Novembro

Akala muli anamabala mukami-enga a-iminyu kozeela vyowakula movwelana na tunga liwa. Hora dhinango, vamigumanoni ninofunjedhavo myasa milukulu yoonga nyarwa dhabanjani venango makalelo. Mbwenye vanooda kala ndima imbo-i venango mbili dhedho mwana dhinaode liye wakulavo thitho mukami-enga a-minyu vwechecha mwasiwa wa-anaode aliwa thonyiwa hora iliyothene inovenyati-a aliwa wono. Awandelamo vyevi vinooda akami-a ira ta-asukwalenga atu enango tathonyiwanga malo mwaaliwa. (1 Ti. 6:18) I-yo othene ninooda kozeela vyowakula vyeyvo vinalemeze Yohova thitho limbi-a Makristau afwi-u. (San. 25:11) Masiki ira hora dhinango ninooda onga mongwandela vyevyo viniireele nirambelenga onga maningi vyoonga vya i-yo. (San. 27:2; 2 Ak. 10:18) Malomwee nidhilimbi-edhenga thuulela maningi vyoonga Yohova, madhwee thitho atwee ninga gulu.—Apk. 4:11. w23.04 24-25 ¶17-18

Udhivela ngofuneya maningi ira nikale methove thitho nithuulelenga pama. (Mat. 22:37-39) Mdhiveliwana Nlungu unonikami-a ira nivilelenga nalabanga basa lolaleela angalive ira irana vyevi unooda nidhi-edhela nyarwa. (2 Ti. 1:7, 8) Namwasa odhiveliwana atu ta-anomlambela Yohova, ninolaleela vatelefonini venango lemba makarta. Kaninofooka namwasa oi ninodedi-edhela ira dambo n’nango, atu enela tanodha chinja noroma irana vyongo vyapama. (Zak. 18:27, 28) Dhiveliwana atu unothangani-avo dhiveliwana Makristau afwi-u. Ninothonyi-edha udhivelula “vodidili-ana thitho limbi-ana.” (1 At. 5:11) Mofwanafwana na anyakondo enao tanokami-ana va hora ya kondo, i-yo thitho ninolimbi-ana unango nafwee. Kaninodha sukwali-a abali naarongoli-u moira funa thitho aweli-edha yothakala. (1 At. 5:13, 15) Ninothonyi-edha udhivelula volemeza abali enao tanosogolela pingo.—1 At. 5:12 w23.06 10 ¶6; 11 ¶10-11

Ndhila imbo-i inalimbi-edhelena i-yo iroromelwi-u, kuthuulela modi-a vyoonga kuto. Kuto unonisikimizeli-a ira vyolanyedha vya Nlungu vinodha kwakwaneli-edhiwa. Nathuulelanga mwapolepole vyairi-idhe ira kuto uode veleliwa thitho thangani-avo vyongo vinango, ninoroma roromela maningi yolanyedha ya Nlungu yoi ninodha kaana ingumi yo-omala muilambo yapama vidha kwakwaneli-edhiwa. Mwasiwa ngwan’ni ninoonga e-no? N’nga vafuneelan’ni ira yoombolana iode veleliwa? Yohova atomtumiza Mwanee odhiveliwiwa oroma baliwa thitho fwee wavarima ira adhabaliwe ninga mutu olongomana vailamboi. Angali vailamboi Yesu atoovilela nyarwa dho-iyana i-yana. Vasogolovee atookwa mooni-iwa nyarwa. Veva Yohova atoopagali pereso yavadhulu maningi. Nlungwi-u waudhivela kaarumeli-e ira Mwanee arucheye nokwa ira nikaena ingumi yapama mbwenye ingali yokwivela. (Ju. 3:16; 1 Pe. 1:18, 19) Namwasa oi atoovelela pereso yavadhulu ee-ni Yohova unodha onechecha ira nidhakaena imgumi yo-omala muilambo ipya. w23.04 27 ¶8-9

N’nga Yohova unofunechecha dhavenyathi-a atu okwa? Kai vyoira fuka. Liye atoovudhelela atu angasi ira talembe yolanyedhayee Bibilyani yoi unodha venyathi-a atu okwa. (Esa. 26:19; Apk. 20:11-13) Yohova alanyedha, hora dhothene unokwakwaneli-edha vyolanyedhavyee. (Yos. 23:14) Thitho liye ngofunechecha dhavenyathi-a atu takwide. Kathuulelani vyaongile Yobo. Liye kaakaikela ira masiki akwe Yohova unodha mvenyathi-a. (Yob. 14:14, 15) Yohova ngofunechecha venyathi-a arumiwee othene enao takwide ira takaena manungo apama thitho osangalala. N’nga munoona a-vi vya atu Mabiliau enao takwide ta-anakaena ngari yofunjedha vyoonga Yohova? Nlungwi-u waudhivela ngofunechecha avenyathi-a. (May. 24:15) Liye unofuna ira tadhakaena ngari yodhakala afwee thitho yodhakala muilamboi modhowa nodhowa.—Ju. 3:16. w23.04 9 ¶5-6

