Bon lawˬ ve Awˬ hkʼaw lo Gʼuiˬ sha Awˬ paˇ lo Jiˆ laˬ˗oꞈ

1, 2. Aˬ htoꞈ ma pa taw bon lawˬ ve teˇ ceuˬ shu htaꞈ maˇ shuˍ ve le. Leh aˬ htoꞈ ma pa taw chi ve htaꞈ caˉ daꞈ ve Liꞈ hpu awˬ hkʼaw lo hkʼaˬ hkʼe maˍ ve htaꞈ shiˍ tuˬ loˍ ve le.

MVUHˇ HPEUꞈ haˉ htaˇ mvuhˇ naw ma htaꞈ chiˇ nyi ve teˇ yanˇ, uiˍ jaˇ kʼehˬ jaˇ, miˬ guiˬ lehˬ, i jaˇ ve yoˬ. Awˬ tehˬ kʼo, Yaˬhoˉvaˬ mehˆ gʼuˇ suhˍ lo, “Miˬ guiˬ mvuhˇ naw htaꞈ te hpanˍ shehˍ hpaˇ” hpehꞈ ve awˬ hkʼaw lo chaw yaˇ ve chaw ceuˬ teˇ hpaˍ lehˬ, pfuhˇ kʼoˍ hkʼaw iˉ kaˆ teˇ jaˆ hkʼe ceh hpehꞈ ve yoˬ. (Chiˇ mvuh ve liꞈ 115:15; Iˉsaˍyaˆ liꞈ 40:15, MGS ) Yaꞈ hkʼaˇ, Liꞈ hpu awˬ hkʼaw lo kʼoˆ ve, “Yawˇ htaꞈ [Yaˬhoˉvaˬ] kuˬ ve chaw hui awˬ paˇ lo yawˇ chehˇ taˍ ve yoˬ. Yawˇ htaꞈ yawˆ yan ve chaw hui htaꞈ yawˇ hui loˍ ve hkʼe yawˇ piˇ chehˇ ve yoˬ. Yawˇ hui kuˬ hkawˇ htaꞈ yawˇ na yuˬ leh ponˬ piˇ ve yoˬ.” (Chiˇ mvuh ve liꞈ 145:18, 19) Dawˇ nyi sheˍ mehˍ. Awˬ gʼaˇ shuˉiˆ ve Te hpanˍ shehˍ hpaˇ ngaˬ hui awˬ paˇ chehˇ taˍ leh, “Yawˇ hui kuˬ hkawˇ htaꞈ yawˇ na yuˬ” laˇ ve yoˬ. Ngaˬ hui lehˬ, Gʼuiˬ sha geh bon lawˬ ve awˬ hkʼaw lo tawˇ yaw daꞈ tuˬ shu htaꞈ maˇ shuˍ ve teˇ ceuˬ cawˬ ve law.

² Yaꞈ hkʼaˇ, ngaˬ hui ve bon lawˬ hkawˇ htaꞈ Yaˬhoˉvaˬ na yuˬ tcuh gaˇ ve kʼo, yawˇ nyi ma cawˇ tuˬ ve awˬ hkʼaˇ awˬ hkʼaw lo bon gʼa lawˬ ve yoˬ. Bon lawˬ ve teˇ ceuˬ Liꞈ hpu awˬ hkʼaw lo maˍ ve awˬ ceuˬ htaꞈ ngaˬ hui maˇ na gʼa ve kʼo, ngaˬ hui chi hkʼa shuˍ hkʼaˬ hkʼe te gʼa ve le. Bon lawˬ ve awˬ hkʼaw lo Yaˬhoˉvaˬ awˬ paˇ jiˆ laˬ tuˬ awˬ pon, awˬ lawn chi htaꞈ Liꞈ hpu awˬ hkʼaw lo hkʼaˬ hkʼe kʼoˆ ve htaꞈ shiˍ tuˬ a yeˇ uiˍ ve yoˬ.

Aˬ HTOꞈ MA PA TAW YAˬHOˉVAˬ GEH BON LAWˬ VE LE

3. A yeˇ uiˍ ve teˇ hkʼaˇ lehˬ, aˬ htoꞈ ma pa taw ngaˬ hui Yaˬhoˉvaˬ geh bon lawˬ cawˇ ve le.

³ A yeˇ uiˍ ve teˇ hkʼaˇ lehˬ, aˬ htoꞈ ma pa taw Yaˬhoˉvaˬ geh chi hkʼe bon lawˬ tuˬ yawˇ ngaˬ hui htaꞈ kuˬ laˇ ve yoˬ. Yawˇ ve Tawˇ hkawˇ awˬ gʼaˇ peꞈ laˇ ve, “Aˬ htoꞈ ma teˇ ceuˬ awˬ lawn htaꞈ maˇ kʼoˆ, taˇ dawˇ hkiˉ. Teˇ ceuˬ le le awˬ hkʼaw lo nawˬ hui bon lawˬ ve, lawˬ hkawˉ ve leh chiˇ mvuh ve awˬ hkʼaw lo, nawˬ hui hkʼa lawˬ gaˇ ve teˇ hpaˍ Gʼuiˬ sha htaꞈ hto piˇ˗oˆ. Oˇ hkʼe te ve kʼo, Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ lehˬ, nawˬ hui ve nyi ma leh nawˬ hui ve dawˇ hkʼaˇ teˇ hpaˍ htaꞈ Yeˍsuˆ Hkriꞈ awˬ hkʼaw lo haꞈ shaˉ laˇ tuˬ yoˬ.” (Hpiˇliˇpiˆ liꞈ 4:6, 7) Awˬ tehˬ yoˬ, uiˍ jaˇ mvuh jaˇ ve mvuhˇ naw ma miˬ naˆ ma htaꞈ Uˉ peunˍ shehˍ hpaˇ Shuˉiˆ ve ha kʼaˉ ve awˬ hkʼaw lo gu teh taˍ ve htaꞈ ngaˬ hui yehˇ cawˇ ve yoˬ mehˍ.

