AWˬ LAWN 52
Awˬ viˉ awˬ nyi yaˇ miˇ haˉ˗oˬ, nawˬ co ha hpawˇ ve chaw mawˇ hpehꞈ tcuh sheˍ
‘Chi hkʼa shuˍ shuˍ, ga piˇ shehˍ ma teˇ hpaˍ htawˇ, shaˍ tiꞈ cawˬ ve chaw leh teˇ ceuˬ le le awˬ hkʼaw lo ka tiꞈ yeˬ ve chaw gʼa hpehꞈ ve yoˬ.’—1 TIˆMOˉSEˍ 3:11.
KʼA MUIˬ HKAWˇ 133 Yaˇ nehˬ hpehꞈ htaˇ, Yaˬhoˉvaˬ htaꞈ oˉ kʼoˍ pui˗o
HENˇ TUˬ VE TEˇ HPAˍa
1. Co ha hpawˇ ve chaw mawˇ hpehꞈ tuˬ ngaˬ hui hkʼaˬ hkʼe gʼa te cawˇ ve le?
Chi beuꞈ teˇ co˗e ve yaˇ uiˍ la vaiˇ jaˇ. Chi lehˬ a hkʼe leˇ hpehꞈ ve yoˬ. Yaꞈ hkʼaˇ, co ha hpawˇ ve chaw mawˇ hpehꞈ ve lehˬ, yawˇ hkʼaˇ yawˇ hpehꞈ la gʼa ve maˇ heˆ.b (1 Kawˇrenˍhtuˆ 13:11; Heˍbrehˇ 6:1) Co ha hpawˇ ve chaw mawˇ hpehꞈ tuˬ ngaˬ hui Yaˬhoˉvaˬ geh gʼa meuˆ daꞈ cawˇ ve yoˬ. Chi hkʼoˆ kaꞈ, ngaˬ hui daꞈ ve te hkʼaˇ dawˇ hkʼaˇ cawˬ tuˬ, awˬ bon cawˬ ve awˬ ceuˬ te jawˬ ve leh, awˬ gʼuˇ suhˍ hpawˇ te tuˬ ve awˬ vuiˬ htaꞈ gu hehnˇ taˍ ve, chi ve teˇ hpaˍ cawˬ tuˬ ngaˬ hui Gʼuiˬ sha ve daꞈ kehˬ ve awˬ ha hpu gʼa ga laˇ tcuh cawˇ ve yoˬ.—Tawˇ naˉ ve 1:5.
2. Awˬ hkuiˉ puiˍ liꞈ 1:27 hkʼaw ngaˬ hui htaꞈ aˬ htoꞈ ma maˍ laˇ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
2 Yaˬhoˉvaˬ lehˬ chaw yaˇ hawˉ hkʼaˆ leh yaˇ miˇ htaꞈ hpanˍ taˍ ve yoˬ. (Awˬ hkuiˉ puiˍ 1:27 gʼaw sheˍ.) Hawˉ hkʼaˆ leh yaˇ miˇ lehˬ, awˬ hoꞈ awˬ han ceh peun daꞈ ve maˇ heˆ. Yaꞈ hkʼaˇ, awˬ nu ve awˬ ceuˬ kaꞈ peun daꞈ ve yoˬ. Tawˇ pa haˉ te kʼo, Yaˬhoˉvaˬ lehˬ hawˉ hkʼaˆ leh yaˇ miˇ htaꞈ awˬ vuiˬ te tcuh ve kaꞈ maˇ shuˍ daꞈ ve yoˬ. Chi htaꞈ pa taw, yawˇ hui ve te hkʼaˇ dawˇ hkʼaˇ leh awˬ bon cawˬ ve awˬ ceuˬ, yawˇ hui a shu yawˇ ve awˬ vuiˬ teˇ ceuˬ ceuˬ htaꞈ te gʼa tuˬ ga piˇ ve yoˬ. (Awˬ hkuiˉ puiˍ 2:18) Awˬ viˉ awˬ nyi yaˇ miˇ haˉ co ha hpawˇ ve chaw mawˇ hpehꞈ tuˬ, aˬ htoꞈ ma gʼa te cawˇ ve awˬ lawn chi ve hkʼaw teˇ geh henˇ tuˬ yoˬ. Leh gʼuˇ suhˍ teˇ lawn hkʼaw awˬ viˉ awˬ nyi yaˇ nehˬ co ha hpawˇ ve chaw mawˇ hpehꞈ tuˬ, aˬ htoꞈ ma gʼa te cawˇ ve kaꞈ teˇ geh henˇ tuˬ yoˬ.
GʼUIˬ SHA HKʼA SHUˍ TE HKʼAˇ DAWˇ HKʼAˇ CAWˬ VE
Oˇ htaˇ teˇ co˗e Gʼuiˬ sha ve kanˉ ka tiꞈ yeˬ ve hkʼaw te ve daꞈ ve te hkʼaˇ dawˇ hkʼaˇ cawˬ ve Reˍbehˆkaꞈ, Iˉsaˍtaˆ, Aˍbiˇgeˍlaˆ nawˬ awˬ viˉ awˬ nyi yaˇ miˇ co ha hpawˇ ve chaw mawˇ hpehꞈ tuˬ hkʼaˬ hkʼe ga laˇ gʼa ve le? (Awˬ tawn 3-4 nyi sheˍ)
3-4. Awˬ viˉ awˬ nyi yaˇ miˇ haˉ daꞈ ve beˆ maˍ laˇ hkawˇ hkʼaˬ kaˬ lo ca gʼa tuˬ le? (Awˬ han htaꞈ nyi sheˍ.)
