Gʼuiˬ sha htaꞈ kawˆ leh yawˆ yan ve lehˬ leuˉ leh awˬ bon gʼa ve

1-2. Chi beuꞈ teˇ co˗e ngaˬ hui Lawˇtaˍ hkʼa shuˍ hkʼaˬ hkʼe gʼa hpuˇ ve le?

Chi beuꞈ teˇ co˗e miˬ guiˬ hkʼoˆ lo ve awˬ liˇ awˬ hkʼaˇ teˇ hpaˍ htaꞈ ngaˬ hui gʼa mawˬ htaˇ, ngaˬ hui Lawˇtaˍ hkʼa shuˍ dawˇ ve yoˬ. Yaˬhoˉvaˬ haiˬ ve htaꞈ maˇ dawˇ cawˇ ve pa taw, “chaw haiˬ teˇ hpaˍ chaꞈ chiˆ ve awˬ liˇ awˬ hkʼaˇ htaꞈ te ve pa taw, Lawˇtaˍ lehˬ dawˇ haˍ gaˇ haˍ jaˇ ve yoˬ.” (2 Peˍtruˆ 2:7, 8) Lawˇtaˍ Yaˬhoˉvaˬ htaꞈ yawˆ yan leh haꞈ jaˇ ve pa taw, yawˇ ve awˬ co˗e miˬ guiˬ yaˇ ve awˬ liˇ awˬ hkʼaˇ haiˬ jaˇ ve htaꞈ yawˇ maˇ gʼaꞈ te ve yoˬ. Chi beuꞈ teˇ co˗e kaꞈ hkʼa shuˍ shuˍ, nga hui awˬ paˇ awˬ kui lo chehˇ ve chaw Yaˬhoˉvaˬ ve awˬ liˇ awˬ hkʼaˇ htaꞈ a yeˇ maˇ yuˬ ve yoˬ. Chi hkʼe hpehꞈ ve htawˇ, ngaˬ hui Yaˬhoˉvaˬ htaꞈ haꞈ leh yawˇ htaꞈ kawˆ leh yawˆ yan tuˬ henˇ ve kʼo, ngaˬ hui daꞈ ve awˬ liˇ awˬ hkʼaˇ cawˬ ve chaw hpehꞈ gʼa sheˍ ve yoˬ.—Tawˇ naˉ ve 14:2.

² Chi hkʼe te htaˇ ngaˬ hui awˬ gʼaˇ gʼa tuˬ Yaˬhoˉvaˬ lehˬ Tawˇ naˉ ve liꞈ hkʼaw ngaˬ hui htaꞈ beˆ maˍ laˇ taˍ ve yoˬ. Hawˉ hkʼaˆ, yaˇ miˇ, yaˇ nehˬ, chaw mawˇ Hkriꞈ yaˇ hpehꞈ ve teˇ gʼaˇ le le Tawˇ naˉ ve liꞈ hkʼaw beˆ maˍ laˇ taˍ ve htaꞈ awˬ bon gʼa ve yoˬ.

GʼUIˬ SHA HTAꞈ KAWˆ LEH YAWˆ YAN VE LEHˬ NGAˬ HUI VE NYI MA HTAꞈ HAꞈ SHAˉ LAˇ GʼA VE

3. Tawˇ naˉ ve liꞈ 17:3 hkʼaw kʼoˆ taˍ ve hkʼe, ngaˬ hui ve nyi ma htaꞈ haꞈ shaˉ laˇ gʼa tuˬ ve teˇ ceuˬ lehˬ aˬ htoꞈ ma le? (Awˬ han htaꞈ nyi sheˍ.)

³ Ngaˬ hui ve nyi ma htaꞈ haꞈ shaˉ laˇ tuˬ a yeˇ uiˍ jaˇ ve teˇ ceuˬ lehˬ, Yaˬhoˉvaˬ ngaˬ hui ve nyi ma htaꞈ chaˬ nyi shehˍ hpaˇ hpehꞈ ve yoˬ. Chi kʼoˆ gaˇ ve lehˬ, Yaˬhoˉvaˬ ngaˬ hui ve nyi ma awˬ nu ve chaw maˇ mawˬ gʼa ve htaꞈ teˇ ceuˬ le le mawˬ gʼa leh ngaˬ hui hkʼaˬ hkʼe ve chaw hpehꞈ ve htaꞈ kaꞈ yawˇ shiˍ ve yoˬ. (Tawˇ naˉ ve 17:3 gʼaw sheˍ.) Yaˬhoˉvaˬ beˆ maˍ laˇ taˍ ve ngaˬ hui ve nyi ma leh dawˇ hkʼaˇ hkʼaw hkʼaˬ htaˆ kaꞈ cawˬ tcuh ve kʼo, yawˇ ngaˬ hui htaꞈ haꞈ ve yoˬ. Chi lehˬ ngaˬ hui co co taiˍ taiˍ ve a shaꞈ gʼa tuˬ kaꞈ ga laˇ ve yoˬ. (Yoˇhanˬ 4:14) Ngaˬ hui chi hkʼe te ve kʼo, pehꞈ ve tzuhˆ ve te tuˬ maˇ dawˇ nyi leh Saˍtanˍ heˍ laˇ ve htaꞈ maˇ na leh miˬ guiˬ yaˇ htaꞈ kaꞈ maˇ henˇ yuˬ. (1 Yoˇhanˬ 5:18, 19) Ngaˬ hui Yaˬhoˉvaˬ geh hkʼa dehꞈ meuˆ daꞈ ve kʼo, ngaˬ hui yawˇ htaꞈ haꞈ leh yawˆ yan tuˬ yoˬ. Ngaˬ hui Yaˬhoˉvaˬ nyi ma luˬ tuˬ maˇ te piˇ gaˇ ve pa taw, te yaꞈ tuˬ kaꞈ maˇ dawˇ nyi leh te yaꞈ tuˬ lawˇ nyi laˇ ve htaꞈ kaꞈ maˇ te ve yoˬ. Ngaˬ hui a shu yawˇ awˬ to htaꞈ na nyi cawˇ ve, ‘ngaˬ haꞈ jaˇ ve Gʼuiˬ sha htaꞈ hkʼaˬ hkʼe te nyi ma luˬ tuˬ te piˇ gʼa tuˬ le?’—1 Yoˇhanˬ 4:9, 10.

