 40:6-8) Chi beuꞈ teˇ co˗e leuˆ yuˬ taˍ ve chaw miˬ guiˬ hkʼoˆ lo co ha hpawˇ ve bon yehˬ lonˉ awˬ hkʼaw hpawˇ lo ka tiꞈ yeˬ ve hkʼaw kanˉ gʼa te sheˍ ve yoˬ. Daꞈ kehˬ ve aˉ po kʼo hkʼaw leh bon yehˬ lonˉ hkʼaw ve hkehˇ pe le lonˉ lehˬ, Hkriꞈ yaˇ teˇ gʼaˇ le le awˬ liˇ awˬ hkʼaˇ daꞈ ve hkʼaw haꞈ shaˉ leh co ha hpawˇ hkʼaˬ htaˆ kaꞈ yeˬ chehˇ tuˬ shaˍ tiꞈ piˇ ve yoˬ. Hkʼe kʼo, “chaw awˬ moˍ lonˉ” yawˇ hui Gʼuiˬ sha htaꞈ hkʼaˬ kaˬ lo oˉ kʼoˍ pui ve le? Tcuh yaˇ Yoˇhanˬ mawˬ ve yawˇ hui lehˬ, ‘kaw jaw awˬ gʼuˇ suhˍ bon yehˬ lonˉ awˬ hkʼaw lo tanˇ hkuinˇ tanˇ vanˇ Gʼuiˬ sha ve kanˉ htaꞈ te chehˇ ve yoˬ.’ Chi htaꞈ pa taw, chaw awˬ moˍ lonˉ lehˬ co ha hpawˇ ve bon yehˬ lonˉ awˬ baˬ hpawˇ lo Gʼuiˬ sha htaꞈ oˉ kʼoˍ pui chehˇ ve yoˬ. (Hpeuꞈ 7:9, 13-15) Yaˬhoˉvaˬ lehˬ, co ha hpawˇ ve bon yehˬ lonˉ hkʼaw ngaˬ hui htaꞈ oˉ kʼoˍ pui tcuh laˇ ve awˬ hpfuhˇ shiˍ jaˇ. w23.10 28-29 ¶15-16

Ngaˬ hui awˬ gʼaˇ cawˬ la tuˬ Yaˬhoˉvaˬ nyi haꞈ shaˉ paˍ htaꞈ cuˇ ve yoˬ. (Isy 32:1, 2) Chi htaꞈ pa taw, nawˬ dawˇ haˍ ve kʼo, nawˬ hkʼaˬ hkʼe dawˇ haˍ ve nyi haꞈ shaˉ paˍ htaꞈ kʼoˆ maˍ piˇ leh, yawˇ ga laˇ tuˬ kʼoˆ laˇ htaˇ haꞈ yuˬ sheˍ. Nawˬ awˬ gʼaˇ cawˬ la tuˬ Yaˬhoˉvaˬ lehˬ yawˇ hui htaꞈ yehˇ ve yoˬ. Liꞈ hpu hkʼaw ve dawˇ law kuiˬ ngaˬ hui awˬ gʼaˇ cawˬ tuˬ te laˇ gʼa ve yoˬ. Ngaˬ hui miˬ guiˬ hkʼoˆ lo, maˇ heˆ leh mvuhˇ naw ma hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve yoˬ. (Roˉ 4:3, 18, 19) Dawˇ law kuiˬ lehˬ, ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ ga laˇ ve, daꞈ ve awˬ lawn sha tanˇ hto toˇ tuˬ ga laˇ ve, leh Hkriꞈ yaˇ awˬ moˍ hkʼaw awˬ vuiˬ teˇ hpaˍ htaꞈ te gʼa tuˬ kaꞈ ga laˇ ve yoˬ. (1 Hteˇ 1:3) Dawˇ law kuiˬ chi hkʼe ve, Pawˇluꞈ awˬ gʼaˇ cawˬ tuˬ kaꞈ ga piˇ gʼa ve yoˬ. Yawˇ “nyiˉ tiˍ taˍ laˇ ve”, “dawˇ maˇ tawˆ ve”, “fawˉ mehˍ laˇ ve” leh “shu dawˆ baˬ laˇ ve” suh la paˇ neˇ ve kaꞈ gʼa hpuˇ ve yoˬ. (2 Kawˇ 4:8-10) Pawˇluꞈ awˬ gʼuˇ suhˍ hpawˇ yawˇ ve dawˇ law kuiˬ htaꞈ hkʼaˬ htaˆ kaꞈ dawˇ nyi ve pa taw, awˬ gʼaˇ cawˬ ve yoˬ. (2 Kawˇ 4:16-18) Pawˇluꞈ awˬ gʼuˇ suhˍ hpawˇ mvuhˇ naw ma hkʼoˆ lo ve dawˇ law kuiˬ htaꞈ hkʼaˬ htaˆ kaꞈ dawˇ nyi chehˇ ve yoˬ. Dawˇ law kuiˬ chi ve htaꞈ Pawˇluꞈ dawˇ nyi ve pa taw, “teˇ nyi peuˬ teˇ nyi” awˬ gʼaˇ kʼawꞈ cawˬ la ve yoˬ. w23.10 15-16 ¶14-17