3 Liꞈ hpu hkʼaw yaˇ miˇ laiˉ gʼaˇ, Yaˬhoˉvaˬ htaꞈ haꞈ leh yawˇ ve kanˉ te ve awˬ lawn htaꞈ kʼoˆ taˍ ve yoˬ. (Vehˆsaiˉ jw.org hkʼaw “Liꞈ hpu hkʼaw yaˇ miˇ ve awˬ lawn ngaˬ hui aˬ htoꞈ ma henˇ yuˬ gʼa ve le?” hkʼaw nyi sheˍ.) Yawˇ hui lehˬ a yeˇ uiˍ ve Liꞈ hpu awˬ tawn hkʼaw kʼoˆ taˍ ve hkʼe hpehꞈ ve yoˬ. Choˬ kaˬ lo kʼoˆ ve, “shaˍ tiꞈ cawˬ ve chaw leh teˇ ceuˬ le le awˬ hkʼaw lo ka tiꞈ yeˬ ve chaw gʼa hpehꞈ ve yoˬ.” Chi hkʼoˆ kaꞈ, ngaˬ hui ve Hkriꞈ yaˇ awˬ moˍ hkʼaw awˬ viˉ awˬ nyi yaˇ miˇ co ha hpawˇ ve chaw mawˇ hpehꞈ ve htaꞈ ngaˬ hui henˇ yuˬ gʼa ve yoˬ.
4 Awˬ viˉ awˬ nyi yaˇ miˇ haˉ˗oˬ, nawˬ henˇ yuˬ gaˇ ve awˬ viˉ awˬ nyi yaˇ miˇ hkʼaˬ ve teˇ gʼaˇ ve awˬ lawn cawˬ ve le? Yawˇ hui daꞈ ve te hkʼaˇ dawˇ hkʼaˇ aˬ htoꞈ ma cawˬ ve le? Leh nawˬ yawˇ hui htaꞈ hkʼaˬ hkʼe te henˇ yuˬ gʼa tuˬ le? Co ha hpawˇ ve chaw mawˇ gʼa cawˬ cawˇ ve te hkʼaˇ dawˇ hkʼaˇ 3 ceuˬ htaꞈ ngaˬ hui teˇ geh henˇ tuˬ yoˬ.
5. Awˬ viˉ awˬ nyi yaˇ miˇ co ha hpawˇ ve chaw mawˇ hpehꞈ leh nyi ma nuˇ nehˬ ve gʼa cawˬ tuˬ aˬ htoꞈ ma te a yeˇ uiˍ jaˇ ve le?
5 Nyi ma nuˇ nehˬ ve lehˬ, co ha hpawˇ ve chaw mawˇ ve te hkʼaˇ dawˇ hkʼaˇ hpehꞈ ve yoˬ. Awˬ viˉ awˬ nyi yaˇ miˇ nyi ma nuˇ nehˬ ve kʼo, yawˇ Yaˬhoˉvaˬ leh awˬ nu ve chaw geh meuˆ daꞈ tuˬ yoˬ. (Yaˍkoˆ 4:6) Tawˇ pa haˉ te kʼo, Yaˬhoˉvaˬ htaꞈ haꞈ ve yaˇ miˇ lehˬ, hawˉ hkʼaˆ yehˬ kʼa hkʼaw maˇ kʼoˆ, Hkriꞈ yaˇ awˬ moˍ hkʼaw maˇ kʼoˆ, sheh kʼai paˍ te tuˬ Yaˬhoˉvaˬ gu te taˍ laˇ ve htaꞈ yawˇ awˬ gʼaˇ piˇ ve yoˬ.c—1 Kawˇrenˍhtuˆ 11:3.
6. Reˍbehˆkaꞈ nyi ma nuˇ nehˬ ve htaꞈ awˬ viˉ awˬ nyi yaˇ miˇ haˉ hkʼaˬ hkʼe henˇ yuˬ gʼa tuˬ le?
6 Reˍbehˆkaꞈ ve awˬ lawn htaꞈ teˇ geh nyi sheˍ. Aˬ htoꞈ ma te tuˬ leh hkʼaˬ htaˆ te tuˬ ve htaꞈ shiˍ htaˇ, yawˇ cuˇ yiˍ cawˬ leh dawˇ cheˆ haˆ ve yoˬ. (Awˬ hkuiˉ puiˍ 24:58; 27:5-17) Yaꞈ hkʼaˇ, yawˇ awˬ hpawˇ htaꞈ yawˆ yan leh awˬ hpawˇ ve kanˇ paˆ awˬ hawˉ lo chehˇ ve tehꞈ hpeuꞈ maw laˇ ve yoˬ. (Awˬ hkuiˉ puiˍ 24:17, 18, 65) Reˍbehˆkaꞈ hkʼa shuˍ, Yaˬhoˉvaˬ gu teh taˍ laˇ ve htaꞈ nawˬ nyi ma nuˇ nehˬ te leh awˬ gʼaˇ piˇ ve kʼo, yehˬ kʼa hkʼaw leh Hkriꞈ yaˇ awˬ moˍ hkʼaw ve chaw teˇ gʼaˇ le le awˬ pon nawˬ daꞈ ve henˇ yuˬ tuˬ hpehꞈ ve yoˬ.