4. Awˬ viˉ awˬ nyi yaˇ miˇ teˇ gʼaˇ htaꞈ te yaꞈ tuˬ beˬ piˇ htaˇ, Yaˬhoˉvaˬ htaꞈ kawˆ leh yawˆ yan ve yawˇ htaꞈ hkʼaˬ hkʼe haꞈ shaˉ piˇ ve le?

⁴ Hko˗eˇshaˍ mvuhˇ miˬ lo chehˇ ve awˬ viˉ awˬ nyi yaˇ miˇ Maˍhtaˆ yawˇ haˉ chawˇ haˉ paˆ te yaꞈ tuˬ beˬ piˇ jaw ve yoˬ. Yawˇ kʼoˆ ve, “oˇ ve teˇ yanˇ ngaˬ htawˇ dawˇ nawˬ dawˇ cawˬ leh ngaˬ ve nyi ma htaꞈ yuˬ tiˍ gʼa tuˬ haˍ jaˇ ve yoˬ. Yaꞈ hkʼaˇ, Yaˬhoˉvaˬ htaꞈ kawˆ leh yawˆ yan ve ngaˬ htaꞈ haꞈ shaˉ laˇ ve yoˬ.”b Yaˬhoˉvaˬ htaꞈ kawˆ leh yawˆ yan ve hkʼaˬ hkʼe ga laˇ ve le? Maˍhtaˆ kʼoˆ ve, yawˇ dawˇ cheˆ ve maˇ cawˇ ve kʼo, heuˆ la kuiˬ cawˬ ve htaꞈ dawˇ nyi ve yoˬ. Ngaˬ hui kaꞈ chi ve hkʼa shuˍ shuˍ gʼa te cawˇ ve yoˬ. Heuˆ la kuiˬ cawˬ jaˇ ve lehˬ, Yaˬhoˉvaˬ nyi ma luˬ tuˬ te piˇ leh yawˇ htaꞈ hkʼaˬ htaˆ kaꞈ oˉ kʼoˍ maˇ gʼa pui tuˬ kaꞈ te laˇ ve yoˬ.—Awˬ hkuiˉ puiˍ 6:5, 6.

5. Le˗oˍ ve awˬ lawn nawˬ htaꞈ hkʼaˬ hkʼe maˍ laˇ gʼa ve le?

⁵ Ngaˬ hui Yaˬhoˉvaˬ htaꞈ kawˆ leh yawˆ yan htaˇ, maˇ daꞈ ve awˬ ceuˬ htaꞈ te ve chaw geh ngaˬ hui awˬ chawˇ maˇ te ve yoˬ. Konˍgoˍ mvuhˇ miˬ lo chehˇ ve Le˗oˍ yawˇ chi hkʼe ve gʼa hpuˇ jaw ve yoˬ. Yawˇ Baˆtiˆsaˬ haꞈ yuˬ peuˬ hkʼawꞈ nawˉ 4 hkʼawꞈ gaˬ leh yawˇ maˇ daꞈ ve chaw geh awˬ chawˇ te ve yoˬ. Yawˇ chi hkʼe te ve htawˇ, yawˇ maˇ daꞈ ve awˬ ceuˬ htaꞈ maˇ te ve kʼo, maˇ yaꞈ tehꞈ dawˇ ve yoˬ. Peuˬ hkʼawꞈ nawˉ maˇ maw awˬ chawˇ chi ve teˇ hpaˍ yawˇ tsuhˬ dawˬ tuˬ jehˬ piˇ leh yawˇ haˉ chawˇ haˉ paˆ kaꞈ te yaꞈ ve yoˬ. Peuˬ hkʼawꞈ nawˉ, yawˇ ve awˬ pa awˬ e Shaˉhkiˆhkanˍ ve chaw hpehꞈ ve yawˇ htaꞈ maˍ piˇ ve awˬ lawn leh yawˇ Shaˉhkiˆhkanˍ ve chaw hpehꞈ htaˇ ve awˬ lawn htaꞈ kaꞈ kʼawꞈ dawˇ nyi ve yoˬ. Chi Le˗oˍ kʼawꞈ dawˇ hpfuhˆ leh cawˇ ve awˬ ceuˬ htaꞈ kʼawꞈ te gaˇ tuˬ te piˇ ve yoˬ. Leh nyi haꞈ shaˉ paˍ kaꞈ yawˇ Yaˬhoˉvaˬ geh kʼawꞈ kʼawꞈ la tuˬ ga piˇ ve yoˬ. Chi teˇ hkui Le˗oˍ nyi haꞈ shaˉ paˍ, tcuh peu ve gʼuˇ suhˍ peuˍ ve chaw kaꞈ hpehꞈ leh, Yaˬhoˉvaˬ ve kanˉ ha lehˬ ha kʼa te chehˇ ve yoˬ.