4. Yaˬhoˉvaˬ geh hkʼaˬ htaˆ kaꞈ bon lawˬ ve teˇ ceuˬ yawˇ awˬ paˇ jiˆ laˬ ve awˬ hkʼaˇ hkʼaˬ hkʼe le.

⁴ Awˬ hkʼaˇ teˇ hkʼaˇ kʼawꞈ cawˬ ve oˇ ve lehˬ, Yaˬhoˉvaˬ geh hkʼaˬ htaˆ kaꞈ bon lawˬ ve teˇ ceuˬ yawˇ awˬ paˇ jiˆ laˬ ve awˬ hkʼaˇ teˇ ceuˬ yoˬ. Awˬ tehˬ ve awˬ chawˇ lehˬ, loˍ htaˇ ceh awˬ chawˇ te ve maˇ heˆ. Yaꞈ hkʼaˇ, awˬ tehˬ ve awˬ chawˇ lehˬ, teˇ gʼaˇ leh teˇ gʼaˇ a yeˇ yuˬ daꞈ ve yoˬ. Awˬ paˇ jiˆ kʼai leh dawˇ haˍ dawˇ hkiˉ ve awˬ ceuˬ, nyi ma hkʼaw lo shoꞈ shaꞈ ve awˬ ceuˬ kʼoˆ piˇ daꞈ ve yoˬ. Teˇ hkʼaˇ hkʼaˇ kʼo, Yaˬhoˉvaˬ Gʼuiˬ sha awˬ paˇ jiˆ laˬ ve htaꞈ shuˍ ve yoˬ. Yaˬhoˉvaˬ htaꞈ caˉ daꞈ ve Liꞈ hpu awˬ hkʼaw lo awˬ tehˬ awˬ na hkʼaˬ hkʼe maˍ ve, yawˇ ve awˬ hoꞈ awˬ han teˇ hkʼaˇ dawˇ hkʼaˇ teˇ hpaˍ, leh yawˇ ve dawˇ law kuiˬ liꞈ chi teˇ kʼoˆ awˬ hkʼaw lo nawˬ gʼa henˇ peuˬ. Yawˇ lehˬ, awˬ tehˬ awˬ na awˬ to cawˬ ve yoˬ tehꞈ, nawˬ gʼa shiˍ ve yoˬ. Bon lawˬ ve teˇ ceuˬ mvuhˇ naw ma hkʼoˆ chehˇ ve nawˬ ve Awˬ pa geh nawˬ dawˇ ve teˇ ceuˬ le le kʼoˆ piˇ ve awˬ yanˇ hpehꞈ ve yoˬ. Chi hkʼe te ve teˇ yanˇ, Yaˬhoˉvaˬ awˬ paˇ jiˆ laˬ ve yoˬ. (Yaˍkoˆ liꞈ 4:8)

TE TUˬ LOˍ VE AWˬ CEUˬ HTAꞈ NGAˬ HUI HKʼAˬ HKʼE TE CAWˇ VE LE

5. Bon lawˬ hkawˇ hkʼa peu˗eˬ htaꞈ Yaˬhoˉvaˬ maˇ na yuˬ tehꞈ, aˬ htoꞈ ma teˇ ceuˬ hpeuꞈ maw laˇ ve le.

⁵ Bon lawˬ hkawˇ hkʼa peu˗eˬ htaꞈ Yaˬhoˉvaˬ na˗aw laˇ. Tcuh kaˍ paˍ Iˉsaˍyaˆ awˬ co˗e Iˉsaˍreˍlaˆ chaw hpfuhˆ htaꞈ yawˇ kʼoˆ piˇ ve, “Nawˬ hui laꞈ sheh chiˇ leh bon lawˬ chehˇ ve htawˇ, ngaˬ nawˬ hui htaꞈ nyi laˇ tuˬ ve maˇ heˆ. Nawˬ hui bon hkʼaˬ ma lawˬ ve htawˇ, ngaˬ na yuˬ laˇ tuˬ ve maˇ heˆ. Awˬ lawn kʼo, nawˬ hui ve laꞈ sheh lehˬ, venˇ baˆ htaꞈ pa taw chaꞈ chiˆ kʼai peuˬ.” (Iˉsaˍyaˆ liꞈ 1:15) Chi htaꞈ pa taw, te ve kanˉ hkʼaˇ teˇ hpaˍ htaꞈ pa taw ngaˬ hui bon lawˬ hkawˇ htaꞈ Gʼuiˬ sha maˇ na ve yoˬ. Ngaˬ hui ve bon lawˬ hkawˇ htaꞈ na laˇ tuˬ awˬ pon, te tuˬ loˍ ve awˬ ceuˬ awˬ hkʼaˇ suh gʼa gʼaꞈ te ve yoˬ.

6. Gʼuiˬ sha ngaˬ hui ve bon lawˬ hkawˇ htaꞈ na yuˬ laˇ tuˬ awˬ pon a yeˇ uiˍ ve te tuˬ loˍ ve awˬ ceuˬ aˬ htoꞈ ma cawˬ ve le. Leh ngaˬ hui hkʼaˬ hkʼe te gʼa ve le.

⁶ Te tuˬ loˍ ve awˬ ceuˬ a yeˇ uiˍ ve awˉ lawˉ teˇ ceuˬ lehˬ, yonˍ ve teˇ ceuˬ yoˬ. (Maˍkuˆ liꞈ 11:24) Awˬ laꞈ gʼawˇ Pawˇluꞈ kʼoˆ ve, “Chaw yaˇ lehˬ, yonˍ ve teˇ ceuˬ maˇ cawˬ ve kʼo, Gʼuiˬ sha nyi hkʼaˇ suh tuˬ te maˇ gʼa. Awˬ lawn kʼo, Gʼuiˬ sha geh jiˆ kʼai ve chaw lehˬ, Gʼuiˬ sha cawˬ ve htaꞈ maˇ kʼoˆ, yawˇ htaꞈ ca ve chaw hui htaꞈ awˬ bon piˇ ve htaꞈ maˇ kʼoˆ, yawˇ gʼa yonˍ ve yoˬ.” (Heˍbrehˇ liꞈ 11:6) Awˬ tehˬ yonˍ ve teˇ ceuˬ Gʼuiˬ sha teꞈ chehˇ ve yoˬ tehꞈ, yonˍ ve ceh tiˉ maˇ heˆ, bon lawˬ hkawˇ teˇ hpaˍ htaꞈ na yuˬ leh hkʼawꞈ laˇ ve yoˬ tehꞈ, gʼa yonˍ ve yoˬ. Ngaˬ hui te tawˆ la ve kanˉ hkʼaˇ lehˬ, yonˍ ve leh maˇ yonˍ ve htaꞈ shiˍ ve yoˬ. Shu htaꞈ yonˍ ve teˇ ceuˬ hpeuꞈ maw piˇ tuˬ teˇ nyi le le gʼa gʼaꞈ te ve yoˬ. (Yaˍkoˆ liꞈ 2:26)