N’nga munaire a-vi ira idedi-edho inyu ikale yakopolo? Mofwanafwani-a, akala munodedi-edhela ingumi yo-omala vailambo yavathila, muleringa nothuulela vyevyo vinoonga Bibilya vyokuza paradaizo. (Esa. 25:8; 32:16-18) Muthuulelenga mwemo ingumi munakalele aliwa vailambo yavathila. Mudhifwanafwani-edhenga ira muli muilambonimo. Nathuulelanga vya idedi-edho yi-u thitho vyailambo ipya, nyarwa dhi-u dhinongooneya ira: “Tahora yoyeva thitho dholuluva.” (2 Ak. 4:17) Idedi-edho iniva-idhe Yohova inodha nikami-a ira nivilelenga vyowesedha. Liye utovelela vyongo vyevyo vinanikami-e ira nifwanye kopolo. Ee-no akala ninofuna ira anikami-e ira nilabe phama urumiwi-u, nivilele vyowesedha venango nikaleve osangalala, ninofwanela lobela wa Yohova kumela vathi varima nosakasaka malangi-oee vofunjedha Bibilya vaokene. Nirumeli-enga ira abali naarongoli-u tanilimbi-e. Hora dhothene nithuulelenga vya idedi-edhwi-u. Naira ee-no ninodha wachela “kopolo dhilukulu namwasa wa kopolodhee [Nlungu] dhatitimi-o, ira niode vilela vyongo vyothene nokala oleva rima thitho aimwerumweru.”—Ako. 1:11. w23.10 17 ¶19-20

Nitokaana myasa injinji inoniiri-a msimba Yohova dhela mumalobelwi-u. Ninooda msimba Yohova namwasa wa vyongo vyapama vina i-yo thitho yotuva iliyothene yapama inokumela wa Yohova. (Yak. 1:17) Mofwanafwani-a, ninooda msimba namwasa wa ilambo yobaleyai na vyongo vinonisangalali-a vyevyo vinoona i-yo mwavyopanduchiwa. Ninooda msimba namwasa oniva-a ingumi, banja, afwi-u na idedi-edho. Thitho ninofuna msimba Yohova namwasa onirumeli-a kala osangalala na uxamwali wa pereso yavadhulu una i-yo na liye. Ninofwanela dhilimbi-edha maningi ira nithuulelenga myasa dhedho dhinoniiri-a ira nimsimbenga Yohova. Atu anjinji amuilamboi mbo-osimba. Hora dhinjinji anothuulela vinofuna aliwa baa-i a-kala vinaire aliwa ira tathonyi-edhe simba vile vina aliwa. Natukulelanga mathuulelo enala vyo-arelavovyee pyoi malobelwi-u anooda kalanga ovepa baa-i. Ira vyevi vya-aniireele ninofwanela dhilimbi-edha kaana rima osimba vyongo vyothene vinoniirela Yohova.—Luk. 6:45. w23.05 4 ¶8-9

Liye ngu Babi-u waudhivela thitho kanosangalala aniona nirucheyanga. (Esa. 63:9) Mbwenye liye kanonibarela mu nyarwa dhothene dhinogumanana i-yo, dhedho dhili ninga mi-inje venango lumi la mulo. (Esa. 43:2) Angalive ira vili ee-no, liye unonilanyedha ira unodha nikami-a “vira,” venango vilela vyongo ninga vyevi. Liye kanodha rumeli-a ira nyarwa dhiniimwanani-e dhowanave kala ororomeleya wa liye. Yohova unoniva-a thitho zimumwee ochena wenuo uli wakopolo ira unikami-e vilela. (Luk. 11:13; Afl. 4:13) Ee-no, kaninokaikela ira ninodha kaana vyongo vyothene vinofuneela i-yo ira nivilele thitho kaleve ororomeleya wa liye. Yohova unodedi-edhela ira nim’nyidelenga. (Aeb. 11:6) Hora dhinango nyarwa dhi-u dhinooda oneyanga ninga dhilukulu moi kaninaode vilela. Venango ninooda kaikelanga akala Yohova unonikami-a. Bibilya linonisikimizeli-a ira, na kopolo dha Nlungu, “ninooda gwela chi-i.” (Sal. 18:29) Malo mokaikelanga, ninofwanela lobelanga na iroromelo yothene ira avwe malobelwi-u.—Yak. 1:6, 7. w23.11 22 ¶8-9