Bon lawˬ htaˇ, ngaˬ hui ve bon lawˬ hkawˇ htaꞈ Yaˬhoˉvaˬ chi teˇ hkui gʼa hkʼawꞈ laˇ cawˇ ve tehꞈ ngaˬ hui dawˇ ve yoˬ hehˉ. Yaꞈ hkʼaˇ, Yaˬhoˉvaˬ ngaˬ hui htaꞈ hkʼaˬ hkʼe htaˇ ga laˇ cawˇ ve tehꞈ yawˇ shiˍ ve htaꞈ ngaˬ hui maˇ leunˇ cawˇ. (Heˍ 4:16) Ngaˬ hui lawˬ taˍ ve hkʼe laꞈ haˉ maˇ gʼa ve kʼo, ‘maˇ gʼa’ sheˍ tehꞈ Yaˬhoˉvaˬ kʼoˆ laˇ chehˇ ve hkʼe hpehꞈ ve tehꞈ ngaˬ hui dawˇ ve yoˬ. Yaꞈ hkʼaˇ, ‘chi teˇ hkui maˇ heˆ’ tehꞈ yawˇ kʼoˆ laˇ chehˇ ve yoˬ. Tawˇ pa haˉ te kʼo, awˬ viˉ awˬ nyi yaˇ nehˬ teˇ gʼaˇ Yaˬhoˉvaˬ yawˇ htaꞈ gu na˗e laˇ tuˬ lawˬ ve yoˬ. Yaꞈ hkʼaˇ, yawˇ maˇ hkehnˇ la sheˍ. Yaˬhoˉvaˬ yawˇ htaꞈ gu na˗e piˇ ve kʼo, yawˇ Yaˬhoˉvaˬ ve kanˉ te ve lehˬ, yawˇ naˬ ve htaꞈ gu na˗e laˇ tcuh gaˇ ve tehꞈ Saˍtanˍ kʼoˆ ve yoˬ. (Yb 1:9-11; 2:4) Chi hkʼoˆ kaꞈ, naˬ ve gawˬ ve teˇ ceuˬ le le htaꞈ Yaˬhoˉvaˬ gu na˗e laˇ tuˬ yoˬ tehꞈ yawˇ tinˍ taˍ ve awˬ yanˇ htaꞈ ngaˬ hui shiˍ ve yoˬ. (Isy 33:24; Hpeuꞈ 21:3, 4) Oˇ ve teˇ yanˇ maˇ gaˬ sheˍ htaˇ, yawˇ anˇ tuˬ te leh ngaˬ hui htaꞈ gu na˗e laˇ tuˬ tehꞈ maˇ dawˇ law. Chi htaꞈ pa taw, awˬ viˉ awˬ nyi yaˇ nehˬ chi ve yawˇ ve bon lawˬ hkawˇ kʼawꞈ pa ve yoˬ. Yawˇ Yaˬhoˉvaˬ ve kanˉ ka tiꞈ yeˬ ve hkʼaw te gʼa tuˬ, yawˇ nyi ma gawˬ lehˍ cawˬ leh naˬ chehˇ ve htaꞈ awˬ gʼaˇ cawˬ leh yeunˇ hkanˍ gʼaˇ tuˬ, Yaˬhoˉvaˬ ga laˇ tuˬ lawˬ ve yoˬ. w23.11 24 ¶13

Sanˍsonˍ yawˇ te yaꞈ jaˇ ve htawˇ, yawˇ awˬ gʼaˇ maˇ nuˇ. Yaˬhoˉvaˬ loˍ ve hkʼe yawˇ Hpiˇliˇtiˆ chaw htaꞈ te luˬ tuˬ, awˬ yanˇ ca chehˇ sheˍ ve yoˬ. (Suhˉ 16:28-30) “Hpiˇliˇtiˆ chaw chi teˇ hpaˍ htaꞈ ngaˬ kʼawꞈ te hkʼawꞈ piˇ hpehꞈ tuˬ” Sanˍsonˍ Yaˬhoˉvaˬ geh bon lawˬ ve yoˬ. Sanˍsonˍ ve bon lawˬ hkawˇ Yaˬhoˉvaˬ hkʼawꞈ piˇ ve lehˬ, yawˇ htaꞈ awˬ gʼaˇ teˇ pawˆ kʼawꞈ cawˬ la piˇ ve yoˬ. Chi teˇ pawˆ lehˬ teˇ pawˆ le le aꞈ kehˉ Hpiˇliˇtiˆ chaw htaꞈ tiˇ pehˍ piˇ maˇ jaˇ ve yoˬ. Sanˍsonˍ yawˇ te yaꞈ ve pa taw, luˬ ve sheˆ ve htaꞈ gʼa hpuˇ ve yoˬ. Yaꞈ hkʼaˇ, yawˇ Yaˬhoˉvaˬ ve a loˍ htaꞈ gʼaꞈ te tuˬ, dawˇ law chehˇ sheˍ ve yoˬ. Ngaˬ hui kaꞈ hkʼa shuˍ, ngaˬ hui te yaꞈ leh deˇ maˍ laˇ ve, maˇ heˆ leh awˬ vuiˬ teˇ hpaˍ maˇ gʼa te˗o htaˇ, ngaˬ hui kaꞈ caˉ leh awˬ gʼaˇ maˇ nuˇ cawˇ ve yoˬ. Leh Yaˬhoˉvaˬ ngaˬ hui htaꞈ dawˇ law chehˇ sheˍ ve tehꞈ tawnˇ taˍ cawˇ ve yoˬ. (Chiˇ 103:8, 9) Ngaˬ hui te yaꞈ ve htawˇ, Yaˬhoˉvaˬ Sanˍsonˍ htaꞈ yehˇ sheˍ ve hkʼe, ngaˬ hui htaꞈ kaꞈ yehˇ sheˍ ve yoˬ. w23.09 6 ¶15-16