7. (a) Aˬ htoꞈ ma pa taw Yaˬhoˉvaˬ geh bon lawˬ ve awˬ hkʼaw lo tawˇ yaw daꞈ htaˇ, gʼa taˍ uiˍ ve le. (b) Gʼuiˬ sha geh bon lawˬ htaˇ nuˇ nuˇ nehˬ nehˬ ve leh, nyi ma awˬ tawˬ hkʼa gaˬ hteˇ˗ehˍ hkʼaˬ hkʼe te lawˬ gʼa ve le.

⁷ Yawˇ geh bon lawˬ ve awˬ hkʼaw lo tawˇ yaw daꞈ tuˬ ve chaw hui geh nyi ma nuˇ nuˇ nehˬ nehˬ ve leh, nyi ma awˬ tawˬ hkʼa gaˬ hteˇ˗ehˍ tawˆ la ve teˇ ceuˬ loˍ ve yoˬ. Ngaˬ hui Yaˬhoˉvaˬ geh bon lawˬ htaˇ, nyi ma nuˇ nuˇ nehˬ nehˬ te tuˬ cawˬ cawˇ ve laˇ. Tawˇ pa haˉ te kʼo, mvuhˇ miˬ jawˇ mawˇ teˇ gʼaˇ htaꞈ chaw yaˇ hui tawˇ yaw daꞈ ve teˇ yanˇ, taˍ uiˍ ve awˬ hkʼaw lo yaw ve yoˬ. Awˬ lawn kʼo, uˉ peunˍ shehˍ hpaˇ oˇ ve teˇ hpaˍ lehˬ, a yaˇ mvuh ve pa taw yoˬ. Chi htaꞈ pa taw, Yaˬhoˉvaˬ geh tawˇ yaw daꞈ htaˇ, gʼa taˍ uiˍ ve yoˬ mehˍ. (Chiˇ mvuh ve liꞈ 138:6) Awˬ lawn kʼo, yawˇ lehˬ, “kanˇ paˆ uiˍ [Awˬ gʼaˇ shuˉiˆ] ve Gʼuiˬ sha hpehꞈ ve yoˬ.” (Awˬ hkuiˉ puiˍ liꞈ 17:1) Gʼuiˬ sha geh ngaˬ hui bon lawˬ htaˇ, ngaˬ hui yawˇ htaꞈ tawˇ yaw ve awˬ hkʼaw lo yawˇ mehˆ gʼuˇ suhˍ nyi ma nuˇ nuˇ nehˬ nehˬ taˍ leh, i jaˇ nehˬ jaˇ ve yoˬ tehꞈ, gʼa haꞈ yuˬ ve yoˬ. Chi hkʼe nuˇ nuˇ nehˬ nehˬ te ve leh, nyi ma awˬ tawˬ hkʼa gaˬ hteˇ˗ehˍ lawˬ tuˬ awˬ gʼaˇ peꞈ laˇ leh, teˇ nyi le le awˬ hkʼaˇ piˍ htaꞈ tiˉ maˇ gʼa lawˬ ve yoˬ. (Maꞈhtehˍ liꞈ 6:7, 8)

8. Ngaˬ hui bon lawˬ hkawˇ htaꞈ hkʼaˬ hkʼe hawˍ daꞈ piˇ gʼa ve le.

⁸ Te tuˬ loˍ ve awˬ ceuˬ teˇ ceuˬ kʼawꞈ cawˬ sheˍ ve oˇ ve lehˬ, ngaˬ hui bon lawˬ hkawˇ htaꞈ gʼa hawˍ daꞈ piˇ ve yoˬ. Ngaˬ hui te gʼa ve teˇ ceuˬ le le awˬ pon Yaˬhoˉvaˬ dawˇ law ve hkʼe, ngaˬ hui bon lawˬ ve awˬ hkʼaˇ suh gʼa gʼaꞈ te ve yoˬ. Tawˇ pa haˉ te kʼo, ngaˬ hui bon lawˬ htaˇ, “Yaꞈ nyi loˍ ve caˇ tuˬ dawˬ tuˬ teˇ hpaˍ, yaꞈ nyi ngaˬ hui htaꞈ peꞈ laˇ˗oˆ.” Kanˉ hehnˇ ve hkʼaˬ ve kanˉ htawˇ maˇ kʼoˆ ngaˬ hui te gʼa ve yoˬ. (Maꞈhtehˍ liꞈ 6:11; 2 Hteˇsaˍlawˇniˆ liꞈ 3:10) Ngaˬ hui bon lawˬ htaˇ kʼo, venˇ baˆ htaꞈ ga laˇ tuˬ lawˬ ve awˬ hkʼaw lo beˬ kuiˬ lawˇ kuiˬ leh chaw yaˇ te chehˇ ve awˬ ceuˬ awˬ hkʼaw lo maˇ kʼai ve yoˬ. (Kawˇlawˇsehˇ liꞈ 3:5) Chi ve awˬ hkʼoˆ, bon lawˬ ve awˬ hkʼaw lo hkʼawꞈ laˇ tuˬ awˬ pon na hkawˇ cawˬ ve yoˬ.