Madhu enala anoonga movweya pama maningi vyokuza udhivela! Anoonga makundo okuza atu othelana oi tanooda dhivelangana maningi. Atu othelana anofwanela kaangana thindhi ira tadhivelanenga vaingumi yiwa yothene. Mofwanafwani-a, mulo unooda dhowanave i-nda akala unothethedhiwa. Wa-athethedhiwenga unooda tima mombaranya. Mofwanafwana na vyevi, udhivela unooda dhowanave kala olimba akala tanodhowanave ulimbi-a. Hora dhinango atu othelana anooda roma ona ira udhiveliwa utoyeva, simbwasimbwa tagumanangana nyarwa dha fuma, marenda venango izo yosamalela a-ima. Ira atu othelana ta-atimi-e “mulo wa Ya” othene lombwana na i-yana anofwanela dhilimbi-edha limbi-a uxamwaliwa na Yohova. w23.05 20-21 ¶1-3

N’nga ninofwanela iran’ni ira nikale olimba rima? Anamabali-u anooda nilimbi-a ira nikale olimba rima, mbwenye kai kalelo lobaliwana. Funjedha limba rima uli ninga funjedha dodoliso n’nangolee. Ndhila imbo-i inonikami-a funjedha dodoliso n’nango, kuonechecha vinoira mulimbo nifunji-a nom’sazi-edhanga. Mofwanafwana na vyevi, ninofunjedha kala olimba rima voonechecha mwemo atu enango munothonyi-edhela aliwa kaleloli, noasazi-edhangaMofwanafwana na Danieli, ninofwanela aidhiwa pama Madhu a Nlungu thitho ninofwanela dhilimbi-edha ira nikale vauxamwali wapama na Yohova volobela wa liye mothathuwa hora dhothene. Ninofwanela m’roromelanga maningi Yohova thitho kanikaikelenga ira uli uikhundu yi-u. Naira e-no iroromelo yi-u yawesedhiwa ninodha kala olimba rima. Mutu olimba rima unoiri-a ira atu enango tamulemezenga. Unooda kami-a thitho atu amathuulelo apama ira tafunjedhe vyoonga Yohova. Onga imbarimbari, nitokaana myasa dhovweya dhokalela olimba rima. w23.08 2 ¶2; 4 ¶8-9

Madhu Aigiriki enao tathapuleliwile ira “sikimizela,” ano-indi-edhiwa basa voonga ndhila yeniyo atu ino-indi-edhela aliwa basa vofula mafero apereso yavadhulu. Ee-no ninofwanela wesedha vyongo vinovwa i-yo venango leri ira nisikimizele akala pyaimbarimbari. Vinodha kala vyofuneya maningi wa i-yo vevo nyarwa ilukulu vanokwivela aliwa. Malo mororomelanga vilivyothene, nino-indi-edha basa dodoliso li-u lothuulela ira nifwanafwani-edhe na vileri i-yo venango uvwa na vyevyo Bibilya thitho gulu la Yohova vinoonga aliwa. Nairangana vyevi, kaninodha nami-iwa na vyonama vya viwanda. (San. 14:15; 1 Ti. 4:1) Ninga gulu, arumiwi a Nlungu tanodha vulumuwa vanyarwa ilukulu. Mbwenye uliothene vaekene kanoidhiwa vya bebe-i. (Yak. 4:14) Akala ninodha kaana ingumi vahoriyo venango ninodha kala ningakwide, ninodha va-iwa yotuva ya ingumi yo-omala akala ninokalave ororomeleya. Dhoweni othene nithuulelenga maningi vya idedi-edho yi-u yosangalali-a thitho dhowanave kozeela dambo la Yohova! w23.06 13 ¶15-16

Kaninoidhiwa maulosi enango a Bibilyani munofuna aliwa dha kwakwaneli-edheliwa. (Dan. 12:8, 9) Mbwenye akala kaninovwechecha ulosi unangwee munofuna aliwa dha kwakwaneli-edheliwa kavinothapulela ira kavinodha kwakwaneli-edhiwa. Nam’nyindelanga Yohova unodha niwandela mwemo munakwakwaneli-edheliwe aliwa vahoree yofwanelela ninga mwemo mwairele liye ndulimu. Atu anodha lengeza ira “pwaseya na rendele.” (1 At. 5:3) Ee-no maguverno ailamboi anodha wukela mareligiau onama noanongelatu. (Apk. 17:16, 17) Vasogolovee anodha wukela atu a Nlungu. (Zak. 38:18, 19) Vyevi vinodha iri-a ira kondo ya Arumagedo iromeye. (Apk. 16:14, 16) Kaninokaikela ira vyevi vinodha ireya vachineneeva. Ee-no va-eni dhoweni nidhowenanive m’simba Babi-u wa dhulu vokaana thindhi na maulosi a Bibilyani thitho kami-a atu enango ira tairengana vyevi. w23.08 13 ¶19-20