6. Yaˇ miˇ 2 gʼaˇ htaꞈ caˉ daꞈ ve awˬ lawn hkʼaˬ hkʼe henˇ tuˬ le?

⁶ Tawˇ naˉ ve liꞈ kaˇ nanˉ uiˍ 9 hkʼaw yaˇ miˇ 2 gʼaˇ htaꞈ caˉ daꞈ ve teˇ geh henˇ tuˬ yoˬ. Yaˇ miˇ teˇ gʼaˇ lehˬ cuˇ yiˍ cawˬ ve yoˬ. Leh awˬ nu ve yaˇ miˇ teˇ gʼaˇ lehˬ cuˇ yiˍ maˇ cawˬ ve yoˬ.c Tawˇ naˉ ve liꞈ chi hkʼaw hawˉ hkʼaˆ, yaˇ miˇ, teˇ gʼaˇ le le awˬ bon gʼa tuˬ yoˬ. Saˍtanˍ ve miˬ guiˬ hkʼoˆ lo haˉ chawˇ haˉ paˆ leh awˬ ku nyi ve awˬ han cawˬ maˇ jaˇ ve tehꞈ ngaˬ hui tawnˇ taˍ cawˇ ve yoˬ. (Eˇfeˇsuꞈ 4:19) Hkʼe te leh, ngaˬ hui Yaˬhoˉvaˬ htaꞈ kawˆ leh yawˆ yan ve a yeˇ uiˍ jaˇ tehꞈ gʼa shawˍ leh maˇ daꞈ ve awˬ ceuˬ htaꞈ kaꞈ maˇ caˉ daꞈ ve yoˬ. (Tawˇ naˉ ve 16:16) Tawˇ naˉ ve liꞈ kaˇ nanˉ uiˍ 9 hkʼaw yaˇ miˇ 2 gʼaˇ ‘cuˇ yiˍ maˇ cawˬ ve chaw’ htaꞈ jehˬ piˇ chehˇ ve yoˬ. Yawˇ hui chaw chi teˇ hpaˍ htaꞈ kʼoˆ piˇ ve, ‘ngaˬ ve yehˬ hkʼaw loꞈ la leh caˇ tuˬ caˇ la˗o.’ (Tawˇ naˉ ve 9:1, 5, 6, 13, 16, 17) Yaꞈ hkʼaˇ, yaˇ miˇ chi 2 gʼaˇ jehˬ piˇ ve htaꞈ gʼaꞈ te ve chaw lehˬ peun daꞈ jaˇ ve yoˬ.

CUˇ YIˍ MAˇ CAWˬ VE YAˇ MIˇ JEHˬ LAˇ VE HKAWˇ HTAꞈ MAˇ GʼAꞈ TE VE

7. Tawˇ naˉ ve liꞈ 9:13-18 hkʼaw kʼoˆ taˍ ve hkʼe, cuˇ yiˍ maˇ cawˬ ve yaˇ miˇ ve yehˬ lo kʼai ve chaw lehˬ hkʼaˬ hkʼe hpehꞈ tuˬ ve le? (Awˬ han htaꞈ nyi sheˍ.)

⁷ ‘Cuˇ yiˍ maˇ cawˬ ve yaˇ miˇ’ jehˬ piˇ ve hkawˇ htaꞈ ngaˬ hui teˇ geh nyi sheˍ. (Tawˇ naˉ ve 9:13-18 gʼaw sheˍ.) Yawˇ maˇ dawˇ nyi puiˉ ve chaw htaꞈ “choˬ kaˬ laˬ˗oꞈ” tehꞈ jehˬ piˇ ve yoˬ. Yawˇ yawˇ hui htaꞈ yawˇ ve yehˬ lo caˇ tuˬ caˇ la tcuh gaˇ ve yoˬ. Yawˇ ve yehˬ lo kʼai ve chaw hkʼaˬ hkʼe hpehꞈ tuˬ le? Liꞈ hpu hkʼaw kʼoˆ ve, “yawˇ ve yehˬ hkʼaw loꞈ˗e ve chaw hkʼa peu˗eˬ suh kʼai peuˬ.” Awˬ lawn chi ve htaꞈ gʼa gʼaw htaˇ, Tawˇ naˉ ve liꞈ hkʼaw henˇ kʼai peuˬ˗oˬ ve teˇ lawn tehˆ maˍ laˇ taˍ ve hkʼa shuˍ nawˬ dawˇ mawˬ ve yoˬ hehˉ. Oˇ kaˬ lo ngaˬ hui htaꞈ “heˍ yuˬ beˬ yuˬ gaˇ ve haiˬ ve yaˇ miˇ htaꞈ” shaˍ tiꞈ te˗o tehꞈ kʼoˆ laˇ ve yoˬ. Leh kʼawꞈ kʼoˆ sheˍ ve, “yawˇ ve yehˬ lo kʼai ve kʼo, suh kuiˬ lo nawˬ kʼai chehˇ ve yoˬ.” (Tawˇ naˉ ve 2:11-19) Chi hkʼoˆ kaꞈ, “haiˬ ve yaˇ miˇ” teˇ gʼaˇ “suh mvuhˇ miˬ lo shiˍ kʼai laˇ tuˬ” ve htaꞈ caˉ daꞈ ve Tawˇ naˉ ve liꞈ 5:3-10 hkʼaw shaˍ tiꞈ peꞈ laˇ sheˍ ve yoˬ.