Nawˬ yeunˇ hkanˍ ve kʼo, nawˬ Gʼuiˬ sha nyi hkʼaˇ suh ve chaw hpehꞈ tuˬ yoˬ. Yaꞈ hkʼaˇ, chi ve lehˬ nawˬ tuꞈ ve hkanˍ ve leh shoꞈ shaꞈ ve laiˉ ceuˬ gʼa hpuˇ ve htaꞈ, Yaˬhoˉvaˬ nyi hkʼaˇ suh ve tehꞈ kʼoˆ gaˇ ve maˇ heˆ. Gʼuiˬ sha nyi hkʼaˇ suh ve awˬ ceuˬ lehˬ nawˬ hpehꞈ ve yoˬ. Chi hkʼe shiˍ htaˇ nawˬ awˬ gʼaˇ gʼa jaˇ ve maˇ heˆ laˇ? (Chiˇ 5:12) Aˍbraˍhanˍ tuꞈ ve hkanˍ ve htaꞈ gʼa hpuˇ ve htawˇ, yawˇ yeunˇ hkanˍ gʼaˇ ve yoˬ. Chi ve lehˬ yawˇ Yaˬhoˉvaˬ nyi hkʼaˇ suh tuˬ te piˇ ve yoˬ. Yawˇ Gʼuiˬ sha nyi ma cawˇ ve chaw hpehꞈ leh Gʼuiˬ sha ve awˬ chawˇ hpehꞈ ve yoˬ. (Awˬ 15:6; Roˉ 4:13, 22) Ngaˬ hui kaꞈ chi ve hkʼa shuˍ shuˍ te gʼa ve yoˬ. Ngaˬ hui Yaˬhoˉvaˬ ve kanˉ te maˇ jaˇ ve maˇ heˆ leh daꞈ ve awˬ vuiˬ cawˬ ve htaꞈ pa taw, yawˇ nyi hkʼaˇ suh tuˬ te piˇ ve maˇ heˆ. Yaꞈ hkʼaˇ, ngaˬ hui ka tiꞈ yeˬ ve hkʼaw yeunˇ hkanˍ ve pa taw, yawˇ nyi hkʼaˇ suh ve yoˬ. Ngaˬ hui a shaꞈ hkʼaˬ hkʼe ma gaˬ˗oˬ ve, a shaꞈ teꞈ hkʼaˇ hkʼaˬ hkʼe hpehꞈ ve, maˇ heˆ leh puiˉ ve cheuˬ ve hkʼaˬ hkʼe taw te gʼa ve htawˇ maˇ kʼoˆ, ngaˬ hui teˇ gʼaˇ le le yeunˇ hkanˍ gʼaˇ ve yoˬ. Chi teˇ hkui nawˬ tuꞈ ve hkanˍ ve gʼa hpuˇ chehˇ leh ka tiꞈ yeˬ ve hkʼaw yeunˇ hkanˍ chehˇ˗aw laˇ? Chi hkʼe te chehˇ ve kʼo, Yaˬhoˉvaˬ nawˬ htaꞈ nyi hkʼaˇ suh jaˇ ve tehꞈ yonˍ sheˍ. Chi hkʼe shiˍ ve lehˬ ngaˬ hui ve dawˇ law kuiˬ htaꞈ hkʼa dehꞈ yonˍ gʼa tuˬ ga laˇ ve yoˬ. w23.12 11 ¶13-14

Awˬ viˉ awˬ nyi hawˉ hkʼaˆ na leh tawˇ hkʼa dehꞈ yaw daꞈ gʼa tcuh cawˇ ve yoˬ. Chi kʼoˆ gaˇ ve lehˬ hkʼa dehꞈ na gʼa ve chaw hpehꞈ leh, shu ve dawˇ hkʼaˇ htaꞈ hkʼa dehꞈ na gʼa ve yoˬ. (Tawˇ 20:5) Nawˬ tawˇ yaw piˇ ve chaw htaꞈ, tawˇ yaw ve awˬ hkawˇ, mehˆ hpfuhˇ hkʼaˬ hkʼe kʼai ve, leh te tawˆ la ve htaꞈ gʼa chaˬ nyi ve yoˬ. Nawˬ maˇ gʼa mawˬ daꞈ leh tawˇ maˇ gʼa yaw daꞈ ve kʼo, nawˬ oˇ hkʼe te chaˬ nyi maˇ gʼa taˬ. Nawˬ awˬ nu ve chaw geh in˗teu˗neꞈ hkʼaw caˉ daꞈ tuˬ, i˗me, maˇ heˆ leh liꞈ bvuhꞈ feu piˇ ve kʼo, na leh tawˇ hkʼa dehꞈ yaw daꞈ maˇ gʼa taˬ. Chi htaꞈ pa taw, awˬ hkʼeun chi ve teˇ hpaˍ htaꞈ yehˇ ve aꞈ kehˉ nawˬ mawˬ daꞈ leh tawˇ yaw daꞈ sheˍ. (2 Yoˇ 12) Chi hkʼoˆ kaꞈ, co ha hpawˇ ve chaw mawˇ hpehꞈ ve lehˬ, a shu yawˇ awˬ to leh yehˬ kʼa htaꞈ hu gʼa ve yoˬ. (1 Tiˆ 5:8) Nawˬ kanˉ cawˬ tuˬ teˇ ceuˬ ceuˬ htaꞈ gʼa henˇ cawˇ ve yoˬ. (Tcuh 18:2, 3; 20:34; Efs 4:28) Chi hkʼoˆ kaꞈ, nawˬ kanˉ te htaˇ coˇ caˇ leh te ve kʼo, nawˬ kaiˬ leh kanˉ htaꞈ a yeˇ hkʼa deh yuˬ leh te peuˬ ve htaꞈ shu mawˬ gʼa ve yoˬ. Nawˬ chi hkʼe te ve kʼo, kanˉ ca sha leh hkʼaˬ htaˆ kaꞈ gʼa te tuˬ yoˬ. w23.12 27-28 ¶12-13