Vevo rumiwi Paulo vaonga liye vya iroromelo, idedi-edho na udhivela, atoomari-a na madhu oonga ira “ilukulu va vyothene vyevi ndi udhivela.” (1 Ak. 13:13) Mwasiwa ngwan’ni atoonga e-no? Namwasa oi sogolou kaninodha funeela roromela vyolanyedha vya Nlungu vyokuza ilambo yavathi ipya, venango kaana idedi-edho yoi vyolanyedhavyo vinodha kwakwaneli-edhiwa namwasa oi vinodhakala ira vitomala kwakwaneli-edhiwa wale. Mbwenye hora dhothene ninodha funeela m’dhiveliwangana Yohova thitho atu. Udhivela unongodhowanave ulukula modhowa nodhowa. Udhivela ndiizindiyelo ya Makristau aimbarimbari. Yesu atoawandela anamafunjedhee ira: “Othene anodha idhiwa ira muli anamafunjedhanga akala munodhivelana.” (Ju. 13:35) Thitho udhivela unokami-a ira nidhivelanenga. Paulo atoonga ira “udhivela, unovwelani-a atu mwakopolo maningi kwaranya yongo iliyothene.” (Ako. 3:14) Rumiwi Juwau atoawandela Makristau afwee ira: “Mutu unodhiveliwana Nlungu adhiveliwengana thitho abalee.” (1 Ju. 4:21) Nadhivelangana ninothonyi-edha ira ninom’dhiveliwana Nlungu. w23.11 8 ¶1, 3

Bibilya linofwanafwani-a ingumi ya Makristu na pikisano otamanga. Atu enao anoganyali vapikisano anowachela yotuva ya ingumi yo-omala. (2 Ti. 4:7, 8) Ninofwanela ira yongo iliyothene inaode i-yo ira nidhowenave tamanga namwasa oi kwaranya wale nlilothene, ee-ni nili komoni wa pikisanula. Rumiwi Paulo atoniwandela ira “niungule vyonyemela vilivyothene . . . ira niode tamanga movilela va pikisano uni-elele atula.” N’nga Paulo athapulela ira kavali yongo iliyothene Makristau inofwanela aliwa tukula? Kabe, kaathapulela e-no. Malomwee athapulela ira ninofwanela tatila yongo iliyothene yo-ofuneya. Vyongo vyevyo vinaniimwanani-e tamanga pama thitho vinaniiri-e i-yo kala ochenyela. Ira nivilele, mombaranya ninofwanela zindiyela thitho tatila yongo iliyothene yo-ofwanelela yeniyo inaniiri-e nyemeliwa. Mbwenye vahora inoira i-yo vyevyo kaninofwanela tatila vyongo vyofuneya tukula namwasa oi naira ee-no vinooda niiri-a ira na-akale ofwanelela va pikisanula.—2 Ti. 2:5 w23.08 26 ¶1-2

Kala ololela unonikami-a ira nilemezenga mathuulelo aatu enango. Mwaifwanafwani-o, arongoli-u enango anodhiveliwana dhibalei-a, voi enango katinodhiveliwana dhibalei-a. Makristau enango tanokala osangalala tamwa vang’ono vyolezeli-a, voi enango tanosakula ira ta-amwe navang’onove. Makristau othene tanofuna kaana manungo apama mbwenye tanosakula vyongo mo-iyana vamwasa osamalela manungwiwa. Akala ninoona ira visakunle i-yo vamwasa unangwee pyapama maningi no limbi-anga Makristau afwi-u ira tairenga vyevyo, ninooda sukwali-a atu enango thitho gawani-a pingo. Mwaifwanafwani-o malo modhi-elela malamulo vamwasa wa vyevyo vinofwanela i-yo wara, Yohova unoniva-a makundo oi naa-arelenga. Ninofwanela wara mofwanelela ninga arumiwi a Nlungu, vothonyi-edha ira nili othuulela pama, odhiyevi-a thitho “azelu.” (1 Ti. 2:9, 10) Kaninoiri-a atu enango ira tathuulelenga vya i-yo namwasa wa moda uwarile i-yo. Makundo a Bibilyani anokami-a thitho andimuwa avapingoni ira kati-ele malamulwiwa vamwasa wa vyowara thitho moda odhibalei-a. w23.07 23-24 ¶13-14

Yohova utonikami-a idhiwa vyevyo vinaire i-yo ira nikaena sogolo lapama. Atu anorumela itaniwa na “i-yana opupwa” anokalelave thuulelanga “vyotapila,” venango nionge ira vyosangalali-a vinafwanye aliwa namwasa oirana vyongo vyamararuo. Vyo-arelavovyee pyoi anodha malela “masiyeni modhowa nodhowa.” (San. 9:13, 17, 18) Vyevi pyo-iyana na vinoireela atu anorumela itaniwa na “zelu ya imbarimbari”! Va-eeni ninofunjedha dhiveliwana vyongo vinodhiveliwana Yohova thitho idanana vyongo vinoidanana Yohova. (Sal. 97:10) Ninokala osangalala voandela atu enango ira tasangalalenga na “zelu ya imbarimbari.” Vinokala ninga “nigwenle vakumani duzi na vandhe noitana ira: ‘Mutu uliwethene o-oidhiwa vyongo adhe wuno.’ Kaiira i-yo thitho atu tarumenle itaniwa ninofwanya maraeli-o va-eeni baa-i. Mbwenye ninodha fwanya maraeli-o sogolou thitho ninodha kaana “ingumi” yodhowa nodhowa vevo vanofuna i-yo “wendanga modhongowa mundhila yovwechecha vyongo.”—San. 9:3, 4, 6. w23.06 24 ¶17-18