8. Ngaˬ hui aˬ htoꞈ ma htaꞈ gʼa dawˇ cheˆ cawˇ ve le?

⁸ ‘Cuˇ yiˍ maˇ cawˬ ve yaˇ miˇ’ kuˬ laˇ ve hkawˇ htaꞈ kaˇ ve chaw, yawˇ jehˬ piˇ ve htaꞈ gʼaꞈ te tuˬ ve, maˇ gʼaꞈ te tuˬ ve, leuˆ yuˬ gʼa ve yoˬ. Dawˇ cheˆ ve chi hkʼe ve ngaˬ hui kaꞈ gʼa hpuˇ la ve yoˬ hehˉ. Ngaˬ hui haˉ chawˇ haˉ paˆ te tuˬ jehˬ laˇ ve, in˗teu˗neꞈ hkʼaw maˇ heˆ leh awˬ nu ve awˬ lawn hkʼaw awˬ ku nyi ve awˬ han mawˬ ve kʼo, ngaˬ hui hkʼaˬ hkʼe dawˇ cheˆ gʼa tuˬ le?

9-10. Ngaˬ hui haˉ chawˇ haˉ paˆ maˇ gʼa te yaꞈ tuˬ aˬ htoꞈ ma awˬ hkʼaˇ cawˬ sheˍ ve le?

⁹ Ngaˬ hui haˉ chawˇ haˉ paˆ maˇ gʼa te yaꞈ tuˬ awˬ hkʼaˇ laiˉ hkʼaˇ cawˬ ve yoˬ. ‘Cuˇ yiˍ maˇ cawˬ ve yaˇ miˇ’ kʼoˆ ve, “hkʼawˇ yuˬ taˍ ve iˉ kaˆ lehˬ mehˬ jaˇ ve yoˬ.” Leh “hkʼawˇ yuˬ taˍ ve iˉ kaˆ lehˬ” aˬ htoꞈ ma le? Liꞈ hpu hkʼaw awˬ hpawˇ awˬ miˇ ma teˇ geh zuhꞈ ve lehˬ nyi ma sha tuˬ te laˇ ve iˉ kaˆ htaꞈ tehˆ taˍ ve yoˬ. (Tawˇ naˉ ve 5:15-18) Awˬ hpawˇ awˬ miˇ ma awˬ liˇ awˬ hkʼaˇ cawˇ ve hkʼaw heuˆ daꞈ taˍ ve chaw ceh tiˉ ha lehˬ ve hkʼaw teˇ geh zuhꞈ gʼa ve yoˬ. Yaꞈ hkʼaˇ, “hkʼawˇ yuˬ taˍ ve iˉ kaˆ” htaꞈ peun daꞈ jaˇ ve yoˬ. Chi ve lehˬ haˉ chawˇ haˉ paˆ te yaꞈ ve htaꞈ kʼoˆ gaˇ ve yoˬ. Chi hkʼe te ve lehˬ shu ve mawˇ hkʼawˇ ve htaꞈ tehˆ taˍ ve yoˬ. Te yaꞈ ve chaw lehˬ shu maˇ shiˍ taˬ tehꞈ dawˇ ve pa taw, ‘hkʼawˇ yuˬ taˍ ve shu ve iˉ kaˆ’ mehˬ jaˇ ve tehꞈ dawˇ ve yoˬ. Yaꞈ hkʼaˇ, chi awˬ tehˬ maˇ heˆ. Yaˬhoˉvaˬ teˇ ceuˬ le le htaꞈ mawˬ ve yoˬ. Yaˬhoˉvaˬ nyi hkʼaˇ maˇ suh tuˬ te piˇ ve awˬ ceuˬ lehˬ haiˬ jaˇ ve yoˬ. Chi htaꞈ pa taw, chi ve lehˬ mehˬ jaˇ ve tehꞈ ngaˬ hui kʼoˆ maˇ gʼa. Awˬ lawn kʼo, chi ve lehˬ nyi ma luˬ jaˇ ve awˬ ceuˬ hpehꞈ ve yoˬ. (1 Kawˇrenˍhtuˆ 6:9, 10) Yaꞈ hkʼaˇ, chi hkʼe ceh tiˉ maˇ heˆ.

