Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ˗aw laˇ?

1-2. Aˬ htoꞈ ma te teˇ pawˆ pawˆ kʼo Yaˬhoˉvaˬ ngaˬ hui ve bon lawˬ hkawˇ htaꞈ maˇ hkʼawꞈ laˇ sheˍ ve le tehꞈ dawˇ ve le?

Liꞈ hpu hkʼaw kʼoˆ ve, “nawˬ ve ha lehˬ tuˬ Gʼuiˬ sha geh ca˗o. Oˇ hkʼe te ve kʼo, nawˬ heuˆ gaˇ ve awˬ ceuˬ yawˇ nawˬ htaꞈ piˇ laˇ tuˬ yoˬ.” (Chiˇ mvuh ve 37:4) Chi ve lehˬ, daꞈ jaˇ ve ka tiꞈ hpehꞈ ve maˇ heˆ laˇ? Yaꞈ hkʼaˇ, Yaˬhoˉvaˬ lehˬ, ngaˬ hui ve bon lawˬ hkawˇ teˇ ceuˬ le le htaꞈ hkʼawꞈ laˇ tuˬ dawˇ law gʼa˗aw laˇ? Aˬ htoꞈ ma te ngaˬ hui chi hkʼe dawˇ ve le? Tawˇ pa haˉ chi ve htaꞈ teˇ geh nyi sheˍ. Awˬ viˉ awˬ nyi yaˇ miˇ teˇ gʼaˇ, Gʼuiˬ sha ve mvuhˇ miˬ hto toˇ ve liꞈ henˇ yehˬ lo kʼai gaˇ jaˇ ve yoˬ. (SKE) Yawˇ liꞈ henˇ yehˬ chi ve hkʼaw gʼa kʼai tuˬ Yaˬhoˉvaˬ geh bon lawˬ ve yoˬ. Yaꞈ hkʼaˇ, ponˬ kʼai ve laiˉ hkʼawꞈ gaˬ˗oˬ ve htawˇ, liꞈ henˇ yehˬ chi ve hkʼaw kʼai tuˬ maˇ kuˬ piˇ sheˍ. Awˬ viˉ awˬ nyi yaˇ nehˬ teˇ gʼaˇ maˇ chehˇ sha ve yoˬ. Yawˇ naˬ chehˇ ve htaꞈ gu na˗e laˇ leh Hkriꞈ yaˇ awˬ moˍ hkʼaw awˬ vuiˬ maˇ maˇ te gʼa tuˬ Yaˬhoˉvaˬ geh bon lawˬ ve yoˬ. Yaꞈ hkʼaˇ, yawˇ naˬ ve maˇ hkehnˇ la sheˍ. Shaˉhkiˆhkanˍ ve chaw hpehꞈ ve awˬ pa awˬ e yaˇ Yaˬhoˉvaˬ ve kanˉ te tuˬ leh awˬ tehˬ ve hkʼaw chehˇ tuˬ bon lawˬ ve yoˬ. Yaꞈ hkʼaˇ, yaˇ Yaˬhoˉvaˬ ve kanˉ maˇ te˗o.

² Chi hkʼe ve nawˬ gʼa hpuˇ jaw˗aw laˇ? Nawˬ Yaˬhoˉvaˬ geh teˇ ceuˬ ceuˬ gʼa tuˬ bon lawˬ ve yoˬ. Yaꞈ hkʼaˇ, nawˬ lawˬ ve hkʼe yawˇ maˇ peꞈ laˇ sheˍ ve pa taw, Gʼuiˬ sha awˬ nu ve chaw ve bon lawˬ hkawˇ htaꞈ hkʼawꞈ piˇ ve tehꞈ nawˬ hkʼaˇ nawˬ dawˇ ve yoˬ. Yaꞈ hkʼaˇ, nawˬ ve bon lawˬ hkawˇ htaꞈ maˇ hkʼawꞈ laˇ sheˍ. Maˇ heˆ leh Gʼuiˬ sha maˇ dawˇ cawˇ ve awˬ ceuˬ htaꞈ nawˬ te yaꞈ ve hehˉ tehꞈ nawˬ hkʼaˇ nawˬ dawˇ ve yoˬ. Awˬ viˉ awˬ nyi yaˇ miˇ Ca˗nib kaꞈ chi hkʼe dawˇ ve yoˬ. Yawˇ leh awˬ hpawˇ Beˍteˍlaˆ hkʼaw kanˉ te gaˇ jaˇ ve pa taw, Yaˬhoˉvaˬ geh bon lawˬ ve yoˬ. Yawˇ kʼoˆ ve, “maˇ maw kʼo Beˍteˍlaˆ hkʼaw kanˉ gʼa te tuˬ yoˬ tehꞈ ngaˬ hkʼaˇ ngaˬ dawˇ ve yoˬ.” Yaꞈ hkʼaˇ, laiˉ ha pa, laiˉ hkʼawꞈ peuˬ kʼai ve htawˇ, Beˍteˍlaˆ hkʼaw kanˉ te tuˬ maˇ kuˬ laˇ sheˍ. Ca˗ni kʼoˆ ve, “ngaˬ maˇ na gʼa leh nyi ma luˬ jaˇ ve yoˬ. Ngaˬ Gʼuiˬ sha maˇ dawˇ cawˇ ve teˇ ceuˬ ceuˬ te ve hehˉ tehꞈ dawˇ ve yoˬ. Awˬ lawn chi htaꞈ caˉ daꞈ ve ngaˬ bon hkʼa dehꞈ lawˬ ve yoˬ. Gʼuiˬ sha htaꞈ hteˇ˗ehˬ kʼoˆ piˇ˗oˬ ve htawˇ, aˬ htoꞈ ma te Gʼuiˬ sha ngaˬ ve bon lawˬ hkawˇ htaꞈ maˇ hkʼawꞈ laˇ sheˍ ve le?”