7. Iˉsaˍtaˆ nyi ma nehˬ lehˍ taˍ ve htaꞈ awˬ viˉ awˬ nyi yaˇ miˇ haˉ hkʼaˬ hkʼe henˇ yuˬ gʼa tuˬ le?
7 Nyi ma nehˬ lehˍ taˍ ve lehˬ, co ha hpawˇ ve chaw mawˇ hpehꞈ ve chaw teˇ gʼaˇ le le gʼa cawˬ cawˇ ve a yeˇ uiˍ jaˇ ve awˬ ceuˬ hpehꞈ ve yoˬ. Liꞈ hpu hkʼaw kʼoˆ ve, “nyi ma nehˬ lehˍ taˍ ve chaw lehˬ, cuˇ yiˍ cawˬ ve chaw hpehꞈ ve yoˬ.” (Tawˇ naˉ ve 11:2) Iˉsaˍtaˆ nyi ma nehˬ lehˍ taˍ leh Gʼuiˬ sha htaꞈ haꞈ ve yoˬ. Yawˇ jawˇ mawˇ ma hpehꞈ ve htawˇ, nyi ma nehˬ lehˍ taˍ ve lehˬ, yawˇ uiˍ muiˬ caˆ muiˬ ve maˇ cawˬ tuˬ te piˇ ve yoˬ. Yawˇ ve aˉ shuˍ paˍ Mawˍdaˍkehˇ beˆ maˍ piˇ ve htaꞈ yawˇ na yuˬ leh gʼaꞈ te ve yoˬ. (Iˉsaˍtaˆ 2:10, 20, 22) Awˬ viˉ awˬ nyi beˆ maˍ laˇ ve htaꞈ nawˬ kaꞈ gʼaꞈ te ve kʼo, nawˬ nyi ma nehˬ lehˍ taˍ ve chaw hpehꞈ ve tehꞈ hpeuꞈ maw piˇ ve yoˬ.—Tiˇtuˆ 2:3-5.
8. 1 Tiˆmoˉseˍ liꞈ 2:9, 10 hkʼaw kʼoˆ taˍ ve hkʼe, nyi ma nehˬ lehˍ taˍ ve awˬ viˉ awˬ nyi yaˇ miˇ haˉ keunˍ daꞈ cawˇ daꞈ ve veuꞈ kʼaˇ veuꞈ htaˇ dawˇ cheˆ gʼa tuˬ hkʼaˬ hkʼe ga piˇ gʼa ve le?
8 Chi hkʼoˆ kaꞈ, Iˉsaˍtaˆ nyi ma nehˬ lehˍ taˍ ve tehꞈ hpeuꞈ maw laˇ sheˍ ve yoˬ. Liꞈ hpu hkʼaw kʼoˆ ve, “yawˇ lehˬ awˬ hkiˇ awˬ naˬ daꞈ jaˇ ve yoˬ.” Yaꞈ hkʼaˇ, awˬ nu ve chaw yawˇ htaꞈ dawˇ cawˇ tuˬ yawˇ maˇ te. (Iˉsaˍtaˆ 2:7, 15) Iˉsaˍtaˆ htaꞈ awˬ viˉ awˬ nyi yaˇ miˇ hkʼaˬ hkʼe henˇ yuˬ gʼa tuˬ le? Awˬ hkʼaˇ teˇ hkʼaˇ lehˬ 1 Tiˆmoˉseˍ liꞈ 2:9, 10 hkʼaw kʼoˆ taˍ ve hkʼe gʼaꞈ te ve yoˬ. (Gʼaw sheˍ.) Tcuh yaˇ Pawˇluꞈ awˬ viˉ awˬ nyi yaˇ miˇ htaꞈ beˆ maˍ laˇ ve, nyi ma taˍ puiˉ ve awˬ hkʼaw lo keunˍ daꞈ cawˇ daꞈ ve veuꞈ kʼaˇ teˇ hpaˍ veuꞈ deh cawˇ ve yoˬ. Heˍlaˍsaˆ hkawˇ chi ve teˇ tawn htaꞈ kʼoˆ ve, awˬ viˉ awˬ nyi yaˇ miˇ keunˍ daꞈ cawˇ daꞈ ve veuꞈ kʼaˇ veuꞈ leh, shu ve dawˇ hkʼaˇ htaꞈ dawˇ nyi piˇ cawˇ ve yoˬ. Co ha hpawˇ ve chaw mawˇ awˬ viˉ awˬ nyi yaˇ miˇ keunˍ daꞈ cawˇ daꞈ ve veuꞈ kʼaˇ veuꞈ ve teˇ gʼaˇ le le htaꞈ ngaˬ hui chiˇ mvuh piˇ gaˇ ve yoˬ.
9. Aˍbiˇgeˍlaˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le?
9 Hkʼa dehꞈ dawˇ nyi puiˉ ve lehˬ, co ha hpawˇ ve chaw mawˇ yaˇ miˇ gʼa cawˬ cawˇ ve awˬ ceuˬ hpehꞈ ve yoˬ. Nyi ma nehˬ lehˍ taˍ puiˉ ve aˬ htoꞈ ma le? Aˬ htoꞈ ma cawˇ maˇ cawˇ ve htaꞈ fuiˍ daꞈ pehˬ daꞈ gʼa leh, cawˇ ve htaꞈ te tuˬ leuˆ yuˬ ve yoˬ. Aˍbiˇgeˍlaˆ ve awˬ lawn htaꞈ teˇ geh nyi sheˍ. Yawˇ ve awˬ hpawˇ dawˇ cheˆ ve maˇ cawˇ ve pa taw, yehˬ kʼa hkʼaw ve chaw hkʼa peu˗eˬ kawˆ tuˬ cawˬ la ve yoˬ. Yaꞈ hkʼaˇ, Aˍbiˇgeˍlaˆ nyi ma taˍ nehˬ ve chaw hpehꞈ ve pa taw, yehˬ kʼa hkʼaw ve chaw hkʼa peu˗eˬ gʼa ponˬ tuˬ ga piˇ gʼa ve yoˬ. (1 Saˍmo˗eˍlaˆ 25:14-23, 32-35) Nyi ma taˍ nehˬ ve chaw hpehꞈ ve lehˬ, hkʼaˬ hkʼe htaˇ tawˇ yaw cawˇ ve leh hkʼaˬ hkʼe htaˇ maˇ yaw cawˇ ve htaꞈ shiˍ tuˬ ga laˇ ve yoˬ. Ngaˬ hui awˬ viˉ awˬ nyi htaꞈ a yeˇ yuˬ ve tehꞈ hpeuꞈ maw piˇ htaˇ, keunˍ daꞈ cawˇ daꞈ ve cawˬ tuˬ kaꞈ ga laˇ ve yoˬ.—1 Hteˇsaˍlawˇniˆ 4:11.