¹⁰ Haˉ chawˇ haˉ paˆ te ve lehˬ, yaꞈ taw tuˬ, a shu yawˇ awˬ to awˬ hpfuhˇ maˇ cawˬ tuˬ, maˇ dawˇ maˇ gaˇ ve hkʼaw yaˇ hu la ve, leh yehˬ kʼa hpaˆ daꞈ tuˬ, chi ve teˇ hpaˍ te laˇ ve yoˬ. Cuˇ yiˍ maˇ cawˬ ve yaˇ miˇ jehˬ laˇ ve hkawˇ maˇ na leh yawˇ ve yehˬ lo maˇ loꞈ˗e ve lehˬ daꞈ jaˇ ve tehꞈ ngaˬ hui gʼa mawˬ ve yoˬ. Yaˬhoˉvaˬ geh meuˆ daꞈ ve htaꞈ yawˇ maˇ te luˬ laˇ ve awˬ hkʼoˆ kaꞈ, teˇ geh zuhꞈ ve a naˍ maˇ nehˉ tuˬ kaꞈ te laˇ ve yoˬ. (Tawˇ naˉ ve 7:23, 26) Tawˇ naˉ ve liꞈ kaˇ nanˉ 9 18 hkʼaw kʼoˆ ve, “yawˇ ve yehˬ hkʼaw loꞈ˗e ve chaw hkʼa peu˗eˬ suh kʼai peuˬ.” Chi htaꞈ pa taw, cuˇ yiˍ maˇ cawˬ ve yaˇ miˇ jehˬ piˇ ve hkawˇ htaꞈ gʼaꞈ te ve chaw laiˉ gʼaˇ lehˬ, gʼa suh tuˬ yoˬ.—Tawˇ naˉ ve 9:13-18.

11. Aˬ htoꞈ ma te awˬ ku nyi ve awˬ han nyi ve lehˬ kawˆ tuˬ cawˬ jaˇ ve le?

¹¹ Ngaˬ hui maˇ caˉ daꞈ cawˇ ve teˇ ceuˬ lehˬ, awˬ ku nyi ve awˬ han nyi ve yoˬ. Chaw teˇ hpaˍ kʼo, awˬ ku nyi ve awˬ han nyi ve kawˆ tuˬ maˇ cawˬ tehꞈ dawˇ ve yoˬ. Yaꞈ hkʼaˇ, awˬ tehˬ kʼo, awˬ ku nyi ve awˬ han nyi ve lehˬ kawˆ tuˬ cawˬ jaˇ. A shu yawˇ awˬ to leh awˬ nu ve chaw kaꞈ maˇ yawˆ yan tuˬ te laˇ ve yoˬ. Nyi peuˬ hkʼawꞈ nawˉ leuˉ leh kʼawꞈ nyi gaˇ ve yoˬ. Awˬ ku nyi ve awˬ han nyi peuˬ hkʼawꞈ nawˉ hkʼaˬ htaˆ kaꞈ dawˇ mawˬ leh maˇ kʼawꞈ dawˇ nyi tuˬ haˍ jaˇ. Chi hkʼe ceh tiˉ maˇ heˆ. Awˬ ku nyi ve awˬ han nyi ve lehˬ ngaˬ hui te gaˇ ve maˇ daꞈ ve awˬ ceuˬ htaꞈ yuˬ baˬ laˇ maˇ gʼa. Yaꞈ hkʼaˇ, leuˉ leh ngaˬ hui kʼawꞈ te gaˇ tuˬ te laˇ ve yoˬ. (Kawˇlawˇsehˇ 3:5; Yaˍkoˆ 1:14, 15) Awˬ ku nyi ve awˬ han nyi ve chaw laiˉ gʼaˇ lehˬ, haˉ chawˇ haˉ paˆ te ve yoˬ.

12. Pehꞈ ve tzuhˆ ve te gaˇ ve teˇ ceuˬ le le htaꞈ maˇ caˉ daꞈ ve tehꞈ ngaˬ hui hkʼaˬ hkʼe hpeuꞈ maw piˇ gʼa tuˬ le?

¹² Tawˇ yaw tuˬ awˬ hkʼeun hkʼaw nyi ve maˇ heˆ leh hkaw˗hpi˗teuˇ hkʼaw nyi chehˇ htaˇ, awˬ ku nyi ve awˬ han tawˆ la ve kʼo ngaˬ hui hkʼaˬ hkʼe te cawˇ ve le? Ngaˬ hui maˇ nyi leh laꞈ haˉ hoˆ cawˇ ve yoˬ. Ngaˬ hui Yaˬhoˉvaˬ geh meuˆ daꞈ ve htaꞈ a yeˇ uiˍ jaˇ tehꞈ dawˇ ve kʼo, ngaˬ hui maˇ nyi leh laꞈ haˉ hoˆ tuˬ sha ve yoˬ. Awˬ han teˇ hpaˍ kʼo, awˬ ku nyi ve awˬ han hpehꞈ ve tehꞈ maˇ dawˇ ve kaꞈ teˇ geh tzuhꞈ gaˇ ve nyi ma cawˬ tuˬ te piˇ gʼa ve yoˬ. Aˬ htoꞈ ma te ngaˬ hui awˬ han chi teˇ hpaˍ htaꞈ maˇ nyi cawˇ ve le? Awˬ lawn kʼo, haˉ chawˇ haˉ paˆ te ve awˬ ceuˬ ngaˬ hui ve nyi ma hkʼaw a ciˉ kaꞈ maˇ cawˬ tcuh gaˇ ve yoˬ. (Maꞈhtehˍ 5:28, 29) Htaiˇ mvuhˇ miˬ lo chehˇ ve nyi haꞈ shaˉ paˍ Daˍviˆ kʼoˆ ve, “ngaˬ a shu yawˇ awˬ to htaꞈ na nyi ve, ‘awˬ han chi awˬ ku nyi ve awˬ han maˇ hpehꞈ ve htawˇ, ngaˬ caˉ leh nyi ve kʼo, Yaˬhoˉvaˬ dawˇ cawˇ tuˬ ve laˇ?’ Ngaˬ chi hkʼe dawˇ nyi ve pa taw, cuˇ yiˍ cawˬ ve hkʼaw te gʼa tuˬ yawˇ ga laˇ ve yoˬ.”