BON LAWˬ HKAWˇ HTAꞈ HKʼAWꞈ LAˇ TUˬ CAˉ DAꞈ VE NA HKAWˇ TEˇ HPAˍ

9. Ngaˬ hui a shu geh bon lawˬ cawˇ ve le. Leh a shu awˬ meh htaꞈ gʼa cuˇ ve le.

⁹ Ngaˬ hui a shu geh bon lawˬ cawˇ ve le. Bon lawˬ tuˬ Yeˍsuˆ awˬ laꞈ gʼawˇ htaꞈ maˍ piˇ ve, “Mvuhˇ naw ma hkʼoˆ chehˇ ve ngaˬ hui ve Awˬ pa˗oˬ,” (Maꞈhtehˍ liꞈ 6:9) Chi htaꞈ pa taw, ngaˬ hui ve bon lawˬ hkawˇ lehˬ, Yaˬhoˉvaˬ Gʼuiˬ sha geh ceh tiˉ gʼa gaˬ tcuh ve yoˬ. Yaꞈ hkʼaˇ, Yaˬhoˉvaˬ ngaˬ hui geh loˍ ve yawˇ ve Yaˇ hpu tiˍ Yeˍsuˆ Hkriꞈ ve aˉ yaˇ htaꞈ gʼa haꞈ yuˬ ve yoˬ. Awˬ lawn 5 awˬ hkʼaw lo ngaˬ hui gʼa henˇ ve hkʼe, Yaˬhoˉvaˬ Yeˍsuˆ htaꞈ miˬ guiˬ hkʼoˆ peu laˇ leh, suh ve leh venˇ baˆ awˬ hkʼaw lo htaiˍ hkʼawꞈ laˇ tuˬ awˬ pon hkanˍ suh tcuh ve yoˬ. (Yoˇhanˬ liꞈ 3:16; Roˉmaꞈ liꞈ 5:12) Yawˇ Paw hkuˇ Lonˉ leh Suhˉ jehˬ shehˍ hpaˇ hpehꞈ ve yoˬ. (Yoˇhanˬ liꞈ 5:22; Heˍbrehˇ liꞈ 6:20) Chi htaꞈ pa taw, Liꞈ hpu ngaˬ hui htaꞈ kʼoˆ laˇ ve, Yeˍsuˆ awˬ meh awˬ hkʼaw lo gʼa cuˇ ve yoˬ. Yeˍsuˆ yawˇ hkʼaˇ yawˇ kʼoˆ ve, “Ngaˬ lehˬ yaꞈ kʼaw yoˬ. Hteˇ ve cawˇ ve teˇ ceuˬ kaꞈ,” “hpehꞈ ve yoˬ. Ngaˬ htaꞈ maˇ cuˇ kʼo, chaw teˇ gʼaˇ kaꞈ Awˬ pa geh gaˬ maˇ hpehꞈ.” (Yoˇhanˬ liꞈ 14:6) Yaˬhoˉvaˬ ngaˬ hui ve bon lawˬ hkawˇ htaꞈ na laˇ tuˬ awˬ pon, Yaˬhoˉvaˬ geh ceh tiˉ ngaˬ hui bon lawˬ cawˇ leh Yaˇ hpu awˬ meh awˬ hkʼaw lo gʼa cuˇ ve yoˬ.

10. Aˬ htoꞈ ma pa taw, bon lawˬ htaˇ shu htaꞈ maˇ shuˍ ve, mui ve, huˉ ve, awˬ to, laꞈ sheh awˬ heˆ te tuˬ maˇ loˍ ve le.

¹⁰ Ngaˬ hui bon lawˬ htaˇ kʼo, shu htaꞈ maˇ shuˍ ve awˬ ceuˬ, mui ve, maˇ heˆ kʼo huˉ cawˇ ve laˇ. Maˆ heˆ. Yaˬhoˉvaˬ lehˬ, shu htaꞈ maˇ shuˍ ve mui ve, huˉ ve, awˬ to, laꞈ sheh awˬ heˆ te tuˬ maˇ loˍ. Liꞈ hpu awˬ hkʼaw lo maˍ laˇ ve, bon lawˬ ve awˬ hkʼaw lo laiˉ hkʼaˇ te lawˬ hpehꞈ ve yoˬ. Tawˇ pa haˉ te kʼo, mui ve, oˉ kʼoˍ kʼawꞈ te ve, hkui tcuhˉ teh ve, tu huˉ ve kaꞈ hpehꞈ ve yoˬ. (1 Raˍsaˍvanˍ liꞈ 17:16, MGS ; Neˍhaˍmiˆ liꞈ 8:6; Daˍyeˍlaˆ liꞈ 6:10, MGS ; Maˍkuˆ liꞈ 11:25) Shu mawˬ hpehꞈ ve awˬ ceuˬ mui ve, huˉ ve, laꞈ sheh awˬ heˆ te ve a yeˇ maˇ uiˍ, yaꞈ hkʼaˇ cawˇ ve awˬ ceuˬ nyi ma awˬ hkʼaw lo tawˆ la ve teˇ hpaˍ a yeˇ uiˍ ve yoˬ. Awˬ tehˬ kʼo, teˇ nyi le le kanˉ te jaw muiˬ ve awˬ hkʼaw lo laꞈ tcuh laꞈ haˉ gʼa hpuˇ la ve awˬ ceuˬ maˇ kʼoˆ, hkʼaˬ kaꞈ lo chehˇ taˍ ve htawˇ maˇ kʼoˆ, awˬ heˆ hkʼaˬ hkʼe te ve htawˇ maˇ kʼoˆ, nyi ma awˬ hkʼaw lo bon lawˬ hpehꞈ ve yoˬ. Awˬ paˇ awˬ kui chehˇ taˍ ve chaw teˇ hpaˍ maˇ mawˬ ve htawˇ, Yaˬhoˉvaˬ ngaˬ hui ve bon lawˬ hkawˇ htaꞈ na yuˬ laˇ ve yoˬ. (Neˍhaˍmiˆ liꞈ 2:1-6)