AWˬ BON CAWˬ VE AWˬ CEUˬ TE JAWˬ VE
Liꞈ gʼaw gʼa leh hkʼa dehꞈ bvuhꞈ gʼa ve nawˬ awˬ pon aˬ htoꞈ ma awˬ bon cawˬ ve le? (Awˬ tawn 11 nyi sheˍ)
10-11. Liꞈ gʼaw gʼa ve leh hkʼa dehꞈ bvuhꞈ gʼa ve nawˬ awˬ pon leh awˬ nu ve chaw awˬ pon awˬ bon hkʼaˬ hkʼe cawˬ ve le? (Awˬ han htaꞈ nyi sheˍ.)
10 Awˬ viˉ awˬ nyi yaˇ miˇ awˬ bon cawˬ ve leh awˬ tehˬ yehˇ gʼa ve te hkʼaˇ dawˇ hkʼaˇ cawˬ cawˇ ve yoˬ. Chi ve teˇ hpaˍ yaˇ ehˉ htaˇ kaꞈ cawˬ tcuh ve kʼo, yawˇ a shaꞈ teꞈ ve teˇ co˗e awˬ bon cawˬ ve yoˬ. Te hkʼaˇ dawˇ hkʼaˇ teˇ ceuˬ ceuˬ htaꞈ teˇ geh nyi sheˍ.
11 Gʼaw gʼa leh bvuhꞈ gʼa tcuh ve. Chaw liˇ vaˇ liˇ teˇ ceuˬ ceuˬ kʼo, yaˇ miˇ lehˬ liꞈ gʼaw gʼa leh bvuhꞈ gʼa tuˬ maˇ loˍ tehꞈ laiˉ gʼaˇ dawˇ ve yoˬ. Yaꞈ hkʼaˇ, Hkriꞈ yaˇ teˇ gʼaˇ le le liꞈ gʼaw gʼa leh bvuhꞈ gʼa tuˬ a yeˇ uiˍ jaˇ.d (1 Tiˆmoˉseˍ 4:13) Chi htaꞈ pa taw, liꞈ gʼaw gʼa leh bvuhꞈ gʼa tuˬ haˍ jaˇ tehꞈ nawˬ dawˇ ve htawˇ, coˇ caˇ leh te sheˍ. Nawˬ liꞈ gʼaw gʼa leh hkʼa dehꞈ bvuhꞈ gʼa ve kʼo, aˬ htoꞈ ma awˬ bon gʼa tuˬ le? Nawˬ kanˉ ca sha leh gʼaˇ hpfuhˇ gʼa daꞈ tuˬ ga laˇ gʼa ve yoˬ. Liꞈ henˇ gʼa leh Liꞈ hpu hkʼa dehꞈ maˍ gʼa tuˬ kaꞈ ga laˇ gʼa ve yoˬ. A yeˇ uiˍ jaˇ ve lehˬ, Liꞈ hpu hkʼaw Yaˬhoˉvaˬ ve tawˇ hkawˇ maˍ laˇ ve htaꞈ nawˬ gʼaw leh hkʼa dehꞈ dawˇ nyi ve pa taw, Yaˬhoˉvaˬ geh kaꞈ meuˆ daꞈ tuˬ yoˬ.—Yawˇsuˆ 1:8; 1 Tiˆmoˉseˍ 4:15.
12. Tawˇ naˉ ve liꞈ 31:26 hkʼaw nawˬ na leh tawˇ hkʼa dehꞈ yaw daꞈ gʼa tuˬ hkʼaˬ hkʼe ga laˇ gʼa ve le?
12 Na leh tawˇ hkʼa dehꞈ yaw daꞈ gʼa ve. Chi ve lehˬ Hkriꞈ yaˇ awˬ pon a yeˇ uiˍ jaˇ. Awˬ lawn chi ve htaꞈ caˉ daꞈ ve Yaˍkoˆ beˆ maˍ laˇ ve, “tawˇ haˆ haˆ taˇ yaw. Nyi ma haˆ haˆ taˇ zuhˆ.” (Yaˍkoˆ 1:19) Nawˬ shu tawˇ yaw ve htaꞈ hkʼa dehꞈ na taˍ ve kʼo nawˬ yawˇ htaꞈ “ha kʼaˉ” ve tehꞈ hpeuꞈ maw piˇ chehˇ ve yoˬ. (1 Peˍtruˆ 3:8) Nawˬ shu tawˇ yaw laˇ ve htaꞈ hkʼa dehꞈ maˇ na gʼa ve tehꞈ shiˍ ve kʼo, yawˇ htaꞈ kʼawꞈ na nyi piˇ sheˍ. Nawˬ na gʼa peuˬ hkʼawꞈ nawˉ, nawˬ tawˇ maˇ yaw sheˍ htaˇ a ciˉ dawˇ nyi sheˍ. (Tawˇ naˉ ve 15:28) Nawˬ a shu yawˇ awˬ to htaꞈ na nyi cawˇ ve, ‘ngaˬ tawˇ yaw ve awˬ ceuˬ awˬ tehˬ hpehꞈ leh yawˇ nyi ma sha tuˬ te piˇ˗aw laˇ? Ngaˬ yawˇ htaꞈ yawˆ yan leh ha kʼaˉ ve tehꞈ hpeuꞈ maw piˇ˗aw laˇ?’ Chi hkʼoˆ kaꞈ, awˬ viˉ awˬ nyi yaˇ miˇ co ha hpawˇ ve chaw mawˇ hpehꞈ ve, tawˇ yaw ve awˬ hkʼaˇ leh na ve awˬ hkʼaˇ henˇ yuˬ gʼa ve htaꞈ chaˬ nyi sheˍ. (Tawˇ naˉ ve 31:26 gʼaw sheˍ.) Nawˬ chi ve teˇ hpaˍ htaꞈ hkʼa dehꞈ henˇ yuˬ gʼa ve kʼo, nawˬ awˬ nu ve chaw geh awˬ chawˇ te gʼa leh meuˆ daꞈ gʼa tuˬ yoˬ.