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Teˇ pawˆ pawˆ kʼo, nawˬ htawˇ dawˇ nawˬ dawˇ cawˬ ve, Yaˬhoˉvaˬ nawˬ ve bon lawˬ hkawˇ htaꞈ na laˇ˗aw hehˉ laˇ? Oˇ htaˇ teˇ co˗e Yaˬhoˉvaˬ ve kanˉ te ve chaw kaꞈ, chi hkʼa shuˍ dawˇ jaw ve yoˬ. (Yawˇbaˆ 30:20; Chiˇ mvuh ve 22:2; Haˍbaˍkuˆ 1:2) Yaˬhoˉvaˬ nawˬ ve bon lawˬ hkawˇ htaꞈ na leh hkʼawꞈ laˇ tuˬ yoˬ tehꞈ yonˍ gʼa tuˬ aˬ htoꞈ ma ga laˇ gʼa ve le? (Chiˇ mvuh ve 65:2) Awˬ hawˉ lo ve na hkawˇ teˇ hpaˍ htaꞈ hkʼawꞈ laˇ tuˬ, a yeˇ uiˍ ve awˬ lawn htaꞈ caˉ daꞈ ve awˉ lawˉ teˇ geh nyi sheˍ. Chi ve lehˬ, (1) ngaˬ hui Yaˬhoˉvaˬ geh aˬ htoꞈ ma dawˇ law gʼa ve le? (2) Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le? Leh (3) aˬ htoꞈ ma te teˇ pawˆ pawˆ ngaˬ hui ve bon lawˬ hkawˇ gʼa pa cawˇ ve le?

NGAˬ HUI YAˬHOˉVAˬ GEH Aˬ HTOꞈ MA DAWˇ LAW GʼA VE LE?

4. Yeˍraˍmiˆ liꞈ 29:12 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ aˬ htoꞈ ma ka tiꞈ te taˍ laˇ ve le?

⁴ Yaˬhoˉvaˬ ngaˬ hui ve bon lawˬ hkawˇ htaꞈ na laˇ tuˬ yoˬ tehꞈ ka tiꞈ te taˍ laˇ ve. (Yeˍraˍmiˆ 29:12 gʼaw sheˍ.) Yaˬhoˉvaˬ yawˇ ve kanˉ te ve ka tiꞈ yeˬ ve chaw teˇ gʼaˇ le le htaꞈ haꞈ jaˇ ve yoˬ. Chi htaꞈ pa taw, yawˇ yawˇ hui ve bon lawˬ hkawˇ htaꞈ na piˇ tuˬ yoˬ. (Chiˇ mvuh ve 10:17; 37:28) Yaꞈ hkʼaˇ, chi kʼoˆ gaˇ ve lehˬ ngaˬ hui lawˬ ve teˇ ceuˬ le le htaꞈ Yaˬhoˉvaˬ peꞈ laˇ tuˬ ve maˇ heˆ. Teˇ pawˆ pawˆ kʼo, ngaˬ hui loˍ ve awˬ ceuˬ miˬ guiˬ awˬ suhˉ hkʼaw gaˬ htaˇ hkʼa gaˬ gʼa law cawˇ ve yoˬ.

5. Yaˬhoˉvaˬ ngaˬ hui ve bon lawˬ hkawˇ htaꞈ na htaˇ yawˇ aˬ htoꞈ ma htaꞈ dawˇ nyi ve le? Tawˇ pa haˉ kʼoˆ maˍ laˇ sheˍ.

⁵ Yaˬhoˉvaˬ ngaˬ hui ve bon lawˬ hkawˇ htaꞈ na htaˇ yawˇ ve a loˍ htaꞈ hkʼaˬ htaˆ kaꞈ dawˇ nyi ve. (Iˉsaˍyaˆ 55:8, 9) Yaˬhoˉvaˬ ve a loˍ teˇ ceuˬ lehˬ, miˬ guiˬ hkʼoˆ lo ve chaw yaˇ hkʼa peu˗eˬ yawˇ uˉ peunˍ ve awˬ hawˉ lo ha lehˬ ha kʼa chehˇ tcuh gaˇ ve yoˬ. Yaꞈ hkʼaˇ, Saˍtanˍ kʼoˆ ve a shu yawˇ hkʼaˇ yawˇ gʼa uˉ peunˍ ve kʼo ha lehˬ jaˇ tuˬ yoˬ. (Awˬ hkuiˉ puiˍ 3:1-5) Leh Saˍtanˍ heˍ ve tehꞈ hpeuꞈ maw piˇ tuˬ, Yaˬhoˉvaˬ lehˬ chaw yaˇ a shu yawˇ hkʼaˇ yawˇ uˉ peunˍ tcuh ve yoˬ. Leh chi beuꞈ teˇ co˗e chaw yaˇ uˉ peunˍ ve luˬ ve sheˆ ve htaꞈ ceh tiˉ gʼa hpuˇ ve tehꞈ ngaˬ hui gʼa mawˬ ve yoˬ. (Cuˇ yiˍ piˇ ve 8:9) Chi teˇ hkui chaw yaˇ gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ Yaˬhoˉvaˬ maˇ gu laˇ sheˍ ve tehꞈ ngaˬ hui gʼa mawˬ ve yoˬ. Yawˇ chi hkʼe te ve kʼo, chaw yaˇ a shu yawˇ hkʼaˇ yawˇ uˉ peunˍ gʼa leh yawˇ hui shoꞈ shaꞈ ve htaꞈ gu gʼa ve tehꞈ chaw teˇ hpaˍ kʼoˆ tuˬ yoˬ.