N’nga munovivwa a-vi fwinyu wa basani venango wa xikolani aufukangani vinororomela nyo? N’nga munoova? Anjinji a-iyo ninoova. Mbwenye yofuka inanifuke liye inooda nikami-a idhiwa mwemo munothuulela liye venango vinororomela liye thitho vinooda niva-a ngari yoi niwandele atu enango milanyu yaphama. Mbwenye hora dhinango mutu unooda fuka yofuka na ifunelo yoi nikangane. Vyevi kavinofwanela nidabwi-a namwasa oi atu enango tavwide vyongo vyodaweya vyokuza vinororomela i-yo. (May. 28:22) Wenjedhela vevo ninokala “mumalambo omari-a” atu anjinji “katinofuna vwelana naafwiwa” thitho “mboopi-a (2 Ti. 3:1, 3) Venango munooda dhifuka ira, ‘N’nga ndinakale a-vi okurudheya na oriya rima mutu mwinango afunanga kangana na miyo va mwasa wa vyevyo vinororomela miyo?’ Kala opwaseya unodha ukami-ani. Mutu opwaseya, kanothakaleliwa mombaranya mbwenye unodhikondi-a atu enango tam’thomanga thitho akala kaidhi vinofuna liye wakula. w23.09 14 ¶1-2

Hora dhinango ninowachela malangi-o enao anonivunela uvyongo ninga dhiveliwana kobiri thitho vyongo vinango vinodha niiri-a dodomi-a malamulo a Nlungu. Veva thitho vyongo vinango vinooda niwendhela phama namwasa o-arela malangi-o enao anoniva-a Yohova. (Esa. 48:17, 18; 1 Ti. 6:9, 10) Mo-okaikela, Yohova unodhowanave indi-edha basa atu ira taniva-e malangi-o vanyarwa ilukulu thitho fiyedha muhora ya vyawa 1.000. Dhoweni nidhowenave a-rela malangi-o. Vyevi vinodha kala vyo-orucha akala va-eeni nino-arela malangi-o a Yohova. Ee-no, dhoweni hora dhothene ni-arelenga malangi-o a Yohova tangani-avo enao anova-iwa i-yo dhela mwaalombwana enao asakunle liye ira tanisogolelenga. (Esa. 32:1, 2; Aeb. 13:17) Naira ee-no, ninokaana myasa yaphama yororomelela Yohova, wenuo unonisogolela, unonikami-a ira nirambelenga vyongo vyevyo vinododomi-a uxamwali-u na liye, fiyedha ilambo ipya inofuna i-yo dhawachela ingumi yo-omala. w24.02 25 ¶17-18

Rumiwi Paulo anoosangalala vomlambela Yohova, mbwenye anoogumanana nyarwa dhinjinji. Hora dhinjinji liye anoowenda maulendo mandandai mandandai thitho hora yeniyo kavyali vyokweya irana vyevi. Vamaulendweyala, hora dhinjinji anoogumanana “vyoopi-a vyama-injeni” thitho “mapanga ndhila.” Hora dhinango atu oruni-a tanom’mwirela vyauwalanga. (2 Ak. 11:23-27) Mbwenye kai hora dhotene vevo Makristau afwee vyathonyi-edha aliwa ira tanoosimba thindhilee lofuna akami-a. (2 Ak. 10:10; Afl. 4:15) N’nga chini yamkami-idhe Paulo ira adhowenganave mlambela Yohova? Liye atoofunjedha vyongo vinjinji vyoonga makalelo a Yohova malembani thitho vavyongo vyevyo vyam’mwireele. Paulo kaakaikela ira Yohova Nlungu unomdhiveliwana. (Aro. 8:38, 39; Aef. 2:4, 5) Naliyene thitho atooroma mdiveliwana maningi Yohova. Paulo atothonyi-edha ira anomdhiveliwana maningi Yohova “volabela ochena thitho dhowanave mlambela.”—Aeb. 6:10. w23.07 9 ¶5-6.