13. Ngaˬ hui cuˇ yiˍ cawˬ ve hkʼaw aˬ htoꞈ ma te tuˬ ga laˇ ve le?

¹³ Yaˬhoˉvaˬ maˇ dawˇ cawˇ tuˬ te piˇ la ve htaꞈ kawˆ ve lehˬ, ngaˬ hui cuˇ yiˍ cawˬ ve hkʼaw te tuˬ ga laˇ gʼa ve yoˬ. “Cuˇ yiˍ cawˬ la hpehꞈ tuˬ nawˬ awˉ lawˉ peuˇ Gʼuiˬ sha htaꞈ yawˆ yan puiˉ ve nyi ma gʼa cawˬ ve yoˬ.” (Tawˇ naˉ ve 9:10) Tawˇ naˉ ve liꞈ kaˇ nanˉ uiˍ 9 hkʼaw ngaˬ hui gʼa henˇ˗oˬ ve htaꞈ awˬ lawn chi mawˬ gʼa tuˬ te laˇ ve yoˬ. Oˇ kaˬ loˬ Heˍbrehˇ hkawˇ ‘awˬ tehˬ ve cuˇ yiˍ’ hpehꞈ ve yaˇ miˇ teˇ gʼaˇ htaꞈ kʼoˆ taˍ ve yoˬ.

‘AWˬ TEHˬ VE CUˇ YIˍ’ JEHˬ LAˇ VE HKʼAˇ SUH GʼAꞈ TE VE

14. Tawˇ naˉ ve liꞈ 9:1-6 hkʼaw ngaˬ hui gʼa henˇ˗oˬ ve jehˬ laˇ ve maˇ shuˍ daꞈ ve aˬ htoꞈ ma cawˬ ve le?

¹⁴ Tawˇ naˉ ve liꞈ 9:1-6 gʼaw sheˍ. Choˬ kaˬ lo ngaˬ hui htaꞈ hpanˍ shehˍ hpaˇ Yaˬhoˉvaˬ jehˬ laˇ ve hkawˇ htaꞈ gʼa mawˬ ve yoˬ. Yaˬhoˉvaˬ lehˬ cuˇ yiˍ cawˬ jaˇ leh awˬ tehˬ ve cuˇ yiˍ peꞈ laˇ shehˍ hpaˇ hpehꞈ ve yoˬ. (Tawˇ naˉ ve 2:6; Roˉmaꞈ 16:27) Chi hkʼoˆ kaꞈ, yehˬ uiˍ jaˇ ve yehˬ hkuiˉ daw lonˉ 7 maˬ cawˬ ve htaꞈ ngaˬ hui gʼa mawˬ ve yoˬ. Chi lehˬ Yaˬhoˉvaˬ piˇ gaˇ puiˉ ve nyi ma cawˬ ve htaꞈ ngaˬ hui gʼa mawˬ ve yoˬ. Yaˬhoˉvaˬ geh cuˇ yiˍ gʼa gaˇ leh a shaꞈ teꞈ kuiˬ hkʼaw yuˬ yehˇ ve chaw teˇ gʼaˇ le le htaꞈ yawˇ piˇ tuˬ yoˬ.

15. Yaˬhoˉvaˬ ngaˬ hui htaꞈ aˬ htoꞈ ma te tuˬ jehˬ laˇ ve le?

¹⁵ Tawˇ naˉ ve liꞈ kaˇ nanˉ uiˍ 9 hkʼaw ‘awˬ tehˬ ve cuˇ yiˍ’ yaˇ miˇ teˇ gʼaˇ hpehꞈ ve htaꞈ tehˆ maˍ laˇ taˍ ve yoˬ. Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ leh ngaˬ hui htaꞈ daꞈ ve awˬ ceuˬ maˇ maˇ peꞈ laˇ ve tehꞈ tehˆ maˍ laˇ taˍ ve chi ngaˬ hui mawˬ tuˬ te laˇ ve yoˬ. Yaˇ miˇ chi ve teˇ gʼaˇ caˇ tuˬ mehˬ jaˇ ve htaꞈ gu ve, a pehˉ meuˇ gʼuiˬ gu teh ve, leh hpui lawˇ hkʼoˆ lo hkʼa dehꞈ gu teh taˍ ve yoˬ. (Tawˇ naˉ ve 9:2) Kaˇ nanˉ ehˉ 4 leh 5 hkʼaw yawˇ kʼoˆ sheˍ ve, “[chaw luˬ paˍ teˇ hpaˍ˗oˬ] ‘ngaˬ gu taˍ ve caˇ tuˬ dawˬ tuˬ htaꞈ ca caˇ ca dawˬ la˗o.’” Aˬ htoꞈ ma te ngaˬ hui cuˇ yiˍ cawˬ ve yaˇ miˇ chi ve teˇ gʼaˇ aˉ hkʼaw lo kʼai leh ca caˇ˗e cawˇ ve le? Ngaˬ hui chi hkʼe te ve lehˬ Yaˬhoˉvaˬ ngaˬ hui htaꞈ haꞈ shaˉ laˇ leh cuˇ yiˍ cawˬ ve chaw hpehꞈ tcuh gaˇ ve tehꞈ shiˍ ve pa taw yoˬ. Yawˇ ngaˬ hui htaꞈ maˇ te yaꞈ tcuh gaˇ leh ngaˬ hui te yaꞈ leh nyi ma naˬ ve awˬ ceuˬ htaꞈ kaꞈ maˇ te yaꞈ tcuh gaˇ ve yoˬ. Hkʼe te leh, yawˇ “hteˇ ve cawˇ ve chaw htaꞈ ga piˇ leh haꞈ shaˉ piˇ ve yoˬ.” (Tawˇ naˉ ve 2:7) Ngaˬ hui Yaˬhoˉvaˬ htaꞈ kawˆ leh yawˆ yan ve kʼo, yawˇ nyi hkʼaˇ suh tuˬ te piˇ gaˇ ve yoˬ. Ngaˬ hui yawˇ beˆ maˍ laˇ ve tawˇ hkawˇ htaꞈ na yuˬ leh gʼaꞈ te ve pa taw ha lehˬ jaˇ ve yoˬ.—Yaˍkoˆ 1:25.