6. Yaˬhoˉvaˬ ngaˬ hui htaꞈ haꞈ leh hteˇ jaˇ cawˇ jaˇ ve tehꞈ aˬ htoꞈ ma te ngaˬ hui yonˍ gʼa cawˇ ve le?

⁶ Yaˬhoˉvaˬ lehˬ teˇ pawˆ leh teˇ pawˆ ve bon lawˬ hkawˇ htaꞈ hkʼawꞈ laˇ ve maˇ shuˍ daꞈ. Tawˇ pa haˉ chi htaꞈ teˇ geh nyi sheˍ. Heˍsaˍkiˆ naˬ jaˇ leh suh la paˇ neˇ htaˇ, Yaˬhoˉvaˬ yawˇ htaꞈ gu na˗e laˇ tuˬ bon lawˬ ve yoˬ. Leh Gʼuiˬ sha kaꞈ yawˇ ve bon lawˬ hkawˇ htaꞈ hkʼawꞈ piˇ ve yoˬ. (2 Jawˇmawˇ 20:1-6) Yaꞈ hkʼaˇ, Pawˇluꞈ ve awˬ lawn lehˬ yawˇ htaꞈ ‘awˬ suhˍ awˬ shaˍ hpawˇ ve aˉ chuˇ teˇ maˬ tcuhˍ laˇ ve yoˬ.’ Chi ve lehˬ, yawˇ a naˍ teˇ ceuˬ ceuˬ hpehꞈ ve htaꞈ kʼoˆ gaˇ ve yoˬ. Leh Pawˇluꞈ Yaˬhoˉvaˬ yawˇ htaꞈ gu na˗e laˇ tuˬ bon lawˬ ve yoˬ. Yaꞈ hkʼaˇ, yawˇ lawˬ ve hkʼe Gʼuiˬ sha maˇ te piˇ. (2 Kawˇrenˍhtuˆ 12:7-9) Chi hkʼoˆ kaꞈ, Peˍtruˆ leh Yaˍkoˆ ve awˬ lawn htaꞈ teˇ geh nyi sheˍ. Jawˇ mawˇ Heˍroˆ yawˇ huiˉ maˬ htaꞈ tiˇ pehˍ gaˇ leh Hkriꞈ yaˇ awˬ moˍ hkʼaw ve awˬ viˉ awˬ nyi yawˇ hui awˬ pon bon lawˬ piˇ ve yoˬ. Yaꞈ hkʼaˇ, Yaˍkoˆ htaꞈ tiˇ pehˍ piˇ ve htawˇ, Peˍtruˆ htaꞈ Yaˬhoˉvaˬ ga ponˬ piˇ ve yoˬ. (Tcuh yaˇ 12:1-11) Aˬ htoꞈ ma te Yaˬhoˉvaˬ Peˍtruˆ htaꞈ ga ponˬ piˇ ve le tehꞈ ngaˬ hui htawˇ dawˇ nawˬ dawˇ cawˬ ve yoˬ. Yaꞈ hkʼaˇ, aˬ htoꞈ ma te Yaˍkoˆ htaꞈ maˇ ga piˇ ve le? Awˬ lawn chi ve Liꞈ hpu hkʼaw hkʼa tawˍ lehˆ maˇ gʼa kʼoˆ laˇ taˬ.c Yaꞈ hkʼaˇ, Yaˬhoˉvaˬ lehˬ “hteˇ cawˇ jaˇ ve yoˬ” tehꞈ ngaˬ hui yonˍ gʼa ve yoˬ. (Bon maˍ ve 32:4) Yaˬhoˉvaˬ lehˬ Peˍtruˆ leh Yaˍkoˆ htaꞈ haꞈ ve tehꞈ ngaˬ hui shiˍ ve yoˬ. (Hpeuꞈ maˍ ve 21:14) Teˇ pawˆ pawˆ kʼo, ngaˬ hui Yaˬhoˉvaˬ geh teˇ ceuˬ ceuˬ lawˬ ve yoˬ. Yaꞈ hkʼaˇ, ngaˬ hui lawˬ ve hkʼe yawˇ maˇ peꞈ laˇ. Yaˬhoˉvaˬ ngaˬ hui htaꞈ haꞈ leh yawˇ hteˇ ve cawˇ ve yoˬ tehꞈ ngaˬ hui yonˍ gʼa ve yoˬ. Chi htaꞈ pa taw, Yaˬhoˉvaˬ ngaˬ hui dawˇ taˍ leh lawˬ ve hkʼe maˇ hkʼawꞈ laˇ ve htawˇ teꞈ chiˉ maˇ heˆ.—Yawˇbaˆ 33:13.