Aˉ hkʼaw kanˉ te kuiˬ shiˍ ve awˬ viˉ awˬ nyi yaˇ miˇ lehˬ yehˬ kʼa hkʼaw leh Hkriꞈ yaˇ awˬ moˍ hkʼaw ve chaw awˬ pon awˬ bon cawˬ ve (Awˬ tawn 13 nyi sheˍ)
13. Nawˬ te jawˬ gʼa tuˬ aˉ hkʼaw ve kanˉ aˬ htoꞈ ma cawˬ ve le? (Awˬ han htaꞈ nyi sheˍ.)
13 Aˉ hkʼaw kanˉ te jawˬ ve. Laiˉ mvuhˇ miˬ hkʼaw aˉ hkʼaw kanˉ te ve lehˬ maˇ˗awˍ kʼo, yaˇ miˇ hpehꞈ ve yoˬ. Nawˬ ve awˬ e maˇ heˆ leh awˬ viˉ awˬ nyi yaˇ miˇ nawˬ aˉ hkʼaw kanˉ te tuˬ maˍ laˇ gʼa ve yoˬ. Awˬ viˉ awˬ nyi yaˇ miˇ teˇ gʼaˇ Seh˗diˆ kʼoˆ ve, “ngaˬ e ngaˬ htaꞈ awˬ hpfuhˇ hkʼaˆ ve teˇ ceuˬ maˍ laˇ ve yoˬ. Chi ve lehˬ kaiˬ ve hkʼaw kanˉ te ve ha lehˬ tuˬ te laˇ ve yoˬ. Ngaˬ e ngaˬ htaꞈ laiˉ ceuˬ maˍ laˇ ve yoˬ. Tawˇ pa haˉ te kʼo, awˬ chiˇ te ve, aˉ hkʼaw daꞈ kehˬ tuˬ te ve, mawˇ tawˉ ve leh mawˇ vuiˬ ve yoˬ. Chi ve teˇ hpaˍ ngaˬ a shaꞈ teꞈ kuiˬ hkʼaw te gʼa tuˬ te laˇ leh, ngaˬ Yaˬhoˉvaˬ ve kanˉ hkʼa dehꞈ te gʼa tuˬ kaꞈ te laˇ ve yoˬ. Ngaˬ shiˍ puiˉ ve chaw hpehꞈ tuˬ kaꞈ ngaˬ e maˍ laˇ ve yoˬ. Awˬ viˉ awˬ nyi laiˉ gʼaˇ haꞈ lu diˬ ve daꞈ ve henˇ yuˬ tuˬ hpehꞈ ve htaꞈ ngaˬ shiˍ daꞈ ve yoˬ.” (Tawˇ naˉ ve 31:15, 21, 22) Awˬ viˉ awˬ nyi yaˇ miˇ kaiˬ ve, hkehˉ chaw htaꞈ haꞈ yuˬ puiˉ ve, aˉ hkʼaw kanˉ te puiˉ ve, chi ve teˇ hpaˍ yehˬ kʼa hkʼaw leh Hkriꞈ yaˇ awˬ moˍ hkʼaw ve chaw awˬ pon awˬ bon cawˬ jaˇ.—Tawˇ naˉ ve 31:13, 17, 27; Tcuh yaˇ 16:15.
14. Awˬ viˉ awˬ nyi Hki˗taˆ ve awˬ lawn nawˬ htaꞈ hkʼaˬ hkʼe maˍ laˇ gʼa ve le? Leh nawˬ aˬ htoꞈ ma htaꞈ dawˇ nyi tuˬ ga laˇ gʼa ve le?
14 A shu yawˇ awˬ to htaꞈ hu gʼa tuˬ ga laˇ ve te hkʼaˇ dawˇ hkʼaˇ htaꞈ henˇ ve. Co ha hpawˇ ve chaw mawˇ teˇ gʼaˇ le le a shu yawˇ awˬ to htaꞈ hu gʼa tuˬ awˬ hkʼaˇ henˇ ve a yeˇ uiˍ jaˇ ve awˬ ceuˬ hpehꞈ ve yoˬ. (Hpiˇliˇpiˆ 4:11) Awˬ viˉ awˬ nyi yaˇ miˇ Hki˗taˆ kʼoˆ ve, “ngaˬ kanˉ ca gʼa tuˬ ngaˬ liꞈ hkʼaˬ hkʼe ve hpawˇ henˇ tuˬ ngaˬ pa ngaˬ e awˬ hkʼaˇ gu laˇ ve yoˬ. Ngaˬ ceˇ leˇ te ve henˇ tuˬ ngaˬ pa beˆ maˍ laˇ ve yoˬ. Chi ve lehˬ ngaˬ awˬ pon daꞈ jaˇ.” Kanˉ gʼa te leh hpu gʼa˗oˬ ve htawˇ, hpu yehˇ tuˬ awˬ hkʼaˇ gu leh awˬ leuˉ maˇ yehˇ tuˬ coˇ caˇ sheˍ. (Tawˇ naˉ ve 31:16, 18) Nawˬ cawˬ taˍ ve awˬ ceuˬ htaꞈ nyi hkʼaˇ suh leh nawˬ jeˬ cha tuˬ awˬ hpfuhˇ hkʼaˆ ve mawˇ maˇ vuiˬ ve kʼo, nawˬ Yaˬhoˉvaˬ ve kanˉ hkʼa dehꞈ te gʼa tuˬ yoˬ.—1 Tiˆmoˉseˍ 6:8.