Atu anjinji anorumela ira maguverno mbofuneya, mbwenye ninofwanela vwela enango mwamalamulo enao “anamatonga aandimuwa andimuwa anovelela aliwa.”Mbwenye atwao katinofuna vwela lamulo la-anodhivelawana aliwa venango linoona aliwa ira kai lolongomana. Ifwanafwani-o ndi vyevyo atu vinoira aliwa vamwasa opagali misoko. Va vyosakasaka vinango vyaireile uilambo ya Europa, atu anjinji. Bibilya linoonga ira maguverno aatu mbanoromi-a nyarwa, ali mandhani mwa Satana, thitho anodha nongiwa vo-ondembuwava. (Sal. 110:5, 6; Nam. 8:9; Luk. 4:5, 6) Linoonga thitho ira mutu uliwethene “unoruni-ana na utongi, unoruni-ana thitho na masaka-edho a Nlungu.” Va-eeni, Yohova utorumeli-a ira maguverno tatongenga na ifunelo yoi va-akale vyododomi-a thitho unodedi-edhela ira naavwelenga. Ee-no ninofuneela velela “waothene vinofuna aliwa,” vyevyo vinothangani-avo misoko, lemezo thitho avwela. (Aro. 13:1-7) Ninooda onanga lamulo n’nango ninga lo-ofwanelela, lo-olongomana venango lorucha livwela. Mbwenye ninovwela anamatongala namwasa oi Yohova unoniwandela ira niirenga e-no akala malamulwao katino-iyana na vyevyo vinofuna liye.—May. 5:29. w23.10 8 ¶9-1

Samisoni abaliwile vahora yatonga Afilisiti thitho anyingalela Aisraeli. (Ana. 13:1) Utongi wauwalangula watoiri-a ira Aisraeli tarucheye maningi. Yohova atom’sakula Samisoni ira “adhakale vasogolo vovulumucha Aisraeli mandhani mwa Afilisiti.” (Ana. 13:5) Ira aode laba basali Samisoni afuneela m’nyindela Yohova. Vahora inango gulu laanyakondo a Afilisiti latodha ira lidham-inde Samisoni. Vinooneya ira wewo wali wu Yuda. Atu awu Yuda tatoova thitho tatothuulela vyom’velela Samisoni wa amwidanao. Ee-no atu azizalee tatom’manga na migo-i minli yolimba maningi nom’velela wa Afilisiti. (Ana. 15:9-13) Mbwenye “zimu wa Yohova watoroma i-nda basa” wa Samisoni thitho atopadha migo-iyo. Vasogolovee “atofwanya likuva lithithi la sabwada dha bulu walombwana” thitho atolidoda noli-indi-edha basa vopha Afilisiti okwakwana 1.000!—Ana. 15:14-16. w23.09 2 ¶3-4

Yohova unooda i-ndi-edha basa ndhila dho-iyana i-yana vofuna “kwakwaneli-edha ifunelwee thitho hora dhothene unoiri-a ira ifunelwee ikwakwaneli-edhiwe.” (San. 16:4) Mbwenye vyo-arelavo va vyevyo vinoira liye, vinokalavo dhowa nodhowa. N’nga ifunelo ya Yohova choi a-vi? N’nga uchinjile vyongo viivi ira aikwakwaneli-edhe? Nlungu atoowandela atu oroma vya ifunelo yana liye. Liye afuna ira “tabalane, tainjive, tadhali-e ilambo yavathi noiing’anela, thitho taing’anele . . . yopanduchiwa iliyothene” vailambo yavathi. (Mar. 1:28) Adamu na Eva tangam’dawele Yohova thitho iri-a ira atu othene takale odawa, ifunelo ya Nlungu chaaimwananeile. Mbwenye achinjile ndhila yokwakwaneli-edhela. Vahora yeniyo Yohova atokaathei-a Umwene dhulu ira akwakwaneli-edhe ifunelwee yokuza ilambo thitho atu.—Mat. 25:34. w23.10 20 ¶6-7

Yohova unooda nikami-a ira nidhowenave m’labela. Vyevi vinooda kala vyorucha simbwa simbwa akala ninogumanana nyarwa inangwee vahora yolapela. Hora dhinango nyarwa dhonolimbanana i-yodho dhinooda kala dhorucha kwaranya vyaguman’nena rumiwi Pedru. Mbwenye Yohova unooda niva-a kopolo ira na-afooke. (Sal. 94:18, 19) Mofwanafwani-a, bali mwinango a-anafunjedhe imbarimbari anoogonana na alombwana afwee wa vyawa vinjinji. Mbwenye liye atoochinja no-iyachi kalelo lothakalali. Angalive e-no hora dhinango unolimbananave rima ofuna irana vyongo vyothakala. N’nga chini im’kami-idhe ira a-afooke? Baluo atoonga ira: “Yohova unondiva-a kopolo.” Atoowenjedhela onga ira: “Mokami-iwa na zimu wa Yohova . . . , nditofunjedha ira pyoodeya dhowanave wenda mundhila ya imbarimbari, . . . Yohova ukanle andi-indi-edhanga basa. Thitho angalive ira ndinodawi-a vyongo vinango liye unodhowanave ndiva-a kopolo.” w23.09 23 ¶12