7. Ngaˬ hui aˬ htoꞈ ma maˇ te cawˇ ve le? Leh aˬ htoꞈ ma pa taw le?

⁷ Ngaˬ hui lehˬ awˬ nu ve chaw htaꞈ maˇ tehˆ daꞈ cawˇ. Tawˇ pa haˉ te kʼo, ngaˬ hui Yaˬhoˉvaˬ geh teˇ ceuˬ ceuˬ lawˬ ve yoˬ. Yaꞈ hkʼaˇ, ngaˬ hui lawˬ ve hkʼe yawˇ maˇ hkʼawꞈ laˇ sheˍ. Awˬ nu ve awˬ viˉ awˬ nyi ngaˬ hui hkʼa shuˍ lawˬ ve htaꞈ Yaˬhoˉvaˬ hkʼawꞈ piˇ ve tehꞈ, ngaˬ hui shiˍ la ve yoˬ. Awˬ viˉ awˬ nyi Ehn˗na ve awˬ lawn htaꞈ teˇ geh nyi sheˍ. Yawˇ ve awˬ hpawˇ Maꞈhtehˍ mvuhˇ haˉ caˇ ve a naˍ na˗e la tuˬ yawˇ bon lawˬ leh, oˇ ve teˇ yanˇ awˬ viˉ awˬ nyi chaw mawˇ ma 2 gʼaˇ mvuhˇ haˉ caˇ ve a naˍ hpehꞈ ve yoˬ. Ehn˗na Maꞈhtehˍ leh awˬ viˉ awˬ nyi yaˇ miˇ chi 2 gʼaˇ awˬ pon kaꞈ bon lawˬ ve yoˬ. Yaˇ miˇ chi 2 gʼaˇ na˗e la ve yoˬ. Yaꞈ hkʼaˇ, Maꞈhtehˍ suh˗e ve yoˬ. Awˬ viˉ awˬ nyi yaˇ miˇ chi 2 gʼaˇ na˗e ve lehˬ Yaˬhoˉvaˬ ga piˇ ve pa taw laˇ tehꞈ, awˉ lawˉ htaˇ Ehn˗na htawˇ dawˇ nawˬ dawˇ cawˬ ve yoˬ. Hkʼe kʼo, aˬ htoꞈ ma te yawˇ ngaˬ ve awˬ hpawˇ htaꞈ maˇ ga piˇ ve le? Awˬ viˉ awˬ nyi yaˇ miˇ chi 2 gʼaˇ hkʼaˬ hkʼe te na˗e la ve ngaˬ hui maˇ shiˍ ve yoˬ. Yaꞈ hkʼaˇ, ngaˬ hui gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ Yaˬhoˉvaˬ gu laˇ luˬ yoˬ tehꞈ shiˍ ve yoˬ. Leh Yaˬhoˉvaˬ yawˇ ve awˬ chawˇ suh˗oˬ ve htaꞈ kʼawꞈ teꞈ tu la piˇ tuˬ yoˬ.—Yawˇbaˆ 14:15.

8. (a) Iˉsaˍyaˆ liꞈ 43:2 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ hkʼaˬ hkʼe ga laˇ tuˬ ve le? (b) Ngaˬ hui shoꞈ shaꞈ ve gʼa hpuˇ ve kʼo, bon lawˬ ve ngaˬ hui htaꞈ hkʼaˬ hkʼe ga laˇ gʼa ve le? (Shoꞈ shaꞈ ve gʼa hpuˇ htaˇ bon lawˬ ve ga laˇ gʼa ve VDO hkʼaw nyi sheˍ.)

⁸ Yaˬhoˉvaˬ ngaˬ hui htaꞈ hkʼaˬ htaˆ kaꞈ ga laˇ ve. Yaˬhoˉvaˬ lehˬ ngaˬ hui htaꞈ haꞈ ve Awˬ pa hpehꞈ ve yoˬ. Ngaˬ hui naˬ ve leh tuꞈ ve hkanˍ ve gʼa hpuˇ ve htaꞈ Yaˬhoˉvaˬ maˇ mawˬ gaˇ. (Iˉsaˍyaˆ 63:9) Yaꞈ hkʼaˇ, chi hkʼe gʼa hpuˇ ve htawˇ, ngaˬ hui tuꞈ ve hkanˍ ve maˇ gʼa hpuˇ tuˬ Gʼuiˬ sha haꞈ shaˉ laˇ ve maˇ heˆ. Liꞈ hpu hkʼaw kʼoˆ ve tuꞈ ve hkanˍ ve lehˬ, iˉ kaˆ lawˬ leh aˬ miˍ ha htaꞈ tehˆ taˍ ve yoˬ. (Iˉsaˍyaˆ 43:2 gʼaw sheˍ.) Yaꞈ hkʼaˇ, chi hkʼe gʼa hpuˇ ve htawˇ, Gʼuiˬ sha ngaˬ hui htaꞈ ka tiꞈ te laˇ ve shoꞈ shaꞈ ve chi teˇ hpaˍ htaꞈ “hpanˍ kʼai” gʼa tuˬ yawˇ ga laˇ tuˬ yoˬ. Tuꞈ ve hkanˍ ve ngaˬ hui hkanˍ maˇ gʼaˇ lawꞈ lawꞈ ve Gʼuiˬ sha maˇ hpuˇ tcuh laˇ taˬ. Ngaˬ hui yeunˇ hkanˍ gʼaˇ tuˬ, Yaˬhoˉvaˬ daꞈ kehˬ ve awˬ ha hpu htaꞈ cuˇ leh ga laˇ tuˬ yoˬ. (Luˉkaꞈ 11:13; Hpiˇliˇpiˆ 4:13) Hkʼe te leh, ngaˬ hui yonˍ gʼa ve, ngaˬ hui yeunˇ hkanˍ leh yawˇ htaꞈ ka tiꞈ yeˬ gʼa tuˬ ngaˬ hui loˍ ve awˬ ceuˬ yawˇ peꞈ laˇ tuˬ yoˬ.d