AWˬ GʼUˇ SUHˍ HPAWˇ TE TUˬ VE AWˬ VUIˬ HTAꞈ GU HEHNˇ TAˍ VE
15-16. Aˬ htoꞈ ma te awˬ viˉ awˬ nyi yaˇ miˇ haˉ awˬ hpfuhˇ hkʼaˆ jaˇ ve le? (Maˍkuˆ 10:29, 30)
15 Nawˬ Gʼuiˬ sha hkʼe leˇ ve te hkʼaˇ dawˇ hkʼaˇ cawˬ leh awˬ bon cawˬ tuˬ te jawˬ˗oˬ ve kʼo, awˬ gʼuˇ suhˍ hpawˇ te tuˬ ve awˬ vuiˬ htaꞈ nawˬ gu hehnˇ taˍ˗oˬ ve yoˬ. Nawˬ te gʼa ve aˬ htoꞈ ma cawˬ ve htaꞈ teˇ geh nyi sheˍ.
16 Nawˬ awˬ ca maˇ cawˬ sheˍ ve. Yeˍsuˆ kʼoˆ ve hkʼa shuˍ yaˇ miˇ teˇ hpaˍ yawˇ hui ve chaw liˇ vaˇ liˇ htaꞈ maˇ hawˍ daꞈ ve htawˇ, awˬ hpawˇ maˇ heuˆ tuˬ dawˇ cheˆ ve yoˬ. (Maꞈhtehˍ 19:10-12) Chaw teˇ hpaˍ kʼo, awˬ nu ve awˬ hkʼaˇ htaꞈ pa taw, awˬ hpawˇ awˬ miˇ ma maˇ heuˆ ve yoˬ. Hkriꞈ yaˇ hpehꞈ ve awˬ hpawˇ awˬ miˇ ma maˇ heuˆ ve chaw htaꞈ Yaˬhoˉvaˬ leh Yeˍsuˆ a yeˇ maˇ uiˍ ve tehꞈ maˇ shawˍ tuˬ yonˍ gʼa ve yoˬ. Miˬ guiˬ chi hkʼoˆ lo awˬ viˉ awˬ nyi yaˇ miˇ haˉ lehˬ, Hkriꞈ yaˇ awˬ moˍ hkʼaw daꞈ ve henˇ yuˬ tuˬ hpehꞈ leh yawˇ hui awˬ nu ve chaw htaꞈ haꞈ leh a yeˇ yuˬ ve tehꞈ hpeuꞈ maw piˇ ve yoˬ. Hkʼe te leh, yawˇ hui Hkriꞈ yaˇ awˬ moˍ hkʼaw ve chaw awˬ pon, awˬ e, awˬ viˉ ma leh, awˬ nyi ma hkʼe hpehꞈ ve yoˬ.—Maˍkuˆ 10:29, 30 gʼaw sheˍ; 1 Tiˆmoˉseˍ 5:2.
17. Awˬ viˉ awˬ nyi yaˇ miˇ haˉ Gʼuiˬ sha ve kanˉ awˬ yanˇ hkʼa biˇ te gʼa tuˬ hkʼaˬ hkʼe te gu teh taˍ gʼa ve le?
17 Nawˬ Gʼuiˬ sha ve kanˉ awˬ yanˇ hkʼa biˇ te ve chaw hpehꞈ ve. Miˬ guiˬ hkʼoˆ lo awˬ viˉ awˬ nyi yaˇ miˇ lehˬ hto toˇ ve htaꞈ ga piˇ ve a yeˇ uiˍ jaˇ. (Chiˇ mvuh ve 68:11) Nawˬ Gʼuiˬ sha ve kanˉ awˬ yanˇ hkʼa biˇ te tuˬ awˬ yanˇ shawˍ teh gʼa˗aw laˇ? Tawˇ pa haˉ te kʼo, nawˬ gʼuˇ suhˍ peuˍ ve chaw te ve, Gʼuiˬ sha ve kanˉ yehˬ te ve hpawˇ ga piˇ ve, maˇ heˆ leh Beˍteˍlaˆ hkʼaw kanˉ te ve yoˬ. Nawˬ dawˇ teh taˍ ve htaꞈ caˉ daꞈ ve bon lawˬ ve, awˬ viˉ awˬ nyi dawˇ teh taˍ ve hkʼe te gʼa˗oˬ ve chaw geh tawˇ yaw daꞈ ve, nawˬ dawˇ teh taˍ ve hkʼe Gʼuiˬ sha ve kanˉ te gʼa tuˬ aˬ htoꞈ ma awˬ hkʼaˇ cawˬ ve htaꞈ nyi sheˍ. Peuˬ hkʼawꞈ nawˉ nawˬ awˬ tehˬ te gʼa ve htaꞈ awˬ hkʼaˇ gu sheˍ. Nawˬ dawˇ teh taˍ ve hkʼe te gʼa˗oˬ ve kʼo, nawˬ Yaˬhoˉvaˬ ve kanˉ awˬ nu ve laiˉ ceuˬ te gʼa tuˬ awˬ hkʼaˇ cawˬ ve yoˬ.
Nawˬ awˬ hpawˇ heuˆ tuˬ dawˇ ve kʼo, a shu nawˬ ve awˬ hpawˇ hpehꞈ tuˬ hkʼa dehꞈ gʼa leuˆ ve (Awˬ tawn 18 nyi sheˍ)
18. Awˬ viˉ awˬ nyi yaˇ miˇ haˉ awˬ hpawˇ heuˆ tuˬ dawˇ cheˆ htaˇ aˬ htoꞈ ma te hkʼa dehꞈ dawˇ nyi cawˇ ve le? (Awˬ han htaꞈ nyi sheˍ.)