Liꞈ hpu hkʼaw ‘Yaˬhoˉvaˬ ve awˬ nyi’ tehꞈ kʼoˆ ve lehˬ, yawˇ ve canˇ paˍ htaꞈ te luˬ leh yawˇ ve chaw htaꞈ ponˬ piˇ htaˇ ve htaꞈ kʼoˆ gaˇ ve yoˬ. Oˇ htaˇ teˇ co˗e Yaˬhoˉvaˬ ve awˬ nyi hkʼaw chaw teˇ chaw ceuˬ htaꞈ te luˬ piˇ ve yoˬ. (Isy 13:1, 6; Ysk 13:5; Zeˍ 1:8) Yaꞈ hkʼaˇ, ngaˬ hui ve awˬ co˗e ‘Yaˬhoˉvaˬ ve awˬ nyi’ lehˬ Uiˍ ve Baˍbuˍlonˍ htaꞈ tanˬ te luˬ piˇ leh Aˍmaˍgeˍdonˍ hkʼaw kaꞈ te luˬ piˇ tuˬ yoˬ. Ngaˬ hui Yaˬhoˉvaˬ ve “awˬ nyi” htaꞈ gʼa ponˬ tuˬ chi teˇ hkui kaꞈ gʼa gu hehnˇ taˍ cawˇ ve yoˬ. “Tuꞈ jaˇ hkanˍ jaˇ ve” awˬ yanˇ htaˇ, “hkʼa dehꞈ gu hehnˇ taˍ˗oꞈ” tehꞈ Yeˍsuˆ ngaˬ hui htaꞈ maˍ laˇ ve yoˬ. Chi ngaˬ hui hkʼaˬ htaˆ kaꞈ gu hehnˇ taˍ cawˇ ve tehꞈ kʼoˆ gaˇ ve yoˬ. (Maꞈ 24:21; Luˉ 12:40) Pawˇluꞈ htaꞈ dawˇ pawnˍ piˇ leh Hteˇsaˍlawˇniˆ venˇ lo chehˇ ve awˬ viˉ awˬ nyi htaꞈ liꞈ awˉ lawˉ teˇ kʼoˆ bvuhꞈ piˇ htaˇ, awˬ viˉ awˬ nyi oˇ kaˬ lo chehˇ ve Yaˬhoˉvaˬ ve awˬ nyi gaˬ la tuˬ gu hehnˇ taˍ gʼa tuˬ yawˇ laiˉ ceuˬ htaꞈ tehˆ maˍ piˇ ve yoˬ. Oˇ ve teˇ yanˇ Yaˬhoˉvaˬ ve awˬ nyi maˇ gaˬ la sheˍ ve tehꞈ Pawˇluꞈ shiˍ ve htawˇ, chi shawˉ pawˍ gaˬ la tuˬ ve hkʼa shuˍ, awˬ viˉ awˬ nyi oˇ kaˬ lo chehˇ ve chaw htaꞈ gu hehnˇ taˍ tcuh ve yoˬ. (2 Hteˇ 2:1-3) Ngaˬ hui kaꞈ Pawˇluꞈ beˆ maˍ laˇ ve htaꞈ yuˬ yehˇ gʼa ve yoˬ. w23.06 8 ¶1-2

1978 hkʼawꞈ htaˇ Jaˬpanˍ mvuhˇ miˬ To˗ki venˇ lo yehˬ lonˉ 60 htehꞈ te ve yoˬ. Miˬ hiˆ la ve kʼo yehˬ lonˉ chi maˇ paˆ˗e tuˬ ve hehˉ laˇ tehꞈ chaw laiˉ gʼaˇ mawˬ htaˇ htawˇ dawˇ nawˬ dawˇ cawˬ ve yoˬ. To˗ki venˇ lo miˬ teˇ hkui teˇ hkui hiˆ ve pa taw, yehˬ lonˉ chi ve maˇ paˆ˗e tuˬ yehˬ lonˉ te tuˬ awˬ han shawehˇ ve chaw awˬ hkʼaˇ hkʼaˬ hkʼe gu ve le? Miˬ hiˆ la htaˇ yehˬ lonˉ chi ve maˇ gʼa paˆ ce la tuˬ yehˬ te ve hpawˇ shawehˇ laˇ paˍ hkʼa dehꞈ te tuˬ shawehˇ laˇ ve yoˬ. Hkʼe kʼo chi beuꞈ teˇ co˗e ve Hkriꞈ yaˇ yehˬ lonˉ chi htaꞈ hkʼaˬ hkʼe shuˍ ve le? Hkriꞈ yaˇ lehˬ yonˍ yeˬ ve hpawˇ keunˍ daꞈ cawˇ daꞈ ve chaw gʼa hpehꞈ ve yoˬ. Yawˇ lehˬ Yaˬhoˉvaˬ ve awˬ liˇ tawˇ hkawˇ leh awˬ liˇ awˬ hkʼaˇ htaꞈ hkʼa dehꞈ gʼa yonˍ yeˬ cawˇ ve yoˬ. Yawˇ “na yuˬ puiˉ ve” chaw gʼa hpehꞈ ve yoˬ. Yaꞈ hkʼaˇ, teˇ ceuˬ ceuˬ gʼa hpuˇ la htaˇ yawˇ ‘awˬ hkʼaˇ ca puiˉ ve’ chaw gʼa hpehꞈ ve yoˬ. (Yaˍ 3:17) Hkriꞈ yaˇ keunˍ daꞈ cawˇ daꞈ ve chaw hpehꞈ ve lehˬ, teˇ ceuˬ htaꞈ ceh tiˉ vawˆ tinˍ taˍ ve, maˇ heˆ leh teˇ lawn le le htaꞈ haꞈ yuˬ ve maˇ heˆ. w23.07 14 ¶1-2