YAˬHOˉVAˬ NGAˬ HUI HTAꞈ Aˬ HTOꞈ MA TE TCUH GAˇ VE LE?

9. Yaˍkoˆ liꞈ 1:6, 7 hkʼaw Yaˬhoˉvaˬ ngaˬ hui htaꞈ ga laˇ tuˬ yoˬ tehꞈ yonˍ gʼa tuˬ hkʼaˬ hkʼe ga laˇ ve le?

⁹ Yaˬhoˉvaˬ ngaˬ hui yawˇ htaꞈ gʼaˇ va tcuh gaˇ ve. (Heˍbrehˇ 11:6) Teˇ pawˆ pawˆ ngaˬ hui shoꞈ shaꞈ ve gʼa hpuˇ jaˇ leh yeunˇ hkanˍ maˇ gʼaˇ˗o tehꞈ dawˇ ve yoˬ. Chi hkʼe ve awˬ yanˇ htaˇ, Yaˬhoˉvaˬ ngaˬ hui htaꞈ awˬ tehˬ ga laˇ tuˬ ve laˇ tehꞈ htawˇ dawˇ nawˬ dawˇ cawˬ ve yoˬ. Yaꞈ hkʼaˇ, Liꞈ hpu hkʼaw ngaˬ hui htaꞈ ka tiꞈ te taˍ laˇ ve, ngaˬ hui yeunˇ hkanˍ gʼaˇ tuˬ Yaˬhoˉvaˬ ngaˬ hui htaꞈ “awˬ gʼaˇ awˬ shaˉ” peꞈ laˇ tuˬ yoˬ. (Chiˇ mvuh ve 18:29) Chi htaꞈ pa taw, Yaˬhoˉvaˬ ngaˬ hui htaꞈ awˬ tehˬ ga laˇ tuˬ ve laˇ tehꞈ, ngaˬ hui htawˇ dawˇ nawˬ dawˇ cawˬ tuˬ maˇ loˍ. Ngaˬ hui bon lawˬ leh lawˬ taˍ ve hkʼe, Yaˬhoˉvaˬ hkʼawꞈ laˇ tuˬ yoˬ tehꞈ yonˍ sheˍ.—Yaˍkoˆ 1:6, 7 gʼaw sheˍ.

10. Ngaˬ hui bon lawˬ taˍ ve hkʼe hkʼaˬ hkʼe gʼaꞈ te gʼa tuˬ le? Tawˇ pa haˉ kʼoˆ maˍ laˇ sheˍ.

¹⁰ Yaˬhoˉvaˬ lehˬ ngaˬ hui bon lawˬ taˍ ve hkʼe gʼaꞈ te tcuh gaˇ ve. Tawˇ pa haˉ te kʼo, awˬ viˉ awˬ nyi hawˉ hkʼaˆ teˇ gʼaˇ hpawnˬ daꞈ lonˉ 3 nyi hkʼaw kʼai gaˇ ve pa taw, yawˇ kanˉ lawˬ jehˇ gʼa tuˬ Yaˬhoˉvaˬ ga laˇ tuˬ bon lawˬ ve yoˬ. Yaˬhoˉvaˬ yawˇ ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le? Awˬ viˉ awˬ nyi hawˉ hkʼaˆ chi ve teˇ gʼaˇ haꞈ hanˉ ve cawˬ tuˬ Yaˬhoˉvaˬ ga piˇ ve yoˬ. Yaꞈ hkʼaˇ, yawˇ lawˬ taˍ ve hkʼe yawˇ kaꞈ gʼa gʼaꞈ te ve yoˬ. Tawˇ pa haˉ te kʼo, yawˇ kanˉ jehˇ gʼa tuˬ paw leˍ geh laiˉ pawˆ lawˬ ve yoˬ. Hpawnˬ daꞈ lonˉ kʼai gʼa tuˬ yawˇ ve awˬ tan kanˉ te laˇ tuˬ awˬ nu ve chaw htaꞈ gʼa ca leh, ha pa hpfuhˇ hkʼa biˇ maˇ peꞈ laˇ ve htawˇ gʼa haꞈ yuˬ ve yoˬ.