18 Nawˬ heuˆ daꞈ tuˬ dawˇ cheˆ ve. Chi awˬ gʼuˇ suhˍ htaˇ kʼoˆ kʼai peuˬ ve laiˉ ceuˬ nawˬ daꞈ ve awˬ miˇ ma hpehꞈ tuˬ ga laˇ gʼa ve yoˬ. Nawˬ heuˆ daꞈ tuˬ dawˇ ve kʼo, chi ve lehˬ nawˬ a shaꞈ teꞈ kuiˬ hkʼaw dawˇ cheˆ ve a yeˇ uiˍ jaˇ ve teˇ ceuˬ hpehꞈ ve pa taw, nawˬ hkʼa dehꞈ gʼa dawˇ nyi ve yoˬ. Nawˬ heuˆ ve chaw nawˬ htaꞈ sheh kʼai laˇ gʼa ve, leh nawˬ yawˇ ve kanˇ paˆ awˬ hawˉ lo gʼa chehˇ ve tehꞈ tawnˇ taˍ sheˍ. (Roˉmaꞈ 7:2; Eˇfeˇsuꞈ 5:23, 33) Chi htaꞈ pa taw, a shu yawˇ awˬ to htaꞈ na nyi cawˇ ve, ‘yawˇ co ha hpawˇ ve chaw mawˇ hpehꞈ˗aw laˇ? Yawˇ awˬ pon Yaˬhoˉvaˬ a yeˇ uiˍ jaˇ tehꞈ shawˍ˗aw laˇ? Yawˇ teˇ lawn lawn htaꞈ dawˇ cheˆ htaˇ cuˇ yiˍ cawˬ ve hkʼaw dawˇ cheˆ˗aw laˇ? Yawˇ te yaꞈ ve kʼo, haꞈ yuˬ˗aw laˇ? Yawˇ yaˇ miˇ htaꞈ yawˆ yan˗aw laˇ? Yawˇ ngaˬ htaꞈ nyi haꞈ shaˉ laˇ gʼa˗aw laˇ? Yawˇ ngaˬ Yaˬhoˉvaˬ geh meuˆ daꞈ tuˬ ga laˇ gʼa˗aw laˇ? Ngaˬ nyi ma luˬ ve maˇ heˆ leh dawˇ haˍ htaˇ, yawˇ ngaˬ htaꞈ awˬ gʼaˇ peꞈ laˇ˗aw laˇ? Yawˇ awˬ vuiˬ htaꞈ a yeˇ yuˬ˗aw laˇ? Tawˇ pa haˉ te kʼo, yawˇ Hkriꞈ yaˇ awˬ moˍ hkʼaw awˬ vuiˬ cawˬ leh yawˇ chi ve htaꞈ hkʼaˬ hkʼe gʼaꞈ te ve le?’ (Luˉkaꞈ 16:10; 1 Tiˆmoˉseˍ 5:8) Nawˬ daꞈ ve awˬ hpawˇ gʼa gaˇ ve kʼo, nawˬ daꞈ ve awˬ miˇ ma gʼa hpehꞈ ve yoˬ.
19. Aˬ htoꞈ ma te ga piˇ shehˍ ma hpehꞈ ve lehˬ yawˆ yan keunˍ jaˇ ve le?
19 Liꞈ hpu hkʼaw kʼoˆ ve, yaˇ miˇ lehˬ awˬ hpawˇ htaꞈ ga piˇ shehˍ ma hpehꞈ tuˬ “ngaˬ yawˇ htaꞈ keunˍ daꞈ ve awˬ chawˇ teˇ gʼaˇ ca piˇ shaˍ.” (Awˬ hkuiˉ puiˍ 2:18) Tawˇ hkawˇ chi ve lehˬ yaˇ miˇ hawˉ hkʼaˆ aꞈ kehˉ a yeˇ maˇ uiˍ ve laˇ? Maˇ heˆ. Awˬ miˇ ma ga piˇ shehˍ ma hpehꞈ ve lehˬ yawˆ yan keunˍ jaˇ ve yoˬ. Awˬ lawn kʼo, Yaˬhoˉvaˬ lehˬ ga piˇ shehˍ hpaˇ hpehꞈ ve tehꞈ Liꞈ hpu hkʼaw laiˉ pawˆ kʼoˆ ve yoˬ. (Chiˇ mvuh ve 54:4; Heˍbrehˇ 13:6) Daꞈ ve awˬ miˇ ma lehˬ, awˬ hpawˇ htaꞈ ga piˇ shehˍ ma hpehꞈ leh yehˬ kʼa hkʼaw awˬ bon cawˬ ve awˬ hpawˇ dawˇ cheˆ htaˇ, yawˇ hkʼa dehꞈ ga piˇ gʼa ve yoˬ. Yawˇ Yaˬhoˉvaˬ htaꞈ haꞈ ve pa taw, awˬ hpawˇ daꞈ ve awˬ meh cawˬ tuˬ kaꞈ te piˇ gʼa ve yoˬ. (Tawˇ naˉ ve 31:11, 12; 1 Tiˆmoˉseˍ 3:11) Chi awˬ gʼuˇ suhˍ hpawˇ te tuˬ ve awˬ vuiˬ htaꞈ ga laˇ gʼa ve yoˬ. Awˬ viˉ awˬ nyi yaˇ miˇ haˉ Yaˬhoˉvaˬ htaꞈ hkʼa dehꞈ haꞈ tuˬ leh chi teˇ hkui kaꞈ yehˬ kʼa hkʼaw leh Hkriꞈ yaˇ awˬ moˍ hkʼaw ga piˇ gʼa ve yoˬ.