11. Ngaˬ hui bon lawˬ ve awˬ hkʼaw lo a shu yawˇ awˬ to awˬ lawn htaꞈ aˬ htoꞈ ma lawˬ hpehꞈ ve le.

¹¹ Ngaˬ hui aˬ htoꞈ ma awˬ pon bon lawˬ cawˇ ve le. Liꞈ hpu awˬ hkʼaw lo kʼaoˍ taˍ ve, “Yawˇ ve a loˍ cawˇ ve hkʼe ngaˬ hui teˇ ceuˬ ceuˬ lawˬ ve kʼo, yawˇ [Yaˬhoˉvaˬ] na yuˬ tuˬ yoˬ.” (1 Yoˇhanˬ liꞈ 5:14) Chi htaꞈ pa taw, Gʼuiˬ sha a loˍ cawˇ ve hkʼe teˇ ceuˬ le le awˬ pon ngaˬ hui lawˬ hpehꞈ ve yoˬ. Ngaˬ hui a shu yawˇ awˬ to dawˇ hkiˉ ve awˬ lawn lawˬ hpehꞈ ve laˇ. Awˬ tehˬ awˬ na lawˬ hpehꞈ ve yoˬ˗ehꞈ. Yaˬhoˉvaˬ geh bon lawˬ htaˇ, awˬ chawˇ awˬ paˇ jiˆ kʼai ve hkʼa shuˍ tawˇ yaw daꞈ hpehꞈ ve yoˬ. Ngaˬ hui nyi ma awˬ hkʼaw lo cawˬ ve teˇ ceuˬ le le yawˇ htaꞈ hto piˇ hpehꞈ ve yoˬ. (Chiˇ mvuh ve liꞈ 62:8) Awˬ ha hpu ga laˇ tuˬ awˬ pon lawˬ ve lehˬ, keunˍ ve yoˬ. Awˬ lawn kʼo, oˇ ve lehˬ, cawˇ ve awˬ ceuˬ htaꞈ te cawˇ tuˬ ga laˇ ve yoˬ. (Luˉkaꞈ liꞈ 11:13) Cuˇ yiˍ cawˬ ve awˬ hkʼaw lo dawˇ cheˆ gʼa ve beˆ maˍ laˇ tuˬ awˬ pon, leh haˍ ve awˬ ceuˬ htaꞈ yeunˇ hkanˍ ve awˬ gʼaˇ cawˬ tuˬ lawˬ hpehꞈ ve yoˬ. (Yaˍkoˆ liꞈ 1:5) Ngaˬ hui venˇ baˆ te ve kʼo, venˇ baˆ hpehˇ laˇ tuˬ awˬ pon Hkriꞈ htaiˍ hkʼawꞈ laˇ ve awˬ hkʼaw lo cuˇ leh lawˬ hpehꞈ ve yoˬ. (Eˇfeˇsuꞈ liꞈ 1:3, 7) Awˬ tehˬ yoˬ, ngaˬ hui a shu yawˇ awˬ to awˬ lawn ceh tiˉ maˇ lawˬ cawˇ, shu htaꞈ caˉ daꞈ ve awˬ lawn kaꞈ lawˬ cawˇ ve yoˬ. Tawˇ pa haˉ te kʼo, ngaˬ hui yehˬ kʼa awˬ hkʼaw lo ve chaw leh, ngaˬ hui geh teˇ geh oˉ kʼoˍ pui chehˇ ve chaw hui awˬ pon lawˬ hpehꞈ ve yoˬ. (Tcuh yaˇ liꞈ 12:5; Kawˇlawˇsehˇ liꞈ 4:12)

12. Ngaˬ hui bon lawˬ ve awˬ hkʼaw lo mvuhˇ naw ma hkʼoˆ chehˇ ve Awˬ pa ve awˬ lawn htaꞈ hkʼaˬ hkʼe te awˉ lawˉ a yeˇ uiˍ jaˇ piˇ cawˇ ve le.

¹² Ngaˬ hui bon lawˬ ve awˬ hkʼaw lo Yaˬhoˉvaˬ Gʼuiˬ sha ve awˬ lawn htaꞈ awˉ lawˉ a yeˇ uiˍ piˇ cawˇ ve yoˬ. Awˬ tehˬ yoˬ, yawˇ ve daꞈ ve awˬ pon ngaˬ hui yawˇ htaꞈ chiˇ mvuh ve awˬ hkʼaw lo awˬ bon uiˍ hkawˇ yaw piˇ ve yoˬ. (1 Raˍsaˍvanˍ liꞈ 29:10-13) Ngaˬ hui bon lawˬ ve awˬ hkʼaw lo Yeˍsuˆ awˬ hkʼaˇ suh henˇ yuˬ tuˬ Maꞈhtehˍ liꞈ 6:9-13 awˬ hkʼaw lo bvuhꞈ taˍ ve yoˬ. Yawˇ lehˬ, ngaˬ hui bon lawˬ tuˬ maˍ laˇ leh kʼoˆ ve, Gʼuiˬ sha ve awˬ meh htaꞈ yawˆ yawˆ yan yan gʼa te ve yoˬ. Tcuhˉ kuiˬ lehˬ, yawˇ ve awˬ meh daꞈ kehˬ jaˇ ve yoˬ. Leh Gʼuiˬ sha ve Uˉ peunˍ ve awˬ moˍ mvuhˇ naw ma hkʼoˆ lo te biˇ ve hkʼa shuˍ yawˇ ve a loˍ miˬ guiˬ hkʼoˆ lo te biˇ la tuˬ lawˬ tcuh laˇ ve yoˬ. Yaˬhoˉvaˬ htaꞈ caˉ daꞈ ve a yeˇ uiˍ ve awˬ lawn chi ve nyiˇ lawn htaꞈ kʼoˆ peuˬ hkʼawꞈ nawˉ, Yeˍsuˆ yawˇ awˬ to htaꞈ caˉ daꞈ ve awˬ lawn yawˇ kʼawꞈ caˉ kʼoˆ ve yoˬ. Ngaˬ hui bon lawˬ ve awˬ hkʼaw lo Gʼuiˬ sha htaꞈ caˉ daꞈ ve awˬ lawn a yeˇ uiˍ jaˇ ve yoˬ tehꞈ, chi hkʼe te lawˬ ve kʼo, ngaˬ hui ve awˬ lawn htaꞈ ceh tiˉ a yeˇ yuˬ ve maˇ heˆ tehꞈ, hpeuꞈ maw piˇ ve yoˬ.

13. Gʼuiˬ sha haꞈ yuˬ ve ngaˬ hui ve bon lawˬ hkawˇ hkʼaˬ maw maw lawˬ tuˬ Liꞈ hpu awˬ hkʼaw lo hkʼaˬ hkʼe kʼoˆ taˍ ve le.

¹³ Ngaˬ hui bon lawˬ ve awˬ hkʼaw lo awˬ yanˇ hkʼaˬ maw maw lawˬ cawˇ ve le. A shu yawˇ hkʼaˇ yawˇ bon lawˬ ve awˬ hkʼaw lo leh awˬ moˍ lonˉ awˬ hkʼaw lo bon hkʼaˬ maw maw lawˬ cawˇ ve Liꞈ hpu awˬ hkʼaw lo maˇ kʼoˆ taˍ. Ngaˬ hui awˍ maˇ caˇ sheˍ htaˇ, bon chi suhˉ˗ehˍ lawˬ hpehꞈ ve yoˬ. Maˇ heˆ leh, ngaˬ hui nyi ma awˬ hkʼaw lo awˬ lawn hkʼa peu˗eˬ Yaˬhoˉvaˬ htaꞈ hto piˇ peuˬ ve kʼo, a shu yawˇ hkʼaˇ yawˇ awˬ yanˇ chi maw maw lawˬ hpehꞈ ve yoˬ. (1 Saˍmo˗eˍlaˆ liꞈ 1:12, 15) Chaw mehˆ gʼuˇ suhˍ lo shu taˍ uiˍ laˇ tuˬ awˬ pon a shu yawˇ awˬ to htaꞈ hteˇ jaˇ cawˇ jaˇ ve yoˬ tehꞈ, shawˍ ve awˬ hkʼaw lo awˬ yanˇ chi maw maw bon lawˬ ve chaw htaꞈ Yeˍsuˆ maˇ dawˇ cawˇ. (Luˉkaꞈ liꞈ 20:46, 47) Bon chi hkʼe te lawˬ ve lehˬ, Yaˬhoˉvaˬ htaꞈ shoꞈ shaꞈ tuˬ te piˇ ve yoˬ. A yeˇ uiˍ jaˇ ve oˇ ve lehˬ, nyi ma hkʼaw lo tawˆ la ve teˇ ceuˬ yoˬ. Chi htaꞈ pa taw, ngaˬ hui bon chi maw maw lawˬ ve awˬ hkʼaw lo Yaˬhoˉvaˬ haꞈ yuˬ laˇ tuˬ, awˬ lawn htaꞈ ceh tiˉ cawˬ ve yoˬ.

14. Ngaˬ hui “hkʼaˬ htaˆ kaꞈ bon lawˬ” tuˬ Liꞈ hpu awˬ gʼaˇ peꞈ laˇ ve teˇ yanˇ tcuhˉ kuiˬ hkʼaˬ hkʼe kʼoˆ gaˇ ve le. Leh chi ve awˬ gʼaˇ hkʼaˬ hkʼe gʼa ve le.

¹⁴ Ngaˬ hui bon hkʼaˬ nyiˇ pawˆ lawˬ cawˇ ve le. Liꞈ hpu ngaˬ hui htaꞈ awˬ gʼaˇ peꞈ laˇ ve, “bon lawˬ ve awˬ hkʼaw lo taˇ hanˇ,” leh “hkʼaˬ htaˆ kaꞈ bon lawˬ,” leh bon lawˬ “tcuhˉ taˍ˗oꞈ.” (Maꞈhtehˍ liꞈ 26:41, MGS ; Roˉmaꞈ liꞈ 12:12; 1 Hteˇsaˍlawˇniˆ liꞈ 5:17) Awˬ tehˬ yoˬ, tawˇ hkawˇ chi ve lehˬ, Yaˬhoˉvaˬ geh teˇ meꞈ liꞈ le le bon lawˬ loˬ tehꞈ, kʼoˆ gaˇ ve maˇ heˆ, chi hkʼe hpehꞈ cawˇ ve htawˇ, Liꞈ hpu awˬ hkʼaw lo ngaˬ hui htaꞈ awˬ gʼaˇ peꞈ laˇ ve, ngaˬ hui htaꞈ peꞈ laˇ ve daꞈ ve awˬ ceuˬ awˬ pon leh beˆ maˍ laˇ tuˬ peꞈ laˇ ve awˬ ceuˬ, dawˇ sha tuˬ peꞈ laˇ ve leh awˬ gʼaˇ peꞈ laˇ ve chi ve teˇ hpaˍ yawˇ geh hkʼaˬ htaˆ kaꞈ bon lawˬ ve awˬ hkʼaw lo awˬ bon uiˍ hkawˇ yaw piˇ cawˇ ve yoˬ. Yaˬhoˉvaˬ geh bon lawˬ ve awˬ hkʼaw lo tawˇ yaw daꞈ tuˬ hkʼaˬ nyiˇ pawˆ leh awˬ yanˇ hkʼaˬ maw lawˬ tuˬ yawˇ maˇ kʼoˆ taˍ ve pa taw awˬ gʼaˇ gʼa ve maˇ heˆ laˇ. Bon lawˬ tuˬ shu htaꞈ maˇ shuˍ ve yoˬ tehꞈ, ngaˬ hui chi hkʼe dawˇ ve kʼo, mvuhˇ naw ma hkʼoˆ chehˇ ve Awˬ pa geh teˇ hkui teˇ hkui ngaˬ hui bon lawˬ hpehꞈ ve yoˬ.

15. Aˬ htoꞈ ma pa taw a shu yawˇ hkʼaˇ yawˇ bon lawˬ peuˬ htaˇ, maˇ kʼoˆ, leh awˬ moˍ lonˉ bon lawˬ peuˬ htaˇ, “A menˬ” tehꞈ, kʼoˆ cawˇ ve le.