11. Ngaˬ hui dawˇ haˍ ve awˬ lawn htaꞈ caˉ daꞈ ve aˬ htoꞈ ma te bon teˇ hkui teˇ hkui lawˬ cawˇ ve le?

¹¹ Ngaˬ hui dawˇ haˍ ve awˬ lawn Yaˬhoˉvaˬ yawˇ geh bon teˇ hkui teˇ hkui lawˬ tcuh gaˇ ve. (1 Hteˇsaˍlawˇniˆ 5:17) Teˇ pawˆ pawˆ kʼo, ngaˬ hui teˇ ceuˬ ceuˬ lawˬ ve htaꞈ Yaˬhoˉvaˬ laꞈ haˉ maˇ hkʼawꞈ laˇ ve tehꞈ, Yeˍsuˆ ve tawˇ hkawˇ ngaˬ hui shiˍ tuˬ te laˇ ve yoˬ. (Luˉkaꞈ 11:9) Chi htaꞈ pa taw, ngaˬ hui nyi ma awˬ tawˬ hkʼa gaˬ hkʼaˬ htaˆ kaꞈ bon gʼa lawˬ cawˇ ve yoˬ. (Luˉkaꞈ 18:1-7) Ngaˬ hui chi hkʼe te ve kʼo, ngaˬ hui awˬ tehˬ awˬ na lawˬ ve tehꞈ Yaˬhoˉvaˬ htaꞈ mawˬ tcuh gʼa leh, yawˇ ngaˬ hui htaꞈ ga laˇ gʼa ve tehꞈ yonˍ ve yoˬ.

Aˬ HTOꞈ MA TE TEˇ PAWˆ PAWˆ NGAˬ HUI VE BON LAWˬ HKAWˇ GʼA PA CAWˇ VE LE?

12. (a) Ngaˬ hui teˇ ceuˬ ceuˬ gʼa tuˬ bon lawˬ htaˇ aˬ htoꞈ ma ve na hkawˇ htaꞈ ngaˬ hui gʼa dawˇ nyi cawˇ ve le? Leh aˬ htoꞈ ma pa taw le? (b) Ngaˬ hui ve bon lawˬ hkawˇ Yaˬhoˉvaˬ htaꞈ yawˆ yan ve tehꞈ hpeuꞈ maw piˇ tuˬ hkʼaˬ hkʼe yonˍ gʼa ve le? (Awˇ ceˍ awˇ fa “Ngaˬ lawˬ ve awˬ ceuˬ Yaˬhoˉvaˬ htaꞈ yawˆ yan ve tehꞈ hpeuꞈ maw piˇ˗aw laˇ?” hkʼaw nyi sheˍ.)

¹² Yaˬhoˉvaˬ ngaˬ hui ve bon lawˬ hkawˇ htaꞈ maˇ hkʼawꞈ laˇ sheˍ ve kʼo, ngaˬ hui a shu yawˇ awˬ to htaꞈ na hkawˇ 3 maˬ na nyi cawˇ ve yoˬ. Awˉ lawˉ teˇ maˬ, ‘ngaˬ lawˬ ve cawˇ˗a laˇ?’ Ngaˬ hui awˬ pon aˬ htoꞈ ma daꞈ ve htaꞈ ngaˬ hui shiˍ ve tehꞈ dawˇ ve yoˬ. Yaꞈ hkʼaˇ, chi ngaˬ hui awˬ pon daꞈ ve maˇ heˆ. Shoꞈ shaꞈ ve teˇ ceuˬ ceuˬ htaꞈ caˉ daꞈ ve ngaˬ hui Yaˬhoˉvaˬ geh bon lawˬ ve kʼo, shoꞈ shaꞈ ve htaꞈ gu laˇ tuˬ ngaˬ hui yawˇ geh lawˬ ve yoˬ. Yaꞈ hkʼaˇ, ngaˬ hui ve shoꞈ shaꞈ ve htaꞈ gu laˇ tuˬ awˬ hkʼaˇ Gʼuiˬ sha shiˍ leh, ngaˬ hui loˍ ve awˬ ceuˬ yawˇ ve a loˍ htaꞈ maˇ hawˍ daꞈ ve yoˬ hehˉ. (1 Yoˇhanˬ 5:14) Tawˇ pa haˉ te kʼo, henˇ kʼai peuˬ˗oˬ ve awˬ pa awˬ e ve awˬ lawn htaꞈ teˇ geh kʼawꞈ dawˇ nyi sheˍ. Yawˇ hui ve yaˇ Yaˬhoˉvaˬ ve kanˉ te leh awˬ tehˬ ve hkʼaw kʼawꞈ chehˇ tuˬ Yaˬhoˉvaˬ ga laˇ tuˬ lawˬ ve yoˬ. Chi hkʼe lawˬ ve lehˬ nyi˗a kʼo, daꞈ ve yoˬ. Yaꞈ hkʼaˇ, Yaˬhoˉvaˬ yawˇ ve kanˉ te tuˬ chaw teˇ gʼaˇ htaꞈ kaꞈ maˇ nyiˉ piˇ ve tehꞈ ngaˬ hui shiˍ ve yoˬ. Yaˬhoˉvaˬ lehˬ ngaˬ hui teˇ gʼaˇ le le leh yaˇ ehˉ kaꞈ yawˇ ve kanˉ te tuˬ, a shu yawˇ hkʼaˇ yawˇ leuˆ yuˬ tcuh gaˇ ve yoˬ. (Bon maˍ ve 10:12, 13; 30:19, 20) Chi htaꞈ pa taw, awˬ pa awˬ e yaˇ Yaˬhoˉvaˬ ve kanˉ te leh yawˇ htaꞈ awˬ chawˇ te gaˇ tuˬ, yawˇ hui maˍ piˇ ve yaˇ nyi ma hkʼaw gaˬ tuˬ ve awˬ hkʼaˇ htaꞈ shiˍ tuˬ, yawˇ hui Yaˬhoˉvaˬ ga laˇ tuˬ bon lawˬ ve awˬ hkʼaˇ gʼa pa ve yoˬ.—Tawˇ naˉ ve 22:6; Eˇfeˇsuꞈ 6:4.