16. Yaˬhoˉvaˬ htaꞈ kawˆ leh yawˆ yan ve lehˬ A˗le cuˇ yiˍ cawˬ ve hkʼaw dawˇ cheˆ gʼa tuˬ aˬ htoꞈ ma ga piˇ ve le? Leh awˬ bon hkʼaˬ hkʼe gʼa ve le?

¹⁶ Yaˬhoˉvaˬ htaꞈ kawˆ leh yawˆ yan ve lehˬ awˬ viˉ awˬ nyi hawˉ hkʼaˆ A˗le cuˇ yiˍ cawˬ ve hkʼaw dawˇ cheˆ gʼa tuˬ hkʼaˬ hkʼe ga piˇ ve htaꞈ teˇ geh nyi sheˍ. A˗le lehˬ nyi haꞈ shaˉ paˍ hpehꞈ leh liꞈ maˍ paˍ saˍ laꞈ kaꞈ hpehꞈ ve yoˬ. Yawˇ kʼoˆ ve, “ngaˬ liꞈ teˇ geh maˍ chehˇ ve awˬ chawˇ laiˉ gʼaˇ kʼoˆ ve, teˇ geh zuhꞈ ve awˬ lawn htaꞈ shiˍ tuˬ yawˇ hui awˬ ku nyi ve awˬ han nyi ve yoˬ.” Yaꞈ hkʼaˇ, A˗le shiˍ ve chi awˬ tehˬ maˇ heˆ. Yawˇ kʼoˆ ve, “ngaˬ Yaˬhoˉvaˬ htaꞈ haꞈ jaˇ leh yawˇ htaꞈ kawˆ leh yawˆ yan ve yoˬ. Hkʼe te leh, ngaˬ yawˇ hui htaꞈ kʼoˆ piˇ ve, hkʼaˬ hkʼe hpehꞈ ve htawˇ ngaˬ maˇ nyi. Leh yawˇ hui htaꞈ awˬ hkʼaˇ kaꞈ kʼoˆ maˍ piˇ sheˍ ve yoˬ.” A˗le ‘awˬ tehˬ ve cuˇ yiˍ’ leh “cuˇ yiˍ awˬ hkʼaˇ suh gʼaꞈ kʼai˗o” tehꞈ kʼoˆ ve beˆ maˍ laˇ hkawˇ htaꞈ gʼaꞈ te ve ngaˬ hui gʼa mawˬ ve yoˬ. (Tawˇ naˉ ve 9:6) Yawˇ geh liꞈ teˇ geh maˍ chehˇ ve awˬ chawˇ dawˇ cawˇ jaˇ leh chi teˇ hkui Liꞈ hpu henˇ leh hpawnˬ daꞈ kuiˬ lo kaꞈ kʼai chehˇ ve yoˬ.

17-18. ‘Awˬ tehˬ ve cuˇ yiˍ’ jehˬ laˇ ve htaꞈ gʼaꞈ te ve chaw chi teˇ hkui leh awˬ gʼuˇ suhˍ hpawˇ kaꞈ aˬ htoꞈ ma awˬ bon gʼa ve le? (Awˬ han htaꞈ nyi sheˍ.)

¹⁷ Ngaˬ hui chi teˇ hkui ve a shaꞈ teꞈ hkʼaˇ daꞈ leh awˬ gʼuˇ suhˍ hpawˇ ha lehˬ ve cawˬ tuˬ ngaˬ hui hkʼaˬ hkʼe gʼa te cawˇ ve Yaˬhoˉvaˬ yaˇ miˇ 2 gʼaˇ htaꞈ yehˇ leh tehˆ maˍ laˇ taˍ ve yoˬ. ‘Cuˇ yiˍ maˇ cawˬ ve yaˇ miˇ’ jehˬ piˇ ve htaꞈ gʼaꞈ te ve chaw lehˬ, ha lehˬ ve cawˬ gaˇ ve pa taw haˉ chawˇ haˉ paˆ hkʼawˇ te ve lehˬ nyi˗a kʼo, mehˬ ve htaꞈ shuˍ ve yoˬ. Yawˇ hui teˇ hkui teˇ yanˇ ha lehˬ ve htaꞈ ceh a yeˇ yuˬ leh awˬ gʼuˇ suhˍ hpawˇ hkʼaˬ hkʼe hpehꞈ la tuˬ ve htaꞈ maˇ dawˇ nyi ve yoˬ. Chi lehˬ yawˇ hui “suh mvuhˇ miˬ hkʼaw” gʼa chehˇ tuˬ yoˬ.—Tawˇ naˉ ve 9:13, 17, 18.