Saˍtanˍ lawˇ nyi piˇ ve laiˉ ceuˬ htaꞈ yawˇ gʼa tawˍ daꞈ ve yoˬ. Teˇ pawˆ pawˆ kʼo, yawˇ Yaˬhoˉvaˬ htaꞈ ka tiꞈ maˇ yeˬ tuˬ Saˍtanˍ kʼoˆ piˇ ve yoˬ. (Maꞈ 4:1-11) Saˍtanˍ chi hkʼe te ve lehˬ, Yeˍsuˆ ve a shaꞈ htaiˍ hkʼawꞈ laˇ maˇ gʼa tuˬ, venˇ baˆ te yaꞈ tcuh gaˇ ve yoˬ. Yeˍsuˆ miˬ guiˬ hkʼoˆ lo Gʼuiˬ sha ve kanˉ te htaˇ, yawˇ tuꞈ ve hkanˍ ve laiˉ ceuˬ gʼa hpuˇ ve yoˬ. Tawˇ pa haˉ te kʼo, yawˇ fawˉ ve mehˍ ve gʼa hpuˇ leh, yawˇ htaꞈ kaꞈ shu tiˇ pehˍ gaˇ ve yoˬ. (Luˉ 4:28, 29; 13:31) Yawˇ ve awˬ laꞈ gʼawˇ hui maˇ biˇ ve htaꞈ kaꞈ yawˇ gʼa yeunˇ hkanˍ sheˍ ve yoˬ. (Mk 9:33, 34) Leh yawˇ htaꞈ suhˉ jehˬ piˇ ve, kʼoˆ guiˇ gʼuiˬ guiˇ piˇ ve, ciˍ yanˍ piˇ htaˇ, yaꞈ taw jaˇ leh naˬ jaˇ ve hkʼaw tiˇ pehˍ piˇ tuˬ suhˉ jehˬ cheˆ piˇ ve yoˬ. (Heˍ 12:1-3) Chi hkʼe ceh tiˉ maˇ heˆ. Yeˍsuˆ suh˗e yoˬ te htaˇ, Yaˬhoˉvaˬ yawˇ htaꞈ maˇ ga piˇ leh gʼa yeunˇ hkanˍ sheˍ ve yoˬ. (Maꞈ 27:46) Yeˍsuˆ ngaˬ hui htaꞈ htaiˍ hkʼawꞈ laˇ tuˬ awˬ pon, yawˇ tuꞈ ve hkanˍ ve laiˉ ceuˬ gʼa hpuˇ ve htaꞈ ngaˬ hui gʼa mawˬ ve yoˬ. Yawˇ ngaˬ hui awˬ pon chi hkʼe taw taw te laˇ ve htaꞈ shiˍ htaˇ, ngaˬ hui yawˇ htaꞈ kʼawꞈ haꞈ maˇ la ve yoˬ. w24.01 10-11 ¶7-9

Yeunˇ hkanˍ ve chaw hpehꞈ ve lehˬ, ngaˬ hui awˬ nu ve chaw geh cawˇ daꞈ hawˍ daꞈ tuˬ ga laˇ gʼa ve yoˬ. Chi ve awˬ nu ve chaw tawˇ yaw htaˇ, ngaˬ hui hkʼa dehꞈ na taˍ piˇ tuˬ ga laˇ gʼa ve yoˬ. (Yaˍ 1:19) Chi hkʼoˆ kaꞈ, ngaˬ hui yeunˇ hkanˍ ve chaw hpehꞈ ve kʼo, ngaˬ hui awˬ nu ve chaw geh awˬ chawˇ te gʼa ve yoˬ. Ngaˬ hui nyi ma maˇ sha htaˇ, kʼoˆ ve leh maˇ daꞈ ve awˬ ceuˬ maˇ te. Awˬ nu ve chaw ngaˬ hui nyi ma naˬ tuˬ te laˇ ve htawˇ, laꞈ haˉ maˇ beuꞈ leh maˇ te hkʼawꞈ. Yaꞈ hkʼaˇ, ngaˬ hui “teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ.” (Kawˇ 3:12, 13) Yeunˇ hkanˍ ve chaw hpehꞈ ve lehˬ, ngaˬ hui hkʼa dehꞈ dawˇ cheˆ gʼa tuˬ ga laˇ ve yoˬ. Ngaˬ hui yeunˇ hkanˍ ve chaw hpehꞈ ve kʼo, ngaˬ hui hkʼa dehꞈ maˇ dawˇ nyi sheˍ htaˇ, haˆ maˇ dawˇ cheˆ. Hkʼaˬ hkʼe dawˇ cheˆ gʼa tuˬ ngaˬ hui awˬ yanˇ yehˇ ve