13. Heˍbrehˇ liꞈ 4:16 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ hkʼaˬ hkʼe htaˇ ga laˇ ve le? Tawˇ pa haˉ kʼoˆ maˍ laˇ sheˍ.

¹³ 2 maˬ teˇ maˬ lehˬ, ‘ngaˬ ve bon lawˬ hkawˇ Yaˬhoˉvaˬ chi teˇ hkui gʼa hkʼawꞈ laˇ cawˇ ve la?ˇ’ Yaˬhoˉvaˬ chi teˇ hkui gʼa hkʼawꞈ laˇ cawˇ ve tehꞈ ngaˬ hui dawˇ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ hkʼaˬ hkʼe htaˇ ga laˇ cawˇ ve tehꞈ shiˍ ve htaꞈ ngaˬ hui maˇ leunˇ cawˇ. (Heˍbrehˇ 4:16 gʼaw sheˍ.) Ngaˬ hui lawˬ taˍ ve hkʼe laꞈ haˉ maˇ gʼa ve kʼo, ‘maˇ gʼa’ sheˍ tehꞈ Yaˬhoˉvaˬ kʼoˆ laˇ chehˇ ve hkʼe hpehꞈ ve tehꞈ ngaˬ hui dawˇ ve yoˬ. Yaꞈ hkʼaˇ, ‘chi teˇ hkui maˇ heˆ’ tehꞈ yawˇ kʼoˆ laˇ chehˇ ve yoˬ. Tawˇ pa haˉ te kʼo, chi awˬ gʼuˇ suhˍ htaˇ awˬ viˉ awˬ nyi yaˇ nehˬ Yaˬhoˉvaˬ yawˇ htaꞈ gu na˗e laˇ tuˬ lawˬ ve htaꞈ teˇ geh nyi sheˍ. Yaˬhoˉvaˬ yawˇ htaꞈ gu na˗e piˇ ve kʼo, yawˇ Yaˬhoˉvaˬ ve kanˉ te ve lehˬ yawˇ naˬ ve htaꞈ gu na˗e laˇ tcuh gaˇ ve tehꞈ Saˍtanˍ kʼoˆ ve yoˬ. (Yawˇbaˆ 1:9-11; 2:4) Chi hkʼoˆ kaꞈ, naˬ ve gawˬ ve teˇ ceuˬ le le htaꞈ Yaˬhoˉvaˬ gu na˗e laˇ tuˬ yoˬ tehꞈ yawˇ tinˍ taˍ ve awˬ yanˇ htaꞈ ngaˬ hui shiˍ ve yoˬ. (Iˉsaˍyaˆ 33:24; Hpeuꞈ maˍ ve 21:3, 4) Oˇ ve teˇ yanˇ maˇ gaˬ sheˍ htaˇ yawˇ anˇ tuˬ te leh ngaˬ hui htaꞈ gu na˗e laˇ tuˬ tehꞈ maˇ dawˇ law. Chi htaꞈ pa taw, awˬ viˉ awˬ nyi yaˇ nehˬ chi ve yawˇ ve bon lawˬ hkawˇ kʼawꞈ pa ve yoˬ. Yawˇ Yaˬhoˉvaˬ ve kanˉ ka tiꞈ yeˬ ve hkʼaw te gʼa tuˬ, yawˇ nyi ma gawˬ lehˍ cawˬ leh naˬ chehˇ ve htaꞈ awˬ gʼaˇ cawˬ leh yeunˇ hkanˍ gʼaˇ tuˬ, Yaˬhoˉvaˬ ga laˇ tuˬ lawˬ ve yoˬ.—Chiˇ mvuh ve 29:11.