¹⁸ ‘Awˬ tehˬ ve cuˇ yiˍ’ jehˬ laˇ ve htaꞈ gʼaꞈ te ve chaw hkʼaˬ hkʼe hpehꞈ tuˬ le? Yawˇ hui gʼa ve awˬ bon peun daꞈ jaˇ. Chi teˇ hkui kaꞈ yawˇ hui htaꞈ hkʼa dehꞈ nyi haꞈ shaˉ piˇ ve pa taw ha lehˬ jaˇ ve yoˬ. Leh Yaˬhoˉvaˬ geh meuˆ daꞈ tuˬ loˍ ve teˇ ceuˬ le le kaꞈ cawˬ ve yoˬ. (Iˉsaˍyaˆ 65:13) Yaˬhoˉvaˬ tcuh kaˍ paˍ Iˉsaˍyaˆ htaꞈ cuˇ leh ngaˬ hui htaꞈ kʼoˆ laˇ ve, “ngaˬ ve tawˇ htaꞈ na leh, ngaˬ kʼoˆ ve hkʼe te˗o. Oˇ hkʼe te ve kʼo, nawˬ hui daꞈ jaˇ ve caˇ tuˬ htaꞈ gʼa caˇ leh, gʼa ha lehˬ tuˬ yoˬ.” (Iˉsaˍyaˆ 55:1, 2) Chi teˇ hkui ngaˬ hui Yaˬhoˉvaˬ haꞈ ve awˬ ceuˬ htaꞈ haꞈ tuˬ henˇ leh Yaˬhoˉvaˬ maˇ dawˇ cawˇ ve awˬ ceuˬ htaꞈ ngaˬ hui kaꞈ maˇ dawˇ cawˇ tuˬ henˇ ve yoˬ. (Chiˇ mvuh ve 97:10) Chi hkʼoˆ kaꞈ, awˬ nu ve chaw ‘awˬ tehˬ ve cuˇ yiˍ’ henˇ la tuˬ ngaˬ hui jehˬ piˇ ve ha lehˬ jaˇ ve yoˬ. Awˬ ceˬ ma teˇ gʼaˇ “venˇ hkʼaw mvuh jaˇ ve chehˇ kuiˬ lo kʼai peu leh, chi hkʼe ca kʼoˆ piˇ tcuh ve yoˬ. ‘Cuˇ yiˍ maˇ cawˬ ve chaw hui˗oˬ, laˬ˗oꞈ.’” Chi hkʼe kʼoˆ ve htaꞈ ngaˬ hui shuˍ ve yoˬ. Kuˬ laˇ ve chi htaꞈ ngaˬ hui leh awˬ nu ve chaw na ve kʼo, chi teˇ hkui ceh tiˉ awˬ bon gʼa ve maˇ heˆ. Co co taiˍ taiˍ awˬ bon gʼa tuˬ yoˬ. Leh ngaˬ hui “cuˇ yiˍ awˬ hkʼaˇ suh kʼai ve” kʼo co co taiˍ taiˍ “a shaꞈ teꞈ chehˇ” tuˬ yoˬ.—Tawˇ naˉ ve 9:3, 4, 6.

19. Cuˇ yiˍ piˇ ve liꞈ 12:13, 14 hkʼaw kʼoˆ taˍ ve hkʼe, ngaˬ hui aˬ htoꞈ ma te tuˬ dawˇ teh taˍ cawˇ ve le? (Awˇ ceˍ awˇ fa “Gʼuiˬ sha htaꞈ kawˆ leh yawˆ yan ve ngaˬ hui awˬ pon awˬ bon cawˬ ve” hkʼaw nyi sheˍ.)

¹⁹ Cuˇ yiˍ piˇ ve liꞈ 12, 13 ,14 gʼaw sheˍ. Yaˬhoˉvaˬ htaꞈ kawˆ leh yawˆ yan ve lehˬ ngaˬ hui ve nyi ma htaꞈ haꞈ shaˉ laˇ gʼa leh ngaˬ hui awˬ liˇ awˬ hkʼaˇ hpawˇ daꞈ kehˬ ve chaw hpehꞈ tuˬ kaꞈ ga laˇ ve yoˬ. Awˬ leh meuˇ ve awˬ yanˇ haiˬ jaˇ ve chi ve hkʼaw Yaˬhoˉvaˬ geh caˉ leh meuˆ daꞈ tuˬ kaꞈ ga laˇ sheˍ ve yoˬ. Ngaˬ hui Yaˬhoˉvaˬ htaꞈ haꞈ leh yawˇ htaꞈ nyi ma awˬ tawˍ hkʼa gaˬ kawˆ leh yawˆ yan ve kʼo, ‘awˬ tehˬ ve cuˇ yiˍ’ htaꞈ caˉ daꞈ ve chaw maˇ maˇ henˇ la tuˬ te gʼa ve hkʼe jehˬ piˇ ve yoˬ.