hkʼaw hpfuhˆ nyi leh, hkʼa dehꞈ dawˇ nyi sheˍ ve yoˬ. Leh daꞈ jaˇ ve awˬ ceuˬ htaꞈ leuˆ yuˬ tuˬ yoˬ. Tawˇ pa haˉ te kʼo, ngaˬ hui kanˉ ca ve, awˬ nu ve chaw kanˉ te tcuh laˇ tuˬ kʼoˆ laˇ ve, kanˉ chi ve htaꞈ te tuˬ yoˬ tehꞈ laꞈ haˉ kʼoˆ piˇ tuˬ ve laˇ? Yaꞈ hkʼaˇ, ngaˬ hui yeunˇ hkanˍ ve chaw hpehꞈ ve kʼo, maˇ dawˇ cheˆ sheˍ htaˇ awˉ lawˉ dawˇ nyi sheˍ ve yoˬ. Kanˉ chi ve ngaˬ hui ve yehˬ kʼa htaꞈ heuˆ la kuiˬ hkʼaˬ hkʼe cawˬ ve, leh ngaˬ hui Yaˬhoˉvaˬ geh meuˆ daꞈ ve htaꞈ heuˆ la kuiˬ cawˬ sheˍ ve laˇ tehꞈ, dawˇ nyi sheˍ ve yoˬ. Chi htaꞈ pa taw, ngaˬ hui yeunˇ hkanˍ ve chaw hpehꞈ ve kʼo, chi ngaˬ hui dawˇ cheˆ htaˇ maˇ yaꞈ tuˬ ga laˇ gʼa ve yoˬ. w23.08 22 ¶8-9

Nawˬ maˇ cawˇ ve awˬ ceuˬ htaꞈ gʼa tawˍ daꞈ ve pa taw, awˬ gʼaˇ nuˇ ve kʼo nawˬ Yaˬhoˉvaˬ htaꞈ awˬ to chiˇ aꞈ piˇ htaˇ, ka tiꞈ te taˍ ve htaꞈ dawˇ nyi sheˍ. Awˬ lawn chi ve htaꞈ dawˇ nyi ve nawˬ yonˍ yeˬ tuˬ te laˇ leh, beˬ ve lawˇ ve htaꞈ tawˍ daꞈ gʼaˇ tuˬ kaꞈ ga laˇ ve yoˬ. Chi hkʼaˬ hkʼe ga laˇ gʼa ve le? Nawˬ Yaˬhoˉvaˬ htaꞈ awˬ to chiˇ aꞈ piˇ htaˇ, nawˬ a shu yawˇ ve a loˍ awˬ hkʼaˇ suh maˇ te˗o ve yoˬ. Chi kʼoˆ gaˇ ve lehˬ, nawˬ Yaˬhoˉvaˬ nyi ma luˬ ve awˬ ceuˬ htaꞈ maˇ te leh yawˇ maˇ dawˇ cawˇ ve awˬ ceuˬ htaꞈ kaꞈ te tuˬ maˇ dawˇ ve yoˬ. (Maꞈ 16:24) Chi htaꞈ pa taw, nawˬ beˬ ve lawˇ ve htaꞈ gʼa hpuˇ htaˇ, nawˬ hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ tuˬ leuˆ yuˬ˗oˬ ve pa taw, maˇ daꞈ ve awˬ ceuˬ htaꞈ maˇ te tehꞈ dawˇ ve yoˬ. Nawˬ Yaˬhoˉvaˬ nyi hkʼaˇ suh tuˬ te piˇ tuˬ yoˬ tehꞈ dawˇ teh taˍ ve yoˬ. Nawˬ chi hkʼe te ve kʼo, beˬ ve lawˇ ve gʼa hpuˇ jaˇ ve htawˇ, Yawˇbaˆ hkʼa shuˍ te gʼa ve yoˬ. Yaꞈ hkʼaˇ, Yawˇbaˆ kʼoˆ sheˍ ve, “ngaˬ suh htaˇ hkʼa gaˬ ka tiꞈ yeˬ tuˬ yoˬ!”—Yb 27:5. w24.03 9 ¶6-7

Yaˬhoˉvaˬ lehˬ ‘haꞈ pehnˇ ve Gʼuiˬ sha hpehꞈʼ leh ngaˬ hui geh chehˇ ve tehꞈ gʼa mawˬ ve yoˬ. (2 Kawˇ 13:11) Yaˬhoˉvaˬ ngaˬ hui teˇ gʼaˇ leh teˇ gʼaˇ htaꞈ a yeˇ yuˬ laˇ ve yoˬ. “Yawˇ ve haꞈ pehnˇ ve teˇ ceuˬ” ngaˬ hui htaꞈ peꞈ laˇ ve tehꞈ yonˍ gʼa ve yoˬ. (Chiˇ 32:10) Yaˬhoˉvaˬ ngaˬ hui htaꞈ haꞈ ve awˬ hkʼaˇ htaꞈ caˉ daꞈ ve ngaˬ hui hkʼa dehꞈ dawˇ nyi htaˇ, yawˇ ngaˬ hui htaꞈ dawˇ haˍ ve tehꞈ hkʼa dehꞈ yonˍ gʼa ve yoˬ. Chi ve ngaˬ hui yawˇ geh hkʼa dehꞈ meuˆ daꞈ tuˬ te laˇ ve yoˬ. Ngaˬ hui bon lawˬ ve hkʼaw teˇ lawn le le Yaˬhoˉvaˬ htaꞈ kʼoˆ maˍ piˇ gʼa ve yoˬ. Yawˇ ngaˬ hui htaꞈ hkʼaˬ hkʼe taw haꞈ tcuh gaˇ ve kaꞈ kʼoˆ piˇ leh, ngaˬ hui aˬ htoꞈ ma awˬ lawn dawˇ haˍ ve kaꞈ kʼoˆ piˇ gaˇ ve yoˬ. Yaˬhoˉvaˬ ngaˬ hui ve dawˇ hkʼaˇ htaꞈ na gʼa leh ga laˇ gaˇ jaˇ ve tehꞈ ngaˬ hui yonˍ gʼa ve yoˬ. (Chiˇ 145:19) Kaˆ jaˇ ve awˬ nyi htaˇ, ngaˬ hui ve awˬ to lehˬ lehˬ cawˬ tuˬ aˬ miˍ lehˬ gaˇ ve yoˬ. Chi ve hkʼa shuˍ shuˍ, ngaˬ hui a shaꞈ teꞈ kuiˬ hkʼaw shoꞈ shaꞈ ve leh tuˬ ve hkanˍ ve gʼa hpuˇ htaˇ, Yaˬhoˉvaˬ ngaˬ hui htaꞈ ga laˇ gʼa tuˬ ngaˬ hui yawˇ awˬ paˇ lo chehˇ gaˇ ve yoˬ. Chi htaꞈ pa taw, Yaˬhoˉvaˬ haꞈ pehnˇ ve nawˬ gawˬ lehˍ ve cawˬ tuˬ te laˇ ve htaꞈ ha lehˬ sheˍ. Teˇ gʼaˇ le le haꞈ pehnˇ ve chi htaꞈ haꞈ yuˬ leh ‘ngaˬ Yaˬhoˉvaˬ htaꞈ haꞈ veʼ tehꞈ kʼoˆ sheˍ!—Chiˇ 116:1. w24.01 31 ¶19-20

Gʼuiˬ sha ve awˬ meh Yaˬhoˉvaˬ meh ve tehꞈ Yeˍsuˆ awˬ nu ve chaw htaꞈ ceh tiˉ kʼoˆ piˇ ve maˇ heˆ. Awˬ tehˬ kʼo, Yeˍsuˆ ve awˬ co˗e htaˇ, Yuˇdaꞈ chaw lehˬ Gʼuiˬ sha aˬ htoꞈ ma meh ve htaꞈ shiˍ˗oˬ ve yoˬ. Yaꞈ hkʼaˇ, “Yaˇ hpu tiˍ lehˬ, Awˬ pa awˬ lawn hkʼa tawˍ lehˆ hpeuꞈ maˍ laˇ peuˬ.” (Yoˇ 1:17, 18) Tawˇ pa haˉ te kʼo, Heˍbrehˇ ve Liꞈ hpu hkʼaw kʼoˆ ve, Yaˬhoˉvaˬ lehˬ ha kʼaˉ puiˉ jaˇ ve Gʼuiˬ sha hpehꞈ ve yoˬ. (Tawˆ 34:5-7) Yaꞈ hkʼaˇ, Yeˍsuˆ lehˬ chi ve hkʼa tawˍ lehˆ hpeuꞈ maw laˇ tuˬ, mehˉ kʼai taˍ ve yaˇ paˍ ve awˬ lawn tawˇ pa haˉ tehˆ maˍ laˇ sheˍ ve yoˬ. Awˬ lawn chi ve htaꞈ Yeˍsuˆ kʼoˆ ve, ‘yaˇ paˍ vuiˇ kuiˬ lo kʼawꞈ la chehˇ ve htaꞈʼ awˬ pa gʼa mawˬ htaˇ, awˬ pa yawˇ htaꞈ kʼaˉ taˍ leh venˇ baˆ hpehˇ piˇ ve yoˬ. Yaˬhoˉvaˬ Gʼuiˬ sha lehˬ ha kʼaˉ puiˉ jaˇ ve tehꞈ awˬ lawn chi ngaˬ hui mawˬ tuˬ te laˇ ve yoˬ. (Luˉ 15:11-32) Yaˬhoˉvaˬ hkʼaˬ hkʼe hpehꞈ ve Yeˍsuˆ lehˬ chaw yaˇ mawˬ tuˬ hkʼa tawˍ lehˆ hpeuꞈ maw laˇ ve yoˬ. w24.02 10 ¶8-9

Tuꞈ ve hkanˍ ve gʼa hpuˇ htaˇ, yawˇ Yaˬhoˉvaˬ geh awˬ gʼaˇ gʼa ve kʼo, nyi ma sha jaˇ ve yoˬ. Hkʼe te leh, ngaˬ hui ha kʼaˉ puiˉ ve leh shu htaꞈ awˬ gʼaˇ piˇ puiˉ ve Gʼuiˬ sha htaꞈ hkʼaˬ hkʼe henˇ yuˬ gʼa tuˬ le? Te gʼa ve awˬ hkʼaˇ teˇ hkʼaˇ lehˬ, ngaˬ hui shu htaꞈ awˬ gʼaˇ piˇ gaˇ tuˬ te laˇ ve te hkʼaˇ dawˇ hkʼaˇ teˇ hpaˍ te jawˬ ve yoˬ. Te hkʼaˇ dawˇ hkʼaˇ chi teˇ hpaˍ aˬ htoꞈ ma cawˬ ve le? Ngaˬ hui awˬ viˉ awˬ nyi htaꞈ hkʼa dehꞈ haꞈ daꞈ leh “teˇ gʼaˇ leh teˇ gʼaˇ awˬ gʼaˇ piˇ daꞈ” tuˬ hkʼaˬ hkʼe ga laˇ gʼa ve le? (1 Hteˇ 4:18) Teˇ nyi