¹⁵ Bon lawˬ ve awˬ lehˬ meuˇ htaˇ aˬ htoꞈ ma pa taw “A menˬ” tehꞈ, kʼoˆ ve le. “A menˬ” tehꞈ, kʼoˆ ve tawˇ hkawˇ tcuhˉ kuiˬ lehˬ, awˬ tehˬ yoˬ, maˇ heˆ leh oˇ hkʼe hpehꞈ piˇ˗oˆ kʼoˆ ve tcuhˉ kuiˬ yoˬ. Liꞈ hpu awˬ hkʼaw lo henˇ yuˬ tuˬ cawˬ ve hkʼe a shu yawˇ hkʼaˇ yawˇ bon lawˬ peuˬ htaˇ maˇ kʼoˆ, leh awˬ moˍ lonˉ bon lawˬ peuˬ htaˇ, “A menˬ” tehꞈ, kʼoˆ keunˍ ve yoˬ. (1 Raˍsaˍvanˍ liꞈ 16:36; Chiˇ mvuh ve liꞈ 41:13) A shu yawˇ hkʼaˇ yawˇ bon lawˬ peuˬ ve awˬ hkʼaw lo “A menˬ” kʼoˆ ve lehˬ, a shu yawˇ ve nyi ma awˬ hkʼaw lo awˬ tehˬ awˬ na tawˆ la ve teˇ ceuˬ hpehꞈ ve yoˬ. Hpawnˬ daꞈ kuiˬ awˬ hkʼaw lo teˇ gʼaˇ bon lawˬ peuˬ htaˇ, “A menˬ” kʼoˆ leh awˬ hkawˇ bvuhˬ chaweh kʼoˆ tawˆ ve maˇ kʼoˆ, nyi ma awˬ hkʼaw lo kʼoˆ ve htawˇ maˇ kʼoˆ, yawˇ bon lawˬ hkawˇ hkʼe nyi ma hawˍ daꞈ cawˇ daꞈ ve yoˬ tehꞈ, hpeuꞈ maw piˇ ve teˇ ceuˬ yoˬ. (1 Kawˇrenˍhtuˆ liꞈ 14:16)

GʼUIˬ SHA NGAˬ HUI VE BON LAWˬ HKAWˇ HTAꞈ HKʼAWꞈ LAˇ VE AWˬ HKʼAˇ

16. Bon lawˬ hkawˇ teˇ hpaˍ htaꞈ caˉ daꞈ ve awˬ lawn ngaˬ hui hkʼaˬ hkʼe te yonˍ gʼa ve le.

¹⁶ Bon lawˬ hkawˇ teˇ hpaˍ htaꞈ Yaˬhoˉvaˬ awˬ tehˬ awˬ na hkʼawꞈ laˇ ve laˇ. Awˬ tehˬ awˬ na hkʼawꞈ laˇ ve yoˬ˗ehꞈ neˬ. Ngaˬ hui yonˍ gʼa ve awˬ hkʼaˇ lonˉ, “bon lawˬ hkawˇ htaꞈ na yuˬ laˇ [“shehˍ hpaˇ,” MGS ]” lehˬ, awˬ tehˬ awˬ na nyi ma awˬ hkʼaw lo hteˇ lehˬ, laiˉ lanˬ gʼaˇ ve bon lawˬ hkawˇ htaꞈ hkʼawꞈ laˇ ve yoˬ. (Chiˇ mvuh ve liꞈ 65:2) Ngaˬ hui ve bon lawˬ hkawˇ htaꞈ Yaˬhoˉvaˬ hkʼawꞈ laˇ ve awˬ hkʼaˇ laiˉ hkʼaˇ cawˬ ve yoˬ.

17. Gʼuiˬ sha lehˬ yawˇ ve mvuhˇ naw ma tcuh yaˇ leh, miˬ guiˬ hkʼoˆ lo chehˇ ve yawˇ ve kanˉ te ve chaw htaꞈ yehˇ ve awˬ hkʼaw lo ngaˬ hui ve bon lawˬ hkawˇ htaꞈ hkʼawꞈ laˇ ve yoˬ tehꞈ, aˬ htoꞈ ma pa taw kʼoˆ hpehꞈ ve le.

¹⁷ Yaˬhoˉvaˬ lehˬ, mvuhˇ naw ma tcuh yaˇ leh, miˬ guiˬ hkʼoˆ lo chehˇ ve yawˇ ve kanˉ te ve chaw htaꞈ yehˇ ve awˬ hkʼaw lo bon lawˬ hkawˇ htaꞈ hkʼawꞈ piˇ ve yoˬ. (Heˍbrehˇ liꞈ 1:13, 14) Hpuˇ laˬ jaw ve chaw laiˉ gʼaˇ lehˬ, Liꞈ hpu awˬ hkʼaw lo na gʼa tuˬ awˬ pon ga laˇ tuˬ Gʼuiˬ sha geh bon lawˬ ve awˬ hkʼaw lo maˇ maw maw gaˬ leh, Yaˬhoˉvaˬ ve kanˉ te ve chaw teˇ gʼaˇ yawˇ htaꞈ hkʼawꞈ piˇ ve yoˬ. Chi hkʼe hpuˇ laˬ jaw ve teˇ ceuˬ lehˬ, mvuhˇ naw ma tcuh yaˇ sheh kʼai ve awˬ hkʼaw lo Uˉ peunˍ ve awˬ moˍ htaꞈ caˉ daꞈ ve awˬ lawn hto piˇ ve yoˬ tehꞈ, hpeuꞈ maw piˇ chehˇ ve yoˬ. (Hpeuꞈ maˍ ve liꞈ 14:6) Ngaˬ hui awˬ tehˬ awˬ na loˍ htaˇ, Yaˬhoˉvaˬ ga laˇ tuˬ lawˬ ve awˬ hkʼaw lo Hkriꞈ yaˇ teˇ gʼaˇ htaꞈ awˬ gʼaˇ piˇ leh, ngaˬ hui htaꞈ ga laˇ gʼa tuˬ yoˬ. (Tawˇ naˉ ve liꞈ 12:25; Yaˍkoˆ liꞈ 2:16)

18. Yaˬhoˉvaˬ lehˬ, awˬ ha hpu leh yawˇ ve Tawˇ hkawˇ htaꞈ yehˇ ve awˬ hkʼaw lo yawˇ ve kanˉ te ve chaw ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le.