20. Daꞈ ve awˬ e hpehꞈ ve lehˬ yehˬ kʼa hkʼaw ve chaw htaꞈ awˬ bon hkʼaˬ hkʼe cawˬ ve le?
20 Nawˬ awˬ e hpehꞈ ve. Heuˆ daꞈ peuˬ hkʼawꞈ nawˉ nawˬ hui yaˇ cawˬ ve yoˬ. (Chiˇ mvuh ve 127:3) Chi htaꞈ pa taw, awˬ gʼuˇ suhˍ hpawˇ ve htaꞈ dawˇ teh taˍ ve lehˬ cuˇ yiˍ cawˬ ve yoˬ. Awˬ lawn chi ve hkʼaw henˇ kʼai peuˬ ve, te hkʼaˇ dawˇ hkʼaˇ teˇ hpaˍ nawˬ daꞈ ve awˬ miˇ ma leh daꞈ ve awˬ e hpehꞈ tuˬ ga laˇ ve yoˬ. Nawˬ haꞈ pehnˇ ve, ha kʼaˉ ve leh yeunˇ hkanˍ ve cawˬ ve tehꞈ hpeuꞈ maw piˇ ve kʼo, yehˬ kʼa hkʼaw dawˇ sha gawˬ lehˍ ve cawˬ tuˬ ga laˇ leh yaˇ kaꞈ awˬ pa awˬ e yawˇ htaꞈ haꞈ leh kawˆ tuˬ maˇ cawˬ ve tehꞈ dawˇ ve yoˬ.—Tawˇ naˉ ve 24:3.
Awˬ viˉ awˬ nyi yaˇ miˇ haˉ laiˉ gʼaˇ co ha hpawˇ ve chaw mawˇ hpehꞈ tuˬ Liꞈ hpu hkʼaw beˆ maˍ laˇ ve htaꞈ yuˬ yehˇ ve (Awˬ tawn 21 nyi sheˍ)
21. Awˬ viˉ awˬ nyi yaˇ miˇ htaꞈ ngaˬ hui hkʼaˬ hkʼe dawˇ ve le? Aˬ htoꞈ ma pa taw chi hkʼe dawˇ ve le? (Awˬ htaꞈ hpawˇ ve awˬ han htaꞈ nyi sheˍ.)
21 Haꞈ ve awˬ viˉ awˬ nyi yaˇ miˇ˗oˬ, nawˬ Yaˬhoˉvaˬ leh awˬ viˉ awˬ nyi awˬ pon te ve pa taw ngaˬ hui nawˬ htaꞈ haꞈ jaˇ. (Heˍbrehˇ 6:10) Nawˬ Gʼuiˬ sha hkʼe ve te hkʼaˇ dawˇ hkʼaˇ cawˬ tuˬ coˇ caˇ leh te ve yoˬ. Nawˬ awˬ to leh awˬ nu ve chaw ha lehˬ ve cawˬ tuˬ, nawˬ coˇ caˇ leh te ve yoˬ. Leh nawˬ awˬ gʼuˇ suhˍ hpawˇ te tuˬ ve awˬ vuiˬ htaꞈ gu hehnˇ taˍ˗oˬ ve yoˬ. Nawˬ Yaˬhoˉvaˬ ve kanˉ hkʼaˇ awˬ pon awˬ hpfuhˇ hkʼaˆ jaˇ.
KʼA MUIˬ HKAWˇ 137 Ka tiꞈ yeˬ ve yaˇ miˇ leh awˬ viˉ awˬ nyi yaˇ miˇ
a Haꞈ ve awˬ viˉ awˬ nyi yaˇ miˇ haˉ˗oˬ, nawˬ lehˬ Hkriꞈ yaˇ awˬ moˍ hkʼaw awˬ hpfuhˇ hkʼaˆ jaˇ ve chaw hpehꞈ ve yoˬ. Nawˬ co ha hpawˇ ve chaw mawˇ hpehꞈ gʼa ve yoˬ. Nawˬ daꞈ ve te hkʼaˇ dawˇ hkʼaˇ leh daꞈ ve awˬ ceuˬ cawˬ tuˬ te jawˬ ve kʼo, awˬ gʼuˇ suhˍ hpawˇ te tuˬ ve awˬ vuiˬ htaꞈ gu hehnˇ taˍ˗oˬ ve yoˬ. Chi hkʼe te ve kʼo, Yaˬhoˉvaˬ ve kanˉ te ve hkʼaw awˬ bon maˇ maˇ gʼa leh ha lehˬ tuˬ yoˬ. Chi ve teˇ hpaˍ awˬ lawn chi ve hkʼaw teˇ geh henˇ tuˬ yoˬ.
b KʼAWꞈ KʼOˆ MAˍ TAˍ VE: Co ha hpawˇ ve chaw mawˇ hpehꞈ ve chaw lehˬ, Gʼuiˬ sha ve awˬ ha hpu beˆ maˍ piˇ ve chaw hpehꞈ ve yoˬ. Miˬ guiˬ ve cuˇ yiˍ beˆ maˍ piˇ ve maˇ heˆ. Yawˇ Yeˍsuˆ ve awˬ lawn htaꞈ henˇ yuˬ ve yoˬ. Yaˬhoˉvaˬ geh hkʼaˬ htaˆ kaꞈ meuˆ daꞈ tuˬ coˇ caˇ leh shu htaꞈ haꞈ ve tehꞈ hpeuꞈ maw piˇ ve yoˬ.
d Liꞈ gʼaw ve a yeˇ hkʼaˬ hkʼe taw uiˍ ve vehˆsaiˉ jw.org hkʼaw “Aˬ htoꞈ ma te liꞈ gʼaw ve yaˇ awˬ pon a yeˇ uiˍ jaˇ ve le?—Awˬ tawn 1: Gʼaw ve maˇ heˆ leh nyi ve?” hkʼaw nyi sheˍ.