14. Ca˗ni ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁴ Ca˗ni ve awˬ lawn htaꞈ teˇ geh kʼawꞈ nyi sheˍ. Yawˇ Beˍteˍlaˆ hkʼaw kanˉ te gaˇ ve tehꞈ bon lawˬ ve yoˬ. Yaꞈ hkʼaˇ, Yaˬhoˉvaˬ hkʼawꞈ piˇ ve lehˬ, awˬ nu ve teˇ hkʼaˇ hpehꞈ ve yoˬ. 5 hkʼawꞈ peuˬ hkʼawꞈ nawˉ yawˇ kʼoˆ ve, “awˬ yanˇ oˇ ve hkʼaw Yaˬhoˉvaˬ ngaˬ htaꞈ laiˉ ceuˬ maˍ laˇ ve yoˬ. Tawˇ pa haˉ te kʼo, ngaˬ yawˇ htaꞈ gʼaˇ hkʼa dehꞈ va tuˬ, a shu yawˇ hkʼaˇ yawˇ Liꞈ hpu hkʼa dehꞈ henˇ leh, hkʼaˬ kaˬ lo chehˇ ve htawˇ Yaˬhoˉvaˬ ve kanˉ ha lehˬ ve hkʼaw te tuˬ, chi ve teˇ hpaˍ hpehꞈ ve yoˬ.” Awˬ yanˇ ponˬ kʼai htaˇ Ca˗ni leh yawˇ ve awˬ hpawˇ htaꞈ toˇ nyi shehˍ hpaˇ te tcuh ve yoˬ. Ca˗ni kʼawꞈ kʼoˆ ve, “Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve yoˬ. Ngaˬ dawˇ taˍ ve hkʼe maˇ heˆ ve htawˇ, chi ve htaꞈ na gʼa tuˬ awˬ yanˇ gʼa yehˇ ve yoˬ. Yaˬhoˉvaˬ ngaˬ htaꞈ haꞈ leh hkʼaˬ hkʼe taw dawˇ haˍ ve ngaˬ hui gʼa shiˍ htaˇ, ngaˬ ha lehˬ leh yawˇ htaꞈ awˬ bon uiˍ jaˇ ve yoˬ.”

15. Aˬ htoꞈ ma te ngaˬ hui bon lawˬ htaˇ laiˉ ceuˬ lawˬ cawˇ ve le? (Awˬ han htaꞈ nyi sheˍ.)

¹⁵ 3 maˬ teˇ maˬ lehˬ, ‘ngaˬ awˬ nu ve awˬ ceuˬ bon lawˬ cawˇ˗aw laˇ?’ Hteˇ˗ehˬ bon lawˬ ve lehˬ daꞈ ve awˬ hkʼaˇ hpehꞈ ve yoˬ. Yaꞈ hkʼaˇ, ngaˬ hui awˬ nu ve awˬ ceuˬ awˬ pon bon lawˬ ve kʼo, Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve tehꞈ ngaˬ hui shiˍ gʼa ve yoˬ. Awˬ viˉ awˬ nyi yaˇ miˇ haˉ Gʼuiˬ sha ve mvuhˇ miˬ hto toˇ ve liꞈ henˇ yehˬ lo kʼai gaˇ ve awˬ pon bon lawˬ ve htaꞈ teˇ geh nyi sheˍ. (SKE) Leh Liꞈ henˇ yehˬ chi ve hkʼaw yawˇ kʼai gaˇ ve lehˬ, hto toˇ ve chaw loˍ jaˇ kuiˬ lo yawˇ Gʼuiˬ sha ve kanˉ te gaˇ ve yoˬ. Chi htaꞈ pa taw, yawˇ liꞈ henˇ yehˬ chi ve hkʼaw gʼa kʼai tuˬ bon lawˬ htaˇ, yawˇ bon lawˬ ve hkʼaw kʼoˆ ve, yawˇ Gʼuiˬ sha ve kanˉ leuˉ leh te gʼa tuˬ Gʼuiˬ sha ga laˇ tuˬ bon lawˬ ve yoˬ. (Tcuh yaˇ 16:9, 10) Leh yawˇ bon lawˬ taˍ ve hkʼe gʼaꞈ te ve yoˬ. Tawˇ pa haˉ te kʼo, Hkriꞈ yaˇ awˬ moˍ maˇ vuiˇ maˇ neˇ kuiˬ lo gʼuˇ suhˍ peuˍ ve chaw loˍ ve hkʼaˬ kaˬ lo cawˬ ve le tehꞈ, toˇ nyi shehˍ hpaˇ htaꞈ na nyi piˇ ve yoˬ. Hkʼaˬ kaˬ lo hto toˇ ve chaw loˍ ve tehꞈ shiˍ tuˬ, yawˇ awˬ tcuhˆ puiˍ lo liꞈ bvuhꞈ feu piˇ ve yoˬ.e

16. Aˬ htoꞈ ma ve awˬ lawn htaꞈ ngaˬ hui yonˍ gʼa ve le?

¹⁶ Ngaˬ hui gʼa henˇ˗oˬ ve hkʼa shuˍ, Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ tuˬ yoˬ tehꞈ yonˍ gʼa ve yoˬ. Awˬ lawn kʼo, yawˇ ngaˬ hui htaꞈ haꞈ leh hteˇ jaˇ cawˇ jaˇ ve yoˬ. (Chiˇ mvuh ve 4:3; Iˉsaˍyaˆ 30:18) Yaꞈ hkʼaˇ, teˇ pawˆ pawˆ kʼo ngaˬ hui dawˇ taˍ ve hkʼe yawˇ maˇ hkʼawꞈ laˇ ve htawˇ, yawˇ ngaˬ hui ve bon lawˬ hkawˇ htaꞈ na leh awˬ tehˬ hkʼawꞈ laˇ tuˬ yoˬ. Awˬ lawn kʼo, yawˇ ngaˬ hui htaꞈ haꞈ jaˇ leh maˇ baˬ taˉ laˇ taˬ. (Chiˇ mvuh ve 9:10) Chi htaꞈ pa taw, ngaˬ hui nyi ma awˬ tawˬ hkʼa gaˬ bon lawˬ leh “hkʼaˬ htaˆ kaꞈ Gʼuiˬ sha htaꞈ gʼaˇ va˗o.”—Chiˇ mvuh ve 62:8.