Abali aazombwe, munofwanela dhilimbi-edhanga ira mukhale olimba mwauzimu. Munofwanela sakhula abali aphama oi musazi-edhenga ifwanafwani-o yiwa, khala othuulela pama, khala onyindeleya, funjedha madodoliso anaukhami-eni sogolo thitho khozeela vizo vinyu vya sogolo. Venango hora dhinango munoona ira pyorucha a-rela vyongo vyothene vinofwanela nyo irana. Mbwenye muthuulelenga ira pyoodeya vikwakwaneli-edha. Muthuulelenga ira Yohova ngokozeya ukami-ani. (Esa. 41:10, 13) Abali naarongola apingoni mwinyu anodha ukhami-ani. Mwadha ulukhula nokhala Kristau olimba mwauzimu, ingumi inyu inodha khala yaphama na yosangalala. Nyo azombwe, ninoudhiveliwanani maningi! Yohova auraeli-eni vevo vanodhilimbi-edha nyo ira mukhale olimba mwauzimu. w23.12 29 ¶19-20

Muthuulelenga makalelo aphama ana abali naarongola, a-kala vyongo vinodawi-a aliwa. Nifwanafwani-e ira muli vambo-i naabali naarongola. Munaawaredha mosangalala. Mutokoma mafoto menli venango mafoto mararu ovela ira enango anodha ta-akume phama. Ee-no mutokaana mafoto mararu. Venango foto inango baluo kaatheile phama. nyo munoifudha namwasa oi mutokaana mafoto menli enao takumile phama. Vatokala vyongo vinjinji vyaphama vinothuulela i-yo vyevyo vyairile i-yo na abali naarongoli-u. N’nga a-vi akala bali venango rongola utoonga venango irana vyongo mo-othuulela atu enango? N’nga ninofwanela iran’ni? Ndi phama fudhamo mathuuleloni mwi-u ninga mwemo mwairile i-yo na mafotwale. (Aef. 4:32) Ninooda kumi-amo vyevi mathuuleloni mwi-u namwasa oi vatokala vyongo vyapama vyokuza abali-uao vyevyo vinavithuulelenga i-yo. Vyongo vyapamavyo, piyevyo vinofwanela i-yo vilokotanga mathuuleloni mwi-u. w23.11 12-13 ¶16-17

Madhu Aigiriki a-indi-edheliwe basa valembali, anothonyi-edha ira vyowara vya Makristau aa-iyana vinofwanela khala vya lemezo thitho vyothonyi-edha ira anothuulela atu enango. Ninosimba maningi arongoli-u Aikrisatau namwasa oi anodhilimbi-edha wara mwalemezo. Zindiyela ndi khalelo n’nango arongola olimba mwauzimu linothonyi-edha aliwa. N’nga zindiyela chini? Zindiyela unothapulela odanga i-yani-a vari va vyongo vyofwanelela na vyo-ofwanelela amala sakhula irangana vyongo vyofwanelelavyo. Ifwanafwani-o vamwasula nja Abigayeli. Man’nee atoosakhula vyongo modaweya vyevyo vyairi-e ira banja liwa lothene ligumanena nyarwa. Abigayeli atoiravo yongo mombaranya voi zindiyelawee watoovulumucha atu anjinji. (1 Sa. 25:14-23, 32-35) Zindiyela unonikami-a idhiwa hora yofwanelela onga na hora yo-ofwanelela onga. Zindiyela thitho unonikhami-a ira nithonyi-edhenga ifunelo waatu enango a-khala ava-anga maonelo odaweya.—1 At. 4:11. w23.12 20 ¶8-9

Rumiwi Paulo atoolembela Makristau awu Roma madhu enala. Abali naarongola awu Roma tali tangafunjedhile wale vya Yohova na Yesu, aliwa tatokaana iroromelo thitho tali tangali Makristau. Ee-no Nlungu “atoaona ira mbolongomana namwasa okaana iroromelo,” thitho atoazoza na zimu ochena. (Aro. 5:1) Aliwa tali tangana idedi-edho yaphama maningi. Vasogolovee Paulo atoolembela Makristau ozoziwa awu Efeso vya idedi-edho yava-iwile aliwa na Nlungu. Idedi-edhwiyo inothangani-avo “vyongo vilanyedhile liye waochena.” (Aef. 1:18) Vyalembele liye Makristau awu Akolose, Paulo atoathonyi-edha thitho wafuna aliwa dhawachela vyadedi-edhela aliwavyo. Liye aongile ira “nitokaana idedi-edho yodhawachela vyongo vinilokotedhele Nlungu dhulu.” (Ako. 1:4, 5) Ee-no idedi-edho yama Kristau ozoziwa choi tanodha venyathi-iwa nodhowa mawachela ingumi yo-omala dhulu, unofuna aliwa dhatonganga vambo-i na Kristu.—1 At. 4:13-17; Apk. 20:6. w23.12 9 ¶4-5