¹⁸ Yaˬhoˉvaˬ Gʼuiˬ sha lehˬ, awˬ ha hpu leh yawˇ ve Tawˇ hkawˇ Liꞈ hpu htaꞈ yehˇ ve awˬ hkʼaw lo yawˇ ve kanˉ te ve chaw ve bon lawˬ hkawˇ htaꞈ hkʼawꞈ piˇ ve yoˬ. Ngaˬ hui ve bon lawˬ hkawˇ htaꞈ hkʼawꞈ piˇ ve awˬ hkʼaw lo beˬ ve lawˇ ve htaꞈ yeunˇ hkanˍ gʼaˇ tuˬ yawˇ ve awˬ ha hpu sheh kʼai piˇ ve awˬ hkʼaw lo awˬ gʼaˇ piˇ ve yoˬ. (2 Kawˇrenˍhtuˆ liꞈ 4:7, MGS ) Laiˉ pawˆ kʼoˆ, Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ ve teˇ ceuˬ lehˬ, ngaˬ hui cuˇ yiˍ cawˬ leh dawˇ cheˆ ve awˬ hkʼaw lo beˆ maˍ laˇ tuˬ htaꞈ lawˬ ve teˇ yanˇ, Liꞈ hpu awˬ hkʼaw lo ga laˇ ve yoˬ. Ngaˬ hui a shu yawˇ hkʼaˇ yawˇ Liꞈ hpu htaꞈ henˇ ve teˇ yanˇ, Hkriꞈ yaˇ ve liꞈ teˇ hpaˍ chi teˇ kʼoˆ htaꞈ gʼaw ve hkʼa shuˍ, Liꞈ hpu awˬ tawn teˇ hpaˍ hpeuꞈ gʼaw ve kʼo, ga laˇ gʼa ve yoˬ. Hkriꞈ yaˇ hui hpawnˬ daꞈ kuiˬ lo ngaˬ hui kʼai ve awˬ hkʼaw lo ngaˬ hui htaꞈ a yeˇ te laˇ ve Hkriꞈ yaˇ awˬ moˍ awˬ hkʼaw lo chaw mawˇ chaw kehˉ kʼoˆ ve tawˇ hkawˇ htaꞈ gʼa kaˇ ve teˇ yanˇ, Liꞈ hpu awˬ tawn teˇ hpaˍ ngaˬ hui htaꞈ ga laˇ gʼa tuˬ yoˬ. (Gaˍlaˍtiˆ liꞈ 6:1)

19. Ngaˬ hui bon lawˬ hkawˇ htaꞈ maˇ hkʼawꞈ laˇ ve kʼo, ngaˬ hui aˬ htoꞈ ma htaꞈ tawnˇ taˍ cawˇ ve le.

¹⁹ Ngaˬ hui bon lawˬ hkawˇ htaꞈ Yaˬhoˉvaˬ hkʼawꞈ laˇ naiˇ ve kʼo, bon lawˬ hkawˇ htaꞈ yawˇ maˇ hkʼawꞈ laˇ gʼa kʼoˆ gaˇ ve maˇ heˆ. Yawˇ ve a loˍ awˬ hkʼaˇ suh awˬ yanˇ cawˇ cawˇ hkʼawꞈ laˇ ve yoˬ tehꞈ tawnˇ taˍ loˬ. Ngaˬ hui loˍ ve yoˬ tehꞈ, yawˇ shiˍ leh, ngaˬ hui aꞈ kehˉ yawˇ nyi haꞈ shaˉ laˇ daꞈ ve yoˬ. Laiˉ pawˆ ngaˬ hui lawˬ loˬ, ca loˬ, yehˬ miˉ htaꞈ htawˆ tcuhˉ taˍ loˬ. (Luˉkaꞈ liꞈ 11:5-10, MGS ) Chi hkʼe te ve awˬ hkʼaw lo ngaˬ hui loˍ jaˇ leh awˬ tehˬ yonˍ ve yoˬ tehꞈ, Gʼuiˬ sha htaꞈ hpeuꞈ maw piˇ ve yoˬ. Chi ve awˬ hkʼoˆ, ngaˬ hui ve bon lawˬ hkawˇ htaꞈ Yaˬhoˉvaˬ hkʼawꞈ laˇ ve awˬ hkʼaˇ ngaˬ hui hkʼa tawˍ lehˆ maˇ mawˬ. Henˇ yuˬ tuˬ tawˇ pa haˉ te kʼo, ngaˬ hui beˬ ve lawˇ ve awˬ pon bon lawˬ puiˉ ve kʼo, yawˇ lehˬ, beˬ ve lawˇ ve oˇ ve htaꞈ yuˬ baˬ laˇ ve maˇ heˆ. Yaꞈ hkʼaˇ, yawˇ lehˬ, ngaˬ hui yeunˇ hkanˍ gʼaˇ tuˬ awˬ gʼaˇ peꞈ laˇ ve yoˬ. (Hpiˇliˇpiˆ liꞈ 4:13)

20. Aˬ htoꞈ ma pa taw ngaˬ hui hkʼaˬ htaˆ kaꞈ bon lawˬ cawˇ ve le.

²⁰ Mvuhˇ naw ma uiˍ jaˇ kʼehˬ jaˇ ve Te hpanˍ shehˍ hpaˇ lehˬ, cawˇ ve awˬ hkʼaw lo bon lawˬ chehˇ ve chaw teˇ gʼaˇ le le awˬ paˇ chehˇ taˍ ve pa taw, ngaˬ hui awˬ bon uiˍ jaˇ ve yoˬ mehˍ. (Chiˇ mvuh ve liꞈ 145:18) Awˬ lawn kʼo, shu htaꞈ maˇ shuˍ ve Yaˬhoˉvaˬ geh bon lawˬ hpehꞈ ve pa taw, hkʼaˬ htaˆ kaꞈ bon lawˬ cawˇ ve yoˬ. Ngaˬ hui chi hkʼe te ve kʼo, Yaˬhoˉvaˬ bon lawˬ hkawˇ htaꞈ Na yuˬ laˇ shehˍ hpaˇ awˬ paˇ shaˬ gʼa jiˆ loꞈ la leh awˬ paˇ shaˬ gʼa kʼawꞈ jiˆ laˬ ve pa taw ngaˬ hui ha lehˬ jaˇ ve yoˬ.