le le daꞈ ve te hkʼaˇ dawˇ hkʼaˇ teˇ hpaˍ cawˬ tuˬ ngaˬ hui gʼa te jawˬ ve yoˬ. Tawˇ pa haˉ te kʼo, ha kʼaˉ puiˉ ve, awˬ viˉ awˬ nyi haꞈ daꞈ ve hkʼe haꞈ daꞈ ve, leh teˇ gʼaˇ leh teˇ gʼaˇ yawˆ yan daꞈ ve yoˬ. (Kawˇ 3:12; 1 Peˍ 3:8) Te hkʼaˇ dawˇ hkʼaˇ chi ve teˇ hpaˍ ngaˬ hui htaꞈ hkʼaˬ hkʼe ga laˇ gʼa tuˬ le? Ha kʼaˉ puiˉ ve ngaˬ hui cawˬ tuˬ te jawˬ leh, te hkʼaˇ dawˇ hkʼaˇ chi ve teˇ hpaˍ ngaˬ hui hkʼaˬ htaˆ kaꞈ cawˬ tcuh ve kʼo, a shu teˇ gʼaˇ tuꞈ ve hkanˍ ve gʼa hpuˇ chehˇ ve htaꞈ ngaˬ hui mawˬ leh awˬ gʼaˇ piˇ gaˇ ve yoˬ. Yeˍsuˆ kʼoˆ taˍ ve hkʼa shuˍ, “nyi ma awˬ hkʼaw lo hkʼa biˇ cawˬ ve hkʼe, mawꞈ kʼaw yaw tawˆ la ve yoˬ. Daꞈ ve chaw lehˬ, a shu yawˇ daꞈ ve awˬ ceuˬ doˆ taˍ kuiˬ awˬ hkʼaw lo daꞈ ve awˬ ceuˬ htaꞈ yuˬ tawˆ la ve yoˬ.” (Maꞈ 12:34, 35) Awˬ viˉ awˬ nyi tuꞈ ve hkanˍ ve gʼa hpuˇ chehˇ ve chaw htaꞈ ngaˬ hui awˬ gʼaˇ piˇ ve lehˬ, yawˇ htaꞈ haꞈ ve tehꞈ hpeuꞈ maw piˇ ve yoˬ. w23.11 10 ¶10-11

Liꞈ hpu hkʼaw tcuh kaˍ paˍ ve tawˇ hkawˇ htaꞈ ngaˬ hui na gʼa gaˇ ve kʼo, ga laˇ tuˬ gʼa lawˬ cawˇ ve yoˬ. Tawˇ pa haˉ chi htaꞈ dawˇ nyi sheˍ. Nawˬ maˇ guiˇ jaw kuiˬ lo ca guiˇ˗e ve kʼo, nawˬ ve awˬ chawˇ oˇ kaˬ lo ca guiˇ˗e jaw leh yawˇ hkʼa dehꞈ shiˍ ve, chi teˇ hkui nawˬ leh yawˇ hkʼaˬ kaˬ lo chehˇ taˍ ve kaꞈ shiˍ leh, yaꞈ kʼaw hkʼaˬ ve teˇ caˆ hkʼaˬ kaˬ lo kʼai ve kaꞈ shiˍ ve yoˬ. Nawˬ ve awˬ chawˇ chi teˇ gʼaˇ nawˬ geh teˇ geh ca guiˇ˗e ve ha lehˬ jaˇ tuˬ yoˬ hehˉ. Chi ve hkʼa shuˍ shuˍ, ngaˬ hui hkʼaˬ ve teˇ tawn lo chehˇ ve htaꞈ Yaˬhoˉvaˬ hkʼa dehꞈ shiˍ leh, awˬ gʼuˇ suhˍ hpawˇ aˬ htoꞈ ma hpehꞈ la tuˬ ve htaꞈ kaꞈ yawˇ hkʼa dehꞈ shiˍ ve yoˬ. Chi htaꞈ pa taw, tcuh kaˍ paˍ ve tawˇ hkawˇ htaꞈ na gʼa gaˇ ve kʼo, ngaˬ hui nyi ma nuˇ nehˬ leh Yaˬhoˉvaˬ gʼa ga laˇ tcuh ve yoˬ. (Daˍ 2:28; 2 Peˍ 1:19, 20) Awˬ pa awˬ e yaˇ htaꞈ haꞈ ve hkʼa shuˍ, Yaˬhoˉvaˬ lehˬ ngaˬ hui htaꞈ awˬ gʼuˇ suhˍ hpawˇ daꞈ ve leh ha lehˬ ve cawˬ tcuh gaˇ ve yoˬ. (Yrm 29:11) Yaꞈ hkʼaˇ, Yaˬhoˉvaˬ lehˬ chaw yaˇ hpehꞈ ve awˬ pa awˬ e htaꞈ maˇ shuˍ. Yaˬhoˉvaˬ lehˬ awˬ gʼuˇ suhˍ hpawˇ aˬ htoꞈ ma hpehꞈ la tuˬ leh, hkʼaˬ htaˆ kaꞈ cawˇ ve hkʼaw kʼoˆ laˇ gʼa ve yoˬ. A yeˇ uiˍ ve awˬ lawn aˬ htoꞈ ma ve hpehꞈ la tuˬ ve htaꞈ ngaˬ hui shiˍ tuˬ, Yaˬhoˉvaˬ lehˬ Liꞈ hpu hkʼaw tcuh kaˍ paˍ ve tawˇ hkawˇ maˇ maˇ cawˬ tcuh taˍ ve yoˬ.—Isy 46:10. w23.08 8-9 ¶3-4