Lembanle latoonga thitho ira rendele wa Nlungu “unodha barela miriminyu na mathuulelwinyu.” Madhu athapuleliwile ira “unodha barela,” anoonga vya anyakhondo enao taing’anela sidadi ira amwidaniwa ta-avolowe. Atu a sidadinimo tanoogona mwarendele voidhiwa ira anyakhondo tanaaing’anela va lango. Rendele wa Nlungu wa barela mirimi-u na mathuulelwi-u, ninokala o-otekenyeya voidhiwa ira nili obareleya. (Sal. 4:8) Mofwanafwana na Hana, ninooda kaana rendele wa rimani masiki ira vyongovyo kavichinjile muhora yeniyo. (1 Sa. 1:16-18) Nakala o-otekenyeya, hora dhinjinji vinokala vyo-orucha ira nithuulelenga pama thitho nisakulenga vyongo mwazelu. Vyongo vinofwanela i-yo irana. Mwapingeya maningi na nyarwa, muitanenga anyakhondo ira taubareleni. N’nga munaviire a-vi vyevyo? Mulobelenga fiyedha mungavivwide ira mutokaana rendele wa Nlungu. (Luk. 11:9; 1 At. 5:17) Mwagumanangana nyarwa, muvilimbi-edhenga lobela, mwaira e-no munodha ona ira rendele wa Yohova unaabarela riminyu na mathuulelwinyu.—Aro. 12:12. w24.01 21 ¶5-6

Ira acheni-e dhina la Babee, Yesu atoodhowanave oni-iwa nyarwa, nyoziwa thitho ongeliwa vyonama vyokuza liye. Liye anoidhiwa ira ali angam’vwenle Babee mu vyongo vyothene thitho kavali mwasa oi akaena manyadho. (Aeb. 12:2) Anoidhiwa thitho ira Satana ngwenuo airi-a vyongo vyothene vyagumanana liye vahora yoruchila. (Luk. 22:2-4; 23:33, 34) Satana ali ofunechecha ira am’muimanani-e Yesu kala ororomeleya, mbwenye atoimwanana mova-a manyadho. Veva Yesu atoothonyi-edha ira Satana ngonama thitho ira Yohova utokaana arumiwee ororomeleya enao anodhowanave m’lambela mororomeleya angalive ira anogumanana vyowesedha vilukulu. N’nga nyo muli ofunechecha m’sangalali-a Yesu Kristu ninga Mweninyu? Akala ndi e-no, dhowananive titimi-a dhina la Yohova thitho mukami-enga atu enango ira taidhiwe makalelo ana liye. Mwairangana vyevi munom’sazi-edha Yesu. (1 Pe. 2:21) Molandana na Yesu, munodha m’sangalali-a Yohova thitho thonyi-edha ira Satana wenuo uli mwindanee wa Nlungu, ngonama maningi! w24.02 11-12 ¶11-13

Vyawa 5 vivirilevi, atu okwaranya milyau imbo-i tatobadiziwa nokala Amboni dha Yohova. Mutu avivelela wa Yohova, unosakula kala namafunjedha wa Yesu Kristu thitho unoona ira irana ifunelo ya Nlungu kofuneya maningi vaingumiyee. N’nga vivelela unothangani-avo n’ni? Yesu aongile ira: “Akala mutu unofuna ndi-arela, avikonde ekene.” (Mat. 16:24) Madhu Aigiriki athapuleliwe ira, “vikonda wekene” anooda ongiwa thitho ira “vikondi-a irana yongo inangwee.” Ninga rumiwi ovivelela wa Yohova, ninofwanela vikondi-a ira na-aire yongo iliyothene ya-anom’sangalali-a Yohova. (2 Ak. 5:14, 15) Vyongo vyevi vinothangani-avo “mabasa amanungo” ninga mararuo. (Agl. 5:19-21; 1 Ak. 6:18) N’nga vikondi-a vyongo ninga vyevi korucha? Kabe, simbwasimbwa akala ninom’dhiveliwana Yohova kaninokaikela ira vwela malamulwee unonikami-a ira vyongo viniwendelenga pama.—Sal. 119:97; Esa. 48:17, 18. w24.03 2 ¶1; 3 ¶4

Yohova unovelela zimu ochena wa atu enao anoasangalalana liye. (Mat. 12:18) Nidhifukenga ira: “N’nga miyo ndinothonyi-edha makalelo oi ngu zimu wa Nlungu unondikami-a ira ndaakaena? N’nga va-eeni munoona ira muli oleva rima maningi mwafwanafwani-edha na hora yali nyo mwa-anafunjedhe vyoonga Yohova? Imbarimbari choi mwathonyi-edhanga maningi makalelo oi ngu zimu ochena uukami-idheni ira mwaakaena, paevo thitho vanoona nyo umboni othonyi-edha ira Nlungu unosangalala na nyo. Yohova uno-indi-edha basa kuto ira akami-e atu enao anosangalala na liye. (1 Ti. 2:5, 6) N’nga a-vi akala rimi-u unoruni-ave vyoi Yohova unosangalala na i-yo angalive ira ninororomela kuto thitho nitomala badiziwa? Nithuulelengani ira kai hora dhothene inaroromelenga i-yo rimi-u, mbwenye niroromelenga maningi Yohova. Liye unoona ira atu anororomela kuto mbolongomana thitho unowalanyedha ira unodha araeli-a.—Sal. 5:12; Aro. 3:26. w24.03 30 ¶15; 31 ¶17